Soliq idoralarini tashkiliy jihatdan va kadrlar bilan mustahkamlash, davlat soliq siyosatini hayotga tatbiq etishda ular faoliyatining samaradorligini oshirish, bozor munosabatlari shakllanishi sharoitida davlat budjetiga tushumlarning barqaror va toʻliq tushishini taʼminlash maqsadida Vazirlar Mahkamasi qaror qiladi:

1. Respublika davlat soliq organlari tizimida ishlaydigan xodimlarning cheklangan soni 8000 mutaxassis, shu jumladan, Oʻzbekiston Respublikasi Vazirlar Mahkamasi huzuridagi Davlat soliq bosh boshqarmasi apparati xodimlarining soni 200 kishi etib belgilansin (xizmat koʻrsatuvchi va yordamchi xodimlardan tashqari).

2. Oʻzbekiston Respublikasi Vazirlar Mahkamasi huzuridagi Davlat soliq bosh boshqarmasi markaziy apparati tarkibida Maxsus nazorat boshqarmasi hamda Qoraqalpogʻiston Respublikasi Davlat soliq bosh boshqarmasi, viloyatlar va Toshkent shahar davlat soliq boshqarmalari tarkibida tegishli boshqarmalar tuzilsin.

Oʻzbekiston Respublikasining soliqqa oid qonunchiligi buzilishining oldini olish, ularni aniqlash va yoʻlini toʻsish, shuningdek, soliq xizmatlari faoliyatining xavfsizligini taʼminlash ushbu boʻlinmalarning asosiy vazifalari etib belgilansin.

Davlat soliq bosh boshqarmasi Oʻzbekiston Respublikasi Adliya vazirligi bilan birgalikda 10 kun muddat ichida Vazirlar Mahkamasiga Maxsus nazorat boshqarmasi toʻgʻrisidagi nizomni taqdim etsin.

3. Belgilab qoʻyilsinki, Oʻzbekiston Respublikasi soliq organlarida:

xodimlarning maxsus unvonlari joriy etiladi. Oʻzbekiston Respublikasi soliq organlari xodimlarining maxsus unvonlari toʻgʻrisidagi ilova qilinayotgan nizom va 1-ilovaga muvofiq davlat soliq organlari xodimlariga shaxsiy unvonlari uchun lavozim maoshiga qoʻshimcha haq toʻlash miqdorlari tasdiqlansin;

koʻp yillik xizmati uchun xodimlarning maoshiga oylik qoʻshimcha pul 2-ilovaga muvofiq toʻlanadi.

4. Oʻzbekiston Respublikasi Vazirlar Mahkamasi huzuridagi Davlat soliq bosh boshqarmasi Oʻzbekiston Respublikasi Oliy va oʻrta maxsus taʼlim vazirligi, Moliya vazirligi bilan birgalikda soliq organlari uchun oʻquv jarayonini soliq organlarida tajriba oʻtash bilan birga qoʻshib olib borgan holda xodimlarni maqsadli tayyorlashning tizimini va shartlarini ishlab chiqsin.

5. Oʻzbekiston Respublikasi Milliy xavfsizlik xizmati, Ichki ishlar vazirligi va Aloqa vazirligi Maxsus nazorat boshqarmasining boʻlinmalarini texnik jihatdan jihozlashga yordam bersinlar.

6. Oʻzbekiston Respublikasi Davlat qurilish ishlari qoʻmitasi qayta tashkil etilayotgan Davlat soliq bosh boshqarmasining Maxsus nazorat boshqarmasi uchun Oʻzbekiston Respublikasi Binokorlik materiallari sanoati vazirligi “Alenit” ilmiy-ishlab chiqarish birlashmasining boʻshab qolgan binolari hisobidan xizmat xonalari ajratsin.

7. Qoraqalpogʻiston Respublikasi Vazirlar Kengashi, viloyatlar va tumanlar hokimlari joriy meʼyorlardan kelib chiqqan holda 1992-yil 1-noyabrgacha davlat soliq boshqarmalariga va inspeksiyalariga qoʻshimcha xizmat joylari ajratsinlar, ularga xizmat telefonlari oʻrnatishda, transport, mebel, jihozlar va uskunalar olishda yordam bersinlar.

8. Vazirlar Mahkamasining 1991-yil 12-avgustdagi 217-son qarorining 3-bandi uchinchi xatboshi oʻz kuchini yoʻqotgan deb hisoblansin.

9. Mazkur qarorning bajarilishini nazorat qilish Bosh vazirning oʻrinbosari oʻrtoq B.S. Hamidov zimmasiga yuklatilsin.

1. Mazkur Nizom davlat soliq organlari xodimlariga maxsus shaxsiy unvonlar berish tartibini belgilaydi.

2. Davlat soliq bosh boshqarmasi xodimlari uchun quyidagi maxsus unvonlar joriy etiladi:

Soliq xizmatining bosh davlat maslahatchisi

Soliq xizmatining I darajali davlat maslahatchisi

Soliq xizmatining II darajali davlat maslahatchisi

Soliq xizmatining III darajali davlat maslahatchisi

Soliq xizmatining I darajali maslahatchisi

Soliq xizmatining II darajali maslahatchisi

Soliq xizmatining III darajali maslahatchisi

Soliq xizmatining I darajali inspektori

Soliq xizmatining II darajali inspektori

Soliq xizmatining III darajali inspektori.

3. Soliqqa oid qonunchilikka rioya qilinishini, hisobga toʻlov oʻtkazishlarning toʻgʻri amalga oshirilishini, budjetga soliqlar va boshqa majburiy toʻlovlarning oʻz vaqtida toʻlanishi va ularning toʻliq boʻlishini, soliq toʻlovchilarni roʻyxatga olishni va soliqlarning buxgalteriyada tezkorlik bilan qayd etib borilishini, soliq idoralari faoliyatining huquqiy jihatdan taʼminlanishini nazorat qilishni amalga oshiruvchi hamda oʻzlari egallab turgan lavozimlarga malaka jihatdan javob bera oladigan soliq idoralari xodimlariga quyidagi tegishli maxsus shaxsiy unvonlar beriladi:

4. Soliq xizmatining bosh davlat maslahatchisi unvoni Oʻzbekiston Respublikasi Prezidenti tomonidan, soliq xizmatining I darajali davlat maslahatchisi unvoni Oʻzbekiston Respublikasi Prezidenti huzuridagi Vazirlar Mahkamasi tomonidan, soliq xizmatining II va III darajali davlat maslahatchisi, soliq xizmatining I, II va III darajali maslahatchisi, soliq xizmatining I darajali inspektorlari unvonlari Oʻzbekiston Respublikasi Vazirlar Mahkamasi huzuridagi Davlat soliq bosh boshqarmasi boshligʻi tomonidan, soliq xizmatining II va III darajali inspektorlari unvonlari Qoraqalpogʻiston Respublikasi davlat soliq bosh boshqarmasi boshligʻi, viloyatlar va Toshkent shahar davlat soliq boshqarmalari boshliqlari tomonidan beriladi.

Maxsus shaxsiy unvonlar davlat soliq boshqarmalari va inspeksiyalarining boʻysunishiga qarab qilgan tavsiyalariga asosan beriladi. Bunda xodimning maʼlum lavozimga tayinlanishi tegishli shaxsiy unvonning oʻz-oʻzidan berilishini taqozo etmaydi.

5. Soliq organlari xodimlariga shaxsiy unvonlar berilishi mezonlari (Prezidentning yoki Hukumatning qaroriga koʻra tayinlanadiganlardan tashqari) tegishli malaka (ish stajiga ega boʻlish) bilan bir qatorda soliq siyosati masalalarida bilimdonlik, soliqni hisoblash va toʻlash hamda soliq xodimlari huquq va burchlari mohiyatini bilish, soliq organlari faoliyatini targʻib qilishdagi faollik hisoblanadi.

6. Shaxsiy unvonlarni egallab turishning quyidagi muddatlari belgilanadi:

soliq xizmatining I darajali maslahatchisi — 4 yil

soliq xizmatining II darajali maslahatchisi — 4 yil

soliq xizmatining III darajali maslahatchisi — 3 yil

soliq xizmatining I darajali inspektori — 3 yil

soliq xizmatining II darajali inspektori — 2 yil

soliq xizmatining III darajali inspektori — 2 yil

Soliq xizmatining bosh davlat maslahatchisi, soliq xizmatining I, II va III darajali davlat maslahatchilarining maxsus shaxsiy unvonni egallab turish muddatlari belgilab qoʻyilmaydi.

7. Navbatdagi shaxsiy unvonni berish, odatda, xodim yangi lavozimga koʻtarilganda yoki uning unvonni egallab turish muddati tugaganda attestatsiya komissiyasining qaroriga binoan beriladi.

Ishga yangi qabul qilingan xodimlarning nomzodi zarur maʼlumoti boʻlgan va soliq muassasalarida kamina bir yillik ish stajiga ega boʻlgan taqdirda soliq xizmatining III darajali inspektori shaxsiy unvoniga tavsiya etiladi, Mazkur talablarga javob bermagan holda xizmatchilar shtatlar jadvaliga muvofiq unvon berilmasdan lavozimga tayinlanadi.

Katta mehnat staji va zarur maʼlumotga ega boʻlgan mutaxassislarga, boshqa organlardan soliq organlariga ishga qabul qilingan taqdirda, egallab turgan lavozimlarga mos unvon oʻsha yerda kamida bir yil xizmat qilganlaridan soʻng berilishi mumkin. Ular shtatlar jadvaliga muvofiq maoshi saqlab qolingan holda bir yilgacha vazifani bajaruvchi etib tayinlanadi.

8. Vazirlar Mahkamasi huzuridagi Davlat soliq bosh boshqarmasi boshligʻiga ayrim hollarda quyidagi huquqlar beriladi:

xizmat vazifalarini namunali bajargani uchun muddatidan oldin navbatdagi maxsus shaxsiy unvonlarni berish;

yuqori lavozimlarga koʻtarilganda navbatga rioya qilmay turib ham maxsus shaxsiy unvon berish, bu unvon xodim oldin egallab turgan unvondan faqat ikki darajagacha yuqori boʻlishi mumkin.

9. Davlat soliq organlarining xizmatchilariga maxsus shaxsiy unvon umrbod beriladi. Xodimlar davlat soliq organlaridan nomunosib ishlari tufayli boʻshatilgan taqdirdagina maxsus shaxsiy unvondan mahrum etilishlari mumkin.

Xizmat vazifalarini qoʻpol ravishda buzgan xodimning maxsus unvoni pasaytirilishi mumkin, lekin bir pogʻonadan past pasaytirilmaydi.

Ushbu jadvalga binoan davlat soliq organlari xodimlariga koʻp yil ishlaganlik uchun qoʻshimcha oylik pul toʻlash tartibi Davlat soliq bosh boshqarmasi tomonidan ishlab chiqilib, Oʻzbekiston Respublikasi davlat muassasalari xodimlari kasaba uyushmasi Markaziy qoʻmitasi bilan kelishilgan koʻp yil ishlaganlik uchun qoʻshimcha pul toʻlash haqidagi nizomga muvofiq Davlat soliq bosh boshqarmasi boshligʻining buyrugʻi bilan belgilanadi.