O‘zbekiston Respublikasi Prezidentining 2018-yil 22-yanvardagi PF-5308-son Farmoni bilan tasdiqlangan 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol tadbirkorlik, innovatsion g‘oyalar va texnologiyalarni qo‘llab-quvvatlash yili”da amalga oshirishga oid Davlat dasturining 56-bandiga muvofiq, shuningdek, chet el fuqarolari va fuqaroligi bo‘lmagan shaxslarni doimiy yashash joyi va vaqtincha turgan joyi bo‘yicha ro‘yxatga olish tartibini takomillashtirish maqsadida:

1. Qoraqalpog‘iston Respublikasi va viloyatlarda (Toshkent viloyatidan tashqari) boshqa davlatlardan kelgan va doimiy yashash joyi bo‘yicha ro‘yxatga olinish huquqiga ega bo‘lgan shaxslar — chet el fuqarolari va fuqaroligi bo‘lmagan shaxslar toifalari ro‘yxati ilovaga muvofiq tasdiqlansin.

2. Belgilab qo‘yilsinki, boshqa davlatlardan kelgan chet el fuqarolari va fuqaroligi bo‘lmagan shaxslarni Qoraqalpog‘iston Respublikasi va viloyatlarda (Toshkent viloyatidan tashqari) doimiy yashash joyi bo‘yicha ro‘yxatga olish mazkur qaror bilan tasdiqlangan Ro‘yxat asosida amalga oshiriladi.

3. Davlat hokimiyati organlari, davlat va xo‘jalik boshqaruvi organlari, boshqa davlat tashkilotlari rahbarlari ushbu shaxslarni lavozimidan ozod qilinganligi, boshqa ishga o‘tganligi yoki pensiyaga chiqqanligi to‘g‘risida o‘z vaqtida xabar bermaganlik uchun shaxsiy javobgarligi haqida ogohlantirilsin.

4. Belgilansinki, boshqa davlatlardan kelgan chet el fuqarolari va fuqaroligi bo‘lmagan shaxslarni Qoraqalpog‘iston Respublikasi va viloyatlarda (Toshkent viloyatidan tashqari) doimiy yashash joyi bo‘yicha ro‘yxatga olish to‘g‘risida iltimosnoma kiritish huquqiga:

Vazirlar Mahkamasining 2016-yil 7-oktabrdagi 336-son qarori bilan tasdiqlangan Rahbarlari xodimlarni Toshkent shahri va Toshkent viloyatida doimiy yashash joyi bo‘yicha ro‘yxatga olish to‘g‘risida iltimosnoma kiritishi mumkin bo‘lgan davlat hokimiyati organlari, davlat va xo‘jalik boshqaruvi organlari, respublika ahamiyatiga molik boshqa davlat tashkilotlari ro‘yxatida ko‘rsatilgan davlat hokimiyati organlari, davlat va xo‘jalik boshqaruvi organlari, respublika ahamiyatiga molik boshqa davlat tashkilotlari rahbarlari;

Qoraqalpog‘iston Respublikasi Vazirlar Kengashi raisi va viloyatlar (Toshkent viloyatidan tashqari) hokimlari ega.

5. O‘zbekiston Respublikasi Ichki ishlar vazirligi bir oy muddatda O‘zbekiston Respublikasi fuqarolari, chet el fuqarolari va fuqaroligi bo‘lmagan shaxslarni doimiy va vaqtincha propiska qilish, shuningdek, turgan joyi bo‘yicha hisobga olish tartibini nazarda tutuvchi Vazirlar Mahkamasi qarori loyihasini kiritsin.

6. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov, O‘zbekiston Respublikasi Prezidenti maslahatchisining birinchi o‘rinbosari B.M. Mavlonov va O‘zbekiston Respublikasi ichki ishlar vaziri P.R. Bobojonov zimmasiga yuklansin.

1. Qonun hujjatlariga muvofiq olingan uy-joyga ega bo‘lgan chet el davlatlarning fuqarolari va fuqaroligi bo‘lmagan shaxslar — xususiy mulk qilib olingan uy-joyga.

2. Qarindoshlar — mazkur Ro‘yxat kuchga kirgunga qadar o‘zlarining to‘g‘ri shajara bo‘yicha birinchi va ikkinchi darajadagi qarindoshlari doimiy yashash joyi bo‘yicha ro‘yxatga olingan uy-joy maydoniga.

3. Er (xotin) — xotini (eri) doimiy yashash joyi bo‘yicha ro‘yxatga olingan uy-joy maydoniga, basharti kamida besh yil birgalikda yashayotgan bo‘lsa.

4. Vasiylik va homiylikdagi hamda oilaga tarbiyaga olingan (patronat) shaxslar — vasiy (homiy), tutingan ota-ona doimiy yashash joyi bo‘yicha ro‘yxatga olingan uy-joy maydoniga.

5. Ota-onalari bo‘lmagan voyaga yetmagan tug‘ishgan aka-ukalar va opa-singillar, shuningdek, mehnatga qobiliyatsiz bo‘lgan hamda o‘z oilasi bo‘lmagan voyaga yetgan tug‘ishgan aka-uka va opa-singillar — o‘zlarining tug‘ishgan aka-uka yoki opa-singillari doimiy ro‘yxatga olingan uy-joy maydoniga.

6. Davlat hokimiyati organlariga, davlat va xo‘jalik boshqaruvi organlariga, respublika ahamiyatiga molik boshqa davlat tashkilotlariga ishga taklif etiladigan yuqori malakali mutaxassislar, tor ixtisoslikdagi mutaxassislar tegishli organ yoki tashkilot rahbarining iltimosnomasiga ko‘ra, shuningdek, ularning oila a’zolari (eri, xotini, shuningdek, ularning o‘z oilasi bo‘lmagan farzandlari) — mazkur shaxslar lavozimda turadigan davrga.

7. O‘zbekiston Respublikasida hududida tugilgan yoki ilgari doimiy yashash joyi bo‘yicha ro‘yxatga olingan chet el fuqarolari va fuqaroligi bo‘lmagan shaxslar — doimiy yashash uchun Qoraqalpog‘iston Respublikasi va viloyatlarga (Toshkent viloyatidan tashqari) qaytib kelganida.

8. Xorijda istiqomat qilayotgan vatandoshlar va ularning oila a’zolari (eri, xotini va voyaga yetmagan farzandlari).

9. O‘zbekiston Respublikasi hududida tovarlar ishlab chiqarish va xizmatlar ko‘rsatish bo‘yicha korxonalar tashkil qilish uchun kamida 3 million AQSH dollari miqdorida investitsiya kiritgan chet el fuqarosi yoki fuqaroligi bo‘lmagan shaxs — xorijiy investitsiyalar ishtirokidagi korxona muassisi (ishtirokchisi), shuningdek, ularning oila a’zolari (eri, xotini va voyaga yetmagan farzandlari).

10. “Faxriy fuqaro” maqomi berilgan chet el fuqarolari va fuqaroligi bo‘lmagan shaxslar, shuningdek, ularning oila a’zolari (eri, xotini va voyaga yetmagan farzandlari).

11. O‘zbekiston Respublikasi Prezidentining 2019-yil 5-yanvardagi “O‘zbekiston Respublikasida turizmni jadal rivojlantirishga oid qo‘shimcha chora-tadbirlar to‘g‘risida”gi PF-5611-son Farmonining 5-bandi va mazkur Farmonga 6-ilovaga muvofiq ko‘chmas mulk sotib olgan xorijiy mamlakatlar fuqarolari.