Portlovchi moddalar va portlatish vositalarining (keyingi oʻrinlarda matnda “portlovchi moddalar” deb yuritiladi) xavfsizligini taʼminlash, ularni Oʻzbekiston Respublikasiga olib kirish, transportda tashish, saqlash va ulardan foydalanish tartibini takomillashtirish hamda ushbu materiallar jinoyat maqsadlarida oʻgʻirlanishi, talon-toroj qilinishi, foydalanilishining oldini olish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasiga olib kirishda nazorat qilinadigan sanoat maqsadidagi portlovchi materiallar roʻyxati 1-ilovaga muvofiq;

Sanoat maqsadidagi portlovchi materiallarni Oʻzbekiston Respublikasiga olib kirish tartibi toʻgʻrisidagi nizom 2-ilovaga muvofiq tasdiqlansin.

2. Belgilab qoʻyilsinki:

sanoat maqsadidagi portlovchi materiallarni Oʻzbekiston Respublikasiga olib kirish faqat portlatish ishlarini bajarish uchun litsenziyalarga ega boʻlgan sanoat korxonalarining buyurtmanomalari asosida Oʻzbekiston Respublikasi Ichki ishlar vazirligi tomonidan beriladigan ruxsatnomalar asosida yuridik shaxslar tomonidan amalga oshiriladi;

Oʻzbekiston Respublikasi hududiga aluminiy kukuni va qurumini (TIF TN kodlari 760310000, 760320000) olib kirish isteʼmolchi korxonalarning asoslangan buyurtmanomalari asosida faqat Oʻzbekiston Respublikasi Ichki ishlar vazirligi tomonidan beriladigan ruxsatnomalar asosida amalga oshiriladi;

portlovchi moddalar maxsus jihozlangan avtotransport vositalari va temir yoʻl vagonlarida faqat Oʻzbekiston Respublikasi Ichki ishlar vazirligining qurollangan boʻlinmalari soqchiligi ostida tashiladi;

portlovchi moddalarni Oʻzbekiston Respublikasi havo kengligida fuqaro aviatsiyasining havo kemalari bilan tashish qatʼiyan taqiqlanadi. Istisno hollarda bunday tashish fuqaro aviatsiyasining havo kemalari bilan xavfsizlikning zarur chora-tadbirlariga rioya qilingan holda Oʻzbekiston Respublikasi Vazirlar Mahkamasining alohida qarori boʻyicha amalga oshirilishi mumkin;

uzoq vaqt saqlanadigan portlovchi materiallar omborlari Ichki ishlar vazirligining boʻlinmalari tomonidan qoʻriqlanadi, qisqa muddatli, koʻchma sarflash va yer osti omborlari Ichki ishlar vazirligi boʻlinmalari yoki idoraviy harbiylashtirilgan soqchilik xizmati tomonidan qoʻriqlanishi mumkin;

portlovchi moddalarni hisobga olish, saqlash, transportda tashish va ulardan foydalanishning belgilangan qoidalariga rioya qilinishi ustidan nazorat “Sanoatgeokontexnazorat” davlat inspeksiyasi bilan birgalikda Ichki ishlar vazirligi tomonidan amalga oshiriladi.

Oʻzbekiston Respublikasi Vazirlar Mahkamasining avval chiqarilgan qarorlariga muvofiq tuzilgan portlovchi materiallarni xarid qilish va olib kirishga kontraktlar ular boʻyicha majburiyatlar bajarilgunga qadar amal qiladi.

3. Zaryadni masofadan turib (kontaktsiz) portlatish qurilmalarini Oʻzbekiston Respublikasi hududiga olib kirish va ulardan portlatish ishlarini bajarishda foydalanish taqiqlansin.

Navoiy kon-metallurgiya kombinatiga “Sanoatgeokontexnazorat” davlat inspeksiyasi bilan kelishuv boʻyicha Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Elektromagnit moslik markazi tomonidan ruxsat berilgan chastotada ishlash sharti bilan Muruntov konida quduq zaryadlari bloklarini masofadan turib boshqarishga maxsus moʻljallangan “Druza-M” tipidagi portlatish apparatini olib kirishga istisno tariqasida ruxsat berilsin.

Navoiy kon-metallurgiya kombinati rahbariyatiga (N.I. Kucherskiy) xavfsizlik chora-tadbirlariga rioya qilgan holda mazkur apparatni olib kirish, hisobga olish, saqlash va undan maqsadli foydalanish uchun shaxsiy javobgarlik yuklansin.

4. Ichki ishlar vazirligi (Z.A. Almatov) “Sanoatgeokontexnazorat” davlat inspeksiyasi (R.T. Saidov) bilan birgalikda Navoiy kon-metallurgiya kombinatidagi mavjud “Druza-M” tipidagi zaryadni masofadan turib (kontaktsiz) portlatish qurilmalari saqlanishi va ulardan maqsadli foydalanilishi uchun qatʼiy nazoratni taʼminlasin.

5. Oʻzbekiston Davlat bojxona qoʻmitasi (B.A. Matlyubov), Milliy xavfsizlik xizmatining Davlat chegaralarini himoya qiluvchi qoʻmitasi (Gʻ.Q. Tishayev) sanoat maqsadidagi portlovchi materiallarni Oʻzbekiston Respublikasiga olib kirish tartibiga rioya qilinishi ustidan qatʼiy nazoratni taʼminlasin.

6. “Sanoatkontexnazorat” davlat inspeksiyasi (R.T. Saidov) Oʻzbekiston Respublikasi Ichki ishlar vazirligi, Favqulodda vaziyatlar vazirligi, Davlat tabiatni muhofaza qilish qoʻmitasi, “Oʻzbekiston temir yoʻllari” davlat-aksiyadorlik kompaniyasi, “Oʻzbekiston havo yoʻllari” milliy aviakompaniyasi, Parvozlar xavfsizligini nazorat qilish davlat inspeksiyasi, Davlat bojxona qoʻmitasi, “Oʻzbekneftgaz” milliy xolding kompaniyasi, Davlat geologiya qoʻmitasi, “Oʻzavtoyoʻl” davlat-aksiyadorlik kompaniyasi, “Oʻzbekenergo” davlat-aksiyadorlik kompaniyasi, “Olmaliq kon-metallurgiya kombinati” ochiq aksiyadorlik jamiyati, “Navoiy kon-metallurgiya kombinati” ochiq aksiyadorlik jamiyati, “Oʻzbekportlatishsanoat” ochiq aksiyadorlik jamiyati bilan birgalikda zamonaviy talablarni va shart-sharoitlarni hisobga olgan holda:

bir oy muddatda — Portlovchi materiallarni ishlab chiqarish, sotib olish, saqlash, transportda tashish, ulardan foydalanish va ularni hisobga olish tartibi toʻgʻrisidagi yoʻriqnomani, shuningdek Oʻzbekiston Respublikasi hududida portlovchi materiallarni tashish qoidalarini (ularda mutaxassislarga qoʻyiladigan ishlab chiqarish talablari va ishga qoʻyishni rasmiylashtirish tartibi nazarda tutilsin);

2005-yil 1-yanvargacha — Portlatish ishlarini bajarishda xavfsizlikning yagona talablarini ishlab chiqsin hamda belgilangan tartibda Oʻzbekiston Respublikasi Vazirlar Mahkamasiga kiritsin.

Ikki oy muddatda portlovchi materiallarni ishlab chiqaradigan yoki ulardan foydalanadigan korxonalarda portlovchi materiallar, portlatish qurilmalarini tashish, saqlash va portlatish ishlarini amalga oshirishga qoʻyilgan xodimlar attestatsiyadan oʻtkazilsin.

8. Adliya vazirligi (A.A. Polvon-zoda) vazirliklar va idoralar bilan birgalikda idoraviy normativ hujjatlarni mazkur qaror talablariga muvofiqlashtirsin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev va Oʻzbekiston Respublikasi Prezidenti huzuridagi Milliy xavfsizlik kengashi Kotibi R. Mirzayev zimmasiga yuklansin.

Mazkur Nizom Oʻzbekiston Respublikasiga olib kirishda nazorat qilinadigan sanoat maqsadidagi portlovchi materiallar roʻyxatiga kiritilgan portlovchi moddalar va portlatish vositalarini (keyingi oʻrinlarda matnda “portlovchi materiallar” deb yuritiladi) Oʻzbekiston Respublikasiga olib kirish tartibini belgilab beradi.

1. Portlovchi materiallarni Oʻzbekiston Respublikasiga olib kirish portlovchi materiallarni yaratish, ishlab chiqarish, transportda tashish, saqlash va realizatsiya qilish sohasidagi faoliyatni belgilangan tartibda amalga oshiruvchi yuridik shaxslar tomonidan amalga oshirilishi mumkin.

2. Portlovchi materiallarni Oʻzbekiston Respublikasiga olib kirish Oʻzbekiston Respublikasi Ichki ishlar vazirligi tomonidan beriladigan ruxsatnomalar asosida amalga oshiriladi.

3. Oʻzbekiston Respublikasida ishlab chiqarilishi va qoʻllanilishiga “Sanoatgeokontexnazorat” davlat inspeksiyasi tomonidan ruxsat berilgan portlovchi materiallarni Oʻzbekiston Respublikasiga olib kirishga ruxsat beriladi.

4. Oʻzbekiston Respublikasiga portlovchi materiallar jismoniy shaxslar tomonidan olib kirilishi, shu jumladan kuzatib borilmaydigan bagajda olib kirilishi taqiqlanadi.

5. Olib kirilayotgan portlovchi materiallarni Oʻzbekiston Respublikasi hududida tashish joʻnatuvchining taʼminlashi (tamgʻasi) va Oʻzbekiston Respublikasi Ichki ishlar vazirligining qurollangan boʻlinmalari soqchiligi ostida alohida toʻlanadigan haq evaziga maxsus jihozlangan avtotransport vositalari va temir yoʻl vagonlarida amalga oshiriladi.

6. Portlovchi materiallarni tashiyotgan transport vositalari (olib kirishga ruxsatnoma mavjud boʻlgan taqdirda) Oʻzbekiston Respublikasi Davlat chegarasidan oʻtkazish manzillari orqali ustuvor tartibda oʻtkazib yuboriladi.

7. Portlovchi materiallar Oʻzbekiston Respublikasining bojxona chegarasi orqali olib oʻtilganda, ularning bojxona rasmiylashtiruvi va nazorati Oʻzbekiston Respublikasining bojxona haqidagi qonunlarida belgilangan tartibda amalga oshiriladi.

8. Portlovchi materiallarning bojxona tekshiruvi faqat maxsus jihozlangan joylarda (portlovchi materiallar saqlanadigan omborlarda) amalga oshiriladi.

9. Zarur hollarda bojxona organlarining taqdimnomasi boʻyicha Ichki ishlar vazirligi olib kirilayotgan tovarlar probalari va namunalarini portlovchi materiallarga tegishlilik yuzasidan identifikatsiya qiladi.

10. Oʻzbekiston Respublikasi hududida portlovchi materiallar tranziti Oʻzbekiston Respublikasi qonun hujjatlariga muvofiq amalga oshiriladi.

11. Portlovchi materiallarni Oʻzbekiston Respublikasiga olib kirishga ruxsatnoma olish uchun ariza beruvchi Oʻzbekiston Respublikasi Ichki ishlar vazirligiga quyidagi hujjatlarni taqdim etadi:

portlovchi materiallar qoʻllanilishi maqsadlari va ular qoʻllaniladigan obyektlar, miqdori, markasi va nomi, olib kirishning aniq muddatlari, Oʻzbekiston Respublikasi hududiga kirish manzili, foydalaniladigan transport turi, yuk joʻnatiladigan va tushiriladigan manzillar toʻgʻrisidagi maʼlumotlar, yukni tashish uchun taqdim etayotgan tashkilotning nomi, yukni oluvchi tashkilotning nomi, tashish yoʻnalishi va portlovchi materiallar saqlanadigan joy (portlovchi materiallar ombori) koʻrsatilgan holda portlovchi materiallarni olib kirishga ruxsatnoma berish toʻgʻrisidagi ariza;

Oʻzbekiston Respublikasining Tashqi iqtisodiy faoliyat tovar nomenklaturasi, BMT nomenklaturasi boʻyicha yukning xususiyati, moddalarning klassifikatsiya shifri, agregat holati, xavfli xossalari toʻgʻrisidagi maʼlumotlar;

qonun hujjatlarida belgilangan tartibda tuzilgan (bojxona organlarida roʻyxatdan oʻtkazilgungacha) portlovchi materiallarni yetkazib berishga kontrakt (shartnoma), olib kirish bir necha turkumlarda amalga oshirilgan taqdirda — tashish jadvali;

olib kirilayotgan portlovchi materiallar Oʻzbekiston Respublikasida qoʻllanilishiga va portlatish ishlarini bajarish huquqiga “Sanoatgeokontexnazorat” davlat inspeksiyasining ruxsatnomasi;

portlovchi materiallarni sotib olishga va ularni saqlash omborlaridan foydalanishga “Sanoatgeokontexnazorat” davlat inspeksiyasining guvohnomasi;

ishlab chiqaruvchi tomonidan belgilangan tartibda berilgan olib kirilayotgan portlovchi materiallarga muvofiqlik sertifikati;

mahsulotni tayyorlovchiga xalqaro standartlarga (ISO-9001, 9002) muvofiq berilgan mahsulot sifati sertifikati;

portlovchi materiallarni Oʻzbekiston Respublikasi hududida tashishga ichki ishlar organlarining ruxsatnomasini rasmiylashtirish uchun zarur boʻlgan Oʻzbekiston Respublikasi qonun hujjatlarida belgilangan hujjatlar;

ariza koʻrib chiqilganligi uchun ariza beruvchi tomonidan yigʻim toʻlanganligini tasdiqlovchi hujjat;

avariya kartochkasi.

12. Portlovchi materiallarni bir necha turkum qilib olib kirishda ariza beruvchi yukning butun turkumiga zarur hujjatlarni ilova qilgan holda ruxsatnoma olish toʻgʻrisida bitta ariza berishi mumkin.

Portlovchi materiallarni bir necha turkum qilib olib kirishga ruxsatnoma yukning har bir turkumiga alohida rasmiylashtiriladi.

13. Oʻzbekiston Respublikasi Ichki ishlar vazirligi portlovchi materiallarni olib kirishga ruxsatnoma berish toʻgʻrisidagi ariza olingandan keyin zarur hujjatlar olingan kundan boshlab ikki ish kuni mobaynida “Sanoatgeokontexnazorat” davlat inspeksiyasiga — mahsulotlarni olib kirishning maqsadga muvofiqligi va Portlatish ishlarida xavfsizlikning yagona qoidalariga, shu jumladan markalash qoidalariga muvofiqligi toʻgʻrisida, Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasiga — portlovchi materiallarni olib kirish mumkinligi va tashishning maqbul yoʻnalishi toʻgʻrisida soʻrovnoma yuboradi.

“Sanoatgeokontexnazorat” davlat inspeksiyasi va Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasining asosli xulosalari Oʻzbekiston Respublikasi Ichki ishlar vazirligiga oʻn kun muddatda taqdim etiladi.

14. Oʻzbekiston Respublikasi Ichki ishlar vazirligi olingan xulosalar asosida oʻn besh kun muddatda portlovchi materiallarni olib kirishga ruxsatnoma berish yoki ruxsatnoma berishni rad etish toʻgʻrisida qaror qabul qiladi, tegishli ruxsatnoma beradi yoki ruxsatnoma berishga asoslari koʻrsatilgan rad javobini yoʻllaydi.

15. Portlovchi materiallarni olib kirishga ruxsatnomada quyidagilar koʻrsatiladi:

tashuvchi tashkilotning va oluvchi tashkilotning nomi;

Oʻzbekiston Respublikasining TIF TN, BMT nomenklaturasi boʻyicha yukning xususiyati toʻgʻrisidagi maʼlumotlar, moddaning klassifikatsiya shifri;

portlovchi materiallarning miqdori, markasi va nomi;

Oʻzbekiston Respublikasi hududiga kirish manzillari, Oʻzbekiston Respublikasi hududida tashish yoʻnalishi;

foydalaniladigan transport turi (avtomobil transportida tashishda — maxsus avtotransportning markasi va davlat raqamlari);

Oʻzbekiston Respublikasi hududida harakat qilishda yukni kuzatib borish va uni qoʻriqlash toʻgʻrisidagi umumiy maʼlumotlar va tashishning boshqa shartlari;

kontraktlar amalga oshirilishining borishi toʻgʻrisidagi axborotni taqdim etish tartibi va muddatlari.

16. Portlovchi materiallarni olib kirishga ruxsatnoma berish yoki ruxsatnoma berishni rad etish toʻgʻrisida qaror qabul qilishning umumiy muddati ruxsatnoma berish toʻgʻrisidagi ariza va mazkur Nizomda belgilangan boshqa hujjatlar olingan kundan boshlab oʻttiz kundan oshmasligi kerak.

17. Portlovchi materiallarni olib kirishga ruxsatnoma berilganligi toʻgʻrisida Oʻzbekiston Respublikasi Ichki ishlar vazirligi Davlat chegarasi orqali rejalashtirilayotgan oʻtishdan kamida 5 sutka oldin Oʻzbekiston Respublikasi Davlat bojxona qoʻmitasini, Oʻzbekiston Respublikasi Milliy xavfsizlik xizmatining Davlat chegaralarini himoya qiluvchi qoʻmitasini, portlovchi moddalarni temir yoʻl transportida tashishda esa — shuningdek Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasini xabardor qiladi.

18. Portlovchi materiallarni olib kirishga ruxsatnomaning amal qilish muddati 30 kundan ortiq boʻlmaydi.

19. Ruxsatnoma berish quyidagi hollarda:

“Sanoatgeokontexnazorat” davlat inspeksiyasi va Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasining asoslangan xulosalari boʻyicha;

taqdim etilgan hujjatlarning toʻliq emasligi, ularning belgilangan talablarga muvofiq emasligi yoxud ulardagi taqdim etilgan maʼlumotlarning ishonchsizligi;

ariza koʻrib chiqilganligi uchun ariza beruvchi tomonidan yigʻim toʻlanmaganligi;

tabiiy yoki texnogen xususiyatga ega boʻlgan favqulodda vaziyatlar yoki jamoat tartibi va xavfsizligi qoʻriqlanishi taʼminlanishi manfaatlariga xavf soluvchi boshqa holatlar paydo boʻlishi yoki paydo boʻlish xavfi hollarida chiqariladi.

Ruxsatnoma berish rad etilishi bunday qaror qabul qilingandan keyin ikki kun muddatda rad etish sabablari koʻrsatilgan holda ariza beruvchiga yozma shaklda yuboriladi.

Litsenziya talabgorining arizasini qayta koʻrib chiqishda ilgari litsenziya berishni rad etish toʻgʻrisidagi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi.

20. Berilgan ruxsatnoma quyidagi hollarda:

ruxsatnoma egasi portlovchi materiallarni tashishni rad etgan;

ruxsatnoma uning berilishi toʻgʻrisida qaror qabul qilish uchun muhim ahamiyatga ega boʻlgan toʻliq boʻlmagan yoki ishonchli boʻlmagan maʼlumotlar asosida berilgan;

ruxsatnoma berish toʻgʻrisidagi arizani koʻrib chiqish vaqtida undan xabardor boʻlish uni berish rad etilishiga olib keladigan holatlar aniqlangan;

tabiiy yoki texnogen xususiyatga ega boʻlgan favqulodda vaziyatlar yoki jamoat tartibi va xavfsizligi qoʻriqlanishi taʼminlanishi manfaatlariga xavf soluvchi boshqa holatlar paydo boʻlishi yoki paydo boʻlish xavfi;

portlovchi materiallarni transportda tashishning belgilangan tartibi buzilishi hollarida bekor qilinishi mumkin.

Ruxsatnomani bekor qilish toʻgʻrisidagi qarorda bekor qilishning asoslari koʻrsatilishi kerak.

Bekor qilish toʻgʻrisidagi qaror zudlik bilan ruxsatnoma egasiga, Oʻzbekiston Respublikasi Davlat bojxona qoʻmitasiga, Oʻzbekiston Respublikasi Milliy xavfsizlik xizmatining Davlat chegaralarini himoya qiluvchi qoʻmitasiga, portlovchi moddalar temir yoʻl transportida tashilganda esa — shuningdek Temir yoʻllarda yuk va yoʻlovchilar tashish xavfsizligini nazorat qilish davlat inspeksiyasiga yuboriladi.

21. Berilgan ruxsatnomalardan foydalanish hisobga olinishini yuritish uchun tashkilotlar Oʻzbekiston Respublikasi Ichki ishlar vazirligiga ruxsatnoma berish chogʻida belgilanadigan shakl va muddatlar boʻyicha kontraktlar amalga oshirilishining borishi toʻgʻrisida axborot taqdim etadilar.

22. Portlovchi materiallarni Oʻzbekiston Respublikasiga olib kirishga ruxsatnoma berish toʻgʻrisidagi ariza koʻrib chiqilganligi uchun Oʻzbekiston Respublikasi qonun hujjatlarida belgilangan eng kam oylik ish haqining ikki baravari miqdorida yigʻim undiriladi. Yigʻim summasi Oʻzbekiston Respublikasi Ichki ishlar vazirligining hisob raqamiga oʻtkaziladi.

Ariza beruvchi ruxsatnoma olishni yoki portlovchi materiallarni tashishni rad etgan taqdirda toʻlangan yigʻim summasi qaytarilmaydi.

23. Mazkur Nizom talablari buzilishida aybdor boʻlgan shaxslar Oʻzbekiston Respublikasining amaldagi qonun hujjatlariga muvofiq javob beradilar.