O‘zbekiston Respublikasining “Elektron raqamli imzo to‘g‘risida”gi Qonuni va O‘zbekiston Respublikasi Vazirlar Mahkamasining 2015-yil 15-iyuldagi 190-sonli “Elektron raqamli imzolar kalitlarini ro‘yxatdan o‘tkazish markazlari faoliyatini yanada tartibga solishga doir qo‘shimcha chora-tadbirlar to‘g‘risida”gi qaroriga muvofiq O‘zbekiston Respublikasi Davlat soliq qo‘mitasi, Axborot texnologiyalari va kommunikatsiyalarini rivojlantirish vazirligi va Markaziy banki Boshqaruvi qaror qiladilar:

1. Respublika ijro etuvchi hokimiyat organlari va xo‘jalik boshqaruvi organlari, mahalliy ijro etuvchi hokimiyat organlari hamda tijorat banklari tomonidan ko‘rsatiladigan barcha turdagi xizmatlarda elektron raqamli imzodan foydalanish qoidalari ilovaga muvofiq tasdiqlansin.

2. Mazkur qaror rasmiy e’lon qilingan kundan e’tiboran uch oy o‘tgach kuchga kiradi.

Ushbu Qoidalar O‘zbekiston Respublikasining “Elektron raqamli imzo to‘g‘risida”gi va “Elektron hujjat aylanishi to‘g‘risida”gi qonunlari, Vazirlar Mahkamasining 2005-yil 26-sentabrdagi 215-sonli “Elektron raqamli imzodan foydalanish sohasida normativ-huquqiy bazani takomillashtirish to‘g‘risida”gi, 2007-yil 23-avgustdagi 181-sonli “Davlat va xo‘jalik boshqaruvi, mahalliy davlat hokimiyati organlarining axborot-kommunikatsiya texnologiyalardan foydalangan holda yuridik va jismoniy shaxslar bilan o‘zaro hamkorligini yanada takomillashtirish chora-tadbirlari to‘g‘risida”gi va 2015-yil 15-iyuldagi 190-sonli “Elektron raqamli imzolar kalitlarini ro‘yxatdan o‘tkazish markazlari faoliyatini yanada tartibga solishga doir qo‘shimcha chora-tadbirlar to‘g‘risida”gi qarorlariga asosan respublika ijro etuvchi hokimiyat organlari va xo‘jalik boshqaruvi organlari, mahalliy ijro etuvchi hokimiyat organlari hamda tijorat banklari tomonidan ko‘rsatiladigan barcha turdagi xizmatlarda elektron raqamli imzodan foydalanish tartibini belgilaydi.

1. O‘zbekiston Respublikasi Soliq qo‘mitasi huzuridagi Yangi texnologiyalar ilmiy-axborot markazi (bundan buyon matnda ro‘yxatga olish markazi) tomonidan berilgan elektron raqamli imzo kaliti sertifikatiga ega bo‘lgan shaxslar respublika ijro etuvchi hokimiyat organlari va xo‘jalik boshqaruvi organlari, mahalliy ijro etuvchi hokimiyat organlari hamda tijorat banklari tomonidan ko‘rsatiladigan barcha turdagi xizmatlardan erkin foydalana oladi.

2. Ushbu Qoidalarda quyidagi asosiy tushunchalardan foydalaniladi:

elektron raqamli imzo (bundan buyon matnda ERI deb yuritiladi) — elektron hujjatdagi mazkur elektron hujjat axborotini ERIning yopiq kalitidan foydalangan holda maxsus o‘zgartirish natijasida hosil qilingan hamda ERIning ochiq kaliti yordamida elektron hujjatdagi axborotda xatolik yo‘qligini aniqlash va ERI yopiq kalitining egasini identifikatsiya qilish imkoniyatini beradigan imzo;

xizmatlarni bajaruvchilar — respublika ijro etuvchi hokimiyat organlari va xo‘jalik boshqaruvi organlari, mahalliy ijro etuvchi hokimiyat organlari hamda tijorat banklari;

foydalanuvchi — xizmatlarni bajaruvchilarga axborot tizimi orqali elektron so‘rov bilan murojaat qilgan jismoniy yoki yuridik shaxs;

elektron xizmat — foydalanuvchining elektron so‘rovi asosida xizmat bajaruvchilar tomonidan vakolatlari doirasida aloqa kanallari orqali barcha turdagi xizmatlarni ko‘rsatish;

elektron so‘rov — xizmatlarni bajaruvchilarga elektron hujjat shaklida taqdim etiladigan elektron xizmat ko‘rsatish to‘g‘risidagi talab;

elektron hujjat — elektron shaklda qayd etilgan, ERI bilan tasdiqlangan hamda elektron hujjatning uni identifikatsiya qilish imkonini beradigan boshqa rekvizitlariga ega bo‘lgan axborot;

vakolatli shaxs — ustav, shartnoma, tegishli xatti-harakatlarni sodir etish huquqiga ishonchnoma asosida ro‘yxatga olish markazi nomidan ish ko‘ruvchi uning xodimi;

ERIning yopiq kaliti — ERI vositalaridan foydalangan holda hosil qilingan, faqat imzo qo‘yuvchi shaxsning o‘ziga ma’lum bo‘lgan va elektron hujjatda ERIni yaratish uchun mo‘ljallangan belgilar ketma-ketligi;

ERIning ochiq kaliti — ERI vositalaridan foydalangan holda hosil qilingan, ERIning yopiq kalitiga mos keluvchi, axborot tizimining har qanday foydalanuvchisi foydalana oladigan va elektron hujjatdagi ERIning haqiqiyligini tasdiqlash uchun mo‘ljallangan belgilar ketma-ketligi;

ERI kalitining sertifikati — ERIning ochiq kaliti ERIning yopiq kalitiga mosligini tasdiqlaydigan va ERI yopiq kalitining egasiga ro‘yxatga olish markazi tomonidan berilgan hujjat. ERI kalitining sertifikati elektron hujjat shaklida va qog‘oz hujjat shaklida tayyorlanishi mumkin;

ERI vositalari — elektron hujjatda ERI yaratilishini, ERIning haqiqiyligi tasdiqlanishini, ERIning yopiq va ochiq kalitlari yaratilishini ta’minlaydigan barcha texnikaviy va dasturiy vositalar;

ERIning haqiqiyligini tasdiqlash — ERIning ERI yopiq kalitining egasiga tegishliligi va elektron hujjatdagi axborotda xatolik yo‘qligi tekshirilgandagi ijobiy natija;

ERI kaliti sertifikatining haqiqiyligini tasdiqlash — ERI kalitining sertifikati ERIning yopiq kaliti egasiga tegishliligi va ERI kalitining sertifikatidagi axborotda xatolik yo‘qligi tekshirilgandagi ijobiy natija.

3. ERI kalitining sertifikatini berish tartibi hamda ERI foydalanuvchilari va egalarining huquq va majburiyatlari O‘zbekiston Respublikasi Vazirlar Mahkamasining 2005-yil 26-sentabrdagi 215-sonli qarori bilan tasdiqlangan Elektron raqamli imzo kalitlarini ro‘yxatga olish markazlarining faoliyat ko‘rsatish tartibi to‘g‘risidagi nizomi bilan belgilanadi.

4. Xizmatlarni bajaruvchilar tomonidan foydalanuvchini identifikatsiyalash elektron so‘rovdagi va ERI kalitining sertifikatidagi rekvizitlar asosida amalga oshiriladi.

5. Xizmatlarni bajaruvchilarga foydalanuvchi tomonidan elektron so‘rov ERI kalitining sertifikati bilan birgalikda yuboriladi.

6. Elektron so‘rovdagi ERIning haqiqiyligini tekshirish xizmatlarni bajaruvchilar tomonidan ERI vositalaridan foydalanilgan holda elektron so‘rov kelib tushgan kundan keyingi ish kunidan kechiktirmasdan amalga oshiriladi.

7. Elektron so‘rovdagi ERIning haqiqiyligini tekshirish quyidagi usullar bilan amalga oshiriladi:

elektron hujjatdagi axborotda xatolik yo‘qligini aniqlash;

ERI kaliti sertifikatining haqiqiyligini tekshirish;

ERI kaliti sertifikatining maqomini tekshirish;

elektron so‘rov maqsadi ERI kaliti sertifikatida ko‘rsatilgan maqsadlarga muvofiqligini tekshirish.

8. Elektron so‘rovdagi ERIning haqiqiyligini tekshirish ushbu Qoidalarning 7-bandida ko‘rsatilgan barcha usullardan foydalanilgan holda amalga oshiriladi.

9. Elektron hujjatdagi axborotda xatolik yo‘qligini aniqlash xizmatlarni bajaruvchilar tomonidan ERIning ochiq kaliti yordamida ERI vositalaridan foydalangan holda amalga oshiriladi.

10. ERI kaliti sertifikatining haqiqiyligini tekshirish xizmatlarni bajaruvchilar tomonidan ERI vositalari yordamida vakolatli shaxsning ERI kaliti sertifikatidan foydalangan holda amalga oshiriladi.

11. Elektron so‘rovdagi ERI kaliti sertifikatining haqiqiyligini tasdiqlash mazkur sertifikatdagi vakolatli shaxs ERIsining haqiqiyligini tasdiqlashdan iborat.

12. Xizmatlarni bajaruvchilar vakolatli shaxsning ERI kaliti sertifikatining elektron hujjat shaklini Ro‘yxatga olish markazlari vakolatli shaxslarining elektron raqamli imzosi kalitlari sertifikatlarining yagona davlat reyestridan oladi.

13. Xizmatlarni bajaruvchilar ERI kaliti sertifikatining haqiqiyligini tasdiqlaganidan so‘ng ERIning haqiqiyligi tasdiqlangan paytidagi yoki imzolash paytini belgilovchi dalillar bo‘lganda elektron hujjat imzolanayotgan paytidagi ERI kaliti sertifikatining maqomini tekshiradi.

14. ERI kaliti sertifikatining maqomi xizmatlarni bajaruvchilar tomonidan ERI vositalari bilan ro‘yxatga olish markaziga aloqa kanallari orqali murojaat qilish yo‘li bilan tekshiriladi.

15. ERI kaliti sertifikatiga ro‘yxatga olish markazi tomonidan amalda, amal qilishi to‘xtatib turilgan va bekor qilingan maqomlari beriladi.

16. ERI kaliti sertifikatining maqomi to‘g‘risidagi axborot ro‘yxatga olish markazi tomonidan xizmatlarni bajaruvchilarga vakolatli shaxsning ERIsi bilan tasdiqlangan shaklda aloqa kanallari orqali taqdim etiladi.

17. Elektron so‘rov maqsadi ERI kaliti sertifikatida ko‘rsatilgan maqsadlarga muvofiq bo‘lishi lozim.

18. Elektron so‘rovdagi ERIning haqiqiyligini tekshirish natijasi bo‘yicha xizmatlarni bajaruvchilar tomonidan elektron so‘rov kelib tushgan kundan keyingi bir ish kuni ichida elektron so‘rovdagi ERIning haqiqiyligi tasdiqlanganligi yoki tasdiqlanmaganligi haqida qaror qabul qilinadi.

19. Elektron so‘rovdagi ERIning haqiqiyligi quyidagi holatlarda tasdiqlangan hisoblanadi:

elektron hujjatdagi axborotda xatolik yo‘qligi aniqlanganda;

ERI kaliti sertifikatining haqiqiyligi tasdiqlanganda;

ERI kaliti sertifikatining maqomi amalda deb topilganda;

elektron so‘rov maqsadi ERI kaliti sertifikatida ko‘rsatilgan maqsadlarga muvofiq bo‘lganda.

20. Elektron so‘rovdagi ERIning haqiqiyligi tasdiqlanganligi xizmatlarni bajaruvchilar tomonidan elektron so‘rovni ko‘rib chiqish uchun asos bo‘ladi.

21. Elektron so‘rovdagi ERIning haqiqiyligi quyidagi holatlarda tasdiqlanmagan hisoblanadi:

elektron hujjatdagi axborotda xatolik aniqlanganda;

ERI kaliti sertifikatining haqiqiyligi tasdiqlanmaganda;

ERI kaliti sertifikatining maqomi — amal qilishi to‘xtatib turilgan yoki bekor qilingan deb topilganda;

elektron so‘rov maqsadi ERI kaliti sertifikatida ko‘rsatilgan maqsadlarga muvofiq bo‘lmaganda.

22. Ushbu Qoidalarning 21-bandida ko‘rsatilgan holatlarning kamida bittasi mavjud bo‘lganda elektron so‘rovdagi ERIning haqiqiyligi tasdiqlanmagan hisoblanadi.

23. Elektron so‘rovdagi ERIning haqiqiyligini tekshirish natijasi bo‘yicha xizmatlarni bajaruvchilar tomonidan elektron so‘rovdagi ERIning haqiqiyligi tasdiqlanmaganligi haqida qaror qabul qilingan taqdirda, xizmatlarni bajaruvchilar mazkur qaror qabul qilingan kunning o‘zida foydalanuvchiga elektron so‘rovni ko‘rib chiqishni rad etish to‘g‘risidagi xabarnoma yuboradi.

24. Elektron so‘rovni ko‘rib chiqishni rad etish to‘g‘risidagi xabarnoma elektron hujjat shaklida aloqa kanallari orqali foydalanuvchining elektron pochta manziliga elektron so‘rovni ko‘rib chiqishni rad etish sabablari ko‘rsatilgan holda yuboriladi.

25. Foydalanuvchi u tomonidan taqdim etilgan elektron so‘rovning asl nusxasini olish uchun xizmatlarni bajaruvchilarga yozma ravishda murojaat qilishi mumkin. Bunda, xizmatlarni bajaruvchilar tomonidan elektron so‘rovning asl nusxasi foydalanuvchiga bir ish kuni ichida taqdim qilinishi shart.

26. Elektron xizmatni ko‘rsatish natijasi xizmatlarni bajaruvchilar vakolatli shaxsining ERIsi bilan tasdiqlangan bo‘lishi lozim.

27. Ushbu Qoidalar talablarining buzilishida aybdor bo‘lgan shaxslar qonunchilik hujjatlariga muvofiq javobgar bo‘ladilar.