O‘zbekiston Respublikasi Prezidentining 2018-yil 13-apreldagi PQ-3666-son “O‘zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to‘g‘risida”gi qarori ijrosini ta’minlash, zamonaviy talablarga javob beradigan yangi normativ-huquqiy va boshqa hujjatlarni qabul qilish hamda umummajburiy idoraviy hujjatlar o‘z kuchini yo‘qotayotganligi sababli qonunchilikda huquqiy bo‘shliq kelib chiqishini oldini olish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining 2018-yil 13-apreldagi PQ-3666-son “O‘zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to‘g‘risida”gi qaroriga muvofiq 2019-yil 1-yanvardan O‘zbekiston Respublikasi hududida 1993-yil 17-iyungacha qabul qilingan va O‘zbekiston Respublikasi Adliya vazirligida ro‘yxatdan o‘tmagan umummajburiy idoraviy hujjatlar, shu jumladan sobiq SSSRning idoraviy hujjatlari o‘z kuchini yo‘qotayotganligi ma’lumot uchun qabul qilinsin.

2. O‘z kuchini yo‘qotayotgan umummajburiy idoraviy hujjatlarning o‘rniga yangi normativ-huquqiy va boshqa hujjatlarni tayyorlash bo‘yicha chora-tadbirlar rejasi (keyingi o‘rinlarda Reja deb yuritiladi) ilovaga* muvofiq tasdiqlansin.

3. Vazirlik va idoralarning rahbarlariga Rejada ko‘rsatilgan normativ-huquqiy va boshqa hujjatlarni o‘z vaqtida va sifatli tayyorlanishi, ekspertiza qilinishi va kelishishi uchun shaxsiy javobgarlik yuklansin.

4. Rejada ko‘rsatilgan mas’ul ijrochilar har oyning 25-kunidan kechiktirmasdan O‘zbekiston Respublikasi Adliya vazirligiga Rejaning ijro holati to‘g‘risida axborot kiritib borsin.

O‘zbekiston Respublikasi Adliya vazirligi hisobot oyidan keyingi oyning 5-kunidan kechiktirmasdan O‘zbekiston Respublikasi Vazirlar Mahkamasiga Rejaning ijro holati yuzasidan umumlashtirilgan axborot kiritib borsin.

5. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosarlari va O‘zbekiston Respublikasi adliya vaziri R.Q. Davletovga yuklansin.