Oʻzbekiston Respublikasi Prezidentining “Meva-sabzavot, kartoshka, poliz mahsulotlari va uzumni xarid qilish va ulardan foydalanish tizimini takomillashtirishga doir qoʻshimcha chora-tadbirlar toʻgʻrisida” 2017-yil 6-yanvardagi PQ-2717-son qaroriga muvofiq, shuningdek zamonaviy axborot-kommunikatsiya texnologiyalari asosida kontraktatsiya shartnomalarining tuzilishi va ularning bajarilishini hisobga olish va monitoringini olib borishning elektron tizimini ishlab chiqish va joriy etish maqsadida Vazirlar Mahkamasi qaror qiladi:

1. Vazirlar Mahkamasining “Yangi meva-sabzavot mahsulotlari, kartoshka, poliz mahsulotlari va uzum xarid qilish yuzasidan davlat buyurtmasi toʻgʻrisidagi nizomni tasdiqlash haqida” 2016-yil 15-iyundagi 206-son qaroriga (Oʻzbekiston Respublikasi QT, 2016-y., 6-son, 55-modda) ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Iqtisodiyot vazirligi, “Oʻzbekoziqovqatxolding” xolding kompaniyasi, “Oʻzvinosanoat-xolding” xolding kompaniyasi, “Oʻzbekoziqovqatzaxira” uyushmasi, “Oʻzagroeksport” AJ Axborot texnologiyalari va kommunikatsiyalarini rivojlantirish vazirligi bilan birgalikda yangi meva-sabzavot mahsulotlari, kartoshka, poliz mahsulotlari va uzum xarid qilish yuzasidan davlat buyurtmasi parametrlarining bajarilishi monitoringining elektron tizimini xalqaro tajribani hisobga olgan holda ikki oy muddatda ishlab chiqsinlar va joriy etsinlar.

3. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — qishloq va suv xoʻjaligi vaziri Z.T.Mirzayev zimmasiga yuklansin.

1. Quyidagi mazmundagi 5¹-band qoʻshilsin:

“5¹. Qoraqalpogʻiston Respublikasi Vazirlar Kengashi, viloyatlar hokimliklari “Oʻzbekoziqovqatxolding” xolding kompaniyasi, “Oʻzvinosanoat-xolding” xolding kompaniyasi, “Oʻzbekoziqovqatzaxira” uyushmasi, “Oʻzagroeksport” AJ ixtisoslashtirilgan tashqi savdo kompaniyasi bilan birgalikda har yili noyabr oyida meva-sabzavot mahsulotlari yetishtiruvchilar va ularni qayta ishlovchi, tayyorlovchi va eksport qiluvchi tashkilotlar oʻrtasida kontraktatsiya shartnomalari tuzish uchun hududiy meva-sabzavot yarmarkalari oʻtkazilishini taʼminlasinlar”.

2. Ilovada:

a) 2-bandning toʻrtinchi xatboshiga “va tashkiliy-huquqiy shakllaridan qatʼi nazar, meva-sabzavot mahsulotlarini qayta ishlovchi, tayyorlovchi va eksport qiluvchi boshqa tashkilotlar” soʻzlari qoʻshilsin;

b) 9-bandning birinchi xatboshi quyidagi tahrirda bayon qilinsin:

“Davlat buyurtmasi doirasida meva-sabzavot mahsulotlari xarid qilish, shu jumladan hududiy meva-sabzavot yarmarkasiga tayyorgarlik koʻrish davrida, shuningdek yarmarkalar oraligʻidagi davrda yetkazib beruvchilar bilan tuziladigan kontraktatsiya shartnomalari asosida amalga oshiriladi”;

v) Nizomga ilovada:

VIII bosqichning “Tadbirlar” ustunidagi “Meva-sabzavot mahsulotlarini yoʻnalishlar boʻyicha, shu jumladan qayta ishlash, gʻamlash va eksport qilish uchun xarid qilish yuzasidan kontraktatsiya shartnomalari” soʻzlari “Yangi va qayta ishlangan meva-sabzavot mahsulotlarini eksport qilish yuzasidan kontraktlar” soʻzlari bilan almashtirilsin”;

quyidagi mazmundagi XI¹ bosqich qoʻshilsin:

XV bosqichning “Bajarish muddatlari” ustunidagi “7” raqami “10” raqami bilan almashtirilsin.