Oʻzbekiston Respublikasi Prezidentining “Oʻzbekiston Respublikasi Davlat geologiya va mineral resurslar qoʻmitasi tizimida yagona geologiya xizmatini tashkil qilish toʻgʻrisida” 2017-yil 24-maydagi PQ-3004-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Davlat geologiya va mineral resurslar qoʻmitasi (keyingi oʻrinlarda Davlat geologiya qoʻmitasi deb ataladi) toʻgʻrisidagi nizom 1-ilovaga muvofiq tasdiqlansin.

2. Belgilab qoʻyilsinki:

Davlat geologiya qoʻmitasi xodimlari uzluksiz ish stajlari uchun (uzoq muddat ishlaganlik) har oylik ustama olish huquqiga ega;

mineral-xomashyo bazasini rivojlantirish va qayta toʻldirish davlat dasturlarini (keyingi oʻrinlarda dasturlar deb ataladi) amalga oshirishda bevosita ishtirok etayotgan Davlat geologiya qoʻmitasi xodimlarining uzluksiz ish staji (uzoq muddat ishlaganlik) uchun ustamalarni toʻlashga moʻljallangan budjet mablagʻlari hamda “Navoiy KMK” DK va “Olmaliq KMK” AJning ajratmalari miqdorlari Davlat geologiya qoʻmitasining asoslangan hisob-kitoblari boʻyicha har yili dasturlarni ishlab chiqish va tasdiqlash chogʻida Oʻzbekiston Respublikasi Moliya vazirligi va Iqtisodiyot vazirligi tomonidan belgilanadi;

mineral-xomashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi xodimlarining uzluksiz ish staji (uzoq muddatli ishlaganlik) uchun ustamalarni toʻlash har yilgi dasturlarda nazarda tutilgan togʻ-kon burgʻulash ishlarining fizik hajmlarini bajarish va foydali qazilmalar zaxiralarini oʻstirish chorak prognoz parametrlarining bajarilishiga koʻra har oyda amalga oshiriladi.

3. Belgilansinki, 2017-yilning ikkinchi yarim yilligida mineral-xomashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi xodimlarining uzluksiz ish staji (uzoq muddatli ishlaganlik) uchun ustamalar toʻlashni moliyalashtirish 2017-yilgi mineral-xomashyo bazasini rivojlantirish va qayta toʻldirish davlat dasturida tasdiqlangan mablagʻlar doirasida Oʻzbekiston Respublikasi Moliya vazirligi va Iqtisodiyot vazirligi bilan kelishilgan holda:

uzluksiz ish staji (uzoq muddatli ishlaganlik) uchun har oylik ustamalarni toʻlash ehtiyojining 15 foiz ulushi — budjet mablagʻlari;

ehtiyojning 67 foizi va 18 foizini tashkil etgan ulushlar — tegishli ravishda “Navoiy KMK” DK va “Olmaliq KMK” AJ mablagʻlari hisobiga amalga oshiriladi, ushbu mablagʻlar Vazirlar Mahkamasining 1999-yil 5-fevraldagi 54-son qarori bilan tasdiqlangan Xarajatlar tarkibi (ishlar, xizmatlar) va moliyaviy natijalarni shakllantirish tartibi toʻgʻrisidagi nizomning 1.1.4-bandiga muvofiq ishlab chiqarishga oid moddiy xarajatlar tarkibiga kiritiladi.

4. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

1. Ushbu Nizom Oʻzbekiston Respublikasi Davlat geologiya va mineral resurslar qoʻmitasining (keyingi oʻrinlarda Davlat geologiya qoʻmitasi deb ataladi) asosiy vazifalari, funksiyalari, huquqlari, javobgarligi va faoliyatining tashkiliy asoslarini belgilab beradi.

2. Davlat geologiya qoʻmitasi yer qaʼrini geologik oʻrganish, foydalanish va muhofaza qilish, shuningdek kon munosabatlarini boshqarish sohasida davlat boshqaruvi organi hisoblanadi va oʻz faoliyatida Oʻzbekiston Respublikasi Vazirlar Mahkamasiga hisobot beradi.

3. Davlat geologiya qoʻmitasining markaziy apparati va unga idoraviy mansub tashkilotlar Davlat geologiya qoʻmitasining yagona tizimini tashkil etadi.

4. Davlat geologiya qoʻmitasi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga hamda boshqa qonun hujjatlariga amal qiladi.

5. Davlat geologiya qoʻmitasi oʻz faoliyatini boshqa davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar bilan oʻzaro hamkorlikda amalga oshiradi.

6. Davlat geologiya qoʻmitasining oʻz vakolatlari doirasida qabul qilingan qarorlari davlat va xoʻjalik boshqaruvi organlari, mahalliy davlat hokimiyati organlari, shuningdek yuridik va jismoniy shaxslar tomonidan bajarilishi majburiy hisoblanadi.

7. Davlat geologiya qoʻmitasi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhr va blankalarga, gʻaznachilik shaxsiy hisobvaraqlariga, shuningdek qonun hujjatlariga muvofiq ochiladigan bank hisob raqamlariga egadir.

8. Davlat geologiya qoʻmitasi markaziy apparatini saqlab turish Oʻzbekiston Respublikasi Davlat budjeti mablagʻlari, idoraviy mansub tashkilotlarning ajratmalari, shuningdek qonun hujjatlarida taqiqlanmagan boshqa manbalar hisobiga amalga oshiriladi.

9. Davlat geologiya qoʻmitasining markaziy apparati Toshkent shahri, T.Shevchenko koʻchasi, 11-uy manzili boʻyicha joylashtiriladi.

10. Quyidagilar Davlat geologiya qoʻmitasining asosiy vazifalari hisoblanadi:

yer qaʼrini geologik oʻrganish, foydalanish va muhofaza qilish, shuningdek konchilik munosabatlarini boshqarish borasida yagona davlat siyosatini amalga oshirish;

respublikaning mineral-xomashyo bazasini, birinchi navbatda yer osti suvlari, qimmatbaho, rangli, nodir, kamyob metallar va uranning mineral xomashyo bazasini jadal rivojlantirish, mineral xomashyoning yangi turlarini va ularning konlarini tezkor izlash;

geologiya-qidiruv ishlarining samaradorligi va natijadorligini oshirish, foydali qazilmalar zaxirasini oʻsishini taʼminlash va joylarda sanoatning yangi quvvatlari yaratilishini inobatga olib iqtisodiyot tarmoqlarining mineral-xomashyo bazasini qayta toʻldirish;

foydali qazilmalar konlari sanoat yoʻli bilan oʻzlashtirish uchun berilishini tezlashtirish hisobiga faol investitsiya siyosatini yuritish, shu jumladan xorijiy investitsiyalarni jalb etgan holda ulardan oqilona foydalanish boʻyicha tavsiyalarni ishlab chiqish;

raqobatbardosh mahsulotlarni ishlab chiqarishni tashkil qilish uchun birinchi navbatda respublika hududlarida sanoatda faoliyat koʻrsatayotgan tarmoqlarining xomashyo manbalarini diversifikatsiyalash boʻyicha takliflar tayyorlash;

mineral-xomashyo bazasini rivojlantirish va qayta toʻldirishning uzoq muddatli, oʻrtacha muddatli va yillik davlat dasturlari monitoringi olib borilishini va nazorat qilinishini taʼminlash, yer qaʼrini geologik oʻrganish metodikasini oʻrganish natijalari hajmi, sifati va ishonchliligini xolisona baholash;

zamonaviy yuqori samarali geologiya-qidiruv va laboratoriya asbob-uskunalarini jadal joriy etish hisobiga geologiya tarmogʻini modernizatsiya qilish choralarini samarali amalga oshirish, ilgʻor texnika va innovatsion texnologiyalar bilan taʼminlash;

kadrlarning kasb mahoratini oshirish boʻyicha tizimli choralarni amalga oshirish, mehnatni ragʻbatlantirishning samarali mexanizmini joriy qilish.

11. Yuklangan vazifalarga muvofiq Davlat geologiya qoʻmitasi quyidagi funksiyalarni bajaradi:

a) yer qaʼrini geologik oʻrganish, foydalanish va muhofaza qilish, shuningdek konchilik munosabatlarini boshqarish borasida yagona davlat siyosatini amalga oshirish sohasida:

respublika hududlarining geologik oʻrganilganligi va iqtisodiyot tarmoqlarining foydali qazilmalar bilan taʼminlanganligini tahlil qiladi va uning asosida vazirliklar, idoralar va mahalliy davlat hokimiyati organlari bilan birgalikda mineral-xomashyo bazasidan foydalanish strategiyasi, qayta toʻldirish surʼatlari, ularni yanada kengaytirish, mustahkamlash va sifat jihatidan yaxshilash, oqilona va kompleks tarzda foydalanish hamda buning uchun zarur boʻlgan davlat investitsiyalari va boshqa investitsiyalar hajmlari toʻgʻrisidagi takliflarni ishlab chiqadi;

oʻz vakolatlari doirasida respublikani iqtisodiy va ijtimoiy rivojlantirish prognozlarini, yer qaʼrini geologik oʻrganish va muhofaza qilish boʻyicha xalqaro dasturlarni ishlab chiqishda ishtirok etadi;

Oʻzbekiston Respublikasi Vazirlar Mahkamasi tomonidan belgilangan tartibda yer qaʼri uchastkalaridan foydalanish huquqini davlat hisobiga olishni, yer qaʼri uchastkalaridan foydalanish huquqlarini davlat roʻyxatidan oʻtkazilishini va yer qaʼrini geologik oʻrganish ishlarining davlat hisobi yuritilishini amalga oshiradi;

mulk egasining mineral-xomashyo bazasini rivojlantirish va qayta toʻldirish davlat dasturlarini amalga oshirish doirasida olingan yer qaʼri toʻgʻrisidagi geologik va boshqa maʼlumotlarga huquqi va majburiyatlarini amalga oshiradi;

Oʻzbekiston Respublikasi Davlat budjeti va yer qaʼridan foydalanuvchilarning oʻz mablagʻlari hisobiga oʻtkazilgan geologiya-qidiruv ishlari natijasida aniqlangan foydali qazilmalarning barcha turlari boʻyicha yer qaʼri haqidagi barcha geologik va boshqa maʼlumotlarni hisobga oladi, saqlaydi va tizimlashtiradi;

yer qaʼrini geologik oʻrganish ishlarini bajarishga loyiha-smeta hujjatlari ekspertizadan oʻtkazilishini tashkil etadi va taʼminlaydi:

yer osti boyliklari toʻgʻrisidagi geologik va boshqa maʼlumotlarning davlat fondini, toshlarga oid geologik materiallarning davlat fondini yuritadi;

konlar va foydali qazilmalar konlarini aniqlash uchun istiqbolli boʻlgan yer qaʼri uchastkalari davlat reyestrini (oʻz vakolati doirasida), foydali qazilmalar zaxiralari davlat balansini, konlar, foydali qazilmalar namoyon boʻlishi va texnogen mineral hosilalar davlat kadastrini, davlat suv kadastrini (yer osti suvlari), tabiiy xavf yuqori boʻlgan zonalar (xavfli geologik jarayonlar namoyon boʻlgan zonalar) davlat kadastrini yuritadi, shuningdek qoʻriqlanayotgan tabiiy hududlarning davlat kadastri boʻyicha chuchuk yer osti suvlari konlarining shakllanishi zonalari boʻyicha maʼlumotlarni tuzadi va taqdim etadi;

manfaatdor vazirliklar va idoralar bilan oʻzaro hamkorlikda yer osti suvlari monitoringini ham oʻz ichiga olgan yer qaʼri davlat monitoringini taʼminlaydi;

oʻz vakolatlari doirasida yer osti suvlaridan oqilona foydalanish zarur tarzda nazorat qilinishini va hisobga olinishini taʼminlaydi;

qoʻshni davlatlarning geologik xizmatlari bilan birgalikda transchegaraviy hududlar doirasida radioaktiv va zaharli elementlar bilan ifloslanish oʻchoqlarini aniqlash va oʻrganishni amalga oshiradi, qoʻshni hududlarning ekologik holatiga salbiy taʼsir koʻrsatishi mumkin boʻlgan oʻta xavfli zonalarni va uchastkalarni aks ettirgan holda geologik xarita va atlaslar tuzadi hamda Oʻzbekiston Respublikasi Vazirlar Mahkamasiga, manfaatdor vazirliklar va idoralarga taqdim etadi;

vazirliklar va idoralar bilan birgalikda suv resurslaridan (yer osti suvlaridan) foydalanish va hududlarni texnogen va xavfli geologik jarayonlar taʼsiri tarqalishidan himoya qilish sxemasini ishlab chiqadi;

qonun hujjatlarida belgilangan tartibda geologik va mineralogik obyektlar muhofazasi yuzasidan nazoratni amalga oshiradi;

sanoat va xoʻjalik qurilishlari obyektlarini istiqbolli joylashtirish uchun muhandislik-geologik, gidrogeologik va ekologik-geologik asoslarni tayyorlaydi;

oʻz vakolatlari doirasida qurilayotgan va rekonstruksiya qilinayotgan yirik sanoat va qishloq xoʻjaligi obyektlarining atrof muhitga taʼsirini baholash ishlarida ishtirok etadi;

qurilayotgan bino va inshootlar ostida foydali qazilmalar mavjud emasligi haqida xulosalar berilishini taʼminlaydi;

sanoat yoʻli bilan oʻzlashtirishga jalb qilinmagan konlar (keng tarqalgan foydali qazilma konlaridan tashqari) joylashgan maydonlarda imoratlar qurish, shuningdek ular joylashgan yerlarda foydali qazilmalarni qazib olish bilan bogʻliq boʻlmagan yer osti inshootlarini joylashtirish imkoniyatlarini kelishadi;

vazirliklar, idoralar va mahalliy davlat hokimiyati organlari bilan birgalikda yer qaʼrini geologik oʻrganish, foydalanish va muhofaza qilish, shuningdek konchilik munosabatlarini boshqarish sohasida tashqi iqtisodiy aloqalarni rivojlantirish strategiyasi haqida takliflar ishlab chiqadi;

idoraviy mansub tashkilotlarda mehnat muhofazasi va texnika xavfsizligi boʻyicha ishlarni muvofiqlashtiradi;

respublika mineral-xomashyo bazasining holati haqidagi axborot tizimi mavjud boʻlishi va uning rivojlanishini taʼminlaydi, yer qaʼrini geologik oʻrganish, foydalanish va muhofaza qilish, shuningdek konchilik munosabatlarini boshqarish sohasida belgilangan tartibda noshirlik faoliyatini amalga oshiradi;

b) respublika mineral-xomashyo bazasini, birinchi navbatda yer osti suvlari, qimmatbaho, rangli, nodir, kamyob metallar va uranning mineral-xomashyo bazasini jadal rivojlantirish, mineral-xomashyoning yangi turlarini va ularning konlarini jadal izlash sohasida:

Oʻzbekiston Respublikasi Iqtisodiyot vazirligi va Moliya vazirligi, “Navoiy KMK” DK, “Olmaliq KMK” AJ bilan kelishgan holda mineral-xomashyo bazasini rivojlantirish va qayta toʻldirishning uzoq muddatli (5 yil va undan ortiq davrga) va oʻrtacha muddatli (5 yilgacha davrga) davlat dasturlarini ishlab chiqadi va tasdiqlash uchun Oʻzbekiston Respublikasi Vazirlar Mahkamasiga kiritadi;

mineral-xomashyo bazasini rivojlantirish va qayta toʻldirishning uzoq muddatli va oʻrtacha muddatli davlat dasturlarini amalga oshirish doirasida mineral-xomashyo bazasini rivojlantirish va qayta toʻldirish yillik davlat dasturlarini Oʻzbekiston Respublikasi Iqtisodiyot vazirligi va Moliya vazirligi, “Navoiy KMK” DK, “Olmaliq KMK” AJ bilan kelishgan holda ishlab chiqadi va tasdiqlaydi;

vakolatli organlar va manfaatdor tashkilotlar bilan kelishgan holda mineral-xomashyo bazasini rivojlantirish va qayta toʻldirishning uzoq muddatli, oʻrtacha muddatli va yillik davlat dasturlarini ishlab chiqishda foydali qazilmalar zaxiralari oʻsishi boʻyicha (uglevodorodlardan tashqari) davlat buyurtmasi loyihalari shakllantirilishini taʼminlaydi;

idoraviy mansub tashkilotlar oʻrtasida mineral-xomashyo bazasini rivojlantirish va qayta toʻldirishning yillik dasturi doirasida geologiya-qidiruv, ilmiy-tadqiqot va tajriba-konstruktorlik ishlarini olib borish uchun davlat buyurtmalarini joylashtiradi, ularning bajarilishini Oʻzbekiston Respublikasi Davlat budjeti mablagʻlari, “Navoiy KMK” DK, “Olmaliq KMK” AJning mablagʻlari, shuningdek qonun hujjatlarida taqiqlanmagan boshqa manbalar hisobiga moliyalashtiradi;

mineral-xomashyo bazasini rivojlantirish va qayta toʻldirishning yillik dasturi doirasida yer qaʼrini geologik oʻrganish ishlarini amalga oshirayotgan yuridik va jismoniy shaxslar uchun bajarilishi majburiy boʻlgan yer qaʼrini geologik oʻrganish boʻyicha ishlarni loyihalash va olib borish sohasida oʻz vakolatlari doirasida meʼyorlar va qoidalarni ishlab chiqadi va tasdiqlaydi;

oʻz vakolatlari doirasida mineral-xomashyo bazasini rivojlantirish va qayta toʻldirishning yillik dasturi doirasida idoraviy mansub tashkilotlarning geologik oʻrganish uchun yer qaʼridan foydalanish huquqining yuzaga kelishiga asos boʻlib hisoblanuvchi yer qaʼrini geologik oʻrganishga oid loyiha-smeta hujjatlarini tasdiqlaydi;

xavfli geologik jarayonlar (koʻchkilar, qulashlar, choʻkishlar, suffoziya, karst)ni oʻrganish, shuningdek ularning togʻli tumanlarda hosil boʻlishi va rivojlanishini kuzatish ishlarini olib boradi;

respublika hududlarining shoʻrlanishiga va choʻllanishiga taʼsir koʻrsatuvchi mintaqaviy ekzogen geologik jarayonlarni oʻrganish ishlarini oʻtkazadi.

v) geologiya-qidiruv ishlarining samaradorligini va natijadorligini oshirish, foydali qazilmalar zaxirasi oʻsishni taʼminlash va joylarda yangi sanoat quvvatlari yaratilishini inobatga olib iqtisodiyot tarmoqlarining mineral-xomashyo bazasini qayta toʻldirish sohasida:

yer osti suvlari, qimmatbaho, rangli, noyob, kamyob metallar va uran konlarini, shuningdek boshqa turdagi foydali qazilma konlarini aniqlashga istiqbolli boʻlgan hududlarni belgilaydi va joylarda sanoatni rivojlantirish uchun ushbu hududlarda geologiya-qidiruv ishlarining ustuvor rivojlanishini taʼminlaydi;

mavzuli va tajriba-konstruktorlik ishlarini, maʼdan va togʻ jinslarini texnologik tadqiq qilish, shuningdek yer qaʼrini geologik oʻrganish sohasidagi boshqa ishlarning ustuvor yoʻnalishlarini hamda fundamental va amaliy fanlarning ilgʻor yutuqlari asosida mineral-xomashyodan foydalanishni asoslab beradi;

g) foydali qazilmalar konlari sanoat yoʻli bilan oʻzlashtirish uchun berilishini tezlashtirish hisobiga faol investitsiya siyosatini yuritish, ulardan shu jumladan xorijiy sarmoyalarni jalb etgan holda samarali foydalanish boʻyicha tavsiyalarni ishlab chiqish sohasida:

xorijiy investitsiyalarni jalb etish ishlarini olib boradi, xorijiy investorlar bilan toʻgʻridan toʻgʻri muzokaralar olib boradi va ularga yer qaʼridan foydalanish huquqini berish boʻyicha (oʻz vakolatlari doirasida) Oʻzbekiston Respublikasi Vazirlar Mahkamasiga takliflar kiritadi;

xalqaro hamkorlikni amalga oshiradi, konferensiyalar, simpoziumlar, koʻrgazmalar oʻtkazadi, Davlat geologiya qoʻmitasi vakolatiga kiruvchi masalalar boʻyicha belgilangan tartibda xalqaro tashkilotlar, boshqa mamlakatlarning geologik xizmatlari bilan munosabatlarni qoʻllab-quvvatlaydi;

Oʻzbekiston Respublikasining xalqaro tashkilotlarda aʼzoligidan kelib chiquvchi majburiyatlari bajarilishini tashkil qiladi va muvofiqlashtiradi hamda yer qaʼrini geologik oʻrganish va foydalanish, konchilik munosabatlarini boshqarish, mineral-xomashyo salohiyatini rivojlantirish va qayta toʻldirish sohasidagi xalqaro shartnomalarda qatnashadi;

manfaatdor vazirliklar va idoralar bilan birgalikda geologiya-qidiruv ishlariga (mineral-xomashyo bazasini qayta toʻldirish) xarajatlar oʻrnini toʻldirish stavkalari miqdorlarini, geologiya-qidiruv ishlarini moliyalashtirish va kreditlash boʻyicha normativ-huquqiy hujjatlarni ishlab chiqadi;

tadbirkorlik tavakkalchiligi shartlarida geologik oʻrganish, foydali qazilmalarni qazib olish, texnogen mineral hosilalardan foydalanish, foydali qazilmalarni qazib olish bilan bogʻliq boʻlmagan yer osti inshootlarini qurish va ulardan foydalanish (nomaʼdan foydali qazilmalarni oʻz ichiga olgan yer qaʼri uchastkalaridan foydalanish huquqi uchun litsenziyalar, shuningdek chiqindilarni saqlash va koʻmish maqsadidagi yer osti inshootlaridan foydalanish bundan mustasno), qoʻriqlanadigan geologik obyektlarni barpo qilish va yarqiramatosh xomashyo namunalarini, paleontologik qoldiqlarni va boshqa geologik kolleksiyabop materiallarni toʻplash huquqini beruvchi litsenziyalarni qonun hujjatlarida belgilangan tartibda beradi;

idoraviy mansub gidrogeologik tashkilotlar tomonidan yer osti suvlariga quduqlarni burgʻulash uchun gidrogeologik xulosalar oʻz vaqtida berilishi yuzasidan nazoratni taʼminlaydi;

qonun hujjatlarida belgilangan tartibda yer osti suvlariga quduqlarni burgʻulash uchun ruxsatnoma beradi va suvdan (yer osti suvlari) maxsus foydalanishi uchun ruxsatnoma idoraviy mansub tashkilotlar bilan oʻz vaqtida kelishilishi nazorat qilinishini taʼminlaydi;

Oʻzbekiston Respublikasi Ekologiya va atrof muhitni muhofazasi qilish davlat qoʻmitasi va “Sanoatgeokontexnazorat” DI bilan birgalikda keng tarqalgan foydali qazilmalar roʻyxatini belgilaydi va uni tasdiqlash uchun Oʻzbekiston Respublikasi Vazirlar Mahkamasiga taqdim etadi;

vazirliklar va idoralar bilan birgalikda materiallarni tayyorlaydi, yer qaʼridan foydalanish huquqini berish yuzasidan ommaviy savdolarni tashkil qilish va oʻtkazishda qatnashadi, yer qaʼri uchastkasidan foydalanish bilan bogʻliq boʻlgan investitsiya loyihalarining texnik-iqtisodiy asoslarini ishlab chiqishda ishtirok etadi;

oʻz vakolatlari doirasida yerdan foydalanuvchilar tomonidan yer qaʼridan foydalanish huquqiga oid litsenziyalarda belgilangan shartlarga, yer qaʼrini geologik oʻrganishlarga doir ishlarni loyihalashtirish sohasidagi meʼyorlar va qoidalarga rioya qilinishi yuzasidan nazoratni amalga oshiradi;

d) raqobatbardosh mahsulotlarni ishlab chiqarishni tashkil qilish uchun birinchi navbatda respublika hududlarida sanoatda faoliyat koʻrsatayotgan tarmoqlarining xomashyo manbalarini diversifikatsiyalash boʻyicha takliflar tayyorlash sohasida:

tizimli asosda mineral-xomashyodan foydalanishning umumjahon tendensiyalarini va ular asosida ishlab chiqariladigan mahsulotlar nomenklaturasini oʻrganadi;

respublikaning qayta ishlab chiqarish quvvatlari uzoq muddatli istiqbolda foydali qazilmalar zaxiralari va resurslari bilan taʼminlanganligini tahlil qiladi va yangi turdagi mineral-xomashyolarni oʻzlashtirish boʻyicha takliflar kiritadi;

raqobatbardosh mahsulotlar ishlab chiqarish uchun xorijiy mamlakatlarda yangi turdagi mineral-xomashyodan foydalanishning istiqbolli yoʻnalishlarini aniqlaydi va ularni respublikada mahalliy xomashyo negizida ishlab chiqarishni tashkil qilish boʻyicha takliflar tayyorlaydi;

iqtisodiyotning qayta ishlovchi tarmoqlari xomashyo manbalarini diversifikatsiyalash boʻyicha takliflar tayyorlaydi va manfaatdor vazirliklar va idoralar bilan birgalikda kiritadi;

e) mineral-xomashyo bazasini rivojlantirish va qayta toʻldirishning uzoq muddatli, oʻrtacha muddatli va yillik davlat dasturlari monitoringi olib borilishini va nazorat qilinishini taʼminlash, yer qaʼrini geologik oʻrganish metodikasini oʻrganish natijalari hajmi, sifati va ishonchliligini xolisona baholash sohasida:

mineral-xomashyo bazasini rivojlantirish va qayta toʻldirishning tasdiqlangan davlat dasturlariga muvofiq yer qaʼrini geologik oʻrganishga doir ishlar olib borilishini muvofiqlashtiradi;

idoraviy mansub tashkilotlar tomonidan asosiy turdagi foydali qazilmalar zaxiralari oʻsishi boʻyicha davlat buyurtmalari va respublika mineral-xomashyo bazasini (uglevodorodlardan tashqari) shakllantirish, mustahkamlash va kengaytirishga doir geologik vazifalar va respublika hududini geologik oʻrganish sohasidagi boshqa ishlar oʻz vaqtida bajarilishi ustidan nazoratni taʼminlaydi;

idoraviy mansub tashkilotlar tomonidan mineral-xomashyo bazasini rivojlantirish va qayta toʻldirishning davlat dasturlari amalga oshirilishi, foydali qazilmalar zaxiralari oʻsishi boʻyicha davlat buyurtmasi bajarilishi ustidan doimiy monitoring olib boradi va nazoratni amalga oshiradi;

respublika hududida geologiya-ekologiya va gidrogeologiya-meliorativ tadqiqotlar dasturlarini ishlab chiqishda va amalga oshirishda ishtirok etadi;

idoraviy mansub tashkilotlar tomonidan yer qaʼrini geologik oʻrganishga doir olib boriladigan ishlarga ajratiladigan moliyaviy mablagʻlardan maqsadli foydalanilishini nazorat qiladi;

j) zamonaviy yuqori samarali geologiya-qidiruv va laboratoriya asbob-uskunalarini jadal joriy etish hisobiga geologiya tarmogʻini modernizatsiya qilish choralarini samarali amalga oshirish, ilgʻor texnika va innovatsion texnologiyalar bilan taʼminlash sohasida:

geologiya-qidiruv ishlariga zamonaviy usullar, ilmtalab texnologiyalar va uskunalar tatbiq etilishini tizimli asosda amalga oshiradi;

Davlat geologiya qoʻmitasiga idoraviy mansub tashkilotlarni asosiy vositalarni, ularning balansiga topshirish yoʻli bilan modernizatsiyalash va texnik jihatdan qayta jihozlash boʻyicha amaliy choralar koʻradi;

zamonaviy kon-burgʻulash, geologik-geofizik va laboratoriya-tahliliy uskunalardan foydalanish samaradorligini tahlil qiladi va ularni samarali qoʻllash boʻyicha idoraviy mansub tashkilotlarga metodik yordam beradi;

z) kadrlarning kasb mahoratini oshirish boʻyicha tizimli choralarni amalga oshirish, mehnatni ragʻbatlantirishning samarali mexanizmini joriy qilish sohasida:

ekstremal sharoitlarda (suvsizlik, yuqori togʻli, yer osti va boshqalar) ish olib borish uchun qoʻshimcha toʻlovlar miqdorining belgilanishini asoslab beradi va takliflar kiritadi;

geologiya tarmogʻi uchun kadrlar tayyorlashni va ularning malakasini oshirish ishlarini tizimli ravishda olib boradi;

Davlat geologiya qoʻmitasining markaziy apparati va idoraviy mansub tashkilotlar xodimlarining mehnatini ragʻbatlantirishning samarali mexanizmini joriy qiladi;

qonun hujjatlarida nazarda tutilgan boshqa funksiyalarni bajaradi.

12. Davlat geologiya qoʻmitasi unga yuklangan vazifalarni hal etadi va oʻzining funksiyalarini bevosita va idoraviy mansub tashkilotlar orqali bajaradi.

13. Davlat geologiya qoʻmitasi unga yuklangan vazifalar va funksiyalarni bajarish uchun quyidagi huquqlarga ega:

oʻz vakolatiga kiruvchi masalalarni hal etish uchun zarur materiallar va maʼlumotlarni davlat va xoʻjalik boshqaruvi organlaridan va boshqa tashkilotlardan belgilangan tartibda soʻrash va olish;

oʻz vakolatlari doirasida yer qaʼri uchastkasidan foydalanish huquqini berish;

yer osti suvlariga quduqlarni burgʻulash uchun belgilangan tartibda ruxsatnoma berish;

davlat va xoʻjalik boshqaruvi organlari va tashkilotlar bilan kelishgan holda ularning mutaxassislarini geologik materiallarni ekspertizadan oʻtkazish uchun jalb qilish;

davlat va xoʻjalik boshqaruvi organlariga, mahalliy davlat hokimiyati organlariga, boshqa tashkilotlarga va fuqarolarga yer qaʼrini geologik oʻrganish, undan foydalanish va muhofaza qilish, shuningdek konchilik munosabatlarini boshqarish doirasidagi qoida buzilishlarni bartaraf etish haqida koʻrib chiqilishi majburiy boʻlgan taqdimnomalar yoʻllash;

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasi tomonidan belgilangan tartibda yer qaʼridan foydalanish huquqini chegaralash, toʻxtatib turish va toʻxtatish haqida qaror chiqarish;

yer qaʼrini geologik oʻrganish, foydalanish va muhofaza qilish, shuningdek konchilik munosabatlarini boshqarish sohasida qonun hujjatlari talablari bajarilmaganligi yoki yetarlicha bajarilmaganligi uchun davlat va xoʻjalik boshqaruvi organlari, mahalliy davlat hokimiyati organlari rahbarlarini belgilangan tartibda javobgarlikka tortish boʻyicha takliflarni koʻrib chiqish uchun Oʻzbekiston Respublikasi Vazirlar Mahkamasiga kiritish;

Davlat geologiya qoʻmitasi vakolatiga kiruvchi masalalar boʻyicha takliflarni Oʻzbekiston Respublikasi Vazirlar Mahkamasiga, davlat va xoʻjalik boshqaruvi organlariga, mahalliy davlat hokimiyati organlariga kiritish;

yer qaʼrini geologik oʻrganish, foydalanish va muhofaza qilish, shuningdek konchilik munosabatlarini boshqarish masalalari boʻyicha idoralararo tusdagi xalqaro shartnomalarni belgilangan tartibda imzolash;

Davlat geologiya qoʻmitasi markaziy apparati va idoraviy mansub tashkilotlar mutaxassislarini tajriba orttirish, malaka oshirish, xalqaro konferensiyalarda qatnashish, biznes-forumlar va boshqalarda ishtirok etish uchun belgilangan tartibda xorijiy mamlakatlarga yuborish;

yer qaʼrini geologik oʻrganish, foydalanish va muhofaza qilish, shuningdek konchilik munosabatlarini boshqarish sohasida chet ellik yetakchi mutaxassislarni Davlat geologiya qoʻmitasi markaziy apparatida va idoraviy mansub tashkilotlarda ishlash uchun shartnoma asosida jalb qilish;

Davlat geologiya qoʻmitasi vakolatiga tegishli masalalar boʻyicha xorijiy davlatlarning vazirliklari (idoralari), xalqaro moliya va iqtisodiyot tashkilotlari, ilmiy-tadqiqot institutlari, chet el firmalari va kompaniyalari bilan, shuningdek xorijiy davlatlarning elchixonalari va missiyalari, Oʻzbekiston Respublikasida akkreditatsiyadan oʻtgan xalqaro va xorijiy tashkilotlar bilan toʻgʻridan toʻgʻri aloqa boʻyicha kengashlar va videokonferensiyalar oʻtkazish;

Davlat geologiya qoʻmitasi vakolatiga kiruvchi masalalar boʻyicha Oʻzbekiston Respublikasi manfaatlarini belgilangan tartibda xalqaro darajada ifodalash;

yer qaʼrini geologik oʻrganish, undan foydalanish va muhofaza qilish, shuningdek konchilik munosabatlarini boshqarish sohasida hukumatlararo qoʻmitalar, xorijiy davlatlar bilan iqtisodiy va ilmiy-texnik hamkorlik qilish boʻyicha kengashlar va komissiyalar ishida qatnashish;

zarurat boʻlganda normativ-huquqiy hujjatlarni ishlab chiqish uchun geologiya sohasi olimlari va mutaxassislaridan iborat vaqtinchalik ishchi guruhlar tashkil etish, boshqa vazirliklar va idoralardan mutaxassislar va ekspertlarni ushbu ishga shartnomalar asosida jalb qilish;

oʻz vakolatlari doirasida konferensiyalar, seminarlar, simpoziumlar, koʻrgazmalar, yarmarkalar va boshqa tadbirlarni oʻtkazish, shuningdek boshqa tashkilotlar, shu jumladan xorijiy tashkilotlar tomonidan oʻtkaziladigan shu kabi tadbirlarda ishtirok etish;

davlat budjeti mablagʻlari va boshqa manbalar hisobiga olingan yer qaʼri toʻgʻrisidagi geologik va boshqa axborotlarni shartnomalar asosida belgilangan tartibda realizatsiya qilish (berish, ayirboshlash, sotish).

Davlat geologiya qoʻmitasi qonun hujjatlariga muvofiq boshqa huquqlarga ham ega.

14. Davlat geologiya qoʻmitasi oʻz vakolati doirasida vazirliklar va idoralar, mahalliy davlat hokimiyati organlari, tashkilotlar, mansabdor shaxslar va fuqarolar uchun bajarilishi majburiy boʻlgan normativ-huquqiy hujjatlarni qabul qilish huquqiga ega.

Davlat geologiya qoʻmitasi zarur hollarda boshqa vazirliklar va idoralar bilan birgalikda qoʻshma qarorlar va boshqa hujjatlarni qabul qilish huquqiga ega.

15. Davlat geologiya qoʻmitasi va uning mansabdor shaxslari ularga yuklangan vazifalar va funksiyalar samarali amalga oshirilishi uchun javob beradi.

16. Davlat geologiya qoʻmitasiga Oʻzbekiston Respublikasining Bosh vaziri tavsiyanomasiga koʻra Oʻzbekiston Respublikasi Prezidenti tomonidan tasdiqlanadigan va lavozimdan ozod qilinadigan rais boshchilik qiladi.

Rais Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan oʻrinbosarlarga, shu jumladan bir nafar birinchi oʻrinbosarga ega boʻladi.

Davlat geologiya qoʻmitasi raisi moddiy, maishiy, transport va tibbiy xizmat koʻrsatish shart-sharoitlari boʻyicha vazirga, uning birinchi oʻrinbosari — vazirning birinchi oʻrinbosariga, uning oʻrinbosarlari esa — vazir oʻrinbosarlariga tenglashtiriladi.

17. Davlat geologiya qoʻmitasi raisi:

Davlat geologiya qoʻmitasi faoliyatiga rahbarlik qiladi va qoʻmitaga yuklangan vazifalar va funksiyalar bajarilishi uchun shaxsan javob beradi;

oʻz oʻrinbosarlarining vakolatlarini belgilaydi, ular oʻrtasida vazifalarni taqsimlaydi, Davlat geologiya qoʻmitasi markaziy apparatining va idoraviy mansub tashkilotlarning mansabdor shaxslari vakolatlarini belgilaydi;

Davlat geologiya qoʻmitasi markaziy apparati va idoraviy mansub tashkilotlar uchun bajarilishi majburiy boʻlgan buyruqlar chiqaradi va koʻrsatmalar beradi;

zarurat boʻlganda xodimlarning belgilangan umumiy soni va mehnatga haq toʻlash fondi doirasida Davlat geologiya qoʻmitasi markaziy apparati tuzilmasiga oʻzgartirishlar kiritadi;

Davlat geologiya qoʻmitasi markaziy apparati shtatlar jadvalini tasdiqlaydi;

Davlat geologiya qoʻmitasi markaziy apparatining tarkibiy boʻlinmalari toʻgʻrisidagi nizomni, Davlat geologiya qoʻmitasi tizimiga kiruvchi tashkilotlarning ustavlarini tasdiqlaydi;

Davlat geologiya qoʻmitasiga idoraviy mansub tashkilotlarni qayta tashkil qilish yoki tugatish toʻgʻrisida Oʻzbekiston Respublikasi Vazirlar Mahkamasiga takliflar kiritadi;

Davlat geologiya qoʻmitasi markaziy apparati va idoraviy mansub tashkilotlar xodimlarini ragʻbatlantirish va intizomiy javobgarlikka tortish masalalarini hal qiladi, tarmoq xodimlarini belgilangan tartibda koʻkrak nishonlari va faxriy yorliqlar bilan mukofotlaydi, Davlat geologiya qoʻmitasi tizimida alohida oʻrnak koʻrsatgan xodimlarni Oʻzbekiston Respublikasi faxriy unvonlari va davlat mukofotlari bilan mukofotlashga tavsiya qiladi;

Davlat geologiya qoʻmitasi markaziy apparatining tashabbuskor va yuqori malakali xodimlarining lavozim maoshlariga (tarif setkasi boʻyicha) belgilangan tartibda shaxsiy ustamalar tayinlash toʻgʻrisida qaror qabul qiladi va idoraviy mansub tashkilotlarda ustamalarni tayinlash tartibini belgilaydi;

Davlat geologiya qoʻmitasi markaziy apparati xodimlarini, Davlat geologiya qoʻmitasi tizimiga kiruvchi tashkilotlar rahbarlarini belgilangan tartibda lavozimga tayinlaydi va lavozimdan ozod qiladi;

Davlat geologiya qoʻmitasi va idoraviy mansub tashkilotlarning mol-mulkini qonun hujjatlarida belgilangan tartibda tasarruf etadi;

Davlat geologiya qoʻmitasi markaziy apparatida va idoraviy mansub tashkilotlarda ijro intizomini mustahkamlashga doir ishlarni muvofiqlashtiradi;

Davlat geologiya qoʻmitasi vakolatiga kiruvchi masalalar boʻyicha jismoniy va yuridik shaxslarning murojaatlari toʻgʻrisidagi qonun hujjatlarini ijro qilish, elektron hujjat aylanishi tizimini keng joriy qilish va samarali foydalanish, yuridik va jismoniy shaxslardan tushuvchi murojaatlar boʻyicha ularni koʻrib chiqish natijalarini hisobga olgan holda maʼlumotlar bazasini shakllantirishga oid ishlarni nazorat qiladi va muvofiqlashtiradi;

Davlat geologiya qoʻmitasi vakolatiga kiruvchi masalalar boʻyicha Oʻzbekiston Respublikasining xalqaro shartnomalarini belgilangan tartibda imzolaydi.

Rais qonun hujjatlariga muvofiq boshqa vakolatlarni ham amalga oshirishi mumkin.

18. Davlat geologiya qoʻmitasida rais (hayʼat raisi), uning birinchi oʻrinbosari va oʻrinbosarlari, shuningdek Davlat geologiya qoʻmitasining tarkibiy boʻlinmalari rahbarlaridan iborat tarkibda qoʻmita faoliyatining asosiy yoʻnalishlarini muvofiqlashtiruvchi hayʼat tashkil qilinadi.

Hayʼat aʼzolarining soni va shaxsiy tarkibi Davlat geologiya qoʻmitasi raisi taqdimnomasi boʻyicha Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat:

ushbu Nizom bilan belgilangan Davlat geologiya qoʻmitasi faoliyatining asosiy yoʻnalishlarini tayyorlash va amalga oshirish, yer qaʼrini geologik oʻrganish va yer osti boyliklaridan foydalanish va muhofaza qilish, shuningdek konchilik munosabatlarini boshqarish, mineral-xomashyo bazasini rivojlantirish va qayta toʻldirishni boshqarish sohasida yagona davlat siyosatini amalga oshirish, konchilik munosabatlari sohasida davlat boshqaruvini amalga oshirish, foydali qazilmalar konlarini izlash va qidirish ishlari samaradorligi oshirilishini taʼminlovchi geologiya-qidiruv ishlarini, shuningdek prognozlashtirishning ilgʻor usullaridan foydalangan holda yer qaʼri toʻgʻrisida geologik va boshqa axborotlarni chuqur ilmiy tahlil qilish asosida mineral-xomashyo bazasini rivojlantirish va qayta toʻldirishning uzoq muddatli, oʻrtacha muddatli va yillik davlat dasturlarini shakllantirish;

Davlat geologiya qoʻmitasi nomenklaturasiga kiruvchi lavozimlarga kadrlarni tanlash, tayinlash, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasining qarorlari va farmoyishlarida belgilangan vazifalarni amalga oshirish uchun ijro intizomini mustahkamlash, ular oʻz vaqtida va sifatli bajarilishini taʼminlash uchun Davlat geologiya qoʻmitasi rahbarlari va xodimlarining shaxsiy javobgarligini oshirish bilan bogʻliq masalalarni koʻrib chiqadi.

Hayʼat Davlat geologiya qoʻmitasi vakolatiga tegishli boʻlgan boshqa masalalarni ham koʻrib chiqish huquqiga ega.

Davlat geologiya qoʻmitasi vakolatiga kiruvchi masalalar boʻyicha hayʼat yigʻilishlariga boshqa vazirliklar, davlat qoʻmitalari, idoralar va mahalliy davlat hokimiyati organlari va tashkilotlarning rahbarlari ham taklif qilinishlari mumkin.

Hayʼat yigʻilishida hayʼat aʼzolari tarkibining yarmidan ortigʻi ishtirok etgan taqdirda hayʼat vakolatli hisoblanadi. Koʻrib chiqilayotgan masalalar boʻyicha qaror oddiy koʻpchilik ovoz bilan qabul qilinadi.

Hayʼat qarorlari Davlat geologiya qoʻmitasining qarorlari va raisning buyrugʻi bilan amalga oshiriladi. Rais va hayʼat aʼzolari oʻrtasida kelishmovchilik yuzaga kelgan taqdirda rais mustaqil ravishda qaror qabul qiladi va yuzaga kelgan kelishmovchilik toʻgʻrisida Oʻzbekiston Respublikasi Vazirlar Mahkamasiga maʼlum qiladi. Hayʼat aʼzolari ham oʻz navbatida Oʻzbekiston Respublikasi Vazirlar Mahkamasiga oʻz fikrlarini maʼlum qilishlari mumkin.

Hayʼatning faoliyat yuritish tartibi hayʼat tomonidan tasdiqlanadigan uning reglamenti bilan belgilanadi.

19. Eng muhim yoʻnalishlarni, ish natijalarini va yer qaʼrini geologik oʻrganish bilan bogʻliq boshqa masalalarni koʻrib chiqish uchun Davlat geologiya qoʻmitasi huzurida ilmiy-texnik kengash tuziladi. Ilmiy-texnik kengash tarkibi va u toʻgʻrisidagi nizom hayʼat tomonidan tasdiqlanadi.

20. Davlat geologiya qoʻmitasi xodimlarini moddiy ragʻbatlantirish qonun hujjatlariga muvofiq amalga oshiriladi.

21. Davlat geologiya qoʻmitasi xodimlarining ish haqi lavozim maoshi, mukofotlar, ustamalar, qoʻshimcha haqlar va qonun hujjatlarida nazarda tutilgan ragʻbatlantiruvchi toʻlovlardan iborat boʻladi.

22. Davlat geologiya qoʻmitasi xodimlariga qoʻmita raisi tomonidan tasdiqlanadigan va respublikaning tegishli tarmoq kasaba uyushmasi bilan kelishiladigan Oʻzbekiston Respublikasi Davlat geologiya va mineral resurslar qoʻmitasi xodimlariga uzluksiz ish staji (uzoq muddat ishlaganlik) uchun ustamalar toʻlash tartibi toʻgʻrisidagi Nizomga muvofiq har oyda uzluksiz ish staji (uzoq muddat ishlaganlik) uchun ustama toʻlanadi.

23. Uzluksiz ish staji (uzoq muddat ishlaganlik) uchun toʻlanadigan ustamalar faqat asosiy ish joyi boʻyicha har oyda va xodimning lavozim maoshiga belgilangan razryad tarif stavkasiga nisbatan quyidagi foizlarda hisoblanadi:

24. Mineral-xomashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi xodimlarining uzluksiz ish staji (uzoq muddat ishlaganlik) uchun ustamalarni toʻlash (ishlab chiqarishda qatnashuvchi xodimlar) budjet mablagʻlari, “Navoiy KMK” DK va “Olmaliq KMK” AJning ajratmalari hisobiga amalga oshiriladi.

Mineral-xomashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi xodimlari toifalarining (ishlab chiqarishda qatnashuvchi xodimlar) roʻyxati ushbu Nizomga ilovada keltirilgan.

25. Mineral-xomashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etmaydigan Davlat geologiya qoʻmitasi (xizmat koʻrsatuvchi va texnik xodimlar), shu jumladan uning markaziy apparati xodimlarining uzluksiz ish staji (uzoq muddat ishlaganlik) uchun ustamalarni toʻlash Davlat geologiya qoʻmitasi olgan foyda va idoraviy mansub tashkilotlarning ajratmalari hisobiga amalga oshiriladi.

26. Mineral-xomashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi xodimlarining uzluksiz ish staji (uzoq muddatli ishlaganlik) uchun ustamalarni toʻlashga moʻljallangan budjet mablagʻlari hamda “Navoiy KMK” DK va “Olmaliq KMK” AJning ajratmalari Davlat geologiya qoʻmitasining asoslangan hisob-kitoblari boʻyicha har yilgi dasturlarni ishlab chiqish va tasdiqlash chogʻida Oʻzbekiston Respublikasi Moliya vazirligi va Iqtisodiyot vazirligi tomonidan belgilanadi;

27. Mineral-xomashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi xodimlarining uzluksiz ish staji (uzoq muddatli ishlaganlik) uchun ustamalarni toʻlash yillik dasturlarda nazarda tutilgan kon burgʻulash ishlarining fizik hajmlarini bajarish va foydali qazilmalar zaxiralari oʻsishi choraklik prognoz parametrlarining bajarilishiga koʻra har oyda amalga oshiriladi.

28. Davlat geologiya qoʻmitasi tizimi boʻyicha geologiya-qidiruv, gidrogeologiya, ilmiy-tadqiqot ishlarini va mineral-xomashyo bazasini rivojlantirish va qayta toʻldirishning har yilgi davlat dasturlari doirasidagi boshqa ishlarni bajaruvchi xodimlarga uzluksiz ish staji uchun ustamalarni toʻlashga doir sarf-xarajatlar ishlar tannarxiga kiradi.

29. Davlat geologiya qoʻmitasini qayta tashkil qilish va tugatish qonun hujjatlarida belgilangan tartibda amalga oshiriladi.

1. Mineral-xomashyo bazasini rivojlantirish va qayta toʻldirish davlat dasturlari doirasida tegishli loyihalar (yoki ularning bir qismi)ni amalga oshirayotgan idoraviy mansub tashkilotlar direktorlari va direktorlar oʻrinbosarlari.

2. Bosh geologlar, bosh geolog oʻrinbosarlari, barcha toifadagi geologlar, texnik-geologlar, geologiya mutaxassisligining barcha texniklari, gidrogeologlar, geodezistlar, geofiziklar, marksheyderlar, topograflar, paleontologlar, geokimyogarlar va barcha toifadagi kimyogarlar.

3. Partiyalar, boʻlimlar, shuʼbalar, otryadlar, uchastkalar va guruhlar boshliqlari.

4. Bosh muhandislar, bosh muhandislar oʻrinbosarlari, barcha toifadagi muhandislar, bosh texnologlar va barcha toifadagi texnologlar, bosh geofiziklar va barcha toifadagi geofiziklar, bosh marksheyderlar va barcha toifadagi marksheyderlar.

5. Bosh mutaxassislar va barcha toifadagi ilmiy xodimlar.

6. Iqtisodiyot va buxgalteriya xizmatlari mutaxassislari.

7. Burgʻulash ustalari, burgʻulash qurilmasi mashinistlari, mashinist yordamchilari.

8. Kon ishlari ustalari, shaxta boshliqlari, kon ishchilari, yer osti ishlari ishchilari va geologiya-qidiruv ishlarining boshqa xizmatchilari.

9. Geologiya-qidiruv ishlarida qatnashuvchi ishchilar va transport vositalari haydovchilari.

10. Geologiya-qidiruv ishlarida bevosita qatnashuvchi boshqa mutaxassislar.

1. Vazirlar Mahkamasining “Oʻzbekiston Respublikasi Davlat geologiya va mineral resurslar qoʻmitasi toʻgʻrisidagi Nizomni tasdiqlash haqida” 2011-yil 8-iyundagi 165-son qarori (Oʻzbekiston Respublikasi QT, 2011-yil, 6-son, 46- modda).

2. Vazirlar Mahkamasining “Oʻzbekiston Respublikasining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Kichik biznes va xususiy tadbirkorlikni yanada rivojlantirish uchun qulay ishbilarmonlik muhitini shakllantirishga doir qoʻshimcha chora-tadbirlar toʻgʻrisida” 2011-yil 24-avgustdagi PF-4354-son Farmoni, Oʻzbekiston Respublikasi Prezidentining “Byurokratik toʻsiqlarni bartaraf etish va tadbirkorlik faoliyati erkinligini yanada oshirish chora-tadbirlari toʻgʻrisida” 2011-yil 25-avgustdagi PQ-1604-son qarori)” 2011-yil 2-noyabrdagi 294-son qaroriga ilovaning 34-bandi (Oʻzbekiston Respublikasi QT, 2011-y., 11-son, 85-modda).

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar va qoʻshimchalar kiritish toʻgʻrisida (Oʻzbekiston Respublikasi Vazirlar Mahkamasining “Tadbirkorlik faoliyati sohasidagi ruxsat berish tartib-taomillari toʻgʻrisida”gi Oʻzbekiston Respublikasi Qonunini amalga oshirish chora-tadbirlari toʻgʻrisida” 2013-yil 15-avgustdagi 225-son qarori) 2013-yil 8-oktabrdagi 276-son qaroriga ilovaning 11-bandi (Oʻzbekiston Respublikasi QT, 2013-yil, 10-son, 72-modda).

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasining “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” 2016-yil 25-apreldagi OʻRQ-405-son Qonunining 6-moddasi)” 2016-yil 9-noyabrdagi 383-son qaroriga ilovaning 1-bandi (Oʻzbekiston Respublikasi QT, 2016-yil, 11-son, 101-modda).