Jahon banki guruhi bilan moliyaviy hamkorlikni yanada kengaytirish, iqtisodiyotning ustuvor tarmoqlarini, ishlab chiqarish tuzilmasi va ijtimoiy sohani rivojlantirishni jadallashtirish, jalb etilayotgan moliyaviy resurslardan samarali foydalanilishini taʼminlash uchun imtiyozli uzoq muddatli qarzlarni jalb etish maqsadida Vazirlar Mahkamasi qaror qiladi:

1. Jahon banki guruhiga kiruvchi Xalqaro taraqqiyot uyushmasining uzoq muddatli imtiyozli kreditlarini 2001-yildan boshlab jalb etish, ularni ishlab chiqarish va ijtimoiy infratuzilmani jadal rivojlantirishni taʼminlovchi ustuvor loyihalarni amalga oshirishga jamlash maqsadga muvofiq deb hisoblansin.

2. Quyidagilar Xalqaro taraqqiyot uyushmasining 40 yilgacha boʻlgan muddatga beriladigan 10 yilgacha imtiyozli davrga ega boʻlgan imtiyozli foizsiz kreditlaridan foydalanishning ustuvor yoʻnalishlari etib belgilansin:

irrigatsiya-melioratsiya tarmogʻini rekonstruksiya qilish va samaradorligini oshirish;

elektr energetikada energiya ishlab chiqaruvchi quvvatlarni zamonaviylashtirish;

shahar va qishloq infratuzilmasini rivojlantirish;

ijtimoiy infratuzilma (taʼlim, sogʻliqni saqlash)ni rivojlantirish.

Xalqaro taraqqiyot uyushmasi bilan oʻzaro kelishuvga koʻra hamkorlikning boshqa yoʻnalishlari.

3. Xalqaro taraqqiyot uyushmasi bilan ishlash boʻyicha Idoralararo ishchi guruhning tarkibi ilovaga* muvofiq tasdiqlansin.

4. Idoralararo ishchi guruhga:

bozor islohotlarini chuqurlashtirish, iqtisodiyotning strategik muhim tarmoqlarini texnika bilan qayta jihozlash, infratuzilmani zamonaviylashtirish va ijtimoiy sohani rivojlantirishga doir birinchi navbatdagi vazifalarni hal etish uchun Xalqaro taraqqiyot uyushmasining uzoq muddatli imtiyozli kreditlari jalb etilishini;

Xalqaro taraqqiyot uyushmasi tomonidan ajratilayotgan mablagʻlardan eng koʻp darajada samarali va maqsadli foydalanilishini taʼminlash yuklansin.

5. Idoralararo ishchi guruh Xalqaro taraqqiyot uyushmasi bilan qoʻshma loyihalarni tayyorlash va amalga oshirishda ushbu loyihalarning Jahon banki guruhiga kiruvchi boshqa xalqaro moliya institutlari (Xalqaro tiklanish va taraqqiyot banki, Xalqaro moliya korporatsiyasi, Investitsiyalarni kafolatlash xalqaro agentligi), shuningdek Osiyo taraqqiyot banki, Yevropa tiklanish va taraqqiyot banki va boshqalar bilan Oʻzbekiston Respublikasining oʻzaro hamkorlik dasturlarining chambarchas muvofiqlashtirilishiga va oʻzaro bir-birini toʻldirishiga alohida eʼtiborni qaratsin.

6. Mazkur qarorning bajarilishini nazorat qilish Bosh vazir oʻrinbosari R.S.Azimov zimmasiga yuklansin.