“Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonuniga va O‘zbekiston Respublikasi Prezidentining “Tadbirkorlik faoliyati sohasidagi litsenziyalash va ruxsat berish tartib-taomillarini yanada qisqartirish va soddalashtirish, shuningdek, biznes yuritish shart-sharoitlarini yaxshilash chora-tadbirlari to‘g‘risida” 2018-yil 11-apreldagi PF-5409-son Farmoniga muvofiq, yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish sohasini davlat tomonidan samarali tartibga solish, ishlab chiqarish va boshqa obyektlarni yong‘indan saqlashning ishonchli texnik vositalarini yaratishda yagona muhandislik-texnika siyosatini o‘tkazish maqsadida Vazirlar Mahkamasi qaror qiladi:

1. Yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatini litsenziyalash to‘g‘risidagi nizom 1-ilovaga muvofiq tasdiqlansin.

2. Belgilab qo‘yilsinki, yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatini litsenziyalash O‘zbekiston Respublikasi Ichki ishlar vazirligi tomonidan amalga oshiriladi.

3. O‘zbekiston Respublikasi Ichki ishlar vazirligi:

yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatining yangi talablari va shartlari to‘g‘risidagi axborot bir oy muddatda yuridik shaxslarga — litsenziatlarga yetkazilishi va tushuntirilishini ta’minlasin;

litsenziatlar faoliyati ustidan samarali nazorat qilinishini va ular tomonidan ushbu sohada qonun hujjatlariga, amaldagi normalar va standartlarga rioya qilinishini ta’minlasin;

manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. O‘zbekiston Respublikasi Hukumatining 2-ilovaga muvofiq ayrim qarorlari o‘z kuchini yo‘qotgan deb hisoblansin.

5. Mazkur qarorning bajarilishini nazorat qilish O‘zbekiston Respublikasi ichki ishlar vaziri P.R. Bobojonov zimmasiga yuklansin.

1. Ushbu Nizom yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatini litsenziyalash tartibini belgilaydi.

Litsenziyalash suvli, gazli, kukunli yong‘inni o‘chirish qurilmalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash va yong‘in haqida xabar berish signalizatsiyalarni loyihalashtirish, montaj qilish, sozlash, ta’mirlash va ularga texnik xizmat ko‘rsatish bo‘yicha faoliyatga tatbiq etiladi.

2. Ushbu Nizomda foydalaniladigan tushunchalar va ta’riflar:

yong‘inga qarshi avtomatika vositalari — obyektda (bino, inshoot, xona, hududda) yong‘in chiqishi belgilari to‘g‘risidagi axborotlarni qabul qilish va ularga ishlov berish, yong‘inni avtomatik tarzda o‘chirish hamda yong‘inga qarshi xavfsizlikni ta’minlash uchun mas’ul bo‘lgan kuchlar va vositalarni xabardor qilish uchun mo‘ljallangan texnik vositalar kompleksi;

yong‘inni o‘chirish qurilmalari (suvli, gazli, kukunli) — olovni o‘chiradigan moddalar chiqarish hisobiga yong‘inni o‘chirish uchun mo‘ljallangan turg‘un texnik vositalar yig‘indisi;

xabar berish vositalari — ovozli, nutqli, yorug‘likli va kombinatsiyalashtirilgan yong‘indan darak beruvchi vositalar, ularni boshqarish priborlari, shuningdek, yong‘in xavfsizligining evakuatsiya belgilari;

qo‘riqlash signalizatsiyasi vositalari — obyektni (bino, inshoot, xona, hududni) qo‘riqlashning holati to‘g‘risidagi axborotlarni qabul qilish, ularga ishlov berish, uzatish va aks ettirish uchun mo‘ljallangan texnik vositalar yig‘indisi;

yong‘indan darak beruvchi signalizatsiya qurilmalari — yong‘inni aniqlash, yong‘in, maxsus axborot to‘g‘risidagi bildirishnomaga (xabar berishga) ishlov berish, berilgan topshiriq shaklida taqdim etish va/yoki yong‘inni o‘chirishning avtomatik qurilmalarini va texnik qurilmalarni ishga tushirish uchun komanda berish mo‘ljallangan texnik vositalar yig‘indisi;

qo‘riqlash-yong‘indan saqlash signalizatsiyasi vositalari — qo‘riqlash signalizatsiyasi va yong‘indan darak beruvchi signalizatsiyaning qo‘shma tizimlari.

3. Obyektlarda o‘rnatiladigan yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyati litsenziyalanadi va faqat yuridik shaxslar tomonidan amalga oshirilishi mumkin.

Avtotransport vositalarida o‘rnatiladigan yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyati litsenziyalanmaydi.

4. Yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va yong‘indan saqlovchi signalizatsiyalarni loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatini litsenziyalash O‘zbekiston Respublikasi Ichki ishlar vazirligi tomonidan (keyingi o‘rinlarda litsenziyalovchi organ deb ataladi) amalga oshiriladi.

5. Yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatini amalga oshirish uchun namunaviy (oddiy) litsenziyalar beriladi.

6. Yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatini amalga oshirish huquqi uchun litsenziya amal qilish muddati cheklanmasdan beriladi.

7. Talabgorning arizasiga muvofiq litsenziya litsenziyalanadigan faoliyatning bir qismiga berilishi mumkin.

8. Litsenziya talabgoriga va litsenziatga quyidagi talablar qo‘yiladi:

1) yuridik shaxs-litsenziya talabgorining doimiy shtatida maxsus tayyorgarlikka va tegishli ixtisoslik (yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish) bo‘yicha kamida uch yil ish stajiga ega bo‘lgan, shuningdek, quyidagi malakalar bo‘yicha ma’lumotga va maxsus tayyorgarlikka ega bo‘lgan kamida ikkita xodimning (ishlarning rahbari va bajaruvchi) mavjud bo‘lishi:

a) loyihalashtirish:

ishlarning rahbari va bajaruvchisi “Muhandislik” (elektrotexnika, elektronika, elektromexanika, radiotexnika, telekommunikatsiya, informatika va axborot texnologiyalari, avtomatlashtirish va boshqarish, muhandislik kommunikatsiyalarini qurish, yong‘in xavfsizligi, shuningdek, yong‘inni o‘chirishning suvli qurilmalari uchun — suv ta’minoti va suv chiqarish inshootlari) yo‘nalishi bo‘yicha oliy ma’lumotga ega bo‘lishi kerak;

b) yong‘indan darak berish, qo‘riqlash signalizatsiyalarini, qo‘riqlash-yong‘indan saqlash va yong‘in haqida xabar berish signalizatsiyalarini montaj qilish, sozlash, ta’mirlash va ularga texnik xizmat ko‘rsatish:

ishlarning rahbari “Muhandislik” (elektroenergetika, elektronika va mikroelektronika, avtomatlashtirish va boshqarish, radiotexnika, telekommunikatsiya) yo‘nalishi bo‘yicha oliy ma’lumotli bo‘lishi kerak;

ishlarni bajaruvchilar elektroenergetika, elektronika va mikroelektronika, avtomatlashtirish va boshqarish, radiotexnika, telekommunikatsiya yo‘nalishlari bo‘yicha 3-razryaddan past bo‘lmagan tegishli malaka bo‘yicha oliy, kasb-hunar-texnik ma’lumotga yoki maxsus tayyorgarlikka ega bo‘lishi kerak;

v) yong‘inni o‘chirish (suvli, gazli, kukunli va boshqa) qurilmalarni montaj qilish, sozlash, ta’mirlash va ularga texnik xizmat ko‘rsatish:

ishlarning rahbari “Muhandislik” (elektroenergetika, elektronika va mikroelektronika, avtomatlashtirish va boshqarish, radiotexnika, telekommunikatsiya) yo‘nalishi bo‘yicha oliy ma’lumotli bo‘lishi kerak;

ishlarni bajaruvchilar quyidagi yo‘nalishlar: qo‘lda payvandlovchi elektr payvandlovchi (gaz bilan payvandlovchi) 5-razryaddan past bo‘lmagan, sanitariya-texnik uskunalarni montaj qiluvchi (sanitariya-texnik tizimlar va asbob-uskunalarni montaj qiluvchi) 4-razryaddan past bo‘lmagan, qo‘riqlash-yong‘indan saqlash signalizatsiyalari elektromontyori (elektr asbob-uskunalarini ta’mirlash va ularga xizmat ko‘rsatish bo‘yicha elektromontyor, aloqa apparatlari va qurilmalarini ta’mirlash va ularga xizmat ko‘rsatish bo‘yicha elektromontyor, radioelektron apparatlar va priborlarni montaj qiluvchi) 3-razryaddan past bo‘lmagan, avtomatik nazorat qilish, rostlash va boshqarish priborlari, apparatlari va tizimlarini sozlovchi (nazorat-o‘lchov priborlari va avtomatika sozlovchisi) 5-razryaddan past bo‘lmagan tegishli malaka bo‘yicha oliy, kasb-hunar-texnik ma’lumotga yoki maxsus tayyorgarlikka ega bo‘lishi kerak.

2) litsenziya talabgorida ushbu Nizomga 1-ilovaga muvofiq yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish bo‘yicha faoliyatni amalga oshirish uchun zarur moddiy-texnik baza mavjud bo‘lishi;

3) litsenziat tomonidan yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish sohasidagi qonun hujjatlariga, normativ hujjatlar va standartlar talablariga rioya etilishi;

4) qonun hujjatlariga muvofiq sertifikatlangan yong‘inga qarshi avtomatika vositalari, qo‘riqlash signalizatsiyalari, yong‘indan darak beruvchi, qo‘riqlash-yong‘indan saqlash signalizatsiyalari vositalari va tizimlaridan foydalanish;

5) yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalari vositalarini montaj qilish loyihalarining hisobini olib borish va ularni ishlatishning butun davrida loyihalarning (yoki ularning nusxalarining) saqlanishini ta’minlash;

6) litsenziat tomonidan obyektlarda o‘rnatilgan yong‘inni o‘chirish qurilmalari, qo‘riqlash signalizatsiyalari, yong‘indan darak beruvchi va qo‘riqlash-yong‘indan saqlash signalizatsiyalari to‘g‘risidagi axborotlarning, shuningdek, obyektni qo‘riqlash va uning xavfsizligini ta’minlash tizimi to‘g‘risida litsenziyalanadigan faoliyatni amalga oshirish jarayonida ma’lum bo‘lib qolgan boshqa ma’lumotlarni muhofaza qilishga yo‘naltirilgan chora-tadbirlarning ko‘rilishi;

9. Litsenziyalanadigan faoliyatni amalga oshirishda:

ilgari sudlangan va qasddan jinoyat sodir etganligi uchun muddati o‘talmagan yoki sudlanganligi olib tashlanmagan shaxslarning;

ruhiy kasalliklar, giyohvandlik, toksikomaniya, alkogolizm yuzasidan hisobda turuvchi shaxslarning ishga yollanishiga yoki jalb qilinishiga yo‘l qo‘yilmaydi.

10. Litsenziyalovchi organ va litsenziat o‘rtasida tuziladigan litsenziya bitimida ushbu Nizomning 8-bandida sanab o‘tilganlardan kelib chiquvchi aniq litsenziya talablari va shartlari nazarda tutilishi mumkin.

11. Litsenziya olish uchun litsenziya talabgori quyidagi hujjatlarni taqdim etadi:

litsenziya berish to‘g‘risida ariza, unda quyidagilar ko‘rsatiladi: yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bank muassasasidagi hisob raqami, litsenziyalanayotgan faoliyatning (uning bir qismining) yuridik shaxs tomonidan amalga oshirilishi mo‘ljallanayotgan turi;

litsenziyalovchi organ tomonidan litsenziya berish to‘g‘risidagi ariza ko‘rib chiqilganligi uchun yig‘im to‘langanligini tasdiqlovchi hujjat;

litsenziyalovchi organ tomonidan belgilanadigan shakl bo‘yicha mutaxassislarning malaka tarkibi to‘g‘risida tegishli hujjatlar (mehnat daftarchasining, ma’lumoti yoki maxsus tayyorgarligi to‘g‘risidagi hujjatlarning nusxalari) ilova qilingan ma’lumotlar;

litsenziyalovchi organ tomonidan belgilanadigan shakl bo‘yicha litsenziyalanayotgan faoliyatni amalga oshirish uchun zarur bo‘lgan moddiy-texnik bazaning mavjudligi to‘g‘risidagi ma’lumotlar.

12. Litsenziya talabgoridan ushbu Nizomda nazarda tutilmagan hujjatlarni taqdim etishni talab qilishga yo‘l qo‘yilmaydi.

13. Hujjatlar litsenziya talabgori tomonidan litsenziyalovchi organga bevosita, ularning olinganligi to‘g‘risidagi bildirishnoma bilan pochta aloqa vositasi orqali yoki elektron shaklda yetkazib beriladi. Elektron shaklda taqdim etilgan hujjatlar litsenziya talabgorining elektron raqamli imzosi bilan tasdiqlanadi.

Litsenziya olish uchun taqdim etilgan hujjatlar litsenziyalovchi organning mas’ul shaxsi tomonidan ro‘yxat bo‘yicha qabul qilinadi, ro‘yxatning nusxasi hujjatlar qabul qilib olingan sana to‘g‘risida belgi qo‘yilgan holda litsenziya talabgoriga yuboriladi (topshiriladi) va ushbu Nizomning 11-bandida ko‘rsatilgan hujjatlar ro‘yxatiga muvofiqlik yuzasidan tekshiriladi.

14. Ishonchli bo‘lmagan yoki buzilgan ma’lumotlar taqdim etilganligi uchun litsenziya talabgori qonun hujjatlariga muvofiq javob beradi.

15. Litsenziyalovchi organ tomonidan litsenziya talabgorining arizasi ko‘rib chiqilganligi uchun O‘zbekiston Respublikasida belgilangan va ariza berilgan kunda amalda bo‘lgan bazaviy hisoblash miqdorining bir baravari miqdorida yig‘im undiriladi. Yig‘im summasi litsenziyalovchi organning hisob raqamiga o‘tkaziladi va litsenziyalovchi organ yig‘imni litsenziyalashda ishtirok etgan bo‘linmalar o‘rtasida taqsimlaydi. Litsenziya talabgori berilgan arizadan voz kechgan yoki litsenziyalovchi organ tomonidan litsenziya berishni rad etish to‘g‘risida qaror qabul qilingan taqdirda to‘langan yig‘im summasi qaytarilmaydi.

16. Yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatini litsenziyalash ushbu Nizomga 2-ilova muvofiq sxema bo‘yicha amalga oshiriladi.

Litsenziyalovchi organ tomonidan litsenziya berish yoki litsenziya berishni rad etish to‘g‘risidagi qaror litsenziya talabgorining arizasi va barcha zarur hujjatlar olingan kundan boshlab yigirma kundan ortiq bo‘lmagan muddatda qabul qilinadi.

Agar litsenziyalovchi organ litsenziya berish to‘g‘risidagi arizani ko‘rib chiqish muddati mobaynida litsenziya berish yoki litsenziya berishni rad etish to‘g‘risida qaror qabul qilmagan taqdirda, ko‘rsatib o‘tilgan muddat tamom bo‘lgandan keyin litsenziya talabgori litsenziyalovchi organni yozma ravishda xabardor qilgan holda o‘zi ariza bergan faoliyatni amalga oshirish huquqiga ega bo‘ladi. Bunda litsenziyalovchi organ litsenziya talabgorining yozma bildirishnomasi olingan kundan boshlab besh ish kuni mobaynida unga litsenziya berishi shart.

Litsenziyalovchi organ xulosa tayyorlash uchun zarurat bo‘lganda o‘z mablag‘lari hisobiga:

litsenziya talabgorida litsenziyalanayotgan faoliyat turini amalga oshirish uchun talab qilinadigan mavjud shart-sharoitlarni joyiga borib baholash;

tegishli xulosalar tayyorlash uchun shartnoma asosida ekspertlarni jalb etish huquqiga ega.

17. Litsenziyalovchi organ litsenziya talabgorini qabul qilingan qaror to‘g‘risida tegishli qaror qabul qilingandan keyin uch kun mobaynida xabardor qiladi.

Litsenziya berishga qaror qabul qilinganligi to‘g‘risidagi bildirishnoma litsenziya talabgoriga bank hisob raqami rekvizitlari, davlat boji to‘lash muddati ko‘rsatilgan holda yozma shaklda yuboriladi (topshiriladi).

18. Litsenziyalovchi organ va litsenziatning o‘zaro huquq va majburiyatlarini belgilovchi litsenziya bitimida quyidagilar bo‘lishi kerak:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

amalga oshirilishiga litsenziya berilayotgan faoliyat turi (uning bir qismi)ning nomi;

litsenziatga qo‘yiladigan litsenziya talablari va shartlari;

litsenziya bitimi talablari va shartlari buzilganligi uchun tomonlarning javobgarligi;

litsenziya bitimi talablari va shartlari litsenziat tomonidan bajarilishini litsenziyalovchi organ tomonidan nazorat qilish tartibi.

Litsenziya bitimi ikki nusxada — litsenziat va litsenziyalovchi organ uchun bir nusxadan tuziladi.

19. Litsenziyalar maxsus blankalarda rasmiylashtiriladi. Litsenziya blankalari namunalari litsenziyalovchi organ tomonidan tasdiqlanadi va litsenziyalovchi organ buyurtmasi bo‘yicha “Davlat belgisi” davlat-ishlab chiqarish birlashmasida bosmaxona usulida tayyorlanadi. Litsenziyalovchi organ litsenziyalar blankalarining saqlanishi uchun javob beradi.

Litsenziyalovchi organ nomidan litsenziyalar O‘zbekiston Respublikasi Ichki ishlar vazirligi tomonidan vakolat berilgan shaxs tomonidan imzolanadi hamda litsenziya talabgori tomonidan davlat boji to‘langanini tasdiqlovchi hujjat taqdim etilgandan va u litsenziya bitimini imzolagandan keyin beriladi.

20. Agar litsenziat litsenziya berish to‘g‘risida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziya berilganligi uchun davlat boji to‘langanligini tasdiqlovchi hujjatni taqdim etmasa yoxud litsenziya bitimini imzolamasa, litsenziyalovchi organ litsenziya berish to‘g‘risidagi qarorni bekor qilishga haqlidir.

21. Litsenziya berish “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunining 17-moddasida nazarda tutilgan asoslar bo‘yicha rad etilishi mumkin.

22. Litsenziya berishni rad etish to‘g‘risida qaror qabul qilingan taqdirda rad etish to‘g‘risidagi bildirishnoma litsenziya talabgoriga rad etishning aniq sabablari va litsenziya talabgori ko‘rsatib o‘tilgan sabablarni bartaraf etib hujjatlarni takroran ko‘rib chiqishga taqdim etishi uchun yetarli bo‘lgan muddat ko‘rsatilgan holda yozma shaklda yuboriladi (topshiriladi). Litsenziya berishni rad etish haqidagi bildirishnomada ko‘rsatilgan muddat kamchiliklarni bartaraf etish uchun zarur bo‘lgan vaqtga mutanosib bo‘lishi kerak.

23. Litsenziya berishni rad etish uchun asos bo‘lgan sabablar litsenziya talabgori tomonidan bartaraf etilgan taqdirda, hujjatlarni takroran ko‘rib chiqish litsenziyalovchi organ tomonidan ko‘rsatilgan kamchiliklar litsenziya talabgori tomonidan bartaraf etilganligini tasdiqlovchi zarur hujjatlar (dalolatnomalar, ma’lumotnomalar, sertifikatlar, formulyarlar va boshqalar) bilan birgalikda arizasi olingan kundan boshlab o‘n kun mobaynida amalga oshiriladi. Bunda litsenziya talabgorining arizasi takroran ko‘rib chiqilganligi uchun yig‘im undirilmaydi.

24. Litsenziya talabgorining arizasini qayta ko‘rib chiqishda ilgari litsenziya berishni rad etish to‘g‘risidagi bildirishnomada ko‘rsatilmagan yangi asoslar bo‘yicha litsenziya berishni rad etishga yo‘l qo‘yilmaydi.

Litsenziya berish rad etilganligi to‘g‘risidagi bildirishnomada ko‘rsatilgan muddat tamom bo‘lgandan keyin berilgan ariza yangidan berilgan ariza hisoblanadi.

25. Litsenziya talabgori litsenziyalovchi organning litsenziya berishni rad etish to‘g‘risidagi qaroridan norozi bo‘lgan taqdirda ushbu qaror, shuningdek, litsenziyalovchi organ mansabdor shaxsining xatti-harakatlari (harakatsizligi) ustidan qonun hujjatlarida belgilangan tartibda shikoyat qilish huquqiga ega.

26. Yuridik shaxs-litsenziat qayta tashkil etilgan, uning nomi yoki joylashgan joyi (pochta manzili) o‘zgargan taqdirda, litsenziat yoki uning huquqiy vorisi qayta ro‘yxatdan o‘tkazilgandan keyin bir oy muddatda litsenziyalovchi organga ko‘rsatib o‘tilgan ma’lumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish to‘g‘risida ariza berishi shart.

27. Litsenziyalovchi organ tegishli hujjatlar ilova qilingan holda ariza olingan kundan boshlab besh ish kuni mobaynida litsenziyani qayta rasmiylashtiradi hamda litsenziyalar reyestriga tegishli o‘zgartirishlar kiritadi.

Litsenziyalarni qayta rasmiylashtirishda litsenziya talabgorining litsenziya berish to‘g‘risidagi arizasi ko‘rib chiqilganligi uchun to‘lanadigan summaning yarmi miqdorida yig‘im undiriladi. Yig‘im summasi litsenziyalovchi organning hisob raqamiga o‘tkaziladi.

28. Litsenziat litsenziya qayta rasmiylashtirilgunga qadar unda ko‘rsatilgan faoliyatni ilgari berilgan litsenziya asosida amalga oshiradi.

29. Yo‘qolgan yoki yaroqsiz holga kelgan litsenziya o‘rniga litsenziatning arizasiga ko‘ra dublikat berilishi mumkin. Bunda litsenziat ommaviy axborot vositalarida yo‘qolgan yoki yaroqsiz holga kelgan litsenziyaning haqiqiy emasligi to‘g‘risida axborot e’lon qilishi va e’lonni litsenziyalovchi organga taqdim etishi shart.

Litsenziya dublikatlarini berishda litsenziya talabgorining litsenziya berish to‘g‘risidagi arizasi ko‘rib chiqilganligi uchun to‘lanadigan summaning yarmi miqdorida yig‘im undiriladi. Yig‘im summasi litsenziyalovchi organning hisob raqamiga o‘tkaziladi.

30. Litsenziat tomonidan litsenziya talablari va shartlariga rioya etilishi ustidan nazorat litsenziyalovchi organ tomonidan qonun hujjatlarida belgilangan tartibda amalga oshiriladi.

31. Litsenziya talablari va shartlariga rioya etilishi ustidan nazoratni amalga oshirishda litsenziyalovchi organ o‘z vakolatlari doirasida:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziat tomonidan litsenziya talablari va shartlari buzilganligidan dalolat beruvchi hollar mavjud bo‘lgan taqdirda litsenziatning ularga rioya etishini qonun hujjatlarida belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chog‘ida paydo bo‘ladigan masalalar yuzasidan litsenziatdan zarur axborotni so‘rash va olish;

tekshirishlar natijalari asosida litsenziat tomonidan litsenziya talablari va shartlarining aniq buzilishlarini ko‘rsatgan holda dalolatnomalar (ma’lumotnomalar) tuzish;

aniqlangan buzilishlarni bartaraf etish yuzasidan litsenziatga majburiyat yuklovchi qarorlar qabul qilish;

litsenziyaning amal qilishini to‘xtatib turish, to‘xtatish yoxud bekor qilish to‘g‘risida qonun hujjatlarida belgilangan tartibda qaror chiqarish yoki sudga murojaat qilish.

32. Litsenziya talablari va shartlariga rioya etilishini tekshirish chog‘ida litsenziyalovchi organning tekshiruvchi xodimlari tomonidan ikki nusxada dalolatnoma tuziladi, uning bir nusxasi litsenziatga beriladi, ikkinchi nusxasi litsenziyalovchi organda qoladi.

33. Litsenziyaning amal qilishini to‘xtatib turish va to‘xtatish, uni bekor qilish “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunining 22 — 24-moddalarida nazarda tutilgan hollarda va tartibda amalga oshiriladi.

34. Litsenziyalovchi organning litsenziyaning amal qilishini to‘xtatib turish va to‘xtatish, uni bekor qilish to‘g‘risidagi qarori yuzasidan sudga shikoyat qilinishi mumkin. Litsenziyalovchi organ tomonidan qabul qilingan qaror asossiz ekanligi sud tomonidan e’tirof etilgan taqdirda, litsenziyalovchi organ litsenziat oldida litsenziat ko‘rgan zarar miqdorida javob beradi.

35. Litsenziyalovchi organ berilgan litsenziyalar reyestrini yuritadi.

36. Reyestrda:

yuridik shaxsning nomi, uning tashkiliy-huquqiy shakli, pochta manzili, telefoni;

litsenziyalanadigan faoliyat turining nomi;

litsenziyaning berilgan sanasi va tartib raqami;

litsenziyani qayta rasmiylashtirish, uning amal qilishini to‘xtatib turish va tiklashning asoslari va sanasi;

litsenziyaning amal qilishini to‘xtatish asoslari va sanasi;

litsenziyani bekor qilish asoslari va sanasi ko‘rsatiladi.

37. Litsenziyalar reyestrida mavjud bo‘lgan ma’lumotlar litsenziyalovchi organning veb-saytida joylashtiriladi va tanishish uchun ochiq bo‘ladi.

38. Yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatini amalga oshirish uchun litsenziya berganlik va uning amal qilish muddatini uzaytirganlik uchun “Davlat boji to‘g‘risida”gi O‘zbekiston Respublikasi Qonunida belgilangan miqdorda davlat boji undiriladi.

39. Davlat boji respublika budjetiga o‘tkaziladi.

1. Faoliyatning litsenziyalanadigan turining barcha yo‘nalishlari bo‘yicha ishlarni amalga oshirish uchun litsenziat:

xodimlarning ishlashi uchun binoga;

signalizatsiyaning texnik vositalarini va yong‘inni o‘chirish qurilmalarini hamda asboblarni saqlash uchun binoga (yoki ajratilgan joyga);

loyiha-smeta hujjatlarini saqlash uchun temir sandiqqa;

qo‘riqlash-yong‘in tizimlari va yong‘inni o‘chirishning avtomatlashtirilgan tizimlarini loyihalashtirish, montaj qilish, sozlash, ta’mirlash va ularga texnik xizmat ko‘rsatish sohasida qonun hujjatlariga, texnik reglamentlarga, ishlarni bajarish va qabul qilish normalari va qoidalariga ega bo‘lishi kerak*.

2. Yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlash signalizatsiyalarini loyihalashtirish bo‘yicha faoliyatni amalga oshirish uchun litsenziat 1-bandda ko‘rsatilganlardan tashqari:

avtomatlashtirilgan loyihalashtirish uchun dasturiy-grafik kompleksli Pentium IV shaxsiy kompyuterga (undan past emas);

grafik materiallarni bosish uchun qurilmaga ega bo‘lishi kerak.

3. Yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va qo‘riqlash-yong‘indan saqlovchi signalizatsiyalarni montaj qilish, sozlash, ta’mirlash va ularga texnik xizmat ko‘rsatish faoliyatini amalga oshirish uchun litsenziat 1-bandda ko‘rsatilganlardan tashqari quyidagi jadvalda ko‘rsatilgan priborlarga, asbob-uskunalarga va vositalarga ega bo‘lishi kerak:

1. Vazirlar Mahkamasining “Yong‘inga qarshi avtomatika vositalarini, qo‘riqlash signalizatsiyalarini, yong‘indan darak beruvchi va yong‘indan saqlovchi signalizatsiyalarni loyihalashtirish, montaj qilish, sozlash, ta’mirlash va ularga texnik xizmat ko‘rsatish faoliyatini litsenziyalash to‘g‘risidagi nizomni tasdiqlash haqida” 2004-yil 22-martdagi 136-son qarori (O‘zbekiston Respublikasi QT, 2004-y., 3-son, 32-modda).

2. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (“Tadbirkorlik subyektlarini huquqiy himoya qilish tizimi takomillashtirilganligi hamda ularning moliyaviy javobgarligi erkinlashtirilganligi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida” O‘zbekiston Respublikasining 2006-yil 10-oktabrdagi O‘RQ-59-son Qonuni)” 2006-yil 10-noyabrdagi 235-son qaroriga (O‘zbekiston Respublikasi QT, 2006-y., 11-son, 86-modda) 1-ilovaning 56-bandi.

3. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida (O‘zbekiston Respublikasining “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida” 2011-yil 7-sentabrdagi O‘RQ-292-son Qonuni)” 2012-yil 1-fevraldagi 26-son qaroriga (O‘zbekiston Respublikasi QT, 2012-y., 2-son, 5-modda) ilovaning 29-bandi.

4. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “Statistik, soliq va moliyaviy hisobotlarni, litsenziyalanadigan faoliyat turlarini va ruxsat berish tartib-taomillarini tubdan qisqartirish chora-tadbirlari to‘g‘risida” 2012-yil 16-iyuldagi PF-4453-son Farmoni)” 2012-yil 1-noyabrdagi 313-son qaroriga (O‘zbekiston Respublikasi QT, 2012-y., 11-son, 79-modda) 1-ilovaning 62-bandi.