O‘zbekistonning ijobiy imiji, turistik salohiyati va investitsiyaviy jozibadorligini oshirish, mamlakat aeroportlari va aviakompaniyalarini dunyo jamoatchiligiga tanitish maqsadida Vazirlar Mahkamasi qaror qiladi:

1. Belgilansinki:

2022-yil 1-maydan boshlab O‘zbekiston Respublikasidagi xalqaro aeroportlarda aviaspotting — belgilangan tartibga asosan aeroportlarda havo kemalari harakatini hamda parvozini kuzatish, shuningdek ularni professional va havaskorlar (aviaspotterlar) tomonidan foto, video tasvirga olishni amalga oshirish yo‘lga qo‘yiladi;

respublikadagi barcha xalqaro aeroportlar hududida ularning boshqaruv shaklidan qat’i nazar, shuningdek, ularga tutash hududlarda parvozlar xavfsizligi talablari, Xalqaro fuqaro aviatsiyasi tashkiloti (IKAO) tavsiyalari va ilg‘or xorijiy tajriba hisobga olingan holda, aviaspotting mashg‘ulotlari uchun ixtisoslashtirilgan joylar (keyingi o‘rinlarda — kuzatish maydonchalari) bosqichma-bosqich ajratiladi;

kuzatish maydonchalariga, shu jumladan, ular joylashgan joylarga nisbatan talablar “Uzbekistan Airports” AJ takliflari asosida O‘zbekiston Respublikasi Turizm va sport vazirligi va Transport vazirligi tomonidan tasdiqlanadi;

2022-yil 1-maydan boshlab xorijiy aviaspotterlar jalb qilingan holda, mahalliy havaskorlar va professional aviaspotterlar uchun har choraklik mavsumiy tanlovlar, shuningdek, har yilgi tanlovlar ta’sis etiladi hamda tashkil qilinadi;

xalqaro aeroportlar hududida kuzatish maydonchalarini tashkil qilish va jihozlash ishlari aeroportlarning o‘z moliyaviy resurslari, shuningdek, qonunchilik hujjatlarida taqiqlanmagan boshqa mablag‘lar, ularga tutash hududlarda esa — xususiy sektor jalb qilingan holda mahalliy budjetlar mablag‘lari, shuningdek, qonunchilik hujjatlarida taqiqlanmagan boshqa mablag‘lar hisobidan amalga oshiriladi.

2. O‘zbekiston Respublikasi Transport vazirligi Turizm va sport vazirligi, Ichki ishlar vazirligi hamda “Uzbekistan Airports” AJ bilan birgalikda kuzatish maydonchalari va ular joylashgan joylarga nisbatan quyidagilarni nazarda tutuvchi talablarni bir oy muddatda tasdiqlasin:

aviaspotterlarni kuzatish maydonchalariga kiritish va ular tomonidan aeroportlar ichki tartibiga rioya etilishi reglamentini tasdiqlash;

o‘ta muhim reyslar parvozlari vaqtida kuzatish maydonchalariga kiritishni kelishish;

videokuzatuv tizimini tashkil qilish va unga xalqaro aeroportlar aviatsiya xavfsizligi xizmatini ulash.

3. Qoraqalpog‘iston Respublikasi Vazirlar Kengashi, Andijon, Buxoro, Qashqadaryo, Navoiy, Namangan, Samarqand, Surxondaryo, Farg‘ona, Xorazm viloyatlari va Toshkent shahar hokimliklari:

2022-yil 1-fevralga qadar “Uzbekistan Airports” AJ bilan birgalikda aviaspotting bilan shug‘ullanish uchun kuzatish maydonchalarini va tegishli infratuzilmani tashkil qilish maqsadida xalqaro aeroportlarga tutash hududlarni belgilasin;

2022-yil 1-mayga qadar xorijiy tajribani o‘rgangan holda, xalqaro aeroportlarga tutash hududlarda kuzatish maydonchalarining to‘liq faoliyat ko‘rsatishini ta’minlasin va ularni zarur infratuzilma (kirish yo‘li, avtoturargoh, sanuzel, umumiy ovqatlanish joylari, videokuzatuv tizimi va boshqalar) bilan jihozlasin.

4. O‘zbekiston Respublikasi Transport vazirligi:

ushbu qarorning 1-bandida ko‘rsatilgan tanlovlarni mazkur qaror talablari inobatga olingan holda o‘tkazish reglamentini ikki oy muddatda ishlab chiqib tasdiqlasin;

“Uzbekistan Airports” AJ, Fuqaro aviatsiyasi agentligi, “O‘zaeronavigatsiya markazi” DUK bilan birgalikda 2022-yil 1-mayga qadar birinchi bosqichda Islom Karimov nomidagi “Toshkent” xalqaro aeroporti va “Samarqand” xalqaro aeroportida, 2022-yil 1-iyuldan boshlab — qolgan barcha xalqaro aeroportlar hududida aviaspotting bilan shug‘ullanish uchun kuzatish maydonchalarining to‘liq faoliyat ko‘rsatishini ta’minlasin;

“Uzbekistan Airports” AJ, O‘zbekiston Respublikasi Mudofaa vazirligi, Toshkent shahar hokimligi bilan birgalikda ikki oy muddatda O‘zbekiston milliy aviatsiya muzeyini tashkil qilish bo‘yicha Vazirlar Mahkamasiga taklif kiritsin;

“Uzbekistan Airports” AJ bilan birgalikda mahalliy aviaspotterlar uchun mahorat saboqlari o‘tkazish, shuningdek, ushbu sohani yanada rivojlantirish maqsadida ularning tavsiyalari va takliflarini olish uchun taniqli aviaspotterlarni doimiy asosda jalb qilinishini ta’minlasin;

aeroportlarda ta’lim muassasalari o‘quvchilari va talabalari uchun ochiq eshiklar kunlarining muntazam o‘tkazilishini ta’minlasin.

5. O‘zbekiston Respublikasi Turizm va sport vazirligi Transport vazirligi, “Uzbekistan Airports” AJ va “Uzbekistan Airways” AJ bilan birgalikda aviaspotting bo‘yicha fotosuratlarni mashhur onlayn platformalarda (“Gettylmages”, “Flickr”, “Shutterstock.com”, “Depositphotos.com” va boshqalarda) joylashtirish choralarini ko‘rsin.

6. O‘zbekiston Respublikasi Transport vazirligi Turizm va sport vazirligi hamda “Uzbekistan Airports” AJ bilan birgalikda parvozlar ko‘p amalga oshiriladigan, aviaspotting va aviaspotterlar uchun zarur shart-sharoitlar yaratilgan dunyodagi yirik aeroportlar faoliyati muntazam o‘rganilishini ta’minlasin, shuningdek, o‘rganish natijalari bo‘yicha ushbu faoliyatni O‘zbekiston Respublikasida rivojlantirib borish yuzasidan zarur choralar ko‘rsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — turizm va sport vaziri A.A. Abduxakimov va O‘zbekiston Respublikasi transport vaziri I.R. Mahkamov zimmasiga yuklansin.