Kelishilgan moliya, soliq va narx siyosatini oʻtkazishni taʼminlash, moliya tizimini mustahkamlash, budjet mablagʻlaridan maqsadli foydalanish va narxlar ustidan nazoratning taʼsirini oshirish, shuningdek, Oʻzbekiston Respublikasi Prezidentining “Oʻzbekiston Respublikasida moliya boshqaruvi organlari va narx belgilash tizimining tashkiliy tuzilishini takomillashtirish toʻgʻrisida”gi Farmoniga muvofiq Vazirlar Mahkamasi qaror qiladi:

1. Oʻzbekiston Respublikasi Moliya vazirligiga:

Oʻzbekiston Respublikasi hududida yagona moliya, soliq va narx qoʻyish siyosatini shakllantirish va oʻtkazish, bozor iqtisodiyotiga oʻtish sharoitlarida respublikani ijtimoiy-iqtisodiy rivojlantirishning va aholini ijtimoiy himoya qilishning barqaror moliyaviy negizini barpo etish boʻyicha ishlarni muvofiqlashtirish;

moliya organlari, ularning tasarrufidagi tashkilotlar va muassasalar faoliyatiga umumiy rahbarlik qilish, ularga oʻz vazifalarini amalga oshirishda metodik va amaliy yordam koʻrsatish;

respublika budjetini tuzish va bajarish, daromadlarni safarbar qilish, xalq xoʻjaligi tarmoqlari va ijtimoiy-madaniy sohaning respublika va mintaqaviy maqsadli kompleks dasturlarini moliyaviy taʼminlash, respublikaning yigʻma moliyaviy balansini tuzish ishlarini tashkil etish;

davlatning moliyani boshqarishini, moliya-kredit mexanizmini, moliya va budjetni rejalashtirish usullarini, soliq olish va narx belgilash tizimlarini takomillashtirish, uzoq muddatli moliyaviy normalar va normativlardan keng foydalanish, budjet resurslari va boshqa moliyaviy resurslardan foydalanishning xarajatlarning oʻsishiga qarshi koʻrsatilganligini oshirish yuzasidan takliflar ishlab chiqish;

narx belgilash masalalari yuzasidan vazirliklar, idoralar, uyushmalar, konsernlar, mahalliy boshqaruv organlarining faoliyatlarini muvofiqlashtirib borish;

mahsulotlarning (ishlar, xizmatlar) ayrim turlariga narxlar va tariflarning chegaraviy darajalarini belgilash (ularni asta sekin erkinlashtira borib) yoʻli bilan narxlar va tariflarni boshqarish yuzasidan chora-tadbirlarni amalga oshirish;

respublika konsernlari, uyushmalari, korxonalari va tashkilotlari tomonidan narxlar va tariflarning turi belgilanishi va qoʻllanilishi, ularning moliya intizomiga rioya qilishlari ustidan nazoratni taʼminlash;

moliya bozorini barpo etish, qimmatdor qogʻozlar chiqarish, mulkni davlat tasarrufidan chiqarish va xususiylashtirish dasturlarini amalga oshirishning moliyaviy jihatlari, respublika davlat ichki zayomlarini joylashtirish, lotereyalar oʻtkazish yuzasidan takliflar ishlab chiqish;

moliya-valyuta siyosatining asosiy qoidalarini, respublikaning valyuta resurslarini koʻpaytirish va ulardan samarali foydalanish boʻyicha takliflarni tayyorlash;

respublika hududida tuziladigan xorijiy investitsiyalar ishtirokidagi korxonalarni, xalqaro birlashmalar va tashkilotlarni, shuningdek, ularning tarkibiy boʻlinmalarini roʻyxatga olish;

narxlar va tariflarning tasdiqlangan preyskurantlarini, moliya, soliq olish va narx belgilash masalalari boʻyicha maʼlumotnomalar va metodik materiallarni chiqarish;

davlat ijtimoiy sugʻurtasi sohasidagi siyosatni amalga oshirish, yangi talablarni hisobga olgan holda uni takomillashtirish vazifalari yuklansin.

2. Oʻzbekiston Respublikasi Moliya vazirligi mazkur qarorning 1-bandidan kelib chiquvchi vazifalarga muvofiq nazorat-taftish ishini aniq tashkil etishni va uni oʻtkazishni muvofiqlashtirishni taʼminlasin, uning amaliyligini va natijadorligini oshirsin. Shu munosabat bilan vazirlik markaziy apparatida nazorat-taftish Bosh boshqarmasi, shuningdek, vazirlikning nazorat-taftish boshqarmasi, uning joylardagi organlari hamda respublika vazirliklari va idoralarining nazorat-taftish xizmatlari negizida Moliya vazirligining Qoraqalpogʻiston Respublikasi, viloyatlar va Toshkent shahri boʻyicha nazorat-taftish boshqarmalari tuzilsin.

Respublika vazirliklari va idoralari bir oy muddat ichida nazorat-taftish xizmatlarining 454 nafardan iborat xodimlari sonini tegishli yillik ish haqi fondi bilan 1-ilovaga muvofiq Oʻzbekiston Respublikasi Moliya vazirligiga bersinlar.

3. Qoraqalpogʻiston Respublikasi Vazirlar Kengashi, viloyatlar va Toshkent shahri hokimlari joylardagi narx organlarining xodimlari sonini va tegishli ish haqi fondlarini 2-ilovaga muvofiq Qoraqalpogʻiston Respublikasi Moliya vazirligiga, viloyatlar va Toshkent shahar moliya boshqarmalariga bersinlar.

4. Oʻzbekiston Respublikasi Moliya vazirligi markaziy apparatining tuzilishi 3-ilovaga muvofiq tasdiqlansin. Moliya organlarining eng koʻp xodimlar soni 5323 nafardan, shu jumladan, Moliya vazirligi markaziy apparati xodimlari soni 307 nafardan iborat qilib belgilansin (binoni qoʻriqlovchi va xizmat koʻrsatuvchi xodimlardan tashqari).

Vazirlikning Oʻzbekiston Respublikasi Moliya vazirligi huzuridagi davlat sugʻurtasi bosh boshqarmasi toʻla xoʻjalik hisobida va oʻz xarajatlarini oʻzi qoplab ishlashi toʻgʻrisidagi taklifi qabul qilinsin.

5. Oʻzbekiston Respublikasi Moliya vazirligiga vazirning yetti nafar oʻrinbosari, shu jumladan, bir nafar birinchi oʻrinbosari va vazirning oʻrinbosari — vazirlik huzuridagi davlat sugʻurtasi bosh boshqarmasi boshligʻi boʻlishiga ruxsat berilsin. Vazirlik hayʼati 11 kishidan iborat qilib belgilansin, uning shaxsiy aʼzolarini Oʻzbekiston Respublikasi Prezidenti huzuridagi Vazirlar Mahkamasi tasdiqlaydi.

6. Oʻzbekiston Respublikasi Moliya vazirligi oʻziga berilgan yangi funksiyalar va vazifalarni hisobga olib, Oʻzbekiston Respublikasi Moliya vazirligi toʻgʻrisidagi Nizomni 10 kun muddat ichida ishlab chiqsin hamda Oʻzbekiston Respublikasi Prezidenti huzuridagi Vazirlar Mahkamasiga tasdiqlashga taqdim etsin.

7. Moliya organlari va nazorat-taftish apparati xodimlarini koʻp yillik xizmatlari va ish staji uchun 4-ilovaga muvofiq miqdorlarda bir martalik taqdirlash tartibi belgilansin. Yillik ish yakunlari yuzasidan oylik lavozim maoshidan kelib chiqib haq toʻlansin.

8. Oʻzbekiston Respublikasi Moliya vazirligiga taftishlar va tekshirishlar natijasi boʻyicha talon-torojlik, oʻgʻirlash, kamomad va gʻayriqonuniy xarajatlardan undirib olingan budjet daromadlariga tushumlarning 15 foizi hisobiga moliya tizimini ijtimoiy rivojlantirish va xodimlarni moddiy ragʻbatlantirish fondini tuzishga ruxsat berilsin.

Moliya vazirligi bir oy muddat ichida koʻrsatilgan fondni tuzish va undan foydalanish tartibini tasdiqlasin.

9. Toshkent shahar hokimi:

Moliya vazirligining yangi tuzilgan tarkibiy boʻlinmalarini 20 qavatli maʼmuriy binodagi davlat bosh soliq boshqarmasi egallab turgan joyga;

davlat bosh soliq boshqarmasini ilgari Davlat narxlar qoʻmitasi va Narx belgilash ilmiy-tadqiqot institutining Oʻrta Osiyo boʻlimi egallab kelgan Abay koʻchasi, 4-uydagi joyga joylashtirsin.

Oʻzbekiston Respublikasi Iqtisodiyot qoʻmitasi, Moddiy-texnika taʼminoti davlat-kooperativ qoʻmitasi har yili Oʻzbekiston Respublikasi Moliya vazirligiga birkitilgan nomlardagi moddiy-texnika resurslarini respublikaning moliya organlari uchun belgilangan tartibda ajratishni nazarda tutsinlar.

10. Oʻzbekiston SSR Ministrlar Sovetining 1979-yil 9-oktabrdagi 700-son qarori bilan tasdiqlangan Oʻzbekiston SSR davlat sugʻurta organlari toʻgʻrisidagi Nizom 14-bandining birinchi xatboshi, Oʻzbekiston SSR Ministrlar Sovetining 1988-yil 4-maydagi 159, 1988-yil 3-noyabrdagi 413, 1989-yil 27-iyuldagi 241-son qarorlari va Vazirlar Mahkamasining 1991-yil 15-oktabrdagi 257-son qarori, Oʻzbekiston SSR Ministrlar Sovetining 1988-yil 27-dekabrdagi 469-f-son farmoyishi oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Vazirlar Mahkamasi Raisining oʻrinbosari oʻrtoq B. S. Hamidovga yuklansin.

1. Davlat budjeti va hududiy moliya yigʻma boshqarmasi

2. Istiqbolni belgilash va daromadlarni iqtisodiy tahlil qilish boshqarmasi

3. Xoʻjalik yuritishning yangi shakllari va buxgalteriya hisobi metodologiyasi boshqarmasi

4. Narx belgilash bosh boshqarmasi

5. Dehqonchilik-sanoat kompleksining moliya boshqarmasi

6. Sanoat, qurilish, transport, aloqa va uy-joy Kommunal xoʻjaligi moliya boshqarmasi

7. Boshqaruv, ijtimoiy rivojlanish va aholiga ijtimoiy madad berish organlarini moliyaviy taʼminlash boshqarmasi

8. Xizmat koʻrsatish sohalari, kooperativlar, qoʻshma va kichik korxonalar moliya boshqarmasi

9. Valyuta-iqtisodiyot boshqarmasi

10. Qimmatbaho metallar boshqarmasi

11. Bosh nazorat-taftish boshqarmasi

12. Ikkinchi boshqarma

13. Kadrlar boshqarmasi

14. Ishlar boshqarmasi

15. Matbuot xizmati

1. Davlat sugʻurtasi bosh boshqarmasi

2. Axborot-hisoblash markazi

3. Moliya va narxlar ilmiy-tadqiqot instituti

4. Narxnomalarni chiqaradigan va tarqatadigan xoʻjalik hisobidagi byuro