O‘zbekiston Respublikasining “Davlat tasarrufidan chiqarish va xususiylashtirish to‘g‘risida”gi Qonuniga muvofiq va bozor munosabatlarini keng joriy qilish, tashabbus va tadbirkorlikni rivojlantirish, davlat tasarrufidan chiqarish va mulkchilikning jamoa hamda xususiy shakllarini shakllantirish uchun sharoitlar yaratish maqsadida Vazirlar Mahkamasi qaror qiladi:

1. O‘zbekiston Respublikasi Davlat mulkini boshqarish va xususiylashtirish qo‘mitasi, “Mahalliy sanoat” davlat korporatsiyasi, O‘zbekiston davlat aksionerlik “Savdo” uyushmasi va O‘zbekiston Respublika aholiga maishiy xizmat ko‘rsatuvchi korxonalar va tashkilotlar uyushmasining mahalliy sanoat, aholiga maishiy xizmat ko‘rsatish, davlat savdosi hamda umumiy ovqatlanish korxonalari va tashkilotlarini davlat tasarrufidan chiqarish va xususiylashtirishga doir chora-tadbirlarni bosqichma-bosqich amalga oshirish to‘g‘risidagi taklifi qabul qilinsin.

Mahalliy sanoat, maishiy xizmat ko‘rsatish, savdo va umumiy ovqatlanish davlat korxonalarini 1992 — 1993-yillarda mulkchilikning boshqa shakllariga aylantirish bo‘yicha tashkiliy chora-tadbirlar 1—3-ilovalarga* muvofiq tasdiqlansin.

2. Davlat mulkini davlat tasarrufidan chiqarish va xususiylashtirishni amalga oshirishda, ko‘rsatilgan tarmoqlarning o‘ziga xos xususiyatlari hisobga olinib, quyidagi qonun-qoidalarga amal qilinsin:

ijtimoiy adolatni, har bir xodim va butun mehnat jamoasi manfaatlari va huquqlarini himoya qilishni ta’minlash;

davlat tasarrufidan chiqarilayotgan va xususiylashtiriladigan korxonalar (tashkilotlar)ning tashkiliy-huquqiy shakllarini mehnat jamoasi tomonidan mustaqil ravishda belgilash;

mehnat jamoalarining talabnomalariga ko‘ra quyi tuzilma bo‘g‘inlarni, ularning tayyorligini hisobga olgan holda, mulkchilikning boshqa shakllariga birinchi navbatda aylantirish;

mazkur korxonadan pensiyaga chiqqan mehnat faxriylariga, shuningdek, ushbu korxonada kamida 10 yil ishlagan mehnat jamoasi a’zolariga imtiyozli shartlarda va pulini bo‘lib-bo‘lib to‘lash sharti bilan aksiyalarni, mulkni sotib olish imkoniyatini berish;

davlat tasarrufidan chiqarilayotgan korxonalarning o‘z balanslarida bo‘lgan ijtimoiy infrastruktura va atrof muhitni muhofaza qilish obyektlarini mehnat jamoalarining o‘z mulki qilib bepul berish;

qurilishi tugallanmagan obyektlarni va davlat korxonalari (tashkilotlari)ni, ularning tarkibiy bo‘linmalarini asosan kimoshdi savdosi orqali va tanlovlar bo‘yicha shaxsiy mulk qilib sotishni amalga oshirish;

davlat tasarrufidan chiqarish va xususiylashtirish jarayonlarining to‘liq oshkoraligini, ulardan tarmoq xodimlarining mufassal xabardorligini hamda ularning korxonalar jamoalari, kasaba uyushmalari va jamoat tashkilotlari tomonidan nazorat qilinishini ta’minlash.

3. O‘zbekiston Respublikasi Davlat mulki qo‘mitasi, uning hududiy boshqarmalari “Mahalliy sanoat” korporatsiyasi, “O‘zbeksavdo”, “O‘zmaishiyxizmat” uyushmalari, Qoraqalpog‘iston Respublikasi Vazirlar Kengashi, viloyatlar, shaharlar va tumanlarning hokimliklari bilan birgalikda tegishli hududlardagi mahalliy sanoat, aholiga maishiy xizmat ko‘rsatish, savdo, umumiy ovqatlanish korxonalarini davlat tasarrufidan chiqarish va xususiylashtirishga doir chora-tadbirlarni belgilangan muddatlarda amalga oshirishni, ularga amaliy yordam ko‘rsatishni ta’minlasinlar.

Belgilab qo‘yilsinki, 5 mln. so‘m va undan ortiq ustav fondi bo‘lgan korxonalarni mulkchilikning boshqa shakllariga, aylantirish O‘zbekiston Respublikasi Davlat mulki qo‘mitasining, 5 mln. so‘mdan kam bo‘lganda esa — uning hududiy boshqarmalarining qaroriga muvofiq amalga oshiriladi.

5. O‘zbekiston Respublikasi Davlat mulki qo‘mitasi:

O‘zbekiston Respublikasi Moliya vazirligi bilan birgalikda bir oy muddat ichida Davlat mulkini va aksiyalarni bo‘lib-bo‘lib to‘lash sharti bilan sotib olish, sotish tartibi to‘g‘risida Vaqtinchalik nizomni ishlab chiqsin va qabul qilsin;

davlat tasarrufidan chiqarish va xususiylashtirish borasida to‘plangan tajribani hisobga olib 4 va 5-bandlarda ko‘rsatilgan puxta ishlangan me’yoriy hujjatlarni tasdiqlash uchun 1993-yilning I choragida Vazirlar Mahkamasiga kiritsin;

1992-yilning 1-aprelida o‘tkazilgan asosiy fondlarni baholashni hisobga olib davlat tasarrufidan chiqarilishi va xususiylashtirilishi kerak bo‘lgan obyektlarning dastlabki narxlarini belgilash bo‘yicha tarmoq me’yoriy va uslubiy tavsiyanomalarni bir oy muddat ichida ishlab chiqsin va ularni vazirliklar, idoralarga, uyushmalar, konsernlar, korporatsiyalar va boshqa xo‘jalik birlashmalariga yetkazish;

berilgan huquqqa muvofiq aksionerlik jamiyatlari, boshqa xo‘jalik jamiyatlari va shirkatlarning ta’sischisi huquqi bilan chiqsin va davlat korxonalari va tashkilotlarini qayta o‘zgartirish tugallangach davlat mulkida qolgan aksiyalar (paylar, ulushlar)ni saqlash va boshqarish huquqi bilan “O‘zdavjamg‘arma”ga bersin.

6. Belgilab qo‘yilsinki:

mahalliy sanoat, savdo va umumiy ovqatlanish korxonalari (tashkilotlari) 10-ilovaga muvofiq davlat tasarrufidan chiqarilmaydi va xususiylashtirilmaydi;

“Fayz” ishlab chiqarish birlashmasi, “Polimer” ishlab chiqarish birlashmasi, Uychi pillakashlik ishlab chiqarish birlashmasi va Ulug‘bek nomidagi Samarqand plastmassa buyumlari zavodini mulkchilikning boshqa shakllariga aylantirish Vazirlar Mahkamasining maxsus qarori bilan amalga oshiriladi;

me’yorlashtirilgan tovarlar, non-bulka mahsulotlari sotuvchi savdo korxonalarini davlat tasarrufidan chiqarish va xususiylashtirish O‘zbekiston Respublikasi Davlat mulki qo‘mitasi (uning hududiy organlari), “O‘zbeksavdo” uyushmasi (uning hududiy savdo-sanoat konsernlari) bilan yangi xususiy mulk egasi o‘rtasida tomonlarning o‘zaro majburiyatlari to‘g‘risida bitimlar tuzilgan taqdirda amalga oshiriladi;

umumiy ta’lim maktablariga, internatlarga, oliy va o‘rta maxsus o‘quv yurtlariga, hunar-texnika bilim yurtlariga, zavod va fabrikalar jamoalariga xizmat ko‘rsatuvchi umumiy ovqatlanish davlat korxonalarini mulkchilikning boshqa shakllariga aylantirish xizmat ko‘rsatilayotgan jamoalarning manfaatlarini hisobga oladigan tomonlarning o‘zaro majburiyatlari to‘g‘risida tuzilgan bitim asosida amalga oshiriladi.

7. “Mahalliy sanoat” davlat korporatsiyasi 15 kun muddat ichida, “O‘zmaishiyxizmat”, “O‘zbeksavdo” uyushmalari — bir oy mobaynida O‘zbekiston Respublikasi Davlat mulki qo‘mitasiga 1992 — 1993-yillarda — birinchi bosqichda davlat tasarrufidan chiqarilishi yoki xususiylashtirilishi mo‘ljallanayotgan korxona (tashkilot)larning obyektlar bo‘yicha ro‘yxatini mehnat jamoalari tomonidan tanlangan qayta o‘zgartirishning tashkiliy-huquqiy shakllarini ko‘rsatgan holda taqdim etsinlar.

10. O‘zbekiston Respublikasi Davlat mulki qo‘mitasi “Mahalliy sanoat” davlat korporatsiyasi, “O‘zbeksavdo”, “O‘zmaishiyxizmat” uyushmalari ishtirokida davlat tasarrufidan chiqarish va xususiylashtirish to‘g‘risida qaror qabul qilishda tomonlarning o‘zaro majburiyatlari to‘g‘risida arizachilar bilan bitimlar tayyorlasin va tuzsin, ularda davlat ehtiyojlari va aholini ijtimoiy himoya qilish maqsadida muayyan davr uchun qayta o‘zgartirilgan korxonaning yo‘nalishini, tovarlarning ayrim turlarini ishlab chiqarish, mahsulotlar yetkazib berish, ishlar, xizmatlarni bajarish hajmlarini saqlab qolish nazarda tutilsin.

“O‘zshartnomasavdo” respublika aholisi va xalq xo‘jaligi ehtiyojlari asosida davlat tasarrufidan chiqarilgan va xususiylashtirilgan korxonalar o‘rtasida ko‘rsatib o‘tilgan bitimlarga muvofiq davlat ehtiyojlari uchun va aholini ijtimoiy himoya qilish maqsadida mahsulotlar yetkazib berish, ishlar, xizmatlarni bajarish uchun buyurtmalarni joylashtirsin.

“O‘zshartnomasavdo”, “O‘zboshengilta’minotsotish”, “O‘zistiqbolstat” davlat qo‘mitasi, “O‘zbeksavdo” uyushmasi bitimlarni imzolagan korxonalarga moddiy-texnika resurslarining zarur limitlarini ajratishni hamda davlat ehtiyojlari va aholini ijtimoiy himoya qilish maqsadida ishlab chiqarilayotgan mahsulotlar (ishlar, xizmatlar)ni yetkazib berish uchun o‘z vaqtida shartnomalar tuzishni ta’minlasinlar.

11. “Mahalliy sanoat” davlat korporatsiyasi, “O‘zbeksavdo”, “O‘zmaishiyxizmat” uyushmalari:

o‘z tarkiblariga kiruvchi korxonalar va tashkilotlar mehnat jamoalarida davlat tasarrufidan chiqarish va xususiylashtirish jarayonining iqtisodiy va ijtimoiy mohiyati to‘g‘risida, davlat korxonalarini qayta o‘zgartirishning turli tashkiliy-huquqiy shakllarining o‘ziga xos xususiyatlari, mehnat jamoalarining huquqlari, xodimlarni ijtimoiy himoya qilish choralari haqida va xususiylashtirish bilan bog‘liq boshqa masalalar bo‘yicha tushuntirish ishlarini olib borsinlar;

korxonalar va ularning bo‘linmalari mehnat jamoalarining davlat tasarrufidan chiqarishni amalga oshirishda mavjud xo‘jalik tuzilmalariga kirish yoki chiqish va yangi tashkil etilganlariga kirish to‘g‘risida mustaqil qaror qabul qilish huquqini kafolatlasinlar;

davlat korxonalari va tashkilotlarini mulkchilikning boshqa shakllariga aylantirishga doir zarur tayyorgarlik hujjatlarini ishlab chiqishni ta’minlasinlar.

12. O‘zbekiston Respublikasi Mehnat vazirligi “Mahalliy sanoat” davlat korporatsiyasi, “O‘zbeksavdo”, “O‘zmaishiyxizmat” uyushmalari bilan birgalikda bo‘shab qolgan xodimlarni qayta tayyorlash, ishga joylashtirish va O‘zbekiston Respublikasining “Aholini ish bilan ta’minlash haqida”gi Qonuniga muvofiq ularning boshqa huquqlarini ta’minlash bo‘yicha kompleks chora-tadbirlarni ishlab chiqsin va amalga oshirsin.

“Mahalliy sanoat” davlat korporatsiyasi, “O‘zmaishiyxizmat”, “O‘zbeksavdo” uyushmalari mahalliy sanoat va kommunal-maishiy xizmat korxonalari, davlat savdosi, umumiy ovqatlanish va matlubot kooperatsiyasi xodimlarining kasaba uyushmalari Markaziy Qo‘mitasi ishtirokida:

davlat tasarrufidan chiqarish va xususiylashtirish davrida korxona ma’muriyatining ilgari tuzilgan jamoa shartnomalarining barcha qoidalariga albatta rioya qilishini;

qayta tuzilgan korxona (tashkilot) davlat ro‘yxatiga olingan paytdan boshlab uch oy mobaynida yangi jamoa shartnomalari tuzishini;

tarmoqlarda band bo‘lgan yollanma xodimlar ijtimoiy manfaatlarining himoya qilinishini ta’minlasinlar.

13. O‘zbekiston Respublikasi Moliya vazirligi huzuridagi davlat mulki fondi:

“Mahalliy sanoat” davlat korporatsiyasi, “O‘zbeksavdo” va “O‘zmaishiyxizmat” uyushmalariga davlatga tegishli ulushlar (paylar, aksiyalar)ga muvofiq aksionerlik jamiyatlari, boshqa jamiyatlar va shirkatlar faoliyatiga rahbarlik qilish huquqlarini berishni;

14. O‘zbekiston Respublikasi Markaziy bankiga:

O‘zbekiston Respublikasi Davlat mulki qo‘mitasi, “Mahalliy sanoat” davlat korporatsiyasi, “O‘zbeksavdo”, “O‘zmaishiyxizmat” uyushmalari bilan birgalikda davlat tasarrufidan chiqarilishi yoki xususiylashtirilishi kerak bo‘lgan korxonalar (tashkilotlar)ning kreditor qarzlarini uzish mexanizmi masalasini 15 kun muddat ichida ishlab chiqish;

O‘zbekiston Respublikasi Oliy Kengashining 1991-yil 19-noyabrdagi 426-XII-son qaroriga muvofiq davlat tasarrufidan chiqariladigan yoki xususiylashtiriladigan savdo va umumiy ovqatlanish korxonalari hamda tashkilotlarining mulklarini sotib olishda yuridik va jismoniy shaxslarga qarz berishni nazarda tutish tavsiya etilsin.

15. Mazkur qarorning bajarilishini nazorat qilish Bosh vazir o‘rinbosarlari A.N. Voznenko va B.S. Hamidov o‘rtoqlar zimmasiga yuklatilsin. Ushbu qarorning qanday amalga oshirilayotganligi 1993-yilning yanvar oyida, undan keyin esa yilning har choragida bir marta ko‘rib chiqilsin.

“Mahalliy sanoat” davlat korporatsiyasi:

“Fonon” Toshkent ilmiy-ishlab chiqarish birlashmasi;

Toshkent oqova suvlarni biologik tozalaydigan eksperimental stansiyasi;

Amaliy san’at muzeyi.

“Savdo” O‘zbekiston Davlat-aksionerlik uyushmasi:

“Olmos” Respublika ulgurji-chakana savdo birlashmasi;

Tovarlar sifati bo‘yicha Davlat inspeksiyasi;

Taom tayyorlash texnologiyasi va umumiy ovqatlanish iqtisodiyoti Respublika laboratoriyasi;

O‘zbekiston iste’mol bozori va marketing ilmiy-tadqiqot instituti;

Respublika hunar-texnika bilim yurti;

Malaka oshirish instituti;

davlat zaxiralarini doimiy joylashtirib borishni ta’minlovchi sovuqxonalar, ombor xo‘jaligi obyektlari.