O‘zbekiston Respublikasining “O‘zbekiston Respublikasining Markaziy banki to‘g‘risida”gi, “Banklar va bank faoliyati to‘g‘risida”gi qonunlari va O‘zbekiston Respublikasi Prezidentining 2019-yil 5-fevraldagi PQ-4160-son “Jahon banki va Xalqaro moliya korporatsiyasining “Biznes yuritish” yillik hisobotida O‘zbekiston Respublikasining reytingini yaxshilashga doir qo‘shimcha chora-tadbirlar to‘g‘risida”gi qaroriga muvofiq O‘zbekiston Respublikasi Markaziy banki Boshqaruvi qaror qiladi:

1. O‘zbekiston Respublikasi Markaziy banki Boshqaruvining 2018-yil 28-apreldagi 16/21-son qarori (ro‘yxat raqami 3028, 2018-yil 29-iyun) (Qonun hujjatlari ma’lumotlari milliy bazasi, 02.07.2018-y., 10/18/3028/1418-son) bilan tasdiqlangan Tijorat banklarida kassa ishini tashkil etish, naqd pul va boshqa qimmatliklarni inkassatsiya qilishga doir yo‘riqnomaga ilovaga muvofiq o‘zgartirishlar va qo‘shimcha kiritilsin.

2. Mazkur qaror rasmiy e’lon qilingan kundan e’tiboran kuchga kiradi.

1. 15-banddagi “Bank binosida joylashmagan amaliyot (operatsion) kassalardagi naqd pullar” degan so‘zlar “Amaliyot kassalaridagi naqd pullar” degan so‘zlar bilan almashtirilsin.

2. 52-bandning birinchi xatboshisidan ikkinchi jumla chiqarib tashlansin.

3. 109-bandning birinchi xatboshisi quyidagi tahrirda bayon etilsin:

“109. Mijozning inkassatsiya sumkasiga (qopiga) naqd pul tushumlari bilan birgalikda tijorat banklarining hisob-kitob cheklari ham solingan bo‘lsa, nazoratchi har bir hisob-kitob chekining to‘g‘ri rasmiylashtirilganligini (imzolar mavjudligini, so‘z va raqam bilan yozilgan summalarning o‘zaro mos kelishini, ularni to‘lov uchun qabul qilingan xo‘jalik yurituvchi subyektning mas’ul xodimining imzosi mavjudligini) tekshirgan holda kassirlardan qabul qilib olishi kerak.”.

4. 126-bandda:

o‘n to‘rtinchi xatboshida “ko‘k yo‘lli bo‘lishi shart.” degan so‘zlar “ko‘k yo‘lli;” degan so‘zlar bilan almashtirilsin;

quyidagi mazmundagi o‘n beshinchi xatboshi bilan to‘ldirilsin:

“100 000 so‘mlik banknotlar uchun — eni 15 mm bo‘lgan ikkita to‘q jigarrang yo‘lli bo‘lishi shart.”.

o‘n beshinchi xatboshi o‘n oltinchi xatboshi deb hisoblansin.

5. 131-band quyidagi tahrirda bayon etilsin:

“131. Pul dastalarini polietilen paketlarga joylashtirilish orqali banknotlar bog‘lami shakllantirilganda, har bir polietilen paketga 10 ta pul dastasi solinib, paketning ochiq tomonini payvandlab, yopishtirish uchun pul bog‘lamlarini shakllantirish uskunasiga joylanadi. Bunda, pul bog‘lamlarini shakllantirish uskunasi qopqog‘iga o‘rnatilgan klishedagi bank rekvizitlari polietilen paketning ochiq tarafiga avtomatik tarzda bosiladi. Agar, banknotlar bog‘lamini shakllantirishda foydalaniladigan polietilen paket, ikkita polietilen bo‘laklarini payvandlash orqali ishlab chiqarilgan bo‘lsa, bunday hollarda pul bog‘lamlarini shakllantirish uskunasi qopqog‘iga o‘rnatilgan kassir klishesidagi bank rekvizitlari polietilen paketning ikkala tomoniga ham bosilishi lozim. Har bir kassir o‘zi sanagan pullarning bog‘lamini shakllantirishda, o‘ziga biriktirilgan klishedan foydalanishi shart.”.

6. 132-bandning birinchi xatboshisidagi “va 50 000” degan so‘zlar “, 50 000 va 100000” degan so‘zlar bilan almashtirilsin.

7. 150-bandning ikkinchi xatboshisidagi “muhri bilan tasdiqlangan” degan so‘zlar “muhri bilan tasdiqlangan (tadbirkorlik subyektlaridan muhr bilan tasdiqlash talab etilmaydi)” degan so‘zlar bilan almashtirilsin.

8. 9-bobning nomi quyidagi tahrirda bayon etilsin:

“9-bob. Bank tomonidan chakana amaliyotlar va bank binosidan tashqarida joylashgan boshqa kassalarni tashkil etish tartibi”.

9. 154-banddagi “mijozlarga” degan so‘z “jismoniy shaxslarga” degan so‘zlar bilan almashtirilsin.

10. 171-band quyidagi tahrirda bayon etilsin:

“171. Bank tomonidan xo‘jalik yurituvchi subyekt murojaatiga asosan tomonlar o‘rtasida tuzilgan shartnomaga ko‘ra, xo‘jalik yurituvchi subyektning huzurida belgilangan tartibda bank kassalari tashkil etilishi mumkin. Bunda, ushbu tashkil etilgan kassalarda qanday kassa xizmatlarini ko‘rsatilishi, bank va xo‘jalik yurituvchi subyekt o‘rtasida imzolangan shartnomaga asosan belgilab olinadi. Bank binosidan tashqarida tashkil etilgan bitta kassa orqali ham jismoniy shaxslarga ham xo‘jalik yurituvchi subyektlarga kassa xizmatlarini ko‘rsatish taqiqlanadi.

Shuningdek, bankka tegishli mini-bank binosida ham barcha zaruriy sharoitlar yaratilgan hamda xavfsizlik choralari to‘liq ta’minlangan bo‘lsa, belgilangan tartibda kassalar tashkil etilishi hamda chakana amaliyot kassasi orqali jismoniy shaxslarga va mini-bank aylanma kassasi orqali mini-bank mijozlari bo‘lgan xo‘jalik yurituvchi subyektlarga kassa xizmatlari ko‘rsatilishi mumkin.”.

11. 193-banddan “to‘rtburchak muhr bosiladi yoki” degan so‘zlar chiqarib tashlansin.

12. 242-bandning birinchi xatboshidagi “surishtiruv organlari” degan so‘zlar “tergovga qadar tekshiruvni amalga oshiruvchi organlar, surishtiruv organlari” degan so‘zlar bilan almashtirilsin.

13. Yo‘riqnomaning 8a-ilovasidan “M.O‘.(topshiruvchining muhri)” degan so‘zlar chiqarib tashlansin.

14. Yo‘riqnomaning 9-ilovasidan “Naqd pul chekini taqdim etgan mijozning muhri uchun joy” degan so‘zlar chiqarib tashlansin.

15. Yo‘riqnomaning 12-ilovasidagi “Jami bir kunda” va “so‘mlik qimmatliklar chiqim qilindi” degan so‘zlar tegishli ravishda “Kassa mudiriga” va “so‘mlik qimmatliklar topshirildi” degan so‘zlar bilan almashtirilsin.

16. Yo‘riqnomaning 25-ilovasidagi “va 50000” degan so‘zlar “, 50000 va 100000” degan so‘zlar bilan almashtirilsin.