Oʻzbekiston Respublikasi Prezidentining “Kosmik tadqiqotlarni tashkil etishni takomillashtirish toʻgʻrisida” 2002-yil 26-sentabrdagi PF-3135-son Farmoniga muvofiq va axborot-kommunikatsiya texnologiyalari vositalarini mamlakatimizning oʻzida ishlab chiqarish uchun shart-sharoitlar yaratish maqsadida Vazirlar Mahkamasi qaror qiladi:

1. “KOINOT” ochiq aksiyadorlik jamiyati ustav fondidagi aksiyalarning davlat ulushini boshqarish Oʻzbekiston aloqa va axborotlashtirish agentligiga berilsin.

2. Oʻzbekiston aloqa va axborotlashtirish agentligi bir oy muddatda 2002—2010-yillarda kompyuterlashtirish va axborot-kommunikatsiya texnologiyalarini rivojlantirishning tasdiqlangan dasturini amalga oshirish uchun “Granit” ilmiy-ishlab chiqarish korxonasi va “KOINOT” ochiq aksiyadorlik jamiyatining mavjud ishlab chiqarish quvvatlaridan ushbu quvvatlarda axborot-kommunikatsiya texnologiyalari vositalarini mamlakatimizning oʻzida ishlab chiqarishni tashkil etish yoʻli bilan foydalanish yuzasidan kompleks chora-tadbirlarni ishlab chiqsin va qabul qilsin.

3. Vazirlar Mahkamasining “Oʻzbekiston pochta va telekommunikatsiyalar agentligi faoliyatini tashkil etish toʻgʻrisida” 1997-yil 31-iyuldagi 380-son qaroriga 1-ilovaning II boʻlimiga “Granit” ilmiy-ishlab chiqarish korxonasi soʻzlari, IV boʻlimiga “KOINOT” soʻzlari qoʻshilsin xamda 1a-ilovaga ham ana shunday qoʻshimchalar kiritilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N.Oripov zimmasiga yuklansin.