O‘zbekiston Respublikasi Vazirlar Mahkamasining
qarori
Texnik vositalarning elektromagnit mosligi to‘g‘risidagi umumiy texnik reglamentni tasdiqlash haqida
“Texnik jihatdan tartibga solish to‘g‘risida”gi O‘zbekiston Respublikasi Qonuniga muvofiq, Texnik vositalarning elektromagnit mosligiga yagona talablarni belgilash maqsadida Vazirlar Mahkamasi qaror qiladi:
1. Texnik vositalarning elektromagnit mosligi to‘g‘risidagi umumiy texnik reglament ilovaga* muvofiq tasdiqlansin va rasmiy e’lon qilingan kunidan boshlab olti oy o‘tgach amalga kiritilsin.
* Ilova rus tilidagi matnda berilgan.
2. “Texnik jihatdan tartibga solish to‘g‘risida”gi O‘zbekiston Respublikasi Qonuni talablariga muvofiq texnik reglamentlarning amalga kiritilishi munosabati bilan, standartlashtirish bo‘yicha ilgari qabul qilingan normativ hujjatlar ko‘rsatilgan mahsulotlar, ishlar va xizmatlar uchun majburiylik xususiyatini yo‘qotishi va belgilangan tartibda qo‘llanilishida ixtiyoriylik tusini olishi ma’lumot uchun qabul qilinsin.
3. “O‘zstandart” agentligi vakolatli organlar bilan birgalikda, ushbu qaror bilan qabul qilingan Umumiy texnik reglament belgilangan tartibda amalga kiritilgan kundan boshlab, texnik vositalarning elektromagnit mosligiga nisbatan majburiy talablarning majburiyligini bekor qilish va standartlashtirish bo‘yicha normativ hujjatlarning qo‘llanilishida ixtiyoriylikni ta’minlash chora-tadbirlarini ko‘rsin.
4. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi, “O‘zstandart” agentligi O‘zbekiston milliy teleradiokompaniyasi bilan birgalikda aholi, davlat va xo‘jalik boshqaruvi organlari, tadbirkorlik faoliyati subyektlarining tasdiqlangan Umumiy texnik reglamentning maqsadi, mazmuni va uni qo‘llash tartibi to‘g‘risida keng xabardor qilinishini ta’minlasinlar.
5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari U.U. Rozuqulov zimmasiga yuklansin.
O‘zbekiston Respublikasining Bosh vaziri Sh. MIRZIYOYEV
Toshkent sh.,
2016-yil 21-noyabr,
389-son
(O‘zbekiston Respublikasi qonun hujjatlari to‘plami, 2016-y., 47-son, 540-modda; Qonun hujjatlari ma’lumotlari milliy bazasi, 15.11.2017-y., 09/17/915/0259-son)