Naqd pul mablag‘larini bank aylanmasiga jalb etish, aholining bo‘sh pul mablag‘larini mintaqaviy ijtimoiy dasturlarni amalga oshirish uchun qo‘shimcha ravishda jamlash, pul-buyum lotereyalari o‘tkazishni faollashtirish va ularni tashkil etishning normativ-huquqiy bazasini takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Kapital bozorini rivojlantirish agentligiga pul-buyum lotereyalari tashkil etish faoliyatini tartibga solish funksiyasi yuklansin.

2. O‘zbekiston Respublikasi Xalq bankiga pul-buyum lotereyalarini tashkil etish va o‘tkazish huquqi berilsin.

Belgilab qo‘yilsinki, Xalq banki tomonidan pul-buyum lotereyalarini o‘tkazishni tashkil etishdan olinadigan daromadlar aholining bo‘sh mablag‘larini omonatlarga jalb etish ishlarini faollashtirishga maqsadli yo‘naltirilgan holda uning tasarrufida qoladi.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari huzurida mintaqaviy lotereyalarni tashkil etish bo‘yicha ixtisoslashtirilgan xo‘jalik hisobidagi tuzilmalar tashkil qilish maqsadga muvofiq deb hisoblansin, ularga quyidagi asosiy vazifalar yuklansin:

mintaqaviy lotereyalar har xil turlarini tashkil etish va o‘tkazish;

xayriya tashkilotlari va jamg‘armalari tomonidan tashkil etiladigan lotereyalar o‘tkazishda qatnashish;

lotereyalarni o‘tkazishdan olinadigan daromadlarni mintaqalarda sog‘lom avlodni tarbiyalash, jismoniy tarbiya va sportni rivojlantirish, aholi manzilgohlarini obodonlashtirish va ularning infratuzilmasini takomillashtirish, boshqa ijtimoiy dasturlarni ro‘yobga chiqarish chora-tadbirlarini amalga oshirish uchun qo‘shimcha manba sifatida jamlash.

4. Lotereyalar tashkil etish va o‘tkazish tartibi to‘g‘risidagi Nizom ilovaga muvofiq tasdiqlansin.

7. Belgilab qo‘yilsinki:

O‘zbekiston Respublikasi Kapital bozorini rivojlantirish agentligi tomonidan berilgan litsenziyaga muvofiq lotereyalar tashkil etish faoliyatini amalga oshiruvchi yuridik shaxslar mazkur faoliyatdan olingan yalpi tushumni alohida hisobga oladilar;

8. O‘zbekiston Respublikasi Vazirlar Mahkamasining “O‘zbekiston Respublikasi hududida lotereya o‘yinlari o‘tkazish tartibini takomillashtirish to‘g‘risida” 1997-yil 19-sentabrdagi 444-son qarori (O‘zbekiston Respublikasi QT, 1997-y., 9-son, 31-modda) o‘z kuchini yo‘qotgan deb hisoblansin.

9. O‘zbekiston Respublikasi Adliya vazirligi Moliya vazirligi va Davlat soliq qo‘mitasi bilan birgalikda bir oy muddatda Vazirlar Mahkamasiga qonun hujjatlariga mazkur qarordan kelib chiquvchi o‘zgartirish va qo‘shimchalar to‘g‘risida takliflar kiritsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.

1. Mazkur Nizom lotereya tashkil etish va o‘tkazish tartibini belgilaydi.

2. Mazkur Nizom maqsadlari uchun quyidagi tushunchalardan foydalaniladi:

lotereya (keyingi o‘rinlarda matnda o‘yin deb yuritiladi) — yuridik va jismoniy shaxslarning pul mablag‘larini ixtiyoriylik asosida o‘yin biletlarini tarqatish yo‘li bilan jalb qilishni nazarda tutuvchi tavakkalchilikka asoslangan o‘yin, ular bo‘yicha tushgan mablag‘larning bir qismi o‘yin qatnashchilariga buyum yoki boshqa yutuqlar holida o‘yin (tiraj) natijalariga ko‘ra to‘lanadi;

o‘yin bileti — o‘yin qatnashchisi o‘yin qiymatini to‘lagan holda o‘yin tashkilotchisi bilan shartnomaviy munosabatlarga kirishganligi va o‘yinni o‘tkazish shartlariga muvofiq o‘yinda qatnashishidan dalolat beruvchi maxsus blanka (kartochka, kupon, kvitansiya, jeton yoki boshqa xildagi axborot manbai);

o‘yin (tiraj) — yutuqlarning o‘yin qatnashchilari o‘rtasida tasodifiy taqsimlanishi. Lotereya biletining har bittasiga o‘yin shartlarida nazarda tutilgan yutuqlarni olishning teng imkoniyati (teng ehtimolligi) o‘yinning asosiy prinsipi hisoblanadi. O‘yinlarning ushbu prinsiplar buzilgan holda o‘tkazilishi taqiqlanadi;

tiraj jihozlari — o‘yin (tiraj)larni o‘tkazishda foydalaniladigan hamda litsenziya talablarining va ushbu jihozlar turiga litsenziyalovchi organ tomonidan belgilanadigan shartlarning bajarilishini ta’minlovchi maxsus jihozlar (mexanik, elektron yoki boshqa texnika jihozlari);

o‘yin tashkilotchisi (yoki muassis) — lotereyalar tashkil etish bo‘yicha faoliyat bilan shug‘ullanish huquqini beruvchi litsenziyaga ega bo‘lgan hamda o‘yinlarni tashkil etish va o‘tkazish bo‘yicha tadbirlarning butun kompleksini o‘tkazishni tashkil qiluvchi va mablag‘ bilan ta’minlovchi yuridik shaxs — O‘zbekiston Respublikasi rezidenti;

o‘yin qatnashchisi — o‘yin qiymatini to‘lagan, o‘yin tashkilotchisi bilan shartnomaviy munosabatlarga kirishgan va o‘yinda uni o‘tkazish shartlariga muvofiq qatnashuvchi yuridik yoki jismoniy shaxs;

litsenziyalovchi organ — lotereyalarni tashkil etish bo‘yicha faoliyatni litsenziyalashni amalga oshiruvchi maxsus vakolatli organ;

o‘yinni o‘tkazish shartlari (keyingi o‘rinlarda Shartlar deb yuritiladi) — litsenziyalovchi organ tomonidan tasdiqlanadigan, o‘yinni o‘tkazish shartlari va tartibini belgilaydigan, o‘yin tashkilotchisi, qatnashchilari va litsenziyalovchi organ o‘rtasidagi munosabatlarni tartibga soluvchi hujjat;

yutuqlar (mukofotlar) fondi — o‘yinlarni o‘tkazish Shartlarida litsenziyalovchi organ tomonidan tasdiqlangan o‘yin qoidalariga muvofiq yutuqlarni to‘lash uchun mo‘ljallangan pul mablag‘lari summasi yoki pul ifodasidagi mol-mulklar.

3. O‘yinlar o‘yinlarni o‘tkazish bo‘yicha tadbirlarning butun kompleksini tashkil etuvchi va mablag‘ bilan ta’minlovchi bir yoki bir nechta tashkilotchilar tomonidan o‘tkazilishi mumkin.

4. Faoliyatining asosiy turi o‘yinlar o‘tkazish hisoblanmaydigan yuridik shaxs tashkiliy qo‘mita tashkil etishi shart, unga o‘yinlarni tashkil etish va o‘tkazish bo‘yicha tadbirlarning butun kompleksini amalga oshirish yuklanadi.

5. O‘yinlarni o‘tkazish quyidagi shakllarda amalga oshirilishi mumkin:

a) tiraj lotereyalari, bunda tartib raqamlari qo‘yilgan (zarurat bo‘lganda, seriyalar va razryadlarga bo‘lingan), ular bo‘yicha oldindan belgilangan vaqtda yutuqlar o‘yini tashkil qilinadigan lotereya biletlari chiqariladi. Bunda o‘yin biletlari soni, bitta o‘yin biletining qiymati, tirajlarni o‘tkazish vaqti, pul, buyum yoki boshqa yutuqlar miqdori va soni lotereyalar chiqarilgungacha belgilanadi;

b) bir lahzali lotereyalar, bunda lotereya biletlari ularni buzmasdan yutuq chiqqan o‘yin biletlarini aniqlashni to‘liq istisno qiluvchi yopiq holda yutuqlar oldindan belgilangan holda chiqariladi. Qatnashish natijalari o‘yin bileti sotib olingandan va u ochilgandan (himoya qatlamini o‘chirish, o‘yin biletining bir qismini kesish yoki qirqib olish) keyin darhol aniqlanadi;

v) passiv va aktiv lotereyalarga bo‘linadigan sonli lotereyalar. Passiv sonli lotereyada qatnashishni xohlovchi shaxs sonlar, belgilar yoki boshqa qaydlar kombinatsiyasi oldindan ko‘rsatilgan o‘yin biletini belgilangan qiymati bo‘yicha sotib oladi. Aktiv sonli lotereyada qatnashishni xohlovchi shaxs maxsus blankada yoki boshqa yo‘l bilan yo‘l qo‘yiladigan natijalar yig‘indisidan tirajning mumkin bo‘lgan natijasini tanlaydi, u o‘yin tashkilotchisi tomonidan tanlangan variantlar ro‘yxatdan o‘tkazilgandan va variantlarga muvofiq keluvchi tirajda qatnashishning qiymati tegishli variant bo‘yicha to‘langandan keyin lotereya qatnashchisiga aylanadi.

Sonli lotereyalar tiraji sonlar, belgilar, boshqa qaydlarni yoki ularning kombinatsiyalarini tasodifiy tanlash yo‘li bilan, shuningdek Shartlarda nazarda tutilgan u yoki bu voqealar natijasida amalga oshiriladi. Sonli lotereyalar tirajining televideniye orqali to‘g‘ridan-to‘g‘ri efirda translyatsiya qilmasdan o‘tkazilishiga yo‘l qo‘yilmaydi.

Sonli lotereyalar bo‘yicha yutuqli biletlar, shuningdek tegishli yutuqlar miqdori tiraj natijalarining o‘yin biletlarida belgilangan natijalarga to‘liq yoki qisman mos tushishiga qarab aniqlanadi.

6. O‘yinlarni o‘tkazish tartiboti quyidagilarni o‘z ichiga oladi:

a) tashkilotchi (yoki tashkilotchilar) tomonidan moliyaviy majburiyatlar hajmlarini taqsimlagan holda o‘yinni o‘tkazish to‘g‘risida qarorlar qabul qilish;

b) zarur hujjatlarni tayyorlash va tashkilotchi (yoki tashkilotchilar) tomonidan Shartlarni tasdiqlash;

v) tayyorlovchi korxonalar bilan o‘yin biletlari tayyorlash yuzasidan shartnomalar tuzish va ularni ekspertizadan o‘tkazish, shuningdek tayyorlovchi tashkilotlar bilan, savdo yoki boshqa tashkilotlar bilan Shartlarga muvofiq buyumlar (yoki pul bo‘lmagan) yutuqlar sifatida nazarda tutilgan tovarlarni yetkazib berish (xizmatlar ko‘rsatish) yuzasidan shartnomalar tuzish;

g) faoliyatning litsenziyalanadigan turi bilan shug‘ullanish huquqiga maxsus ruxsatnoma (litsenziya) olish (o‘yinni birinchi marta o‘tkazayotgan tashkilotchilarga litsenziya Shartlarni tasdiqlash bilan bir vaqtda beriladi);

d) litsenziyalovchi organda Shartlarni tasdiqlash;

e) o‘yin biletlarini ishlab chiqarish va tarqatish;

j) lotereyalar tirajlarini va ularning natijalarini e’lon qilish (agar bu Shartlarda nazarda tutilgan bo‘lsa);

z) yutuqlarni berish;

i) litsenziyalovchi organga har choraklik hisobotlarni, shuningdek o‘yinlar tugagach ularni o‘tkazish natijalari to‘g‘risida to‘liq hisobot taqdim etish.

7. O‘yin biletlarida quyidagi rekvizitlar bo‘lishi kerak:

o‘yin tashkilotchisi (tashkilotchilari)ning nomi, uning (ularning) to‘liq manzili;

o‘yinning nomi;

o‘yinda qatnashish qiymati;

tirajning o‘tkazilish sanasi va vaqti (tirajli lotereyalar uchun);

yutuq fondining miqdori (tirajli va lahzali lotereyalar uchun — qo‘shimcha ravishda yutuqlarning umumiy soni va miqdorlari);

yutuqlarni to‘lash muddatlari va joyi;

razryadlar, seriyalar, tartib raqamlari va Shartlarda nazarda tutilgan boshqa rekvizitlar.

9. Tashkilotchi tomonidan muayyan o‘yinni o‘tkazishga faqat faoliyatning litsenziyalanadigan turi bilan shug‘ullanish huquqini beruvchi litsenziya va litsenziyalovchi organ tomonidan tasdiqlangan mazkur o‘yinni o‘tkazish Shartlari mavjud bo‘lgandagina yo‘l qo‘yiladi. O‘yinlarni o‘tkazish Shartlarini tasdiqlamasdan o‘yinlar yoki yutuqlar tiraji o‘tkazilishi litsenziyalanadigan faoliyat turini litsenziyasiz amalga oshirishga tenglashtiriladi.

10. Tashkilotchi tomonidan lotereyalarning navbatdagi chiqarishlari (turlari) Shartlarini tasdiqlash uchun taqdim etilgan hujjatlar litsenziyalovchi organ tomonidan faqat tashkilotchi tomonidan o‘tkazilayotgan o‘yinlar natijalari to‘g‘risida har choraklik hisobotlar muntazam taqdim etilgan hamda litsenziya talablari va o‘yinlarni o‘tkazish Shartlari qo‘pol ravishda buzilmagan hollardagina ko‘rib chiqiladi.

11. O‘yinlarni o‘tkazish Shartlarini tasdiqlash uchun tashkilotchi tomonidan litsenziyalovchi organga quyidagi hujjatlar taqdim etiladi:

tashkilotchining Shartlarni tasdiqlash to‘g‘risidagi arizasi;

o‘yinni o‘tkazishning tashkilotchilarning rahbari imzosi bilan tasdiqlangan ikki nusxadagi Shartlari (u mazkur Nizomga 1-ilovaga muvofiq shakl bo‘yicha ishlab chiqiladi);

o‘yinlar biletining ikki nusxadagi namunasi (maketi);

tashkilotchi (tashkilotchilar)ning o‘yinni o‘tkazish to‘g‘risidagi qarorining tasdiqlangan nusxasi, tashkiliy qo‘mita tarkibi (ushbu Nizomning 4-bandiga muvofiq), tashkiliy qo‘mita a’zolari o‘rtasida vazifalarning taqsimlanishi albatta ko‘rsatilgan holda. Bunda, agar o‘yin bir nechta tashkilotchilar tomonidan o‘tkazilsa, qo‘shimcha ravishda tashkilotchilar o‘rtasidagi ularning moliyaviy va boshqa majburiyati hajmlari taqsimlangan holdagi shartnoma nusxasi taqdim etiladi;

tayyorlovchi korxonalar bilan o‘yin biletlarini tayyorlash va ularning haqiqiyligi bo‘yicha ekspertizasini o‘tkazish yuzasidan shartnomalar nusxalari;

tayyorlovchi korxonalar, savdo yoki boshqa tashkilotlar bilan buyum (yoki boshqa pul bo‘lmagan) yutuqlar sifatida Shartnomalarda nazarda tutilgan tovarlarni yetkazib berish (xizmatlar ko‘rsatish) to‘g‘risidagi (agar zarur bo‘lsa) shartnomalar nusxalari;

boshqa tashkilotlar bilan o‘yin biletlarini tarqatish va ular bo‘yicha yutuqlar berish yuzasidan shartnomalar nusxalari (agar zarur bo‘lsa);

belgilangan to‘lovlar va bojlar to‘langanligi to‘g‘risidagi to‘lov hujjatlari nusxalari;

o‘yinni ta’minlash uchun tashkilotchining o‘z sarmoyasi yetarli bo‘lmaganda moliya institutlarining kafolatnomasi (agar zarur bo‘lsa);

xizmat ko‘rsatuvchi bankning o‘yin tashkilotchisining budjetga va budjetdan tashqari fondlarga majburiy to‘lovlar, banklar kreditlari bo‘yicha, boshqa yuridik va jismoniy shaxslarga to‘lov muddati o‘tkazib yuborilgan qarzi yo‘qligi to‘g‘risidagi ma’lumotnoma;

sonli lotereyalar tiraji o‘tkazilishini to‘g‘ridan-to‘g‘ri efirda translyatsiya qilish yuzasidan televideniye bilan tuzilgan shartnomalar nusxalari.

12. Taqdim etilgan Shartlarni ko‘rib chiqishda litsenziyalovchi organ Shartlarning alohida qoidalari va ko‘rsatkichlarining to‘g‘riligiga o‘z bahosini berishga haqlidir. Baholashda litsenziyalovchi organ chiqarish ko‘rsatkichlari, istalgan asosiy va yordamchi axborot kelishib olinganligini va o‘yin tashkilotchisi o‘z zimmasiga majburiyatlar oladigan summani baholaydi.

13. O‘yin turiga va tashkilotchining moliyaviy ahvoliga ko‘ra, litsenziyalovchi organ tomonidan amaldagi qonun hujjatlariga va normativ hujjatlarga muvofiq o‘yin tashkilotchilariga litsenziya talablari va shartlari, shuningdek tashkilotchilar tomonidan o‘yinlar qatnashchilari oldidagi majburiyatlarning bajarilishini ta’minlovchi o‘yin parametrlari yuzasidan normativlar belgilanishi mumkin.

14. Litsenziyalovchi organ amaldagi qonunchilikka muvofiq rasmiylashtirilgan (ushbu Nizomning 11-bandida ko‘rsatilgan) hujjatlar olingan kundan boshlab o‘ttiz kundan oshmaydigan muddatda Shartlarni tasdiqlash yoki tasdiqlashni rad etish to‘g‘risida qaror qabul qiladi.

Tasdiqlangan Shartlarga o‘zgartirish va qo‘shimchalar faqat litsenziyalovchi organning ruxsati bilan kiritilishi mumkin.

Shartlarga qo‘shimchalar va o‘zgartirishlarni tasdiqlash uchun tashkilotchi litsenziyalovchi organga quyidagi hujjatlarni taqdim etadi:

shartlarga qo‘shimchalar va o‘zgartirishlar kiritish to‘g‘risida ariza;

o‘yinlar tashkilotchisi (yoki tashkilotchilari)ning Shartlarga o‘zgartirishlar va qo‘shimchalar kiritish to‘g‘risidagi qarori;

qo‘shimchalar va o‘zgartirishlar kiritish zarurligining asoslanganligi;

Shartlarga o‘yinning barcha tashkilotchilari tomonidan kelishilgan va tasdiqlangan o‘zgartirishlar va qo‘shimchalar, ikki nusxada;

o‘yin biletlarining namunalari (maketlari), ikki nusxada (agar qo‘shimchalar va o‘zgartirishlar o‘yin biletlariga kiritilsa);

belgilangan to‘lovlarning to‘langanligi to‘g‘risidagi to‘lov hujjati nusxasi.

15. Tiraj lotereyalari bo‘yicha Shartlarga o‘zgartirishlar va qo‘shimchalar faqat tiraj o‘tkazilgungacha kiritilishi mumkin. Bunda tirajni o‘tkazish muddatlarining o‘zgartirilishiga yo‘l qo‘yilmaydi.

16. Litsenziyalovchi organ tomonidan tasdiqlangan Shartlarga o‘yinlarni o‘tkazishning qatnashchilarga nisbatan shartlarini yomonlashtiruvchi o‘zgartirishlar va qo‘shimchalarning (tirajni o‘tkazishning tasdiqlangan yoki e’lon qilingan muddatlari, tiraj yutuqlarining tasdiqlangan soni hamda ro‘yxati va boshqalar) kiritilishiga yo‘l qo‘yilmaydi.

17. O‘yinning uning konsepsiyasi va texnologiyasini o‘zgartiruvchi shartlari o‘zgartirilgan taqdirda bunday o‘yinni o‘tkazish Shartlari yangi shartlar sifatida tasdiqlanishi kerak.

18. Shartlarni yoki ularga o‘zgartirishlar va qo‘shimchalarni tasdiqlashni rad etish uchun quyidagilar asos bo‘lishi mumkin:

zarur darajada rasmiylashtirilmagan hujjatlarni taqdim etish;

ma’lumotlarning to‘liq emasligi va taqdim etilgan hujjatlar mazmunining amaldagi qonunchilik va ushbu Nizom talablariga muvofiq emasligi;

tashkilotchining litsenziya talablariga va amaldagi qonunchilikda belgilangan shartlarga muvofiq emasligi;

tashkilotchi tomonidan o‘yinni o‘tkazish bo‘yicha mualliflik ishlanmalari yuzasidan boshqa tashkilotchilar huquqlarining buzilishi;

o‘yin nomining, uning shiorining, o‘yin bileti maketining ilgari ro‘yxatdan o‘tkazilgan o‘yinga o‘xshashligi.

19. Shartlarni tasdiqlash uchun hujjatlarni ko‘rib chiqish bilan bog‘liq xarajatlarni qoplash uchun o‘yin tashkilotchisi o‘tkaziladigan o‘yin hajmining 0,1 foizi miqdorida yig‘im to‘laydi. Yig‘im litsenziyalovchi organning hisob raqamiga to‘lanadi. Ilgari tasdiqlangan Shartlarga o‘zgartirishlar va qo‘shimchalar kiritilganda (chiqariladigan lotereyalar umumiy summasining o‘zgartirilishi va to‘ldirilishidan tashqari, bunda yig‘im to‘liq miqdorda to‘lanadi) yig‘im ushbu Shartlarni tasdiqlash uchun to‘langan summaning yarmi miqdorida to‘lanadi.

20. Tashkilotchining mansabdor shaxslari Shartlardagi mavjud ma’lumotlarning to‘g‘riligi, shuningdek o‘yinni o‘tkazish shartlariga rioya qilinishi uchun javob beradilar.

21. Litsenziyalovchi organ o‘yinni o‘tkazishning qonunchilikda va ushbu Nizomda belgilangan shartlari va tartibiga rioya qilinishi ustidan nazoratni amalga oshiradi.

22. Litsenziyalovchi organ o‘yinning o‘tkazilishini to‘xtatib qo‘yish yoki muddatidan oldin to‘xtatish huquqiga ega. Quyidagilar o‘yinlarning o‘tkazilishini to‘xtatib qo‘yish yoki to‘xtatish uchun asos bo‘lishi mumkin:

taqdim etilgan hujjatlardagi ma’lumotlarning haqiqiy emasligi;

litsenziyada belgilangan faoliyat turiga rioya qilinmaganlik;

o‘yin tashkilotchisining litsenziya talablari va shartlariga nomuvofiqligi;

o‘yinni o‘tkazishning tasdiqlangan Shartlari va tartibining buzilishi;

tashkilotchining o‘yin qatnashchilari oldidagi majburiyatlari bajarilmasligiga olib keluvchi moliyaviy ahvolining yomonlashishi;

litsenziyalovchi organ ko‘rsatmalarining bajarilmasligi.

O‘yinlarni o‘tkazish amaldagi qonunchilikda nazarda tutilgan boshqa asoslar bo‘yicha ham to‘xtatib qo‘yilishi yoki to‘xtatilishi mumkin.

23. O‘yinni o‘tkazishni to‘xtatib qo‘yish yoki to‘xtatish to‘g‘risidagi qaror yuzasidan tashkilotchi iqtisodiy sudga shikoyat qilishi mumkin.

24. O‘yin biletlari qimmatli qog‘ozlar tayyorlash uchun litsenziyaga ega bo‘lgan korxonalarda tayyorlanishi hamda qalbakilashtirishdan kamida olti darajali himoyaga ega bo‘lishi kerak. Lotereyalarning aktiv turlarini biletlarini qatnashchi tomonidan tanlangan tiraj natijalarini ro‘yxatdan o‘tkazgan holda shakllantirishni nazarda tutuvchi o‘yinlarni o‘tkazishda o‘yin biletlari blankalari himoyalashning kam darajalari bilan, o‘yinlar biletlarini ro‘yxatdan o‘tkazishda himoyalashning zarur darajasiga biletlarda maxsus kodlarni yoki belgilarni ko‘rsatish yo‘li bilan erishish shartlariga rioya qilgan holda tayyorlanishi mumkin. Tayyorlovchi korxonalar tomonidan o‘yinlar biletlarini tayyorlashga faqat tashkilotchida faoliyatning litsenziyalanadigan turi bilan shug‘ullanish huquqini beruvchi litsenziya va litsenziyalovchi organ tomonidan tasdiqlangan Shartlar mavjud bo‘lgan taqdirdagina yo‘l qo‘yiladi.

25. O‘yinlar biletlarini saqlash maxsus jihozlangan binolarda, biletlar saqlanishini ta’minlash bo‘yicha albatta zarur chora-tadbirlar ko‘rilgan holda amalga oshiriladi.

26. O‘yinlar biletlari qayta sanab chiqilmasdan va tayyorlovchi korxonalarga, yetkazib beruvchilarga yoki tashuvchilarga nisbatan e’tirozlar o‘z vaqtida bildirilmasdan qabul qilingan hollarda o‘yin biletlarining yetishmasligi yoki yaroqsizlanganligi yuzasidan moddiy javobgarlik o‘yin biletlarini qabul qilib olishning belgilangan tartibiga amal qilishni ta’minlamagan o‘yin tashkilotchisiga yuklanadi.

27. O‘yin biletlarini tarqatish uchun berish, hisobga olish va hisobot masalalari tashkilotchining vakolatiga kiradi va uning ichki hujjatlari bilan tartibga solinadi.

28. O‘yin biletlari chiqarish summasini va sonini ko‘paytirib yuborishga, shuningdek Shartlarda belgilangan o‘yinda qatnashish qiymatini o‘zgartirishga yo‘l qo‘yilmaydi.

29. O‘yinlar biletlarini tarqatishga, o‘yin bo‘yicha faqat litsenziya olingandan va Shartlar litsenziyalovchi organ tomonidan tasdiqlangandan keyingina yo‘l qo‘yiladi.

30. O‘yinlar biletlarini tarqatish, o‘zining tarqatuvchilar tarmog‘i orqali yoki shartnoma asosida boshqa yuridik va jismoniy shaxslarni jalb etish yo‘li bilan amalga oshiriladi.

31. Aholi o‘rtasida lotereya biletlarini tarqatish, ixtiyoriylik prinsipiga majburiy rioya etilgan holda amalga oshiriladi.

Lotereya biletlarini balog‘atga yetmagan shaxslarga tarqatish taqiqlanadi.

32. O‘yinni o‘tkazish bo‘yicha reklama kompaniyasi Shartlar litsenziyalovchi organ tomonidan tasdiqlangandan keyingina boshlanadi. O‘yinni o‘tkazish bo‘yicha reklama kompaniyasi Shartlar litsenziyalovchi organ tomonidan tasdiqlanmasdan oldin o‘tkazilganda javobgarlik reklama beruvchi zimmasiga yuklanadi.

O‘tkazilishi tugallangan, taqiqlangan yoki to‘xtatib qo‘yilgan o‘yinning reklama kompaniyasi tegishli ravishda to‘xtatib qo‘yilishi yoki to‘xtatilishi kerak.

O‘yin reklamasi uni o‘tkazish shartlarini buzmasligi kerak.

Lotereyalar reklamasida balog‘atga yetmagan shaxslarning reklama qilinayotgan lotereyada qatnashishiga yo‘l qo‘ymaslik to‘g‘risidagi ogohlantirish mavjud bo‘lishi kerak.

33. O‘yinlarni o‘tkazish faqat yutuqli biletlarni tasodifiy tanlab olish jarayoniga inson omilining biron-bir ta’sirini to‘liq istisno qiluvchi texnologiyalar va jihozlarni qo‘llagan holda amalga oshiriladi. Jihozlarning soz holatda bo‘lishi uchun o‘yin tashkilotchisi javob beradi.

34. Tiraj lotereyalari o‘yini litsenziyalovchi organning normativ hujjatlarida belgilangan tartibda o‘tkaziladi. Boshqa o‘yinlar bo‘yicha o‘yinlarni o‘tkazish va o‘yin yakunlarini litsenziyalovchi organga taqdim etish tartibi ushbu o‘yinlarni o‘tkazish Shartlarida belgilanadi.

35. O‘yin televideniye orqali olib ko‘rsatilgan taqdirda tashkilotchilar yutuqlarni aniqlash tartibotini namoyish etgan holda bevosita efirda tirajning o‘zini olib ko‘rsatilishini ta’minlaydilar.

36. Har qaysi o‘yin uchun alohida jihozlar, bezaklar, rekvizitlardan foydalaniladi.

Rekvizitdan (sharlar, bochonkalar komplektlari va boshqalardan) o‘yin mobaynida bir marta foydalaniladi.

37. Quyidagilar o‘yinlar bo‘yicha yutuqlar bo‘lishi mumkin:

pul mablag‘lari;

buyum yutuqlari, bunda yutuq egasi uning qiymatini naqd pul bilan olish huquqiga ega (agar Shartlarda boshqacha tartib nazarda tutilmagan bo‘lsa). Bitta buyum yutug‘ini uning egasi roziligisiz boshqasi bilan almashtirishga yo‘l qo‘yilmaydi;

ko‘char va ko‘chmas mulk tarzidagi yutuqlar;

nomoddiy tusdagi yutuqlarning boshqa turlari, ko‘chmas mulklar, ayrim tovarlar va xizmatlar, turistik sayohatlar, sanatoriy va dam olish uylariga yo‘llanmalar sotib olish bo‘yicha imtiyozlar.

38. O‘yinning Shartlarda ko‘rsatilgan va o‘yin qatnashchilari mablag‘larining taqsimlanmagan qismidan iborat bo‘lgan yutuq fondi o‘yin tashkilotchisining aktivi hisoblanmaydi va uning tomonidan, qatnashchilarga yutuqlarni to‘lash yoki berishdan tashqari, boshqa hech qanday maqsadlarda foydalanilishi mumkin emas.

Yutuq fondi o‘yin tashkilotchisining mulki hisoblanmaydi va undan tashkilotchi majburiyatlari bo‘yicha qarzlar undirib olinishi mumkin emas.

39. O‘yinlarning yutuq (mukofot) fondlari quyidagi miqdorlarda belgilanishi kerak:

tirajli va lahzali lotereyalar uchun — lotereya biletlarini tarqatishdan olingan pul mablag‘lari summasidan qat’i nazar, chiqarilgan lotereyalar hajmining kamida 40 foizi miqdorida;

lotereyalarning boshqa turlari uchun — tarqatilgan lotereya biletlari umumiy summasining kamida 40 foizi miqdorida;

40. Buyum yoki boshqa pul bo‘lmagan yutuqlarni nazarda tutuvchi o‘yinlarni o‘tkazishda tashkilotchilar o‘yinlarni o‘tkazish boshlangungacha ko‘rsatilgan toifadagi yutuqlarni sotib olishga majburdirlar. Alohida hollarda (tirajli lotereyalardan tashqari) o‘yin xususiyatlariga ko‘ra litsenziyalovchi organning ruxsati bilan yutuqlarning bir qismi o‘yin o‘tkazilgandan keyin, lekin o‘yinning o‘tkazilish sanasidan boshlab 15 kundan kechikmay sotib olinishi mumkin. Bunday hollarda tashkilotchilar litsenziyalovchi organga yetkazib berish yuzasidan shartnomalarni va (yoki) o‘yin tashkilotchisi tomonidan o‘z majburiyatlarining o‘z vaqtida bajarilishini tasdiqlovchi boshqa hujjatlarni taqdim etishi shart.

41. Yutuq fondining qarz olingan mablag‘lar hisobiga shakllantirilishiga yo‘l qo‘yilmaydi.

42. Yutuq fondi mablag‘larini saqlash tartibi har xil tirajlar yutuq fondlarining alohida saqlanishini ta’minlashi kerak.

43. O‘yin biletlarini tarqatishdan tushgan mablag‘lar, qonunchilikda belgilangan majburiy to‘lovlar amalga oshirilgandan keyin, birinchi navbatda o‘yinning yutuq fondini shakllantirishga, yutuqlar bo‘yicha to‘lovlarni (buyum yutuqlarini berishni) ta’minlashga yo‘naltiriladi.

Pul shaklidagi yutuq fondini shakllantirish o‘yin biletlarini tarqatishdan olingan mablag‘larning bir qismini kamida yutuq fondi ulushi miqdorida zaxira qilib qo‘yish yo‘li bilan amalga oshiriladi.

44. Talab qilib olinmagan pulsiz shakldagi yutuqlar tashkilotchida yoxud ushbu maqsad uchun shartnoma asosida maxsus jalb etilgan yuridik shaxsda yutuqni to‘lash muddati tugagungacha saqlanadi. Yutuqni to‘lash muddati tugagandan keyin talab qilib olinmagan yutuq fondi ijtimoiy-xayriya maqsadlariga, shu jumladan aniq tarzdagi ijtimoiy dasturlarni qo‘llab-quvvatlashga (bolalar bog‘chalari, maktablar, shifoxonalar, poliklinikalar va shu kabilarga moliyaviy yordam uchun) yo‘naltiriladi, ularning aniq yo‘nalishlari o‘yinni o‘tkazish Shartlarida nazarda tutiladi.

45. O‘yinning tarqatilmagan biletlarini yo‘q qilish litsenziyalovchi organ, jamoatchilik va o‘yin tashkilotchisi vakillaridan iborat bo‘lgan maxsus komissiya tomonidan amalga oshiriladi. Tirajli lotereyalarni o‘tkazishda maxsus komissiya tiraj o‘tkazilishidan kamida besh kun oldin tuziladi.

46. O‘yin biletlari:

tiraj o‘tkaziladigan paytga kelib o‘yin biletlarining bir qismi tarqatilmay qolgan (tirajli va sonli lotereyalarning ayrim turlarida);

o‘yin o‘tkazishni tugallash paytiga kelib biletlarning bir qismi foydalanilmay qolgan;

tashkilotchi tomonidan tayyorlovchidan tayyor biletlarni olishda yoki o‘yinni o‘tkazish jarayonida o‘yin biletlarida o‘yinni Shartlar va litsenziyalovchi organ talablariga muvofiq tegishli tarzda o‘tkazishga xalaqit qiluvchi brak (nuqson) aniqlangan;

o‘yinni o‘tkazish amaldagi qonunchilikka muvofiq muddatidan oldin to‘xtatilgan hollarda yo‘q qilinadi.

47. Tirajli va sonli lotereyalarning ayrim turlarini o‘tkazishda tarqatilmagan o‘yin biletlari komissiya tomonidan yo‘q qilish dalolatnomasi tuzilgan holda tiraj o‘tkazilgunga qadar (o‘yin Shartlarida belgilangan muddatlarda) yo‘q qilinadi. Yo‘q qilish dalolatnomasi yo‘q qilingan biletlarning barcha rekvizitlari albatta ko‘rsatilgan holda to‘rt nusxada tuziladi. Dalolatnomaning bir nusxasi tiraj o‘tkazilgunga qadar majburiy tartibda litsenziyalovchi organga taqdim etiladi, dalolatnomaning ikkinchi nusxasi o‘yin biletlarini yo‘q qilish komissiyasi raisida, uchinchi nusxasi — o‘yin tashkilotchisida qoladi, to‘rtinchi nusxasi litsenziyalovchi organning belgisi bilan tiraj boshlangunga qadar bevosita tiraj komissiyasi raisiga taqdim etiladi, bu tirajni o‘tkazish uchun asos hisoblanadi.

48. Tashkilotchilarga bog‘liq bo‘lmagan ayrim sabablarga ko‘ra tarqatilmagan o‘yin biletlari tirajni o‘tkazish boshlangunga qadar yo‘q qilinmay qolgan hollarda komissiya o‘yin biletlarini muhrlab qo‘yadi va yo‘q qilinadigan o‘yin biletlarining barcha rekvizitlarini, shuningdek ularning yo‘q qilinishiga xalaqit bergan sabablarni ko‘rsatgan holda tegishli dalolatnoma tuzadi. Muhrlash (plombalash), Shartlarda boshqacha hol nazarda tutilmagan bo‘lsa, litsenziyalovchi organ vakili bo‘lgan komissiya a’zosi tomonidan amalga oshiriladi. Dalolatnomaning bir nusxasi tiraj o‘tkazilgunga qadar majburiy tartibda litsenziyalovchi organga taqdim etiladi, dalolatnomaning ikkinchi nusxasi o‘yin biletlarini yo‘q qilish komissiyasi raisida, uchinchi nusxasi — o‘yin tashkilotchisida qoladi, to‘rtinchi nusxasi litsenziyalovchi organning birinchi nusxa olinganligi to‘g‘risidagi belgisi bilan tiraj boshlangunga qadar bevosita tiraj komissiyasi raisiga taqdim etiladi, bu tirajni o‘tkazish uchun asos hisoblanadi.

49. Bir lahzali lotereya biletlari seriyalar (chiqarishlar, razryadlar, turkumlar) bo‘yicha, ularda ishlab chiqarish braki va boshqa nuqsonlar aniqlangan, yutuqlar belgilangan o‘yin chizig‘ining himoya qoplami yoki maxsus tanib olish kodlari zonalari qisman yoki to‘liq buzilgan, lotereya biletlari qalbakilashtirishdan himoya qilish talablariga muvofiq bo‘lmagan, shuningdek lotereya biletlari rekvizitlari Shartlarda tasdiqlangan rekvizitlariga muvofiq bo‘lmagan istisno hollarda, ushbu seriya (chiqarish, razryad, turkum) tarqatilmasdan, yo‘q qilinadi.

50. Bir lahzali lotereyalarning o‘ynalmagan biletlari mazkur Nizomning 46-bandida nazarda tutilgan tartibga o‘xshash tartibda yo‘q qilinadi. Tashkilotchi tomonidan to‘lovga taqdim etilgan yutuq chiqqan biletlarning yo‘q qilinishiga faqat yutuq chiqqan bilet egasi bo‘lgan qatnashchiga yutuq to‘liq to‘langandan keyin yo‘l qo‘yiladi. Bunda mayda yutuq chiqqan o‘yin biletlari ularning to‘planishiga qarab, yutuq to‘langan sanadan boshlab kamida bir oydan keyin yo‘q qilinadi, yirik yutuq chiqqan o‘yin biletlari esa yutuqni to‘lash (berish) sanasidan boshlab da’vo arizasi berish muddatidan oldin yo‘q qilinishi mumkin emas.

51. Boshqa o‘yinlar biletlari o‘yinni o‘tkazishning tasdiqlangan Shartlarida nazarda tutilgan tartibda yo‘q qilinadi.

52. Yutuqlarni to‘lash (berish) tartibi, muddatlari va shartlari litsenziyalovchi organ tomonidan tasdiqlangan Shartlarga muvofiq belgilanadi.

53. Yutuq chiqqan o‘yin biletlarini litsenziyalovchi organga (yoki uning vakolatli vakiliga) taqdim etishning Shartlarda belgilanadigan muddati tiraj o‘tkazilgan yoki o‘yinni o‘tkazish tugagan kundan boshlab uch oydan kam bo‘lmasligi kerak.

Yutuqlarni to‘lash (berish) muddati yutuq chiqqan bilet to‘lovga taqdim etilgan sanadan boshlab uch oydan ortiq bo‘lishi mumkin emas.

Yutuq chiqqan biletlarni to‘lovga taqdim etishning Shartlarda belgilangan muddatlari o‘zgartirilishiga yo‘l qo‘yilmaydi.

54. Qalbakilashtirishning oldini olish maqsadida tashkilotchining yoki litsenziyalovchi organning xohishiga ko‘ra o‘yinning haqiqiyligiga shubha tug‘ilgan har qanday bileti tegishli ekspertizadan o‘tkazilishi mumkin.

55. O‘yinning yutuq chiqqan biletlari ekspertizasi o‘yin tashkilotchisi yoki, zarurat bo‘lganda, tayyorlagan korxona tomonidan yutuq chiqqan bilet to‘lovga taqdim etilgan kundan boshlab bir oydan ortiq bo‘lmagan muddatda amalga oshiriladi.

56. O‘yinlarni o‘tkazishning buxgalteriya hisobi O‘zbekiston Respublikasining buxgalteriya hisobi va hisoboti to‘g‘risidagi qonunchiligida belgilangan tartibda yuritiladi.

57. Tashkilotchi tomonidan har chorakda, hisobot davri tugagandan keyin 30 kundan ortiq bo‘lmagan muddatda litsenziyalovchi organga hisobotlar taqdim etiladi (2-ilova).

O‘yinlarni o‘tkazish Shartlarida, o‘tkazilayotgan o‘yinning xususiyatiga qarab litsenziyalovchi organga tirajlar va o‘yinlarni o‘tkazish natijalari, muayyan razryadlar, seriyalar, chiqarishlar yakunlari to‘g‘risida Shartlarda kelishilgan muddatlarda va shaklda majburiy tartibda qo‘shimcha axborot (oraliq hisobot) taqdim etish tartibi nazarda tutilishi mumkin.

O‘yinni o‘tkazish yakunlari to‘g‘risidagi hisobotni imzolagan mansabdor shaxslar undagi ma’lumotlarning to‘g‘riligi uchun qonunchilikda belgilangan tartibda javob beradilar.

58. Litsenziyalovchi organ istalgan ma’lumotlarni, shu jumladan maxfiy ma’lumotlarni ham (bir lahzali lotereyalar uchun — garovnomani, tarqatilmagan yoki yaroqsiz biletlarni yo‘q qilish, sotilgan biletlar va miqdori, tarqatish uchun berilgan o‘yin biletlari miqdori, yutuqlarni to‘lash (berish), tashkilotchilarning moliyaviy ahvoli va boshqalar), o‘yinni o‘tkazish bilan bog‘liq materiallarni talab qilib olishi, shuningdek biletlarni tarqatish va o‘yinni o‘tkazish joylarida belgilangan tartibda tekshirishlar o‘tkazishi mumkin.

59. Litsenziyalovchi organ amaldagi qonunchilikning va ushbu Nizomning buzilishiga yo‘l qo‘ymaslik maqsadida o‘yinlarni o‘tkazishning borishi ustidan nazoratni ta’minlashga majburdir.

60. Litsenziyalovchi organ o‘yin qatnashchilarining, o‘yinlarni o‘tkazish jarayoni qatnashchilarining amaldagi qonunchilikning yoki o‘yinni o‘tkazishning ushbu Nizomda belgilangan tartibining yoxud litsenziyalovchi organ tomonidan tasdiqlangan Shartlarning o‘yin tashkilotchilari tomonidan buzilishlariga oid shikoyat va arizalarini qabul qiladi.

61. Litsenziyalovchi organ o‘yinni o‘tkazish jarayoni qonunchilik, ushbu Nizom yoki litsenziyalovchi organ tomonidan tasdiqlangan Shartlar buzilgan holda o‘tkazilgan taqdirda o‘yinni o‘tkazish jarayonini to‘xtatishga, litsenziyaning amal qilishini to‘xtatib qo‘yish yoki to‘xtatishga haqlidir.

O‘yinni o‘tkazish jarayoni to‘xtatib qo‘yilgan taqdirda tashkilotchi to‘xtatib qo‘yishga sabab bo‘lgan buzilishlarni 30 kun muddatda bartaraf etishga majburdir, shundan keyin o‘yinni o‘tkazish jarayoni litsenziyalovchi organning maxsus ruxsatnomasiga binoan davom ettirilishi mumkin.

Aks holda litsenziyalovchi organ litsenziyaning amal qilishini to‘xtatib qo‘yish (to‘xtatish) huquqiga ega va tegishli faoliyat to‘xtatiladigan muddatni belgilaydi.

62. Litsenziyaning amal qilishi to‘xtatib qo‘yilgan yoki to‘xtatilgan hollarda litsenziyalovchi organ tashkilotchidagi mavjud sotilmagan biletlarni olib qo‘yishi, litsenziyalovchi organ tomonidan belgilanadigan, sotilgan (shu jumladan boshqa yuridik va jismoniy shaxslarda tarqatishda bo‘lgan) o‘yin biletlari, hamda to‘lovga taqdim etilgan yutuqlar summasidan ortiq bo‘lmagan summadagi pul mablag‘larini so‘zsiz undirib olishi, ularni vakolatli banklarda ochilgan maxsus hisob raqamlariga o‘tkazishi mumkin.

Tashkilotchidan aholi o‘rtasida tarqatilmagan o‘yin biletlarini olib qo‘yish biletlarni qayta sanash va ro‘yxatga olish yo‘li bilan amalga oshiriladi, keyinchalik ular taxlanadi, plombalanadi va saqlash uchun qo‘yiladi.

Tarqatilgan o‘yin biletlari va mablag‘larni qaytarish ularning egalarining litsenziyalovchi organga yoki uning vakolatli vakiliga biletlar taqdim etilgan arizalari asosida amalga oshiriladi. Mablag‘lar litsenziyalovchi organ tomonidan belgilanadigan miqdorlarda va muddatlarda, maxsus hisob raqamida jamlangan summadan kelib chiqqan holda qaytariladi. Bilet egalarining mablag‘larni qaytarish to‘g‘risidagi arizalari fuqarolik qonunchilikda belgilangan da’vo arizasi muddatlari doirasida qabul qilinadi. Da’vo bildirish muddatlari o‘tib ketgan taqdirda talab qilib olinmagan mablag‘lar qoldig‘i respublika budjeti foydasiga undiriladi.

Tashkilotchidan olib qo‘yilgan va xaridorlardan olingan biletlar litsenziyalovchi organ tomonidan belgilangan tartibda, litsenziyalovchi organ rahbari yoki uning topshirig‘iga binoan litsenziyalovchi organning mas’ul xodimi imzolaydigan tegishli dalolatnoma tuzilgan holda yo‘q qilinadi

1. Tashkilotchining yuridik shaxs sifatidagi maqomi, uning ro‘yxatdan o‘tkazilgan to‘liq va qisqartirilgan nomi. Ro‘yxatdan o‘tkazilgan sana va tartib raqami, ro‘yxatdan o‘tkazgan organning nomi.

2. Tashkilotchi joylashgan joy (pochta manzili), bank rekvizitlari, telefoni.

3. O‘yinni tashkil etish to‘g‘risida qaror qabul qilingan sanadagi tashkilotchi rahbarlarining familiyasi, ismi, otasining ismi, egallab turgan lavozimi, telefon raqamlari ko‘rsatilgan holdagi ro‘yxati.

4. Lotereya tashkil etish va o‘tkazishdagi oldingi tajribalar to‘g‘risida qisqacha ma’lumot.

1. Tashkilotchi mol-mulkining qisqacha tavsifi va faoliyatining asosiy turlari.

2. Korxonaning buxgalteriya balansi, oxirgi hisobot sanasidagi foydalar va ko‘rilgan zararlar to‘g‘risidagi hisobot.

3. Tashkilotchida soliqlarga oid va boshqa imtiyozlar mavjudligi to‘g‘risidagi ma’lumotlar.

4. Tashkilotchida hujjatlarni litsenziya beruvchi organga taqdim etish paytidagi soliqlar va budjetdan tashqari jamg‘armalarga majburiy to‘lovlar bo‘yicha muddati o‘tkazib yuborilgan qarzlar mavjudligi to‘g‘risidagi ma’lumotlar.

5. Bank kreditlari bo‘yicha qarzlar to‘g‘risidagi ma’lumotlar, shu jumladan:

bankning qisqa muddatli kreditlari (jumladan, to‘lov muddati o‘tkazib yuborilganlari);

to‘lov muddatlari bo‘yicha taqsimlangan holdagi bankning uzoq muddatli kreditlari (shu jumladan to‘lov muddati o‘tkazib yuborilganlari);

kreditorlik qarzlarining umumiy summasi (shu jumladan to‘lov muddati o‘tkazib yuborilgan qarzlar).

6. Tashkilotchiga oxirgi uch yil mobaynida davlat boshqaruv organlari yoki sud tomonidan solingan ma’muriy va iqtisodiy sanksiyalar to‘g‘risidagi ma’lumotlar. Bunday ma’lumotlarda quyidagilar bo‘lishi kerak:

sanksiya solingan sana;

sanksiya solgan organ;

sanksiya solish sabablari;

sanksiyalarning turi;

sanksiyalar miqdori;

sanksiyalarning o‘yinni tashkil etish to‘g‘risida qaror qabul qilingan paytdagi bajarilishi darajasi.

1. O‘yin to‘g‘risidagi umumiy ma’lumotlar:

o‘yin turi;

o‘yinni o‘tkazish maqsadi;

o‘tkaziladigan o‘yinning umumiy hajmi;

chiqariladigan biletlarning soni, ularning tartib raqamlari (razryadlarga, seriyalarga, tartib raqamlariga taqsimlangan holda va boshqalar);

o‘yinda qatnashish (lotereya bileti) qiymati;

yutuq fondining summasi;

buyum, pul yutuqlari yoki boshqa xil yutuqlarning to‘liq ro‘yxati, ularning qiymati, soni, miqdorlari va summalari bilan birga.

2. O‘yinlarni o‘tkazish qoidalari:

a) Biletlarni tarqatish (mas’ul ijrochilar ko‘rsatilgan holda):

biletlarni tarqatish muddatlari;

o‘yinni o‘tkazish mo‘ljallanayotgan hudud hamda biletlarni sotish shoxobchalarini tashkil etish, joylashtirish, ularning ishini rejalashtirish tartibi;

o‘yin biletlarini tarqatish tartibi (bu tartib naqd pulsiz hisob-kitob bo‘yicha biletlarni sotib olishni xohlovchi tashkilotlarga sotish tartibini, biletlarni aholiga sotish tartibini o‘z ichiga oladi);

biletlarni tarqatuvchilarni tanlash, o‘yin bo‘yicha tushgan tushumlarni saqlash, topshirish va inkassatsiya qilish (banklarga topshirish) tartibi;

xarajatlar smetasini ilova qilgan holda biletlarni tarqatganlik uchun haq to‘lash miqdori va tartibi;

b) O‘yinlarni o‘tkazish (mas’ul ijrochilar ko‘rsatilgan holda):

o‘yinni o‘tkazish muddatlari;

o‘yinlarni o‘tkazish qoidalari (keltirilayotgan qoidalar Nizomning 2-bandiga muvofiqligini tushuntirgan holda);

tirajni o‘tkazish sanasi va joyi. Bir lahzalik lotereya o‘yinlari o‘tkazilgan hollarda lotereya biletlarini sotish muddatlari ko‘rsatiladi;

sotilmay yoki yaroqsiz bo‘lib qolgan biletlarni yo‘q qilish tartibi va muddatlari;

yutuqlar tirajini o‘tkazish tartibi (tirajli lotereyalar uchun — lotereya tiraji litsenziyalovchi organning yo‘riqnomalariga ko‘ra, boshqa lotereyalar uchun — lotereyani o‘tkazish shartlarida keltirilgan tartibga muvofiq o‘tkaziladi;

yutuqlarni olish muddatlari, joyi, shartlari va tartibi.

3. O‘yinlar o‘tkazilishini ta’minlash (mas’ul ijrochilar ko‘rsatilgan holda);

biletlarni tayyorlash va ularni ekspertizadan o‘tkazish shartnomasining asosiy shartlari;

tovarlar va boshqa xil boyliklarni sotib olish tartibi (buyum yoki pul-buyum yutuqlari o‘yinlari o‘tkazishda yutuqlar ro‘yxati o‘yin shartlariga kiritilgan taqdirda);

lotereyalarni tarqatuvchilar bilan namunaviy shartnoma;

hujjatlarni rasmiylashtirish, biletlarni tayyorlash va tarqatish, reklama qilish hamda texnik xizmat ko‘rsatish, o‘yinni o‘tkazish bo‘yicha boshqa tashkiliy-texnik masalalar bilan bog‘liq tadbirlar kompleksini amalga oshiruvchi tashkilotchilar o‘rtasida vazifalarni taqsimlash.

4. Mablag‘lardan foydalanish va hisobot:

biletlarni sotish bilan bog‘liq operatsiyalar bo‘yicha hisob va hisobot tartibi, o‘yin bo‘yicha litsenziyalovchi organga hisobotlar taqdim etish sanasi;

o‘yinni o‘tkazish natijasida olingan daromadni taqsimlash tartibi (uni o‘tkazish bilan bog‘liq barcha xarajatlarni ko‘rsatgan holda);

tegishli asoslash bilan birga muayyan maqsadga qaratilgan, xayriya lotereyalari uchun lotereyalar chiqarish yo‘li bilan jalb qilinadigan mablag‘lardan foydalanish yo‘nalishlari. Agar loyiha birorta ixtisoslashtirilgan tuzilmalarda ekspertizadan o‘tgan bo‘lsa, u holda ushbu ekspertizani hujjat bilan tasdiqlash zarur;

o‘yinni tashkil etish va o‘tkazishda faol qatnashgan xodimlarni rag‘batlantirish uchun mukofot jamg‘armasini tashkil etish tartibi. Mukofot jamg‘armasidan to‘lov faqat o‘yin tiraji o‘tkazilgandan (bir lahzali lotereyalar razryadi yoki seriyasi sotib bo‘lingandan) so‘ng amalga oshiriladi.

200____ yilning (choragi/ yil) _______uchun

litsenziya egasining nomi;

o‘yin o‘tkazishga asos bo‘lgan litsenziyaning tartib raqami va berilgan sanasi;

o‘yinni o‘tkazish shartlari tasdiqlangan sana;

lotereya biletlarini tayyorlagan tashkilot (korxona)ning nomi;

tayyorlangan lotereya biletlarining soni va summasi;

sotilgan biletlar (hisobot davrida va chiqarila boshlangandan buyon reja bo‘yicha hamda amalda);

biletlarni sotishdan tushgan tushum (hisobot davrida va chiqarila boshlangandan buyon reja bo‘yicha hamda amalda).

o‘tkazilgan o‘yinlar (o‘tkazilgan sanalar, o‘yinga qo‘yilgan lotereyalarning soni va turlari, bekor qilingan, yo‘q qilingan yoki olib qo‘yilgan lotereyalar soni va turlari);

tirajlarni o‘tkazish komissiyasi tarkibi va javobgar shaxslar;

tirajni o‘tkazish natijalari bo‘yicha komissiyaning hisoboti;

chiqqan yutuqlar soni va turlari (mukofotlar va summalar ko‘rsatilgan holda);

berilgan yutuqlar (mukofotlar va summalar ko‘rsatilgan holda);

talab qilib olinmagan yutuqlar (mukofotlar va summalar ko‘rsatilgan holda);

biletlarni yo‘q qilish yoki bekor qilish komissiyasi tarkibi;

biletlarni yo‘q qilish yoki bekor qilish komissiyasining hisoboti.

tarqatilgan biletlar soni va tarqatishdan tushgan umumiy tushum;

o‘yinni o‘tkazishga oid xarajatlar, shu jumladan:

biletlarni tayyorlash, transportda tashish, yetkazib berish va saqlash uchun (hisob-kitob narxlariga solishtirganda);

mukofotlarni xarid qilish va yutuqlarni to‘lash uchun (har bir turi bo‘yicha mukofotlarni xarid qilishning hisob-kitob va amaldagi narxlariga solishtirganda);

biletlarni tarqatuvchi shaxslarga haq to‘lash uchun (rejalashtirilgan to‘lovlarga solishtirganda);

reklama uchun (smeta bo‘yicha xarajatlar bilan solishtirganda);

tirajlarni o‘tkazish xarajatlari;

mukofot to‘lovlari;

boshqa xarajatlar va majburiy to‘lovlar;

to‘langan va to‘lanishi kerak bo‘lgan soliqlar hamda boshqa yig‘imlar, ularning summasi, to‘lash muddatlari;

sof foyda;

foydadan maqsadli foydalanish to‘g‘risidagi hisobot (maqsadli o‘yinlar uchun).