Oʻzbekiston Respublikasi Prezidentining “Oʻzbekiston Respublikasi Istiqbolni belgilash va statistika davlat qoʻmitasini Oʻzbekiston Respublikasi Makroiqtisodiyot va statistika vazirligiga oʻzgartirish toʻgʻrisida” 1997-yil 15-maydagi PF—1780-son Farmonidan kelib chiqadigan vazifalarni bajarish hamda Makroiqtisodiyot va statistika vazirligi va Vazirlar Mahkamasining Axborot-tahlil boshqarmasi tomonidan amalga oshiriladigan analitik va prognoz ishlanmalarni ilmiy-uslubiy taʼminlash maqsadida Vazirlar Mahkamasi qaror qiladi:

1. Quyidagilar Makroiqtisodiy va ijtimoiy tadqiqotlar institutining asosiy vazifalari etib belgilansin:

makroiqtisodiy boshqarishning monetar usullari va mexanizmlarini tadqiq qilish;

bozor islohotlarini amalga oshirish sharoitlarida respublikani ijtimoiy-iqtisodiy rivojlantirish omillari va tendensiyalarini tahlil qilish;

milliy hisoblar tizimidan foydalangan holda mamlakat iqtisodiyotini rivojlantirishning koʻp variantli makroiqtisodiy modellarini ishlab chiqish;

respublikaning xalqaro mehnat taqsimotidagi oʻrnini belgilaydigan oʻziga xos shart-sharoitlar va omillarni hisobga olgan holda iqtisodiyotning maqbul tuzilmasini bosqichma-bosqich shakllantirish boʻyicha asoslangan takliflar ishlab chiqish;

respublikaning barqaror iqtisodiy oʻsishi, jahon iqtisodiy hamjamiyatiga integratsiyalashuvi omillarini tadqiq qilish;

tabiiy va mineral xomashyo resurslaridan, ishlab chiqarish potensialidan foydalanishni tahlil qilish;

respublika mintaqalarini kompleks rivojlantirish dasturlarini ishlab chiqishni metodologik va uslubiy taʼminlash;

iqtisodiyot tarmoqlari va sektorlarida iqtisodiy konʼyunktura hamda amaliy faollik monitoringini oʻtkazish;

demografik jarayonlarni, ijtimoiy rivojlanish va aholi farovonligi darajasini, mehnat resurslarini ish bilan taʼminlash muammolarini tadqiq qilish.

2. Makroiqtisodiy va ijtimoiy tadqiqotlar instituti tuzilmasi 1 va 1a-ilovalarga muvofiq tasdiqlansin.

3. Belgilansinki:

Makroiqtisodiy va ijtimoiy tadqiqotlar instituti oʻz faoliyati toʻgʻrisida Makroiqtisodiyot va statistika vazirligiga hisob beradi va Makroiqtisodiyot va statistika vazirligi hamda Vazirlar Mahkamasining Axborot-tahlil boshqarmasi buyurtmalari asosida ilmiy-tadqiqotlar oʻtkazishga ajratiladigan budjet mablagʻlari, grantlar, shuningdek shartnoma asosida boshqa buyurtmachilar mablagʻlari hisobiga faoliyat koʻrsatadi;

institutga ilmiy xodimlar qabul qilish tanlov asosida, tegishli ilmiy-tadqiqot ishlarini bajarish yuzasidan yakka tartibda kontraktlar tuzgan holda amalga oshiriladi.

4. Makroiqtisodiyot va statistika vazirligi:

ikki hafta muddatda Makroiqtisodiy va ijtimoiy tadqiqotlar instituti toʻgʻrisidagi nizomni tasdiqlasin;

bir oy muddatda institut xodimlarini attestatsiyadan oʻtkazsin;

institutni zarur axborot bazasi bilan taʼminlasin, uni statistik axborotlar yuboriladigan tashkilotlar reyestriga kiritsin, xorijiy mamlakatlar va xalqaro tashkilotlardan keladigan ilmiy-uslubiy hamda analitik materiallarni tanishib chiqish va ekspertizadan oʻtkazish uchun joʻnatsin.

5. Makroiqtisodiy va ijtimoiy tadqiqotlar instituti direktoriga, Oʻzbekiston Respublikasi Makroiqtisodiyot va statistika vazirligi bilan kelishgan holda, institut tuzilmasiga belgilangan xodimlar soni va mehnatga haq toʻlash fondi doirasida oʻzgartirishlar kiritish huquqi berilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B. S. Hamidov zimmasiga yuklansin.

Direktor

Direktorning fan boʻyicha oʻrinbosari

Kompleks makroiqtisodiy tahlil va prognozlar boʻlimi

Makroiqtisodiy boshqarish monetar usullari shuʼbasi

Valyuta va tashqi iqtisodiy munosabatlar shuʼbasi

Iqtisodmetrik modellarni ishlab chiqish boʻlimi

Tarmoqlararo balansni ishlab chiqish guruhi

Iqtisodiyotni tarkibiy qayta oʻzgartirishlar dasturlarini shakllantirish boʻlimi

Iqtisodiyot sektorlarida amaliy faollik konʼyunkturasi boʻlimi

Direktorning fan boʻyicha oʻrinbosari

Demografiya va mehnat resurslari boʻlimi

Aholi turmush darajasi boʻlimi

Ijtimoiy infratuzilmani rivojlantirish boʻlimi

Mintaqalarni kompleks rivojlantirish boʻlimi

Tabiatdan oqilona foydalanish va Orolboʻyini rivojlantirish guruhi

Transport va kommunikatsiyalar tizimlari boʻlimi

Iqtisodiyotning barqarorligi muammolari boʻlimi

Ilmiy kotib xizmati

Buxgalteriya

Kadrlar va maxsus ishlar boʻlimi

Maʼmuriy-xoʻjalik boʻlimi