O‘zbekiston Respublikasi Investitsiyalar bo‘yicha davlat qo‘mitasining faoliyatini, xalqaro moliya institutlari, donorlar va boshqa manbalar hisobidan rivojlantirishga doir davlat dasturlari va boshqa investitsiya loyihalarini shakllantirish hamda amalga oshirish jarayonlarini yanada takomillashtirish, rivojlantirish davlat dasturlarini shakllantirish va amalga oshirish bo‘yicha vazirliklar va idoralarning faoliyatini muvofiqlashtirish samaradorligini oshirish maqsadida:

1. Ma’lumot uchun qabul qilinsinki, O‘zbekiston Respublikasi Prezidentining “O‘zbekiston Respublikasining rivojlanish davlat dasturlarini shakllantirish va moliyalashtirishning yangi tartibini joriy etish to‘g‘risida” 2017-yil 18-dekabrdagi PQ-3437-sonli hamda “Xalqaro va xorijiy moliya institutlari bilan hamkorlikning samaradorligini yanada oshirish chora-tadbirlari to‘g‘risida” 2017-yil 20-dekabrdagi PQ-3439-sonli qarorlariga muvofiq O‘zbekiston Respublikasi Investitsiyalar bo‘yicha davlat qo‘mitasining (keyingi o‘rinlarda — Qo‘mita deb yuritiladi) zimmasiga:

rivojlantirish davlat dasturlarini tarmoqlararo va mintaqaviy rivojlantirishga doir uzoq muddatli konsepsiyalarni ishlab chiqish, shakllantirish va amalga oshirish bo‘yicha barcha ishlarni muvofiqlashtirish, shuningdek, loyihalarni amalga oshirish samaradorligini monitoring qilish;

xalqaro moliya institutlari va xorijiy hukumat moliya tashkilotlari bilan markazlashgan hamkorlik qilish bo‘yicha vakolatli organ funksiyalari yuklatildi.

2. Kuyidagilar:

Qo‘mitaning boshqaruv xodimlari cheklangan soni 189 nafardan iborat yangilangan tashkiliy tuzilmasi va markaziy apparati tuzilmasi 1* va 2-ilovalarga* muvofiq;

Qoraqalpog‘iston Respublikasi Investitsiyalar bo‘yicha qo‘mitasining yangilangan tuzilmalari, viloyatlarning investitsiyalar bo‘yicha bosh boshqarmalari namunaviy tuzilmalari hamda Toshkent shahar Investitsiyalar bo‘yicha bosh boshqarmasining tuzilmasi 3*, 3a* va 3b-ilovalarga* muvofiq;

Qoraqalpog‘iston Respublikasi Investitsiyalar bo‘yicha qo‘mitasining, viloyatlar va Toshkent shahar investitsiyalar bo‘yicha bosh boshqarmalarining, shuningdek, tumanlar va shaharlar investitsiyalar bo‘yicha bo‘limlarining xodimlari cheklangan soni 4* va 4a-ilovalarga* muvofiq tasdiqlansin.

Qo‘mita raisiga, zarur xollarda, markaziy apparat tuzilmasiga boshqaruv xodimlarining belgilangan umumiy soni va mehnatga haq to‘lash jamg‘armasi doirasida o‘zgartirishlar kiritish huquqi berilsin.

3. Belgilab qo‘yilsinki:

Qo‘mita markaziy apparati boshqaruv xodimlarining 25 nafari O‘zbekiston Respublikasi Iqtisodiyot vazirligi markaziy apparatining shtat birliklarini qisqartirish hisobiga kiritilmoqda;

Qoraqalpog‘iston Respublikasi Investitsiyalar bo‘yicha qo‘mitasining, viloyatlar va Toshkent shahar investitsiyalar bo‘yicha bosh boshqarmalarining, shuningdek, tumanlar va shaharlarning investitsiyalar bo‘yicha yangi tashkil etilayotgan bo‘limlarining yangi kiritilayotgan shtat birliklari Qoraqalpog‘iston Respublikasi Iqtisodiyot vazirligining, viloyatlar va Toshkent shahar iqtisodiyot va hududlarni kompleks boshqarish hududiy boshqarmalarining hamda ularning tuman (shahar) bo‘limlarining, shuningdek, moliya, soliq organlari va statistika organlarining shtat birliklarini qisman qisqartirish hisobiga kiritilmoqda;

Qoraqalpog‘iston Respublikasi Investitsiyalar bo‘yicha qo‘mitasining, viloyatlar va Toshkent shahar investitsiyalar bo‘yicha bosh boshqarmalarining, tumanlar va shaharlar investitsiyalar bo‘yicha bo‘limlarining joriy ta’minoti hamda faoliyatini moliyalashtirish Qoraqalpog‘iston Respublikasi respublika budjetining, viloyatlar viloyat budjetlarining va Toshkent shahri shahar budjetining mablag‘lari hisobidan amalga oshiriladi.

4. O‘zbekiston Respublikasi Investitsiyalar bo‘yicha davlat qo‘mitasi:

bir oy muddatda Qo‘mita markaziy apparati xodimlarining yangilangan shtat jadvallarini belgilangan tartibda tasdiqlasin va O‘zbekiston Respublikasi Moliya vazirligida ro‘yxatdan o‘tkazsin;

tasdiqlangan tuzilmaga muvofiq shtat birliklarini yuqori malakali kadrlar bilan to‘ldirilishini ta’minlasin.

5. O‘zbekiston Respublikasi Moliya vazirligi Qo‘mitaga uning markaziy apparatini, Qoraqalpog‘iston Respublikasi Investitsiyalar bo‘yicha qo‘mitasining, viloyatlar va Toshkent shahar investitsiyalar bo‘yicha bosh boshqarmalarining, tumanlar va shaharlar investitsiyalar bo‘yicha bo‘limlarining apparatlarini zarur anjomlar, tashkiliy texnika bilan jihozlash, zarur miqdorda xizmat avtotransport vositalarini, ularni saqlash uchun tegishli limitlarni olish uchun, asoslangan hisob-kitoblar bo‘yicha, Qo‘mita tuzilmasining tegishli o‘zgarishlarini hisobga olgan holda mablag‘lar, shuningdek, xorijda O‘zbekiston Respublikasining reklama kampaniyalari, biznes-forumlari, konferensiyalari va ko‘rgazmalarini o‘tkazish uchun zarur mablag‘lar ajratsin.

6. Belgilansinki:

Qo‘mita ta’minoti va Qo‘mita xodimlarini rag‘batlantirish (ish haqi, mukofotlar, ustamalar va boshqa pul mukofotlari to‘lash) O‘zbekiston Respublikasi Davlat budjetining mablag‘lari, Qo‘mitaning budjetdan tashqari mablag‘lari, shu jumladan Vazirlar Mahkamasining “Germaniya Federativ Respublikasining kredit muassasalari tomonidan O‘zbekiston Respublikasiga beriladigan kreditlardan foydalanish to‘g‘risida” 1994-yil 25-noyabrdagi 570-sonli qaroriga muvofiq bir joyga to‘planadigan vaqtincha bo‘sh turgan budjetdan tashqari va qarz mablag‘larini tijorat banklarining depozitlariga joylashtirishdan tushgan daromadlar, shuningdek, ko‘rsatilayotgan xizmatlardan tushgan daromadlar va qonun hujjatlarida taqiqlanmagan boshqa mablag‘lar hisobidan amalga oshiriladi;

budjetdan tashqari mablag‘lar va qonun hujjatlarida taqiqlanmagan boshqa manbalar hisobidan Qo‘mita xodimlari mehnatiga haq to‘lash shartlari Qo‘mita hay’ati tomonidan belgilanadi.

7. “O‘ztreyd” AJ, “O‘zsanoateksport” AJ va “O‘rta Osiyo Trans” AJning Toshkent shahri, Yunusobod tumani, Amir Temir ko‘chasi, 107-uy, manzilida joylashgan “EKSPO” MChJ QK ustavi kapitalidagi o‘z ulushini balans qiymati bo‘yicha “O‘zekspomarkaz” MKK AJga ularning ustav kapitallaridagi davlat ulushini tegishli ravishda kamaytirib, davlat ulushini ko‘paytirish hisobiga o‘tkazish to‘g‘risidagi taklifi ma’kullansin.

8. “Xalqaro hamkorlik markazi” AJ, “O‘zekspomarkaz” MKK AJ va “Interservis” respublika xo‘jalik hisobidagi tashki iqtisodiy birlashmasi — davlat korxonasi:

mazkur tashkilotlarning moddiy-texnik bazasini yaxshilash va samarali faoliyatini ta’minlash maqsadida olib kiriladigan respublikada ishlab chiqarilmaydigan asbob-uskunalarni, materiallarni va boshqa tovar-moddiy boyliklarni O‘zbekiston Respublikasi Vazirlar Mahkamasi tomonidan tasdiqlanadigan ro‘yxatlar bo‘yicha import qilishda bojxona to‘lovlarini to‘lashdan (bojxona rasmiylashtiruvi yig‘imlaridan tashqari);

2018-yil 1-fevral holatiga ko‘ra soliqlar bo‘yicha qarzdorlikni o‘chirgan xolda 10 yil muddatga yer solig‘i, mol-mulk solig‘i, shuningdek, qo‘shimcha qiymat solig‘i to‘lashdan ozod etilsin.

9. Qo‘mitaga, “Xalqaro hamkorlik markazi” AJga, “O‘zekspomarkaz” MKK AJga va “Interservis” respublika xo‘jalik hisobidagi tashki iqtisodiy birlashmasi — davlat korxonasiga:

xorijiy investitsiyalarni jalb qilish va tijorat ko‘chmas mulkini boshqarish masalalarida tajribaga ega bo‘lgan nufuzli xalqaro konsalting kompaniyalarini hamda maslahatchilarni eng yaxshi takliflarni saralab olish asosida (tender o‘tkazmay) jalb qilishga;

mamlakatimizning ishlab chiqaruvchilariga ustunlik bergan holda eng yaxshi takliflarni tanlash asosida O‘zbekiston Respublika tovar-xomashyo birjasining maxsus axborot portali orqali elektron savdolar vositasida tadbirkorlik subyektlaridan materiallar, asbob-uskunalar va texnika, xizmat transport vositalari, ofis jihozlari va anjomlar, kompyuter va tashkiliy texnika, shu jumladan ularning dasturiy ta’minoti xaridini tender o‘tkazmay va (yoki) eng zarur tovarlarning (ishlar, xizmatlar) davlat xaridini amalga oshirishga ruxsat berilsin.

10. O‘zbekiston Respublikasi Vazirlar Mahkamasining “Toshkent shahridagi Xalqaro savdo-ko‘rgazma kompleksi hududida jamoat tartibini va obyektlar xavfsizligini qo‘riqlashni ta’minlashga doir qo‘shimcha chora-tadbirlar to‘g‘risida” 1999-yil 10-maydagi 231-sonli qarori o‘z kuchini yo‘qotgan deb hisoblansin.

O‘zbekiston Respublikasi Prezidentining “O‘zbekiston Respublikasi Investitsiyalar bo‘yicha davlat qo‘mitasi faoliyatini yanada rivojlantirish va samaradorligini oshirish chora-tadbirlari to‘g‘risida” 2017-yil 16-oktabrdagi PQ-3326-sonli qaroridan 1-bandning uchinchi xatboshi va 3-bandi chiqarib tashlansin.

11. O‘zbekiston Respublikasi Investitsiyalar bo‘yicha davlat qo‘mitasi ikki oy muddatda:

Qo‘mita markaziy apparati bo‘linmalarining yangilangan nizomlarini tasdiqlasin;

qonun hujjatlariga mazkur qarordan kelib chiqadigan o‘zgartish va qo‘shimchalar to‘g‘risida O‘zbekiston Respublikasi Vazirlar Mahkamasiga belgilangan tartibda takliflar kiritsin.

12. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Bosh vazirining o‘rinbosari S.R. Xolmurodov zimmasiga yuklansin.