O‘zbekiston Respublikasida koronavirus infeksiyasi tarqalishining oldini olish, koronavirus bo‘yicha epidemiologik vaziyatning yomonlashish ehtimoli belgilarini o‘z vaqtida aniqlash va kasallanish xavfini kamaytirish hamda bemorlarga malakali tibbiy yordam ko‘rsatishga qaratilgan profilaktik va epidemiyaga qarshi kechiktirib bo‘lmaydigan zarur tadbirlarni amalga oshirish maqsadida Vazirlar Mahkamasi qaror qiladi:

1. Quyidagilar:

Toshkent viloyatining Zangiota tumanida O‘zbekiston Respublikasi Sog‘liqni saqlash vazirligi huzurida koronavirus infeksiyasi bilan kasallangan bemorlarni davolashga mo‘ljallangan 2 ta ixtisoslashgan tibbiyot majmualari (keyingi o‘rinlarda — ixtisoslashgan tibbiyot majmualari) barpo etilganligi;

ixtisoslashgan tibbiyot majmualarining qurilishi tugatilgan binolarida koronavirus infeksiyasi bilan kasallangan bemorlarni davolash maqsadida 2 ta shifoxona tashkil etilib, ularni boshqarish vaqtinchalik 1-son Respublika klinik shifoxonasi va 3-son Toshkent shahar yuqumli kasalliklar shifoxonasiga yuklanganligi ma’lumot uchun qabul qilinsin.

2. O‘zbekiston Respublikasi Sog‘liqni saqlash vazirligining ixtisoslashgan tibbiyot majmualari negizida koronavirus infeksiyasi bilan kasallangan bemorlarni davolashga mo‘ljallangan maxsus “1-son Zangiota” shifoxonasini (keyingi o‘rinlarda — maxsus shifoxona) tashkil etish to‘g‘risida taklifiga rozilik berilsin.

3. Quyidagilar:

Koronavirus infeksiyasi bilan kasallangan bemorlarni davolashga mo‘ljallangan maxsus “1-son Zangiota” shifoxonasi tuzilmasi 1-ilovaga muvofiq;

4. Belgilansinki, maxsus shifoxona:

O‘zbekiston Respublikasi Sog‘liqni saqlash vazirligining yuridik shaxs maqomiga ega bo‘lgan davlat muassasasi shaklidagi tarkibiy bo‘linmasi hisoblanib, mustaqil balansga hamda shaxsiy g‘azna hisobvaraqlariga ega bo‘ladi;

direktor va uning o‘rinbosarlari O‘zbekiston Respublikasi sog‘liqni saqlash vaziri tomonidan lavozimga tayinlanadi va lavozimdan ozod etiladi;

malakali tibbiy xizmatlar ko‘rsatishni tashkil etish maqsadida boshqa tibbiyot muassasalaridan tibbiyot xodimlari, yordamchi va texnik xodimlarni jalb qilish huquqiga ega.

5. O‘zbekiston Respublikasi Sog‘liqni saqlash vazirligi ikki hafta muddatda:

maxsus shifoxonalarning ustavi belgilangan tartibda tasdiqlanishini;

1-son Respublika klinik shifoxonasi va 3-son Toshkent shahar yuqumli kasalliklar shifoxonasi hamda ularga xizmat ko‘rsatayotgan tadbirkorlik subyektlari bilan tuzilgan shartnomalarning maxsus shifoxonalar bilan qayta rasmiylashtirilishini ta’minlasin.

6. O‘zbekiston Respublikasi Sog‘liqni saqlash vazirligi, Ichki ishlar vazirligi, Mudofaa vazirligi, Milliy gvardiyasi, Davlat xavfsizlik xizmati hamda Toshkent shahar hokimligining Toshkent shahrida va Toshkent viloyatida koronavirus infeksiyasini yuqtirgan shaxslarni davolash maqsadida tashkil etiladigan vaqtinchalik shifoxonalarni (keyingi o‘rinlarda — vaqtinchalik shifoxonalar) quyidagi tartibda;

O‘zbekiston gimnastika federatsiyasining “Universal” sport majmuasida tashkil etilgan 750 o‘ringa mo‘ljallangan vaqtinchalik shifoxonani O‘zbekiston Respublikasi Ichki ishlar vazirligining markaziy gospitaliga;

“O‘zekspomarkaz” MKK AJ 1 va 2-son pavilyonida tashkil etilgan 814 o‘ringa mo‘ljallangan vaqtinchalik shifoxonani O‘zbekiston Respublikasi Mudofaa vazirligining markaziy harbiy klinik gospitaliga;

“O‘zbekiston temir yo‘llari” AJning “Nazarbek” sog‘lomlashtirish maskanida tashkil etilgan 350 o‘ringa mo‘ljallangan vaqtinchalik shifoxonani Milliy gvardiya va “O‘zbekiston temir yo‘llari” AJga;

Yoshlik sport majmuasida tashkil etilgan 520 o‘ringa mo‘ljallangan vaqtinchalik shifoxonani O‘zbekiston Respublikasi Davlat xavfsizlik xizmatining markaziy harbiy gospitaliga;

“O‘zekspomarkaz” MKK AJ 3 va 4-son pavilyonida tashkil etilgan 1000 o‘ringa mo‘ljallangan vaqtinchalik shifoxona, Sergeli tumanidagi 2-son Bolalar va o‘smirlar sport maktabida tashkil etilgan 250 o‘ringa mo‘ljallangan vaqtinchalik shifoxona va Olimpiya zaxiralari sport saroyida 500 o‘ringa mo‘ljallangan vaqtinchalik shifoxonani Toshkent shahar hokimligiga biriktirish to‘g‘risidagi takliflariga rozilik berilsin.

O‘zbekiston Respublikasi Sog‘liqni saqlash vazirligiga Moliya vazirligi bilan kelishgan holda koronavirus infeksiyasini yuqtirgan bemorlar bilan muloqotga kirishadigan, bemorlar joylashtirilgan obyektlarda (statsionar davolash muassasalarida) davolanayotgan bemorlar sonidan va xodimlarning ishlash xususiyatidan kelib chiqib tibbiyot xodimlari va boshqa xodimlarning me’yorlarini tasdiqlash huquqi berilsin.

Toshkent shahri va Toshkent viloyati hokimliklari O‘zbekiston Respublikasi Sog‘liqni saqlash vazirligi, Ichki ishlar vazirligi, Mudofaa vazirligi, Milliy gvardiyasi hamda Davlat xavfsizlik xizmati bilan birgalikda vaqtinchalik shifoxonalar faoliyatiga jalb qilingan tibbiyot, sanitariya-epidemiologik osoyishtalik va jamoat salomatligi xizmati va boshqa xodimlar, shu jumladan harbiy xizmatchilarni joylashtirish choralarini ko‘rsinlar.

Vaqtinchalik shifoxonalar faoliyatiga jalb qilingan xodimlar (harbiy xizmatchilar) va boshqa shaxslarni joylashtirishda binolarni saqlash bilan bog‘liq xarajatlar ushbu qarorning 7-bandi “a” kichik bandining uchinchi xatboshida belgilangan tartibda amalga oshirilishi belgilab qo‘yilsin.

7. Belgilansinki:

a) vaqtinchalik shifoxonalarning:

kadrlar va buxgalteriya xizmatlari tegishlicha vaqtinchalik shifoxonalar biriktirilgan tashkilotlar tomonidan;

binolarni saqlash, jumladan, issiqlik va suv ta’minoti, kanalizatsiya, elektr energiyasi, tabiiy gaz, obodonlashtirish, texnik ko‘maklashish xarajatlari tegishlicha binolarni balansda saqlovchi tashkilotlar tomonidan amalga oshiriladi;

b) vaqtinchalik shifoxonalarga O‘zbekiston Respublikasi Ichki ishlar vazirligi, Mudofaa vazirligi hamda Davlat xavfsizlik xizmatining gospitallari va boshqa budjet tashkilotlaridan biriktiriladigan mutaxassis va xodimlarning asosiy ish joyi bo‘yicha pul ta’minoti (ish haqi) saqlab qolinadi;

v) maxsus shifoxona to‘liq foydalanishga topshirilgunga qadar belgilangan bosh pudratchi tashkilotlar tomonidan muassasalarni saqlash bilan bog‘liq joriy xarajatlar buyurtmachilar tomonidan taqdim etilgan hisob-kitoblar asosida O‘zbekiston Respublikasi Moliya vazirligi huzuridagi Inqirozga qarshi kurashish jamg‘armasi mablag‘lari hisobidan qoplanadi.

11. Vaqtinchalik shifoxonalarni joriy saqlash, shuningdek, bemorlarni hamda jalb qilingan mutaxassis va boshqa xodimlarni oziq-ovqat mahsulotlari, dori vositalari, niqob, dezinfeksiya vositalari va boshqa zarur anjomlar bilan ta’minlash xarajatlari O‘zbekiston Respublikasi Moliya vazirligi huzuridagi Inqirozga qarshi kurashish jamg‘armasi mablag‘lari va qonunchilik hujjatlarida taqiqlanmagan boshqa manbalar hisobidan amalga oshiriladi.

12. Belgilansinki, Qoraqalpog‘iston Respublikasi, viloyatlar va Toshkent shahrida Inqirozga qarshi kurashish respublika komissiyasi bilan kelishilgan holda qo‘shimcha vaqtinchalik shifoxonalar tashkil etilganda, mazkur qaror bilan belgilangan tartibda chora-tadbirlar amalga oshiriladi va ushbu qaror bilan o‘rnatilgan normativlar amal qiladi.

13. O‘zbekiston Respublikasi Sog‘liqni saqlash vazirligi Ichki ishlar vazirligi, Mudofaa vazirligi, Milliy gvardiyasi hamda Davlat xavfsizlik xizmati bilan birgalikda uch kun muddatda:

vaqtinchalik shifoxonalarni koronavirus infeksiyasi bilan kasallangan bemorlarga samarali tibbiy xizmat ko‘rsatish uchun zarur bo‘lgan tibbiyot xodimlari va boshqa xodimlar bilan (zarur hollarda, vaqtinchalik mehnat shartnomasi asosida), tibbiy asbob-uskunalar, dori vositalari, tibbiyot buyumlari, sarflash vositalari, shaxsiy himoya, dezinfeksiya vositalari, PZR testlar, reagentlar va boshqalar bilan ta’minlash choralarini ko‘rsin;

Ichki ishlar vazirligi, Mudofaa vazirligi, Milliy gvardiya hamda Davlat xavfsizlik xizmatining tibbiyot muassasalaridagi hamda markazlashgan xaridlar bo‘yicha olingan tovarlarni qayta taqsimlash orqali vaqtinchalik shifoxonalarning tezkor tayyorgarligini ta’minlasin, ularning butligini va maqsadli foydalanilishini hamda vaqtinchalik shifoxonalar faoliyati to‘xtatilgandan keyin barcha texnologik jihozlar qaytarilishini ta’minlasin.

14. O‘zbekiston Respublikasi Sog‘liqni saqlash vazirligi, Moliya vazirligi, Ichki ishlar vazirligi, Mudofaa vazirligi, Milliy gvardiyasi hamda Davlat xavfsizlik xizmatining pandemiya sharoitida maxsus shifoxona hamda vaqtinchalik shifoxona faoliyatini tezkor tashkil etish maqsadida:

zarur bo‘lgan dori vositalari, dezinfeksiya buyumlari, tibbiy buyumlar va tibbiy texnikalar va sarflash materiallar, xo‘jalik va boshqa tovarlarni (xizmatlarni) yetkazib berish bo‘yicha, istisno tariqasida, tender (tanlov) o‘tkazmasdan to‘g‘ridan-to‘g‘ri shartnoma tuzish;

bemorlar va xodimlarni ovqatlantirish, kir yuvish, tashish, chiqindilarni chiqarish hamda utilizatsiya qilish va zarur hollarda laboratoriya va diagnostika xizmatlarini tashkil etishda autsorsing xizmat ko‘rsatuvchi tashkilotlar bilan, istisno tariqasida, tender (tanlov) o‘tkazmasdan to‘g‘ridan-to‘g‘ri shartnoma tuzish to‘g‘risidagi takliflariga rozilik berilsin.

15. O‘zbekiston Respublikasi Sog‘liqni saqlash vazirligi Moliya vazirligi hamda manfaatdor vazirlik va idoralar bilan birgalikda ikki xafta muddatda:

koronavirus infeksiyasi bilan kasallangan bemorlarni davolashga moslashtirilgan barcha turdagi ambulator va statsionar davolash muassasalari faoliyatini tashkil etish to‘g‘risidagi nizomni ishlab chiqsin va Vazirlar Mahkamasiga tasdiqlash uchun kiritsin;

koronavirus bilan kasallangan bemorlarni davolash muassasalarida ishlayotgan tibbiyot xodimlariga O‘zbekiston Respublikasi Prezidenti tomonidan belgilangan maxsus qo‘shimcha to‘lovlarni takomillashtirish hamda anesteziolog-reanimatolog vrachlarning mehnatini yanada rag‘batlantirish bo‘yicha Vazirlar Mahkamasiga taklif kiritsin.

16. Ambulator poliklinika muassasalari qoshida tashkil etilgan mobil brigadalar xodimlariga mexnat qonunchiligi bilan o‘rnatilgan tungi vaqtda va bayram kunlari ishlaganligi uchun nazarda tutilgan miqdorlarda haq to‘lanishi belgilansin.

17. O‘zbekiston Respublikasi Transport vazirligi koronavirus infeksiyasi bilan kasallangan bemorlarni davolashga moslashtirilgan maxsus shifoxona, shu jumladan ixtisoslashgan tibbiyot majmuasi hamda vaqtinchalik shifoxonadan sog‘ayib chiqqan bemorlarni hamda tibbiyot xodimlarini tashish uchun tegishli vazirlik va idoralarning buyurtmasi asosida kerakli miqdorda avtobuslar ajratilishini ta’minlasin.

18. O‘zbekiston Respublikasi Bojxona qo‘mitasi Sog‘liqni saqlash vazirligi bilan birgalikda Sog‘liqni saqlash vazirligi hamda vazirlik va idoralarga koronavirus infeksiyasi tarqalishining oldini olish bo‘yicha chora-tadbirlar doirasida muruvvat yordami tariqasida yuborilgan va yuk hujjatlari jo‘natuvchi tomonidan lozim darajada rasmiylashtirilmagan tovar-moddiy boyliklar istisno tariqasida, bojxonadan chiqarilishi va taqsimlanishi bo‘yicha zarur amaliy yordam ko‘rsatsinlar.

19. O‘zbekiston Respublikasi Moliya vazirligi quyidagi maqsadlar uchun Inqirozga qarshi kurashish jamg‘armasidan:

maxsus shifoxonani saqlash va boshqa xarajatlar uchun asoslangan hisob-kitoblariga muvofiq;

O‘zbekiston Respublikasi Ichki ishlar vazirligi, Mudofaa vazirligi, Milliy gvardiyasi, Davlat xavfsizlik xizmati hamda Qoraqolpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan taqdim etilgan hisob-kitoblarga asosan vaqtinchalik shifoxonalar xarajatlarini amalga oshirish uchun mablag‘ ajratilishini ta’minlasin.

20. Belgilansinki:

O‘zbekiston Respublikasi Mudofaa vazirligi va Milliy gvardiyasi — koronavirus infeksiyasi bilan kasallangan bemorlarni davolashga moslashtirilgan maxsus shifoxonani perimetri bo‘ylab kecha-kunduz qo‘riqlashga;

O‘zbekiston Respublikasi Ichki ishlar vazirligi va Milliy gvardiyasi — koronavirus infeksiyasi bilan kasallangan bemorlarni davolashga moslashtirilgan maxsus shifoxonada ichki tartib-qoidalariga rioya etilishini ta’minlashga va jamoat tartibini saqlashga mas’ul hisoblanadi.

21. Mazkur qarorning bajarilishini nazorat qilish O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari B.A. Musayev, O‘zbekiston Respublikasi sog‘liqni saqlash vaziri A.K. Shadmanov, O‘zbekiston Respublikasi ichki ishlar vaziri P.R. Bobojonov, O‘zbekiston Respublikasi mudofaa vaziri B.N. Qurbanov, O‘zbekiston Respublikasi Milliy gvardiya qo‘mondoni R.M. Djurayev va O‘zbekiston Respublikasi Davlat xavfsizlik xizmati raisi A.A. Azizov zimmasiga yuklansin.