Oʻzbekiston Respublikasi Prezidentining “Sudyalik lavozimlariga nomzodlarni tayyorlash, sudyalar va sudlar apparati xodimlarini qayta tayyorlash, ularning malakasini oshirish tizimini tubdan takomillashtirish chora-tadbirlari toʻgʻrisida” 2019-yil 6-yanvardagi PQ-4096-son qarori ijrosini taʼminlash hamda Oʻzbekiston Respublikasi Adliya vazirligi qoshidagi Yuristlar malakasini oshirish markazi faoliyati samaradorligini yanada oshirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Adliya vazirligi qoshidagi Yuristlar malakasini oshirish markazining ustavi 1-ilovaga muvofiq;

Oʻzbekiston Respublikasi Adliya vazirligi qoshidagi Yuristlar malakasini oshirish markazining tuzilmasi 2-ilovaga muvofiq tasdiqlansin.

2. Oʻzbekiston Respublikasi Moliya vazirligi Oʻzbekiston Respublikasi Adliya vazirligi qoshidagi Yuristlar malakasini oshirish markaziga jami 3 ta, shu jumladan 2 ta xizmat va 1 ta navbatchi yengil avtotransport vositasini saqlashga limit ajratsin.

3. Vazirlar Mahkamasining “Oʻzbekiston Respublikasi Adliya vazirligi qoshida Yuristlar malakasini oshirish markazini tashkil etish toʻgʻrisida” 1997-yil 21-iyuldagi 364-son qaroriga 3-ilovaga muvofiq oʻzgartirishlar kiritilsin.

4. Oʻzbekiston Respublikasi Hukumatining ayrim qarorlari 4-ilovaga muvofiq oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi adliya vaziri R.Q. Davletov zimmasiga yuklansin.

1. Mazkur Ustav Oʻzbekiston Respublikasi Adliya vazirligi qoshidagi Yuristlar malakasini oshirish markazining (keyingi oʻrinlarda Markaz deb ataladi) maqomi, maqsadi, vazifalari va faoliyati asosiy yoʻnalishlarini, huquq va majburiyatlarini, faoliyatini tashkil etish va moliyalashtirish tartibini, shuningdek, oʻquv jarayonini tashkil etish tartibini belgilaydi.

2. Markaz adliya organlari va muassasalari, advokatlar, notariuslar, patent vakillari, mediatorlar, tashkiliy-huquqiy shaklidan qatʼi nazar barcha tashkilotlarning yuridik xizmati xodimlarini hamda huquqiy bilimlarini oshirish talab etiladigan davlat boshqaruvi organlari, fuqarolik jamiyati institutlari, shuningdek, boshqa soha mutaxassislarini qayta tayyorlaydigan va ularning malakasini oshiradigan davlat taʼlim muassasasidir.

3. Markaz oʻz faoliyatini Oʻzbekiston Respublikasining Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari, farmoyishlari, Vazirlar Mahkamasining qarorlari va farmoyishlari, boshqa qonunchilik hujjatlari, shuningdek, ushbu Ustavga asosan amalga oshiradi.

4. Markaz Oʻzbekiston Respublikasi Adliya vazirligining yuridik shaxs maqomiga ega boʻlgan mustaqil tuzilmasi boʻlib, oʻz balansiga, Oʻzbekiston Respublikasi Moliya vazirligi Gʻaznachiligida ochilgan hisob raqamlariga, Oʻzbekiston Respublikasining Davlat gerbi tasviri tushirilgan va oʻz nomi yozilgan muhrga hamda oʻz faoliyati uchun zarur boshqa belgilar va rekvizitlarga ega boʻladi.

5. Markaz bevosita Oʻzbekiston Respublikasi Adliya vazirligiga boʻysunadi. Oʻzbekiston Respublikasi Adliya vazirligi Markaz faoliyatiga rahbarlik qiladi.

6. Markazning rasmiy nomi:

davlat tilida — Oʻzbekiston Respublikasi Adliya vazirligi qoshidagi Yuristlar malakasini oshirish markazi;

ingliz tilida — Lawyersʼ Training Center under the Ministry of Justice of the Republic of Uzbekistan;

rus tilida — Sentr povisheniya kvalifikatsii yuristov pri Ministerstve yustitsii Respubliki Uzbekistan.

7. Markaz joylashgan joy (pochta manzili): Toshkent shahri, Katta darxon koʻchasi, 6-uy.

8. Adliya organlari va muassasalari, advokatlar, notariuslar, FHDY organlari va davlat boshqaruvi organlari, tashkiliy-huquqiy shaklidan qatʼi nazar, boshqa tashkilotlarning yuridik xizmati xodimlari (yuriskonsultlari) hamda xoʻjalik birlashmalari va boshqa tashkilotlarning oʻzga soha mutaxassislarini qayta tayyorlash va ularning malakasini oshirish Markaz faoliyatining asosiy maqsadi hisoblanadi.

9. Quyidagilar Markazning asosiy vazifalari hisoblanadi:

tinglovchilarni qabul qilinayotgan yangi qonunlar va amaldagi qonunchilik hujjatlariga kiritilgan oxirgi oʻzgartirish va qoʻshimchalar mazmun-mohiyati, davlat va jamiyat qurilishi sohasini yanada demokratlashtirish jarayonlari, shuningdek davlat hokimiyati va boshqaruvi, sud, huquqni muhofaza qilish organlari faoliyatida huquqni qoʻllashning zamonaviy talablari hamda ushbu sohadagi xorijiy davlatlar tajribasi bilan yaqindan tanishtirish;

oʻquv, ilmiy-metodik ishlarni tashkil etish va amalga oshirish uchun respublikaning yetakchi taʼlim, ilmiy-tadqiqot muassasalari, davlat organlari va jamoat tashkilotlari, shuningdek, xalqaro tashkilotlar va xorijiy mamlakatlarning yetakchi taʼlim va ilmiy muassasalarining tajribali olimlari, boshqa xodimlari va ekspertlarini jalb etish, shu jumladan shartnoma asosida jalb etish.

10. Quyidagilar Markaz faoliyatining asosiy yoʻnalishlari hisoblanadi:

davlat va jamiyat qurilishi sohasini demokratlashtirish, sud-huquq tizimi, ijtimoiy va iqtisodiy sohalardagi islohotlarning yoʻnalishlari va zamonaviy talablari asosida adliya, yuridik xizmat, advokatura boʻyicha huquqshunos va boshqa kadrlarni qayta tayyorlash va ularning malakasini oshirish;

boshqa soha mutaxassislarining huquqiy bilimlarini oshirish boʻyicha shartnoma asosida oʻqishlar tashkil etish;

huquqshunoslik sohasida ilmiy tadqiqotlarni amalga oshirish;

huquqshunos kadrlarga oid davlat siyosatini takomillashtirish borasida tavsiyalar ishlab chiqish va taqdim etish;

huquqshunos kadrlarni qayta tayyorlash va ularning malakasini oshirish masalalari yuzasidan xalqaro tashkilotlar hamda xorijiy davlatlar taʼlim muassasalari bilan oʻzaro hamkorlik qilish.

11. Markaz quyidagi huquqlarga ega:

Markaz professor-oʻqituvchilari oʻquv-uslubiy va ilmiy faoliyati boʻyicha vaqt meʼyorlarini, shuningdek, ular uchun cheklangan oʻquv yuklamasini Oʻzbekiston Respublikasi Adliya vazirligi bilan kelishgan holda mustaqil belgilash;

Markazga shartnoma asosida (shu jumladan, soatbay haq toʻlash asosida) oʻqituvchi va amaliyot xodimlari (ekspertlar)ni jalb etish;

tegishli vazirlik, idoralar va boshqa tashkilotlardan statistikaga oid maʼlumotlar hamda zarur materiallarni olish uchun murojaat qilish;

yuridik kadrlarni qayta tayyorlash va malakasini oshirish boʻyicha oʻquv-uslubiy ishlarni belgilangan tartibda tashkil qilish va ularni takomillashtirish boʻyicha takliflar ishlab chiqish;

oʻquv-uslubiy, ilmiy-amaliy va madaniy aloqalarni rivojlantirish, tajriba almashish yuzasidan hamkorlik qilish maqsadida oliy taʼlim muassasalari hamda xorijiy davlatlar muassasalari bilan shartnomalar tuzish;

ajratilgan budjet mablagʻlari hamda oʻz mablagʻlari hisobidan belgilangan tartibda zarur jihoz va anjomlarni sotib olish;

noshirlik faoliyatini belgilangan tartibda amalga oshirish, davlat va jamiyat qurilishi sohasini demokratlashtirish, sud-huquq tizimi, ijtimoiy va iqtisodiy sohalardagi islohotlarning dolzarb muammolari boʻyicha davriy, ilmiy-nazariy va amaliy nashrlar chiqarish;

oʻquv jarayoni hamda oʻquv-uslubiy ishlarga yuqori malakali huquqshunos olimlarni, tajribali amaliyotchi xodimlar va xorijdan mutaxassislarni shartnoma asosida (shu jumladan, soatbay haq toʻlash asosida) jalb qilish;

oʻquv dasturlari, darsliklar, oʻquv va oʻquv-uslubiy qoʻllanmalar, ilmiy maqolalar toʻplamlarini nashr qilish;

Oʻzbekiston Respublikasi Adliya vazirligi hamda boshka manfaatdor tashkilotlar bilan kelishilgan holda oʻquv dasturlarini mustaqil ishlab chiqish va tasdiqlash, professor-oʻqituvchilar tarkibini belgilash;

oʻz faoliyatini rivojlantirish uchun modernizatsiya va yangi texnologiyalar jamgʻarmasini, ijtimoiy rivojlantirish jamgʻarmasini, moddiy ragʻbatlantirish jamgʻarmasini, valyuta ajratmalari jamgʻarmasini tashkil qilish. Mazkur mablagʻlar olib qoʻyilishi mumkin emas, ular kelgusida foydalanish uchun yigʻiladi;

xalqaro konferensiya, simpozium, seminar va anjumanlarni tashkil qilish hamda ularda ishtirok etish.

Markaz qonunchilik hujjatlariga muvofiq boshqa huquqlarga ham ega boʻlishi mumkin.

12. Markaz tuzilmasiga quyidagilar kiradi:

Markaz filiallari;

Kafedralar;

Boʻlimlar;

Buxgalteriya;

Axborot resurs markazi;

Kadrlar boʻyicha katta inspektor.

Markaz direktori, zarurat boʻlganda, Oʻzbekiston Respublikasi Adliya vazirligi bilan kelishilgan holda boshqaruv xodimlarining umumiy cheklangan soni va mehnatga haq toʻlash fondi doirasida Markaz tuzilmasiga oʻzgartirishlar kiritishi hamda Markazning budjetdan tashqari mablagʻlari hisobidan qoʻshimcha shtatlar joriy etishi mumkin.

13. Markaz faoliyatiga direktor rahbarlik qiladi.

Markaz direktori ikki oʻrinbosarga, jumladan oʻquv-uslubiy va ilmiy ishlar boʻyicha birinchi oʻrinbosar hamda moliya-iqtisod va xoʻjalik ishlari boʻyicha oʻrinbosar ega.

14. Markaz direktori va uning oʻrinbosarlari belgilangan tartibda Oʻzbekiston Respublikasi adliya vaziri tomonidan lavozimga tayinlanadi va lavozimdan ozod qilinadi.

15. Markaz direktori oʻz vakolati doirasida qonunchilik hujjatlariga muvofiq buyruqlar chiqaradi va ularning bajarilishini taʼminlaydi.

Direktor qonunchilik hujjatlari va mazkur Ustavga muvofiq:

Markaz nomidan ish olib boradi, barcha tashkilotlarda uning huquqlarini himoya qiladi;

direktor oʻrinbosarlari oʻrtasida Markaz tuzilmasiga muvofiq vazifalarni taqsimlaydi;

Budjet mablagʻlari va budjetdan tashqari adliya organlari va muassasalarini rivojlantirish jamgʻarmasi hisobidan ajratiladigan mablagʻlar (rivojlantirish jamgʻarmasiga tinglovchilarni oʻqitishdan tushadigan pullik xizmatlar asosidagi mablagʻlar bundan mustasno) uchun xarajatlar smetasi va shtatlar jadvalini oʻrnatilgan tartibda Adliya vazirligiga roʻyhatdan oʻtkazish uchun kiritadi;

xodimlarni ishga qabul qiladi va ishdan boʻshatadi;

Markaz faoliyatini samarali tashkil etish maqsadida mutaxassislarni Markazning budjetdan tashqari mablagʻlar hisobidan shartnoma asosida ishga jalb qiladi;

Markaz xodimlari uchun oylik maosh tizimi va ragʻbatlantirish jamgʻarmasini taqsimlaydi;

Markazning mol-mulki va mablagʻlarini belgilangan tartibda tasarruf qiladi;

shartnomalarni imzolaydi, ishonch qogʻozlarni beradi, Oʻzbekiston Respublikasi Moliya vazirligi Gʻaznachiligida Markaz hisob raqamlarini ochadi;

belgilangan tartibda modernizatsiya va yangi texnologiyalar jamgʻarmasini va valyuta ajratmalari jamgʻarmasini tashkil qiladi;

Oʻzbekiston Respublikasi Adliya vazirligi va Markazning budjetdan tashqari mablagʻlari hisobidan yuqori malakali professor-oʻqituvchilarga, ilmiy xodimlar va boshqa xodimlarga lavozim maoshining ikki yuz foizigacha miqdorda oylik ustama belgilaydi;

Markaz xodimlarini mukofotlaydi va zarur hollarda ularga nisbatan intizomiy choralar qoʻllaydi;

Oʻzbekiston Respublikasi Adliya vazirligi bilan kelishilgan holda ichki mehnat tartibini belgilaydi, shuningdek, qonunchilik hujjatlariga muvofiq qoʻshimcha taʼtil muddatini belgilaydi;

tinglovchilar uzoq vaqt mashgʻulotlarda sababsiz qatnashmagan yoki ichki tartib-qoidalarni buzgan taqdirda, ularni tinglovchilar safidan chiqaradi va bu haqda ularning ish joyiga maʼlumot yuboradi;

ilmiy kengash, konferensiya, simpozium, seminar va anjumanlarda Markaz nomidan qatnashadi;

Markazning Ilmiy kengashi faoliyatiga rahbarlik qiladi;

ilmiy tadqiqotchilarni Markazga biriktirish masalalarini koʻrib chiqadi;

qonunchilik hujjatlariga muvofiq boshqa vakolatlarni amalga oshiradi.

16. Markaz direktorining oʻquv-uslubiy va ilmiy ishlar boʻyicha birinchi oʻrinbosari:

Markaz kafedralari va filiallari Zamonaviy axborot texnologiyalarini joriy etish va masofadan oʻqitishni tashkil etish boʻlimi, Fan, innovatsiya va taʼlim dasturlarini ishlab chiqish boʻlimi, Oʻquv jarayonini tashkil etish va nazorat qilish boʻlimi faoliyatiga rahbarlik qiladi;

oʻquv jarayonini tashkil qilishga bevosita rahbarlik qiladi;

tinglovchilarni oʻqitish taqsimot-rejalari loyihalarini tayyorlashga rahbarlik qiladi;

oʻquv rejalari, dasturlari va dars jadvallari ishlab chiqilishini tashkil qiladi;

Markaz professor-oʻqituvchilari, ilmiy tadqiqotchilari tomonidan olib boriladigan ilmiy-tadqiqot ishlarini yoʻnaltirib boradi;

Markazning Ilmiy kengashi ish rejasini ishlab chiqadi va tasdiqlash uchun Ilmiy kengash muhokamasiga kiritilishini taʼminlaydi;

Markazning oʻquv, oʻquv-uslubiy va ilmiy ishlari boʻyicha hisobotlarini tayyorlaydi;

direktorning topshirigʻiga koʻra boshqa vakolatlarni amalga oshiradi.

17. Markaz direktorining moliya-iqtisod va xoʻjalik ishlari boʻyicha oʻrinbosari:

Markazning Buxgalteriya, Axborot-resurs markazi, Maʼmuriy-xoʻjalik boʻlimi, Buyurtmalar portfeli va marketingni shakllantirish boʻlimi va Tahririy-nashriyot boʻlimi faoliyatiga rahbarlik qiladi;

xoʻjalik ishlarini tashkil etadi;

Markaz bir maromda faoliyat olib borishi uchun uni kerakli asbob uskunalar va jihozlar bilan taʼminlaydi;

Markaz binolaridan talab darajasida foydalanish, binolarni zarur taʼmirlash va kapital qurilish ishlarini tashkil qiladi hamda ularning bajarilishini taʼminlaydi;

Markazning xoʻjalik shartnomalari majburiyatlari bajarilishini taʼminlaydi, xoʻjalik faoliyati boʻyicha bank operatsiyalari amalga oshirilishini tashkil etadi;

Markazning moliya-xoʻjalik ishlari toʻgʻrisidagi hisobotlarini tayyorlaydi;

direktorning topshirigʻiga koʻra boshqa vakolatlarni amalga oshiradi.

18. Markaz kafedralari, boʻlimlari va boshqa tarkibiy tuzilmalari direktor tomonidan tasdiqlanadigan nizomlar asosida ish olib boradi.

19. Markaz faoliyatiga taalluqli muhim masalalarni hal qilish uchun direktor, uning oʻrinbosarlari, kafedra mudirlari, kasaba uyushma qoʻmitasi raisi, yetakchi olimlar va mutaxassislardan iborat tarkibda Ilmiy kengash tuziladi.

20. Ilmiy kengash oʻz faoliyatini Markaz direktori tomonidan tasdiqlanadigan Ilmiy kengash toʻgʻrisidagi nizom asosida olib boradi. Ilmiy kengash ishi yillik ish rejasiga muvofiq tashkil qilinadi.

Ilmiy kengash:

mamlakatdagi ijtimoiy-siyosiy oʻzgarishlar va sud-huquq sohasida amalga oshirilayotgan islohotlarni chuqurlashtirish hamda huquqshunos mutaxassislarni zamonaviy texnologiyalar asosida qayta tayyorlash va ularning malakasini oshirish masalalarini hal qiladi;

ilmiy-tadqiqot ishlarini muhokama qiladi va Markaz nomidan xulosa beradi;

Markaz ilmiy tadqiqotchilarining mavzularini tasdiqlaydi, ularni kafedralarga biriktiradi;

professor-oʻqituvchilarni ilmiy unvonlarga tavsiya qiladi;

belgilangan tartibda Markazning faxriy doktori darajasini beradi;

Markaz, uning tuzilmalari rahbarlarining hisobotlarini koʻrib chiqadi.

21. Markaz faoliyatini moliyalashtirish qonunchilik hujjatlarida belgilangan tartibda quyidagi manbalar hisobidan amalga oshiriladi:

Oʻzbekiston Respublikasi Davlat budjetidan ajratiladigan mablagʻlar;

Budjetdan tashqari adliya organlari va muassasalarini rivojlantirish jamgʻarmasi mablagʻlari;

shartnoma asosida pullik oʻqitishdan tushadigan mablagʻlar;

davlat ilmiy dasturlari roʻyxatiga kiritilgan ilmiy dasturlarni maqsadli moliyalashtirish, davlat hokimiyati va boshqaruvi organlari buyurtmasi boʻyicha tanlov asosida bajariladigan ishlar uchun ajratiladigan mablagʻlar;

yuridik va jismoniy shaxslarning homiylik xayriyalari;

qonunchilik hujjatlari bilan taqiqlanmagan boshqa manbalar.

22. Markazning direktori va uning oʻrinbosarlari, professor-oʻqituvchilariga oliy taʼlim muassasalarida amalda boʻlgan mehnatga haq toʻlash miqdorlari, qolgan xodimlariga esa Oʻzbekiston Respublikasi Adliya vazirligi markaziy apparati xodimlari mehnatiga haq toʻlashning amaldagi miqdorlari qoʻllaniladi.

23. Markaz xodimlariga qonunchilik hujjatlarida belgilangan tartibda adliya organlari va muassasalari xodimlari uchun belgilangan martaba darajalari joriy etiladi.

24. Markaz xodimlarining oldingi ish joyidan berilgan martaba darajalari saqlab qolinadi.

Markazdagi ish davri martaba darajalarini olish uchun zarur boʻlgan ish stajiga qoʻshiladi.

25. Markaz taʼlim faoliyatini Oʻzbekiston Respublikasining qonunchilik hujjatlari qoidalari, davlat va jamiyat hayotini modernizatsiyalash, sud-huquq tizimini takomillashtirish, siyosiy, ijtimoiy, iqtisodiy va huquqiy sohalardagi islohotlarning yoʻnalishlari va zamonaviy talablari asosida shuningdek, xalqaro standartlar va rivojlangan davlatlarning ilgʻor tajribasini hisobga olgan holda ishlab chiqilgan yurist kadrlarni qayta tayyorlash va ularning malakasini oshirishga qoʻyiladigan davlat taʼlim talablari asosida amalga oshiradi.

26. Markazning oʻquv dasturlari yurist kadrlarni qayta tayyorlash va ularning malakasini oshirishga qoʻyiladigan davlat taʼlim talablariga asosan ishlab chiqiladi.

28. Markazga oʻqishga yuboriladigan xodimlar kasbiy yoʻnalishi boʻyicha guruhlarga boʻlingan holda oʻqitiladi, ularning oʻqish vaqti va muddati Markaz bilan kelishilgan holda tayyorlangan hamda tegishliligi boʻyicha buyurtmachi tashkilotlar tomonidan tasdiqlanadigan taqsimot-rejalarga muvofiq belgilanadi.

Oʻqishga yuborilgan xodimlarning Markazga yetib kelishi taqsimot-rejalarga asosan tegishli tashkilotlar tomonidan taʼminlanadi.

29. Markazda tinglovchilarni oʻqitish malaka oshirish kurslarida bir oygacha davom ettirilishi mumkin.

Toʻlov-shartnoma asosida tinglovchilarni oʻqitish muddati buyurtmachi tashkilot bilan Markaz oʻrtasida tuziladigan shartnoma asosida belgilanadi.

30. Qayta tayyorlash kurslari tinglovchilarining bilimlari sinov imtihoni, malaka oshirish kurslari tinglovchilarining bilimi esa suhbatdan oʻtish asosidan baholanadi.

Sinov imtihonini yoki suhbatdan oʻtishni tashkil etish va oʻtkazish uchun Yuristlar malakasini oshirish markazi direktorining buyrugʻi bilan sinov imtihoni komissiyasi tuziladi. Komissiya, qoidaga koʻra, rais va kamida ikki nafar aʼzodan iborat boʻladi.

Sinov imtihoni komissiyasi tarkibiga, kelishuv asosida, adliya vazirligi markaziy apparati, Advokatlar palatasi, Notarial palataning xodimlari, boshqa buyurtmachi tashkilotlar hamda oliy taʼlim muassasalari va boshqa huquqni muhofaza qilish organlari vakillari ham kiritilishi mumkin.

Tinglovchilar bilan yakuniy sinov imtihoni (suhbat) — ular kasbiy faoliyatining asosiy yoʻnalishlari hamda malaka oshirish kursi dasturiga asosan oʻtilgan mavzular boʻyicha oʻtkaziladi. Sinov imtihoni (suhbatdan oʻtish) natijalari sinov imtihoni qaydnomasida “sinovdan oʻtdi” yoki “sinovdan oʻtmadi” deb baholanadi hamda komissiya raisi va uning aʼzolari tomonidan imzolanadi.

Yuristlar malakasini oshirish markazi oʻquv dasturlarida nazarda tutilgan barcha talablarni bajargan va sinov imtihonini muvaffaqiyatli topshirgan (suhbatdan oʻtgan) tinglovchilarga belgilangan namunadagi sertifikat beriladi.

Sinov imtihonini topshirmagan (suhbatdan oʻtmagan) tinglovchiga sertifikat berilmaydi. Bu holda tinglovchiga malaka oshirish kursida qatnashganligi toʻgʻrisida maʼlumotnoma beriladi.

31. Oʻqish muddati mobaynida tinglovchilarning asosiy ish joylaridagi oʻrtacha ish haqi saqlab qolinadi. Respublikaning boshqa hududlaridan Markazga oʻqishga kelgan tinglovchilarga bir martalik xizmat safari xarajatlari oʻqishga yoʻllagan tashkilotlar tomonidan belgilangan tartibda qoplanadi.

32. Markazda kadrlarni qayta tayyorlash va ularning malakasini oshirish xarajatlari adliya xodimlari uchun davlat budjeti mablagʻlari hisobidan qoplanadi.

Oʻzbekiston Respublikasi Adliya vazirligi tinglovchilarni oʻqitish xarajatlari hamda yuridik va jismoniy shaxslarga koʻrsatiladigan xizmatlar uchun haq miqdorini mustaqil belgilaydi;

Markaz va buyurtmachi tashkilotlar, advokatlar va boshqa toifadagi tinglovchilar bilan toʻlovni amalga oshirish toʻgʻrisidagi toʻlov-shartnomalar elektron shaklda tuziladi va vakolatli shaxsning elektron raqamli imzosi bilan tasdiqlanadi.

33. Markaz huquqshunos kadrlarni qayta tayyorlash va ularning malakasini oshirish sohasida xalqaro hamkorlik qilish, xorijiy hamkorlar bilan shartnomalar tuzish, tegishli xalqaro tashkilotlar bilan belgilangan tartibda oʻzaro manfaatli asosda ilmiy axborotlar almashish ishlarini yoʻlga qoʻyadi shuningdek, qonunchilik hujjatlariga muvofiq xalqaro aloqalarni amalga oshiradi.

Markaz tinglovchilar uchun oʻquv jarayonining muayyan qismini va professor-oʻqituvchilarning malaka oshirishi va tajriba orttirishini yetakchi xorijiy ilmiy va oʻquv markazlarida, firmalarda va xalqaro tashkilotlarda mustaqil ravishda tashkil etishi mumkin.

34. Markazda chet el fuqarolarini qayta tayyorlash va ularning malakasini oshirish, Markaz professor-oʻqituvchilari va tinglovchilarining xorijiy davlatlardagi oʻquv va ilmiy-tadqiqot ishlarini tashkil etish hamda tajriba orttirishi xalqaro shartnomalar, davlat organlari oʻrtasida tuzilgan bitimlar asosida amalga oshiriladi.

35. Markaz faoliyatini qayta tashkil etish va tugatish qonunchilik hujjatlarida belgilangan tartibda amalga oshiriladi.

3-bandda:

ikkinchi xatboshidan “sud” soʻzi chiqarib tashlansin;

uchinchi va toʻrtinchi xatboshilar chiqarib tashlansin;

beshinchi — sakkizinchi xatboshilar tegishlicha uchinchi — oltinchi xatboshilar deb hisoblansin.

1. Vazirlar Mahkamasining “Oʻzbekiston Respublikasi Adliya vazirligi qoshidagi Yuristlar malakasini oshirish markazi tuzilmasini takomillashtirish toʻgʻrisida” 2012-yil 28-martdagi 87-son qarori.

2. Vazirlar Mahkamasining “Oʻzbekiston Respublikasi Adliya vazirligi qoshidagi Yuristlar malakasini oshirish markazining Ustavini tasdiqlash toʻgʻrisida” 2012-yil 12-iyuldagi 212-son qarori (Oʻzbekiston Respublikasi QHT, 2012-y., 29-son, 330-modda).

3. Vazirlar Mahkamasining “Oʻzbekiston Respublikasi Adliya vazirligi qoshidagi Yuristlar malakasini oshirish markazining Ustaviga oʻzgartirish va qoʻshimchalar kiritish toʻgʻrisida” 2013-yil 30-dekabrdagi 347-son qarori.

4. Vazirlar Mahkamasining “Oʻzbekiston Respublikasi Adliya vazirligi qoshidagi Yuristlar malakasini oshirish markazining Ustaviga oʻzgartirish kiritish, shuningdek Oʻzbekiston Respublikasi Hukumatining ayrim qarorlarini oʻz kuchini yoʻqotgan deb hisoblash toʻgʻrisida (“Oʻzbekiston Respublikasi Sudyalar oliy kengashi toʻgʻrisida”gi Oʻzbekiston Respublikasining Qonuni)” 2017-yil 31-maydagi 327-son qarori.