Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili” da amalga oshirishga oid davlat dasturi toʻgʻrisida” 2021-yil 3-fevraldagi PF-6155-son Farmoniga muvofiq hamda avtomobil transporti sohasida energiya tejamkorligiga erishish, ekologik xavfsizlikni tubdan yaxshilash, elektr quvvati bilan harakatlanadigan transport vositalaridan foydalanishni ommalashtirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili” da amalga oshirishga oid davlat dasturi toʻgʻrisida” 2021-yil 3-fevraldagi PF-6155-son Farmonida quyidagilar:

avtomobil yoʻllarida yoʻl-transport hodisalarining oldini olish hamda oʻlim holatlarini, jumladan, piyodalar oʻtish joylarining zamonaviy svetoforlar bilan taʼminlanganlik darajasini bosqichma-bosqich oshirish orqali qisqartirish;

notariuslar tomonidan avtomototransport vositasini boshqa shaxsga berish toʻgʻrisidagi shartnomani “yagona darcha” tamoyili asosida rasmiylashtirish nazarda tutilganligi maʼlumot uchun qabul qilinsin.

2. Belgilansinki:

notariuslar tomonidan avtomototransport vositasini boshqa shaxsga berish toʻgʻrisidagi shartnomani rasmiylashtirish davomida murojaat qiluvchi taraflar tomonidan avtomototransport vositasi agregatlar raqamlarining roʻyxatdan oʻtkazish raqamlariga muvofiqligi yuzasidan koʻzdan kechiriladi va bu haqda shartnomada aks ettiriladi;

notariuslar tomonidan avtotransport vositasini boshqa shaxsga berish toʻgʻrisidagi shartnomalar bilan bogʻliq maʼlumotlar davlat yoʻl harakati xavfsizligi xizmatining elektron maʼlumotlar bazasiga “yagona darcha” tamoyili asosida avtomatik ravishda yuboriladi;

elektr quvvati bilan harakatlanadigan, elektrdvigatelining quvvati 4 kVt va undan ortiq yoki soatiga 40 va undan yuqori tezlikka ega boʻlgan avtomototransport vositalari (keyingi oʻrinlarda — elektromobil) uchun alohida farqlovchi roʻyxatdan oʻtkazish davlat raqami belgilari joriy etiladi.

3. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

4. Oʻzbekiston Respublikasi Ichki ishlar vazirligi:

2021-yil 1-oktabrdan boshlab elektromobillar uchun alohida farqlovchi roʻyxatdan oʻtkazish davlat raqami belgilari bilan taʼminlash choralarini koʻrsin;

2021-yil 1-noyabrga qadar elektromobillar uchun rasmiylashtirilgan roʻyxatdan oʻtkazish davlat raqami belgilari qonunchilik hujjatlarida belgilangan toʻlov va yigʻimlar undirilmasdan almashtirib berilsin. Bunda elektromobil egasi auksion savdolari orqali yutib olingan va oshirilgan toʻlov stavkasidagi roʻyxatdan oʻtkazish davlat raqami belgilari mos ravishda elektromobillar uchun alohida farqlovchi roʻyxatdan oʻtkazish davlat raqami belgilariga almashtirib berilishini taʼminlansin.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

Oʻzbekiston Respublikasi Transport vazirligi huzuridagi Avtomobil yoʻllari qoʻmitasi va Ichki ishlar vazirligi bilan birgalikda uch oy muddatda avtomobil yoʻllarida piyodalar ishtirokidagi oʻlim holatlari bilan bogʻliq yoʻl-transport hodisalarining oldini olish maqsadida aholi yashash punktlaridagi piyodalar oʻtish joylarini oʻrganib chiqsin va svetofor qurilmalarini oʻrnatish mumkin boʻlgan joylarni aniqlasin;

oʻrganish natijalari boʻyicha yillik dasturlarga tegishli oʻzgartirishlar kiritsin va piyodalar oʻtish joylariga ilgʻor xorijiy tajribaga asoslangan holda zamonaviy svetofor qurilmalarini bosqichma-bosqich oʻrnatsin.

6. Oʻzbekiston Respublikasi Ichki ishlar vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda mazkur qarorga muvofiqlashtirsin.

7. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.

1. Vazirlar Mahkamasining 2006-yil 7-martdagi 38-son qarori (Oʻzbekiston Respublikasi QT, 2006-y., 3-son, 17-modda) bilan tasdiqlangan Avtomototransport vositalari bilan bogʻliq bitimlarni rasmiylashtirish tartibi toʻgʻrisidagi nizomda:

7-band quyidagi tahrirda bayon etilsin:

“7. Notariuslar tomonidan avtomototransport vositalari bilan bogʻliq bitimlarni tasdiqlash hamda rasmiy dilerlar tomonidan “TRADE-IN” dasturi boʻyicha ilgari foydalanilgan avtotransport vositalarining oldi-sotdi shartnomasini rasmiylashtirish boshqa shaxsga berish taqiqlanmaganligi va xatlab qoʻyilmaganligi tekshirilgandan keyin amalga oshiriladi, tasarruf etish huquqisiz ishonchnomalar bundan mustasno.

Notariuslar tomonidan avtomototransport vositasini boshqa shaxsga berish toʻgʻrisidagi shartnomani rasmiylashtirish davomida murojaat qiluvchilar tomonidan avtomototransport vositalari agregatlar raqamlarining roʻyxatdan oʻtkazish raqamlariga muvofiqligi yuzasidan koʻzdan kechiriladi va bu haqda shartnomada aks ettiriladi.

Rasmiy dilerlar tomonidan “TRADE-IN” dasturi boʻyicha ilgari foydalanilgan avtotransport vositalarining oldi-sotdi shartnomasini rasmiylashtirishga qadar avtomototransport vositalari sotib oluvchining tanloviga koʻra, xohlagan DYHXX organlarida agregatlar raqamlari roʻyxatdan oʻtkazish raqamlariga muvofiqligi yuzasidan koʻzdan kechirilishi lozim. Bunda agregatlar raqamlarining roʻyxatdan oʻtkazish raqamlariga muvofiqligi yuzasidan maʼlumotnoma taqdim etiladi va ushbu maʼlumotnoma koʻzdan kechirgan mansabdor shaxsning familiyasi, ismi va otasi ismining bosh harflari, koʻzdan kechirilgan sana koʻrsatilgan va mansabdor shaxs imzosi qoʻyilgan holda shtamp bilan tasdiqlanadi. Shtamp 10 kun mobaynida amal qiladi.

Avtomototransport vositasi koʻzdan kechirilganligi uchun toʻlov undirilmaydi”;

11-bandga:

quyidagi mazmundagi ikkinchi xatboshi qoʻshilsin:

“Notariuslar tomonidan avtotransport vositasini boshqa shaxsga berish toʻgʻrisidagi shartnomalar bilan bogʻliq maʼlumotlar DYHXXning elektron maʼlumotlar bazasiga “yagona darcha” tamoyili asosida avtomatik ravishda yuboriladi”.

ikkinchi va uchinchi xatboshilar tegishlicha uchinchi va toʻrtinchi xatboshilar deb hisoblansin.

2. Vazirlar Mahkamasining 2007-yil 27-iyundagi 131-son qarori (Oʻzbekiston Respublikasi QHT, 2007-y., 25-26-son, 264-modda) bilan tasdiqlangan avtomototransport vositalari va ularning tirkamalariga beriladigan roʻyxatdan oʻtkazish davlat raqami belgilarining tiplarida:

a) I¹ tipdagi roʻyxatdan oʻtkazish davlat raqamining grafik tasviridan keyin quyidagi mazmundagi xatboshilar va grafik tasvir qoʻshilsin:

“IE tip — roʻyxatdan oʻtkazish davlat raqami belgilari yuridik shaxslarning elektromobillariga beriladi.

Roʻyxatdan oʻtkazish davlat raqami belgilarining foni oq rangda, chetki qismi, raqam va harflari qora rangda. Chap tomonda hududning kodi qora rangda va uning foni yashil rangda, oʻng tomonda Oʻzbekiston Respublikasi bayrogʻi va “UZ” harflari.

b) III tipdagi roʻyxatdan oʻtkazish davlat raqamining grafik tasviridan keyin quyidagi mazmundagi xatboshilar va grafik tasvir qoʻshilsin:

“IIIE tip — roʻyxatdan oʻtkazish davlat raqami belgilari jismoniy shaxslarning elektromobillariga beriladi.

Roʻyxatdan oʻtkazish davlat raqami belgilarining foni oq rangda, chetki qismi, raqam va harflari qora rangda. Chap tomonda hududning kodi qora rangda va uning foni yashil rangda, oʻng tomonda Oʻzbekiston Respublikasi bayrogʻi va “UZ” harflari.

v) XI tipdagi roʻyxatdan oʻtkazish davlat raqamining grafik tasviridan keyin quyidagi mazmundagi xatboshilar va grafik tasvir qoʻshilsin:

“XIE tip — mototransport vositalari (mototsikllar, motorolerlar, elektroskuterlar) uchun ikki qatorli roʻyxatdan oʻtkazish davlat raqami belgilari.

Roʻyxatdan oʻtkazish davlat raqami belgilarining foni oq rangda, chetki qismi, raqami va harflari qora rangda. Oʻng burchagining yuqori tomonida hududning kodi qora rangda va uning foni yashil rangda, quyi tomonida Oʻzbekiston Respublikasi bayrogʻi va “UZ” harflari.

Raqamli bitta belgi beriladi (orqa tomonda mahkamlash uchun) ”;

g) IA¹ roʻyxatdan oʻtkazish davlat raqamining grafik tasviridan keyin quyidagi mazmundagi xatboshilar va grafik tasvir qoʻshilsin:

“IAE tip — ikki qatorli roʻyxatdan oʻtkazish davlat raqami belgilari orqa tomonga yoki old va orqa tomonga mahkamlash uchun yuridik shaxslarning mahkamlash joyi IE tipdagi roʻyxatdan oʻtkazish davlat raqami gabaritlariga muvofiq boʻlmagan yengil elektromobillarga beriladi.

Roʻyxatdan oʻtkazish davlat raqami belgilarining foni oq rangda, chetki qismi, raqami va harflari qora rangda. Oʻng tomonda quyida hududning kodi qora rangda va uning foni yashil rangda, Oʻzbekiston Respublikasi bayrogʻi va “UZ” harflari.

d) IIIA tipdagi roʻyxatdan oʻtkazish davlat raqamining grafik tasviridan keyin quyidagi mazmundagi xatboshilar va grafik tasvir qoʻshilsin:

“IIIAE tip — ikki qatorli roʻyxatdan oʻtkazish davlat raqami belgilari elektr yurgizgichli yuk avtomobillar va avtobuslarga, shuningdek jismoniy shaxslarning mahkamlash joyi III tipdagi roʻyxatdan oʻtkazish davlat raqami gabaritlariga muvofiq boʻlmagan yengil elektromobillarga orqa tomonga yoki old va orqa tomonga mahkamlash uchun beriladi.

Roʻyxatdan oʻtkazish davlat raqami belgilarining foni oq rangda, chetki qismi, raqami va harflari qora rangda. Oʻng tomonda quyida hududning kodi qora rangda va uning foni yashil rangda, Oʻzbekiston Respublikasi bayrogʻi va “UZ” harflari.

3. Vazirlar Mahkamasining “Avtomototransport vositalarini davlat roʻyxatidan oʻtkazish va ularga roʻyxatdan oʻtkazish davlat raqami belgilarini berish tartibini takomillashtirish toʻgʻrisida” 2017-yil 31-avgustdagi 683-son qarorida (Oʻzbekiston Respublikasi QT, 2017-y., 8-son, 191-modda):

a) 1-ilovada:

7-band quyidagi tahrida bayon etilsin:

“7. Avtomototransport vositasining boshqa shaxsga oʻtkazilishi haqidagi bitimlar notarius tomonidan tasdiqlanishi davomida avtomototransport vositasining raqam agregatlari va boshqa texnik parametrlarning roʻyxatdan oʻtkazish maʼlumotlariga mos kelishi yuzasidan murojaat qiluvchilar tomonidan tekshiriladi va bu haqida shartnomada aks ettiriladi.

Rasmiy dilerlar tomonidan “TRADE-IN” dasturi boʻyicha ilgari foydalanilgan avtotransport vositalarining oldi-sotdi shartnomasini rasmiylashtirishdan oldin avtomototransport vositasi raqam agregatlari va boshqa texnik parametrlarning roʻyxatdan oʻtkazish maʼlumotlarga mos kelishi yuzasidan tekshirilishi uchun sotib oluvchining tanloviga koʻra hoxlagan hududiy DYHXX organlariga taqdim etilishi zarur.

Bunda avtomototransport vositasini koʻrikdan oʻtkazish natijalari boʻyicha koʻrikdan oʻtkazish maʼlumotlari hududiy YHXDX organi xodimlari tomonidan beriladigan maʼlumotnomaga koʻrikdan oʻtkazgan mansabdor shaxsning familiyasi, ismi va otasining ismi, koʻrikdan oʻtkazish sanasi koʻrsatilgan holda va mansabdor shaxsning imzosi bilan belgilangan namunadagi shtamp bosilishi yoʻli bilan qayd qilinadi. Shtamp oʻn kalendar kun mobaynida haqiqiy hisoblanadi”;

8-bandga quyidagi mazmundagi ikkinchi xatboshi qoʻshilsin:

“Bunda avtomototransport vositasini boshqa shaxsga berish toʻgʻrisidagi shartnomani “yagona darcha” tamoyili asosida rasmiylashtirish maqsadida notariuslar tomonidan avtomototransport vositasini boshqa shaxsga berish toʻgʻrisidagi bitimlar tasdiqlanishida avtomototransport vositasini roʻyxatdan oʻtkazish hujjatlaridagi maʼlumotlar YHXDX organlarining olib qochilgan va oʻgʻirlangan avtomototransport vositalari boʻyicha maʼlumotlar bazasi bilan integratsiya qilish orqali taqqoslanadi”;

14-bandda:

birinchi xatboshidagi “roʻyxatga olingan joylarida” soʻzlari chiqarib tashlansin;

quyidagi mazmundagi ikkinchi xatboshi qoʻshilsin:

“Bunda roʻyxatdan oʻtkazish avtomototransport vositasi egasining doimiy yashash joyi boʻyicha roʻyxatga olingan hududidan qatʼi nazar, har bir hududda avtomototransport vositalarini davlat roʻyxatidan oʻtkazish va ularga davlat raqami belgilarini berish uchun masʼul etib belgilangan hududiy DYHXX organlarida ham amalga oshirilishi mumkin”;

ikkinchi — toʻrtinchi xatboshilari tegishlicha uchinchi — beshinchi xatboshilar deb hisoblansin;

16-bandda:

oltinchi xatboshi chiqarib tashlansin;

yettinchi — oʻninchi xatboshilar tegishlicha oltinchi — toʻqqizinchi xatboshilar deb hisoblansin;

23-bandga quyidagi mazmundagi ikkinchi xatboshi qoʻshilsin:

“Davlat roʻyxatidan oʻtkazilgan avtomototransport vositalarining ROʻDRB va avtomototransport vositasini davlat roʻyxatidan oʻtkazganlik toʻgʻrisidagi guvohnomalar egalariga ularning shaxsini identifikatsiya qilish (barmoq izlarini skaner qilish va boshqalar) yoʻli bilan topshiriladi va elektron qayd etiladi”;

ikkinchi xatboshi uchinchi xatboshi deb hisoblansin;

24-bandning beshinchi xatboshi chiqarib tashlansin;

26-bandda:

oltinchi xatboshidagi “I va IA tipli” soʻzlari “I, IA yoki IE, IAE tipli” soʻzlari bilan almashtirilsin;

yettinchi xatboshidagi “III va IIIA tipli” soʻzlari “III, IIIA yoki IIIE, IIIAYE tipli” soʻzlari bilan almashtirilsin;

34-bandda:

toʻrtinchi xatboshi chiqarib tashlansin;

beshinchi va oltinchi xatboshilar tegishlicha toʻrtinchi va beshinchi xatboshilar deb hisoblansin;

36-bandda:

oltinchi xatboshi chiqarib tashlansin;

yettinchi xatboshi oltinchi xatboshi deb hisoblansin;

43-bandda:

beshinchi xatboshi chiqarib tashlansin;

oltinchi va yettinchi xatboshilar tegishli ravishda beshinchi va oltinchi xatboshilar deb hisoblansin;

44-bandda:

beshinchi xatboshi chiqaribtashlansin;

oltinchi xatboshi beshinchi xatboshi deb hisoblansin;

53-bandda:

toʻrtinchi xatboshi chiqarib tashlansin;

beshinchi xatboshi toʻrtinchi xatboshi deb hisoblansin;

oltinchi xatboshi chiqarib tashlansin;

b) 2-ilovada:

3-bandning uchinchi xatboshidagi “I, Ia, III, IIIa tipdagi” soʻzlari “I, IA, IE, IAYE, III, IIIA, IIIE, IIIAYE tipdagi” soʻzlari bilan almashtirilsin;

3¹-banddagi “I, IA, III, IIIA tipidagi” soʻzlari “I, IA, IE, IAYE, III, IIIA, IIIE, IIIAYE tipidagi” soʻzlari bilan almashtirilsin;

2-ilovaning nomlanishi quyidagi tahrirda bayon etilsin:

“Oshirilgan toʻlov stavkalari boʻyicha beriladigan I, IA, IE, IAE, III, IIIA, IIIE, IIIAE tipidagi avtotransport vositalari uchun roʻyxatdan oʻtkazish davlat raqami belgilarining roʻyxati”.

4. Vazirlar Mahkamasining 2020-yil 18-noyabrdagi 726-son qarori (Oʻzbekiston Respublikasi QT, 2020-y., 11-son, 257-modda) bilan tasdiqlangan Notariuslar tomonidan avtomototransport vositalarini boshqa shaxsga oʻtkazish haqidagi bitimlarni tasdiqlashning maʼmuriy reglamentining 20-bandi quyidagi tahrirda bayon etilsin:

“20. Notarius tomonidan bitimni tasdiqlash davomida murojaat qiluvchilar tomonidan avtomototransport vositalari agregatlar raqamlari roʻyxatdan oʻtkazish raqamlariga muvofiqligi yuzasidan koʻzdan kechiriladi va bu haqida bitimda aks ettiriladi”.