“Garov toʻgʻrisida” va “Ipoteka toʻgʻrisida”gi Oʻzbekiston Respublikasi qonunlariga muvofiq, Oʻzbekiston Respublikasi Prezidentining “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash toʻgʻrisida” 2013-yil 15-iyuldagi PQ–2003-son qarorini va Oʻzbekiston Respublikasi Vazirlar Mahkamasining “Tarixiy, badiiy yoki oʻzga madaniy qimmatliligi tufayli garov va ipoteka qoʻllanilishi mumkin boʻlmagan obyektlar roʻyxatini tasdiqlash toʻgʻrisida” 2014-yil 5-dekabrdagi 335-son qarorini bajarish yuzasidan hamda davlat xavfsizligini taʼminlash manfaatlari nuqtai nazaridan Vazirlar Mahkamasi qaror qiladi:

1. Davlat xavfsizligini taʼminlash manfaatlari nuqtai nazaridan garov va ipoteka qoʻllanilishi mumkin boʻlmagan obyektlar toifalari roʻyxati ilovaga muvofiq tasdiqlansin.

2. Vazirliklar va idoralar bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Oʻzbekiston Respublikasi hududi doirasida yer va yer osti boyliklari.

2. Milliy arxiv fondining davlatga tegishli qismi tarkibiga kiritilgan arxiv hujjatlari, ilmiy-tadqiqot muassasalarining arxivlari, fondlari.

3. Muhofaza etiladigan tabiiy hududlar.

4. Oʻzbekiston Respublikasi Davlat budjeti, Oʻzbekiston Respublikasi xalqaro zaxiralari, Oʻzbekiston Respublikasi Moliya vazirligi, Markaziy banki, Tiklanish va taraqqiyot jamgʻarmasi, davlat maqsadli fondlari mablagʻlari, xalqaro operatsiyalar va hisob-kitoblarni amalga oshirish bilan bogʻliq holatlar, shuningdek Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining ayrim qarorlari bilan nazarda tutilgan holatlar bundan mustasno.

5. Pul belgilarini, qimmatli qogʻozlarni, ordenlarni va medallarni ishlab chiqarishni taʼminlovchi davlat korxonalari va obyektlar.

6. Oʻzbekiston Respublikasi Qurolli Kuchlarining, Milliy xavfsizlik xizmatining va Ichki ishlar vazirligining korxonalari, obyektlari va harbiy-texnikaviy mol-mulki (sanoatda qayta ishlov berilguniga qadar, shuningdek sanoatda (qayta ishlov berilishi mumkin boʻlmagan mol-mulk).

7. Ionlashtiruvchi nurlanish manbalaridan foydalanib ilmiy-tadqiqot, tajriba-konstruktorlik ishlarini olib boruvchi, rentgen uskunalari, asbob-uskunalar va jihozlarni ishlab chiqish, tayyorlash va realizatsiya qilishni amalga oshiruvchi davlat korxonalari va davlat obyektlari.

8. Radioaktiv moddalarni kavlab olish, ishlab chiqarish, tashish, qayta ishlashni, radioaktiv chiqindilarni koʻmish, uran va boshqa boʻlinuvchi materiallarni, shuningdek ulardan yasalgan buyumlarni realizatsiya qilishni amalga oshiruvchi davlat korxonalari va davlat obyektlari.

9. Qurol-yarogʻ va oʻq dorilar, himoya vositalari, harbiy texnika, ehtiyot qismlar, butlovchi qismlar va ular uchun asbob-uskunalar, portlovchi moddalar, pirotexnika mahsulotlari, shuningdek ularni ishlab chiqarish uchun maxsus materiallar va uskunalar ishlab chiqish, tayyorlash, taʼmirlash va realizatsiya qilishni amalga oshiruvchi davlat korxonalari va davlat obyektlari.

10. Ovchilik va sport sohasida foydalaniladigan oʻqotar qurollar va oʻq-dorilar, shuningdek tigʻ qurol (sovgʻa tarzidagi milliy pichoqlar bundan mustasno) ishlab chiqarish, taʼmirlash va realizatsiya qilishni amalga oshiruvchi davlat korxonalari va davlat obyektlari.

11. Kuchli taʼsir etadigan zaharlar, giyohvandlik moddalari va zaharli moddalar ishlab chiqaruvchi, shuningdek tarkibida giyohvandlik moddalari va zaharli moddalar boʻlgan ekinlar ekuvchi, yetishtiruvchi va ularga qayta ishlov beruvchi davlat korxonalari.

12. Oʻzbekiston Respublikasining davlat zaxiralari.

13. Fuqaro muhofazasi va safarbarlik maqsadidagi obyektlar hamda mol-mulk.

14. Atom energetikasi obyektlarini (uskunalari, tizimlari va apparatlarini oʻrnatish) va strategik ahamiyatdagi obyektlarni qurish va montaj qilish ishlarini olib borish, ulardan foydalanish hamda ularni taʼmirlashni amalga oshiruvchi ixtisoslashtirilgan davlat korxonalari va obyektlar.

15. Portlash xavfi boʻlgan va zaharli moddalarni tashishni amalga oshiruvchi ixtisoslashtirilgan davlat korxonalari va obyektlar.

16. Umumiy foydalanishdagi avtomobil yoʻllari.

17. Sanitariya-epidemiologiya stansiyalari. Sud-tibbiy ekspertizasi byurolari. Atrof muhit holatini nazorat qiluvchi hamda tabiatni muhofaza qiluvchi xizmatlar.

18. Jazoni ijro etish muassasalarining davolash-ishlab chiqarish ustaxonalari, korxonalari va obyektlari.

19. Maxsus vazifalarni bajaradigan korxonalar va obyektlar (Respublika maxsus aloqa uzeli, 15361-harbiy qism, Elektromagnit moslashuv markazi).

20. Qabristonlar.

21. Oʻzbekiston Respublikasi Prezidentining qarorlari bilan tasdiqlanadigan roʻyxat boʻyicha alohida muhim va toifalangan obyektlar.

22. Muomaladan olib qoʻyilgan va oʻzgaga berilmaydigan ashyolar, shuningdek boshqa shaxsga berilishi qonunda man etilgan talablar.

23. Oʻzbekiston Respublikasining qonunlariga, Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qarorlariga muvofiq davlat xavfsizligini taʼminlash manfaatlari nuqtai nazaridan ularga nisbatan garov va ipoteka qoʻllanilishiga yoʻl qoʻyilmaydigan boshqa obyektlar.