Davlat va korporativ xaridlarning shaffofligi va raqobatdoshligini oshirish, ularni amalga oshirish jarayoniga zamonaviy axborot-kommunikatsiya texnologiyalarini joriy etish va xaridlar jarayonida huquqbuzarliklarning oldini olish maqsadida Vazirlar Mahkamasi qaror qiladi:

1. Belgilab qoʻyilsinki:

davlat va korporativ xaridlar boʻyicha shartnomalarning ularni amalga oshirish toʻgʻrisidagi eʼlonni “Oʻzbekiston Respublika tovar-xomashyo birjasi” aksiyadorlik jamiyatining maxsus axborot portalida oldindan joylashtirmasdan tuzilishiga yoʻl qoʻyilmaydi, qonun hujjatlarida nazarda tutilgan holatlar bundan mustasno;

davlat va korporativ xaridlar boʻyicha shartnomalarni nohalol yetkazib beruvchilar reyestriga kiritilgan yetkazib beruvchilar bilan tuzish taqiqlanadi;

davlat va korporativ xaridlarni tashkil etishga masʼul boʻlgan rahbarlar va mansabdor shaxslar davlat va korporativ xaridlar toʻgʻrisidagi qonun hujjatlari talablariga soʻzsiz rioya etilishi uchun shaxsan javob beradilar.

2. “Oʻzbekiston respublika tovar-xomashyo birjasi” aksiyadorlik jamiyati manfaatdor vazirliklar va idoralar bilan birgalikda quyidagilarni taʼminlasin:

birja savdolari, davlat va korporativ xaridlarining natijalari boʻyicha kelib chiqqan narxlar darajasi haqidagi axborotni shakllantirish va erkin tarzda “Oʻzbekiston respublika tovar-xomashyo birjasi” aksiyadorlik jamiyati maxsus axborot portalining barcha foydalanuvchilariga taqdim etishni taʼminlaydigan dasturiy modulni ishlab chiqish va 2017-yil 1-yanvardan boshlab joriy etish;

2017-yil mobaynida davlat va korporativ xaridlar ehtiyojlari, elektron tijorat uchun tovarlar (ishlar, xizmatlar)ning Milliy klassifikatorini joriy etish;

2017-2018-yillar davrida shartnomaviy majburiyatlarning bajarilishi yuzasidan monitoring va nazoratni tashkil qilgan holda, shuningdek xaridlar qatnashchilariga masofaviy boshqaruv boʻyicha ularning hisob-kitob-kliring palatasidagi shaxsiy hisobvaraqlaridagi mablagʻlari bilan xizmatlar koʻrsatgan holda davlat va korporativ xaridlar boʻyicha shartnomalar doirasida toʻlovlar boʻyicha hisob-kitoblarni va mahsulot yetkazib berishni hisob-kitob-kliring palatasi orqali tashkil etish mexanizmini bosqichma-bosqich joriy etish.

3. “Oʻzbekiston respublika tovar-xomashyo birjasi” aksiyadorlik jamiyatining maxsus axborot portalida davlat va korporativ xaridlar boʻyicha axborotni joylashtirish va oshkor qilish tartibi toʻgʻrisidagi nizom ilovaga muvofiq tasdiqlansin.

4. “Oʻzbekiston respublika tovar-xomashyo birjasi” aksiyadorlik jamiyati Oʻzbekiston Respublikasi Moliya vazirligi huzuridagi Moliya organlari hamda budjet tashkilotlarining moliya-hisob boʻlinmalari xodimlarini tayyorlash va qayta tayyorlash oʻquv markazi bilan birgalikda “Oʻzbekiston respublika tovar-xomashyo birjasi” aksiyadorlik jamiyatining maxsus axborot portalida onlayn-taʼlim moduli imkoniyatlaridan foydalangan holda davlat va korporativ xaridlar jarayoni qatnashchilari muntazam ravishda malaka oshirishini taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom “Oʻzbekiston respublika tovar-xomashyo birjasi” aksiyadorlik jamiyatining (keyingi oʻrinlarda OʻzRTXB deb ataladi) maxsus axborot portalida davlat va korporativ xaridlar boʻyicha axborotni joylashtirish va oshkor qilish tartibini belgilaydi.

2. Ushbu Nizomning amal qilishi budjet tashkilotlariga, budjet mablagʻlarini oluvchilarga, Oʻzbekiston Respublikasi Moliya vazirligi huzuridagi budjetdan tashqari Respublika maqsadli kitob jamgʻarmasi, Oʻzbekiston Respublikasi Xalq taʼlimi vazirligi huzuridagi Bolalar sportini rivojlantirish jamgʻarmasi mablagʻlarini oluvchilarga, tabiiy monopoliyalar subyektlariga, davlat unitar korxonalariga hamda ustav fondida 50 foizdan ortiq davlat ulushi mavjud boʻlgan xoʻjalik jamiyatlariga, davlat va xoʻjalik boshqaruvi organlariga, shuningdek vakolatli boshqa organlar va OʻzRTXBning maxsus axborot portalidan foydalanuvchilarga nisbatan tatbiq etiladi.

3. Ushbu Nizom maqsadlarida quyidagi tushunchalardan foydalaniladi:

agent — birjada akkreditatsiya tartib-taomillaridan oʻtgan hamda buyurtmachilar va yetkazib beruvchilarga topshiriq shartnomasi asosida ularning elektron auksion savdolarda qatnashishini taʼminlashga doir professional xizmatlar koʻrsatadigan yuridik shaxs;

davlat xaridlari — budjet tizimi va boshqa markazlashtirilgan manbalarning budjet mablagʻlari hisobiga amalga oshiriladigan tovarlar (ishlar, xizmatlar) xaridlari;

buyurtmachi — tovarlar (ishlar, xizmatlar) davlat va korporativ xaridlarini amalga oshiruvchi yuridik shaxs;

portalning yopiq qismi — mijozning maxfiy axboroti saqlanadigan, ushbu Nizomga muvofiq muayyan toifadagi foydalanuvchilar foydalana oladigan portalning qismi;

xaridni amalga oshirish yakunlari toʻgʻrisidagi axborot — davlat yoki korporativ xaridlar boʻyicha tovarlar (ishlar, xizmatlar)ni yetkazib berish boʻyicha tuzilgan shartnoma haqidagi axborot;

mijoz — qonun hujjatlariga muvofiq portalda axborot joylashtiradigan shaxs;

korporativ xaridlar — tabiiy monopoliyalar subyektlari, davlat unitar korxonalari va ustav fondida 50 foizdan ortiq davlat ulushi mavjud boʻlgan xoʻjalik jamiyatlari tomonidan amalga oshiriladigan tovarlar (ishlar, xizmatlar) xaridlari;

xaridni amalga oshirish toʻgʻrisidagi eʼlon — buyurtmachining davlat yoki korporativ xaridlarni amalga oshirish muddatlari va talablari toʻgʻrisidagi portalda joylashtiriladigan axboroti;

portalning ochiq qismi — ushbu Nizomda belgilangan tartibda mijozlar tomonidan joylashtirilgan axborotdan foydalana olishni taʼminlovchi portalning umumiy foydalanishga moʻljallangan qismi;

shaxsiy idoraviy kabinet — davlat va xoʻjalik boshqaruvi organlari, boshqa vakolatli organlarning OʻzRTXB maxsus axborot portalidagi individual sahifasi, uning yordamida ular tomonidan tegishli individual loginlar va parollarni qoʻllagan holda zarur axborotdan erkin foydalana olishi taʼminlanadi;

shaxsiy kabinet — buyurtmachilar va yetkazib beruvchilarning (ularning agentlarining) OʻzRTXB maxsus axborot portalidagi individual sahifasi, uning yordamida ular tomonidan tegishli individual loginlar va parollarni qoʻllagan holda zarur axborotdan foydalana olishi taʼminlanadi;

reja-jadval — buyurtmalar, tovarlar (ishlar, xizmatlar)ni joylashtirish hajmlari va muddatlarini (har yillik yoki har choraklik) nazarda tutadigan hujjat;

foydalanuvchilar — ushbu Nizomga muvofiq portalda joylashtirilgan axborotdan foydalana olishi taʼminlangan davlat va xoʻjalik boshqaruvi organlari, boshqa vakolatli organlar, yuridik va jismoniy shaxslar;

yetkazib beruvchi — davlat yoki korporativ xaridlar boʻyicha shartnoma asosida tovarlar (ishlar, xizmatlar)ni yetkazib berishni amalga oshiruvchi xoʻjalik subyekti, shu jumladan yakka tartibdagi tadbirkor;

Hukumat komissiyasi — davlat xaridlari boʻyicha Hukumat komissiyasi va/yoki Davlat ulushi ustuvor boʻlgan tabiiy monopoliyalar subyektlari, korxonalar va tashkilotlarning elektron xaridlari boʻyicha Hukumat komissiyasi;

axborotni oshkor qilish — mijozlar tomonidan davlat va korporativ xaridlariga doir maʼlumotlarni OʻzRTXB maxsus axborot portalida eʼlon qilish;

boʻlib oʻtmagan bitimlar reyestri — lotlar roʻyxati, ular boʻyicha ushbu Nizomga muvofiq boʻlib oʻtmagan deb eʼtirof etilgan savdolar natijalari;

OʻzRTXBning maxsus axborot portali (keyingi oʻrinlarda portal deb ataladi) — davlat va korporativ xaridlarning amalga oshirilishi toʻgʻrisidagi eʼlonlarni, ularning yakunlari toʻgʻrisidagi axborotni, shuningdek boshqa zarur axborotni joylashtirish va koʻrishni taʼminlaydigan OʻzRTXBning rasmiy veb-sayti;

axborotni joylashtirish va oshkor qilish jarayoni qatnashchilari — OʻzRTXB, mijozlar, ularning agentlari, Hukumat komissiyalarining ishchi organlari va boshqa vakolatli organlar.

4. Quyidagilar portalning asosiy maqsadlari hisoblanadi:

a) tovarlar (ishlar, xizmatlar)ning davlat va korporativ xaridlari boʻyicha axborot bazasini yaratish, saqlab turish va muntazam yangilab borish;

b) quyidagilar uchun shart-sharoitlar yaratish:

tovarlar (ishlar, xizmatlar)ning davlat va korporativ xaridlari boʻyicha axborotni joylashtirish;

davlat va korporativ xaridlar jarayonlari yuzasidan zarur darajadagi davlat va jamoatchilik nazorati, ushbu sohaning qonun hujjatlariga rioya qilish;

davlat va korporativ buyurtmani joylashtirishda ochiqlik, oshkoralik va raqobatdoshlik tamoyillarini, shuningdek buyurtmachilar yoki yetkazib beruvchilarning (ularning agentlarining) teng huquqliligini taʼminlash;

v) davlat va xoʻjalik boshqaruvi organlari, boshqa vakolatli organlar, buyurtmachilar va yetkazib beruvchilar, ommaviy axborot vositalari va jamoatchilikni tovar bozorlari konyunkturasi toʻgʻrisidagi axborot bilan taʼminlash.

5. OʻzRTXB quyidagi huquqlarga ega:

mijozlar tomonidan portalda joylashtiriladigan fayllarga nisbatan texnologik talablarni, shuningdek axborot xavfsizligini taʼminlash boʻyicha talablarni belgilash;

mijozlarning ishonchli boʻlmagan axborot va soxta maʼlumotlarni tarqatish, shuningdek raqobatni cheklaydigan yoki nohalol raqobat olib borishga qaratilgan axborotni joylashtirish boʻyicha harakatlariga chek qoʻyish;

davlat va xoʻjalik boshqaruvi organlari, boshqa vakolatli organlarga ular tomonidan portaldan olingan axborotning maxfiyligiga rioya qilish boʻyicha talablarni bajarmaslik hollari aniqlanganda erkin foydalana olish huquqlarini cheklash;

xaridni amalga oshirish toʻgʻrisidagi eʼlonni chop etmagan taqdirda buyurtmachiga xaridni amalga oshirish yakunlari toʻgʻrisidagi axborotni eʼlon qilishni rad etish.

OʻzRTXB qonun hujjatlariga muvofiq boshqa huquqlarga ham ega boʻlishi mumkin.

6. OʻzRTXB quyidagilarni taʼminlashi shart:

axborotni portalda joylashtirishni taʼminlovchi apparat va dasturiy-texnik vositalarni joriy etish va hamrohlik qilish hamda ushbu Nizomda belgilangan tartibda undan erkin foydalana olishni taʼminlash;

davlat va korporativ xaridlarni amalga oshirish tartibini tartibga soluvchi normativ-huquqiy hujjatlarni, Hukumat komissiyalarining qarorlarini, shuningdek davlat yoki korporativ xaridlar toʻgʻrisidagi qonun hujjatlarini buzgan buyurtmachilar va yetkazib beruvchilar va/yoki ularning mansabdor shaxslariga nisbatan koʻrilgan choralar haqidagi axborotni portalda eʼlon qilish;

davlat va korporativ xaridlar boʻyicha tuzilgan shartnomalar va boʻlib oʻtmagan bitimlar reyestrini, shuningdek kafolatlovchi va nohalol yetkazib beruvchilar reyestrini shakllantirish, yuritish va eʼlon qilish;

portalning uzluksiz ishlashi;

portalda joylashtirilgan axborotning saqlanishi va yaxlitligi;

axborotni joylashtirish jarayoni qatnashchilarining tijorat va xizmat sirlarini tashkil qiluvchi maʼlumotlarning maxfiyligi;

ushbu Nizomda belgilangan tartibda davlat va xoʻjalik boshqaruvi organlari, boshqa vakolatli organlarning axborotdan foydalana olishlarini.

OʻzRTXB qonun hujjatlariga muvofiq boshqa majburiyatlarga ham ega boʻlishi mumkin.

7. Mijozlar quyidagi huquqlarga ega:

ular tomonidan portalda joylashtirilgan maʼlumotlar, login va parol, ushbu Nizomda belgilangan tartibda axborotni joylashtirish va oshkor etish imkoniyatlaridan foydalanish;

agentlar bilan davlat va korporativ xaridlarida ishtirok etish, ularga login va parolni taqdim etish orqali portalda axborotni joylashtirish uchun topshiriq shartnomasini tuzish.

Mijozlar qonun hujjatlariga muvofiq boshqa huquqlarga ham ega boʻlishi mumkin.

8. Mijozlar quyidagilarga majbur:

portalda zarur axborotni belgilangan tartibda joylashtirish;

portalda joylashtirilgan axborotning ishonchliligini taʼminlash va soxta maʼlumotlar tarqalishining oldini olish choralarini koʻrish;

OʻzRTXB tomonidan taqdim etilgan, shuningdek agent tomonidan tuzilgan topshiriq shartnomalariga muvofiq koʻrsatiladigan xizmatlarga haq toʻlash;

portalda axborot joylashtirish imkoniyatlaridan faqat ushbu Nizomda nazarda tutilgan maqsadlarda foydalanish;

raqobatni cheklashga olib keluvchi yoki olib kelishi mumkin boʻlgan harakatlar amalga oshirilishiga yoʻl qoʻymaslik.

Mijozlar qonun hujjatlariga muvofiq boshqa majburiyatlarga ham ega boʻlishlari mumkin.

9. Agentlar quyidagi huquqlarga ega:

mijozlardan ushbu Nizomda belgilangan tartibda portalda axborotni joylashtirish, oʻzgartirish yoki oʻchirish uchun foydalana olish huquqini olish;

koʻrsatgan xizmatlari uchun mijozlardan toʻlovlar undirish.

Agentlar qonun hujjatlariga muvofiq boshqa huquqlarga ham ega boʻlishlari mumkin.

10. Agentlar quyidagilarga majbur:

topshiriq shartnomasida nazarda tutilgan axborotni oʻz vaqtida va toʻliq hajmda joylashtirish va oshkor qilish boʻyicha majburiyatlarni bajarish;

mijozning aniq koʻrsatmalariga muvofiq axborotni joylashtirish;

mijozga portalda axborotni joylashtirish bilan bogʻliq masalalar boʻyicha maslahat berish;

axborotning maxfiyligiga rioya qilish.

Agentlar qonun hujjatlariga muvofiq boshqa majburiyatlarga ham ega boʻlishlari mumkin.

11. Davlat va xoʻjalik boshqaruvi organlari, boshqa vakolatli organlar quyidagi huquqlarga ega:

portalda joylashtirilgan axborotdan ushbu Nizomda nazarda tutilgan tartibda va hajmlarda foydalanish huquqini olish;

portaldan olgan axborotdan faqat qonun hujjatlariga muvofiq ularga yuklangan vazifalarni amalga oshirish uchun foydalanish.

Davlat va xoʻjalik boshqaruvi organlari, boshqa vakolatli organlar qonun hujjatlariga muvofiq boshqa huquqlarga ham ega boʻlishlari mumkin.

12. Davlat va xoʻjalik boshqaruvi organlari, boshqa vakolatli organlar qonun hujjatlariga muvofiq portaldan olingan axborotning maxfiyligiga rioya qilishga majbur.

Davlat va xoʻjalik boshqaruvi organlari, boshqa vakolatli organlar qonun hujjatlariga muvofiq boshqa majburiyatlarga ham ega boʻlishlari mumkin.

13. Barcha mijozlar ommaviy axborot vositalarida eʼlon qilish uchun ochiq axborotdan foydalanishda yoki uchinchi shaxslarga berishda majburiy tarzda portalga havola qilgan holda uning ishonchliligini taʼminlashga majbur.

14. Buyurtmachilar (ularning agentlari) majburiy tartibda portalda quyidagi axborotni joylashtiradilar:

davlat va korporativ xaridlarning reja-jadvali;

davlat yoki korporativ xaridlarni amalga oshirish haqidagi eʼlon;

portaldan tashqarida amalga oshirilgan davlat va korporativ xaridlar yakunlari haqidagi axborot.

15. Portaldan tashqarida amalga oshirilgan davlat va korporativ xaridlar yakunlari haqidagi axborot tarkibida buyurtmachilar majburiy tartibda quyidagilarni koʻrsatadilar:

portaldan tashqarida davlat va korporativ xaridlarini tashkil qilish usuli;

portalda eʼlonni joylashtirishda berilgan davlat va korporativ xaridlar haqidagi eʼlonning identifikatsiya raqami;

shartnoma tuzilgan sana;

buyurtmachi va yetkazib beruvchining rekvizitlari;

davlat va korporativ xaridlar predmeti;

davlat va korporativ xaridlar predmetining miqdori (hajmi);

xar bir birlik tovar (ishlar, xizmatlar) uchun narx;

shartnoma qiymati;

toʻlov shartlari;

yetkazib berish shartlari;

tanlov (tender) savdolari tashkilotchisining nomi;

tanlov (tender) savdolarida ishtirok etgan talabgorlarning soni, ularning soliq toʻlovchining individual raqami, nomi va pochta manzillari;

tanlov (tender) savdolarini tashkil qilishdagi boshlangʻich narx.

16. Portaldan tashqarida amalga oshirilgan davlat va korporativ xaridlar yakunlari haqidagi axborot buyurtmachi (uning agenti) tomonidan shaxsiy kabinet orqali shartnoma tuzilgan kundan eʼtiboran uch ish kunidan kechiktirmay joylashtiriladi.

17. Portalda joylashtiriladigan axborotga avtomatik tarzda identifikatsiya raqami beriladi.

18. Axborot shaxsiy kabinet orqali apparat va dasturiy-texnik vositalardan foydalangan holda joylashtiriladi.

19. OʻzRTXB portalda quyidagilarni joylashtiradi:

davlat va korporativ xaridlar jarayonlarini, birja va koʻrgazma-yarmarka savdosi va elektron tijoratni tartibga soluvchi normativ-huquqiy hujjatlar;

davlat va korporativ xaridlar toʻgʻrisida tuzilgan shartnomalar reyestri;

davlat va korporativ xaridlar boʻyicha boʻlib oʻtmagan bitimlar reyestri;

portalda sodir etilgan elektron koʻrgazma-yarmarka va boshqa elektron bitimlar reyestri;

portalda sodir etilgan birja va koʻrgazma-yarmarka savdosi natijalari va davlat va korporativ xaridlar natijalari haqidagi har choraklik statistik axborot;

OʻzRTXBda akkreditatsiya qilingan agentlar reyestri;

kafolatlovchi yetkazib beruvchilar reyestri;

nohalol yetkazib beruvchilar reyestri.

20. Hukumat komissiyalarining ishchi organlari portalda uch ish kuni mobaynida qabul qilingan qarorlar va Hukumat komissiyalarining topshiriqlari toʻgʻrisidagi axborotni, shuningdek tovarlar (ishlar, xizmatlar) davlat va korporativ xaridlari bilan bogʻliq boshqa axborotni joylashtiradi.

21. Davlat va korporativ xaridlar masalalari boʻyicha bahslar va kelishmovchiliklarni koʻrib chiqish boʻyicha maxsus komissiya, davlat va xoʻjalik boshqaruvchi organlari, shuningdek boshqa vakolatli organlar uch ish kuni mobaynida portalning ochiq qismida davlat yoki korporativ xaridlar toʻgʻrisidagi qonun hujjatlarini buzgan buyurtmachilar, yetkazib beruvchilar va/yoki ularning mansabdor shaxslariga nisbatan koʻrilgan choralar haqidagi axborotni joylashtiradilar.

22. OʻzRTXB maʼlumotlar bazasida axborotni (shu jumladan oʻzgartirishlar va qoʻshimchalar, shuningdek oʻzgartirish va qoʻshimchalar kiritilgan oldin joylashtirilgan axborotni) u portalda joylashtirilgan paytdan eʼtiboran besh yil mobaynida saqlanishini taʼminlaydi.

Axborotni undan foydalana olishni bloklash orqali oʻchirib tashlash uni oʻchirib tashlashni asoslovchi hujjatni majburiy tarzda joylashtirgan holda buyurtmachi tomonidan amalga oshiriladi. Oʻchirilgan axborot, shuningdek uning oʻchirilishini asoslovchi hujjat portalning maʼlumotlar bazasida ular joylashtirilgan paytdan eʼtiboran besh yil mobaynida saqlanadi.

23. Joylashtirilgan axborotga oʻzgartirishlar va qoʻshimchalar kiritganlik, shuningdek uni oʻchirganlik uchun ushbu oʻzgartirishlar, qoʻshimchalar va oʻchirish haqidagi qarorni imzolagan shaxs javobgar boʻladi.

24. OʻzRTXB foydalanuvchilar uchun portalning ochiq qismida quyidagi axborotdan foydalana olish huquqini taʼminlaydi:

kafolatlovchi yetkazib beruvchilar reyestri;

nohalol yetkazib beruvchilar reyestri;

davlat va korporativ xaridlar reja-jadvallari;

davlat va korporativ xaridlarni amalga oshirish haqidagi eʼlonlar;

davlat va korporativ xaridlari haqidagi shartnomalar reyestrlari (qatnashchilarning rekvizitlari koʻrsatilmagan holda);

yuqori likvidli va monopol turdagi mahsulotlarni birja savdolarida sotish natijalari boʻyicha shakllangan oʻrtacha narxlar haqidagi axborot;

davlat va korporativ xaridlar natijalari boʻyicha narxlar darajasi haqidagi axborot;

Hukumat komissiyalarining qarorlari.

25. OʻzRTXB foydalanuvchilarga roʻyxatdan oʻtkazishsiz va toʻlov undirmasdan portalning ochiq qismidan erkin foydalana olish huquqini taʼminlaydi.

26. Portalning yopiq qismida joylashtirilgan axborotdan foydalana olish huquqi davlat va xoʻjalik boshqaruvchi organlariga, vakolatli boshqa organlarga ular tomonidan ochilgan shaxsiy idoraviy kabinetlar orqali taʼminlanadi.

Portalning yopiq qismida joylashtirilgan axborotdan foydalana olish huquqi taʼminlanadigan davlat va xoʻjalik boshqaruvchi organlari, boshqa vakolatli organlari roʻyxati, shuningdek ularga taqdim etiladigan axborot hajmi Hukumat komissiyasi tomonidan tasdiqlanadi.

Davlat va xoʻjalik boshqaruvi organlari, boshqa vakolatli organlar rahbarlari oʻzlarining farmoyish hujjatlari bilan Hukumat komissiyasining tegishli qarori bilan foydalana olish huquqi taʼminlanadigan xizmat maqsadlarida axborotni olishga masʼul boʻlgan mansabdor shaxslarni tayinlaydilar va ular toʻgʻrisida OʻzRTXBni xabardor qiladilar.

OʻzRTXB tegishli soʻrovnoma olingan paytdan eʼtiboran ikki ish kuni mobaynida mansabdor shaxslarga axborotdan foydalana olish huquqini taʼminlaydi.

Davlat va xoʻjalik boshqaruvchi organlarining, boshqa vakolatli organlarning tarkibiy (hududiy) boʻlinmalarining portalning yopiq qismida joylashtirilgan axborotdan foydalana olishlari ushbu organlar markaziy apparatlarining foydalana olish huquqi bilan taʼminlangan xodimlari tomonidan ushbu Nizomga muvofiq ularning shaxsiy kabinetlari orqali taʼminlanadi.

27. Ushbu Nizomning talablari buzilishida aybdor boʻlgan shaxslar qonun hujjatlarida belgilangan tartibda javobgar boʻladilar.