Namangan viloyatida tadbirkorlikni yanada qo‘llab-quvvatlash, aholi bandligini ta’minlash va muhandislik-kommunikatsiya tarmoqlarini rivojlantirish uchun moliyaviy resurslar ajratish maqsadida:

1. Investitsiyalar va tashqi savdo vazirligi, Iqtisodiy taraqqiyot va kambag‘allikni qisqartirish vazirligi hamda Moliya vazirligining Tiklanish va taraqqiyot jamg‘armasi hisobidan Namangan viloyati hokimligiga 10 yil muddatga, 3 yillik imtiyozli davrni hisobga olgan holda, foiz stavkasi yiliga 2,5 foizni tashkil qiladigan 30 million AQSH dollari miqdoridagi kredit ajratish to‘g‘risidagi taklifi ma’qullansin.

2. Namangan viloyati hokimligi mazkur qarorning 1-bandida belgilangan mablag‘larni quyidagi maqsadlarga yo‘naltirsin:

Namangan shahrining markazlashgan issiqlik tizimini qurish va rekonstruksiya qilishga — 15 million AQSH dollari ekvivalenti;

Namangan shahrining eski shahar hududi infratuzilmasini yaxshilash, aholi bandligini ta’minlash, shahardagi Yangiariq, Shimoliy Farg‘ona kanallari va Namangansoy qirg‘oqlarini obodonlashtirish ishlariga — 10 million AQSH dollari ekvivalenti;

kichik sanoat hamda yoshlar sanoat va tadbirkorlik zonalarini rivojlantirishga — 5 million AQSH dollari ekvivalenti.

Bunda, mazkur bandda nazarda tutilgan mablag‘lar taqsimotiga, zarur hollarda, Vazirlar Mahkamasi (A.N. Aripov) tomonidan o‘zgartirishlar kiritilishi mumkin.

3. Mazkur qarorning 2-bandi ikkinchi xatboshisida ko‘rsatilgan tadbirlar bo‘yicha 2021-yilning 20-noyabriga qadar obyektni qurish va rekonstruksiya qilishda zarur bo‘ladigan, Uy-joy kommunal xizmat ko‘rsatish vazirligi (Sh.S. Hidoyatov) tomonidan shakllantiriladigan ro‘yxatlar bo‘yicha olib kiriladigan qozonxonalar, asbob-uskunalar, butlovchi buyumlar, ehtiyot qismlari, metall konstruksiyalar, suvni tayyorlash uchun kimyoviy moddalar bojxona bojidan ozod etilsin.

4. Belgilansinki:

mazkur qaror bilan ajratilayotgan mablag‘lardan maqsadli va samarali foydalanilishi uchun Namangan viloyati hokimligi mas’ul ijro etuvchi organ hisoblanadi;

Namangan shahrining markazlashgan issiqlik tizimini qurish va rekonstruksiya qilish uchun ajratilgan kreditni qoplash va xizmat ko‘rsatish bilan bog‘liq xarajatlar Namangan viloyatining mahalliy budjeti, Namangan viloyati “Issiqlik manbai” ishlab chiqarish DUK mablag‘lari hamda qonun hujjatlarida taqiqlanmagan boshqa manbalar hisobidan qoplanadi;

Namangan shahrining eski shahar hududi infratuzilmasini yaxshilash, aholi bandligini ta’minlash, shahardagi Yangiariq, Shimoliy Farg‘ona kanallari va Namangansoy qirg‘oqlarini obodonlashtirish, kichik sanoat hamda yoshlar sanoat va tadbirkorlik zonalarini rivojlantirish uchun ajratilgan kreditlarni qoplash va xizmat ko‘rsatish bilan bog‘liq xarajatlar Namangan viloyatining mahalliy budjeti hamda qonunchilik hujjatlarida taqiqlanmagan boshqa manbalar hisobidan qoplanadi.

6. Belgilansinki, O‘zbekiston Respublikasi Prezidentining 2021-yil 27-martdagi “Oilaviy tadbirkorlikni rivojlantirish dasturlari doirasida amalga oshiriladigan qo‘shimcha chora-tadbirlar to‘g‘risida”gi PQ-5041-son qaroriga asosan “Har bir oila — tadbirkor” dasturi doirasida Tiklanish va taraqqiyot jamg‘armasi hisobidan Namangan viloyati uchun ajratilgan mablag‘lardan:

100 milliard so‘m miqdoridagi mablag‘ “mahallabay” ishlash tizimi orqali aniqlangan drayver loyihalarni kreditlash uchun;

100 milliard so‘m miqdoridagi mablag‘ “Turon bank” ATBning ustav kapitalidagi Tiklanish va taraqqiyot jamg‘armasining ulushini oshirishga yo‘naltirish yo‘li bilan limonchilikni rivojlantirish loyihalarini kreditlash uchun ajratiladi.

7. Namangan viloyatida turizm infratuzilmasini rivojlantirish uchun:

O‘zbekiston Respublikasi Prezidentining 2021-yil 9-fevraldagi “O‘zbekiston Respublikasida ichki va ziyorat turizmini yanada rivojlantirish chora-tadbirlari to‘g‘risida”gi PF-6165-son Farmoni 9-bandiga muvofiq O‘zbekiston Respublikasi Davlat budjeti hamda Tiklanish va taraqqiyot jamg‘armasi hisobidan teng ulushlarda 1 trillion so‘m miqdorida ajratilganligi;

O‘zbekiston Respublikasi Prezidentining 2021-yil 2-apreldagi “Obod qishloq” va “Obod mahalla” dasturlarini amalga oshirish bo‘yicha qo‘shimcha chora-tadbirlar to‘g‘risida”gi PQ-5048-son qarori bilan tasdiqlangan Turizm infratuzilmasini rivojlantirish yig‘ma parametrlariga asosan ajratilgan 1 trillion so‘mdan Namangan viloyati uchun 37,5 mlrd so‘m ajratilganligi, shuningdek, mazkur parametrlarga, zarur hollarda, Vazirlar Mahkamasi tomonidan o‘zgartirishlar kiritilishi mumkinligi belgilanganligi ma’lumot uchun qabul qilinsin.

8. Namangan viloyati hokimligi Uy-joy kommunal xizmat ko‘rsatish vazirligi, Iqtisodiy taraqqiyot va kambag‘allikni qisqartirish vazirligi, Suv xo‘jaligi vazirligi bilan birgalikda ikki hafta muddatda mazkur qarorning 2-bandida belgilangan tadbirlar bo‘yicha manzilli dasturlarni shakllantirsin hamda tasdiqlash uchun Vazirlar Mahkamasiga kiritilishini ta’minlasin.

9. O‘zbekiston Respublikasi Prezidentining 2021-yil 27-martdagi “Oilaviy tadbirkorlikni rivojlantirish dasturlari doirasida amalga oshiriladigan qo‘shimcha chora-tadbirlar to‘g‘risida”gi PQ-5041-son qaroriga ilovaga muvofiq o‘zgartirishlar kiritilsin.

10. Namangan viloyati hokimligi:

ikki oy muddatda “2021-yil uchun O‘zbekiston Respublikasining Davlat budjeti to‘g‘risida”gi O‘zbekiston Respublikasi Qonuniga o‘zgartirish va qo‘shimchalar kiritish haqida”gi O‘zbekiston Respublikasi qonuni loyihasini;

har chorakda tadbirkorlikni yanada qo‘llab-quvvatlash va muhandislik-kommunikatsiya tarmoqlarini rivojlantirishga yo‘naltirilgan mablag‘lardan samarali foydalanish bo‘yicha amalga oshirilgan chora-tadbirlarning natijadorligi to‘g‘risidagi hisobotni Vazirlar Mahkamasiga kiritsin.

11. Uy-joy kommunal xizmat ko‘rsatish vazirligi boshqa manfaatdor vazirlik va idoralar bilan birgalikda ikki oy muddatda qonunchilik hujjatlariga mazkur qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

12. Mazkur qarorning ijrosini samarali tashkil etishga mas’ul va javobgar etib O‘zbekiston Respublikasi Bosh vazirining o‘rinbosari J.A. Kuchkarov hamda Namangan viloyati hokimi Sh.Sh. Abdurazakov belgilansin.

Qaror ijrosi uchun mas’ul idoralar faoliyatini muvofiqlashtirish va nazorat qilish O‘zbekiston Respublikasining Bosh vaziri A.N. Aripov zimmasiga yuklansin.

1. 4-bandning “b” kichik bandi ikkinchi xatboshisidagi va 5-bandning birinchi xatboshisidagi “1,6” raqami “1,5” raqami bilan almashtirilsin.

2. 1-ilovada:

a) “Jami” pozitsiyasida:

“2021-yilda yo‘naltiriladigan mablag‘lar” ustunidagi “9 140” raqami “9 040” raqami bilan almashtirilsin;

“Tiklanish va taraqqiyot jamg‘armasi hisobidan” ustunidagi “2 540” raqami “2 440” raqami bilan almashtirilsin;

b) 1-bandda:

“2021-yilda yo‘naltiriladigan mablag‘lar” ustunidagi “5 638” raqami “5 538” raqami bilan almashtirilsin;

“Tiklanish va taraqqiyot jamg‘armasi hisobidan” ustunidagi “1 600” raqami “1 500” raqami bilan almashtirilsin;

3. 2-ilovada:

a) “Jami” pozitsiyasida:

“Jami” ustunidagi “9 140” raqami “9 040” raqami bilan almashtirilsin;

“Har bir oila — tadbirkor” dasturi” ustunidagi “5 638” raqami “5 538” raqami bilan almashtirilsin;

b) 6-bandda:

“Jami” ustunidagi “885” raqami “785” raqami bilan;

“Har bir oila — tadbirkor” dasturi” ustunidagi “602” raqami “502” raqami bilan almashtirilsin.