O‘zbekiston Respublikasi Oliy Majlisining Qonunchilik palatasi (bundan buyon matnda Qonunchilik palatasi deb yuritiladi) o‘z faoliyatini O‘zbekiston Respublikasining Konstitutsiyasiga, “O‘zbekiston Respublikasi Oliy Majlisining Qonunchilik palatasi to‘g‘risida”gi O‘zbekiston Respublikasining Konstitutsiyaviy Qonuniga, ushbu Qonunga va boshqa qonun hujjatlariga muvofiq amalga oshiradi.

Qonunchilik palatasi faoliyatining asosiy prinsiplari quyidagilardan iborat:

siyosiy xilma-xillik va ko‘ppartiyaviylik;

masalalarni erkin muhokama qilish va jamoa bo‘lib hal etish;

ochiqlik va oshkoralik;

jamoatchilik fikrini hisobga olish.

Qonunchilik palatasining ishi palata barcha deputatlarining professional, doimiy faoliyatiga asoslanadi.

Qonunchilik palatasi faoliyatining tashkiliy shakli uning Qonunchilik palatasi sessiyalari davrida, qoida tariqasida, haftasiga uch marta o‘tkaziladigan majlislaridir.

Qonunchilik palatasining majlislari, agar ularning ishida palata deputatlari umumiy sonining yarmidan ko‘pi ishtirok etsa, vakolatli hisoblanadi. O‘zbekiston Respublikasining Konstitutsiyasini, konstitutsiyaviy qonunlarni qabul qilishda, ularga o‘zgartirishlar va qo‘shimchalar kiritishda deputatlar umumiy sonining kamida uchdan ikki qismi hozir bo‘lishi shart.

Qonunchilik palatasining birinchi majlisi Qonunchilik palatasiga saylovdan keyin ikki oydan kechiktirmay o‘tkaziladi. Mazkur majlisni O‘zbekiston Respublikasi Markaziy saylov komissiyasining Raisi ochadi va Qonunchilik palatasi Spikeri saylangunga qadar unda raislik qiladi.

Qonunchilik palatasi birinchi majlisi ishini tashkil etish uchun majlisning muvaqqat kotibiyati sanoq komissiyasi va ovozlarni hisoblashning elektron tizimidan foydalanish ustidan muvaqqat nazorat guruhi saylanadi.

Qonunchilik palatasining birinchi majlisida uning faoliyatini tashkil etish bilan bog‘liq masalalar ko‘rib chiqiladi, shu jumladan, qoida tariqasida:

Qonunchilik palatasi Spikeri va uning o‘rinbosarlari saylanadi;

siyosiy partiyalar fraksiyalari (bundan buyon matnda fraksiyalar deb yuritiladi) ro‘yxatga olinadi;

Qonunchilik palatasining qo‘mitalari tuziladi.

Qonunchilik palatasining navbatdan tashqari majlislari uning sessiyalari oralig‘ida O‘zbekiston Respublikasining Prezidenti, Qonunchilik palatasi Spikeri taklifiga yoki Qonunchilik palatasi deputatlari umumiy sonining kamida uchdan bir qismining taklifiga binoan chaqirilishi mumkin.

Qonunchilik palatasining majlislari ochiq, oshkora o‘tkaziladi va ommaviy axborot vositalari tomonidan yoritiladi. Qonunchilik palatasining qaroriga binoan yopiq majlislar o‘tkazilishi ham mumkin.

Qonunchilik palatasi va O‘zbekiston Respublikasi Oliy Majlisining Senati (bundan buyon matnda Senat deb yuritiladi), qoida tariqasida, alohida-alohida majlis o‘tkazadi.

Qonunda belgilangan hollarda palatalarning qo‘shma majlislari o‘tkaziladi. O‘zbekiston Respublikasi Oliy Majlisi palatalarining qo‘shma majlislari O‘zbekiston Respublikasi Prezidentining, Qonunchilik palatasi Spikerining, Senat Raisining taklifiga yoki tegishincha Qonunchilik palatasi deputatlari yoxud senatorlar umumiy sonining kamida uchdan bir qismining taklifiga binoan chaqirilishi mumkin.

Qonunchilik palatasining birinchi majlisi Qonunchilik palatasi Spikerini saylashdan boshlanadi.

Qonunchilik palatasi Spikerini va uning o‘rinbosarlarini saylash uchun deputatlar orasidan Qonunchilik palatasiga saylovda ishtirok etgan har bir siyosiy partiyadan kamida uch nafar deputatdan iborat Siyosiy partiyalar vakillari kengashi tuziladi. Siyosiy partiyalar vakillari kengashining tarkibi to‘g‘risidagi qaror Qonunchilik palatasi deputatlari umumiy sonining ko‘pchilik ovozi bilan qabul qilinadi.

Siyosiy partiyalar vakillari kengashi o‘z majlisida Qonunchilik palatasi Spikeri va uning o‘rinbosarlari lavozimlariga nomzodlarni deputatlar orasidan ko‘rsatish masalasini ko‘rib chiqadi. Siyosiy partiyalar vakillari kengashi majlisida Qonunchilik palatasiga saylovda eng ko‘p deputatlik o‘rinlarini olgan siyosiy partiyaning vakili raislik qiladi.

Nomzod, agar u yashirin ovoz berish natijasida Qonunchilik palatasi deputatlari umumiy sonining yarmidan ko‘p ovozini olgan bo‘lsa, Qonunchilik palatasining Spikeri etib saylangan hisoblanadi.

Qonunchilik palatasi Spikeri o‘rinbosarlarining soni, qoida tariqasida, ikki nafardan oshmasligi kerak.

Qonunchilik palatasi Spikerining o‘rinbosarlari yashirin ovoz berish orqali deputatlar umumiy sonining ko‘pchilik ovozi bilan Qonunchilik palatasining vakolatlari muddatiga saylanadi.

Siyosiy partiyalar vakillari kengashi taqdim etgan nomzod Qonunchilik palatasi Spikerining o‘rinbosari lavozimiga saylanmagan taqdirda, Siyosiy partiyalar vakillari kengashi deputatlar orasidan boshqa nomzodni taqdim etish huquqiga ega.

Qonunchilik palatasi Spikeri va uning o‘rinbosarlari saylanganligi to‘g‘risida qarorlar qabul qilinadi, qarorlarni palata majlisida raislik qiluvchi imzolaydi.

Qonunchilik palatasi Spikeri yashirin ovoz berish orqali Qonunchilik palatasi deputatlari umumiy sonining uchdan ikki qismidan ko‘prog‘ining ovozi bilan qabul qilingan Qonunchilik palatasi qaroriga binoan muddatidan ilgari lavozimidan ozod qilinishi mumkin.

Qonunchilik palatasi Spikerining o‘rinbosarlari yashirin ovoz berish orqali Qonunchilik palatasi deputatlari umumiy sonining uchdan ikki qismidan ko‘prog‘ining ovozi bilan qabul qilingan Qonunchilik palatasining qaroriga binoan muddatidan ilgari lavozimidan ozod qilinishi mumkin.

Qonunchilik palatasi Spikerini yoki uning o‘rinbosarlarini muddatidan ilgari lavozimidan ozod qilish to‘g‘risidagi masala Qonunchilik palatasi deputatlari umumiy sonining kamida uchdan bir qismidan iborat Qonunchilik palatasi deputatlari guruhining taklifiga binoan palata tomonidan ko‘rib chiqiladi.

Qonunchilik palatasi Spikerini yoki uning o‘rinbosarlarini muddatidan ilgari lavozimidan ozod qilish to‘g‘risida qaror qabul qilinadi, qarorni palata majlisida raislik qiluvchi imzolaydi.

Qonunchilik palatasining faoliyatini samarali tashkil etish maqsadida Qonunchilik palatasi Kengashi tuziladi.

Qonunchilik palatasi Kengashining tarkibiga Qonunchilik palatasi Spikeri, uning o‘rinbosarlari, fraksiyalar rahbarlari, Qonunchilik palatasi qo‘mitalarining raislari kiradi.

Qonunchilik palatasining Kengashi:

Qonunchilik palatasi majlisining kun tartibi loyihasini shakllantiradi;

qo‘mitalarning ishini muvofiqlashtirib boradi;

qonun loyihasini Qonunchilik palatasi ko‘rib chiqishi uchun qabul qilish yoki uni qonunchilik tashabbusi huquqi subyektiga qaytarish to‘g‘risida qonun loyihasini dastlabki tarzda ko‘rib chiqish uchun mas’ul bo‘lgan qo‘mitaning (bundan buyon matnda mas’ul qo‘mita deb yuritiladi) xulosasiga ko‘ra qaror qabul qiladi;

qonunchilik tashabbusi tartibida kiritilgan qonunchilik taklifini (bundan buyon matnda qonunchilik taklifi deb yuritiladi) Qonunchilik palatasi ko‘rib chiqishi uchun qabul qilish to‘g‘risida mas’ul qo‘mitaning xulosasiga ko‘ra qaror qabul qiladi;

Qonunchilik palatasi deputatining saylov okrugidagi ishini tashkil etishga ko‘maklashadi;

Qonunchilik palatasi faoliyatini tashkil etish bilan bog‘liq boshqa masalalarni hal etadi.

Kengash o‘z vakolatiga kiradigan masalalar bo‘yicha o‘z a’zolari umumiy sonining ko‘pchilik ovozi bilan qarorlar qabul qiladi.

Qonunchilik palatasi Kengashiga Qonunchilik palatasi Spikeri rahbarlik qiladi, u Kengashning majlislarini olib boradi va uning qarorlarini imzolaydi.

Qonunchilik palatasi tomonidan uning deputatlari orasidan palataning vakolatlari muddatiga rais, uning o‘rinbosari va a’zolardan iborat tarkibda qo‘mitalar tuziladi.

Qonunchilik palatasi Spikeri va uning o‘rinbosarlari Qonunchilik palatasi qo‘mitalarining tarkibiga saylanishi mumkin emas.

Qonunchilik palatasida, qoida tariqasida, budjet va iqtisodiy masalalar qo‘mitasi, korrupsiyaga qarshi kurashish va sud-huquq masalalari qo‘mitasi, mehnat, sog‘liqni saqlash va ijtimoiy masalalar qo‘mitasi, xalqaro ishlar, mudofaa va xavfsizlik masalalari qo‘mitasi, innovatsion rivojlanish va axborot texnologiyalari masalalari qo‘mitasi, demokratik institutlar va fuqarolik jamiyatini rivojlantirish masalalari qo‘mitasi, fan, ta’lim, madaniyat, sport va yoshlar masalalari qo‘mitasi, ekologiya va atrof-muhitni muhofaza qilish masalalari qo‘mitasi tuziladi. Qonunchilik palatasida boshqa qo‘mitalar ham tuzilishi mumkin.

Qonunchilik palatasi qo‘mitalarining umumiy soni, qoida tariqasida, o‘n bittadan oshmasligi kerak.

Qo‘mita raisi, uning o‘rinbosari va qo‘mita a’zolari lavozimlari deputatlarning qaysi partiyaga mansubligini hamda saylov yakunlari bo‘yicha olingan deputatlik o‘rinlarini inobatga olgan holda yaxlit (umumiy) qaror bilan belgilanadi. Qo‘mita raisi, uning o‘rinbosari va qo‘mita a’zolari lavozimlariga nomzodlar ko‘rsatish yuzasidan takliflarni fraksiyalarning rahbarlari o‘zaro kelishgan holda kiritadilar. Bunda bir nafar qo‘mita raisi va ikki nafar qo‘mita raisi o‘rinbosari lavozimlari o‘zini parlamentdagi muxolifat deb e’lon qilgan fraksiya uchun ajratiladi.

Qonunchilik palatasi qo‘mitasining raisi, uning o‘rinbosari va qo‘mita a’zolari palata majlisida Qonunchilik palatasi deputatlari umumiy sonining ko‘pchilik ovozi bilan saylanadi.

Qonunchilik palatasi qo‘mitasining raisi, uning o‘rinbosari, shuningdek qo‘mita a’zolari saylangani to‘g‘risida Qonunchilik palatasi qarorlar qabul qiladi.

Qonun loyihalarini ishlab chiqishga va muhokama qilishga, nazorat-tahlil tadbirlarini tayyorlashga va o‘tkazishga ko‘maklashish maqsadida Qonunchilik palatasining qo‘mitalari huzurida ekspert guruhlari tuziladi.

Ekspert guruhlari davlat organlarining, ilmiy va ta’lim muassasalarining, nodavlat notijorat tashkilotlarining tegishli sohalarda ilmiy ish tajribasiga, qonun loyihalarini tayyorlash va (yoki) amaliy ish tajribasiga ega bo‘lgan malakali mutaxassislari orasidan tuziladi.

Qonunchilik palatasining qo‘mitalari huzurida ekspert guruhlarini shakllantirish va ularning faoliyati tartibi Qonunchilik palatasi Kengashi tomonidan tasdiqlanadigan nizom bilan belgilanadi.

Qonunchilik palatasi muayyan vazifalarni bajarish uchun komissiyalar tuzishi mumkin.

Komissiya Qonunchilik palatasi majlisida Qonunchilik palatasining deputatlari orasidan komissiya raisi va a’zolari, zarurat bo‘lganda esa komissiya raisining o‘rinbosaridan iborat tarkibda tuziladi.

Komissiya tuzilgani to‘g‘risida Qonunchilik palatasi qaror qabul qiladi.

Komissiya o‘z zimmasiga yuklatilgan vazifalar bajarilganidan so‘ng, qaysi muddatga tuzilgan bo‘lsa, shu muddat o‘tganidan keyin yoki Qonunchilik palatasining qaroriga binoan muddatidan ilgari o‘z faoliyatini tugatadi.

O‘zbekiston Respublikasi Oliy Majlisi palatalarining qo‘shma qarori bilan O‘zbekiston Respublikasi Oliy Majlisining komissiyalari (parlament komissiyalari) tashkil etilishi mumkin.

Zarur bo‘lgan hollarda komissiyalar ishiga davlat organlarining va boshqa organlarning vakillari, shuningdek fuqarolik jamiyati institutlarining vakillari jalb etilishi mumkin.

Fraksiya siyosiy partiyadan ko‘rsatiladigan deputatlar tomonidan partiya manfaatlarini Qonunchilik palatasida ifodalash maqsadida tuziladigan va belgilangan tartibda ro‘yxatdan o‘tkazilgan deputatlar birlashmasidir.

Qonunchilik palatasining kamida besh nafar deputati fraksiya tuzish huquqiga ega.

Qonunchilik palatasining deputati faqat bir fraksiyaning a’zosi bo‘lishi mumkin.

Siyosiy partiyadan ko‘rsatilgan va Qonunchilik palatasiga saylangan deputat faqat shu partiya fraksiyasining a’zosi bo‘lishi kerak.

Qonunchilik palatasi Spikeri va Qonunchilik palatasi Spikerining o‘rinbosarlari o‘z vazifalarini bajarish davrida siyosiy partiyaga a’zolikni to‘xtatib turadi va fraksiya tarkibiga kirishi mumkin emas.

Fraksiya tuzish uchun:

fraksiya ta’sis yig‘ilishini o‘tkazish;

fraksiyani tuzish to‘g‘risida ta’sis bayonnomasini qabul qilish;

fraksiya rahbarini saylash zarur bo‘ladi.

Fraksiya rahbari fraksiyani tuzish to‘g‘risidagi ta’sis bayonnomasini Qonunchilik palatasiga taqdim etadi va fraksiya tuzilgani haqida Qonunchilik palatasiga axborot beradi, bu Qonunchilik palatasi majlisining bayonnomasida qayd etiladi.

Fraksiyalar hisobga olish ro‘yxatidan o‘tkaziladi.

Fraksiyalar faoliyatining tashkiliy shakli ularning majlislaridir.

Fraksiyalar ishini muvofiqlashtirib borish, Qonunchilik palatasi majlisiga kiritiladigan masalalarni dastlabki tarzda ko‘rib chiqishni tashkil etish, fraksiyalar nuqtai nazarini kelishib olish maqsadida fraksiyalar rahbarlarining qo‘shma majlislari o‘tkazilishi mumkin.

Fraksiyalar o‘zlari qabul qilgan qarorlar, shuningdek fraksiyalar rahbarlarining qo‘shma majlislarida qabul qilingan qarorlar haqida Qonunchilik palatasi Spikeriga va uning Kengashiga axborot beradilar.

Fraksiya faoliyati quyidagi hollarda tugatiladi:

fraksiyaning o‘z tashabbusiga binoan;

Qonunchilik palatasining vakolatlari muddati tugaganda;

fraksiya tarkibiga kiruvchi deputatlar soni uni tuzish uchun zarur bo‘lgan me’yordan kamayib ketganda;

tegishli siyosiy partiya faoliyati tugaganda (tugatilganda).

Qonunchilik palatasining vakolatlari muddati tugashidan oldin fraksiyalar faoliyatining tugatilishi Qonunchilik palatasining qarori bilan rasmiylashtiriladi.

Qonunchilik palatasida ko‘pchilik o‘rinni egallagan fraksiya parlamentdagi ko‘pchilikni tashkil etadi.

O‘z dasturiy maqsadli vazifalarining yaqinligidan yoki mosligidan kelib chiqqan holda blok tuzadigan bir nechta fraksiyalar parlamentdagi ko‘pchilikni tashkil etishi mumkin.

Yangitdan shakllantirilgan hukumatning tutgan yo‘li va dasturiga yoki uning ayrim yo‘nalishlariga qo‘shilmaydigan fraksiyalar o‘zlarini muxolifat deb e’lon qilishi mumkin.

Fraksiyalarning blokka birlashishi qonunda nazarda tutilgan huquqlarni amalga oshirishda ularning mustaqilligini cheklab qo‘ymaydi.

O‘zini parlamentdagi muxolifat deb e’lon qilgan fraksiya qonunda fraksiyalar uchun nazarda tutilgan vakolatlar bilan bir qatorda quyidagi huquqlarga ega:

o‘z vakillari Qonunchilik palatasining bir nafar qo‘mita raisi va ikki nafar qo‘mita raisi o‘rinbosari lavozimlarini kafolatli egallashi;

qonun loyihasi birinchi o‘qishda ko‘rib chiqilguniga qadar o‘sha masalaga doir qonun loyihasining muqobil tahririni, qonun loyihasi ikkinchi o‘qishda ko‘rib chiqilguniga qadar uning ikkinchi o‘qishga tayyorlangan matnining yoki tarkibiy birligi matnining muqobil tahririni, shuningdek Qonunchilik palatasi qarori loyihasining muqobil tahririni kiritish;

muhokama etilayotgan masalalar yuzasidan o‘zining alohida fikrini Qonunchilik palatasining majlisi bayonnomasiga kiritish;

Qonunchilik palatasining majlislarida hukumat a’zolarining Qonunchilik palatasi deputatlari savollariga javoblarini eshitish (“hukumat soati”) doirasida yilning har choragida kamida bitta masala kiritish;

parlament so‘rovini yuborish to‘g‘risida Qonunchilik palatasiga yilning har choragida kamida bitta masala kiritish;

Senat tomonidan rad etilgan qonun bo‘yicha kelishuv komissiyasida o‘z vakillarining kafolatli ishtirok etishi.

Parlamentdagi muxolifatning qonun bilan kafolatlangan huquqlari parlamentdagi ko‘pchilik tomonidan kamsitilishi mumkin emas.

Qonunchilik palatasi majlisida ko‘rib chiqilishi lozim bo‘lgan masalalar ularni ko‘rib chiqish navbati, palataning har bir masalani ko‘rib chiqishga tayyorlash uchun mas’ul bo‘lgan qo‘mitalari, ma’ruzachilar (qo‘shimcha ma’ruzachilar), shuningdek boshqa ma’lumotlar ko‘rsatilgan holda majlis kun tartibi loyihasiga kiritiladi.

Qonunchilik palatasi majlisi kun tartibining loyihasi Qonunchilik palatasi Kengashi tomonidan tuziladi.

Qonunchilik palatasining deputatlari Qonunchilik palatasi majlisining kun tartibi loyihasiga kiritilgan masalalar to‘g‘risida oldindan xabardor qilinadilar.

Qonunchilik palatasi majlisining kun tartibi palata qarori bilan tasdiqlanadi.

Qonunchilik palatasining qarorlari uning majlislarida ochiq yoki yashirin ovoz berish orqali qabul qilinadi. Ochiq ovoz berish fraksiyalarning tashabbusiga ko‘ra nomma-nom o‘tkazilishi mumkin, uning natijalari Qonunchilik palatasi majlisining stenogrammasiga ilova qilinadi.

Qonunchilik palatasi majlislarida ovoz berish ovozlarni hisoblashning elektron tizimidan foydalangan holda yoki yashirin ovoz berish byulletenlaridan foydalangan holda amalga oshirilishi mumkin.

Qonunchilik palatasi majlisida ovozlarni hisoblashning elektron tizimidan foydalanilishi ustidan nazoratni Qonunchilik palatasi deputatlari jumlasidan bo‘lgan guruh amalga oshiradi.

Ovoz berish shakli va usuli to‘g‘risidagi qaror Qonunchilik palatasi tomonidan ochiq ovoz berish orqali qabul qilinadi, u yoki bu masala yuzasidan ovoz berish shakli va usuli O‘zbekiston Respublikasining Konstitutsiyasida hamda konstitutsiyaviy qonunlarda belgilangan hollar bundan mustasno.

Qonunchilik palatasining deputati o‘zining ovoz berish huquqini shaxsan amalga oshiradi.

Qonun loyihasi Qonunchilik palatasiga Qonunchilik tashabbusi huquqi subyektlari tomonidan kiritiladi.

Qonun loyihasini Qonunchilik palatasiga kiritishda quyidagilar taqdim etilishi kerak:

1) qonun loyihasiga uning konsepsiyasi bayon qilingan tushuntirish xati, ushbu konsepsiyada huquqiy jihatdan tartibga solishning asosiy g‘oyasi, maqsadi va predmeti; tegishli ijtimoiy munosabatlarni huquqiy jihatdan tartibga solishning mazkur sohada amalda bo‘lgan qonunlar hamda boshqa normativ-huquqiy hujjatlar tahlili ilova qilingan holdagi umumiy tavsifi va holatiga berilgan baho; qonun loyihasini ishlab chiqish zaruriyati asoslari; qonun loyihasining asosiy qoidalari; bo‘lg‘usi qonunning ijtimoiy-iqtisodiy, huquqiy va boshqa oqibatlari prognozi belgilab berilgan bo‘lishi kerak;

2) o‘zgartirishlar va qo‘shimchalar kiritish to‘g‘risidagi, shuningdek qonun loyihasi kiritilishi bilan bog‘liq qonun hujjatlarini o‘z kuchini yo‘qotgan deb topish to‘g‘risidagi qonun loyihasi;

3) o‘zgartirilishi, qo‘shimchalar kiritilishi, o‘z kuchini yo‘qotgan deb topilishi yoki qabul qilinishi lozim bo‘lgan qonunosti hujjatlarining ro‘yxati;

3¹) xalqaro hujjatlarning va chet el mamlakatlari qonun hujjatlarining, O‘zbekiston Respublikasi qonunchiligining tegishli qoidalari, O‘zbekiston Respublikasi sharoitida tegishli xalqaro tajriba qo‘llanilishining maqbulligi to‘g‘risidagi asosli takliflar ketma-ket tartibda ko‘rsatilgan tahliliy qiyosiy jadval;

4) moddiy xarajatlarni talab qiladigan qonun loyihalari uchun moliyaviy-iqtisodiy asoslar;

5) davlat daromadlarini kamaytirish yoki davlat xarajatlarini ko‘paytirish, shuningdek O‘zbekiston Respublikasi Davlat budjeti moddalari bo‘yicha o‘zgartirishlarni nazarda tutuvchi qonunlarning loyihalari yuzasidan O‘zbekiston Respublikasi Vazirlar Mahkamasining xulosasi.

6) xalqaro shartnoma loyihasining (matnining) O‘zbekiston Respublikasi Tashqi ishlar vazirligi tomonidan o‘tkazilgan huquqiy ekspertizasi natijalari bo‘yicha ushbu vazirlikning xulosasi — xalqaro shartnomalarni ratifikatsiya qilishni yoki ularga qo‘shilishni nazarda tutuvchi qonun loyihalari uchun;

7) xalqaro shartnoma loyihasining (matnining) O‘zbekiston Respublikasi qonunchiligiga muvofiqligi nuqtai nazaridan O‘zbekiston Respublikasi Adliya vazirligi tomonidan o‘tkazilgan huquqiy ekspertizasi natijalari bo‘yicha ushbu vazirlikning xulosasi — xalqaro shartnomalarni ratifikatsiya qilishni yoki ularga qo‘shilishni nazarda tutuvchi qonun loyihalari uchun;

8) qonun loyihasining huquqiy ekspertizasi natijalari bo‘yicha xulosa;

9) qonun loyihasining korrupsiyaga qarshi ekspertizasini o‘tkazish chog‘ida to‘ldirilgan cheklist;

10) qonun loyihasining jamoatchilik muhokamasi natijalari to‘g‘risidagi axborot (kelib tushgan fikr-mulohazalar va (yoki) takliflarni ko‘rib chiqish natijalari ko‘rsatilgan holda), bundan jamoatchilik muhokamasidan o‘tkazilishi majburiy bo‘lmagan qonun loyihalari mustasno.

Qonun loyihasi Qonunchilik palatasi tomonidan birinchi o‘qishda qabul qilinguniga qadar qonun loyihasini kiritgan qonunchilik tashabbusi huquqi subyekti loyiha matnini o‘zgartirish yoki o‘zi kiritgan qonun loyihasini chaqirib olish huquqiga ega. Qonunchilik palatasiga ilgari palata tomonidan birinchi o‘qishda qabul qilingan tegishli qonun loyihasiga doir masalaga daxldor bo‘lgan qonun loyihasi kelib tushgan hollarda, Qonunchilik palatasi yangi kiritilgan qonun loyihasini qaytarish to‘g‘risidagi yoxud uni ilgari birinchi o‘qishda qabul qilingan qonun loyihasi bilan birlashtirish haqidagi masalani mas’ul qo‘mitaning xulosasi asosida hal etishga haqli.

Qonunchilik palatasi Spikeri mas’ul qo‘mitani belgilaydi, qonun loyihasi hamda unga ilova qilingan materiallarni mas’ul qo‘mitaga va, bir vaqtning o‘zida, fraksiyalarga topshiradi, shuningdek fraksiyalar tomonidan fikrlar va takliflarni hamda mas’ul qo‘mita tomonidan xulosani taqdim etish muddatini belgilaydi.

Qonun loyihasini Qonunchilik palatasi ko‘rib chiqishi uchun qabul qilish mumkinligi to‘g‘risida takliflar ishlab chiqish uchun qonun loyihasi ustida ishlash fraksiyalar va mas’ul qo‘mita tomonidan bir vaqtning o‘zida amalga oshiriladi. Bunda fraksiyalarning qonun loyihasi bo‘yicha fikrlari va takliflarisiz mas’ul qo‘mita ushbu qonun loyihasi yuzasidan o‘z xulosasini chiqarish huquqiga ega emas.

Mas’ul qo‘mita qonun loyihasi bo‘yicha barcha fraksiyalardan fikrlar va takliflarni to‘plab, Qonunchilik palatasi Kengashiga qonun loyihasini Qonunchilik palatasi ko‘rib chiqishi uchun qabul qilish mumkinligi to‘g‘risida belgilangan muddatda xulosa taqdim etadi.

Qonunchilik palatasi Kengashi mas’ul qo‘mitaning xulosasi asosida, fraksiyalarning fikrlari va takliflarini hisobga olgan holda qonun loyihasini Qonunchilik palatasi ko‘rib chiqishi uchun qabul qilish to‘g‘risida yoki qonun loyihasi ushbu Qonun 12-moddasining ikkinchi qismida belgilangan talablarga muvofiq bo‘lmagan taqdirda yoxud u qonunchilik tashabbusi huquqi subyekti tomonidan o‘z vakolatlari jumlasiga kiritilmagan masalalar bo‘yicha kiritilganda uni qonunchilik tashabbusi huquqi subyektiga qaytarish haqida qaror qabul qiladi.

Aniqlangan kamchiliklar bartaraf etilganidan keyin qonun loyihasi Qonunchilik palatasi ko‘rib chiqishi uchun yangidan kiritilishi mumkin.

Qonun loyihasi Qonunchilik palatasi ko‘rib chiqishi uchun qabul qilinayotganda uning Kengashi qonun loyihasini palata majlisida ko‘rib chiqishga tayyorlash muddatini belgilashi shart.

Ko‘rib chiqish uchun qabul qilingan qonun loyihasi unga ilova qilingan materiallar bilan Qonunchilik palatasining qo‘mitalariga yuboriladi.

Qonun loyihasini dastlabki tarzda muhokama qilish va uni Qonunchilik palatasida birinchi o‘qishda ko‘rib chiqishga tayyorlash mas’ul qo‘mita tomonidan amalga oshiriladi.

Fraksiyalar qonun loyihasini dastlabki tarzda muhokama qilish yakunlariga ko‘ra mas’ul qo‘mitaga o‘z fikrlari va takliflarini taqdim etadi.

Mas’ul qo‘mita fraksiyalar, manfaatdor tashkilotlar hamda ekspertlar guruhlarining fikrlari va takliflarini hisobga olgan holda qonun loyihasining dastlabki tarzdagi muhokamasini o‘tkazadi va qonun loyihasi olingan kundan e’tiboran ikki oy ichida unga:

Qonunchilik palatasi Kengashining qonun loyihasini birinchi o‘qishda ko‘rib chiqish uchun Qonunchilik palatasiga kiritish to‘g‘risidagi qarori loyihasini;

mas’ul qo‘mitaning mazkur qonun loyihasini qabul qilish yoki rad etish zarurligi asoslangan xulosasini;

fraksiyalarning qonun loyihasi bo‘yicha fikrlari va takliflarini ilova qilgan holda, Qonunchilik palatasi Kengashi ko‘rib chiqishi uchun taqdim etadi.

Qonun loyihasini Qonunchilik palatasi qo‘mitalarida muhokama qilish ochiq o‘tkaziladi. Muhokamalarga qonun loyihasini kiritgan qonunchilik tashabbusi huquqi subyektining vakillari, fuqarolik jamiyati institutlarining va ilmiy-tadqiqot muassasalarining vakillari, shuningdek olimlar, mutaxassislar ham taklif etilishi mumkin.

Qonunchilik palatasining qo‘mitalaridagi qonun loyihasi muhokamalarida O‘zbekiston Respublikasi Vazirlar Mahkamasining O‘zbekiston Respublikasi Oliy Majlisidagi vakolatli vakili ishtirok etishi mumkin.

Qonunchilik palatasi Kengashi mas’ul qo‘mita taqdim etgan qonun loyihasini birinchi o‘qishda ko‘rib chiqish uchun Qonunchilik palatasi majlisining kun tartibi loyihasiga kiritish to‘g‘risida qaror qabul qiladi.

Qonunchilik palatasi qonun loyihasini, qoida tariqasida, uch o‘qishda ko‘rib chiqadi.

Qonun loyihasini Qonunchilik palatasi majlislarida birinchi o‘qishda ko‘rib chiqish chog‘ida uni qabul qilish zarurati, qonun loyihasining konsepsiyasi, uning O‘zbekiston Respublikasi Konstitutsiyasi va qonunlariga muvofiqligi, shuningdek qonunni amalga oshirish bilan bog‘liq xarajatlar hamda moliyalashtirish manbalari to‘g‘risidagi masala muhokama qilinadi. Birinchi o‘qishdagi qonun loyihasi yuzasidan ma’ruza bilan, qoida tariqasida, qonunchilik tashabbusi huquqi subyekti yoki uning vakili, keyingi o‘qishlarda esa mas’ul qo‘mita vakili so‘zga chiqadi.

Mas’ul qo‘mita birinchi hamda keyingi o‘qishlarda fraksiyalarning fikrlari va takliflarini deputatlarga yetkazishi shart.

Fraksiyalarning qonun loyihasi bo‘yicha fikrlari va takliflari majburiy tarzda hamda har tomonlama muhokama qilinishi lozim.

Qonunchilik palatasi muhokama natijalari bo‘yicha qonun loyihasini maromiga yetkazish va keyingi o‘qishda ko‘rib chiqish uchun palataga kiritish muddatini majburiy tartibda belgilagan holda uni birinchi o‘qishda qabul qilish haqida yoxud qonun loyihasini rad etish to‘g‘risida qaror qabul qiladi.

Qonunchilik palatasi muhokamasiga qonun loyihalarining muqobil tahrirlari kiritilgan taqdirda ular bir vaqtda ko‘rib chiqilishi kerak. Qonunchilik palatasi deputatlarining qaror qabul qilish uchun talab qilinadigan eng ko‘p miqdordagi ovozini to‘plagan qonun loyihasi birinchi o‘qishda qabul qilingan hisoblanadi.

Birinchi o‘qishda qabul qilingan qonun loyihasining matni, qoida tariqasida, Qonunchilik palatasining rasmiy veb-saytida joylashtiriladi, zarur bo‘lgan hollarda esa, Qonunchilik palatasining qaroriga ko‘ra ommaviy axborot vositalarida e’lon qilinadi. Bunda eng muhim ijtimoiy, ijtimoiy-iqtisodiy ahamiyatga ega bo‘lgan qonun loyihalari Qonunchilik palatasining uni birinchi o‘qishda qabul qilish haqidagi qaroriga muvofiq qonun loyihasini ikkinchi o‘qishga tayyorlash jarayonida keng muhokamaga, shu jumladan joylarda fuqarolar ishtirokidagi keng muhokamaga chiqarilishi mumkin.

Mas’ul qo‘mita qonun loyihasini ikkinchi o‘qishga tayyorlash chog‘ida qonun loyihasining moddama-modda muhokamasini o‘tkazadi, kelib tushgan fikrlar va takliflarni umumlashtiradi. Qonun loyihasining maromiga yetkazilgan matni fraksiyalarga, shuningdek qonun loyihasini kiritgan qonunchilik tashabbusi huquqi subyektiga ularning ushbu qonun loyihasi bo‘yicha fikrlari va takliflarini olish uchun yuboriladi.

Mas’ul qo‘mita maromiga yetkazilgan qonun loyihasi bo‘yicha fikrlar va takliflarni olganidan so‘ng ularning muhokamasini qonun loyihasini kiritgan qonunchilik tashabbusi huquqi subyekti vakillari, fuqarolik jamiyati institutlarining hamda ilmiy-tadqiqot muassasalarining vakillari ishtirokida tashkil etadi. Muhokamalarga olimlar, mutaxassislar ham taklif etilishi mumkin.

Fraksiyalar o‘z dasturiy maqsadli vazifalaridan kelib chiqib, qonun loyihalarining joylarda fuqarolar ishtirokidagi muhokamasini hamda ular bo‘yicha kelib tushgan takliflarni o‘rganishni siyosiy partiyalar tegishli tashkilotlarining xodimlarini jalb etgan holda tashkil etadi. Fraksiyalar o‘rganishlar yakunlariga ko‘ra kelib tushgan fikrlar va takliflarni o‘z majlislarida muhokama qiladi, o‘z dasturiy maqsadli vazifalaridan kelib chiqqan holda takliflar ishlab chiqadi, ular mas’ul qo‘mitaga yuboriladi.

Mas’ul qo‘mita tomonidan asosli deb topilgan takliflar qonun loyihasining matniga kiritiladi.

O‘zini parlamentdagi muxolifat deb e’lon qilgan fraksiya o‘z takliflari asosida ikkinchi o‘qishga tayyorlagan qonun loyihasi matnini Qonunchilik palatasiga kiritganda mazkur matn ushbu moddaning sakkizinchi va to‘qqizinchi qismlarida belgilangan tartibda mas’ul qo‘mita tomonidan ko‘rib chiqiladi. Bunda muqobil qonun loyihasi Qonunchilik palatasi majlisida asosiy qonun loyihasi bilan bir vaqtda ko‘rib chiqilishi kerak. Qonunchilik palatasi deputatlarining qaror qabul qilish uchun talab qilinadigan eng ko‘p miqdordagi ovozini to‘plagan qonun loyihasi ikkinchi o‘qish tartib-taomilida ko‘rib chiqiladi.

Qonun loyihasini Qonunchilik palatasi tomonidan ikkinchi o‘qishda ko‘rib chiqish chog‘ida muhokama uning nomi, muqaddimasi (agar mavjud bo‘lsa), har bir moddasi bo‘yicha alohida-alohida o‘tkaziladi. Bunda mas’ul qo‘mita tomonidan ma’qullangan fikrlar va takliflar ham, ma’qullanmagan fikrlar va takliflar ham muhokama qilinadi. Qonun loyihasi bo‘yicha, qoida tariqasida, uning nomiga, muqaddimasiga (agar mavjud bo‘lsa), har bir moddasiga alohida-alohida ovoz beriladi. Qonunchilik palatasining qaroriga ko‘ra qonun loyihasi bo‘yicha ovoz berish boblar yoki bo‘limlar bo‘yicha, shuningdek bir necha moddalar bo‘yicha bir vaqtning o‘zida o‘tkazilishi mumkin.

O‘zini parlamentdagi muxolifat deb e’lon qilgan fraksiya ikkinchi o‘qishda ko‘rib chiqilayotgan qonun loyihasi tarkibiy birligining matni bo‘yicha taqdim etgan muqobil tahrir asosiy qonun loyihasining tegishli bobi, bo‘limi, moddasi yoki bandi ko‘rib chiqilayotganda muhokama qilinadi. Qonunchilik palatasi deputatlarining qaror qabul qilish uchun talab qilinadigan eng ko‘p miqdordagi ovozini to‘plagan matn qonun loyihasiga kiritiladi.

Muhokama natijalari bo‘yicha Qonunchilik palatasi qonun loyihasini maromiga yetkazish va keyingi o‘qishda ko‘rib chiqish uchun palataga kiritish muddatini belgilagan holda uni ikkinchi o‘qishda qabul qilish haqida yoxud qonun loyihasini rad etish to‘g‘risida qaror qabul qiladi.

Qonun loyihasini kiritgan qonunchilik tashabbusi huquqi subyekti o‘zi kiritgan qonun loyihasini qonun loyihasi Qonunchilik palatasi tomonidan ikkinchi o‘qishda qabul qilinguniga qadar chaqirib olish to‘g‘risida Qonunchilik palatasiga taklif kiritishga haqli. Qonun loyihasini chaqirib olish to‘g‘risidagi masala Qonunchilik palatasi tomonidan ko‘rib chiqiladi.

Uchinchi o‘qishda qonun loyihasi muhokama qilinmasdan to‘laligicha ovozga qo‘yiladi.

Qonun loyihasi birinchi yoki ikkinchi o‘qishda qabul qilingan taqdirda, mas’ul qo‘mitaning taklifiga binoan qonunni keyingi o‘qishlar tartib-taomilini istisno etgan holda qabul qilish to‘g‘risidagi masala ovozga qo‘yilishi mumkin.

Qonun Qonunchilik palatasi tomonidan palata deputatlari umumiy sonining ko‘pchilik ovozi bilan qabul qilinadi, bundan ushbu Qonun 15¹, 17 va 18-moddalarida nazarda tutilgan hollar mustasno.

Qonunchilik palatasi tomonidan qabul qilingan qonun o‘n kun ichida Senatga ko‘rib chiqish uchun yuboriladi. Senatga qonun bilan birgalikda qonun loyihasini Qonunchilik palatasiga kiritish chog‘ida taqdim etilgan materiallar yuboriladi.

Senat tomonidan rad etilgan qonun Qonunchilik palatasi tomonidan bir oylik muddatda qayta ko‘rib chiqilishi lozim.

Mas’ul qo‘mita Senat tomonidan rad etilgan qonun yuzasidan xulosa beradi.

Mas’ul qo‘mitaning xulosasi olinganidan keyin qonunni Qonunchilik palatasi tomonidan qayta ko‘rib chiqish masalasi belgilangan tartibda Qonunchilik palatasi majlisining kun tartibiga kiritiladi.

Senat tomonidan rad etilgan qonunni qayta ko‘rib chiqishda Qonunchilik palatasi quyidagi qarorlardan birini qabul qiladi:

yuzaga kelgan kelishmovchiliklarni bartaraf etish uchun belgilangan tartibda kelishuv komissiyasini tuzish;

qonunni Qonunchilik palatasi tomonidan avvalgi qabul qilingan tahririda qabul qilish;

qonunni Qonunchilik palatasining qayta ko‘rib chiqishidan olib tashlash.

Agar Qonunchilik palatasi Senat tomonidan rad etilgan qonunni Qonunchilik palatasi deputatlari umumiy sonining uchdan ikki qismidan iborat ko‘pchilik ovozi bilan yana ma’qullasa, qonun O‘zbekiston Respublikasi Oliy Majlisi tomonidan qabul qilingan hisoblanadi hamda imzolanishi va e’lon qilinishi uchun O‘zbekiston Respublikasi Prezidentiga yuboriladi.

Senat tomonidan rad etilgan qonun yuzasidan Qonunchilik palatasi va Senat yuzaga kelgan kelishmovchiliklarni bartaraf etish uchun Qonunchilik palatasi deputatlari va Senat a’zolari orasidan tenglik asosida kelishuv komissiyasini tuzishi mumkin.

Qonunchilik palatasida kelishuv komissiyasini tuzish to‘g‘risidagi tashabbus Qonunchilik palatasi Spikeridan, shuningdek fraksiyalardan chiqishi mumkin.

Kelishuv komissiyasining Qonunchilik palatasidan ko‘rsatilgan tarkibi uning majlisida tasdiqlanadi. Bunda kelishuv komissiyasining Qonunchilik palatasidan ko‘rsatilgan tarkibiga o‘zini muxolifat deb e’lon qilgan fraksiyalarning vakillari kiritilishi shart.

Kelishuv komissiyasining har bir palatadan saylangan a’zolari o‘z tarkibidan ko‘pchilik ovoz bilan komissiyaning hamraislarini saylaydilar.

Kelishuv komissiyasi qonunning yagona matnini ishlab chiqish maqsadida Senatning har bir e’tirozini alohida-alohida ko‘rib chiqadi.

Kelishuv komissiyasining qarorlari kelishuv komissiyasi tarkibiga kirgan Qonunchilik palatasi deputatlari va senatorlarning alohida-alohida ovoz berishi orqali qabul qilinadi. Qaror, agar komissiyaning har bir palatadan saylangan a’zolarining ko‘pchiligi uni yoqlab ovoz bergan bo‘lsa, qabul qilingan hisoblanadi.

Kelishuv komissiyasi o‘z ishining natijalari yuzasidan kelishmovchiliklarni bartaraf etish bo‘yicha takliflarni o‘z ichiga olgan xulosa qabul qiladi. Xulosaga qonunga doir o‘zgartishlar va qo‘shimchalar loyihasining matni ilova qilinadi.

Xulosa Qonunchilik palatasi va Senatdan saylangan kelishuv komissiyasining hamraislari tomonidan imzolanib, tegishincha Qonunchilik palatasi va Senatga topshiriladi.

Kelishuv komissiyasining takliflari qabul qilingan taqdirda qonun Qonunchilik palatasi tomonidan qayta ko‘rib chiqilishi kerak. Qonunni qayta ko‘rib chiqishda kelishuv komissiyasining bayonnomasida mavjud bo‘lgan takliflargina muhokama qilinadi.

Kelishuv komissiyasining loaqal bitta taklifi rad etilgan taqdirda Qonunchilik palatasi kelishuv komissiyasiga yangi takliflarni taqdim etish uchun palata tomonidan ma’qullangan tuzatishlarni inobatga olgan holda ishni davom ettirishni taklif qilishi mumkin.

Qonunchilik palatasi qonunni kelishuv komissiyasining tahririda qabul qilsa, u ma’qullash uchun Senatga yuboriladi.

Agar kelishuv komissiyasining qonun bo‘yicha ishlari yakunlariga ko‘ra kelishuvga erishilmasa, qonun Senat tomonidan rad etilgan qonun sifatida qayta ko‘rib chiqilishi kerak.

Senat qonunni ma’qullash yoki rad etish to‘g‘risida u Senatga kelib tushgan kundan e’tiboran oltmish kun ichida qaror qabul qilmasa, Qonunchilik palatasi tomonidan qonun imzolanishi va e’lon qilinishi uchun O‘zbekiston Respublikasi Prezidentiga yuboriladi.

O‘zbekiston Respublikasi Prezidenti tomonidan e’tirozlar bilan qaytarilgan qonun Qonunchilik palatasi tomonidan bir oylik muddatda qayta ko‘rib chiqilishi kerak.

Mas’ul qo‘mita O‘zbekiston Respublikasi Prezidenti tomonidan qaytarilgan qonun yuzasidan xulosa beradi.

Mas’ul qo‘mitaning xulosasi olinganidan keyin qonunni Qonunchilik palatasi tomonidan qayta ko‘rib chiqish masalasi belgilangan tartibda Qonunchilik palatasi majlisining kun tartibiga kiritiladi.

O‘zbekiston Respublikasi Prezidenti tomonidan qaytarilgan qonunni qayta ko‘rib chiqishda Qonunchilik palatasi tomonidan quyidagi qarorlardan biri qabul qilinadi:

qonunni O‘zbekiston Respublikasi Prezidentining mulohazalari va takliflarini inobatga olgan holda qabul qilish;

qonunni bundan buyon ko‘rib chiqmaslik;

qonunni avvalgi qabul qilingan tahririda ma’qullash.

Agar qonun avvalgi qabul qilingan tahririda Qonunchilik palatasi deputatlari umumiy sonining kamida uchdan ikki qismidan iborat ko‘pchilik ovozi bilan ma’qullansa, Senatga ma’qullash uchun yuboriladi.

O‘zbekiston Respublikasi Konstitutsiyasining, konstitutsiyaviy qonunning, ularga o‘zgartirishlar va qo‘shimchalar kiritish to‘g‘risidagi qonunlarning loyihalarini qabul qilish uchun Qonunchilik palatasi deputatlari umumiy sonining uchdan ikki qismidan iborat ko‘pchilik ovozi talab qilinadi.

Qonunchilik palatasi O‘zbekiston Respublikasining Konstitutsiyasiga o‘zgartirishlar va qo‘shimchalar kiritish to‘g‘risidagi qonun loyihasini tegishli taklif kiritilgandan keyin olti oy ichida uning keng muhokamasini inobatga olgan holda ko‘rib chiqishi mumkin.

Agar Qonunchilik palatasi O‘zbekiston Respublikasining Konstitutsiyasiga o‘zgartirishlar va qo‘shimchalar kiritish to‘g‘risidagi qonun loyihasini qabul qilmasa, uni ko‘rib chiqish kamida bir yildan keyin qayta boshlanishi mumkin.

Qonunchilik palatasi qonunlar qabul qilinishi talab etilmaydigan masalalar yuzasidan qarorlar qabul qiladi.

Qaror loyihasi Qonunchilik palatasiga kiritilayotganda unga qisqacha tushuntirish xati va boshqa zarur materiallar ilova qilinadi.

Qonunchilik palatasi Spikeri, mas’ul qo‘mitani belgilaydi, unga va, bir vaqtning o‘zida, fraksiyalarga qaror loyihasini hamda unga ilova qilingan materiallarni topshiradi.

Mas’ul qo‘mita qaror loyihasi bo‘yicha barcha fraksiyalar, manfaatdor tashkilotlar hamda ekspertlar guruhlaridan fikrlar va takliflarni to‘plab, uni Qonunchilik palatasi majlisida ko‘rib chiqish mumkinligi to‘g‘risida Qonunchilik palatasi Kengashiga xulosa taqdim etadi.

Qonunchilik palatasi Kengashi mas’ul qo‘mitaning xulosasi asosida, fraksiyalarning fikrlari va takliflarini hisobga olgan holda qaror loyihasini Qonunchilik palatasi majlisining kun tartibiga kiritish yoki kiritmaslik to‘g‘risida qaror qabul qiladi.

Qonunchilik palatasi majlisida mas’ul qo‘mita vakilining axboroti eshitilib, unda fraksiyalarning qaror loyihasi bo‘yicha fikrlari va takliflari deputatlarga yetkazilishi shart.

Fraksiyalarning qaror loyihasi bo‘yicha fikrlari va takliflari majburiy ravishda va har tomonlama muhokama qilinishi lozim.

Muhokama natijalariga ko‘ra deputatlar umumiy sonining ko‘pchilik ovozi bilan Qonunchilik palatasining qarori qabul qilinadi.

Agar ovoz berish yakunlariga ko‘ra qaror loyihasini qabul qilish to‘g‘risidagi taklif zarur miqdorda ovoz to‘plamagan bo‘lsa, taklif rad etilgan hisoblanadi.

Qonunchilik palatasining Senat bilan birgalikdagi vakolatlariga kiritilgan masala yuzasidan qabul qilingan qarori mazkur qaror qabul qilingan kundan e’tiboran besh kun ichida, agar ushbu Qonunda boshqacha qoida belgilangan bo‘lmasa, Senatga yuboriladi.

O‘zbekiston Respublikasining saylov huquqiga ega bo‘lgan, yuz ming nafardan kam bo‘lmagan fuqarolari, Senat, O‘zbekiston Respublikasi Oliy Majlisining Inson huquqlari bo‘yicha vakili (ombudsman), O‘zbekiston Respublikasi Markaziy saylov komissiyasi qonunchilik takliflarini qonunchilik tashabbusi tartibida O‘zbekiston Respublikasi Oliy Majlisining Qonunchilik palatasiga kiritishga haqli. Mazkur qonunchilik taklifida muayyan sohada qonunni qabul qilish, amaldagi qonunlarga o‘zgartirishlar, qo‘shimchalar kiritish, qonunlarni yoki ularning qismlarini o‘z kuchini yo‘qotgan deb topish zaruriyati asoslantirilgan bo‘lishi, shuningdek qabul qilish uchun taklif etilayotgan qonunning konsepsiyasi va kutilayotgan natijalar to‘g‘risidagi axborot bo‘lishi kerak.

Quyidagi masalalar Qonunchilik palatasiga O‘zbekiston Respublikasi fuqarolari tomonidan kiritiladigan qonunchilik taklifining predmeti bo‘lishi mumkin emas:

O‘zbekiston Respublikasining hududiy yaxlitligini o‘zgartirish to‘g‘risidagi;

amnistiya va afv etish haqidagi;

mansabdor shaxslarni tayinlash va lavozimidan ozod etish to‘g‘risidagi.

Qonunchilik taklifi Qonunchilik palatasiga O‘zbekiston Respublikasi fuqarolari tomonidan kiritilayotganda quyidagilar taqdim etilishi kerak:

qonunchilik taklifining matni;

saylov huquqiga ega bo‘lgan, yuz ming nafardan kam bo‘lmagan O‘zbekiston Respublikasi fuqarolarining familiyasi, ismi, otasining ismi, tug‘ilgan sanasi, yashash joyi manzili, pasportining yoki identifikatsiyalovchi ID-kartasining seriyasi va raqami, shuningdek O‘zbekiston Respublikasi fuqarolari tomonidan kiritilgan imzoning sanasi ko‘rsatilgan imzo varaqalari. Bunda imzolar kamida sakkizta hududiy subyektda (viloyatda), shu jumladan Qoraqalpog‘iston Respublikasi va Toshkent shahrida yashayotgan O‘zbekiston Respublikasi fuqarolari o‘rtasida mutanosib taqsimlangan bo‘lishi hamda imzolar sonida yo‘l qo‘yiladigan eng ko‘p chetga chiqish, qoida tariqasida, o‘n foizdan oshmasligi kerak;

qonunchilik taklifini ko‘rib chiqish chog‘ida ishtirok etadigan vakil yoki vakillar guruhi haqidagi axborot.

Qonunchilik taklifi Qonunchilik palatasiga Senat, O‘zbekiston Respublikasi Oliy Majlisining Inson huquqlari bo‘yicha vakili (ombudsman), O‘zbekiston Respublikasi Markaziy saylov komissiyasi tomonidan kiritilayotganda quyidagilar taqdim etilishi kerak:

qonunchilik taklifining matni;

qonunchilik taklifini kiritish to‘g‘risidagi tegishli qaror;

qonunchilik taklifini ko‘rib chiqish chog‘ida ishtirok etadigan vakil haqidagi axborot.

Qonunchilik taklifiga ushbu moddaning uchinchi va to‘rtinchi qismlarida nazarda tutilmagan boshqa hujjatlar hamda materiallar ham ilova qilinishi mumkin.

Qonunchilik palatasi Spikeri mas’ul qo‘mitani belgilaydi, qonunchilik taklifini hamda unga ilova qilingan materiallarni mas’ul qo‘mitaga va bir vaqtning o‘zida fraksiyalarga topshiradi, shuningdek fraksiyalar tomonidan fikrlar va takliflarni hamda mas’ul qo‘mita tomonidan xulosani taqdim etish muddatini belgilaydi.

Qonunchilik taklifini Qonunchilik palatasi ko‘rib chiqishiga qabul qilish mumkinligi to‘g‘risidagi takliflarni ishlab chiqish uchun qonunchilik taklifi ustida ishlash fraksiyalar va mas’ul qo‘mita tomonidan bir vaqtning o‘zida amalga oshiriladi. Bunda fraksiyalarning qonunchilik taklifi bo‘yicha fikrlari va takliflarisiz mas’ul qo‘mita ushbu qonunchilik taklifi yuzasidan o‘z xulosasini chiqarish huquqiga ega emas.

Mas’ul qo‘mita imzolarning ushbu Qonun 19¹-moddasining talablariga muvofiqligini belgilangan tartibda tekshiradi.

Mas’ul qo‘mita barcha fraksiyalardan qonunchilik taklifi bo‘yicha fikrlar va takliflarni to‘plab, Qonunchilik palatasi Kengashiga qonunchilik taklifini Qonunchilik palatasi ko‘rib chiqishi uchun qabul qilish mumkinligi to‘g‘risida belgilangan muddatda xulosa taqdim etadi.

Qonunchilik palatasi Kengashi mas’ul qo‘mitaning xulosasi asosida, fraksiyalarning fikrlari va takliflarini hisobga olgan holda qonunchilik taklifini Qonunchilik palatasi ko‘rib chiqishi uchun qabul qilish to‘g‘risida yoki qonunchilik taklifi ushbu Qonunning 19¹-moddasida belgilangan talablarga muvofiq bo‘lmagan taqdirda uni qonunchilik taklifi tashabbuskoriga qaytarish haqida qaror qabul qiladi.

Aniqlangan kamchiliklar bartaraf etilganidan keyin qonunchilik taklifi Qonunchilik palatasi ko‘rib chiqishi uchun yangidan kiritilishi mumkin.

Qonunchilik taklifi Qonunchilik palatasi ko‘rib chiqishi uchun qabul qilinayotganda qonunchilik taklifini palata majlisida ko‘rib chiqishga tayyorlash muddati uning Kengashi tomonidan belgilanishi shart.

Ko‘rib chiqish uchun qabul qilingan qonunchilik taklifi unga ilova qilingan materiallar bilan Qonunchilik palatasining qo‘mitalariga yuboriladi.

Qonunchilik taklifini dastlabki tarzda muhokama qilish va Qonunchilik palatasida ko‘rib chiqishga tayyorlash mas’ul qo‘mita tomonidan amalga oshiriladi.

Fraksiyalar qonunchilik taklifini dastlabki tarzda muhokama qilish yakunlariga ko‘ra mas’ul qo‘mitaga o‘z fikrlari va takliflarini taqdim etadi.

Mas’ul qo‘mita fraksiyalarning, manfaatdor tashkilotlarning hamda ekspertlar guruhlarining fikrlari va takliflarini hisobga olgan holda qonunchilik taklifining dastlabki tarzdagi muhokamasini o‘tkazadi va uni quyidagilarni ilova qilgan holda Qonunchilik palatasi Kengashi ko‘rib chiqishi uchun taqdim etadi:

qonunchilik taklifini ko‘rib chiqish uchun Qonunchilik palatasiga kiritish to‘g‘risidagi Qonunchilik palatasi Kengashining qarori loyihasini;

qonunchilik taklifi bo‘yicha mas’ul qo‘mitaning xulosasini;

fraksiyalarning qonunchilik taklifi bo‘yicha fikrlari va takliflarini.

Qonunchilik taklifini Qonunchilik palatasi qo‘mitalarida muhokama qilish ochiq o‘tkaziladi. Muhokamalarga qonunchilik taklifini kiritgan tashabbuskorlarning vakillari, fuqarolik jamiyati institutlarining va ilmiy-tadqiqot muassasalarining vakillari, shuningdek olimlar, mutaxassislar ham taklif etilishi mumkin.

Qonunchilik palatasi Kengashi qonunchilik taklifini ko‘rib chiqish uchun Qonunchilik palatasi majlisining kun tartibi loyihasiga kiritish to‘g‘risida qaror qabul qiladi.

Qonunchilik taklifini Qonunchilik palatasi majlisida ko‘rib chiqish chog‘ida mas’ul qo‘mita vakilining ma’ruzasi eshitiladi va mazkur masala yuzasidan muhokamalar o‘tkaziladi.

Qonunchilik palatasi muhokama natijalari bo‘yicha quyidagi qarorlardan birini qabul qiladi:

qonunchilik taklifini ma’qullash to‘g‘risida;

qonunchilik taklifini rad etish to‘g‘risida.

Qonunchilik taklifini ma’qullash to‘g‘risida qaror qabul qilingan taqdirda, ma’qullangan qonunchilik taklifi tegishli qonun loyihasini tayyorlash va Qonunchilik palatasiga belgilangan tartibda kiritish uchun tegishli qo‘mitaga yuboriladi. Qonunchilik palatasining qarori bilan qonunchilik tashabbusi huquqi subyektiga tegishli qonun loyihasini tayyorlash, shuningdek Qonunchilik palatasiga belgilangan tartibda kiritish tavsiya etilishi mumkin.

Navbatdagi yil uchun O‘zbekiston Respublikasining Davlat budjeti to‘g‘risidagi qonun loyihasi (bundan buyon matnda Davlat budjeti to‘g‘risidagi qonun loyihasi deb yuritiladi) va budjetnoma O‘zbekiston Respublikasi Vazirlar Mahkamasi tomonidan, qoida tariqasida, joriy yilning 15-oktabridan kechiktirmay O‘zbekiston Respublikasi Hisob palatasining xulosasi bilan birga Qonunchilik palatasiga kiritiladi.

Davlat budjeti to‘g‘risidagi qonun loyihasi Qonunchilik palatasi tomonidan, qoida tariqasida, joriy yilning 15-noyabrigacha ko‘rib chiqiladi.

Qonunchilik palatasi Spikeri Davlat budjeti to‘g‘risidagi qonun loyihasi va budjetnomani dastlabki tarzda ko‘rib chiqish hamda fikrlar va takliflar ishlab chiqish uchun Budjet va iqtisodiy masalalar qo‘mitasiga, fraksiyalarga hamda Qonunchilik palatasining qo‘mitalariga yo‘llaydi.

Davlat budjeti to‘g‘risidagi qonun loyihasini dastlabki tarzda muhokama qilish jarayonida fraksiyalar va Qonunchilik palatasining qo‘mitalari Davlat budjeti to‘g‘risidagi qonun loyihasi bilan bog‘liq qo‘shimcha axborotni tegishli organlardan talab qilib olishi mumkin.

Budjet va iqtisodiy masalalar qo‘mitasi barcha fraksiyalar hamda Qonunchilik palatasi qo‘mitalarining fikrlari va takliflarini o‘rganib chiqib, Davlat budjeti to‘g‘risidagi qonun loyihasining va budjetnomaning dastlabki tarzda ko‘rib chiqilishini o‘tkazadi hamda Qonunchilik palatasi Kengashiga Davlat budjeti to‘g‘risidagi qonun loyihasini Qonunchilik palatasi ko‘rib chiqishi uchun kiritish mumkinligi to‘g‘risida belgilangan muddatda xulosa taqdim etadi.

Fraksiyalarning hamda Qonunchilik palatasi qo‘mitalarining Davlat budjeti to‘g‘risidagi qonun loyihasi bo‘yicha fikrlari va takliflari Qonunchilik palatasining majlisida muhokama qilinishi shart.

Davlat budjeti to‘g‘risidagi qonun loyihasini ko‘rib chiqish chog‘ida Qonunchilik palatasi O‘zbekiston Respublikasi iqtisodiyot va moliya vazirining yoki uning vazifasini bajaruvchi shaxsning ma’ruzasini, Budjet va iqtisodiy masalalar qo‘mitasi vakilining qo‘shimcha ma’ruzasini eshitadi hamda uni birinchi o‘qishda qabul qilish to‘g‘risida yoxud rad etish haqida qaror qabul qiladi.

Davlat budjeti to‘g‘risidagi qonun loyihasi birinchi o‘qishda rad etilgan taqdirda Qonunchilik palatasi uni O‘zbekiston Respublikasi Vazirlar Mahkamasiga maromiga yetkazish uchun qaytaradi.

O‘zbekiston Respublikasi Vazirlar Mahkamasi rad etilgan Davlat budjeti to‘g‘risidagi qonun loyihasi olingan kundan e’tiboran o‘n to‘rt kun ichida Qonunchilik palatasining mulohazalari va takliflarini inobatga olgan holda qonun loyihasini maromiga yetkazadi hamda maromiga yetkazilgan qonun loyihasini Qonunchilik palatasiga birinchi o‘qishda qayta ko‘rib chiqish uchun kiritadi.

Davlat budjeti to‘g‘risidagi qonun loyihasining davlat sirini va qonun bilan qo‘riqlanadigan boshqa sirni tashkil etuvchi qismi Qonunchilik palatasining yopiq majlisida qonunchilikda belgilangan tartibda ko‘rib chiqiladi.

Qonunchilik palatasi tomonidan qabul qilingan Davlat budjeti to‘g‘risidagi Qonun qabul qilingan kundan e’tiboran besh kun ichida Senatga ko‘rib chiqish uchun yuboriladi.

Davlat budjeti to‘g‘risidagi Qonunga O‘zbekiston Respublikasi Vazirlar Mahkamasining taqdimiga binoan belgilangan tartibda o‘zgartirishlar va qo‘shimchalar kiritilishi mumkin.

Davlat budjeti to‘g‘risidagi Qonunga o‘zgartirishlar va qo‘shimchalar kiritish to‘g‘risidagi masala, qoida tariqasida, Qonunchilik palatasining majlisida birinchi navbatda ko‘rib chiqilishi kerak.

Davlat budjeti to‘g‘risidagi Qonunga o‘zgartirishlar va qo‘shimchalar belgilangan tartibda kiritiladi.

O‘zbekiston Respublikasi Bosh vaziri nomzodi O‘zbekiston Respublikasi Oliy Majlisi palatalarining mansabdor shaxslari saylangandan va organlari shakllangandan so‘ng bir oy ichida yoki O‘zbekiston Respublikasi Bosh vaziri lavozimidan ozod etilganidan keyin yoxud O‘zbekiston Respublikasi Bosh vaziri, O‘zbekiston Respublikasi Vazirlar Mahkamasining amaldagi tarkibi iste’foga chiqqanidan keyin bir oy ichida Qonunchilik palatasi ko‘rib chiqishi va ma’qullashi uchun O‘zbekiston Respublikasi Prezidenti tomonidan barcha siyosiy partiyalar fraksiyalari bilan maslahatlashuvlar o‘tkazilganidan so‘ng taqdim etiladi.

Qonunchilik palatasi O‘zbekiston Respublikasi Prezidenti tomonidan taqdim etilgan O‘zbekiston Respublikasi Bosh vaziri nomzodini taqdimnoma kiritilgan kundan e’tiboran o‘n kun ichida ko‘rib chiqadi.

O‘zbekiston Respublikasining Bosh vaziri lavozimiga nomzod Qonunchilik palatasida uning nomzodi ko‘rib chiqilayotganda O‘zbekiston Respublikasi Vazirlar Mahkamasining yaqin muddatga va uzoq istiqbolga mo‘ljallangan harakat dasturini taqdim etadi.

O‘zbekiston Respublikasi Vazirlar Mahkamasining yaqin muddatga va uzoq istiqbolga mo‘ljallangan harakat dasturi Qonunchilik palatasining majlisida eshitiladi.

O‘zbekiston Respublikasi Vazirlar Mahkamasining yaqin muddatga va uzoq istiqbolga mo‘ljallangan harakat dasturi, fraksiyalar vakillarining o‘z fikrlari va nuqtai nazarlari bayon etilgan chiqishlari eshitilganidan so‘ng O‘zbekiston Respublikasining Bosh vaziri nomzodini ma’qullash to‘g‘risidagi masala ko‘rib chiqiladi.

O‘zbekiston Respublikasi Bosh vaziri nomzodi uning uchun Qonunchilik palatasi deputatlari umumiy sonining yarmidan ko‘pi tomonidan ovoz berilgan taqdirda ma’qullangan hisoblanadi.

Qonunchilik palatasining O‘zbekiston Respublikasi Bosh vaziri nomzodini ma’qullash masalasi yuzasidan qarori mazkur qaror qabul qilingan kundan e’tiboran uch kun ichida O‘zbekiston Respublikasi Prezidentiga yuboriladi.

Agar ovoz berish chog‘ida O‘zbekiston Respublikasi Bosh vaziri nomzodi Qonunchilik palatasi deputatlari umumiy sonining yarmidan ko‘pining ovozini to‘play olmagan bo‘lsa, O‘zbekiston Respublikasi Prezidenti barcha fraksiyalar bilan qo‘shimcha maslahatlashuvlar o‘tkazilganidan so‘ng Bosh vazir lavozimiga nomzodni yana ikki marta taqdim etish huquqiga ega.

O‘zbekiston Respublikasi Bosh vaziri lavozimiga taqdim etilgan nomzod uch marta rad etilgan taqdirda, O‘zbekiston Respublikasi Prezidenti Bosh vazirni tayinlaydi va Qonunchilik palatasini tarqatib yuborishga haqli.

Qonunchilik palatasi tarqatib yuborilgan taqdirda yangi saylov tarqatib yuborish to‘g‘risidagi qaror qabul qilingan kundan e’tiboran uch oy ichida o‘tkaziladi.

O‘zbekiston Respublikasi Bosh vaziri nomzodi Qonunchilik palatasi tomonidan ma’qullanganidan keyin O‘zbekiston Respublikasi Prezidenti tomonidan lavozimga tayinlanadi.

O‘zbekiston Respublikasi Bosh vaziri va Qonunchilik palatasi o‘rtasida ziddiyatlar doimiy tus olgan holda Qonunchilik palatasi deputatlari umumiy sonining kamida uchdan bir qismi tomonidan O‘zbekiston Respublikasi Prezidenti nomiga rasman kiritilgan taklif bo‘yicha Qonunchilik palatasining muhokamasiga O‘zbekiston Respublikasi Bosh vaziriga nisbatan ishonchsizlik votumi bildirish haqidagi masala kiritiladi.

O‘zbekiston Respublikasi Bosh vaziriga nisbatan ishonchsizlik votumi, agar uning uchun Qonunchilik palatasi deputatlari umumiy sonining kamida uchdan ikki qismi ovoz bersa, qabul qilingan hisoblanadi. Bu holda O‘zbekiston Respublikasi Prezidenti O‘zbekiston Respublikasi Bosh vazirini lavozimidan ozod etish to‘g‘risida qaror qabul qiladi. Bunda O‘zbekiston Respublikasi Vazirlar Mahkamasining butun tarkibi O‘zbekiston Respublikasi Bosh vaziri bilan birga iste’foga chiqadi.

O‘zbekiston Respublikasi Vazirlar Mahkamasining a’zolari ularning nomzodlari O‘zbekiston Respublikasi Prezidentining taqdimiga binoan Qonunchilik palatasi tomonidan ma’qullanganidan keyin O‘zbekiston Respublikasi Prezidenti tomonidan lavozimga tayinlanadi.

O‘zbekiston Respublikasi Vazirlar Mahkamasi a’zoligiga nomzod u mas’ul qo‘mita, fraksiyalar tomonidan dastlabki tarzda ko‘rib chiqilganidan keyin Qonunchilik palatasining majlisida ko‘rib chiqiladi va ma’qullanadi.

O‘zbekiston Respublikasi Vazirlar Mahkamasi a’zosining lavozimiga nomzod uning nomzodi Qonunchilik palatasida ko‘rib chiqilayotganda va ma’qullanayotganda O‘zbekiston Respublikasi Vazirlar Mahkamasining harakatlar dasturi bilan o‘zaro bog‘liq bo‘lgan, istiqbolga mo‘ljallangan maqsadli ko‘rsatkichlar va vazifalarga erishish borasidagi huquqiy, iqtisodiy, ijtimoiy, tashkiliy-texnik choralarni nazarda tutuvchi harakatlar rejasini, shuningdek korrupsiyaga qarshi kurashish rejasini taqdim etadi.

Qonunchilik palatasi O‘zbekiston Respublikasi Vazirlar Mahkamasi a’zoligiga nomzodni rad etgan taqdirda, O‘zbekiston Respublikasi Prezidenti ko‘rib chiqish va ma’qullash uchun yangi nomzodni kiritadi.

O‘zbekiston Respublikasi Vazirlar Mahkamasining a’zosi O‘zbekiston Respublikasi Prezidenti tomonidan lavozimga tayinlanganidan keyin o‘z vazifalarini bajarishga kirishadi.

O‘zbekiston Respublikasi Oliy Majlisining Inson huquqlari bo‘yicha vakili (ombudsman) nomzodi Qonunchilik palatasi ko‘rib chiqishi uchun O‘zbekiston Respublikasi Prezidenti tomonidan kiritiladi.

O‘zbekiston Respublikasi Oliy Majlisining Inson huquqlari bo‘yicha vakili (ombudsman) o‘rinbosarining nomzodi Qonunchilik palatasi ko‘rib chiqishi uchun O‘zbekiston Respublikasi Oliy Majlisining Inson huquqlari bo‘yicha vakili (ombudsman) tomonidan kiritiladi.

Qonunchilik palatasining O‘zbekiston Respublikasi Oliy Majlisining Inson huquqlari bo‘yicha vakilini (ombudsmanni) va uning o‘rinbosarini saylash to‘g‘risidagi qarorlari Senatga yuboriladi.

O‘zbekiston Respublikasi Oliy Majlisining Inson huquqlari bo‘yicha vakili (ombudsman) nomzodi O‘zbekiston Respublikasi Oliy Majlisi palatalarining majlislarida ko‘rib chiqilganidan keyin ushbu masala yuzasidan qabul qilingan uzil-kesil qaror qonunda belgilangan tartibda O‘zbekiston Respublikasi Prezidentiga yuboriladi”;

O‘zbekiston Respublikasi Markaziy saylov komissiyasi a’zoligiga nomzodlar to‘g‘risidagi takliflar Qonunchilik palatasi ko‘rib chiqishi uchun Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlari tomonidan kiritiladi.

Qonunchilik palatasining O‘zbekiston Respublikasi Markaziy saylov komissiyasi a’zolarini saylash masalasi yuzasidan qarori mazkur qaror qabul qilingan kundan e’tiboran uch kun ichida Senatga yuboriladi.

Qonunchilik palatasi o‘zining ko‘rib chiqishi uchun kiritilgan O‘zbekiston Respublikasi Prezidentining urush holati e’lon qilish to‘g‘risidagi farmonini ushbu farmon kelib tushgan paytdan e’tiboran 48 soatdan kechiktirmay, O‘zbekiston Respublikasi Prezidentining umumiy yoki qisman safarbarlik e’lon qilish to‘g‘risidagi, favqulodda holat joriy etish, uning amal qilishini uzaytirish va tugatish to‘g‘risidagi farmonlarini esa ular kelib tushgan paytdan e’tiboran 72 soatdan kechiktirmay ko‘rib chiqadi.

O‘zbekiston Respublikasi Prezidentining urush holati, umumiy yoki qisman safarbarlik e’lon qilish to‘g‘risidagi, favqulodda holat joriy etish, uning amal qilishini uzaytirish va tugatish to‘g‘risidagi farmonlarini tasdiqlash haqidagi masala Qonunchilik palatasi qo‘mitalarida dastlabki tarzda muhokama qilinmasdan Qonunchilik palatasi tomonidan ko‘rib chiqiladi.

Qonunchilik palatasining O‘zbekiston Respublikasi Prezidentining urush holati, umumiy yoki qisman safarbarlik e’lon qilish to‘g‘risidagi, favqulodda holat joriy etish, uning amal qilishini uzaytirish va tugatish to‘g‘risidagi farmonlarini tasdiqlash masalasi yuzasidan qarorlari darhol O‘zbekiston Respublikasi Prezidentiga yuboriladi.

O‘zbekiston Respublikasi Vazirlar Mahkamasining o‘tgan yildagi ijtimoiy-iqtisodiy rivojlanish yakunlari va navbatdagi yil uchun nazarda tutilgan asosiy ustuvorliklar to‘g‘risidagi har yilgi ma’ruzasi O‘zbekiston Respublikasi Bosh vaziri tomonidan Qonunchilik palatasiga taqdim etiladi.

Fraksiyalar, Qonunchilik palatasining qo‘mitalari O‘zbekiston Respublikasi Vazirlar Mahkamasining har yilgi ma’ruzasini dastlabki tarzda ko‘rib chiqadi hamda fikrlar va takliflarni ishlab chiqadi, fikrlar va takliflar Qonunchilik palatasining majlisida majburiy ravishda hamda har tomonlama muhokama qilinishi lozim.

O‘zbekiston Respublikasi Vazirlar Mahkamasining har yilgi ma’ruzasini eshitish yakunlari bo‘yicha Qonunchilik palatasi qaror qabul qiladi, unda hukumatning mamlakat ijtimoiy-iqtisodiy rivojlanishining eng muhim masalalarini hal etishga doir faoliyati samaradorligini oshirishga qaratilgan takliflar bo‘lishi mumkin.

O‘zbekiston Respublikasi Vazirlar Mahkamasining har yilgi ma’ruzasini eshitish yakunlari bo‘yicha qabul qilingan Qonunchilik palatasining qarori O‘zbekiston Respublikasi Vazirlar Mahkamasiga yuboriladi.

O‘zbekiston Respublikasi Korrupsiyaga qarshi kurashish agentligi har yili O‘zbekiston Respublikasida korrupsiyaga qarshi kurashish to‘g‘risida milliy ma’ruza (bundan buyon matnda Milliy ma’ruza deb yuritiladi) tayyorlaydi, Milliy ma’ruza O‘zbekiston Respublikasi Korrupsiyaga qarshi kurashish agentligi direktori tomonidan Qonunchilik palatasiga taqdim etiladi.

Fraksiyalar, Qonunchilik palatasining qo‘mitalari Milliy ma’ruzani dastlabki tarzda ko‘rib chiqadi hamda fikrlar va takliflarni ishlab chiqadi, fikrlar va takliflar Qonunchilik palatasining majlisida majburiy ravishda hamda har tomonlama muhokama qilinadi.

Milliy ma’ruzani eshitish yakunlari bo‘yicha Qonunchilik palatasi qaror qabul qiladi, unda O‘zbekiston Respublikasida korrupsiyaga qarshi kurashish samaradorligini oshirishga qaratilgan takliflar bo‘lishi mumkin.

Milliy ma’ruzani eshitish yakunlari bo‘yicha qabul qilingan Qonunchilik palatasining qarori O‘zbekiston Respublikasi Korrupsiyaga qarshi kurashish agentligiga yuboriladi.

Qonunchilik palatasi O‘zbekiston Respublikasining referendumini o‘tkazish kerakligi to‘g‘risidagi materiallarni va mas’ul qo‘mitaning xulosasini ko‘rib chiqib, quyidagi qarorlardan birini qabul qilishi mumkin:

referendum tayinlash va uni ta’minlash chora-tadbirlari to‘g‘risida;

referendumni o‘tkazish to‘g‘risidagi tashabbusni rad etish haqida;

referendum o‘tkazmasdan turib, referendum o‘tkazish to‘g‘risidagi tashabbusda taklif qilingan qonunni yoki boshqa qarorni qabul qilish haqida.

Qonunchilik palatasining O‘zbekiston Respublikasining referendumi masalasi yuzasidan qarori mazkur qaror qabul qilingan kundan e’tiboran uch kun ichida Senatga, shuningdek referendum o‘tkazish tashabbuskorlariga yuboriladi.

Agar Qonunchilik palatasi O‘zbekiston Respublikasining referendumini o‘tkazish to‘g‘risidagi tashabbusni rad etish haqida qaror qabul qilsa, ayni shu mazmun yoki ma’nodagi ta’rif bilan referendum o‘tkazish to‘g‘risidagi masala kamida bir yildan keyin Qonunchilik palatasiga ko‘rib chiqish uchun takroran kiritilishi mumkin.

O‘zbekiston Respublikasining xalqaro shartnomasini ratifikatsiya qilish, denonsatsiya qilish, tugatish yoki uning amal qilishini to‘xtatib turish to‘g‘risidagi qonun loyihasi Qonunchilik palatasiga O‘zbekiston Respublikasi Prezidenti yoki O‘zbekiston Respublikasi Vazirlar Mahkamasi tomonidan shu shartnoma rasmiy matnining tasdiqlangan nusxasi va uni ratifikatsiya qilish, denonsatsiya qilish, tugatish yoki uning amal qilishini to‘xtatib turish maqsadga muvofiqligining asoslarini o‘z ichiga olgan hujjatlar bilan birgalikda kiritiladi.

O‘zbekiston Respublikasining xalqaro shartnomasini ratifikatsiya qilish, denonsatsiya qilish, tugatish yoki uning amal qilishini to‘xtatib turish to‘g‘risida Qonunchilik palatasi tomonidan qabul qilingan qonun Senatga yuboriladi.

Agar Qonunchilik palatasi O‘zbekiston Respublikasining xalqaro shartnomasini ratifikatsiya qilish, denonsatsiya qilish, tugatish yoki uning amal qilishini to‘xtatib turish to‘g‘risidagi qonunni belgilangan tartibda qabul qilmasa, O‘zbekiston Respublikasining xalqaro shartnomasi ratifikatsiya qilish, denonsatsiya qilish, tugatish yoki uning amal qilishini to‘xtatib turish tartib-taomilidan o‘tmagan hisoblanadi.

Qonunchilik palatasi O‘zbekiston Respublikasi Vazirlar Mahkamasining belgilangan tartibda kiritilgan taklifiga binoan tumanlar, shaharlar, viloyatlarni tashkil etish, tugatish, ularning nomini va chegaralarini o‘zgartirish to‘g‘risidagi masalalarni ko‘rib chiqadi.

Tumanlar, shaharlar, viloyatlarni tashkil etish, tugatish, ularning nomini va chegaralarini o‘zgartirish to‘g‘risidagi masala rad etilgan taqdirda, u Qonunchilik palatasi ko‘rib chiqishi uchun kamida bir yildan keyin qayta kiritilishi mumkin.

Navbatdagi yil uchun O‘zbekiston Respublikasining ijtimoiy va ishlab chiqarish infratuzilmasini rivojlantirish dasturiga kiritiladigan loyihalar portfellari O‘zbekiston Respublikasi Vazirlar Mahkamasi tomonidan har yili 1-iyulga qadar Qonunchilik palatasiga kiritib boriladi.

O‘zbekiston Respublikasining ijtimoiy va ishlab chiqarish infratuzilmasini rivojlantirish dasturiga kiritiladigan loyihalar portfeli fraksiyalarda hamda Qonunchilik palatasi qo‘mitalarida muhokama qilinadi.

O‘zbekiston Respublikasining ijtimoiy va ishlab chiqarish infratuzilmasini rivojlantirish dasturiga kiritiladigan loyihalar portfeli fraksiyalar va Qonunchilik palatasi qo‘mitalari tomonidan o‘n kun ichida ko‘rib chiqiladi hamda taklif va tavsiyalar O‘zbekiston Respublikasi Vazirlar Mahkamasiga yuboriladi.

O‘zbekiston Respublikasi Bosh prokurorining Qonunchilik palatasi deputatini jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan ma’muriy jazo choralarini qo‘llashga rozilik olish to‘g‘risidagi taqdimnomalari Qonunchilik palatasi tomonidan, Qonunchilik palatasining sessiyalari oralig‘idagi davrda esa uning Kengashi tomonidan ko‘rib chiqilib, keyinchalik Qonunchilik palatasi Kengashining ushbu masala yuzasidan qarori Qonunchilik palatasining sessiyasida tasdiqlanadi.

Qonunchilik palatasining yoki uning Kengashining Qonunchilik palatasi deputatini daxlsizlik huquqidan mahrum etishga rozilik berish to‘g‘risidagi qarori yashirin ovoz berish orqali qabul qilinadi.

Qonunchilik palatasining yoki uning Kengashining Qonunchilik palatasi deputatini jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan ma’muriy jazo choralarini qo‘llashga rozilik berish masalasi yuzasidan qarori darhol O‘zbekiston Respublikasi Bosh prokuroriga yuboriladi.

O‘zbekiston Respublikasi Bosh prokurorining O‘zbekiston Respublikasi Oliy Majlisining Inson huquqlari bo‘yicha vakilini (ombudsmanni) jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan ma’muriy jazo choralarini qo‘llashga rozilik olish to‘g‘risidagi taqdimnomasi o‘n kun ichida Qonunchilik palatasi tomonidan ko‘rib chiqiladi, Qonunchilik palatasining sessiyalari oralig‘idagi davrda esa uning Kengashi tomonidan ko‘rib chiqilib, keyinchalik Qonunchilik palatasi Kengashining ushbu masala bo‘yicha qarori Qonunchilik palatasining majlisida tasdiqlanadi.

Qonunchilik palatasining yoki uning Kengashining O‘zbekiston Respublikasi Oliy Majlisining Inson huquqlari bo‘yicha vakilini (ombudsmanni) daxlsizlik huquqidan mahrum etishga rozilik berish to‘g‘risidagi qarori yashirin ovoz berish orqali qabul qilinadi.

Qonunchilik palatasining yoki uning Kengashining O‘zbekiston Respublikasi Oliy Majlisining Inson huquqlari bo‘yicha vakilini (ombudsmanni) jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan ma’muriy jazo choralarini qo‘llashga rozilik berish to‘g‘risidagi qarori darhol Senatga yuboriladi.

Qonunchilik palatasining O‘zbekiston Respublikasi Oliy Majlisining Inson huquqlari bo‘yicha vakilini (ombudsmanni) daxlsizlik huquqidan mahrum qilishga rozilik berishni rad etishi unga nisbatan jinoyat ishini yuritishni yoki sud tartibida beriladigan ma’muriy jazoni nazarda tutadigan ma’muriy huquqbuzarlik to‘g‘risidagi ishni yuritishni istisno etadigan va bunday ishlarni tugatishga sabab bo‘ladigan holat hisoblanadi.

Qonunchilik palatasi Davlat budjetining ijrosi ustidan nazoratni amalga oshiradi.

O‘zbekiston Respublikasi Vazirlar Mahkamasi:

O‘zbekiston Respublikasi konsolidatsiyalashgan budjetining ijrosi to‘g‘risidagi yillik hisobotni hamda zarur materiallarni hisobot yilidan keyingi yilning 15-mayidan kechiktirmay O‘zbekiston Respublikasi Hisob palatasining xulosasi bilan birga;

Davlat budjetining va davlat maqsadli jamg‘armalari budjetlarining birinchi chorakdagi, yarim yillik va to‘qqiz oylik ijrosi to‘g‘risidagi hisobotlarni hamda zarur materiallarni O‘zbekiston Respublikasi Hisob palatasining tezkor xulosasi bilan birga, ushbu tezkor xulosa olingan kundan e’tiboran ikki kun ichida Qonunchilik palatasiga taqdim etadi.

O‘zbekiston Respublikasi Vazirlar Mahkamasi tomonidan taqdim etilgan O‘zbekiston Respublikasi konsolidatsiyalashgan budjetining ijrosi to‘g‘risidagi yillik hisobot, Davlat budjetining va davlat maqsadli jamg‘armalari budjetlarining birinchi chorakdagi, yarim yillik, to‘qqiz oylik ijrosi to‘g‘risidagi hisobotlar fraksiyalarda va Qonunchilik palatasi qo‘mitalarida dastlabki tarzda muhokama qilinadi.

Davlat budjetining va davlat maqsadli jamg‘armalari budjetlarining ijrosi to‘g‘risidagi masalalarni ko‘rib chiqish davomida fraksiyalar va Qonunchilik palatasining qo‘mitalari Davlat budjeti daromad qismining ijrosi, ajratilgan mablag‘larning o‘zlashtirilish holati to‘g‘risida tegishli organlardan qo‘shimcha axborotni, shuningdek ularning maqsadli sarflanishi hamda ulardan samarali foydalanilishi haqidagi ma’lumotlarni talab qilib olishi mumkin. Bunda fraksiyalar joylarda budjet mablag‘larining maqsadli sarflanishi va ulardan samarali foydalanilishi masalalarini Qonunchilik palatasining tegishli qo‘mitalari tomonidan o‘rganish tashabbusi bilan chiqishi mumkin.

O‘zbekiston Respublikasi konsolidatsiyalashgan budjetining ijrosi to‘g‘risidagi yillik hisobot, shuningdek Davlat budjetining va davlat maqsadli jamg‘armalari budjetlarining ijrosi to‘g‘risidagi yarim yillik hisobot dastlabki tarzda muhokama qilinganidan keyin Qonunchilik palatasining majlisida ko‘rib chiqiladi. Uni ko‘rib chiqish vaqtida O‘zbekiston Respublikasi Vazirlar Mahkamasining hisoboti, fraksiyalarning fikrlari va takliflari, mas’ul qo‘mitaning xulosasi eshitiladi, muhokama o‘tkaziladi hamda hisobot Qonunchilik palatasining qarori bilan tasdiqlanadi.

Davlat budjetining va davlat maqsadli jamg‘armalari budjetlarining birinchi chorakdagi va to‘qqiz oylik ijrosi to‘g‘risidagi hisobotlar mas’ul qo‘mitaning majlisida ko‘rib chiqiladi hamda uning qarori bilan tasdiqlanadi.

Qonunchilik palatasi qo‘mitalari O‘zbekiston Respublikasi Soliq qo‘mitasining, O‘zbekiston Respublikasi Iqtisodiyot va moliya vazirligi huzuridagi Bojxona qo‘mitasining hamda O‘zbekiston Respublikasi Davlat aktivlarini boshqarish agentligining Davlat budjeti daromadlari prognozining bajarilishi to‘g‘risidagi hisobotlarini har chorak yakunlari bo‘yicha eshitib boradi.

Birinchi darajali budjet mablag‘larini taqsimlovchilar uchun belgilangan budjet mablag‘laridan foydalanish bilan bog‘liq maqsadli indikatorlarning bajarilishi hamda Davlat budjeti mablag‘lari hisobidan amalga oshirilayotgan rivojlantirish dasturlarining ijrosi yuzasidan birinchi darajali budjet mablag‘larini taqsimlovchilar rahbarlarining hisobotlari Qonunchilik palatasining tegishli qo‘mitalarida har chorak yakunlari bo‘yicha eshitib borilishi mumkin.

Davlat budjeti va davlat maqsadli jamg‘armalari budjetlarining ijrosi to‘g‘risidagi hisobot bilan birga O‘zbekiston Respublikasi ijtimoiy va ishlab chiqarish infratuzilmasini rivojlantirish dasturining ijro etilish holati haqidagi axborot Qonunchilik palatasining tegishli qo‘mitalariga har chorak yakunlari bo‘yicha ma’lumot uchun kiritib boriladi.

Qonunchilik palatasi davlat organlarining mansabdor shaxslariga qonunlarning, turli sohalardagi davlat dasturlarining ijrosi masalalari hamda ularning vakolatlariga kiradigan boshqa muhim masalalar yuzasidan asoslantirilgan tushuntirish berish yoki nuqtai nazarini bayon etish talabi bilan parlament so‘rovi yuborishga haqli.

Parlament so‘rovini yuborish haqidagi taklif palata qo‘mitalari, fraksiyalar, shuningdek Qonunchilik palatasi deputatlari umumiy sonining kamida beshdan bir qismi tomonidan Qonunchilik palatasi ko‘rib chiqishi uchun kiritiladi.

Qonunchilik palatasining parlament so‘rovi to‘g‘risidagi qarori loyihasi so‘rov tashabbuskorlari tomonidan Qonunchilik palatasining Spikeriga masalani Qonunchilik palatasining navbatdagi majlisi kun tartibiga kiritish uchun yuboriladi.

Qonunchilik palatasining qarori loyihasiga parlament so‘rovi loyihasi, shuningdek boshqa zarur materiallar ilova qilinadi. Parlament so‘rovi loyihasida so‘rovga javob berishning shakli (og‘zaki yoki yozma) haqidagi takliflar bo‘lishi kerak.

Qonunchilik palatasi parlament so‘rovini yuborish to‘g‘risida deputatlar umumiy sonining ko‘pchilik ovozi bilan qaror qabul qiladi.

Davlat organlarining mansabdor shaxslari parlament so‘roviga og‘zaki javobni Qonunchilik palatasining majlisida palata belgilagan muddatda beradi.

Davlat organlarining mansabdor shaxslari parlament so‘roviga yozma javobni, agar boshqa muddat belgilangan bo‘lmasa, so‘rov olingan kundan e’tiboran o‘n kundan kechiktirmay yuborishi lozim. Parlament so‘roviga javob o‘z nomiga so‘rov yuborilgan mansabdor shaxs yoki uning vazifalarini vaqtincha bajarayotgan shaxs tomonidan imzolanadi.

O‘zbekiston Respublikasi Vazirlar Mahkamasining O‘zbekiston Respublikasi Oliy Majlisidagi vakolatli vakili O‘zbekiston Respublikasi Vazirlar Mahkamasining a’zolariga, respublika ijro etuvchi hokimiyat organlarining, mahalliy ijro etuvchi hokimiyat organlarining mansabdor shaxslariga yuborilgan parlament so‘roviga o‘z vaqtida javob yuborilishini ta’minlashga ko‘maklashadi.

Parlament so‘roviga yozma javob, qoida tariqasida, Qonunchilik palatasining majlisida raislik qiluvchi tomonidan o‘qib eshittiriladi. Yozma javobning nusxalari palata majlisida o‘qib eshittirilguniga qadar oldindan deputatlarga yuboriladi.

O‘zbekiston Respublikasi Oliy sudi raisi, Bosh prokurori, surishtiruv va tergov organlari rahbarlari nomiga yo‘llangan parlament so‘rovi ularning ish yurituvidagi muayyan ishlar va materiallarga taalluqli bo‘lishi mumkin emas.

Parlament so‘roviga javob Qonunchilik palatasining majlisida muhokama qilinishi mumkin. Qonunchilik palatasi parlament so‘rovi muhokamasi yakunlari bo‘yicha qaror qabul qiladi.

Qonunchilik palatasi deputati davlat organlarining mansabdor shaxslariga, qoida tariqasida, tegishli saylov okrugi saylovchilarining huquqlari va qonuniy manfaatlarini ta’minlash bilan bog‘liq masalalar yuzasidan asoslantirilgan tushuntirish berish yoki nuqtai nazarini bayon etish talabi bilan so‘rov yuborishga haqli.

Davlat organlarining mansabdor shaxslari Qonunchilik palatasi deputati so‘roviga, agar boshqa muddat belgilangan bo‘lmasa, so‘rov olingan kundan e’tiboran o‘n kundan kechiktirmay yozma javob yuboradi. Qonunchilik palatasi deputatining so‘roviga javob o‘z nomiga so‘rov yuborilgan mansabdor shaxs yoki uning vazifalarini vaqtincha bajarayotgan shaxs tomonidan imzolanadi.

O‘zbekiston Respublikasi Vazirlar Mahkamasining O‘zbekiston Respublikasi Oliy Majlisidagi vakolatli vakili Qonunchilik palatasi deputatining O‘zbekiston Respublikasi Vazirlar Mahkamasi a’zolariga, respublika ijro etuvchi hokimiyat organlarining, mahalliy ijro etuvchi hokimiyat organlarining mansabdor shaxslariga yuborilgan so‘roviga o‘z vaqtida javob yuborilishini ta’minlashga ko‘maklashadi.

O‘zbekiston Respublikasi Oliy sudi raisi, Bosh prokurori, surishtiruv va tergov organlari rahbarlari nomiga yo‘llangan deputat so‘rovi ularning ish yurituvidagi muayyan ishlar va materiallarga taalluqli bo‘lishi mumkin emas.

O‘zbekiston Respublikasi Bosh vaziri hukumat a’zolari bilan birgalikda har yarim yilda Qonunchilik palatasiga O‘zbekiston Respublikasi Prezidentining O‘zbekiston Respublikasi xalqiga hamda Oliy Majlisiga Murojaatnomasidan kelib chiqadigan, tegishli yilga mo‘ljallangan davlat dasturi bajarilishining borishi to‘g‘risida hisobot taqdim etadi.

Qonunchilik palatasining fraksiyalari, qo‘mitalari O‘zbekiston Respublikasi Vazirlar Mahkamasining hisobotini dastlabki tarzda ko‘rib chiqadi hamda Qonunchilik palatasining majlisida majburiy ravishda va har tomonlama muhokama qilinishi lozim bo‘lgan fikrlar va takliflarni ishlab chiqadi.

Qonunchilik palatasi O‘zbekiston Respublikasi Vazirlar Mahkamasining hisobotini ko‘rib chiqish yakunlari bo‘yicha qaror qabul qiladi, qaror O‘zbekiston Respublikasi Prezidentining O‘zbekiston Respublikasi xalqiga hamda Oliy Majlisiga Murojaatnomasidan kelib chiqadigan, tegishli yilga mo‘ljallangan davlat dasturini bajarish bo‘yicha hukumat faoliyati samaradorligini oshirishga qaratilgan takliflarni o‘z ichiga olishi mumkin.

O‘zbekiston Respublikasi Vazirlar Mahkamasining hisobotini ko‘rib chiqish yakunlari bo‘yicha qabul qilingan Qonunchilik palatasi qarori O‘zbekiston Respublikasi Vazirlar Mahkamasiga yuboriladi.

Qonunchilik palatasi zarur bo‘lgan hollarda o‘z majlisida O‘zbekiston Respublikasi Bosh vazirining mamlakatni ijtimoiy-iqtisodiy jihatdan rivojlantirishning dolzarb masalalari yuzasidan hisobotini eshitishi mumkin.

O‘zbekiston Respublikasi Bosh vazirining mamlakatni ijtimoiy-iqtisodiy jihatdan rivojlantirishning dolzarb masalalari yuzasidan hisoboti ushbu Qonunning 32-moddasiga muvofiq parlament so‘rovi tartibida eshitiladi.

Fraksiyalar, Qonunchilik palatasining qo‘mitalari O‘zbekiston Respublikasi Bosh vazirining hisobotini dastlabki tarzda ko‘rib chiqadi hamda fikrlar va takliflarni ishlab chiqadi, ular Qonunchilik palatasining majlisida majburiy ravishda hamda har tomonlama muhokama qilinishi lozim.

O‘zbekiston Respublikasi Bosh vazirining hisobotini eshitish yakunlari bo‘yicha Qonunchilik palatasi qaror qabul qiladi, unda hukumatning mamlakatni ijtimoiy-iqtisodiy jihatdan rivojlantirishning dolzarb masalalariga doir faoliyati samaradorligini oshirishga qaratilgan takliflar bo‘lishi mumkin.

O‘zbekiston Respublikasi Bosh vazirining hisobotini eshitish yakunlari bo‘yicha qabul qilingan Qonunchilik palatasining qarori O‘zbekiston Respublikasi Vazirlar Mahkamasiga yuboriladi.

Qonunchilik palatasi zarur bo‘lgan hollarda, o‘zining majlisida O‘zbekiston Respublikasi Vazirlar Mahkamasi a’zolarining o‘z faoliyati masalalari yuzasidan hisobotlarini, davlat organlari rahbarlarining axborotini eshitishi mumkin.

O‘zbekiston Respublikasi Vazirlar Mahkamasi a’zolarining o‘z faoliyati masalalari yuzasidan hisobotlarini, davlat organlari rahbarlarining axborotini eshitish to‘g‘risidagi masala fraksiyalar, qo‘mitalar tashabbusiga ko‘ra Qonunchilik palatasi tomonidan ko‘rib chiqiladi.

O‘zbekiston Respublikasi Vazirlar Mahkamasi a’zolarining o‘z faoliyati masalalari yuzasidan hisobotlarini, davlat organlari rahbarlarining axborotini eshitish to‘g‘risida Qonunchilik palatasi qaror qabul qiladi. O‘zbekiston Respublikasi Vazirlar Mahkamasi a’zolarining hisobotlarini eshitish to‘g‘risidagi Qonunchilik palatasi qarori oldindan O‘zbekiston Respublikasi Vazirlar Mahkamasiga, davlat organlari rahbarlarining axborotini eshitish to‘g‘risidagi qarori esa tegishli davlat organiga yuboriladi.

O‘zbekiston Respublikasi Vazirlar Mahkamasi a’zolarining hisobotlarini, davlat organlari rahbarlarining axborotini eshitish yakunlari bo‘yicha Qonunchilik palatasi qaror qabul qiladi, unda tegishincha O‘zbekiston Respublikasi Vazirlar Mahkamasi a’zolarining, davlat organlari rahbarlarining faoliyati samaradorligini oshirishga qaratilgan takliflar bo‘lishi, shuningdek ularning ishiga baho berilishi mumkin.

O‘zbekiston Respublikasi Vazirlar Mahkamasi a’zolarining hisobotlarini eshitish yakunlari bo‘yicha qabul qilingan Qonunchilik palatasi qarori O‘zbekiston Respublikasi Vazirlar Mahkamasiga yuboriladi, davlat organlari rahbarlarining axborotini eshitish yakunlari bo‘yicha qarori esa tegishli davlat organiga yuboriladi.

Qonunchilik palatasi, qoida tariqasida, bir oyda bir marta o‘z majlisida hukumat a’zolarining Qonunchilik palatasi deputatlari savollariga javoblarini eshitadi (bundan buyon matnda “hukumat soati” deb yuritiladi).

“Hukumat soati”ni o‘tkazish jadvali O‘zbekiston Respublikasi Bosh vaziri bilan kelishilgan holda Qonunchilik palatasi Kengashi tomonidan belgilanadi.

Qonunchilik palatasi deputatlarining hukumat a’zolariga savollari Qonunchilik palatasi Kengashi tomonidan “hukumat soati”ni o‘tkazishdan kamida o‘n kun oldin O‘zbekiston Respublikasi Vazirlar Mahkamasiga yuboriladi.

O‘zbekiston Respublikasi Vazirlar Mahkamasi savollar ro‘yxatidan kelib chiqqan holda “hukumat soati”da Qonunchilik palatasi deputatlarining savollariga javob beradigan hukumat a’zolarini belgilaydi.

“Hukumat soati” yakunlari bo‘yicha Qonunchilik palatasining qarori qabul qilinishi mumkin.

Qonunchilik palatasi har yili, hisobot yilidan keyingi yilning 15-fevralidan kechiktirmay o‘z majlisida O‘zbekiston Respublikasi Oliy Majlisi Inson huquqlari bo‘yicha vakilining (ombudsmanning) faoliyati to‘g‘risidagi ma’ruzani eshitadi.

O‘zbekiston Respublikasi Oliy Majlisi Inson huquqlari bo‘yicha vakilining (ombudsmanning) faoliyati to‘g‘risidagi ma’ruzada qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash hollarining oldini olish bo‘yicha amalga oshirilgan ishlar ham aks ettiriladi.

O‘zbekiston Respublikasi Oliy Majlisi Inson huquqlari bo‘yicha vakilining (ombudsmanning) faoliyati to‘g‘risidagi ma’ruza dastlabki tarzda fraksiyalar tomonidan ko‘rib chiqiladi.

Qonunchilik palatasi majlisida O‘zbekiston Respublikasi Oliy Majlisi Inson huquqlari bo‘yicha vakilining (ombudsmanning) faoliyati to‘g‘risidagi ma’ruzasini muhokama qilish O‘zbekiston Respublikasi Oliy Majlisi Inson huquqlari bo‘yicha vakilining (ombudsmanning) chiqishi bilan boshlanadi, ma’ruzadan so‘ng fraksiyalarning vakillari so‘zga chiqadi.

O‘zbekiston Respublikasi Oliy Majlisi Inson huquqlari bo‘yicha vakilining (ombudsmanning) faoliyati to‘g‘risidagi ma’ruzani eshitish yakunlari bo‘yicha Qonunchilik palatasi qaror qabul qiladi, qaror qabul qilingan kundan e’tiboran o‘n kun ichida O‘zbekiston Respublikasi Oliy Majlisi Inson huquqlari bo‘yicha vakiliga (ombudsmanga) va Senatga yuboriladi.

O‘zbekiston Respublikasi Oliy Majlisining Inson huquqlari bo‘yicha vakili (ombudsman) Qonunchilik palatasiga inson huquqlari, erkinliklari va qonuniy manfaatlarini himoya qilish yuzasidan huquqiy, tashkiliy, ijtimoiy-iqtisodiy va boshqa chora-tadbirlar ko‘rishga qaratilgan maxsus ma’ruzani taqdim etishga haqli.

O‘zbekiston Respublikasi Oliy Majlisi Inson huquqlari bo‘yicha vakilining (ombudsmanning) inson huquqlari, erkinliklari va qonuniy manfaatlarini himoya qilish yuzasidan huquqiy, tashkiliy, ijtimoiy-iqtisodiy va boshqa chora-tadbirlar ko‘rishga qaratilgan maxsus ma’ruzasini ko‘rib chiqish tartibi Qonunchilik palatasining Reglamenti bilan belgilanadi.

Qonunchilik palatasi har yili, hisobot yilidan keyingi yilning 15-mayidan kechiktirmay o‘z majlisida O‘zbekiston Respublikasi Hisob palatasining hisobotini ko‘rib chiqadi.

O‘zbekiston Respublikasi Hisob palatasining hisoboti dastlabki tarzda fraksiyalar, shuningdek Budjet va iqtisodiy masalalar qo‘mitasi tomonidan ko‘rib chiqiladi.

Fraksiyalar Budjet va iqtisodiy masalalar qo‘mitasiga o‘z takliflari hamda fikrlarini yuboradi.

O‘zbekiston Respublikasi Hisob palatasining hisobotini ko‘rib chiqish yakunlari bo‘yicha Budjet va iqtisodiy masalalar qo‘mitasi fraksiyalar taqdim etgan takliflar hamda fikrlarni inobatga olgan holda mazkur hisobot yuzasidan xulosani, shuningdek O‘zbekiston Respublikasi Hisob palatasining tegishli yildagi hisoboti to‘g‘risida Qonunchilik palatasining qarori loyihasini tayyorlaydi hamda ularni palata ko‘rib chiqishi uchun taqdim etadi.

O‘zbekiston Respublikasi Hisob palatasining hisobotini ko‘rib chiqish chog‘ida Qonunchilik palatasi O‘zbekiston Respublikasi Hisob palatasi raisining ma’ruzasini, Budjet va iqtisodiy masalalar qo‘mitasi vakilining qo‘shimcha ma’ruzasini, shuningdek fraksiyalar vakillarining chiqishlarini eshitadi.

O‘zbekiston Respublikasi Hisob palatasining hisobotini ko‘rib chiqish yakunlari bo‘yicha Qonunchilik palatasi qaror qabul qiladi, qaror qabul qilingan kundan e’tiboran o‘n kun ichida O‘zbekiston Respublikasi Hisob palatasiga yuboriladi.

Qonunchilik palatasining qo‘mitalari, shuningdek Qonunchilik palatasining deputatlari davlat organlaridan va boshqa tashkilotlardan, mansabdor shaxslardan hujjatlarni, ekspert xulosalarini, statistika ma’lumotlarini va boshqa ma’lumotlarni so‘rab olishi mumkin.

Qonunchilik palatasining qo‘mitalari yoki Qonunchilik palatasining deputatlari tomonidan so‘ralayotgan axborotni tegishli davlat organi, boshqa tashkilot, mansabdor shaxs murojaat olingan kundan e’tiboran o‘n kundan kechiktirmay taqdim etishi kerak.

Qonunchilik palatasi qo‘mitalari qo‘mitalarning ish rejalariga, Qonunchilik palatasi va uning Kengashi qarorlariga muvofiq o‘z majlislarida davlat organlari rahbarlarining ular tomonidan qonunlarga rioya etilishi, Qonunchilik palatasi va uning Kengashi qarorlarining, palata qo‘mitalari qarorlarining bajarilishi to‘g‘risidagi axborotini eshitishi mumkin.

Davlat organlari rahbarlarining axborotini eshitish yakunlari bo‘yicha Qonunchilik palatasining qo‘mitalari qarorlar qabul qiladi, qarorlar tegishli davlat organiga yuboriladi.

Qonunchilik palatasining qo‘mitalari o‘z ish rejalariga muvofiq qonunlarning, Qonunchilik palatasi qarorlarining davlat organlari tomonidan ijro etilishi holatini, huquqni qo‘llash amaliyotini vaqti-vaqti bilan joylarga chiqib o‘rganadi.

Qonunchilikning ijro etilishi holatini, huquqni qo‘llash amaliyotini o‘rganish yakunlari bo‘yicha Qonunchilik palatasining qo‘mitalari o‘z majlislarida davlat organlari rahbarlarining axborotini eshitishi, shuningdek o‘rganish natijalarini Qonunchilik palatasi ko‘rib chiqishi uchun kiritish to‘g‘risida qarorlar qabul qilishi mumkin.

Qonunchilik palatasining qo‘mitalari yangi qabul qilingan qonunlar ijrosini ta’minlash uchun qonun osti hujjatlarining o‘z vaqtida qabul qilinishi yuzasidan monitoringni amalga oshiradi. Monitoringni amalga oshirish yakunlari Qonunchilik palatasi qo‘mitalarining majlislarida ko‘rib chiqilishi mumkin.

Qonunchilik palatasining deputatlari navbatdagi yil uchun O‘zbekiston Respublikasining ijtimoiy va ishlab chiqarish infratuzilmasini rivojlantirish dasturi loyihasining Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlari tomonidan ko‘rib chiqilish jarayonlarida ishtirok etishi mumkin.

Mamlakatning xavfsizligi, barqaror rivojlanishi asoslariga salbiy ta’sir ko‘rsatishi mumkin bo‘lgan, inson huquqlari va erkinliklariga, jamiyat va davlat manfaatlariga tahdid soladigan faktlar hamda voqealarni o‘rganish maqsadida Qonunchilik palatasi va Senatning qo‘shma qarori bilan parlament tekshiruvi o‘tkazilishi mumkin.

Parlament tekshiruvini o‘tkazish uchun Qonunchilik palatasi deputatlari va Senat a’zolari orasidan tenglik asosida maxsus komissiya tuziladi.

Maxsus komissiya parlament tekshiruvini o‘tkazishda quyidagilarga haqli:

davlat organlarining, xo‘jalik boshqaruvi organlarining vakillarini, mutaxassislarni, ekspertlarni va olimlarni komissiya ishiga jalb etishga;

davlat organlaridan, xo‘jalik boshqaruvi organlaridan, boshqa tashkilotlardan, shuningdek fuqarolardan zarur ma’lumotlarni so‘rab olishga;

davlat organlarining, xo‘jalik boshqaruvi organlarining, boshqa tashkilotlarning mansabdor shaxslarini, shuningdek fuqarolarni tushuntirishlar berish uchun taklif etishga.

Maxsus komissiya Qonunchilik palatasi va Senatning qo‘shma qaroriga muvofiq boshqa huquqlarga ham ega bo‘lishi mumkin.

Maxsus komissiya bajarilgan ishlar to‘g‘risida Qonunchilik palatasi va Senat tomonidan belgilangan muddatda ularni xabardor qiladi.

Qonunchilik palatasi deputati o‘z okrugi saylovchilari, uni deputatlikka nomzod qilib ko‘rsatgan siyosiy partiya bilan aloqa bog‘lab turadi, Qonunchilik palatasida ularning manfaatlarini ifoda etadi.

Siyosiy partiyalar tomonidan ko‘rsatilgan deputatlikka nomzodlar ro‘yxati asosida saylangan deputatlarning saylovchilar bilan aloqasi tegishincha siyosiy partiya fraksiyasi tomonidan belgilanadi.

Fraksiyalar har yili Qonunchilik palatasining Kengashi bilan birgalikda deputatlarning saylovchilar bilan aloqasi uchun mo‘ljallangan vaqtni belgilaydi.

Saylovchilar bilan uchrashuvlar o‘tkazish chog‘ida Qonunchilik palatasi deputati: