2017-yil 9-iyunda Ostona shahrida SHHTga aʼzo davlatlar rahbarlari Kengashi yigʻilishida Oʻzbekiston Respublikasi tomonidan ilgari surilgan tashabbuslar va takliflarni amalga oshirish, shuningdek, 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi vazifalarini muvaffaqiyatli amalga oshirishda xalq diplomatiyasi mexanizmlaridan xar tomonlama foydalanish maqsadida:

1. Oʻzbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan doʻstona aloqalar qoʻmitasi (keyingi oʻrinlarda — Qoʻmita), Tashki ishlar vazirligi, Madaniyat vazirligi, Oliy va oʻrta maxsus taʼlim vazirligi, Jismoniy tarbiya va sport vazirligi, Turizmni rivojlantirish davlat qoʻmitasi, Fanlar akademiyasi, Badiiy akademiya, Yoshlar ittifoqi, Jurnalistlar ijodiy uyushmasi, Yozuvchilar uyushmasining ular muassisligida nodavlat notijorat tashkiloti koʻrinishidagi muassasa shaklida Oʻzbekistonda Shanxay hamkorlik tashkilotining Halq diplomatiyasi markazini (keyingi oʻrinlarda — Markaz) tashkil etish toʻgʻrisidagi takliflariga rozilik berilsin, kuyidagilar Markaz faoliyatining asosiy vazifalari va yoʻnalishlari etib belgilansin:

SHHT mamlakatlari oʻrtasida oʻzaro ishonch va yaxshi qoʻshnichilikni, millatlararo va dinlararo totuvlikni mustahkamlashga, sivilizatsiyalararo muloqotni kuchaytirishga koʻmaklashish;

SHHT mamlakatlari bilan madaniy-gumanitar aloqalarni kengaytirishda, delegatsiyalarning oʻzaro tashriflarini uyushtirishda ishtirok etish;

SHHT mamlakatlarining fuqarolik jamiyati institutlari, shu jumladan yoshlar va xotin-qizlar tashkilotlari oʻrtasida doʻstona hamkorlik muhitini qaror toptirish uchun shart-sharoitlar yaratish;

SHHT mamlakatlari oʻrtasida axborot sohasidagi hamkorlikni rivojlantirishga koʻmaklashish, axborot resurslarini shakllantirish xamda SHHTning maqsadlari, vazifalari, faoliyatining ustuvor yoʻnalishlari va asosiy prinsiplarini keng tushuntirish maqsadida ommaviy axborot vositalari bilan hamkorlik qilish, SHHT mamlakatlarining madaniy- gumanitar sohada erishgan yutuqlari toʻgʻrisida axborot-taxliliy materiallar tayyorlash va ularni muntazam chop etib borish;

SHHT mamlakatlari va ularning xalqlarini bir-biriga yaqinlashtirish, oʻzaro ishonch va yaxshi qoʻshnichilik ruxini mustahkamlash maqsadida xalq diplomatiyasi vositalaridan foydalanish.

2. Maʼlumot uchun qabul qilinsinki, quyidagilar Markaz faoliyatini moliyalashtirish manbalari hisoblanadi:

davlat subsidiyalari, ijtimoiy buyurtmalar va ijtimoiy sheriklik doirasida ajratiladigan grantlar;

texnikaviy koʻmaklashish vositalari, xalqaro va xorijiy hukumat, noxukumat tashkilotlari, tijorat banklari xamda boshqa tashkilotlarning Markaz faoliyatini koʻllab-quvvatlashga ajratadigan grantlari;

yuridik va jismoniy shaxslarning xayriya ehsonlari;

qonunchilikda taqiqlanmagan boshqa manbalar.

3. Markazga:

oʻz zimmasiga yuklangan vazifalarni bajarish doirasida vazirliklar, idoralar va boshqa davlat tashkilotlaridan zarur statistik va tahliliy axborotni talab qilish va bepul olish;

ilmiy, madaniy, maʼnaviy-maʼrifiy tadbirlarni oʻtkazish uchun davlat mulki boʻlmish majlislar zali va konsert zallaridan (ana shu zallar oʻz tasarrufida boʻlgan subyektlar bilan kelishilgan jadval boʻyicha) bepul foydalanish huquqi berilsin.

4. Qoʻmita:

Tashki ishlar vazirligi bilan birgalikda Markaz faoliyatini moddiy-texnik va axborot jihatdan taʼminlash, shuningdek, Markaz tadbirlarida ishtirok etish uchun xorijiy ekspertlarni taklif qilish maqsadida texnikaviy koʻmaklashish vositalarini va grantlarni jalb etish masalalarini SHHT hamda boshqa xalqaro va xorijiy tashkilotlar bilan puxta ishlab chiqishda Markazga yordam koʻrsatsin;

Madaniyat vazirligi, Jismoniy tarbiya va sport vazirligi, Turizmni rivojlantirish davlat qoʻmitasi va Milliy teleradiokompaniya bilan birgalikda SHHT mamlakatlari oʻrtasida madaniy-gumanitar, sport hamda boshqa aloqalarni yoʻlga qoʻyish va rivojlantirishda madaniyat, sport, turizm va OAV sohasidagi tadbirlarni tashkil qilishda Turizmni rivojlantirish davlat qoʻmitasi va Milliy teleradiokompaniya Markazga yordam bersin.

5. Markazga ikki oy muddatda Markaz faoliyatini tashkil etish boʻyicha “yoʻl xaritasi”ni ishlab chiqish va tasdiqlash tavsiya etilsin.

6. Madaniyat vazirligi, Jismoniy tarbiya va sport vazirligi, Oliy va oʻrta maxsus taʼlim vazirligi, Turizmni rivojlantirish davlat qoʻmitasi, Milliy teleradiokompaniya. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari majlislar zali va boshqa mulkdan vaqtincha foydalanish uchun ularni bepul taqdim etish orqali madaniy, sport tadbirlari hamda boshqa tadbirlarni tashkil etish va oʻtkazishda Markazga yordam bersinlar

7. Markaz Toshkent shahar, Yakkasaroy tumani, Bobur koʻchasi, 45-uyda ijara haqi “nol stavka” boʻyicha joylashtirilsin.

8. Moliya vazirligi:

2018-yilda Qoʻmitaga Markaz joylashadigan bino qismini mukammal taʼmirlash va jihozlash uchun Oʻzbekiston Respublikasi davlat budjeti parametrlari doirasida;

Markazga xodimlar mehnatiga haq toʻlash uchun Tashki ishlar vazirligi xodimlari uchun belgilangan normativlarga muvofiq zarur mablagʻlar ajratilishini taʼminlasin.

9. Toshkent shahar hokimligi ikki hafta muddatda Markazning zarur zamonaviy kompyuterlar. tashkiliy texnika, mebel va anjomlar bilan jihozlanishini taʼminlasin.

10. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Markazning telefon aloqasi va Internet tarmogʻiga ulanishini oʻrnatilgan tartibda taʼminlasin.

11. Oʻzbekiston matbuot va axborot agentligi Alisher Navoiy nomidagi Milliy kutubxona bilan birgalikda Milliy kutubxonaning axborot-kutubxona fondiga hamda chet ellardagi litsenziyalangan yetakchi axborot-kutubxona resurslarining fondlariga doimiy elektron bogʻlanishini taʼminlasin.

12. “Oʻzavtosanoat” AJga “Lasetti” rusumli 1 dona yangi avtotransport vositasini Markazga xayriya ionasi sifatida topshirish tavsiya qilinsin.

13. Adliya vazirligi bir hafta muddatda Markaz qonunchilikda oʻrnatilgan tartibda davlat roʻyxatiga olinishini taʼminlasin.

14. Tashqi ishlar vazirligi Markazning buyurtmanomalariga binoan, Markaz tomonidan oʻtkaziladigan tadbirlarga jalb etiladigan xorijiy mutaxassislarga kirish vizalari konsullik yigʻimlari undirilmagan holda rasmiylashtirilishini taminlasin.

15. Ichki ishlar vazirligi Markaz buyurtmanomalariga binoan, Markazda ishlash uchun jalb etiladigan xorijiy mutaxassislarga vizalar muddati uzaytirilishini. shuningdek, ular vaqtincha yashaydigan joyda vaqtinchalik roʻyxatga olish va uning muddatini uzaytirishni davlat boji undirilmasdan belgilangan tartibda taʼminlasin.

16. Milliy teleradiokompaniya va Milliy axborot agentligi Markaz faoliyatining maqsad va vazifalarini aholi oʻrtasida. shu jumladan, bosma va elektron ommaviy axborot vositalarida, jumladan, Internet jahon axborot tarmogʻida keng yoritilishini taʼminlasin.

17. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti huzuridagi Xavfsizlik kengashi Kotibi V.V. Maxmudov zimmasiga yuklansin.