Oʻzbekiston Respublikasining “Davlat xaridlari toʻgʻrisida”gi Qonuniga asosan buyuraman:

1. Xarid qilish tartib-taomillarini tashkil etish va oʻtkazish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining “Davlat xaridlari toʻgʻrisida”gi Qonuniga muvofiq (bundan buyon matnda Qonun deb yuritiladi) xarid qilish tartib-taomillarini tashkil etish va oʻtkazish tartibini belgilaydi.

1. Mazkur Nizomda quyidagi asosiy tushunchalardan foydalaniladi:

avans toʻlovi — qonunchilik hujjatlarida belgilangan tartibda davlat buyurtmachisi va xarid qilish tartib-taomillari ishtirokchisi tomonidan kiritiladigan, operatorning vositachilik yigʻimini va tomonlarning zakalatini oʻz ichiga olgan moliyaviy mablagʻlar summasi;

davlat buyurtmachisi (bundan buyon matnda buyurtmachi deb yuritiladi) — davlat xaridlarini amalga oshiruvchi yuridik shaxs;

davlat xaridlari toʻgʻrisidagi shartnoma — davlat xaridlari boʻyicha huquqlar va majburiyatlarni belgilash, oʻzgartirish yoki bekor qilish toʻgʻrisida buyurtmachi va davlat xaridlarining ijrochisi oʻrtasida tuziladigan bitim;

yagona yetkazib beruvchi — tabiiy monopoliya subyekti, Oʻzbekiston Respublikasi Prezidentining alohida farmonlarida, qarorlarida va farmoyishlarida yoki Oʻzbekiston Respublikasi Vazirlar Mahkamasining qarorlarida belgilangan subyektlar, shuningdek davlat tomonidan xarid qilinayotgan, bozorda muqobillari mavjud boʻlmagan noyob tovarlarni (ishlarni, xizmatlarni) yetkazib beruvchi;

tanlov — shartnomani bajarish boʻyicha eng yaxshi shartlarni taklif qilgan ishtirokchi gʻolib deb topiladigan xarid qilish tartib-taomilini amalga oshirishning turi;

tanlov taklifi — tanlov hujjatlarida belgilangan shartlarga muvofiq ishtirokchining tanlov predmetiga nisbatan taqdim etiladigan taklifi;

lot — turli belgilari boʻyicha guruhlashtirilgan (foydalanish, texnik va funksional xususiyatlariga koʻra) bir xil turdagi tovarlarning jamlanmasi sifatida buyurtmachi tomonidan belgilangan va alohida shartnoma boʻyicha xarid predmetining miqdoriy qismi;

taklifni taʼminlash — buyurtmachining talabiga binoan ishtirokchi tomonidan takliflar va majburiyatlarning garov, kafolat, zakalat tarzida yoxud qonunchilik hujjatlarida nazarda tutilgan boshqa usulda taʼminlanishi;

shaxsiy kabinet — elektron davlat xaridlarida ishtirok etishni hamda zarur axborotni joylashtirishni va undan foydalanishni taʼminlaydigan, buyurtmachi yoki xarid qilish tartib-taomili ishtirokchisining maxsus axborot portaldagi individual sahifasi;

reja-jadval — tovarlar (ishlar, xizmatlar) xaridining hajmlari va joylashtirish muddatlarini nazarda tutuvchi hujjat;

davlat xaridlari boʻyicha toʻgʻridan toʻgʻri shartnoma — maxsus axborot portalida roʻyxatga qoʻyilishi shart boʻlgan, davlat xaridlari boʻyicha huquqlar va majburiyatlarni belgilash, oʻzgartirish yoki bekor qilish toʻgʻrisida buyurtmachi va davlat xaridlarining ijrochisi oʻrtasida tuziladigan bitim;

qadam oʻlchovi — narxni pasaytirish uchun auksionning boshlangʻich narxini yoki oldingi ishtirokchi narxining foiz bilan belgilanadigan kamaytirish pul miqdori;

hisob-kitob-kliring palatasi (bundan buyon matnda HKKP deb yuritiladi) — avans toʻlovlarini deponentlash va ularni hisobga olish yoʻli bilan shartnomalar boʻyicha majburiyatlarni bajara oladigan ishtirokchilarni elektron xaridlarga kirishini taʼminlovchi maxsus axborot portalining tarkibiy boʻlinmasi;

yagona yetkazib beruvchilar reyestri — vakolatli organ bilan kelishilgan holda maxsus axborot portali operatori tomonidan yuritiladigan axborot resursi;

zaxira ijrochisi — xarid qilish tartib-taomillari yakuniga koʻra xarid komissiyasining qaroriga muvofiq gʻolib deb topilgan ishtirokchining taklifidan soʻng taklifi eng maqbul deb topilgan ishtirokchi;

maxsus axborot portali (bundan buyon matnda portal deb yuritiladi) — operatorning davlat xaridlari oʻtkazilishini, davlat xaridlari toʻgʻrisidagi eʼlonlar, davlat xaridlari yakunlari, xarid qilish tartib-taomillari ishtirokchilarining takliflari haqidagi axborotning va qonunchilik hujjatlarida nazarda tutilgan boshqa axborotning elektron shaklda joylashtirilishini va koʻrilishini, shuningdek elektron davlat xaridlari oʻtkazilishini taʼminlovchi veb-sayti va maxsus elektron platformasi;

tabiiy monopoliya subyekti — tabiiy monopoliya sharoitlarida tovarlarni (ishlarni, xizmatlarni) ishlab chiqarish va/yoki realizatsiya qilish bilan band boʻlgan xoʻjalik yurituvchi subyekt (yuridik shaxs);

tender taklifi — tender hujjatlarida belgilangan shartlarga muvofiq tender predmetiga nisbatan ishtirokchining taklifi;

davlat xaridlari sohasidagi vakolatli organ (bundan buyon matnda vakolatli organ deb yuritiladi) — Oʻzbekiston Respublikasi Moliya vazirligi;

davlat xaridlarining elektron tizimi (bundan buyon matnda elektron tizim deb yuritiladi) — elektron davlat xaridlari jarayonida davlat xaridlari subyektlarining oʻzaro hamkorligini taʼminlaydigan tashkiliy, axborot va texnik vositalarning dasturiy majmui;

elektron davlat xaridlari — davlat xaridlari subyektlarining axborot-kommunikatsiya texnologiyalari vositalaridan foydalangan holda davlat xaridlarini amalga oshirish shakllari.

2. Xarid qilish tartib-taomillarini amalga oshirish turlari quyidagilardan iborat:

elektron doʻkon;

boshlangʻich narxni pasaytirish uchun oʻtkaziladigan auksion (bundan buyon matnda auksion deb yuritiladi);

tanlov;

tender;

yagona yetkazib beruvchi bilan amalga oshiriladigan davlat xaridlari.

Davlat xaridlari elektron shaklda amalga oshirilishi mumkin.

3. Xaridlarga tayyorgarlik oʻz ichiga quyidagilarni oladi:

portalda xaridlarning yillik va choraklik reja-jadvallarini joylashtirish;

portalda xaridlar oʻtkazilishi haqidagi eʼlonlarni joylashtirish;

buyurtmachilar va xarid jarayonlari ishtirokchilari (bundan buyon matnda ishtirokchi deb yuritiladi) tomonidan xaridlarda ularning ishtirokini taʼminlovchi avans toʻlovlarini kiritish.

4. Portalda joylashtiriladigan reja-jadval quyidagi maʼlumotlarni oʻz ichiga olishi kerak:

xarid predmeti;

xarid oʻtkaziladigan oy;

buyurtmachining nomi va manzili;

xarid predmetini moliyalashtirish manbalari;

tovarlarni yetkazib berish, ishlarni bajarish va xizmatlarni koʻrsatish joyi (manzili), muddatlari va shartlari.

5. Buyurtmachi va ishtirokchilar HKKPdagi shaxsiy hisobvaraqlariga avans toʻlovlarini kiritganlaridan soʻng elektron davlat xaridlariga (bundan buyon matnda elektron xaridlar deb yuritiladi) qoʻyiladi.

6. Buyurtmachi va ishtirokchilar elektron xaridlardagi ishtiroklarini elektron raqamli imzolaridan (bundan buyon matnda ERI deb yuritiladi) foydalangan holda amalga oshiradi. Buyurtmachi va ishtirokchi tomonidan ERIdan foydalanish, elektron tizimda tuziladigan shartnomalarni haqiqiy deb topish uchun asos boʻlib hisoblanadi.

7. Xarid qilish tartib-taomillarini elektron doʻkon yoki auksion orqali amalga oshirishda korporativ buyurtmachi va ishtirokchi tomonidan kiritilgan zakalat shartnoma majburiyati bajariladigan vaqtga qadar yoki shartnoma qonunchilik hujjatlarida belgilangan tartibda bekor qilingunga qadar xatlab qoʻyiladi, bundan mazkur Nizomning 8-bandida belgilangan hollar mustasno.

8. Elektron doʻkon va auksion ishtirokchilarining zakalati boshqa ishtirokchilar tomonidan pastroq narxdagi taklif berilgunga qadar xatlanadi.

8^1. Budjet buyurtmachisi tomonidan elektron tanlov yoki elektron tender oʻtkazishda ishtirokchilarning zakalati operator tomonidan gʻolib aniqlangunga qadar xatlab qoʻyiladi. Elektron tanlov yoki elektron tender gʻolibining zakalati shartnoma tuzilguniga qadar xatlanadi.

Korporativ buyurtmachi tomonidan elektron tanlov yoki elektron tender oʻtkazishda ishtirokchilar tomonidan zakalat kiritish zarurati va miqdori korporativ buyurtmachi tomonidan belgilanadi hamda kiritilgan zakalat operator tomonidan elektron tanlov yoki elektron tender gʻolibi bilan shartnoma tuzilguniga qadar xatlanadi. Bunda zakalat miqdori tovar (ish, xizmat) qiymatining 3 foizidan oshmasligi kerak.

11. Operator tomonidan buyurtmachi va ishtirokchilardan undiriladigan vositachilik haqi miqdori qonunchilik hujjatlarida belgilangan tartibda aniqlanadi.

12. Operatorning elektron tizimi avtomatik rejimda quyidagilarni amalga oshiradi:

kiritilgan avans summasiga muvofiq har bir lot boʻyicha elektron xaridlardan foydalanish;

elektron xaridlarni oʻtkazish;

elektron xaridlar natijasi boʻyicha ishtirokchilarni aniqlash;

bitimni roʻyxatga olish va shartnomani shakllantirish.

13. Elektron doʻkon ishtirokchilarning takliflaridan shakllantiriladi. Ishtirokchining elektron doʻkonga qoʻyilgan taklifi buyurtmachilarga yuborilgan ommaviy ofertadir.

14. Qonunning 43-moddasi ikkinchi qismiga muvofiq elektron doʻkonda quyidagi davlat xaridlari amalga oshirilishi mumkin:

bir shartnoma boʻyicha bazaviy hisoblash miqdorining ikki yuz ellik baravaridan (budjet buyurtmachilari uchun bazaviy hisoblash miqdorining yigirma besh baravaridan) oshmaydigan, biroq bir yilda bir buyurtmachi uchun bazaviy hisoblash miqdorining ikki ming besh yuz baravari miqdordagi summadan koʻp boʻlmagan tovarlar;

bir buyurtmachi uchun bazaviy hisoblash miqdorining yigirma besh baravaridan oshmaydigan miqdordagi ishlar, xizmatlar.

15. Ishtirokchi elektron doʻkonga joylashtirilgan oʻz taklifida quyidagilarni koʻrsatadi:

taklif etilayotgan tovarning (ishning, xizmatning) nomi;

sotish narxi;

tovarning eng koʻp va eng kam toʻpi;

tovarning rusumi va texnik parametrlari (texnik pasport yoki boshqa hujjat asosida);

tovarning fotosurati;

tovar yetkazib beriladigan (ish bajariladigan, xizmat koʻrsatiladigan) hudud;

tovarni ishlab chiqaruvchi va tovar kelib chiqqan mamlakat toʻgʻrisidagi axborot;

kafolat shartlari va muddati toʻgʻrisidagi axborot;

tovar ishlab chiqarilgan yil;

tovarning yaroqlilik muddati;

ishni bajarish, xizmatni koʻrsatish muddati;

zarur boʻlganda, litsenziya, ruxsat etish xususiyatiga ega boshqa hujjat yoki sertifikat mavjudligi toʻgʻrisidagi axborot.

16. Ishtirokchi elektron doʻkonda joylashtirilgan axborotning ishonchliligi boʻyicha toʻliq javobgar boʻladi.

17. Ishtirokchining ofertasi u elektron doʻkonga joylashtirilgan paytdan boshlab oʻn besh kalendar kun mobaynida amal qiladi. Ushbu muddat tugaganidan soʻng ishtirokchi uni yana oʻn besh kalendar kunga aktivlashtirishi mumkin.

18. Oferta buyurtmachi tomonidan akseptlangunga qadar ishtirokchi ofertani har qanday muddatda chaqirib olishi yoki unga tuzatishlar kiritishga haqli.

19. Buyurtmachi elektron doʻkonda ishtirokchilarning ofertalarini oʻrganish yoʻli bilan oʻzi uchun zarur boʻlgan tovarni (ishni, xizmatni) tanlaydi va tovar (ish, xizmat) tanlangach, xarajatlar moddasini belgilagan holda narxlar soʻrovi mexanizmidan foydalanadi.

19^1. Davlat buyurtmachilari elektron doʻkonning qoʻshimcha sahifasidan foydalangan holda, davlat xaridlarini hududlar (Qoraqalpogʻiston Respublikasi, viloyatlar va Toshkent shahri) kesimida mahalliy ishlab chiqaruvchilar (ish bajaruvchilar, xizmat koʻrsatuvchilar) oʻrtasida amalga oshirishi mumkin.

Bunda, elektron doʻkonning qoʻshimcha sahifasidan foydalanish quyidagi ketma-ketlikda amalga oshiriladi:

buyurtmachi elektron doʻkonda “milliy doʻkon” yacheykasini tanlaydi;

elektron tizim buyurtmachi joylashgan hudud boʻyicha mahalliy ishlab chiqaruvchilarning (ish bajaruvchilarning, xizmat koʻrsatuvchilarning) takliflari joylashtirilgan qoʻshimcha sahifani ochadi.

“Milliy doʻkon” yacheykasining “qidiruv” tugmasidan foydalanilganda elektron tizim buyurtmachi joylashgan hududdagi mahalliy ishlab chiqaruvchilar (ish bajaruvchilar, xizmat koʻrsatuvchilar) tomonidan yetkazib beriladigan tovarni (ishni, xizmatni) qidiradi.

Elektron doʻkonning qoʻshimcha sahifasida xarid qilish tartib-taomili yakuniga koʻra tovar (ish, xizmat) mavjud emasligi sababli shartnoma tuzilmagan boʻlsa, davlat buyurtmachisi elektron doʻkonning asosiy sahifasidan foydalanmasdan mustaqil ravishda tanlangan yetkazib beruvchi bilan toʻgʻridan toʻgʻri shartnoma tuzishga haqli emas.

20. Portal avtomatik rejimda, narxlar soʻrovi mexanizmini amalga oshirgan holda ofertani taklif etgan ishtirokchiga hamda elektron doʻkonda oʻxshash tovarlarni (ishlarni, xizmatlarni) taklif etayotgan barcha ishtirokchilarga xarid qilish tartib-taomilida ishtirok etish toʻgʻrisida takliflar yuborilishini taʼminlashga majbur.

20^1. “Milliy doʻkon” orqali xaridlarni amalga oshirishda elektron tizim narxlar soʻrovi mexanizmini faqat buyurtmachi joylashgan hududdagi (Qoraqalpogʻiston Respublikasi, viloyatlar va Toshkent shahri) mahalliy ishlab chiqaruvchilar (ish bajaruvchilar, xizmat koʻrsatuvchilar) orasida yuborilishini taʼminlaydi.

21. Narxlar soʻrovi mexanizmi, buyurtmachiga oʻxshash tovarlarni (ishlarni, xizmatlarni) taklif etayotgan ishtirokchilardan pastroq narxni soʻrash imkoniyatini taqdim etadigan elektron tizimning funksiyasidan iborat .

22. Ishtirokchilar narxlar soʻrovida ishtirok etish toʻgʻrisidagi taklif portal tomonidan yuborilgan paytdan eʼtiboran qirq sakkiz soat ichida oʻz takliflarini berishga haqli.

23. Ishtirokchilarning manziliga yuborilayotgan narxlar soʻrovida ishtirok etish toʻgʻrisidagi taklif buyurtmachi tomonidan tanlangan ishtirokchining ofertasiga havolani oʻz ichiga oladi.

Ishtirokchilar narxlar soʻrovida ishtirok etish haqidagi taklifni olgan vaqtdan boshlab buyurtmachi tomonidan tanlangan oferta narxidan pastroq narx boʻyicha taklif kiritishga haqli.

24. Korporativ buyurtmachilar va ishtirokchilar xaridlarni elektron doʻkonda tartib-taomili orqali amalga oshirishdan oldin HKKPdagi shaxsiy hisobvaragʻiga ishtirokchi oferta qiymatining 3 foizi miqdoridagi zakalatni joylashtiradi.

25. Agar narx soʻrovi mobaynida ishtirokchi tomonidan taklif qilingan narx buyurtmachi tomonidan tanlangan narxdan 15 va undan ortiq foizga past boʻlsa, ishtirokchi buyurtmachi tomonidan tanlangan ofertaning narxi va oʻzi tomonidan taklif etilgan narxning farqi miqdoridagi qoʻshimcha zakalatni xarid predmetining har bir birligi uchun oldindan kiritishi shart.

Qoʻshimcha zakalat mavjud boʻlmagan taqdirda ushbu takliflar elektron tizim tomonidan avtomatik ravishda rad etiladi.

26. Ishtirokchilar tomonidan berilgan narx boʻyicha takliflarni taqqoslash portal tomonidan avtomatik rejimda amalga oshiriladi.

27. Ishtirokchilar toʻgʻrisidagi maʼlumotlardan buyurtmachi yoki ishtirokchilar yakuniy natijalar eʼlon qilinguniga qadar foydalana olmaydi. Ijrochining nomi va uning taklif qilgan narxi gʻolib aniqlangan paytda portalda aks ettiriladi.

28. Portal shartnomani buyurtmachi tomonidan tanlangan ishtirokchining ofertasida bayon etilgan shartlarga muvofiq hamda ishtirokchilar tomonidan taklif etilgan eng past narxda shakllantiradi.

29. Portal tuzilgan bitimni roʻyxatga oladi, buyurtmachi va ishtirokchining shaxsiy hisobvaragʻidan operatorning vositachilik haqini yechib oladi. Bitimni roʻyxatga olish elektron tizim tomonidan shartnomani shakllantirish va unga oʻziga xos raqam berish bilan amalga oshiriladi.

30. Portalda roʻyxatdan oʻtkazilgan ishtirokchilarning hech biri dastlabki taklifdan pastroq narxni taklif qilmasa, portal buyurtmachi va ijrochi oʻrtasidagi bitimni roʻyxatdan oʻtkazadi.

31. Xarid qilish tartib-taomili yakuniga koʻra elektron doʻkonda tovar (ish, xizmat) mavjud emasligi sababli shartnoma tuzilmagan boʻlsa, buyurtmachi mustaqil ravishda tanlangan yetkazib beruvchi bilan shartnoma tuzish orqali toʻgʻridan toʻgʻri xaridni amalga oshirishga haqli. Bunda ushbu Nizomning 14-bandida belgilangan davlat xaridlarining summalarga oid mezonlari amal qiladi.

32. Toʻgʻridan-toʻgʻri xarid natijasida tuzilgan shartnoma u tuzilgan sanadan eʼtiboran uch kundan kechiktirmay portalga joylashtirilishi lozim. Toʻgʻridan-toʻgʻri xarid uchun javobgarlik buyurtmachining zimmasida boʻladi.

33. Qonunning 46-moddasiga asosan auksion vositasidagi davlat xaridi quyidagi shartlar bir vaqtning oʻzida bajarilgan taqdirda amalga oshiriladi:

tovarning standart xususiyatlarga ega boʻlishi;

tovarning texnik, ekspluatatsiya qilinish xususiyatlarini va boshqa xususiyatlarini baholash hamda taqqoslash zaruratining mavjud emasligi;

xizmatlarning, ishlarning davlat xaridi obyekti boʻlmasligi;

tovarning qiymati bir shartnoma boʻyicha bazaviy hisoblash miqdorining besh ming baravaridan kam boʻlishi. Budjet buyurtmachilari uchun auksiondagi davlat xaridlari bir shartnoma boʻyicha bazaviy hisoblash miqdorining ikki ming besh yuz baravaridan ortiq boʻlmasligi kerak.

34. Buyurtmachi auksion oʻtkazish haqida xaridlar reja-jadvaliga muvofiq portalga eʼlon joylashtiradi.

Korporativ buyurtmachilar va ishtirokchilar tomonidan auksionda ishtirok etishdan oldin HKKPdagi shaxsiy hisobraqamlariga auksionning boshlangʻich narxdan 3 foiz miqdorida zakalat mablagʻi oʻtkaziladi.

34¹. Agar xaridlar reja-jadvali uch oy oldin maxsus axborot portaliga joylashtirilmagan boʻlsa, boshlangʻich narxni pasaytirish uchun oʻtkaziladigan auksion orqali davlat xaridlarini amalga oshirishda tovarlarni yetkazib berish muddati yetti kundan kam boʻlmasligi kerak.

35. Auksion oʻtkazilishi toʻgʻrisidagi eʼlon auksion gʻolibini aniqlangunga qadar kamida besh kun avval joylashtirilishi kerak.

36. Auksion oʻtkazilishi toʻgʻrisidagi eʼlonda quyidagi maʼlumotlar boʻlishi kerak:

buyurtmachining nomi va manzili;

auksionning birinchi va oxirgi kuni (auksion oʻtkaziladigan davr);

auksion predmetining boshlangʻich narxi;

auksion predmetining xususiyatlari (auksion predmetining tasnifi);

auksion predmetini lotlar boʻyicha boʻlib chiqish va har bir lotning hajmi;

tovarlarni yetkazib berish muddatlari va shartlari;

tovarlar yetkazib beriladigan joy (manzil);

litsenziya yoki ruxsat etish xususiyatiga ega hujjatning mavjudligi haqida talab (zarur boʻlganda);

tovarning oʻziga xos xususiy parametrlarini ifodalovchi alohida shartlar.

37. Auksion buyurtmachining eʼlonida bayon etilgan talablarni inobatga olgan holda oʻtkaziladi.

38. Agar buyurtmachining eʼlonida boshqa holatlar koʻzda tutilmagan boʻlsa, ishtirokchi yangi tovarni yetkazib berishi shart.

39. Auksion elektron tizimda boshlangʻich narxni qadam-baqadam pasaytirish yoʻli bilan oʻtkaziladi. Qadam oʻlchovi operator tomonidan vakolatli organ bilan kelishilgan holda belgilanadi, lekin ishtirokchi tomonidan kiritiladigan zakalat miqdoridan ortiq boʻlishi mumkin emas.

40. Budjet buyurtmachisining eʼloni buyurtmachi tomonidan eʼlon joylashtirilgan vaqtdan va Oʻzbekiston Respublikasi Moliya vazirligining davlat moliyasini boshqarish axborot tizimi pul mablagʻlari mavjudligi haqidagi tasdigʻi olingandan soʻng aktivlashtiriladi va ishtirokchilarning takliflarini qabul qilish boshlanadi.

41. Agar taklif narxi buyurtmachi tomonidan berilgan boshlangʻich narxdan past va/yoki boshqa ishtirokchining taklif qilgan narxidan past boʻlsa, portal ishtirokchilarning takliflarini qabul qilishni taʼminlaydi.

Auksionni oʻtkazish chogʻida ishtirokchilar auksion oʻtkazilishi toʻgʻrisidagi eʼlon chop etilgan kundan eʼtiboran va u tamom boʻladigan paytga qadar butun muddat ichida narx boʻyicha takliflarni cheklanmagan miqdorda berishga haqli.

Auksion uni oʻtkazish haqidagi eʼlonda koʻrsatilgan muddatda (sana va vaqt), biroq oxirgi taklif kelib tushgan vaqtdan soʻng besh minutdan kam boʻlmagan vaqtda tugagan deb hisoblanadi.

Mazkur vaqt ichida yangi taklif berilgan taqdirda, ishtirokchilardan takliflarni qabul qilish muddati oxirgi taklif olingandan soʻng yana besh minutga uzaytiriladi.

Bunda, auksionning tugash muddati operatorning ish kuni va ish vaqtiga toʻgʻri kelishi lozim.

Ishtirokchilarning nomi va ular bilan bogʻlanishga doir maʼlumotlar auksion gʻolibi aniqlanmaguniga qadar portalda aks ettirilmaydi.

Agar auksion mobaynida ishtirokchi tomonidan taklif qilingan narx boshlangʻich narxdan 15 va undan ortiq foizga past boʻlsa, ishtirokchi boshlangʻich narx va oʻzi tomonidan taklif etilgan narxning farqi miqdoridagi qoʻshimcha zakalatni xarid predmetining har bir birligi uchun oldindan kiritishi shart.

Qoʻshimcha zakalat mavjud boʻlmagan taqdirda ushbu takliflar elektron tizim tomonidan avtomatik ravishda rad etiladi.

42. Auksion tugaydigan vaqt kelganda portal auksion oʻtkazilgan vaqt davomida berilgan takliflar orasida eng past narxni taklif qilgan taklifni avtomatik ravishda aniqlab oladi. Eng past narx koʻrsatilgan taklifni bergan ishtirokchi auksion gʻolibi sifatida portal tomonidan saralab olinadi. Ijrochining nomi portalda aks ettirilib, ushbu tizim tuzilgan bitimni avtomatik ravishda qayd etadi va buyurtmachining buyurtmanomasida bayon etilgan shartlarga muvofiq shartnomani shakllantiradi.

43. Agar auksionda bir nafar ishtirokchi ishtirok etgan boʻlsa yoki hech kim ishtirok etmagan boʻlsa, auksion oʻtkazilmagan deb hisoblanadi va gʻolib aniqlanmaydi, buyurtmachi auksionni besh kunga uzaytiradi. Auksionni uzaytirish avvalgi auksion tamom boʻlgan paytdan eʼtiboran uch kun ichida buyurtmachi tomonidan amalga oshiriladi. Auksionni uzaytirishda buyurtmachi boshlangʻich narxni, texnik talablarni, xususiyatlarni yoki texnik topshiriqni qayta koʻrib chiqishga haqli.

44. Agar qayta auksion takliflar mavjud emasligi sababli oʻtkazilmagan deb topilgan boʻlsa, buyurtmachi Qonunning 48-moddasida nazarda tutilgan tartib-taomil boʻyicha tanlov oʻtkazishga haqli.

45. Tanlov vositasidagi davlat xaridi quyidagi shartlar bir vaqtning oʻzida bajarilgan taqdirda amalga oshiriladi:

tovarning (ishning, xizmatning) batafsil va aniq taʼrifini taʼriflash imkoniyati mavjud;

gʻolibni aniqlash mezonlari tovar (ish, xizmat) davlat xaridining nafaqat pul ifodasiga, balki miqdoriy va sifat bahosiga ham ega boʻladi.

Korporativ buyurtmachilar tomonidan quyidagi hollarda tanlov orqali xaridlar amalga oshiriladi:

tovar qiymati bir shartnoma boʻyicha bazaviy hisoblash miqdorining besh ming baravaridan yigirma besh ming baravarigacha boʻlgan miqdorni;

xizmatlarning, ishlarning qiymati bir shartnoma boʻyicha bazaviy hisoblash miqdorining yigirma besh baravaridan yigirma besh ming baravarigacha boʻlgan miqdorni tashkil etganda.

46. Budjet buyurtmachilari tomonidan quyidagi hollarda tanlov orqali xaridlar amalga oshiriladi:

tovarning qiymati bir shartnoma boʻyicha bazaviy hisoblash miqdorining ikki ming besh yuz baravaridan olti ming baravarigacha boʻlgan miqdorni;

ishlarning, xizmatlarning qiymati bazaviy hisoblash miqdorining yigirma besh baravaridan olti ming baravarigacha boʻlgan miqdorni tashkil etganda.

47. Tovarning (ishning, xizmatning) qiymati bazaviy hisoblash miqdorining besh ming baravaridan oshgan hollarda tanlov boʻyicha texnik topshiriq Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi qoshidagi Loyihalar va import kontraktlarini kompleks ekspertiza qilish markazi (bundan buyon matnda Markaz deb yuritiladi) bilan kelishib olinishi lozim.

47¹. Tanlovda xorijiy yetkazib beruvchilar bilan birga ikki yoki undan ortiq ishtirokchilar — mahalliy ishlab chiqaruvchilar boʻlgan taqdirda, mahalliy ishlab chiqaruvchilarga nisbatan qonunchilik hujjatlarida belgilangan tartibda narx preferensiyasi qoʻllaniladi.

48. Agar investitsiya loyihalari doirasida Oʻzbekiston Respublikasi Prezidentining farmonlari, qarorlari va farmoyishlari bilan buyurtmachilarga tenderni oʻtkazmasdan tovarlarni (ishlarni, xizmatlarni) yetkazib beruvchilar bilan shartnomalar tuzish huquqi berilgan taqdirda, xarid qilish tartib-taomili davlat xaridining summasidan qatʼi nazar tanlov oʻtkazish orqali amalga oshiriladi. Bunda tanlov haqidagi eʼlon buyurtmachi tomonidan takliflarni qabul qilish muddati tugaguniga qadar kamida oʻn kun oldin portalda joylashtiriladi.

49. Buyurtmachi tanlovni oʻtkazish uchun toq sonli aʼzolardan (kamida beshta kishidan) iborat xarid komissiyasini (bundan buyon matnda tanlov komissiyasi deb yuritiladi) tuzadi.

50. Tanlov komissiyasi aʼzolarining tarkibi va soni olinadigan tovarlarning (ishlarning, xizmatlarning) xususiyatlarini hisobga olgan holda oʻzgarishi mumkin.

51. Xarid qilish xoʻjalik faoliyati doirasida oʻtkazilganda xarid komissiyasi buyurtmachining vakillari orasidan, zarur boʻlgan taqdirda ovoz berish huquqiga ega ekspertlar jalb etilgan holda shakllantiriladi.

52. Xarid qilish loyiha faoliyati doirasida oʻtkazilganda tanlov komissiyasi vazifalarini belgilangan tartibda tashkil etiladigan loyihani amalga oshiruvchi guruh bajaradi, u xarid qilish tartib-taomillarini oʻtkazish natijalari toʻgʻrisida qarorlar qabul qiladi.

53. Qiymati bazaviy hisoblash miqdorining besh ming baravaridan ortiq miqdordagi davlat xaridlari oʻtkazilganda tanlov komissiyasi tarkibiga buyurtmachining vakillaridan tashqari Oʻzbekiston Respublikasi Investitsiyalar va tashqi savdo vazirligining, Oʻzbekiston Respublikasi Vazirlar Mahkamasi huzuridagi “Oʻzinjiniring” respublika loyihalashtirish institutining vakillari kiritiladi.

54. Tanlov komissiyasi buyurtmachining tegishli qarori bilan tuziladi va tarqatib yuboriladi.

55. Tanlov oʻtkazish boʻyicha xarid komissiyasining tezkor faoliyatini uning masʼul kotibi tashkil etadi.

56. Buyurtmachi tomonidan tanlov oʻtkazish toʻgʻrisidagi qaror qabul qilinganidan soʻng buyurtmachining mutaxassislari yoki tanlovni tashkillashtirish va oʻtkazish uchun masʼul shaxs tomonidan tanlov hujjatlarining, shartnoma va tanlov oʻtkazish haqidagi eʼlonning matni ishlab chiqiladi.

57. Tanlov oʻtkazilishi toʻgʻrisidagi eʼlonda quyidagi axborot boʻlishi kerak:

tovarning (ishning, xizmatning) batafsil tavsifi va narxi;

tanlov oʻtkaziladigan joy manzili;

tanlov ishtirokchilariga qoʻyiladigan talablar;

buyurtmachining ishtirokchilar bilan aloqada boʻlish uchun bogʻlovchi shaxslar sifatida belgilangan bir yoki bir nechta mansabdor shaxsining yoki boshqa xodimlarining F.I.O., lavozimi va manzili;

tanlov hujjatlari qoidalarini izohlash uchun soʻrov berish shakli;

takliflarni berish muddati tugaydigan sana va vaqt;

tanlov takliflarini rasmiylashtirishga doir talablar.

Tanlov oʻtkazish toʻgʻrisidagi eʼlonda qonunchilik hujjatlariga zid boʻlmagan boshqa axborot ham boʻlishi mumkin.

58. Tanlov hujjatlarida quyidagilar boʻlishi kerak:

tanlov oʻtkazilishi toʻgʻrisidagi eʼlonda koʻrsatilgan axborot;

shartnoma bahosini va ijrochilar bilan hisob-kitoblarni shakllantirish uchun foydalaniladigan valyuta hamda toʻlov tartibi haqidagi axborot;

tanlovda ishtirok etish uchun taklif qaysi tilda tayyorlanishi kerakligi boʻyicha talab;

tanlov ishtirokchilariga tanlov hujjatlari qoidalariga doir tushuntirishlarni taqdim etish tartibi, taqdim etish muddati boshlanadigan va tugaydigan sana;

agar tovarning (ishning, xizmatning) muqobil variantlariga yoʻl qoʻyilsa, lotni almashtirish boʻyicha muqobil takliflarni baholash tartibining tavsifi;

texnik topshiriq;

Qonunga muvofiq ishtirokchilarning takliflarini baholash mezonlari va koʻrib chiqish tartibi.

59. Tanlov hujjatlariga ularning ajralmas qismi boʻlgan shartnoma loyihasi ilova qilinadi.

60. Buyurtmachi tanlov hujjatlarini koʻrib chiqish uchun tanlov oʻtkazish boʻyicha xarid komissiyasiga kiritadi.

61. Tanlov komissiyasi oʻz majlislarida tanlov hujjatlarini Qonun talablariga muvofiqligini koʻrib chiqadi va quyidagilarni:

takliflar qabul qilinadigan muddatlarini;

takliflarni ochish tartib-taomillarini;

takliflarni baholash mezonlarini;

taklif kiritish tartibini, hajmini va uni taʼminlash shaklini belgilaydi.

62. Tanlov hujjatlari tanlov komissiyasi tomonidan kelishilgandan soʻng tanlovni oʻtkazish haqida qaror qabul qilinadi.

63. Tanlov hujjatlarida kamchiliklar aniqlangan taqdirda, aniqlangan kamchiliklar bartaraf etilganidan soʻng, tanlov komissiyasi tomonidan tanlov hujjatlari qayta koʻrib chiqiladi.

64. Buyurtmachi tanlov komissiyasi tomonidan koʻrib chiqilgan tanlov hujjatlarini oʻzining imzosi va muhri bilan tasdiqlaydi.

65. Tasdiqlangan tanlov hujjatlari, shartnoma loyihasi, shuningdek tanlov oʻtkazish haqidagi eʼlon tanlov ishtirokchilarining takliflarini qabul qilish muddati tugashidan kamida oʻn kun avval buyurtmachi tomonidan portalga joylashtiriladi.

66. Tanlov oʻtkazish haqidagi eʼlon qoʻshimcha ravishda buyurtmachining rasmiy veb-saytida yoki oʻzining yuqori turuvchi organi rasmiy veb-saytida, shuningdek ommaviy axborot vositalariga joylashtirilishi mumkin.

67. Zarur hollarda buyurtmachi tanlov hujjatlariga oʻzgartirish kiritish haqida qaror qabul qilishi mumkin.

68. Buyurtmachi tanlov hujjatlariga oʻzgartishlar kiritish toʻgʻrisida tanlovda ishtirok etish uchun takliflar berish muddati tugaydigan sanadan kamida uch kun oldin qaror qabul qilishga haqli.

69. Tanlov hujjatlariga oʻzgartishlar kiritish davomida tovarni (ishni, xizmatni) yoki uning xususiyatlarini oʻzgartirishga yoʻl qoʻyilmaydi.

70. Tanlovda takliflar berish tugaydigan muddat tanlov hujjatlariga oʻzgartishlar kiritilgan sanadan eʼtiboran kamida oʻn kunga uzaytirilishi kerak.

71. Shu bilan bir vaqtda, agar eʼlonda koʻrsatilgan axborot oʻzgartirilgan boʻlsa, tanlov oʻtkazish toʻgʻrisidagi eʼlonga oʻzgartishlar kiritiladi.

72. Zarur hollarda buyurtmachi tanlov komissiyasi qarori asosida takliflarni berish muddatini uzaytirishga, shuningdek ishtirokchilarga ularning takliflarini amal qilish muddatini muayyan davrga uzaytirish toʻgʻrisidagi taklif bilan murojaat qilishi mumkin.

73. Tanlov hujjatlarida buyurtmachi har bir tovarni (ishni, xizmatni) xarid qilishda alohida lot sifatida eʼlon qilishi mumkin. Bunday holda buyurtmachi tovarlarni (ishlarni, xizmatlarni) yetkazib berish uchun tanlovning har xil loti boʻyicha bir nechta ishtirokchisi bilan shartnomalar tuzishi mumkin, bunda har bir lot uchun faqat bitta gʻolib aniqlanishi mumkin.

74. Portalda eʼlon qilingan tanlov ishtirokchilarining takliflari eʼlonda belgilangan tartibda tanlov oʻtkazish toʻgʻrisidagi eʼlonda koʻrsatilgan manzil boʻyicha muhrlangan konvertlarda taqdim etiladi.

75. Tanlov ishtirokchilarining takliflari ip bilan tikilgan, raqamlangan, muhr qoʻyilgan va ishtirokchining vakolatli shaxsining imzosi bilan tasdiqlangan yoki takliflarning har bir varagʻi imzolangan holda taqdim etish tavsiya etiladi.

76. Tanlov ishtirokchilarining takliflari eʼlonda belgilangan tartib asosida tanlov oʻtkazish toʻgʻrisidagi eʼlonda koʻrsatilgan manzilga muhrlangan konvertlarda (konvertning yelimlangan joyiga ishtirokchining muhri bosiladi) taqdim etiladi, unda texnikaviy, moliyaviy, moddiy, kadrlar resurslarining hamda boshqa resurslarning mavjudligiga oid maʼlumotlar texnik va tijorat takliflari bilan birga boʻlishi kerak.

77. Takliflar solingan konvert tanlovni tashkillashtirish va oʻtkazishga masʼul shaxsga roʻyxatga olish kitobida topshiruvchi va qabul qiluvchi shaxslar imzosi ostida, qabul qilishning sanasi va vaqtini qayd etish yoʻli bilan qabul qilinadi. Roʻyxatga olish kitobi ip bilan tikilgan, raqamlangan va muhrlangan boʻlishi kerak.

78. Takliflar bilan birga ishtirokchilar xarid obyekti boʻlgan tovarning eskizi, rasmi, chizmasi, fotosurati va boshqa tasviri, nusxasi, namunasini taqdim etishi mumkin.

79. Tanlov ishtirokchisi bitta lotga faqat bitta taklif berishga haqli.

80. Tanlov ishtirokchisi taqdim etilayotgan axborot va hujjatlarning haqiqiyligi va toʻgʻriligi uchun javobgar boʻladi.

81. Tanlov ishtirokchisi taqdim etilgan takliflarni berish muddati tugaguniga qadar berilgan taklifni chaqirib olishga yoki unga oʻzgartishlar kiritishga haqli.

82. Tanlovga takliflarni qabul qilish portalda chop etilgan eʼlonda koʻrsatilgan muddat kelishi bilan tugatiladi.

83. Tanlov ishtirokchisi tanlov hujjatlaridagi talablarni, tanlov oʻtkazish uchun eʼlonda belgilangan shaklda tushuntirish talabi bilan buyurtmachiga soʻrov yuborishga haqli.

84. Buyurtmachi soʻrov kelib tushgan sanadan eʼtiboran ikki ish kuni ichida, agar mazkur soʻrov buyurtmachiga takliflar berish muddati tugaydigan sanadan kamida ikki kun oldin kelib tushgan boʻlsa, ushbu soʻrovga javob yuborishi shart.

85. Buyurtmachi xarid qilish tartib-taomiliga nisbatan ishtirokchilar tomonidan takliflarning taʼminlanishi zarurligi tarzida talab belgilagan taqdirda, takliflar yuborilguniga qadar ishtirokchi taʼminotning maqbulligini tasdiqlash toʻgʻrisida soʻrov yuborishga haqli. Buyurtmachi bunday soʻrovga darhol javob beradi.

86. Tanlovda quyidagi mezonlarga muvofiq boʻlgan ishtirokchilar qatnasha oladi:

shartnomani bajarish uchun zarur texnikaviy, moliyaviy, moddiy, kadrlar resurslarining hamda boshqa resurslarning mavjudligi;

shartnoma tuzish uchun qonuniy huquqqa egalik;

soliqlar va yigʻimlarni toʻlash boʻyicha qarzdorlikning mavjud emasligi;

oʻziga nisbatan joriy etilgan bankrotlik tartib-taomillarining mavjud emasligi;

insofsiz ijrochilarning yagona reyestrida qayd etilmaganligi.

87. Agar takliflar berish muddati tugagan paytda tanlov komissiyasi tomonidan tanlov ishtirokchilaridan tanlov hujjatlarida koʻrsatilgan talablarga mos keladigan kamida ikkita taklif olingan boʻlsa, tanlov oʻtkazilgan deb topiladi.

87¹. Uch yoki undan ortiq tanlov ishtirokchilari — mahalliy ishlab chiqaruvchilar boʻlgan taqdirda davlat xaridlari buyurtmachining tanloviga koʻra mahalliy ishlab chiqaruvchilar oʻrtasida amalga oshirilishi mumkin.

88. Tanlovda bitta ishtirokchi ishtirok etgan yoki bironta ishtirokchi ishtirok etmagan taqdirda tanlov oʻtkazilmagan deb topiladi. Bunday holatda buyurtmachi tanlovni ayni oʻsha shartlarda hamda tovarga (ishga, xizmatga) doir ayni oʻsha mezonlarga va talablarga muvofiq takroran amalga oshirishi shart.

89. Tanlov hujjatlarining shartlari oʻzgartirilmasdan takroran tanlov oʻtkazilganda takroran tanlov oʻtkazish toʻgʻrisidagi eʼlon ishtirokchilardan takliflar qabul qilinadigan muddat tugaydigan sanadan kamida oʻn kun oldin buyurtmachi tomonidan portalga joylashtiriladi.

90. Tovarga (ishga, xizmatga) nisbatan baholash shartlari, mezonlari va talablarni oʻzgartirish zarurati paydo boʻlganda xarid komissiyasi asoslarni keltirgan holda tegishli qarorni qabul qiladi.

91. Tanlov ishtirokchilari tomonidan berilgan takliflar solingan konvertlar tanlov komissiyasi yigʻilishida ochiladi.

92. Tanlov ishtirokchilarining takliflarini koʻrib chiqish va baholash muddati takliflar berish tugagan paytdan eʼtiboran oʻn kundan koʻp boʻlishi mumkin emas.

93. Eʼlonda tanlovni oʻtkazish vaqti sifatida koʻrsatilgan vaqtda tanlov komissiyasi tanlov ishtirokchilari tomonidan berilgan takliflar solingan konvertlarni takliflarni baholash uchun ochadi. Tanlov ishtirokchisining vakolatli vakili konvertlarni ochish tartib-taomili chogʻida hozir boʻlishga haqli.

94. Takliflar solingan konvertlarni ochishda ularda barcha hujjatlarning mavjudligi va toʻgʻri rasmiylashtirilganligi tekshiriladi. Tegishli hujjatlar konvertda mavjud boʻlmagan holatda, tanlov komissiyasi ushbu taklifni koʻrib chiqish va baholashga qoʻymaslikka haqli.

95. Tanlov takliflari solingan konvertlarni ochish jarayoni buyurtmachi tomonidan videoyozuvga tushiriladi. Konvertlarni ochish davomida ishtirokchilar taqdim etgan barcha hujjatlar va tijorat taklifining narxi oʻqib eshittiriladi.

96. Agar taklifni kiritgan tanlov ishtirokchisi Qonunda belgilangan talablarga mos kelmasa yoxud tanlov ishtirokchisining taklifi tanlov hujjatlari talablariga mos kelmasa, xarid komissiyasi taklifni rad etadi.

97. Tanlov komissiyasi gʻolibni aniqlash uchun rad etilmagan takliflarni tanlov hujjatlarida qayd etilgan mezonlar asosida baholashni amalga oshiradi.

98. Tanlov hujjatlarini baholash maqsadida tanlov komissiyasi komissiya aʼzolari va ekspertlardan iborat boʻlgan baholovchi guruh tuzishga haqli.

99. Taklif Qonunning va tanlov hujjatlarining talablariga muvofiq boʻlsa, u tegishli tarzda rasmiylashtirilgan deb topiladi.

100. Baholash paytida tanlov komissiyasi tanlov ishtirokchilaridan takliflari boʻyicha tushuntirishlar soʻrashga haqli. Mazkur jarayon rasmiy ravishda yozma shaklda tanlov tashkilotchisi orqali belgilangan tartibda olib boriladi. Tushuntirish jarayonida taklifning mohiyati, shuningdek narxi yuzasidan biror-bir oʻzgartirishlarga yoʻl qoʻyilmaydi.

101. Tanlov taklifi tanlov hujjatlari bilan belgilangan muddat mobaynida kuchida qoladi.

102. Tanlov ishtirokchisining konvertini ochishda tanlov komissiyasi tomonidan tanlov taklifining malakaga oid, texnik va narx qismi boʻyicha oʻrganish oʻtkaziladi. Tanlov komissiyasining tanlov takliflarining texnik va narx qismini baholash haqidagi qarori tanlov gʻolibini aniqlash haqidagi bayonnomada qayd etiladi.

103. Tanlov hujjatlarida va taklifda koʻrsatilgan mezonlar asosida shartnomani bajarishning eng yaxshi shartlarini taklif qilgan tanlov ishtirokchisi gʻolib deb topiladi.

104. Tanlov komissiyasi ijrochini va zaxira ijrochini aniqlaydi yoki tanlovni oʻtkazilmagan deb topadi.

105. Agar tanlov hujjatlarida tanlovning har bir tovari (ishi, xizmati) xarid qilish tartib-taomilining alohida loti sifatida koʻrib chiqilishi nazarda tutilgan boʻlsa, tanlov komissiyasi gʻolibni tanlovning har bir loti boʻyicha aniqlaydi.

106. Tanlov oʻtkazish boʻyicha xarid komissiyasining har bir aʼzosi ovoz berishda yoqlab ovoz berishi, qarshi ovoz berishi yoki unda ishtirok etishdan bosh tortishi mumkin. Xarid komissiyasining raisi ovoz berishda ishtirok etishdan bosh tortish huquqiga ega emas.

107. Tanlov oʻtkazish boʻyicha xarid komissiyasining majlislari yuzma-yuz yoki sirtdan (soʻrov orqali, barchaning ishtirokisiz) oʻtkazilishi mumkin. Yuzma-yuz majlislar konferensiyalar (videokonferensiyalar va hokazo) shaklida oʻtkazilishi mumkin.

108. Tanlov oʻtkazish boʻyicha xarid komissiyasining qarori komissiya aʼzolari umumiy sonining koʻpchilik ovozi bilan qabul qilinadi.

109. Takliflarni koʻrib chiqish hamda baholash natijalari bayonnomada qayd etiladi va tanlov oʻtkazish boʻyicha xarid komissiyasining barcha aʼzolari tomonidan imzolanadi. Bayonnomadan koʻchirma u imzolangan kundan eʼtiboran uch ish kuni ichida portalda eʼlon qilinadi.

110. Takliflarni koʻrib chiqish va baholash bayonnomasida quyidagi axborot boʻlishi kerak:

tanlov takliflari koʻrib chiqiladigan hamda baholanadigan sana va vaqt toʻgʻrisidagi;

hozir boʻlgan xarid komissiyasi aʼzolarining va tanlov ishtirokchilari vakolatli vakillarining tarkibi haqidagi;

takliflari koʻrib chiqilgan tanlov ishtirokchilari toʻgʻrisidagi;

takliflari ularni rad etishning aniq sabablari koʻrsatilgan holda rad etilgan tanlov ishtirokchilari haqidagi;

tanlov gʻolibi toʻgʻrisida qabul qilingan qaror haqidagi;

tanlov gʻolibining nomi (yuridik shaxslar uchun), familiyasi, ismi, otasining ismi (jismoniy shaxslar uchun), turgan joyi (pochta manzili).

111. Tanlovning istalgan ishtirokchisi takliflarni koʻrib chiqish va baholash bayonnomasi eʼlon qilinganidan soʻng buyurtmachiga tanlov natijalariga doir tushuntirishlarni taqdim etish toʻgʻrisida soʻrov yuborishga haqli.

112. Buyurtmachi bunday soʻrov kelib tushgan sanadan eʼtiboran uch ish kuni ichida tanlov ishtirokchisiga tegishli tushuntirishlarni taqdim etishi shart.

113. Buyurtmachi gʻolib boʻlgan taklif akseptiga qadar istalgan vaqtda tanlovni bekor qilish huquqiga ega. Tanlov bekor qilingan taqdirda buyurtmachi portalda mazkur qarorning asoslantirilgan sabablarini eʼlon qiladi.

114. Buyurtmachi tanlov bekor qilinganligi uchun javobgar boʻlmaydi, bundan buyurtmachining gʻayriqonuniy harakatlari (harakatsizligi) oqibatida bekor qilingan hollar mustasno.

115. Buyurtmachi oʻtkazilgan tanlov yakunlari boʻyicha gʻolib boʻlgan taklifning aksepti toʻgʻrisida bir ish kuni ichida qaror qabul qiladi.

116. Gʻolib boʻlgan taklifning aksepti quyidagi hollarda amalga oshirilishi mumkin, agar:

davlat xaridlari bekor qilinmagan boʻlsa;

gʻolib boʻlgan taklifni yuborgan ishtirokchi chetlatilmagan boʻlsa;

xarid qilish tartib-taomili buzilmagan boʻlsa.

117. Tanlov natijalari boʻyicha shartnoma tanlov hujjatlarida va oʻzi bilan shartnoma tuzilayotgan tanlov ishtirokchisi tomonidan berilgan taklifda koʻrsatilgan shartlar asosida gʻolib aniqlangan vaqtdan eʼtiboran oʻn kundan kechiktirilmagan muddatda tuziladi.

118. Tanlov natijalari toʻgʻrisidagi axborot buyurtmachi tomonidan portalda eʼlon qilinadi va buyurtmachilar bilan tuzilgan shartnomalar reyestriga kiritiladi.

119. Tanlov gʻolibi tanlov shartlari asosida shartnoma tuzishdan bosh tortgan hollarda shartnoma tuzish huquqi zaxira ijrochisiga oʻtadi va tanlov gʻolibiga taʼminot summasi qaytarib berilmaydi. Bunda zaxira ijrochisi tanlov gʻolibi taklif qilgan narxda shartnoma tuzishi mumkin yoki shartnoma tuzishdan bosh tortishi mumkin.

120. Buyurtmachi quyidagi holatlardan biri yuz bergan taqdirda taklifni taʼminlash summasi toʻlanishini talab qilmaydi va taʼminlash toʻgʻrisidagi hujjatni darhol qaytaradi yoki keyin uning qaytarilishini taʼminlaydi:

taklifni taʼminlashning amal qilish muddati tugashi;

davlat xaridlari toʻgʻrisidagi shartnomaning kuchga kirishi va ushbu shartnomaning bajarilishi taʼminlanishi, agar bunday taʼminlash davlat xaridi shartlarida talab etilsa;

davlat xaridlarining bekor qilinishi;

takliflarni yuborishning oxirgi muddati tugaguniga qadar taklifning chaqirib olinishi, agar davlat xaridi shartlarida bunday qaytarib olishga yoʻl qoʻyilmasligi aytib oʻtilmagan boʻlsa.

121. Ikki yoki undan ortiq buyurtmachilarning xaridlar rejasiga muvofiq qoʻshma tanlovlar oʻtkazilishi mumkin.

122. Qoʻshma tanlovlar bir davlat dasturi yoki loyihalar portfelida ishtirok etayotgan buyurtmachilar doirasida shakllantirilishi shart.

123. Tanlov ishtirokchilari tanlov shartlari va tanlovni oʻtkazish tartib-taomillari buzilgan holatlarda tanlov natijalari ustidan belgilangan tartibda shikoyat qilishlari mumkin.

124. Tanlov komissiyasi xaridlarning boshqa subyektlari tomonidan amalga oshiriladigan harakatlar uchun javobgar boʻlmaydi.

125. Tanlov komissiyasining oʻz vakolati doirasida qabul qiladigan qarorlari Qonunning 19-moddasiga asosan barcha ishtirokchilar uchun majburiydir.

125^1. Elektron tanlov vositasidagi xaridlarni oʻtkazish shartlari mazkur Nizomning 3-bobi 1-paragrafiga muvofiq belgilanadi.

125^2. Buyurtmachi elektron tanlovni oʻtkazish uchun toq sonli aʼzolardan (kamida besh kishidan) iborat xarid komissiyasini tuzadi.

125^3. Xarid komissiyasi aʼzolarining tarkibi va soni olinadigan tovarlarning (ishlarning, xizmatlarning) xususiyatlarini hisobga olgan holda oʻzgarishi mumkin.

125^4. Elektron tanlov xoʻjalik faoliyati doirasida oʻtkazilganda xarid komissiyasi buyurtmachining vakillari orasidan, zarur boʻlgan taqdirda ovoz berish huquqi bilan ekspertlar jalb etilgan holda shakllantiriladi.

125^5. Elektron tanlov loyiha faoliyati doirasida oʻtkazilganda xarid komissiyasi vazifalarini belgilangan tartibda tashkil etiladigan loyihani amalga oshiruvchi guruh bajaradi, u xarid qilish tartib-taomillarini oʻtkazish natijalari toʻgʻrisida qarorlar qabul qiladi.

125^6. Qiymati bazaviy hisoblash miqdorining besh ming baravaridan ortiq miqdordagi elektron tanlov oʻtkazilganda xarid komissiyasi tarkibiga buyurtmachining vakillaridan tashqari Oʻzbekiston Respublikasi Investitsiyalar va tashqi savdo vazirligi hamda Oʻzbekiston Respublikasi Vazirlar Mahkamasi huzuridagi “OʻzInjiniring” respublika loyihalashtirish instituti vakillari kiritiladi.

125^7. Xarid komissiyasi buyurtmachining tegishli qarori bilan tuziladi va tarqatib yuboriladi.

125^8. Elektron tanlov oʻtkazish boʻyicha xarid komissiyasining tezkor faoliyatini uning ovoz berish huquqiga ega boʻlmagan masʼul kotibi tashkillashtiradi.

Xarid komissiyasining masʼul kotibi:

ishtirokchilarning takliflarini tanlov hujjatlarining rasmiylashtirish talablariga mos kelishi boʻyicha tekshirishni amalga oshiradi va tekshirish natijalarini xarid komissiyasiga koʻrib chiqish uchun taqdim qiladi;

tanlov hujjatlarida belgilangan mezonlar boʻyicha ishtirokchilarning takliflarini baholash natijalarini elektron tizimga kiritadi.

125^9. Buyurtmachi xarid komissiyasining har bir aʼzosiga va masʼul kotibiga oʻz vazifalarini amalga oshirish uchun elektron tizimda shaxsiy kabinet ochadi.

125^10. Xarid komissiyasining vakolatiga kiritilgan masalalarni koʻrib chiqish uchun xarid komissiyasining aʼzolari va masʼul kotibining elektron tizim tomonidan yopiq chat orqali muloqot qilish imkoniyati taʼminlanadi.

125^11. Elektron tizimdagi shaxsiy kabinetga birinchi marotaba kirilayotganda xarid komissiyaning har bir aʼzosi, shu jumladan uning raisi ishtirokchilar bilan affillanganlik xususiyatiga ega aloqalari mavjudligi toʻgʻrisida maʼlumotlarni kiritishi shart. Operator xarid komissiyasi aʼzolari tomonidan kiritilgan maʼlumotlarning maxfiyligini taʼminlash boʻyicha javobgar boʻladi.

125^12. Xarid komissiyasi aʼzolarida ishtirokchilar bilan affillanganlik xususiyatiga ega aloqalar mavjud boʻlgan taqdirda, xarid komissiyasining bunday aʼzosi bu masala koʻtarilgan majlisda oʻzini oʻzi rad etishi va mazkur masala boʻyicha ovoz berishda ishtirok etmasligi kerak, bu haqda bayonnomada qayd etiladi.

Ishtirokchilarning xarid qilish tartib-taomillarida ishtirok etish bilan bogʻliq masalalarni koʻrib chiqishda xarid komissiyasi aʼzosining ushbu ishtirokchi bilan affillanganligi mavjud boʻlganda tizim ushbu xarid komissiyasi aʼzosining ovozini mazkur masala boʻyicha ovoz berish natijalaridan chiqarib tashlaydi.

125^13. Xarid komissiyasi raisining affillanganlik xususiyatiga ega aloqalari mavjud boʻlsa, elektron tanlovni oʻtkazish jarayoni buyurtmachi tomonidan yangi xarid komissiyasi raisi tayinlanguniga qadar toʻxtatiladi.

125^14. Xarid komissiyasining har bir aʼzosi oʻzining shaxsiy kabineti orqali ovoz berishda yoqlab ovoz berishi, qarshi ovoz berishi yoki unda ishtirok etishdan bosh tortishi mumkin. Xarid komissiyasi aʼzosi qarshi ovoz berganda elektron bayonnomada sharh qoldirishi shart. Belgilangan muddatlarda xarid komissiyasi aʼzosi shaxsiy kabineti orqali ovoz berishdan boʻyin tovlagan taqdirda, u ovoz berishdan bosh tortgan deb tan olinadi. Xarid komissiya raisi ovoz berishda bosh tortishga haqli emas.

125^15. Buyurtmachi tomonidan elektron tanlov oʻtkazish toʻgʻrisidagi qaror qabul qilinganidan soʻng buyurtmachining mutaxassislari yoki elektron tanlovni tashkillashtirish va oʻtkazish uchun masʼul shaxs tomonidan tanlov hujjatlarining, shartnoma va elektron tanlov oʻtkazish haqidagi eʼlonning matni ishlab chiqiladi.

125^16. Elektron tanlov oʻtkazish toʻgʻrisidagi eʼlonda quyidagi axborot boʻlishi kerak:

tovarning (ishning, xizmatning) batafsil tavsifi va narxi;

elektron tanlov oʻtkazadigan operatorning nomi va uning veb-saytiga havola;

elektron tanlov ishtirokchilariga qoʻyiladigan talablar;

buyurtmachining ishtirokchilar bilan aloqada boʻlish uchun bogʻlovchi shaxslar sifatida belgilangan bir yoki bir nechta mansabdor shaxsining yoki boshqa xodimlarining F.I.O., lavozimi va manzili;

tanlov takliflarini berish muddati tugaydigan vaqt va sana;

tanlov takliflarini rasmiylashtirishga doir talablar.

Elektron tanlov oʻtkazish toʻgʻrisidagi eʼlonda qonunchilik hujjatlariga zid boʻlmagan boshqa axborot ham boʻlishi mumkin.

125^17. Tanlov hujjatlarida quyidagilar boʻlishi kerak:

elektron tanlov oʻtkazilishi toʻgʻrisidagi eʼlonda koʻrsatilgan axborot;

shartnoma bahosini va ijrochilar bilan hisob-kitoblarni shakllantirish uchun foydalaniladigan valyuta hamda toʻlov tartibi haqidagi axborot;

elektron tanlovda ishtirok etish uchun tanlov taklifi qaysi tilda tayyorlanishi kerakligi boʻyicha talab;

elektron tanlov ishtirokchilariga tanlov hujjatlari qoidalariga doir tushuntirishlarni taqdim etish tartibi, taqdim etish muddati boshlanadigan va tugaydigan sana;

agar tovarning (ishning, xizmatning) muqobil variantlariga yoʻl qoʻyilsa, lotni almashtirish boʻyicha muqobil takliflarni baholash tartibining tavsifi;

texnik topshiriq;

Qonunga muvofiq ishtirokchilarning takliflarini baholash mezonlari va koʻrib chiqish tartibi.

125^18. Tanlov taklifining texnik va narx qismi boʻyicha buyurtmachining tovarlarga (ishlarga, xizmatlarga) boʻlgan ehtiyojlarini qondirish uchun taklifning har bir qismini baholash ahamiyatiga qarab nisbiy qiymati belgilanadi.

Tanlov hujjatlarida ballarning boshlangʻich qiymatlari belgilanishi mumkin va ulardan oʻtmagan ishtirokchi elektron tanlovdan chetlatiladi.

Tanlov taklifining texnik qismi uchun miqdoriy koʻrsatkichlardan (malakali mutaxassislar soni, yetkazib berish muddati, ish tajribasi va boshqalar) yoki ekspert bahosidan kelib chiqqan holda baholash mezonlari belgilanadi.

Ball usulidan foydalanganda tanlov taklifining texnik qismining har bir baholash mezoni boʻyicha nisbiy qiymat belgilanishi mumkin. Eng past narx usulidan foydalanganda ishtirokchining tanlov taklifi tanlov hujjatlarida belgilangan talablarga mos kelishi yoki mos kelmasligini aniqlovchi mezonlar belgilanishi mumkin.

Tanlov hujjatlarida belgilangan mezonlar oʻta muhim qiymatga ega boʻlishi mumkin. Bunda tanlov taklifining belgilangan mezonlarga mos kelmasligi ishtirokchini elektron tanlovning har qanday bosqichida chetlatilishiga olib keladi.

Shartnoma summasi (narhi) tanlov taklifi narx qismining yagona mezoni hisoblanadi.

125^19. Tanlov hujjatlariga ularning ajralmas qismi boʻlgan shartnoma loyihasi ilova qilinadi.

125^20. Buyurtmachi tanlov hujjatlarini kelishish uchun elektron shaklda xarid komissiyasiga kiritadi.

125^21. Xarid komissiyasi tanlov hujjatlarini yuzma-yuz majlisda yoki masofadan turib Qonun talablariga muvofiqligini koʻrib chiqadi va quyidagilarni belgilaydi:

tanlov takliflari qabul qilinadigan muddatlar;

tanlov takliflarini baholash usullari va mezonlari;

tanlov takliflari qismlarining va zarur hollarda texnik qismining har bir baholash mezonlarining nisbiy qiymati;

tanlov taklifini taʼminlash hajmi va shakli.

125^22. Elektron tanlovni oʻtkazish haqida qaror tanlov hujjatlari xarid komissiyasi tomonidan kelishilganidan soʻng qabul qilinadi.

125^23. Tanlov hujjatlarida kamchiliklar aniqlangan taqdirda, aniqlangan kamchiliklar bartaraf etilganidan soʻng, xarid komissiyasi tomonidan tanlov hujjatlari qayta kelishilishi kerak.

125^24. Buyurtmachi xarid komissiyasi bilan kelishilgan tanlov hujjatlarini elektron raqamli imzo bilan tasdiqlaydi.

125^25. Tasdiqlangan tanlov hujjatlari, shartnoma loyihasi, shuningdek elektron tanlov oʻtkazish haqidagi eʼlon elektron tanlov ishtirokchilarining takliflarini qabul qilish muddati tugashidan kamida oʻn kun avval buyurtmachi tomonidan portalga joylashtiriladi.

125^26. Elektron tanlov oʻtkazish haqidagi eʼlon qoʻshimcha ravishda buyurtmachining rasmiy veb-saytida yoki oʻzining yuqori turuvchi organi rasmiy veb-saytida, shuningdek ommaviy axborot vositalariga joylashtirilishi mumkin.

125^27. Zarur hollarda buyurtmachi tanlov hujjatlariga oʻzgartirish kiritish haqida qaror qabul qilishi mumkin.

125^28. Tanlov hujjatlariga oʻzgartirishlar kiritish toʻgʻrisida qaror elektron tanlovda ishtirok etish uchun tanlov takliflarini berish muddati tugaydigan sanadan kamida uch kun oldin qabul qilinishi mumkin.

Bunda ushbu elektron tanlovda tanlov takliflarini berish tugaydigan muddat tanlov hujjatlariga oʻzgartirishlar kiritilgan sanadan eʼtiboran kamida oʻn kunga uzaytirilishi kerak. Shu bilan bir vaqtda, agar eʼlonda koʻrsatilgan axborot oʻzgartirilgan boʻlsa, elektron tanlov oʻtkazish toʻgʻrisidagi eʼlonga oʻzgartirishlar kiritiladi.

Tanlov hujjatlariga oʻzgartirishlar kiritish davomida tovarni (ishni, xizmatni) yoki uning xususiyatlarini oʻzgartirishga yoʻl qoʻyilmaydi.

125^29. Tanlov hujjatlarida buyurtmachi har bir tovar (ish, xizmat) alohida lot sifatida koʻrib chiqilishini eʼlon qilishi mumkin. Bunday holda buyurtmachi tovarlarni (ishlarni, xizmatlarni) yetkazib berish uchun tanlovning har xil loti boʻyicha bir nechta ishtirokchi bilan shartnomalar tuzishi mumkin, bunda har bir lot uchun faqat bitta gʻolib aniqlanishi mumkin.

125^30. Elektron tanlov oʻtkazilganda ishtirokchilar tanlov takliflarini elektron konvert koʻrinishida oʻzlarining shaxsiy kabinetlari orqali elektron tanlovni oʻtkazish toʻgʻrisidagi eʼlonda koʻrsatilgan muddatdan kechiktirmay taqdim etadilar.

125^31. Ishtirokchining tanlov taklifining ajralmas qismi boʻlgan elektron hujjatlar operator tomonidan belgilangan formatlarda taqdim etiladi. Har bir joylashtirilgan elektron hujjat ishtirokchining elektron raqamli imzosi bilan tasdiqlanadi.

125^32. Tanlov taklifi bilan birgalikda ishtirokchilar eskizlar, rasmlar, chizmalar, fotosuratlar va boshqa hujjatlarni fayl sifatida joylashtirishlari mumkin.

Bunda ishtirokchilarning tanlov takliflari elektron tizimdagi shablonlarga muvofiq hujjatlarni biriktirish orqali taqdim etiladi. Ishtirokchi tomonidan koʻrsatilgan maʼlumotlar biriktirilgan hujjatlardagi maʼlumotlarga mos kelishi kerak.

125^33. Tanlov takliflarini ochish muddati yetib kelgunga qadar ular elektron tanlov ishtirokchilari, shu jumladan xarid komissiyasi masʼul kotibi va aʼzolari tomonidan koʻrilishiga yoʻl qoʻyilmaydi, bundan ushbu takliflarni taqdim etgan ishtirokchi mustasno. Mazkur talabning bajarilishiga operator javobgar hisoblanadi.

125^34. Elektron tanlov ishtirokchisi bitta lotga faqat bitta tanlov taklifini berishga haqli.

125^35. Elektron tanlov ishtirokchisi taqdim etilayotgan axborot va hujjatlarning haqiqiyligi va toʻgʻriligi uchun javobgar boʻladi.

125^36. Elektron tanlov ishtirokchisi taqdim etilgan tanlov takliflarini berish muddati tugaguniga qadar berilgan tanlov taklifini chaqirib olishga yoki unga oʻzgartirishlar kiritishga haqli.

125^37. Elektron tanlov ishtirokchisi tanlov hujjatlaridagi talablarni tushuntirish talabi bilan buyurtmachiga ochiq elektron chat orqali tanlov takliflarini berish muddati tugaydigan sanadan kamida ikki kun oldin soʻrov yuborishga haqli.

125^38. Buyurtmachi soʻrov kelib tushgan sanadan eʼtiboran ikki kun ichida ushbu soʻrovga ochiq elektron chat orqali tushuntirish yuborishi shart.

125^39. Buyurtmachi xarid qilish tartib-taomiliga nisbatan ishtirokchilar tomonidan tanlov takliflarining taʼminlanishi zarurligi tarzida talab belgilagan taqdirda, tanlov takliflari yuborilguniga qadar ishtirokchi taʼminotning maqbulligini tasdiqlash toʻgʻrisida ochiq elektron chat orqali soʻrov yuborishga haqli. Buyurtmachi bunday soʻrovga darhol javob beradi.

125^40. Elektron tanlovda quyidagi mezonlarga muvofiq boʻlgan ishtirokchilar qatnasha oladi:

shartnomani bajarish uchun zarur texnikaviy, moliyaviy, moddiy, kadrlar resurslarining hamda boshqa resurslarning mavjudligi;

shartnoma tuzish uchun qonuniy huquqqa egalik;

soliqlar va yigʻimlar boʻyicha qarzdorlikning mavjud emasligi;

oʻziga nisbatan joriy etilgan bankrotlik tartib-taomillarining mavjud emasligi;

insofsiz ijrochilarning yagona reyestrida qayd etilmaganligi.

125^41. Uch yoki undan ortiq elektron tanlov ishtirokchilari — mahalliy ishlab chiqaruvchilar boʻlgan taqdirda davlat xaridlari buyurtmachining tanloviga koʻra mahalliy ishlab chiqaruvchilar oʻrtasida amalga oshirilishi mumkin.

125^42. Elektron tanlovda bitta ishtirokchi ishtirok etgan yoki bironta ishtirokchi ishtirok etmagan taqdirda tanlov oʻtkazilmagan deb topiladi. Bunday holatda buyurtmachi tanlovni ayni oʻsha shartlarda hamda tovarga (ishga, xizmatga) doir ayni oʻsha mezonlarga va talablarga muvofiq takroran amalga oshirishi shart.

125^43. Elektron tanlov xarid komissiyasi tomonidan belgilangan muddatda oʻtkazilganda elektron tizim avtomatik ravishda ishtirokchilar tomonidan joylashtirilgan va ularning tanlov takliflarini tashkil etuvchi elektron hujjatlarni koʻrish imkoniyatini beradi.

Ishtirokchi tomonidan biriktirilgan fayllar uning tanlov taklifida koʻrsatilgan maʼlumotlariga mos boʻlishi hamda elektron tizimdagi elektron maydonlar toʻldirilishi kerak.

Elektron tizim ishtirokchi taklif etgan narxni boshlangʻich narxga muvofiqligini va elektron maydonlarning toʻldirilganligini hamda biriktirilgan fayllarning mavjudligini tekshiradi. Ishtirokchi tomonidan taklif etilgan narx boshlangʻich narxdan yuqori boʻlsa, shuningdek toʻldirilmagan maydonlar mavjud boʻlsa yoki biriktirilgan fayllar toʻliq boʻlmasa, elektron tizim rad etish sababini koʻrsatgan holda ishtirokchining taklifini rad etadi. Biriktirilgan fayllardagi maʼlumotlarning ishtirokchining tanlov taklifida koʻrsatilgan maʼlumotlarga muvofiqligini tekshirish xarid komissiyasining masʼul kotibi tomonidan amalga oshiriladi.

125^44. Agar tanlov taklifi Qonunning va tanlov hujjatlarining talablariga muvofiq boʻlsa, u tegishli tarzda rasmiylashtirilgan deb topiladi. Tanlov taklifi tegishli tarzda rasmiylashtirilganligi yoki rasmiylashtirilmaganligi boʻyicha xarid komissiyasi masʼul kotibining qarori uning asoslangan sabablari bilan xarid komissiyasi tomonidan tasdiqlanishi lozim.

125^45. Tanlov takliflarini baholash vaqtida xarid komissiyasining masʼul kotibi elektron tanlov ishtirokchilaridan ularning tanlov takliflari yuzasidan tushuntirishlar soʻrashga haqli. Mazkur jarayon elektron shaklda oʻtkaziladi.

125^46. Tanlov taklifi tanlov hujjatlari bilan belgilangan muddat mobaynida kuchda qoladi.

125^47. Tanlov taklifining texnik qismini miqdoriy koʻrsatkichlarga asosan baholash, shuningdek taklifning narx qismini baholash elektron tizim tomonidan avtomatik ravishda amalga oshiriladi.

Miqdor koʻrsatkichlariga ega boʻlmagan taklifning texnik qismining mezonlari (ekspert mezonlari) boʻyicha ishtirokchilarning takliflarini baholash va taqqoslash xarid komissiyasi tomonidan ovoz berish orqali amalga oshiriladi.

Tanlov hujjatlari shablonlarini toʻldirishda miqdoriy (oʻlchov birligini belgilagan holda) va ekspert mezonlarni xarid komissiyasi tasdiqlaydi.

125^48. Tanlov hujjatlarida belgilangan shartlardan kelib chiqib elektron tizim avtomatik ravishda:

tanlov taklifining texnik va narx qismlarini baholashni hisobga olgan holda eng yuqori ball toʻplagan ishtirokchini (ball usulidan foydalanganda);

tanlov takliflarining texnik qismini baholash natijalariga koʻra elektron tanlovda ishtirok etishni davom ettirishga ruxsat berilgan ishtirokchilar orasidan eng past narxni taklif etgan ishtirokchini (eng past narx usulidan foydalanganda) gʻolib sifatida aniqlaydi.

Ikki yoki undan ortiq ishtirokchilar bir xil ball toʻplagan boʻlsa (ball usulidan foydalanganda) yoki bir xil narx taklif qilgan boʻlsa (eng past narx usulidan foydalanganda), tanlov taklifini barchadan oldin joylashtirgan ishtirokchi gʻolib deb topiladi.

Zaxira ijrochisini aniqlash mazkur bandda belgilangan tartibda amalga oshiriladi.

125^49. Tanlov takliflarini koʻrib chiqish natijalariga koʻra xarid komissiyasining masʼul kotibi elektron tizimda xarid komissiyasi yigʻilishining elektron bayonnomasini tuzadi hamda tasdiqlash uchun xarid komissiyasi aʼzolariga yuboradi.

Xarid komissiyasi aʼzolari elektron bayonnomani elektron raqamli imzolaridan foydalangan holda tasdiqlaydi.

125^50. Xarid komissiyasining qarorlari uning aʼzolari umumiy sonining koʻpchilik ovozi bilan qabul qilinadi.

125^51. Tanlov takliflarini koʻrib chiqish hamda baholash natijalari elektron bayonnomada qayd etiladi va elektron tanlov oʻtkazish boʻyicha xarid komissiyasi aʼzolari tomonidan elektron raqamli imzolaridan foydalangan holda imzolanadi. Elektron bayonnomadan koʻchirma portalda avtomatik ravishda eʼlon qilinadi.

Bunda, bayonnomada quyidagi axborot boʻlishi kerak:

tanlov takliflari koʻrib chiqiladigan hamda baholanadigan sana va vaqt;

xarid komissiyasi aʼzolarining va elektron tanlov ishtirokchilari vakolatli vakillarining tarkibi;

tanlov takliflari koʻrib chiqilgan elektron tanlov ishtirokchilari;

tanlov takliflari ularni rad etishning aniq sabablari koʻrsatilgan holda rad etilgan elektron tanlov ishtirokchilari;

elektron tanlov gʻolibi toʻgʻrisida qabul qilingan qaror haqida maʼlumot;

elektron tanlov gʻolibining nomi (yuridik shaxslar uchun), F.I.O. (jismoniy shaxslar uchun), turgan joyi (pochta manzili).

125^52. Elektron tanlovning istalgan ishtirokchisi elektron bayonnoma eʼlon qilinganidan soʻng buyurtmachiga elektron tanlov natijalariga doir tushuntirishlarni taqdim etish toʻgʻrisida soʻrov yuborishga haqli.

125^53. Buyurtmachi bunday soʻrov kelib tushgan sanadan eʼtiboran uch ish kuni ichida elektron tanlov ishtirokchisiga tegishli tushuntirishlarni taqdim etishi majbur.

125^54. Elektron tanlov oʻtkazish natijalariga koʻra shartnoma mazkur Nizomning 3-bobi 7-paragrafiga muvofiq tartibda elektron shaklda tuziladi, tomonlarning elektron raqamli imzolari bilan tasdiqlanadi hamda shartnomalar reyestriga kiritiladi.

126. Tender vositasidagi davlat xaridi quyidagi shartlar bir vaqtning oʻzida bajarilgan taqdirda amalga oshiriladi:

gʻolibni aniqlash mezonlari tovarlarning (ishlarning, xizmatlarning) nafaqat pul bilan baholanishini, balki miqdoriy va sifat jihatidan baholanishini ham oʻz ichiga oladi;

korporativ buyurtmachilari uchun tovarlarning (ishlarning, xizmatlarning) qiymati bir shartnoma boʻyicha bazaviy hisoblash miqdorining yigirma besh ming baravaridan ortiq miqdorni tashkil etadi;

budjet buyurtmachilari uchun tenderdagi davlat xaridlari bir shartnoma boʻyicha bazaviy hisoblash miqdorining olti ming baravaridan ortiq summani tashkil etishi kerak.

127. Tender oʻtkazish toʻgʻrisidagi eʼlonlarni faqat moliyalashtirish manbalari va miqdorlari mavjudligi tasdiqlangan taqdirdagina portalga va boshqa ommaviy axborot vositalariga joylashtirishi shart.

127¹. Tenderda xorijiy yetkazib beruvchilar bilan birga ikki yoki undan ortiq ishtirokchilar — mahalliy ishlab chiqaruvchilar boʻlgan taqdirda, mahalliy ishlab chiqaruvchilarga nisbatan qonunchilik hujjatlarida belgilangan tartibda narx preferensiyasi qoʻllaniladi.

128. Tender oʻtkazish uchun buyurtmachi huzurida toq sonli (yetti kishidan kam boʻlmagan) aʼzolardan iborat xarid komissiyasi (bundan buyon matnda tender komissiyasi deb yuritiladi) tuziladi.

129. Tender komissiyasining aʼzolari tarkibi va soni xarid qilish tartib-taomilining turiga bogʻliq boʻladi hamda olinayotgan tovarning (ishning, xizmatning) xususiyatlari inobatga olingan holda oʻzgartirilishi mumkin.

130. Tender xoʻjalik faoliyati doirasida oʻtkazilganda tender komissiyasi buyurtmachining vakillari orasidan, zarur boʻlgan taqdirda ovoz berish huquqiga ega ekspertlar jalb etilgan holda shakllantiriladi.

131. Tender loyiha faoliyati doirasida oʻtkazilganda tender komissiyasi vazifalarini qonunchilik hujjatlarida belgilangan tartibda tashkil etiladigan loyihani amalga oshiruvchi guruh bajaradi, u tender natijalari toʻgʻrisida qarorlar qabul qiladi.

132. Tender komissiyasi tarkibiga Oʻzbekiston Respublikasi Investitsiyalar va tashqi savdo vazirligining va Oʻzbekiston Respublikasi Vazirlar Mahkamasi huzuridagi “Oʻzinjiniring” respublika loyihalashtirish institutining vakillari kiritilishi shart.

133. Tender komissiyasi buyurtmachining tegishli qarorlari bilan shakllantiriladi va tarqatib yuboriladi.

134. Tender komissiyasining tezkor faoliyatini uning masʼul kotibi tashkil etadi.

135. Buyurtmachi tomonidan tender oʻtkazish haqidagi qaror qabul qilinganidan keyin buyurtmachi mutaxassislari yoki uning masʼul shaxslari tender hujjatlari loyihasi, shartnomasi va eʼlonining matni ishlab chiqariladi.

136. Tender oʻtkazilishi toʻgʻrisidagi eʼlonda quyidagi axborot boʻlishi kerak:

tovarning (ishning, xizmatning) batafsil tavsifi va narxi;

tender oʻtkaziladigan joy manzili;

tender ishtirokchilariga qoʻyiladigan talablar;

buyurtmachining ishtirokchilar bilan aloqada boʻlish uchun bogʻlovchi shaxslar sifatida belgilangan bir yoki bir nechta mansabdor shaxsining yoki boshqa xodimlarining nomi, lavozimi va manzili;

tender hujjatlari qoidalarini tushuntirish uchun soʻrov berish shakli;

takliflar berish muddati tugaydigan sana va vaqt;

tender takliflarini rasmiylashtirishga doir talablar.

Tender oʻtkazish toʻgʻrisidagi eʼlonda qonunchilik hujjatlariga zid boʻlmagan boshqa axborot ham boʻlishi mumkin.

137. Tender hujjatlarida quyidagilar boʻlishi kerak:

tender oʻtkazilishi toʻgʻrisidagi eʼlonda koʻrsatilgan axborot;

shartnoma bahosini va ijrochilar bilan hisob-kitoblarni shakllantirish uchun foydalaniladigan valyuta hamda toʻlov tartibi haqidagi axborot;

tenderda ishtirok etish uchun taklif qaysi tilda taqdim etilishi kerakligi boʻyicha talab;

tender ishtirokchisi taklifining texnik va narxga oid qismi, ularni baholash tartibi toʻgʻrisidagi axborot;

tender ishtirokchilariga tender hujjatlari qoidalariga doir tushuntirishlarni taqdim etish tartibi, taqdim etish muddati boshlanadigan va tugaydigan sana;

texnik topshiriq;

Qonunga muvofiq tender ishtirokchilarining takliflarini baholash mezonlari va koʻrib chiqish tartibi.

138. Ishlab chiqilgan tender hujjatlarini loyihasi buyurtmachi tomonidan tender hujjatlarini ekspertizadan oʻtkazish uchun Markazga yuboriladi.

139. Tender komissiyasi oʻzining majlisida tender hujjatlari loyihasini Qonun talablariga muvofiqligi boʻyicha koʻrib chiqib, quyidagilarni:

takliflar qabul qilinadigan muddatlarni;

takliflarni ochish tartib-taomillarini;

takliflarni baholash mezonlarini;

taklif kiritish tartibini, hajmini va uni taʼminlash shaklini belgilaydi.

140. Tender hujjatlari loyihasi unda belgilangan talablar bilan birga muhokamaga qoʻyiladi.

141. Tender komissiyasi tomonidan tender hujjatlari loyihasi maʼqullangan holda tender oʻtkazish haqida qaror qabul qilinadi.

142. Tender hujjatlari maʼqullanmagan xollarda u qayta ishlash uchun qaytarib yuborilishi yoki tender komissiyasi majlisida qayta ishlanishi mumkin.

143. Maʼqullangan tender hujjatlarini buyurtmachi oʻzining muhri va imzosi bilan tasdiqlaydi.

144. Tasdiqlangan tender hujjatlari, shartnoma loyihasi, shuningdek tender oʻtkazilishi toʻgʻrisidagi eʼlon tender ishtirokchilaridan takliflarni qabul qilish muddati tugaydigan sanadan kamida oʻttiz kun oldin va koʻpi bilan qirq besh kun oldin portalga buyurtmachi tomonidan joylashtiriladi.

145. Tender oʻtkazishni amalga oshirish haqidagi eʼlon qoʻshimcha ravishda buyurtmachining rasmiy veb-saytida yoki oʻzining yuqori turuvchi organi rasmiy veb-saytiga, shuningdek ommaviy axborot vositalariga joylashtirilishi mumkin.

146. Zarur boʻlgan hollarda buyurtmachi tomonidan tender hujjatlariga oʻzgartirishlar kiritish haqidagi qaror qabul qilishi mumkin.

147. Tenderda ishtirok etish uchun takliflar berish muddati tugaydigan sanadan kamida uch kun oldin tender hujjatlariga oʻzgartishlar kiritish toʻgʻrisida qaror qabul qilishga haqli.

148. Tender hujjatiga oʻzgartirish takliflar berish muddati tugayotganda kiritilgan taqdirda tender, tender hujjatlariga oʻzgartishlar kiritilgan sanadan eʼtiboran oʻn kundan kam boʻlmagan muddatga uzaytirilishi lozim. Shu bilan bir vaqtda, agar eʼlonda koʻrsatilgan axborot oʻzgartirilgan boʻlsa, tender oʻtkazish toʻgʻrisidagi eʼlonga oʻzgartishlar kiritiladi.

149. Tender hujjatlariga oʻzgartirishlar kiritish jarayonida tovarni (ishni, xizmatni) oʻzgartirishga yoʻl qoʻyilmaydi.

150. Zarur boʻlgan hollarda buyurtmachi tomonidan takliflar berish muddati uzaytirilishi yoki tender ishtirokchilariga takliflar qabul qilinishi muddati tender komissiyasi qarori bilan maʼlum vaqtga uzaytirish taklifi bilan murojaat qilishi mumkin.

151. Tender hujjatlarida buyurtmachi har bir tovarni (ishni, xizmatni) xarid qilishda alohida lot sifatida eʼlon qilishi mumkin. Bu holatda buyurtmachi tovarlarni (ishlarni, xizmatlarni) yetkazib berish uchun tenderning bir nechta ishtirokchisi bilan shartnomalar tuzishi mumkin, bunda har bir lot uchun faqat bitta gʻolib aniqlanishi mumkin.

152. Portalda eʼlon qilingan tender ishtirokchilarining takliflari eʼlonda belgilangan tartibda, tender oʻtkazish toʻgʻrisidagi eʼlonda koʻrsatilgan manzil boʻyicha muhrlangan konvertlarda taqdim etiladi.

153. Tender ishtirokchilarining takliflari ip bilan tikilgan, raqamlangan, muhr qoʻyilgan va ishtirokchining vakolatli shaxsining imzosi bilan tasdiqlangan yoki takliflarning har bir varagʻi imzolangan holda taqdim etish tavsiya etiladi.

154. Tender ishtirokchilarining takliflari eʼlonda belgilangan tartib asosida tender oʻtkazish toʻgʻrisidagi eʼlonda koʻrsatilgan manzilga muhrlangan konvertlarda (konvertning yelimlangan joyiga ishtirokchining muhri bosiladi) taqdim etiladi, unda:

alohida muhrlangan ichki konvertda texnik taklif (shu jumladan, texnik, moliyaviy, moddiy, kadrlar resurslarining hamda boshqa resurslarning mavjudligi oid maʼlumotlar);

alohida muhrlangan ichki konvertda taklifning narxga oid qismi boʻlishi kerak.

155. Takliflar solingan konvert roʻyxatga olish kitobida topshiruvchi va qabul qiluvchi shaxs imzosi ostida, qabul qilingan sana va vaqti, konvertlar sonini qayd etish yoʻli bilan tenderni tashkillashtirish va oʻtkazishga masʼul shaxsga taqdim etiladi. Roʻyxatga olish kitobi ip bilan tikilgan, raqamlangan va muhrlangan boʻlishi kerak.

156. Taklif bilan birga xarid obyekti boʻlgan tovarning eskizi, rasmi, chizmasi, fotosurati va boshqa tasviri, nusxasi, namunasi boʻlishi mumkin.

157. Tender ishtirokchisi bitta lotga faqat bitta taklif berishga haqli.

158. Tender ishtirokchisi taqdim etilayotgan axborot va hujjatlarning haqiqiyligi va toʻgʻriligi uchun javobgar boʻladi.

159. Tender ishtirokchisi takliflarni berish muddati tugaguniga qadar berilgan taklifni qaytarib olishga yoki unga oʻzgartishlar kiritishga haqli.

160. Tenderga takliflarni qabul qilish portalda chop etilgan eʼlonda koʻrsatilgan muddat kelishi bilan tugatiladi.

161. Tender ishtirokchisi tender oʻtkazish uchun eʼlonda belgilangan shaklda buyurtmachiga tender hujjatlari qoidalariga doir tushuntirishlar berish toʻgʻrisida soʻrov yuborishga haqli. Mazkur soʻrov kelib tushgan sanadan eʼtiboran ikki ish kuni mobaynida buyurtmachi, agar mazkur soʻrov buyurtmachiga takliflar berish muddati tugaydigan sanadan kamida ikki kun oldin kelib tushgan boʻlsa, tender hujjatlari qoidalariga doir tushuntirishlarni belgilangan shaklda yuborishi shart.

162. Buyurtmachi tomonidan tender oʻtkazish tartib-taomiliga nisbatan ishtirokchilar tomonidan takliflarning taʼminlanishi zarurligi tarzida talab belgilagan taqdirda, takliflar yuborilguniga qadar ishtirokchi taʼminotning maqbulligini tasdiqlash toʻgʻrisida soʻrov yuborishga haqli. Buyurtmachi bunday soʻrovga darhol javob beradi.

163. Tenderda, quyidagi mezonlarga muvofiq boʻlgan ishtirokchilar qatnasha oladi:

shartnomani bajarish uchun zarur texnikaviy, moliyaviy, moddiy, kadrlar resurslarining hamda boshqa resurslarning mavjudligi;

shartnoma tuzish uchun qonuniy huquqqa egalik;

soliqlar va boshqa majburiy toʻlovlarni toʻlash boʻyicha qarzdorlikning mavjud emasligi;

oʻziga nisbatan joriy etilgan bankrotlik tartib-taomillarining mavjud emasligi;

insofsiz ijrochilarning yagona reyestrida qayd etilmaganligi.

164. Agar takliflar berish muddati tugagan vaqtda xarid komissiyasi tender ishtirokchilaridan tender hujjatlarida koʻrsatilgan talablarga mos keladigan kamida ikkita taklif olgan boʻlsa, tender oʻtkazilgan deb topiladi.

164¹. Uch yoki undan ortiq tender ishtirokchilari — mahalliy ishlab chiqaruvchilar boʻlgan taqdirda davlat xaridlari buyurtmachining tanloviga koʻra mahalliy ishlab chiqaruvchilar oʻrtasida amalga oshirilishi mumkin.

165. Tenderda bitta ishtirokchi ishtirok etgan yoki bironta ishtirokchi ishtirok etmagan taqdirda tender oʻtkazilmagan deb topiladi. Bunday holatda buyurtmachi tender hujjatidagi shartlarda hamda tovarga (ishga, xizmatga) doir ayni oʻsha mezonlarga va talablarga muvofiq takroran amalga oshirishi shart.

166. Tender hujjatlarining shartlari oʻzgartirilmasdan takroran tender oʻtkazilganda, takroran tender oʻtkazish toʻgʻrisidagi eʼlon takliflar qabul qilish muddati tugaydigan sanadan kamida yigirma kun oldin buyurtmachi tomonidan portalga joylashtiriladi.

167. Tovarga (ishga, xizmatga) nisbatan baholash shartlari, mezonlari va talablarni oʻzgartirish zarurati paydo boʻlganda tender komissiyasi tomonidan asoslar keltirgan holda tegishli qaror qabul qiladi.

168. Tender ishtirokchilarining takliflari mavjud boʻlgan konvertlarini ochish tender komissiyasi majlisida ikki bosqichda amalga oshiriladi.

169. Tender ishtirokchilarining takliflarini koʻrib chiqish va baholash muddati takliflar berish tugagan paytdan eʼtiboran oltmish kundan koʻp boʻlishi mumkin emas.

170. Eʼlonda tenderni oʻtkazish vaqti sifatida koʻrsatilgan vaqtda tender komissiyasi tender ishtirokchilari tomonidan berilgan takliflar solingan konvertlarni ularni baholash uchun navbatma-navbat ochadi. Tender ishtirokchisining vakolatli vakili takliflar solingan konvertlarni ochish tartib-taomilida hozir boʻlishga haqli.

171. Agar taklifni kiritgan tender ishtirokchisi ushbu Qonunda belgilangan talablarga mos kelmasa yoki tender ishtirokchisining taklifi tender hujjatlari talablariga mos kelmasa, tender komissiyasi taklifni rad etadi.

172. Tender takliflari solingan konvertlarni ochish jarayoni buyurtmachi tomonidan videoyozuvga tushiriladi. Konvertlarni ochish davomida ishtirokchilar taqdim etgan barcha hujjatlar va tijorat taklifining narxi oʻqib eshittiriladi.

173. Tender komissiyasi takliflarni koʻrish natijasida ularning hamma takliflari rad etilganda yoki takliflardan faqat biri talabga muvofiq kiritilgan taqdirda tender oʻtkazilmagan deb topiladi.

174. Tender komissiyasi rad etilmagan takliflarni baholashni tender hujjatlarida koʻrsatilgan mezonlar asosida tender gʻolibini aniqlash uchun amalga oshiradi.

175. Tender hujjatlarini baholash maqsadida tender komissiyasi komissiya aʼzolari va ekspertlardan iborat boʻlgan baholovchi guruh tuzishga haqli.

176. Agar taklif Qonunning va tender hujjatlarining talablariga muvofiq kelsa, u tegishli tarzda rasmiylashtirilgan deb topiladi.

177. Tender takliflarni baholash vaqtida tender komissiyasi tender ishtirokchilaridan ularning tender takliflari boʻyicha qoʻshimcha tushuntirish berishlarini soʻrashlari mumkin. Ushbu jarayon tender tashkilotchilari orqali yozma ravishda rasmiylashtiriladi. Tushuntirish berish jarayonida berilgan taklif va narx boʻyicha oʻzgartirishlarga yoʻl qoʻyilmaydi.

178. Tender takliflari tender hujjatlarida koʻrsatilgan muddatda oʻz kuchida qoladi.

179. Birinchi bosqichda ishtirokchilarning texnikaviy, moliyaviy, moddiy, kadrlar va boshqa resurslarga oid maʼlumotlar va texnik takliflar joylashtirilgan konvert ochiladi.

180. Tender komissiyasi tomonidan ishtirokchilarning texnikaviy, moliyaviy, moddiy, kadrlar va boshqa resurslarga oid maʼlumotlar oʻrganiladi va texnik qismi baholanadi. Tender komissiyasining tender taklifining texnik qismini baholash boʻyicha qarori bayonnoma bilan rasmiylashtiriladi, bayonnomada tenderning birinchi bosqichi gʻoliblari aniqlanadi. Tender ishtirokchisining vakolatli vakili takliflar solingan konvertlarni ochish tartib-taomilida hozir boʻlishga haqli.

181. Tenderning birinchi bosqichi gʻoliblari tenderning ikkinchi bosqichida qoʻyiladi.

182. Tenderning ikkinchi bosqichida taklifning narxga oid qismi ochiladi va baholanadi. Tender komissiyasining tender taklifining narxga oid qismini baholash boʻyicha qarori bayonnoma bilan rasmiylashtiriladi, bayonnomada tenderning ikkinchi bosqichi gʻolibi aniqlanadi. Tender ishtirokchisining vakolatli vakili takliflar solingan konvertlarni ochish tartib-taomilida ishtirok etishga haqli.

183. Tender hujjatlarida va taklifda koʻrsatilgan mezonlar asosida shartnomani bajarishning eng yaxshi shartlarini taklif qilgan tender ishtirokchisi gʻolib deb topiladi.

184. Tender komissiyasi tomonidan ijrochi va zaxira ijrochisi aniqlanadi eki tender oʻtkazilmagan deb topiladi.

185. Agar tender hujjatlarida tenderning har bir tovari (ishi, xizmati) tenderning alohida loti sifatida koʻrib chiqilishi nazarda tutilgan boʻlsa, tender komissiyasi gʻolibni tenderning har bir loti boʻyicha aniqlaydi.

186. Gʻolib ovoz berish natijasida aniqlanadi. Tender komissiyasining har bir aʼzosi ovoz berishda yoqlab ovoz berishi, qarshi ovoz berishi yoki unda ishtirok etishdan bosh tortishi mumkin. Tender komissiyasining raisi ovoz berishda ishtirok etishdan bosh tortish huquqiga ega emas.

187. Tender komissiyasining umumiy sonidan kelib chiqib koʻpchilikning ovozi bilan qaror qabul qilinadi.

188. Takliflarni koʻrib chiqish va baholash natijalari takliflarni koʻrib chiqish hamda baholash bayonnomasida qayd etiladi. Takliflarni koʻrib chiqish va baholash bayonnomasi tender komissiyasining barcha aʼzolari tomonidan imzolanadi hamda undan olingan koʻchirma u imzolangan kundan eʼtiboran uch ish kuni ichida portalda eʼlon qilinadi.

189. Takliflarni koʻrib chiqish va baholash bayonnomasida quyidagi axborot boʻlishi kerak:

tender takliflari koʻrib chiqiladigan hamda baholanadigan sana va vaqt toʻgʻrisidagi;

hozir boʻlgan xarid komissiyasi aʼzolarining va tender ishtirokchilari vakolatli vakillarining tarkibi haqidagi;

takliflari koʻrib chiqilgan tender ishtirokchilari toʻgʻrisidagi;

takliflari ularni rad etishning aniq sabablari koʻrsatilgan holda rad etilgan tender ishtirokchilari haqidagi;

tender gʻolibi toʻgʻrisida qabul qilingan qaror haqidagi;

tender gʻolibining nomi (yuridik shaxs uchun), familiyasi, ismi, otasining ismi (jismoniy shaxs uchun), turgan joyi (pochta manzili).

190. Tenderning istalgan ishtirokchisi takliflarni koʻrib chiqish va baholash bayonnomasi eʼlon qilinganidan soʻng buyurtmachiga tender natijalari boʻyicha tushuntirishlarni taqdim etish toʻgʻrisida soʻrov yuborishga haqli.

191. Buyurtmachi bunday soʻrov kelib tushgan sanadan eʼtiboran uch ish kuni ichida tender ishtirokchisiga tegishli tushuntirishlarni taqdim etishi shart.

192. Buyurtmachi gʻolib boʻlgan taklif akseptiga qadar istalgan vaqtda tenderni bekor qilish huquqiga ega. Tender bekor qilingan taqdirda buyurtmachi portalda mazkur qarorning asoslantirilgan sabablarini eʼlon qiladi.

193. Buyurtmachi tender bekor qilinganligi uchun javobgar boʻlmaydi, bundan tender buyurtmachining gʻayriqonuniy harakatlari (harakatsizligi) oqibatida bekor qilingan hollar mustasno.

194. Buyurtmachi oʻtkazilgan xarid qilish tartib-taomillari yakunlari boʻyicha gʻolib boʻlgan taklifning aksepti toʻgʻrisida bir ish kuni ichida qaror qabul qiladi.

195. Gʻolib boʻlgan taklifning aksepti quyidagi hollarda amalga oshirilishi mumkin, agar:

davlat xaridlari bekor qilinmagan boʻlsa;

gʻolib boʻlgan taklifni yuborgan ishtirokchi chetlatilmagan boʻlsa;

tender qilish tartib-taomili buzilmagan boʻlsa.

196. Tender natijalari boʻyicha shartnoma tender hujjatlarida va shartnoma tuzilayotgan tender ishtirokchisi tomonidan berilgan taklifda koʻrsatilgan shartlar asosida gʻolib aniqlangan vaqtdan boshlab oʻn kunlik muddatdan kechiktirmasdan tuziladi

197. Tender natijalari toʻgʻrisidagi axborot portalda eʼlon qilinadi va shartnomalar reyestriga kiritiladi.

198. Tender gʻolibi tender shartlari asosida shartnoma tuzishdan bosh tortgan hollarda shartnoma tuzish huquqi zaxira ijrochisiga oʻtadi va tender gʻolibiga taʼminot qaytarib berilmaydi. Bunda zaxira ijrochisining taklifi boʻyicha shartnoma tuzilishi yoki zaxira ijrochisi shartnoma tuzishdan bosh tortishi mumkin.

199. Buyurtmachi quyidagi holatlardan biri roʻy bergan taqdirda taklifni taʼminlash summasi toʻlanishini talab qilmaydi va taʼminlash toʻgʻrisidagi hujjatni darhol qaytaradi yoki uning qaytarilishini taʼminlaydi:

taklifni taʼminlashning amal qilish muddati tugagan boʻlsa;

davlat xaridlari toʻgʻrisidagi shartnomaning kuchga kirishi va ushbu shartnomaning bajarilishi taʼminlanishi, agar bunday taʼminlash davlat xaridi shartlarida talab etilsa;

davlat xaridlarining bekor qilinishi;

takliflarni yuborishning oxirgi muddati tugaguniga qadar taklifning chaqirib olinishi, agar davlat xaridi shartlarida bunday qaytarib olishga yoʻl qoʻyilmasligi aytib oʻtilmagan boʻlsa.

200. Ikki yoki undan ortiq buyurtmachilarning xaridlar rejasiga muvofiq qoʻshma tenderlar oʻtkazilishi mumkin.

201. Qoʻshma tenderlar bir davlat dasturi yoki loyihalar portfelida ishtirok etayotgan buyurtmachilar doirasida shakllantirilishi shart.

202. Tender ishtirokchilari tender shartlari va tenderni oʻtkazish tartib-taomillari buzilgan holatlarda tender natijalari ustidan belgilangan tartibda shikoyat qilishlari mumkin.

203. Tender komissiyasi davlat xaridlarining boshqa subyektlari tomonidan amalga oshiriladigan harakatlar uchun javobgar boʻlmaydi.

204. Tender komissiyasining oʻz vakolati doirasida qabul qiladigan qarorlari Qonunning 19-moddasiga asosan barcha ishtirokchilar uchun majburiydir.

204^1. Elektron tender orqali davlat xaridlarini amalga oshirish shartlari mazkur Nizomning 4-bobi 1-paragrafiga muvofiq belgilanadi.

204^2. Elektron tender oʻtkazish uchun buyurtmachi huzurida toq sonli (yetti kishidan kam boʻlmagan) aʼzolardan iborat xarid komissiyasi tuziladi.

204^3. Xarid komissiyasi aʼzolarining tarkibi va soni xarid qilish tartib-taomilining turiga bogʻliq boʻladi hamda olinayotgan tovarning (ishning, xizmatning) xususiyatlari inobatga olingan holda oʻzgartirilishi mumkin.

204^4. Elektron tender xoʻjalik faoliyati doirasida oʻtkazilganda xarid komissiyasi buyurtmachining vakillari orasidan, zarur boʻlgan taqdirda ovoz berish huquqiga ega ekspertlar jalb etilgan holda shakllantiriladi.

204⁵. Elektron tender loyiha faoliyati doirasida oʻtkazilganda xarid komissiyasi vazifalarini qonunchilik hujjatlarida belgilangan tartibda tashkil etiladigan loyihani amalga oshiruvchi guruh bajaradi, u elektron tender natijalari toʻgʻrisida qarorlar qabul qiladi.

204^6. Xarid komissiyasi tarkibiga Oʻzbekiston Respublikasi Investitsiyalar va tashqi savdo vazirligi va Oʻzbekiston Respublikasi Vazirlar Mahkamasi huzuridagi “OʻzInjiniring” respublika loyihalashtirish instituti vakillari kiritilishi shart.

204^7. Xarid komissiyasi buyurtmachining tegishli qarorlari bilan shakllantiriladi va tarqatib yuboriladi.

204^8. Elektron tender oʻtkazish boʻyicha xarid komissiyasining tezkor faoliyatini uning ovoz berish huquqiga ega boʻlmagan masʼul kotibi tashkillashtiradi.

Xarid komissiyasining masʼul kotibi:

ishtirokchilarning takliflarini tender hujjatlarining rasmiylashtirish talablariga mos kelishi boʻyicha tekshirishni amalga oshiradi va tekshirish natijalarini xarid komissiyasiga koʻrib chiqish uchun taqdim qiladi;

tasdiqlangan mezonlar boʻyicha ishtirokchilarning takliflarini baholash natijalarini elektron tizimda joylashtiradi.

204^9. Buyurtmachi xarid komissiyasining har bir aʼzosiga va masʼul kotibiga oʻz vazifalarini amalga oshirish uchun elektron tizimda shaxsiy kabinet ochadi.

204^10. Xarid komissiyasining vakolatiga kiritilgan masalalarni koʻrib chiqish uchun xarid komissiyasining aʼzolari va masʼul kotibining elektron tizim tomonidan yopiq chat orqali muloqot qilish imkoniyati taʼminlanadi.

204^11. Elektron tizimdagi shaxsiy kabinetga birinchi marotaba kirilayotganda xarid komissiyaning har bir aʼzosi, shu jumladan uning raisi ishtirokchilar bilan affillanganlik xususiyatiga ega aloqalar mavjudligi toʻgʻrisida maʼlumotlarni kiritishi shart. Operator xarid komissiyasi aʼzolari tomonidan kiritilgan maʼlumotlarning maxfiyligini taʼminlash boʻyicha javobgar boʻladi.

204^12. Xarid komissiyasi aʼzolarida ishtirokchilar bilan affillanganlik xususiyatiga ega aloqalar mavjud boʻlgan taqdirda, xarid komissiyasining bunday aʼzosi bu masala koʻtarilgan majlisda oʻzini oʻzi rad etishi va mazkur masala boʻyicha ovoz berishda ishtirok etmasligi kerak, bu haqda bayonnomada qayd etiladi.

Ishtirokchilarning xarid qilish tartib-taomillarida ishtirok etish bilan bogʻliq masalalarni koʻrib chiqishda xarid komissiyasi aʼzolarining ushbu ishtirokchilar bilan affillanganlik xususiyatiga ega aloqalar mavjud boʻlganda tizim ushbu xarid komissiyasi aʼzosining ovozini mazkur masala boʻyicha ovoz berish natijalaridan chiqarib tashlaydi.

204^13. Xarid komissiyasi raisining affillanganlik xususiyatiga ega aloqalari mavjud boʻlsa, elektron tenderni oʻtkazish jarayoni buyurtmachi tomonidan yangi xarid komissiyasi raisi tayinlanguniga qadar toʻxtatiladi.

204^14. Xarid komissiyasining har bir aʼzosi oʻzining shaxsiy kabineti orqali ovoz berishda yoqlab ovoz berishi, qarshi ovoz berishi yoki unda ishtirok etishdan bosh tortishi mumkin. Xarid komissiyasi aʼzosi qarshi ovoz berganda elektron bayonnomada sharh qoldirishi shart. Belgilangan muddatlarda xarid komissiya aʼzosi shaxsiy kabineti orqali ovoz berishdan bosh tortgan taqdirda, uning ovozi betaraf sifatida qabul qilinadi. Xarid komissiya raisi ovoz berishda betaraf qolishga haqli emas.

204^15. Buyurtmachi tomonidan elektron tender oʻtkazish toʻgʻrisidagi qaror qabul qilinganidan soʻng buyurtmachining mutaxassislari yoki elektron tenderni tashkillashtirish va oʻtkazish uchun masʼul shaxs tomonidan tender hujjatlarining, shartnoma va elektron tender oʻtkazish haqidagi eʼlonning matni ishlab chiqiladi.

204^16. Elektron tender oʻtkazilishi toʻgʻrisidagi eʼlonda quyidagi axborot boʻlishi kerak:

tovarning (ishning, xizmatning) batafsil tavsifi va narxi;

elektron tender oʻtkazadigan operatorning nomi va uning veb-saytiga havola;

elektron tender ishtirokchilariga qoʻyiladigan talablar;

buyurtmachining ishtirokchilar bilan aloqada boʻlish uchun bogʻlovchi shaxslar sifatida belgilangan bir yoki bir nechta mansabdor shaxsining yoki boshqa xodimlarining F.I.O., lavozimi va manzili;

tender takliflarini berish muddati tugaydigan sana va vaqt;

tender takliflarini rasmiylashtirishga doir talablar.

Elektron tender oʻtkazish toʻgʻrisidagi eʼlonda qonunchilik hujjatlariga zid boʻlmagan boshqa axborot ham boʻlishi mumkin.

204^17. Tender hujjatlarida quyidagilar boʻlishi kerak:

elektron tender oʻtkazilishi toʻgʻrisidagi eʼlonda koʻrsatilgan axborot;

shartnoma bahosini va ijrochilar bilan hisob-kitoblarni shakllantirish uchun foydalaniladigan valyuta hamda toʻlov tartibi haqidagi axborot;

elektron tenderda ishtirok etish uchun tender taklif qaysi tilda tayyorlanishi kerakligi boʻyicha talab;

elektron tender ishtirokchisi tender taklifining texnik va narxga oid qismi, ularni baholash tartibi toʻgʻrisidagi axborot;

elektron tender ishtirokchilariga tender hujjatlari qoidalariga doir tushuntirishlarni taqdim etish tartibi, taqdim etish muddati boshlanadigan va tugaydigan sana;

texnik topshiriq;

Qonunga muvofiq ishtirokchilarning tender takliflarini baholash usullari, mezonlari va koʻrib chiqish tartibi.

Tender hujjatlarida elektron tender ishtirokchilari malakasiga oid talablar nazarda tutilishi mumkin.

204^18. Tender taklifining texnik va narx qismi boʻyicha buyurtmachining tovarlarga (ishlarga, xizmatlarga) boʻlgan extiyojlarini qondirish uchun taklifning har bir qismini baholash ahamiyatiga qarab nisbiy qiymati belgilanadi.

Tender hujjatlarida ballarning boshlangʻich qiymatlari belgilanishi mumkin va ulardan oʻtmagan ishtirokchi elektron tenderdan chetlatiladi.

Tender taklifining texnik qismi uchun miqdoriy koʻrsatkichlardan (malakali mutaxassislar soni, yetkazib berish muddati, ish tajribasi va boshqalar) yoki ekspert bahosidan kelib chiqqan holda baholash mezonlari belgilanadi.

Ball usulidan foydalanganda tender taklifining texnik qismining har bir baholash mezoni boʻyicha nisbiy qiymat belgilanishi mumkin. Eng past narx usulidan foydalanganda ishtirokchining taklifi tender hujjatlarida belgilangan talablarga mos kelishi yoki mos kelmasligini aniqlovchi mezonlar belgilanishi mumkin.

Tender hujjatlarida belgilangan mezonlar oʻta muhim qiymatga ega boʻlishi mumkin. Bunda tender taklifining belgilangan mezonlarga mos kelmasligi ishtirokchini elektron tenderning har qanday bosqichida chetlatilishiga olib keladi.

Shartnoma summasi (narxi) tender taklifi narx qismining yagona mezoni hisoblanadi.

204^19. Tender hujjatlariga ularning ajralmas qismi boʻlgan shartnoma loyihasi ilova qilinadi.

204^20. Buyurtmachi tender hujjatlarini kelishish uchun elektron shaklda xarid komissiyasiga kiritadi.

204^21. Xarid komissiyasi oʻzining yuzma-yuz majlisida yoki masofadan turib tender hujjatlari loyihasini Qonun talablariga muvofiqligi boʻyicha koʻrib chiqadi va quyidagilarni belgilaydi:

tender takliflari qabul qilinadigan muddatlar;

tender takliflarini baholash usullari va mezonlari;

tender taklifi qismlarining va zarur hollarda texnik qismining har bir baholash mezoni boʻyicha nisbiy qiymati;

tender taklifini taʼminlash hajmi va shakli.

204^22. Tender hujjatlari loyihasi unda belgilangan talablar bilan birga muhokamaga qoʻyiladi.

204^23. Xarid komissiyasi tomonidan tender hujjatlari loyihasi maʼqullangan holda elektron tender oʻtkazish haqida qaror qabul qilinadi.

204^24. Tender hujjatlari maʼqullanmagan hollarda ular qayta ishlash uchun qaytarib yuborilishi yoki xarid komissiyasi majlisida qayta ishlanishi mumkin.

204^25. Ishlab chiqilgan tender hujjatlari loyihasi buyurtmachi tomonidan tender hujjatlarini ekspertizadan oʻtkazish uchun Markazga yuboriladi.

204^26. Maʼqullangan tender hujjatlarini buyurtmachi elektron raqamli imzosi bilan tasdiqlaydi.

204^27. Tasdiqlangan tender hujjatlari, shartnoma loyihasi, shuningdek elektron tender oʻtkazish toʻgʻrisidagi eʼlon elektron tender ishtirokchilaridan tender takliflarini qabul qilish muddati tugaydigan sanadan kamida oʻttiz kun oldin va koʻpi bilan qirq besh kun oldin portalga buyurtmachi tomonidan joylashtiriladi.

204^28. Elektron tender oʻtkazishni amalga oshirish haqidagi eʼlon qoʻshimcha ravishda buyurtmachining rasmiy veb-saytida yoki oʻzining yuqori turuvchi organi rasmiy veb-saytiga, shuningdek ommaviy axborot vositalariga joylashtirilishi mumkin.

204^29. Tender hujjatlariga oʻzgartirishlar kiritish haqidagi qaror elektron tenderda ishtirok etish uchun takliflar berish muddati tugaydigan sanadan kamida uch kun oldin qabul qilinishi mumkin.

Bunda ushbu elektron tenderda tender hujjatiga oʻzgartirish takliflar berish muddati tugayotganda kiritilgan taqdirda elektron tender, tender hujjatlariga oʻzgartirishlar kiritilgan sanadan eʼtiboran oʻn kundan kam boʻlmagan muddatga uzaytirilishi lozim. Shu bilan bir vaqtda, agar eʼlonda koʻrsatilgan axborot oʻzgartirilgan boʻlsa, elektron tender oʻtkazish toʻgʻrisidagi eʼlonga oʻzgartirishlar kiritiladi.

204^30. Tender hujjatlariga oʻzgartirishlar kiritish jarayonida tovarni (ishni, xizmatni) oʻzgartirishga yoʻl qoʻyilmaydi.

204^31. Zarur boʻlgan hollarda buyurtmachi tomonidan tender takliflarini berish muddati uzaytirilishi yoki elektron tender ishtirokchilariga tender takliflari qabul qilinishi muddati xarid komissiyasi qarori bilan maʼlum vaqtga uzaytirish taklifi bilan murojaat qilishi mumkin.

204^32. Tender hujjatlarida buyurtmachi har bir tovar (ish, xizmat) alohida lot sifatida koʻrib chiqilishini eʼlon qilishi mumkin. Bu holatda buyurtmachi tovarlarni (ishlarni, xizmatlarni) yetkazib berish uchun tenderning bir nechta ishtirokchisi bilan shartnomalar tuzishi mumkin, bunda har bir lot uchun faqat bitta gʻolib aniqlanishi mumkin.

204^33. Elektron tender oʻtkazilganda ishtirokchilar tender takliflarini elektron konvert koʻrinishida oʻzlarining shaxsiy kabinetlari orqali elektron tenderni oʻtkazish toʻgʻrisidagi eʼlonda koʻrsatilgan muddatdan kechiktirmay taqdim etadilar.

204^34. Ishtirokchining tender taklifini tashkil etuvchi elektron hujjatlar operator tomonidan belgilangan formatlarda taqdim etiladi. Xar bir joylashtirilgan elektron hujjat ishtirokchining elektron raqamli imzosi bilan tasdiqlanadi.

204^35. Tender taklifi bilan birgalikda ishtirokchilar eskizlar, rasmlar, chizmalar, fotosuratlar va boshqa hujjatlarni fayl sifatida joylashtirishlari mumkin.

Bunda ishtirokchilarning tender takliflari elektron tizimda shablonlarga muvofiq hujjatlarni biriktirish orqali taqdim etiladi. Ishtirokchi tomonidan koʻrsatilgan maʼlumotlar biriktirilgan hujjatlardagi maʼlumotlarga mos kelishi kerak.

204^36. Tender takliflarini ochish muddati yetib kelgunga qadar ular elektron tender ishtirokchilari, shu jumladan xarid komissiyasi masʼul kotibi va aʼzolari tomonidan koʻrilishiga yoʻl qoʻyilmaydi, bundan ushbu takliflarni taqdim etgan ishtirokchi mustasno. Mazkur talabning bajarilishiga operator javobgar hisoblanadi.

204^37. Elektron tender ishtirokchisi bitta lotga faqat bitta tender taklifini berishga haqli.

204^38. Elektron tender ishtirokchisi taqdim etilayotgan axborot va hujjatlarning haqiqiyligi va toʻgʻriligi uchun javobgar boʻladi.

204^39. Elektron tender ishtirokchisi tender takliflarini berish muddati tugaguniga qadar berilgan tender taklifini qaytarib olishga yoki unga oʻzgartirishlar kiritishga haqli.

204^40. Joylashtirilgan eʼlonda koʻrsatilgan muddat va vaqtda elektron tizim tender takliflarini qabul qilishni toʻxtatadi.

204^41. Tender takliflari tender hujjatlarida koʻrsatilgan muddatda oʻz kuchida qoladi.

204^42. Elektron tender ishtirokchisi tender hujjatlaridagi talablarni tushuntirish talabi bilan buyurtmachiga ochiq elektron chat orqali tender takliflarini berish muddati tugaydigan sanadan kamida ikki kun oldin soʻrov yuborishga haqli.

204^43. Buyurtmachi soʻrov kelib tushgan sanadan eʼtiboran ikki kun ichida ushbu soʻrovga ochiq elektron chat orqali tushuntirish yuborishi shart.

204^44. Buyurtmachi elektron tender oʻtkazish tartib-taomiliga nisbatan ishtirokchilar tomonidan tender takliflarining taʼminlanishi zarurligi tarzida talab belgilagan taqdirda, tender takliflari yuborilguniga qadar ishtirokchi taʼminotning maqbulligini tasdiqlash toʻgʻrisida ochiq elektron chat orqali soʻrov yuborishga haqli. Buyurtmachi bunday soʻrovga darhol javob beradi.

204^45. Elektron tenderda quyidagi mezonlarga muvofiq boʻlgan ishtirokchilar qatnasha oladi:

shartnomani bajarish uchun zarur texnikaviy, moliyaviy, moddiy, kadrlar resurslarining hamda boshqa resurslarning mavjudligi;

shartnoma tuzish uchun qonuniy huquqqa egalik;

soliqlar va yigʻimlar boʻyicha qarzdorlikning mavjud emasligi;

oʻziga nisbatan joriy etilgan bankrotlik tartib-taomillarining mavjud emasligi;

insofsiz ijrochilarning yagona reyestrida qayd etilmaganligi.

204^46. Uch yoki undan ortiq elektron tender ishtirokchilari — mahalliy ishlab chiqaruvchilar boʻlgan taqdirda davlat xaridlari buyurtmachining tanloviga koʻra mahalliy ishlab chiqaruvchilar oʻrtasida amalga oshirilishi mumkin.

204^47. Elektron tenderda bitta ishtirokchi ishtirok etgan yoki bironta ishtirokchi ishtirok etmagan taqdirda tanlov oʻtkazilmagan deb topiladi. Bunday holatda buyurtmachi tenderni ayni oʻsha shartlarda hamda tovarga (ishga, xizmatga) doir ayni oʻsha mezonlarga va talablarga muvofiq takroran amalga oshirishi shart.

204^48. Elektron tender xarid komissiyasi tomonidan belgilangan muddatda oʻtkazilganda elektron tizim avtomatik ravishda ishtirokchilar tomonidan joylashtirilgan va ularning tender takliflarini tashkil etuvchi elektron hujjatlarni koʻrish imkoniyatini beradi.

Ishtirokchi tomonidan biriktirilgan fayllar uning tender taklifida koʻrsatilgan maʼlumotlariga mos boʻlishi hamda elektron tizimdagi elektron maydonlar toʻldirilishi kerak.

Elektron tizim ishtirokchi taklif etgan narxni boshlangʻich narxga muvofiqligini va elektron maydonlarning toʻldirilganligini hamda biriktirilgan fayllarning mavjudligini tekshiradi. Ishtirokchi tomonidan taklif etilgan narx boshlangʻich narxdan yuqori boʻlsa, shuningdek, toʻldirilmagan maydonlar mavjud boʻlsa yoki biriktirilgan fayllar toʻliq boʻlmasa, elektron tizim rad etish sababini koʻrsatgan holda ishtirokchining tender taklifini rad etadi. Biriktirilgan fayllardagi maʼlumotlarning ishtirokchining tender taklifida koʻrsatilgan maʼlumotlarga muvofiqligini tekshirish xarid komissiyasining masʼul kotibi tomonidan amalga oshiriladi.

204^49. Tender takliflarini baholash quyidagi ketma-ketlikda amalga oshiriladi:

tender taklifining tender hujjatlarida koʻrsatilgan talablarga mos ravishda rasmiylashtirilganligini tekshirish;

ishtirokchining malaka talablarga (tender hujjatlarida nazarda tutilgan boʻlsa) muvofiqligini baholash;

tender taklifining texnik qismini baholash;

tender taklifining narx qismini baholash.

Bunda elektron tizim tender taklifining malaka, texnik va narx qismlarida mavjud boʻlgan maʼlumotlarni tender taklifining oldingi qismi baholanishi yakunlangandan soʻng ketma-ketlik bilan oshkor qilinishini taʼminlaydi.

204^50. Agar tender taklifi Qonunning va tender hujjatlarining talablariga muvofiq kelsa, u tegishli tarzda rasmiylashtirilgan deb topiladi. Tender taklifi tender hujjatlarining talablariga muvofiqligi yoki nomuvofiqligi boʻyicha xarid komissiyasi masʼul kotibining qarori uning asoslangan sabablari bilan xarid komissiyasi tomonidan tasdiqlanishi lozim.

204^51. Ishtirokchining tender taklifi talablarga mos kelmaganligi toʻgʻrisidagi qaror, ushbu qaror qabul qilingan kunda ishtirokchining shaxsiy kabinetiga yuboriladi.

204^52. Elektron tender gʻolibini aniqlash uchun rad etilmagan tender takliflarini baholash tender hujjatlarida belgilangan mezonlar va usul asosida amalga oshiriladi. Buyurtmachi ishtirokchilarning tender takliflarini baholash usulini (eng past narx usulini yoki ball usulini) va mezonlarini ishlab chiqadi va xarid komissiyasiga kelishish uchun kiritadi.

204^53. Tender takliflarini baholash vaqtida xarid komissiyasining masʼul kotibi elektron tender ishtirokchilaridan ularning tender takliflari yuzasidan tushuntirishlar soʻrashga haqli. Mazkur jarayon elektron shaklda oʻtkaziladi.

204^54. Tender taklifining texnik qismini miqdoriy koʻrsatkichlarga asosan baholash, shuningdek taklifning narx qismini baholash elektron tizim tomonidan avtomatik ravishda amalga oshiriladi.

Miqdor koʻrsatkichlariga ega boʻlmagan taklifning texnik qismining mezonlari (ekspert mezonlari) boʻyicha ishtirokchilarning takliflarini baholash va taqqoslash xarid komissiyasi tomonidan ovoz berish orqali amalga oshiriladi.

Tender hujjatlari shablonlarini toʻldirishda miqdoriy (oʻlchov birligini belgilagan holda) va ekspert mezonlarni xarid komissiyasi tasdiqlaydi.

204^55. Miqdor koʻrsatkichlariga asoslangan mezonlarni baholashda:

tender hujjatlarida koʻrsatkichlarning eng kam va eng koʻp qiymatlari belgilanishi mumkin;

miqdor koʻrsatkichlari eng kam va eng koʻp hisobga olinadigan qiymatlari oraligʻida boʻlgan ishtirokchilar uchun ball koeffitsiyenti uning miqdor koʻrsatkichining eng kam va eng koʻp hisobga olinadigan qiymatlarining farqiga boʻlgan nisbatini aniqlash orqali hisoblanadi;

agar maʼlum bir mezon boʻyicha ishtirokchining miqdor koʻrsatkichi tender hujjatlarida belgilangan shartlarga muvofiq eng kam hisobga olinadigan qiymatidan kam boʻlsa, ishtirokchiga eng kam ball qoʻyiladi;

agar maʼlum bir mezon boʻyicha ishtirokchining miqdor koʻrsatkichi eng koʻp hisobga olinadigan qiymatidan yuqori boʻlsa, uning koʻrsatkichi eng koʻp hisobga olinadigan qiymatidan qay darajada yuqoriligidan qatʼi nazar unga ushbu mezon boʻyicha eng yuqori ball beriladi;

miqdoriy yoki ekspert mezonini baholash elektron tizim tomonidan ballni ushbu mezonning hisobga olinadigan qiymatiga koʻpaytirish orqali avtomatik ravishda amalga oshiriladi.

204^56. Xarid qilinayotgan tovarning (ishning, xizmatning) oʻziga xos xossalari va xususiyatlaridan kelib chiqib, xarid komissiyasi ishtirokchilarga shartnomani bajarish uchun zarur professional va texnik malaka maʼlumotlariga, kasbiy va texnik kompetensiyaga, moliyaviy resurslarga, jihozlarga va boshqa moddiy imkoniyatlarga, boshqaruv malakaga, ishonchliligiga, tajribaga va obroʻga, shuningdek inson resurslariga ega ekanligiga ishonch hosil qilish uchun qoʻshimcha mezon va talablarni belgilash huquqiga ega.

Bunda ishtirokchilarni kamsitishga olib kelishi mumkin boʻlgan mezonlarni, talablarni va tartib-taomillarni qoʻllashga yoʻl qoʻyilmaydi.

204^57. Tender hujjatlarida elektron tender ishtirokchisining malaka talablariga mos kelishini tasdiqlovchi hujjatlarning elektron tizimga biriktirilishi nazarda tutilishi mumkin. Buyurtmachi tender hujjatlarida nazarda tutilmagan mezonlar boʻyicha ishtirokchining malakasini baholashga yoki tender hujjatlarida nazarda tutilmagan hujjatlarni taqdim etilishini talab qilishga haqli emas.

204^58. Tender hujjatlarida belgilangan shartlardan kelib chiqib elektron tizim avtomatik ravishda:

tender taklifining texnik va narx qisimlarini baholashni hisobga olgan holda eng yuqori bal toʻplagan ishtirokchini (bal usulidan foydalanganda). Ikki yoki undan ortiq ishtirokchilar bir xil ball toʻplagan boʻlsa, tender taklifini barchadan oldin joylashtirgan ishtirokchi gʻolib deb topiladi;

tender takliflarining texnik qismini baholash natijalariga koʻra elektron tenderda ishtirok etishni davom ettirishga ruxsat berilgan ishtirokchilar orasidan eng past narxni taklif etgan ishtirokchini (eng past narx usulidan foydalanganda) gʻolib sifatida aniqlaydi.

Zaxira ijrochisini aniqlash mazkur bandda belgilangan tartibda amalga oshiriladi.

204^59. Xarid komissiyasining qarorlari uning aʼzolari umumiy sonining koʻpchilik ovozi bilan qabul qilinadi.

204^60. Tender takliflarini koʻrib chiqish natijalariga koʻra xarid komissiyasining masʼul kotibi elektron tizimdagi mavjud shablonlar asosida xarid komissiya yigʻilishining elektron bayonnomalarini shakllantiradi hamda tasdiqlash uchun xarid komissiyasi aʼzolariga yoʻllaydi.

Xarid komissiyasi aʼzolari yigʻilishining elektron bayonnomalarini elektron raqamli imzolaridan foydalangan holda tasdiqlaydi. Elektron bayonnomadan koʻchirma portalda avtomatik ravishda eʼlon qilinadi.

204^61. Tender takliflarini koʻrib chiqish va baholash bayonnomasida quyidagi axborot boʻlishi kerak:

tender takliflari koʻrib chiqiladigan hamda baholanadigan sana va vaqt toʻgʻrisida;

hozir boʻlgan xarid komissiyasi aʼzolarining va elektron tender ishtirokchilari vakolatli vakillarining tarkibi haqida;

tender takliflari koʻrib chiqilgan elektron tender ishtirokchilari toʻgʻrisida;

tender takliflari ularni rad etishning aniq sabablari koʻrsatilgan holda rad etilgan elektron tender ishtirokchilari haqida;

elektron tender gʻolibi toʻgʻrisida qabul qilingan qaror haqida;

elektron tender gʻolibining nomi (yuridik shaxs uchun), familiyasi, ismi, otasining ismi (jismoniy shaxs uchun), turgan joyi (pochta manzili).

204^62. Elektron tenderning istalgan ishtirokchisi tender takliflarini koʻrib chiqish va baholash bayonnomasi eʼlon qilinganidan soʻng buyurtmachiga elektron tender natijalari boʻyicha tushuntirishlarni taqdim etish toʻgʻrisida soʻrov yuborishga haqli.

204^63. Buyurtmachi bunday soʻrov kelib tushgan sanadan eʼtiboran uch ish kuni ichida elektron tender ishtirokchisiga tegishli tushuntirishlarni taqdim etishi shart.

204^64. Elektron tender oʻtkazish natijalariga koʻra shartnoma tuzish mazkur Nizomning 4-bobi 7-paragrafiga muvofiq tartibga solinadi. Bunda shartnoma elektron hujjat shaklida tuziladi, tomonlarning elektron raqamli imzolari bilan tasdiqlanadi va operator tomonidan shartnomalar reyestriga kiritiladi.

205. Qonunning 67-moddasi ikkinchi qismiga asosan yagona yetkazib beruvchi bilan davlat xaridlari quyidagi alohida hollarda amalga oshiriladi:

bozorda muqobillari boʻlmagan va faqat yagona yetkazib beruvchidan xarid qilish mumkin boʻlgan texnik jihatdan murakkab tovarlarning (ishlarning, xizmatlarning) davlat xaridi;

madaniy qimmatliklarni olish;

Oʻzbekiston Respublikasi Prezidentining farmonlari, qarorlari va farmoyishlari yoki Oʻzbekiston Respublikasi Vazirlar Mahkamasining qarorlari asosidagi davlat xaridlari;

tabiiy monopoliya subyekti tovarlarining (ishlarining, xizmatlarining) davlat xaridi;

oʻz vakolatlariga muvofiq faqat davlat hokimiyati va boshqaruvi organlari yoki ularning tasarrufidagi davlat muassasalari va tashkilotlari tomonidan bajarilishi mumkin boʻlgan ishlarga yoki koʻrsatilishi mumkin boʻlgan xizmatlarga ehtiyoj paydo boʻlishi;

tovarlarning (ishlarning, xizmatlarning) Oʻzbekiston Respublikasi Vazirlar Mahkamasi tomonidan belgilanadigan tariflar boʻyicha davlat xaridi.

Vakolatli organ tomonidan Oʻzbekiston Respublikasi Vazirlar Mahkamasi bilan birgalikda yagona yetkazib beruvchi bilan davlat xaridlarini amalga oshirishning boshqa hollari ham belgilanishi mumkin.

206. Yagona yetkazib beruvchilardan xaridni amalga oshirish uchun buyurtmachilar yagona yetkazib beruvchilar reyestridan (bundan buyon matnda Reyestr deb yuritiladi) foydalanadi.

207. Yagona yetkazib beruvchidan tovar (ish, xizmat) olish zarur boʻlgan taqdirda, u va buyurtmachi oʻrtasida portalda roʻyxatga olinishi lozim boʻlgan toʻgʻridan toʻgʻri shartnoma tuziladi.

208. Toʻgʻridan-toʻgʻri shartnoma qonunchilik hujjatlari bilan belgilangan tartibda yozma shaklda tuziladi va unda quyidagi maʼlumotlar boʻlishi kerak:

shartnoma predmeti;

tovarlar (ishlar, xizmatlar) soni, sifati, assortimenti;

yetkazib beriladigan tovarlar (ishlar, xizmatlar) narxi;

tovarlarni yetkazib berish, ishlarni bajarish va xizmatlarni koʻrsatish muddati;

hisob-kitob tartibi;

tomonlarning majburiyatlari;

shartnomaviy majburiyatlar bajarilmagan yoki lozim darajada bajarilmaganligi uchun tomonlarning javobgarligi;

nizolarni hal etish tartibi;

tomonlarning rekvizitlari;

shartnoma tuzilgan sana va joy;

xaridlar toʻgʻrisidagi shartnomalar uchun qonunchilik hujjatlari bilan belgilangan yoki tomonlardan birining arizasiga muvofiq kelishuvga erishilishi lozim boʻlgan boshqa muhim shartlar.

209. Yagona yetkazib beruvchi bilan amalga oshirilgan xarid natijasida tuzilgan shartnomalar toʻgʻrisidagi maʼlumot, shartnoma tuzilgan kundan uch kunlik muddatdan kechiktirmasdan portalga joylashtirilishi lozim.

210. Reyestr, qogʻoz va elektron shaklda yagona yetkazib beruvchilar va ularning davlat xaridlari uchun ruxsat etilgan tovarlari (ishlari, xizmatlari) haqidagi maʼlumotlarni oʻz ichiga oladigan axborot resursi hisoblanib, unda yagona yetkazib beruvchi haqidagi maʼlumotlar yigʻiladi, saqlanadi, qayta ishlanadi.

211. Reyestrda kontragent mavjud boʻlmasa, buyurtmachi toʻgʻridan toʻgʻri shartnomani tuzishga haqli emas.

212. Reyestrni yuritish operator tomonidan vakolatli organ bilan kelishilgan holda axborot resursiga yagona yetkazib beruvchilar haqidagi maʼlumotlarni kiritish, ushbu maʼlumotlarni yangilash, yagona buyurtmachi haqidagi maʼlumotlari reyestrdan chiqarish yoʻli bilan amalga oshiriladi.

213. Reyestr operator tomonidan portalga joylashtiriladi va undan hamma erkin foydalanishi mumkin.

214. Reyestrga yagona yetkazib beruvchilar haqidagi maʼlumotlarni kiritish uchun operator quyidagi maʼlumotlardan foydalanadi:

tabiiy monopoliya subyektlarining davlat reyestridan;

vakolat doirasida faqat shu organlar yoki ularning tasarrufidagi davlat muassasalari va tashkilotlari tomonidan bajariladigan ishlar yoki xizmatlarni koʻrsatadigan davlat hokimiyati va boshqaruvi organlari haqidagi maʼlumotlar;

tariflari Oʻzbekiston Respublikasi Hukumati tomonidan belgilanadigan tovarlar (ishlar, xizmatlarning) tariflari haqida maʼlumotlar;

vakolatli organ tomonidan taqdim etilgan maʼlumotlar.

215. Operator yagona yetkazib beruvchilar haqida vakolatli organ tomonidan yuborilgan hamda mazkur Nizom 217-bandi 2 — 4-xatboshilaridagi kelishilgan maʼlumotlarni bir ish kuni mobaynida Reyestrga kiritadi.

216. Vakolatli organ operatorga Reyestrga yagona yetkazib beruvchilar sifatida kiritish uchun yuridik va jismoniy shaxslar toʻgʻrisidagi maʼlumotlarni taqdim etib boradi.

217. Vakolatli organ tahlil oʻtkazish va tegishli maʼlumotlarni yigʻish orqali quyidagilarni aniqlaydi:

bozorda muqobillari boʻlmagan texnik jihatdan murakkab va noyob tovarlarni (ishlarni, xizmatlarni) ishlab chiqaruvchi (yetkazib beruvchi) xoʻjalik yurituvchi subyektlarni;

tegishli bozorda muqobillari boʻlmagan tovarlarni (ishlarni, xizmatlarni) ishlab chiqaruvchi (yetkazib beruvchi) Tovar yoki moliya bozorida ustun mavqeni egallab turgan xoʻjalik yurituvchi subyektlarning davlat reyestriga kiritilgan monopolist-korxonalarni;

tarixiy, badiiy yoki boshqa madaniy ahamiyatga ega boʻlgan madaniy qimmatliklarning egalarini, shuningdek, ushbu qimmatliklarni davlatning muzey, axborot-kutubxona, arxiv fondlarini, kino fondlarini, fotosuratlar fondlarini va shunga oʻxshash fondlarni toʻldirish uchun zarurligini.

218. Mazkur Nizomning 217-bandida koʻrsatib oʻtilgan shaxslar Reyestrga yagona yetkazib beruvchi sifatida kiritish haqidagi ariza bilan vakolatli organga murojaat etishlari mumkin.

219. Reyestrga yagona yetkazib beruvchi sifatida kiritish haqidagi arizada quyidagi maʼlumotlar koʻrsatiladi: