Aholini ijtimoiy muhofaza qilish tizimini yanada takomillashtirish, pensiya taʼminoti uchun majburiy badallarning toʻliq kelib tushishi hamda davlat ijtimoiy sugʻurtasi boʻyicha pensiya va nafaqalarni toʻlashga xarajatlarni oʻz vaqtida moliyaviy taʼminlash uchun ijtimoiy taʼminot organlarining masʼuliyatini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasi huzuridagi Ijtimoiy sugʻurta jamgʻarmasi negizida Oʻzbekiston Respublikasi Ijtimoiy taʼminot vazirligi huzurida Qoraqalpogʻiston Respublikasi Ijtimoiy taʼminot vazirligi va ijtimoiy taʼminot mahalliy organlari qoshida tegishli hududiy boʻlinmalari va boʻlimlari boʻlgan Pensiya jamgʻarmasi tashkil etilsin.

2. Quyidagilar Pensiya jamgʻarmasining asosiy vazifalari va faoliyati yoʻnalishlari etib belgilansin:

davlat ijtimoiy sugʻurtasiga badallar va ajratmalarni yigʻish va jamlash;

ijtimoiy sugʻurta boʻyicha pensiya va nafaqalarni belgilangan miqdorlarda toʻlash xarajatlarini mablagʻ bilan taʼminlash;

mablagʻlardan belgilangan maqsadda foydalanishni nazorat etish;

pensionerlar, nogironlar va aholining boshqa toifalarini ijtimoiy qoʻllab-quvvatlashga doir davlat dasturlarini mablagʻ bilan taʼminlashda shartnoma asosida ishtirok etish;

pensiya taʼminoti bilan bogʻliq muammolar boʻyicha xalqaro hamkorlikni amalga oshirish Pensiya jamgʻarmasi faoliyatining asosiy vazifalari va yoʻnalishlari etib belgilansin.

3. Belgilab qoʻyilsinki, Pensiya jamgʻarmasi mablagʻlari quyidagilar hisobiga shakllantiriladi:

mulkchilik shakllaridan qatʼi nazar, korxonalar, muassasalar va tashkilotlar ish haqi fondining 37,3 foizi miqdoridagi sugʻurta badallari, shuningdek yuridik shaxs boʻlmasdan tadbirkorlik faoliyati shugʻullanuvchi jismoniy shaxslarning, dehqon xoʻjaliklari aʼzolarining qonun hujjatlarida belgilangan miqdordagi sugʻurta badallari;

fuqarolarning ish haqining 2,5 foizi miqdoridagi majburiy sugʻurta badallari;

mulkchilik shakllaridan qatʼi nazar, korxonalar, muassasalar va tashkilotlarning sotilgan mahsulotlar (ishlar, xizmatlar) haqiqiy hajmining, ulgurji va chakana dorixona muassasalarining esa yalpi daromadining 0,5 foizi miqdoridagi majburiy ajratmalar;

sugʻurta badallari va ajratmalarni oʻz vaqtida toʻlamaganlik uchun solingan jarimalar va penyalar summasi;

muddatidan oldin pensiya tayinlash bilan bogʻliq qoplanadigan mablagʻlar, shuningdek “Fuqarolarning davlat pensiya taʼminoti toʻgʻrisida”gi Qonuniga muvofiq regress talablar (daʼvolar) boʻyicha ish beruvchilar va fuqarolardan undiriladigan mablagʻlar;

yuridik va jismoniy shaxslarning ixtiyoriy badallari.

Pensiya jamgʻarmasining pul mablagʻlari 1997-yil 1-yanvardan boshlab Oʻzbekiston Respublikasining Davlat budjetiga kiritiladi, bunda bu jamgʻarma mablagʻlarini shakllantirish va sarflashning maqsadli yoʻnaltirilganligi saqlab qolinadi.

4. Pensiya jamgʻarmasiga qonunchilikka muvofiq belgilangan tartibda Pensiya jamgʻarmasiga majburiy toʻlovlar boʻyicha vaqtida toʻlanmagan summadan kechiktirilgan har bir kun uchun 0,15 foiz miqdorida penya solish huquqi berilsin.

5. Belgilab qoʻyilsinki:

Pensiya jamgʻarmasiga rahbarlik qilish Pensiya jamgʻarmasining 9 kishidan iborat boshqaruvi hamda doimiy faoliyat koʻrsatuvchi ijro etuvchi organi — Ijro etuvchi direksiyasi tomonidan amalga oshiriladi;

Oʻzbekiston Respublikasi Ijtimoiy taʼminot vaziri Pensiya jamgʻarmasi boshqaruvi raisi hisoblanadi;

Pensiya jamgʻarmasining ijro etuvchi direktori lavozimiga koʻra Oʻzbekiston Respublikasi Ijtimoiy taʼminot vazirining oʻrinbosari hisoblanadi;

Boshqaruv tarkibiga Ijtimoiy taʼminot vaziri, uning oʻrinbosari — Pensiya jamgʻarmasining ijro etuvchi direktori, Pensiya jamgʻarmasi ijro etuvchi direktorining oʻrinbosari, Oʻzbekiston Respublikasi Moliya vazirligi, Mehnat vazirligi, Sogʻliqni saqlash vazirligi, Markaziy bank, Davlat soliq qoʻmitasi va Oʻzbekiston Kasaba uyushmalari Federatsiyasi Kengashi rahbarlari kiradi.

Pensiya jamgʻarmasining ijro etuvchi direktori Oʻzbekiston Respublikasi Ijtimoiy taʼminot vaziri tavsiyasiga koʻra Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod qilinadi;

Pensiya jamgʻarmasi hududiy boʻlimlarining boshliqlari lavozimiga koʻra tegishli ravishda Qoraqalpogʻiston Respublikasi Ijtimoiy taʼminot vazirining, viloyatlar, Toshkent shahar ijtimoiy taʼminot boshqarmalari boshliqlarining oʻrinbosarlari hisoblanadilar hamda Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining tavsiyasiga binoan Pensiya jamgʻarmasi boshqaruvi tomonidan tayinlanadilar.

Pensiya jamgʻarmasining tuman (shahar) boʻlimlari boshliqlari lavozimiga koʻra tuman (shahar) ijtimoiy taʼminot boʻlimi boshliqlarining oʻrinbosarlari hisoblanadilar hamda tumanlar (shaharlar) hokimlari tavsiyasiga binoan Pensiya jamgʻarmasining hududiy boʻlinmalari rahbarlari tomonidan tayinlanadilar.

6. Quyidagilar tasdiqlansin:

Oʻzbekiston Respublikasi Ijtimoiy taʼminot vazirligi huzuridagi Pensiya jamgʻarmasi markaziy apparati tuzilmasi 1-ilovaga muvofiq;

Pensiya jamgʻarmasi hududiy boʻlinmalarining namunaviy tuzilmasi 2-ilovaga muvofiq;

Pensiya jamgʻarmasi tuman (shahar) boʻlimlarining namunaviy tuzilmasi 3-ilovaga muvofiq;

4-ilovaga muvofiq Oʻzbekiston Respublikasi Ijtimoiy taʼminot vazirligi huzuridagi Pensiya jamgʻarmasining barcha organlari xodimlarining cheklangan soni 991 kishidan (binolarni qoʻriqlash va ularga xizmat koʻrsatish xodimlaridan tashqari), shu jumladan Pensiya jamgʻarmasi markaziy apparatiniki — 36 kishidan iborat etib;

“Oʻzbekiston Respublikasi Ijtimoiy taʼminot vazirligi huzuridagi Pensiya jamgʻarmasi toʻgʻrisida Nizom” 5-ilovaga muvofiq.

7. Pensiya jamgʻarmasi (boshqaruv apparati va uning tarkibiy boʻlinmalari xarajatlari pensiya jamgʻarmasi mablagʻlari hisobidan amalga oshirilsin.

8. Qoraqalpogʻiston Respublikasi Vazirlar Kengashi, viloyatlar hokimlari Oʻzbekiston Respublikasi Ijtimoiy taʼminot vazirligi bilan birgalikda bir hafta muddatda tegishli mahalliy ijtimoiy taʼminot organlari huzurida:

Ijtimoiy sugʻurta jamgʻarmasining vakolatli hududiy boʻlinmalari negizida Pensiya jamgʻarmasining hududiy boʻlinmalarini;

Ijtimoiy sugʻurta jamgʻarmasining tuman vakolatli boʻlimlari negizida Pensiya jamgʻarmasining tuman (shahar) boʻlimlarini tuzsinlar.

9. Pensiya jamgʻarmasi Davlat soliq qoʻmitasi bilan birgalikda Pensiya jamgʻarmasiga sugʻurta badallari va ajratmalarning toʻliq yigʻilishini taʼminlasin.

10. Pensiya jamgʻarmasi yilning har choragida Oʻzbekiston Respublikasi Moliya vazirligiga jamgʻarma daromadlari va xarajatlarining bajarilishi toʻgʻrisidagi hisobotni taqdim etsin.

11. Pensiya jamgʻarmasining Ijro etuvchi direksiyasi Toshkent shahar, Beruniy koʻchasi, 12 uyga joylashtirilsin.

12. Oʻzbekiston Respublikasi Adliya vazirligi bir hafta muddatda amaldagi qonunchilikka oʻzgartirishlar toʻgʻrisida takliflar kiritsin.

Vazirliklar va idoralar idoraviy normativ hujjatlarga mazkur qarorning qabul qilinishi bilan bogʻliq tegishli oʻzgartirishlar kiritsinlar.

13. Vazirlar Mahkamasi hamda Kasaba uyushmalari Federatsiyasi Kengashining “Oʻzbekiston Respublikasi Vazirlar Mahkamasi huzuridagi Ijtimoiy sugʻurta jamgʻarmasini tashkil etish toʻgʻrisida” 1993-yil 4-avgustdagi 391-son qarorining Oʻzbekiston Respublikasi Vazirlar Mahkamasi huzurida Ijtimoiy Sugʻurta jamgʻarmasini tashkil etishga taalluqli qismi oʻz kuchini yoʻqotgan deb hisoblansin.

14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklatilsin.

1. Oʻzbekiston Respublikasi Ijtimoiy taʼminot vazirligi huzuridagi Pensiya jamgʻarmasi (keyingi oʻrinlarda Pensiya jamgʻarmasi deb yuritiladi) aholini davlat tomonidan kafolatlangan ijtimoiy himoya qilish boʻyicha vazifalarni amalga oshirish uchun zarur moliyaviy bazani yaratish maqsadida tashkil etilgan.

Pensiya jamgʻarmasi Ijtimoiy taʼminot vazirligi tizimiga kiradi.

2. Pensiya jamgʻarmasi oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisining boshqa qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, mazkur Nizomga va boshqa normativ hujjatlarga amal qiladi.

Pensiya jamgʻarmasi Oʻzbekiston Respublikasi Ijtimoiy taʼminot vazirligiga va Moliya vazirligiga hisob beradi.

3. Pensiya jamgʻarmasi mablagʻlari mablagʻlarning ularni shakllantirish va sarflashning maqsadli yoʻnaltirilganligi saqlanib qolgan holda Davlat budjetiga kiritiladi.

4. Quyidagilar Pensiya jamgʻarmasining asosiy vazifalari hisoblanadi:

fuqarolarning ijtimoiy taʼminotga va ijtimoiy sugʻurtaga boʻlgan davlat tomonidan kafolatlangan huquqlarini toʻliq amalga oshirish;

davlat ijtimoiy sugʻurtasiga badallar va ajratmalarni yigʻish va jamlash;

Oʻzbekiston Respublikasi Davlat soliq qoʻmitasi bilan birgalikda badallarning toʻliq va oʻz vaqtida tushishi ustidan nazoratni taʼminlash;

“Fuqarolarning pensiya taʼminoti toʻgʻrisida”gi Qonunga muvofiq pensiyalarning oʻz vaqtida toʻlanishiga, shuningdek ijtimoiy sugʻurta boʻyicha nafaqalar toʻlashga xarajatlarni mablagʻ bilan taʼminlash;

Pensiya jamgʻarmasi mablagʻlaridan belgilangan maqsadda va samarali foydalanish ustidan nazoratni tashkil etish;

Pensiya jamgʻarmasi budjeti daromad qismini koʻpaytirish tadbirlarini amalga oshirish.

5. Koʻrsatib oʻtilgan vazifalar bajarilishini taʼminlash maqsadida Pensiya jamgʻarmasi quyidagilarni amalga oshiradi:

pensiya taʼminoti va ijtimoiy sugʻurta boʻyicha nafaqalar toʻlash uchun moʻljallangan majburiy badallarni yigʻish va jamlash;

jamgʻarma mablagʻlari hisobidan toʻlanadigan davlat pensiyalari va nafaqalarini mablagʻ bilan taʼminlash;

davlat ijtimoiy sugʻurtasiga yoʻnaltiriladigan mablagʻlarni hududiy boʻlinmalar oʻrtasida qayta taqsimlash;

yuridik va jismoniy shaxslardan ijtimoiy sugʻurtaga badallar oʻz vaqtida va toʻliq tushishini, shuningdek jamgʻarma mablagʻlarining toʻgʻri sarflanishini hisobga olish va nazorat qilish;

Pensiya jamgʻarmasi tomonidan mablagʻ bilan taʼminlanadigan davlat ijtimoiy sugʻurtasi boʻyicha pensiyalar va nafaqalar tayinlanishi va toʻlanishining qonuniyligini tekshirish;

davlat ijtimoiy sugʻurtasi tizimining moliyaviy barqarorligini taʼminlash va uni yanada takomillashtirish maqsadida aktual hisob-kitoblar oʻtkazish;

ijtimoiy sugʻurtaga majburiy badallar miqdorlari toʻgʻrisidagi takliflarni ishlab chiqish;

ijtimoiy sugʻurtaga tushuvchi badallarni shaxslar boʻyicha hisobga olishni tashkil etishga doir tadbirlarni ishlab chiqish va amalga oshirish;

oʻz vakolatlari doirasida pensiya jamgʻarmasi vazifalarini amalga oshirish uchun zarur boʻlgan yoʻriqnomalar va uslubiy hujjatlarni ishlab chiqish;

Pensiya jamgʻarmasi hududiy boʻlinmalari va tuman (shahar) boʻlimlari faoliyatiga tashkiliy-uslubiy rahbarlik qilish, shuningdek ular faoliyatini nazorat qilish;

jamoatchilikni oʻz faoliyatidan xabardor qilish;

pensiya taʼminoti bilan bogʻliq muammolar yuzasidan xalqaro hamkorlik.

6. Pensiya jamgʻarmasi quyidagilarga majburdir:

qonun hujjatlariga muvofiq Pensiya jamgʻarmasiga badallar toʻlashga majbur boʻlgan yuridik va jismoniy shaxslar hisobini yuritish;

Pensiya jamgʻarmasiga badallar toʻlash boʻyicha qarzdor boʻlgan yuridik va jismoniy shaxslar roʻyxatini har oyda Davlat soliq qoʻmitasiga va uning joylardagi organlariga taqdim etish;

Oʻzbekiston Respublikasi Moliya vazirligiga va Ijtimoiy taʼminot vazirligiga belgilangan tartibda hisobotlar, shuningdek bir yilda bir marta Pensiya jamgʻarmasi va uning boʻlinmalarining mustaqil auditorlik tekshiruvi natijalarini taqdim etish;

Pensiya jamgʻarmasi budjeti ijrosi toʻgʻrisida har yillik hisobotni eʼlon qilish.

7. Pensiya jamgʻarmasi quyidagi huquqlarga egadir:

Davlat soliq qoʻmitasi bilan birgalikda, mulkchilik va xoʻjalik yuritish shakllaridan qatʼi nazar, yuridik shaxslarning buxgalteriya hujjatlarini va boshqa hujjatlarini, shuningdek fuqarolarni shartnomalar boʻyicha yollovchi hamda yakka tartibdagi mehnat faoliyati bilan shugʻullanuvchi, shu jumladan yakka tartibda (jamoa) ijarasi shartlarida yoki shaxsiy dehqon xoʻjaligida, jismoniy shaxslarning Pensiya jamgʻarmasiga badallari va ajratmalarini hisoblab chiqish va toʻlash bilan bogʻliq buxgalteriya hujjatlari va boshqa hujjatlarini tekshirish;

mulkchilik va xoʻjalik yuritish shakllaridan qatʼi nazar, barcha yuridik shaxslardan (kichik va oʻrta korxonalar, mikrofirmalar bundan mustasno), shuningdek, tegishli organlardan oʻz faoliyatini amalga oshirish uchun zarur boʻlgan statistika hisobotini belgilangan tartibda olish;

daromadlarni yashirish yoki buxgalteriya hisobini buzish natijasida badallar notoʻgʻri toʻlanganligi aniqlangan taqdirda badal toʻlovchining moliya-xoʻjalik faoliyatini kompleks taftish qilish uchun Davlat soliq qoʻmitasi organlariga murojaat qilish;

yuridik shaxs boʻlmagan holda mehnat faoliyati bilan shugʻullanuvchi jismoniy shaxslarning daromadlarni yashirishi hollari aniqlangan taqdirda tegishli chora-tadbirlar koʻrish uchun tegishli davlat organlariga murojaat qilish;

majburiy toʻlovlar boʻyicha oʻz vaqtida toʻlanmagan toʻlov summasidan Pensiya jamgʻarmasiga muddati oʻtkazib yuborilgan har bir kun uchun 0,15 foiz miqdorida penya hisoblash;

jarimalar, penyalar va boshqa sanksiyalardan tushuvchi mablagʻlar hisobiga 15 foiz miqdorida Pensiya jamgʻarmasini rivojlantirish va uning xodimlarini moddiy ragʻbatlantirish jamgʻarmasini tashkil etish.

8. Pensiya jamgʻarmasi budjeti quyidagilar hisobiga shakllantiriladi:

mulkchilik shakllaridan qatʼi nazar, korxonalar, muassasalar va tashkilotlar ish haqi fondining 37,3 foizi miqdoridagi sugʻurta badallari, shuningdek yuridik shaxs boʻlmasdan tadbirkorlik faoliyati bilan shugʻullanuvchi shaxslarning, dehqon xoʻjaliklari aʼzolarining qonun hujjatlarida belgilangan miqdordagi sugʻurta badallari;

ish haqining 2,5 foizi miqdoridagi fuqarolarning majburiy sugʻurta badallari;

mulkchilik shakllaridan qatʼi nazar, korxonalar, muassasalar va tashkilotlarning sotilgan mahsulotlar (ishlar, xizmatlar) haqiqiy hajmining, ulgurji va chakana dorixona muassasalarining esa yalpi daromadining 0,5 foizi miqdoridagi majburiy ajratmalari;

badallar va ajratmalar oʻz vaqtida toʻlanmaganligi uchun hisoblangan jarima va penyalar summasi;

muddatidan ilgari pensiyalar tayinlanganligi munosabati bilan qoplanadigan mablagʻlar;

regress talablar (daʼvolar) boʻyicha ish beruvchilar va fuqarolardan undirib olinadigan mablagʻlar;

yuridik va jismoniy shaxslarning ixtiyoriy xayriyalari.

9. Pensiya jamgʻarmasi mablagʻlari quyidagilarni toʻlashga yoʻnaltiriladi:

ijtimoiy taʼminot organlari tomonidan tayinlanadigan pensiyalar;

bolalikdan nogironlarga, davlat pensiya taʼminoti huquqiga ega boʻlmagan keksa va mehnatga layoqatsiz fuqarolarga, nafaqaxoʻrlarga;

bola tugʻilganda beriladigan nafaqalar;

vaqtincha mehnatga layoqatsizlik nafaqalari, shu jumladan homiladorlik va tugʻish nafaqasi;

dafn marosimi nafaqalari;

qonun hujjatlariga muvofiq Pensiya jamgʻarmasidan mablagʻ bilan taʼminlanadigan boshqa toʻlovlar.

Pensiya jamgʻarmasi boshqaruv apparatini, uning tarkibiy boʻlinmalarini saqlash, moddiy-texnikaviy bazani tashkil etish va rivojlantirish Pensiya jamgʻarmasi mablagʻlari hisobidan amalga oshiriladi.

10. Pensiya jamgʻarmasi, budjeti loyihasi, tegishli hokimliklar bilan kelishilgan holda, uning hududiy boʻlinmalari, tuman (shahar) boʻlimlari budjet loyihalari asosida Ijro etuvchi direksiya tomonidan ishlab chiqiladi va Pensiya jamgʻarmasi boshqaruvining koʻrib chiqishi uchun kiritiladi.

Pensiya jamgʻarmasi budjeti loyihasi Hukumatning koʻrib chiqishi uchun Oʻzbekiston Respublikasi Davlat budjeti bilan birgalikda kiritiladi va Davlat budjeti tarkibida tasdiqlanadi.

11. Pensiya jamgʻarmasi hududiy boʻlinmalari budjetlari Pensiya jamgʻarmasi boshqaruvi tomonidan tasdiqlanadi.

12. Budjetning tasdiqlangan koʻrsatkichlarini bajarish Ijro etuvchi direksiya, Pensiya jamgʻarmasining tegishli hududiy boʻlinmalari, tuman (shahar) boʻlimlari tomonidan taʼminlanadi.

13. Hududiy boʻlinmalar mablagʻlari kamomadi belgilangan tartibda Pensiya jamgʻarmasi boshqaruvining qaroriga koʻra qoplanadi.

14. Pensiya jamgʻarmasi mablagʻlaridan qonun hujjatlarida va mazkur Nizomda nazarda tutilmagan maqsadlarda foydalanishga yoʻl qoʻyilmaydi.

15. Pensiya jamgʻarmasining 9 kishidan iborat boshqaruvi va Ijro etuvchi direksiyasi Pensiya jamgʻarmasining boshqaruv organlari hisoblanadi.

16. Boshqaruv tarkibiga Ijtimoiy taʼminot vaziri, uning oʻrinbosari — Pensiya jamgʻarmasining Ijro etuvchi direktori, Pensiya jamgʻarmasi Ijro etuvchi direktorining oʻrinbosari, Oʻzbekiston Respublikasi Moliya vazirligi, Mehnat vazirligi, Sogʻliqni saqlash vazirligi, Markaziy banki, Davlat soliq qoʻmitasi va Oʻzbekiston Kasaba uyushmalari Federatsiyasi Kengashi rahbarlari kiradi.

Pensiya jamgʻarmasi boshqaruvining shaxsiy tarkibi Oʻzbekiston Respublikasi Vazirlar Mahkamasi tomonidan belgilanadi.

Oʻzbekiston Respublikasi Ijtimoiy taʼminot vaziri lavozimiga koʻra Pensiya jamgʻarmasi boshqaruvi raisi hisoblanadi.

17. Pensiya jamgʻarmasi boshqaruvi:

Pensiya jamgʻarmasi budjeti ijrosi uchun toʻliq javob beradi;

Pensiya jamgʻarmasining joriy va istiqboldagi vazifalarini belgilaydi;

manfaatdor vazirliklar va idoralar bilan birgalikda davlat ijtimoiy sugʻurtasiga badallar miqdorlari toʻgʻrisidagi takliflarni Hukumatga kiritadi;

Pensiya jamgʻarmasi mablagʻlaridan foydalanish normativlarini va tartibini, shu jumladan Pensiya jamgʻarmasi boshqaruvi organlariga sarflanadigan mablagʻlarni tasdiqlaydi;

Pensiya jamgʻarmasining hududiy boʻlinmalari hamda tuman (shahar) boʻlimlari toʻgʻrisidagi namunaviy nizomlarni tasdiqlaydi;

Oʻzbekiston Respublikasi Moliya vazirligi bilan kelishilgan holda Pensiya jamgʻarmasi Ijro etuvchi direksiyasi va boʻlinmalari shtat jadvallarini va xarajatlari smetasini tasdiqlaydi;

Ijro etuvchi direktorning taqdimnomasiga binoan Pensiya jamgʻarmasi Ijro etuvchi direktori oʻrinbosarini tayinlaydi;

Pensiya jamgʻarmasining barqaror faoliyat koʻrsatishini taʼminlash uchun zaxira jamgʻarmasi va boshqa jamgʻarmalar tashkil etishning maqsadga muvofiqligi hamda ushbu jamgʻarmalar mablagʻlaridan foydalanish yoʻnalishlarini belgilaydi. Zaxira jamgʻarmasi va boshqa jamgʻarmalar faqat Pensiya jamgʻarmasining oʻz boʻsh mablagʻlari hisobidan shakllantirilishi mumkin.

18. Pensiya jamgʻarmasi boshqaruvi yilning har bir choragida kamida bir marta chaqiriladi. Boshqaruv oʻz aʼzolarining kamida uchdan ikki qismi hozir boʻlganda qaror qabul qilishga vakolatli boʻladi. Qaror boshqaruvning hozir boʻlgan aʼzolarining oddiy koʻpchilik ovozi bilan qabul qilinadi.

19. Pensiya jamgʻarmasi Ijro etuvchi direksiyasi Pensiya jamgʻarmasining doimiy ishlovchi ijro etuvchi organi hisoblanadi.

Pensiya jamgʻarmasining ijro etuvchi direktori lavozimiga koʻra Ijtimoiy taʼminot vazirining oʻrinbosari hisoblanadi. Pensiya jamgʻarmasi ijro etuvchi direktori Oʻzbekiston Respublikasi Ijtimoiy taʼminot vazirining takdimnomasiga koʻra Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod qilinadi.

20. Pensiya jamgʻarmasining Ijro etuvchi direksiyasi:

davlat ijtimoiy sugʻurtasiga badallarning oʻz vaqtida va toʻla yigʻilishi uchun toʻliq javob beradi;

Pensiya jamgʻarmasi mablagʻlaridan belgilangan maqsadda foydalanishi ustidan nazoratni amalga oshiradi;

Pensiya jamgʻarmasi barcha tuzilmalarining moddiy-texnikaviy jihozlanishini amalga oshiradi;

yuridik va jismoniy shaxslardan tushuvchi badallarning shaxslar boʻyicha hisobini tashkil etish ishlarini olib boradi;

Davlat soliq qoʻmitasi tuzilmalari bilan birgalikda ijtimoiy sugʻurtaga badallarning oʻz vaqtida va toʻgʻri toʻlanishi tekshirilishini tashkil etadi;

yoʻriqnoma, uslubiy va boshqa normativ hujjatlarni ishlab chiqadi hamda ularni Pensiya jamgʻarmasi boshqaruvining koʻrib chiqishi uchun kiritadi;

ijtimoiy himoyaning davlat tizimini moliyaviy taʼminlash boʻyicha joriy va istiqbolli aktuar hisob-kitoblarni oʻtkazadi hamda ularni Pensiya jamgʻarmasi boshqaruvining koʻrib chiqishiga taqdim etadi;

ijtimoiy sugʻurtaga badallar tariflarini oʻzgartirish toʻgʻrisidagi takliflarni Pensiya jamgʻarmasi boshqaruvining koʻrib chiqishiga kiritadi.

21. Pensiya jamgʻarmasi hududiy boʻlinmalari boshliqlari lavozimlariga koʻra tegishli ravishda Qoraqalpogʻiston Respublikasi Ijtimoiy taʼminot vazirining, ijtimoiy taʼminot viloyat, Toshkent shahar boshqarmalari boshliqlarining oʻrinbosarlari hisoblanadilar hamda Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining taqdimnomasi boʻyicha Pensiya jamgʻarmasi boshqaruvi tomonidan tayinlanadilar;

Pensiya jamgʻarmasi tuman (shahar) boʻlimlari boshliqlari lavozimlariga koʻra ijtimoiy taʼminot tuman (shahar) boʻlimlari boshliqlarining oʻrinbosarlari hisoblanadilar hamda tumanlar (shaharlar) hokimlarining taqdimnomasi boʻyicha Pensiya jamgʻarmasi hududiy boʻlimlari rahbarlari tomonidan tayinlanadilar.

22. Pensiya jamgʻarmasi, hududiy boʻlinmalar, tuman (shahar) boʻlimlari yuridik shaxslar hisoblanadilar, muhrga hamda bankda hisob-kitob schyotiga ega boʻladilar.