Deputatlar nazorati samaradorligini, deputatlar korpusi faolligini, shuningdek Oʻzbekiston Respublikasining qonunlari va Oʻzbekiston Respublikasi Oliy Majlisi Qonunchilik palatasining qarorlari ijro etilishini taʼminlash yuzasidan davlat tuzilmalari rahbarlarining masʼuliyatini oshirish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasining qonunlari va Oʻzbekiston Respublikasi Oliy Majlisi Qonunchilik palatasining qarorlari ijro etilishi ustidan nazoratni amalga oshirish tartibi toʻgʻrisidagi nizom tasdiqlansin (ilova qilinadi).

2. Oʻzbekiston Respublikasi Oliy Majlisi Qonunchilik palatasi qoʻmitalarining raislari Oʻzbekiston Respublikasining qonunlari va Oʻzbekiston Respublikasi Oliy Majlisi Qonunchilik palatasining qarorlari ijro etilishi ustidan nazoratni amalga oshirish tartibi toʻgʻrisidagi nizomda nazarda tutilgan nazorat tadbirlarini tayyorlash va oʻtkazish tartib-taomiliga doir talablarga ogʻishmay rioya qilinishini taʼminlasinlar.

3. Nazorat faoliyati yakunlari toʻgʻrisidagi axborotni (yilning har choragida) eshitish va muhokama qilish amaliyotga joriy etilsin.

4. Oʻzbekiston Respublikasining qonunlari va Oʻzbekiston Respublikasi Oliy Majlisi Qonunchilik palatasining qarorlari ijro etilishi ustidan nazoratni amalga oshirish tartibi toʻgʻrisidagi nizomning ijrosi ustidan nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari zimmasiga yuklatilsin.

5. Ushbu qaror qabul qilingan kundan eʼtiboran kuchga kiradi.

1. Ushbu Nizom Oʻzbekiston Respublikasining qonunlari va Oʻzbekiston Respublikasi Oliy Majlisi Qonunchilik palatasi qarorlarining ijro etuvchi hokimiyat organlari (bundan buyon matnda davlat organlari deb yuritiladi) tomonidan ijro etilishi ustidan nazoratni amalga oshirishga doir tadbirlarni (bundan buyon matnda nazorat tadbirlari deb yuritiladi) Oʻzbekiston Respublikasi Oliy Majlisi Qonunchilik palatasining qoʻmitalari (bundan buyon matnda Qonunchilik palatasi qoʻmitalari deb yuritiladi) tomonidan tayyorlash va oʻtkazish tartib-taomilini tartibga soladi.

2. Qonunchilik palatasi qoʻmitalarining Oʻzbekiston Respublikasi qonunlari va Oʻzbekiston Respublikasi Oliy Majlisi Qonunchilik palatasi qarorlarining (bundan buyon matnda Qonunchilik palatasining qarorlari deb yuritiladi) ijro etilishi ustidan nazoratni amalga oshirish borasidagi faoliyatini tashkil etish Oʻzbekiston Respublikasi Oliy Majlisi Qonunchilik palatasining Spikeri tomonidan amalga oshiriladi.

Qonunchilik palatasi Spikeri oʻrinbosarlari zimmasiga Qonunchilik palatasining oʻzlari masʼul boʻlgan qoʻmitalari ishining lozim darajada tashkil etilishini, shuningdek ushbu Nizomda nazarda tutilgan talablarga rioya etilishini taʼminlash vazifasi yuklatiladi.

3. Qonunchilik palatasi qoʻmitalarining nazorat tadbirlarini tayyorlash va oʻtkazish borasidagi faoliyatini muvofiqlashtirish Oʻzbekiston Respublikasi Oliy Majlisi Qonunchilik palatasining Kengashi (bundan buyon matnda Qonunchilik palatasining Kengashi deb yuritiladi) tomonidan amalga oshiriladi.

4. Qonunchilik palatasining qoʻmitalarida nazorat tadbirlarini tayyorlash va oʻtkazish, tayyorlanayotgan hujjatlarning sifatini taʼminlash, shuningdek Qonunchilik palatasi qoʻmitalarining nazorat tadbirlari yakunlariga koʻra qabul qilinib, davlat organlariga yuborilgan qarorlarini oʻz vaqtida koʻrib chiqish yuzasidan taʼsirchan monitoringni amalga oshirish borasidagi ishlarni tashkil qilish Qonunchilik palatasi qoʻmitalarining raislari zimmasiga yuklatiladi.

5. Qonunchilik palatasi qoʻmitalari tomonidan nazorat tadbirlarini tashkil etish va oʻtkazish Qonunchilik palatasi yoki Qonunchilik palatasining Kengashi har yili tasdiqlaydigan nazorat faoliyati rejalariga muvofiq amalga oshiriladi.

6. Qonunchilik palatasi qoʻmitalarining nazorat faoliyati rejasi (bundan buyon matnda Nazorat faoliyati rejasi deb yuritiladi) Qonunchilik palatasi qoʻmitalarining takliflari asosida shakllantiriladi.

7. Qonunchilik palatasi qoʻmitalarining takliflarini umumlashtirish Qonunchilik palatasi Devoni Nazorat-axborot boʻlimining zimmasiga yuklatiladi.

Qonunchilik palatasi qoʻmitalarining takliflari Qonunchilik palatasi Devonining Nazorat-axborot boʻlimiga joriy yilning 1-dekabridan kechiktirmasdan taqdim etiladi.

8. Qonunchilik palatasi qoʻmitalarining Nazorat faoliyati rejasiga kiritish uchun takliflar tayyorlash borasidagi faoliyatini muvofiqlashtirish Qonunchilik palatasi Spikeri oʻrinbosarlaridan birining zimmasiga yuklatiladi. Mazkur masalaga doir qaror Qonunchilik palatasi Kengashining majlisida qabul qilinadi.

9. Nazorat faoliyati rejasining shakllantirilgan loyihasi Qonunchilik palatasi Spikeriga koʻrib chiqish uchun taqdim etiladi, u mazkur rejani maromiga yetkazish uchun oʻz eʼtirozlari bilan qaytarishga haqli.

10. Qonunchilik palatasi Spikerining fikr-mulohazalari mavjud boʻlmagan taqdirda, Nazorat faoliyati rejasi loyihasi Qonunchilik palatasining yoki Qonunchilik palatasi Kengashining muhokamasiga kiritiladi.

11. Qonunchilik palatasi qoʻmitalari tomonidan Nazorat faoliyati rejasiga kiritish uchun takliflar tayyorlash ularning joriy yildagi faoliyati natijalariga (qonun ijodkorligi faoliyati, konferensiyalar, davra suhbatlari oʻtkazish, nazorat faoliyati yakunlari, parlamentlararo faoliyat va boshqalar) yakun yasash bilan boshlanadi. Yakun yasalganidan keyin nazorat tadbirlari doirasida qoʻshimcha ravishda oʻrganilishi lozim boʻlgan masalalar aniqlanadi va nazorat tadbirlarining taxminiy mavzulari belgilanadi.

Keyingi yil uchun takliflar tayyorlash chogʻida Qonunchilik palatasida koʻrib chiqilishi (qonun loyihalarini birinchi, ikkinchi va uchinchi oʻqishlarda koʻrib chiqish) paytida Qonunchilik palatasining qoʻmitasi masʼul boʻlgan Oʻzbekiston Respublikasi qonunlarining, shuningdek Qonunchilik palatasi qarorlarining ijro etilishi amaliyotini oʻrganishga qaratilgan nazorat tadbirlarini oʻtkazish zarurati ham hisobga olinadi.

12. Takliflarni tayyorlash uchun quyidagilar asos boʻlishi mumkin:

Oʻzbekiston Respublikasi Prezidentining qarorlaridan yoki maʼruzalaridan (nutqlaridan) kelib chiqadigan topshiriq;

Oʻzbekiston Respublikasi Oliy Majlisi Qonunchilik palatasi va Senatining qoʻshma qarorida yoki Qonunchilik palatasining qarorida koʻrsatilgan topshiriq;

Qonunchilik palatasi Spikerining topshirigʻi yoki tavsiyasi;

Qonunchilik palatasi Kengashining topshirigʻi yoki tavsiyasi;

qoʻmita aʼzolari boʻlgan va siyosiy partiyalar fraksiyalarining vakillari yoki Oʻzbekiston ekologik harakati deputatlar guruhi aʼzolari boʻlgan deputatlarning tegishli siyosiy partiya fraksiyasining yoki Oʻzbekiston ekologik harakati deputatlar guruhining (bundan buyon matnda deputatlar birlashmalari deb yuritiladi) qaroriga asoslangan taklifi;

oʻtkazilgan nazorat tadbirlarining yakunlari, shu jumladan parlament soʻroviga javob eshituvi yoki parlament eshituvlarini oʻtkazish yakunlari;

konferensiyalar va davra suhbatlari yakunlari;

Qonunchilik palatasi deputatlarining saylovchilar bilan uchrashuvlari yakunlari;

qonun loyihalarini ishlab chiqish, parlament soʻrovlari va parlament eshituvlarini tayyorlash bilan bogʻliq masalalarni tahliliy jihatdan har tomonlama ishlab chiqish zaruriyati;

Qonunchilik palatasi qoʻmitalari tomonidan oʻtkazilgan nazorat tadbirlari yakunlariga koʻra qabul qilingan qarorlarning ijro etilish holatini baholash natijalari;

boshqa asoslar.

13. Qonunchilik palatasi qoʻmitalarining takliflari dastlab ularning majlislarida muhokama qilinadi. Bunda Qonunchilik palatasi qoʻmitasining har bir aʼzosi oʻz fikrini bildirishga va nazorat tadbirining mavzusini taklif etishga haqli.

14. Deputatlar birlashmalari Nazorat faoliyati rejasiga kiritish uchun beriladigan takliflarni tayyorlashda Qonunchilik palatasi qoʻmitalaridagi oʻz vakillari — deputatlar birlashmalarining aʼzosi boʻlgan deputatlar orqali ishtirok etadilar.

15. Qonunchilik palatasi qoʻmitalarining takliflari quyidagi talablarga javob berishi kerak:

nazorat tadbirlarini oʻtkazish zaruriyati asoslangan boʻlishi lozim;

nazorat tadbirlarining maqsadi aniq belgilangan va taʼriflangan boʻlishi kerak;

nazorat tadbirlarining mavzulari Nazorat faoliyati rejasiga kiritish uchun taklif bergan Qonunchilik palatasi qoʻmitalarining ixtisosligiga muvofiq boʻlishi kerak;

nazorat tadbirlarining mavzulari dolzarb xususiyatga ega boʻlishi hamda Oʻzbekiston Respublikasini rivojlantirishning sotsial-iqtisodiy va ijtimoiy-siyosiy ehtiyojlaridan kelib chiqishi lozim;

nazorat tadbirlari bajarib boʻladigan va natijali boʻlishi kerak;

nazorat tadbirlarini oʻtkazish yakunlariga ehtiyoj boʻlishi kerak;

nazorat tadbirlarining pirovard natijalarini taxmin qilish imkoniyati.

16. Nazorat faoliyati rejasiga kiritish uchun takliflar tayyorlanayotganda tadbirlarni oʻtkazishning aniq muddatlari belgilanishi kerak. Qonunchilik palatasi qoʻmitasining taklifi jadval shaklida rasmiylashtirilishi lozim (ilova qilinadi). Qonunchilik palatasi qoʻmitalarining takliflariga quyidagilarni qamrab olgan tushuntirish xatlari ilova qilinadi:

nazorat tadbirining maqsadi tavsifi;

nazorat tadbiri mavzusiga oid ishlarning holatiga doir sharh (tahlil);

nazorat tadbirini oʻtkazish zaruriyatining asosi;

nazorat tadbirini oʻtkazishdan kutilayotgan natijalar.

17. Yil boshida, tasdiqlangan Nazorat faoliyati rejasi asosida Qonunchilik palatasi qoʻmitasining majlisida qoʻmita aʼzolari orasidan nazorat tadbirlarini tayyorlash va oʻtkazish uchun masʼul boʻlgan deputatlar (deputatlar guruhi) belgilanadi.

18. Nazorat tadbirini tayyorlash va oʻtkazish uchun masʼul boʻlgan deputat Qonunchilik palatasi qoʻmitasining qarori qabul qilinganidan keyin besh ish kuni ichida Nazorat tadbirini tayyorlash va oʻtkazish boʻyicha tadbirlar rejasini tuzadi hamda uni Qonunchilik palatasi qoʻmitasining raisi bilan kelishib oladi.

19. Nazorat tadbirlarini tayyorlash va oʻtkazishga doir tadbirlar rejasi quyidagilarni oʻz ichiga olishi mumkin:

tegishli davlat organlariga soʻrovlar yuborish (soʻrovlar Qonunchilik palatasi qoʻmitasining blankasida rasmiylashtiriladi va Qonunchilik palatasi qoʻmitasining raisi tomonidan imzolanadi);

zarur amaliy maslahatlar olish maqsadida davlat organlari va boshqa tashkilotlardan mutaxassislarni taklif etish (taklifnomalar Qonunchilik palatasi qoʻmitasining blankasida rasmiylashtiriladi hamda Qonunchilik palatasi qoʻmitasining raisi tomonidan imzolanadi);

ijro etilishini oʻrganish moʻljallanilayotgan Oʻzbekiston Respublikasi qonuni normalarini ijro etish uchun qabul qilingan qonunosti hujjatlari roʻyxatini belgilash;

ijro etilishini oʻrganish moʻljallanilayotgan Oʻzbekiston Respublikasi qonunini ijro etish yuzasidan qabul qilingan qonunosti hujjatlari va normativ hujjatlar va ichki hujjatlarni tahlil qilish;

nazorat tadbiri mavzusiga doir xalqaro tajribani oʻrganish;

konferensiya yoki davra suhbati oʻtkazish (tadbir ekspertlar va olimlarning fikr-mulohazalarini oʻrganish maqsadida Qonunchilik palatasining qoʻmitasi nomidan oʻtkaziladi);

Qonunchilik palatasi qoʻmitasining majlisida davlat organi rahbarining Oʻzbekiston Respublikasi qonuni ijro etilishini taʼminlash yuzasidan koʻrilayotgan chora-tadbirlar haqidagi axborotini eshitish;

boshqa tadbirlar.

20. Oʻzbekiston Respublikasi qonuni normalarini ijro etish maqsadida qabul qilingan qonunosti hujjatlarini va normativ (ichki) hujjatlarni tahlil qilish chogʻida:

Oʻzbekiston Respublikasi qonunining ijro etilishi uchun masʼul boʻlgan davlat organlari belgilanadi;

Oʻzbekiston Respublikasi qonunining ijro etilishi uchun masʼul boʻlgan davlat organlarining maqsadlari va vazifalarini belgilovchi normativ-huquqiy hujjatlar oʻrganiladi;

Oʻzbekiston Respublikasi Prezidentining Oʻzbekiston Respublikasi qonunlarining ijro etilishi maqsadida qabul qilingan farmonlari va qarorlari oʻrganiladi;

Oʻzbekiston Respublikasi Vazirlar Mahkamasining Oʻzbekiston Respublikasi qonunini ijro etish maqsadida qabul qilingan qarorlari oʻrganiladi;

vazirliklar, davlat qoʻmitalari va idoralarning Oʻzbekiston Respublikasi qonunini ijro etish maqsadida qabul qilingan normativ-huquqiy hujjatlari oʻrganiladi;

Oʻzbekiston Respublikasi qonunining ijro etilishi uchun masʼul boʻlgan davlat organi tomonidan qabul qilingan normativ (ichki) hujjatlar (ichki buyruqlar, farmoyishlar va hokazo) soʻrab olinadi hamda tahlil etiladi;

huquqni qoʻllash amaliyotidagi kamchiliklar va nomuvofiqliklar, Oʻzbekiston Respublikasi qonunining normalari bilan mazkur Oʻzbekiston Respublikasi qonunini ijro etish maqsadida qabul qilingan qonunosti hujjatlari, normativ hujjatlar, ichki hujjatlar oʻrtasidagi tafovutlar yoki ziddiyatlar aniqlanadi.

21. Oʻzbekiston Respublikasi qonunini ijro etish uchun qabul qilingan qonunosti hujjatlari va normativ (lokal) hujjatlar tahlilining yakunlari alohida maʼlumotnoma tarzida rasmiylashtirilib, Qonunchilik palatasining qoʻmitasi tomonidan Qonunchilik palatasi Spikerining mazkur qoʻmita faoliyatiga mutasaddi boʻlgan oʻrinbosari koʻrib chiqishi uchun taqdim etiladigan bajarilgan ishlar toʻgʻrisidagi yigʻma tahliliy maʼlumotnomani shakllantirishga asos boʻladi.

22. Oʻzbekiston Respublikasi qonuni ijro etilishi uchun qabul qilingan qonunosti hujjatlari va normativ (lokal) hujjatlar tahlili asosida Qonunchilik palatasi qoʻmitasi tomonidan dastlabki tarzdagi xulosalar va tavsiyalar tayyorlanadi.

Dastlabki tarzdagi xulosalar va tavsiyalar asosliligining tasdigʻini olish maqsadida Qonunchilik palatasining qoʻmitasi Oʻzbekiston Respublikasi qonuni ijro etilishi uchun masʼul boʻlgan davlat organining fikrini soʻrashi, mutaxassislar va olimlarni taklif qilishi, konferensiyalar, davra suhbatlari va boshqa shu kabi tadbirlar tashkil etishi mumkin.

23. Nazorat tadbirini tayyorlash va oʻtkazish tadbirlari rejasini roʻyobga chiqarish yakunlari boʻyicha bajarilgan ishlar toʻgʻrisida yigʻma tahliliy maʼlumotnoma tayyorlanadi, unda bajarilgan ish yakunlari, Qonunchilik palatasi qoʻmitasining dastlabki tarzdagi xulosalari va tegishli tavsiyalari, Oʻzbekiston Respublikasi qonuni ijro etilishi uchun masʼul boʻlgan davlat organining nuqtai nazari qisqacha tavsiflanadi, shuningdek joyga borib nazorat tadbiri oʻtkazish zarurligi asoslab beriladi.

24. Bajarilgan ish toʻgʻrisidagi yigʻma tahliliy maʼlumotnoma Qonunchilik palatasi qoʻmitasining raisi tomonidan Qonunchilik palatasi Spikerining mazkur qoʻmita faoliyati uchun mutasaddi boʻlgan oʻrinbosariga yuboriladi. Yigʻma tahliliy maʼlumotnoma maromiga yetkazish uchun Qonunchilik palatasining qoʻmitasiga qaytarib yuborilishi mumkin.

25. Qonunchilik palatasi qoʻmitasining raisi joyga borib nazorat tadbiri oʻtkazish toʻgʻrisidagi masalani Qonunchilik palatasi Spikerining mazkur qoʻmita faoliyati uchun mutasaddi boʻlgan oʻrinbosari bilan kelishadi.

26. Joyga borib nazorat tadbiri oʻtkazish masalasi boʻyicha eʼtirozlar boʻlmasa, Qonunchilik palatasi qoʻmitasi raisi yoki uning oʻrinbosari:

tegishli davlat organining rahbariga belgilangan nazorat tadbiri toʻgʻrisida oldindan xat yuboradi;

masʼul deputatning taklifiga binoan ishchi guruhining tarkibini belgilaydi va tashkilotlarning ishchi guruhi tarkibiga kiritilgan xodimlari ishtiroki toʻgʻrisidagi masalani tegishli tashkilotlarning rahbarlari bilan kelishadi;

ishchi guruhi aʼzolarini bajarilgan ish toʻgʻrisidagi yigʻma tahliliy maʼlumotnoma bilan tanishtiradi;

oʻrganish yoʻnalishlari va obyektlarini belgilaydi;

ishchi guruhi aʼzolari oʻrtasida vazifalarni taqsimlaydi;

bajarilgan ish toʻgʻrisidagi yigʻma tahliliy maʼlumotnomada koʻrsatilgan dastlabki tarzdagi xulosalar va tavsiyalarni inobatga olgan holda savolnoma tayyorlab, uni tegishli davlat organining rahbariga oldindan yuboradi.

27. Nazorat tadbiri joyga borib oʻtkazilganda:

Qonunchilik palatasi qoʻmitasining bajarilgan ish toʻgʻrisidagi yigʻma tahliliy maʼlumotnomada koʻrsatilgan dastlabki tarzdagi xulosalari yoki tavsiyalarining toʻgʻriligi yoki notoʻgʻriligi tekshiriladi;

Qonunchilik palatasi qoʻmitasining soʻrovlari boʻyicha davlat organi rahbarlari tomonidan avval taqdim etilgan axborotning ishonchli ekanligi yoki ishonchli emasligi va qay darajada tugalligi tekshiriladi;

davlat organi xodimlarining tarkib topgan ish amaliyoti Oʻzbekiston Respublikasi qonuni talablariga qay darajada muvofiqligi tekshiriladi;

Oʻzbekiston Respublikasi qonuni normalarini ijro etish uchun qabul qilingan qonunosti hujjatlari, normativ hujjatlar va ichki hujjatlar bor-yoʻqligi aniqlanadi;

davlat organi xodimlarining malakasini va mamlakatda amalga oshirilayotgan ijtimoiy-iqtisodiy islohotlarning qanday borayotganligidan xabardorligini oshirish maqsadida amalga oshirilayotgan chora-tadbirlarning samaradorligi oʻrganiladi;

davlat organi tomonidan Oʻzbekiston Respublikasi qonuni normalari ijro etilishini taʼminlash uchun qabul qilingan muayyan chora-tadbirlar aniqlanadi.

28. Oʻtkazilgan nazorat tadbiri yakunlari boʻyicha yakuniy maʼlumotnoma (5 — 10 bet) tayyorlanadi. Yakuniy maʼlumotnomada quyidagilar koʻrsatiladi:

nazorat tadbiri oʻtkazilgan sana va joy;

Qonunchilik palatasi qoʻmitasi tomonidan tashkil etilgan ishchi guruhining tarkibi;

davlat organining nazorat tadbiri oʻtkazilishida ishtirok etgan vakillari;

Oʻzbekiston Respublikasi qonuni ijro etilishi borasidagi ishlar holatining tavsifi;

Qonunchilik palatasi qoʻmitasining asoslantirilgan xulosalari;

Qonunchilik palatasi qoʻmitasining (agar kamchiliklar va xatoliklar mavjud boʻlsa) davlat organi faoliyatini takomillashtirish yoki amaldagi qonun hujjatlariga oʻzgartishlar kiritish boʻyicha asoslantirgan takliflari.

29. Yakuniy maʼlumotnoma ishchi guruhi aʼzolari va Qonunchilik palatasi qoʻmitasining raisi tomonidan imzolanadi. Yakuniy maʼlumotnoma ishchi guruhi Qonunchilik palatasiga qaytib kelganidan keyin koʻpi bilan uch ish kuni ichida tayyorlanadi. Yakuniy maʼlumotnomaning nusxasi mazkur qoʻmita uchun masʼul boʻlgan Qonunchilik palatasi Spikeri oʻrinbosariga taqdim etiladi, shuningdek maʼlumot uchun davlat organining rahbariga yuboriladi.

30. Qonunchilik palatasi qoʻmitasining yakuniy maʼlumotnomada koʻrsatilgan xulosalari va takliflari rasmiy hujjatlar bilan mustahkamlanishi kerak.

31. Yakuniy maʼlumotnoma Qonunchilik palatasi qoʻmitasining majlisida tegishli davlat organi rahbarini taklif etgan holda muhokama qilinadi. Davlat organi rahbarining Qonunchilik palatasi qoʻmitasining xulosalari va takliflariga doir nuqtai nazari Qonunchilik palatasining qoʻmitasiga oldindan yozma ravishda taqdim etiladi.

32. Qonunchilik palatasining qoʻmitasi yakuniy maʼlumotnomani koʻrib chiqish yakunlari boʻyicha qaror qabul qiladi, unda aniq bayon etilgan tavsiyalar va Qonunchilik palatasi qoʻmitasining qarori tegishli davlat organi tomonidan koʻrib chiqilganligi toʻgʻrisida axborot taqdim etish muddatlari koʻrsatiladi.

33. Qonunchilik palatasi qoʻmitasining qarorida mazkur qoʻmitaning Qonunchilik palatasi qoʻmitasi qarorining ijro etilishi boʻyicha kelib tushgan axborotlarni umumlashtirish va tahlil etish vazifasi zimmasiga yuklatilgan masʼul aʼzosi ham koʻrsatiladi.

34. Qonunchilik palatasi qoʻmitasi qarorini bajarish boʻyicha taqdim etilgan axborot yetarli boʻlmasa, parlament soʻrovi yuborish yoki parlament eshituvi oʻtkazish toʻgʻrisida tashabbus bilan chiqiladi.

35. Qonunchilik palatasi qarorlarining ijro etilishi ustidan nazorat Qonunchilik palatasining qarorlarida koʻrsatilgan Qonunchilik palatasi qoʻmitalari yoki deputatlari tomonidan amalga oshiriladi.

Qonunchilik palatasi qarorlarining ijro etilishi ustidan nazoratni amalga oshirish boʻyicha tadbirlarni roʻyobga chiqarish maqsadida Qonunchilik palatasi ixtisoslashgan qoʻmitasi aʼzolari orasidan ishchi guruhi shakllantiriladi.

36. Qonunchilik palatasining qarori Qonunchilik palatasining qarorida nazarda tutilgan muddatlarda ijro etilganligi toʻgʻrisidagi axborot kelib tushgan taqdirda, ishchi guruhi ushbu axborotni har tomonlama tahlil qiladi.

37. Qonunchilik palatasi qarorining ijro etilishi toʻgʻrisidagi axborotda koʻrsatilgan maʼlumotlarni aniqlashtirish maqsadida yoki bunday axborot oʻz vaqtida taqdim etilmagani taqdirda, ishchi guruhining taklifiga binoan Qonunchilik palatasi tegishli qoʻmitasining raisi tomonidan tegishli davlat organlariga yozma shakldagi soʻrovlar yuboriladi.

38. Zarurat taqozo etgan taqdirda, ishchi guruhi Qonunchilik palatasining Kengashi bilan kelishgan holda Qonunchilik palatasi qarori ijro etilishining borishini joyga borib oʻrganadi.

39. Qonunchilik palatasi qarorining ijro etilishi toʻgʻrisidagi axborotning va deputatlarning yozma soʻrovlari asosida davlat organi tomonidan taqdim etilgan hujjatlarning yakuniy tahlili boʻyicha Qonunchilik palatasi qarorining ijro etilganligi yoki ijro etilmaganligi toʻgʻrisida xulosalar tayyorlanadi (Qonunchilik palatasi qarorida bayon qilingan koʻrsatmalarning lozim darajada yoki tugal darajada ijro etilmaganligi Qonunchilik palatasi qarorini ijro etmaganlik deb hisoblanadi). Xulosalar yakuniy maʼlumotnoma shaklida tayyorlanib, Qonunchilik palatasi Spikerining mazkur masala boʻyicha mutasaddi boʻlgan oʻrinbosariga taqdim etiladi. Taqdim etilgan xulosalar asoslantirilmagan yoki taqdim etilgan axborot tugal boʻlmagan taqdirda, maʼlumotnoma maromiga yetkazish uchun qaytarib yuboriladi.

40. Qonunchilik palatasi qarorining ijro etilishi yakunlari toʻgʻrisidagi axborot Qonunchilik palatasi qarorida koʻrsatilgan Qonunchilik palatasi qoʻmitasi yoki deputatlari tomonidan Qonunchilik palatasi Kengashining koʻrib chiqishi uchun taqdim etiladi.

41. Qonunchilik palatasi Kengashining majlisida:

Qonunchilik palatasi qarorining ijro etilishi natijalariga;

Qonunchilik palatasining qarorida koʻrsatilgan Qonunchilik palatasi qoʻmitasi yoki deputatlarining Qonunchilik palatasi qarori ijro etilishini taʼminlash boʻyicha faoliyatiga baho beriladi.

42. Qonunchilik palatasi Kengashi Qonunchilik palatasining qarori ijro etilmaganligi toʻgʻrisidagi xulosalar ifoda etilgan qaror qabul qilgan taqdirda, ushbu masalani Qonunchilik palatasi majlisida Qonunchilik palatasi qarorining lozim darajada ijro qilinishini taʼminlamagan davlat organi rahbarini taklif qilgan holda koʻrib chiqish toʻgʻrisida qaror qabul qilinadi.

43. Qonunchilik palatasining qoʻmitalari tomonidan oʻtkazilgan nazorat tadbirlarining yakunlari yilning har choragida Qonunchilik palatasi Kengashining majlislarida koʻrib chiqiladi. Qonunchilik palatasi Spikeri yoki uning oʻrinbosarlari yoxud Qonunchilik palatasi qoʻmitalari raislarining tashabbusiga koʻra Qonunchilik palatasi Kengashining majlislarida nazorat tadbirlariga daxldor boshqa masalalar ham koʻrib chiqilishi mumkin.

44. Nazorat tadbirlarining yakunlari boʻyicha ommaviy axborot vositalarida eʼlon qilish yoki Qonunchilik palatasining veb-saytida joylashtirish uchun axborot materiallari tayyorlanadi.

45. Nazorat tadbirlari davomida qogʻozda yoki elektron shaklda tayyorlangan maʼlumot materiallari va hujjatlarining nusxalari Qonunchilik palatasi qoʻmitalarining raislari tomonidan Oʻzbekiston Respublikasi Oliy Majlisi Qonunchilik palatasi qoʻmitalari faoliyatiga doir maʼlumotlarning axborot bazasi toʻgʻrisidagi Nizomda belgilangan tartibda Qonunchilik palatasi Devonining tegishli boʻlinmalariga taqdim etiladi.