Vazirlar Mahkamasi qaror qiladi:

1. Vazirliklar, idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimlari, budjetdan mablag‘ bilan ta’minlanadigan tashkilotlar va muassasalar O‘zbekiston Respublikasi Prezidentining 1992-yil 27-iyundagi Farmoniga muvofiq oshirilgan miqdorlarda o‘z vaqtida ish haqi to‘lashni ta’minlasinlar. Bunda xodimlarning ish haqini oshirish bilan bog‘liq qo‘shimcha xarajatlarning 25 foizi budjetdagi muassasalar va tashkilotlarning smeta bo‘yicha umumiy xarajatlarini qisqartirish hisobiga qidirib topilsin.

2. Oliy o‘quv yurtlari talabalariga, aspirantlarga, doktorantlarga, texnikumlarning hamda kiyim-kechak va oziq-ovqat bilan ta’minlanmagan hunar-texnika bilim yurtlarining o‘quvchilariga stipendiyalar ilovaga muvofiq belgilansin.

Imtiyozli ovqatlanish uchun oylik qo‘shimcha to‘lovlarning amaldagi miqdorlari hamda talabalar oshxonalari va tamaddixonalaridagi tushliklar qiymatidan 50 foizli chegirmalar saqlab qolinsin.

3. Respublika Oliy va o‘rta maxsus ta’lim vazirligi hamda Xalq ta’limi vazirligi bir hafta muddat ichida oliy o‘quv yurtlarining talabalariga hamda texnikumlar va hunar-texnika bilim yurtlarining o‘quvchilariga stipendiyalar tayinlash va to‘lash tartibi to‘g‘risidagi yo‘riqnomaga o‘zgartishlar kiritsinlar.

4. Mehnat vazirligi, Moliya vazirligi, O‘zbekiston Kasaba uyushmalari Federatsiyasi Kengashi hamda boshqa manfaatdor vazirliklar va idoralar bilan birgalikda xodimlarni rag‘batlantirishni va mehnatga undashni ta’minlovchi hamda o‘rta maxsus va hunar-texnika bilim yurtlarining o‘qituvchilari, tarbiyachilari, muallimlari, professor-o‘qituvchilar tarkibi, ilmiy xodimlar va vrachlarning ish haqini 1,8 baravar, budjetdagi muassasa va tashkilotlar boshqa xodimlarining ish haqini esa 1,5 baravar oshirishni nazarda tutuvchi tarif stavkalari va maoshlarning yangi miqdorlarini ishlab chiqsin va tasdiqlasin.

5. O‘zbekiston Respublikasi Ijtimoiy ta’minot vazirligi, Pensiya jamg‘armasining O‘zbekiston Respublika bo‘limi, Mehnat vazirligi, Davlat statistika qo‘mitasi, Moliya vazirligi bilan birgalikda 1992-yilning 1-iyuligacha pensiyaga chiqqan pensionerlarning pensiyalarini qayta hisoblash uchun tuzatish kiritish koeffitsiyentlarini 1992-yil 15-avgustgacha ishlab chiqsin va Vazirlar Mahkamasiga kiritsin.

6. Pensiya jamg‘armasining O‘zbekiston Respublika bo‘limi, “O‘zsanoatqurilishbank”, “O‘zdehqonchiliksanoatbank” va boshqa tijorat banklari Vazirlar Mahkamasining 1992-yil 30-apreldagi 218-son qaroriga muvofiq O‘zbekiston Respublikasi Prezidentining 1992-yil 27-iyundagi Farmonida belgilangan oshirilgan miqdorlarda pensiya to‘lashni ta’minlovchi sug‘urta badallarining to‘la va o‘z vaqtida tushishini ta’minlasinlar.

7. Vazirliklar, idoralar, uyushmalar, konsernlar, birlashmalar, korxonalar va xo‘jaliklar belgilangan ish haqining eng oz miqdorini hisobga olgan holda mehnat unumdorligini oshirish va ishlab chiqarish hajmlarini ko‘paytirish hisobiga ishlovchilarning ish haqini yanada o‘stirishni ta’minlovchi choralarni amalga oshirsinlar.

8. O‘zbekiston Respublikasi Moliya vazirligi, Pensiya jamg‘armasining O‘zbekiston Respublika bo‘limi 1992-yilning ikkinchi yarmi uchun budjetlarda O‘zbekiston Respublikasi Prezidentining Farmonida belgilangan ish haqi, stipendiyalar va pensiyalarni oshirish uchun zarur mablag‘lar ajratishni nazarda tutsinlar.

9. O‘zbekiston Respublikasi Mehnat vazirligi Vazirlar Mahkamasiga ko‘rib chiqish uchun xalq xo‘jaligi barcha tarmoqlari xodimlarining kasb-malaka guruhlarini qamrab oluvchi yagona tarif setkasi asosida mehnatga haq to‘lash tartibini takomillashtirish yuzasidan 1992-yil 1-sentabrgacha takliflar kiritsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari, Qoraqalpog‘iston Respublikasi Vazirlar Kengashining Raisi, viloyatlar va Toshkent shahar hokimlari zimmasiga yuklatilsin