Koʻmir tarmogʻi korxonalarini texnika bilan qayta jihozlash va rekonstruksiya qilish boʻyicha belgilangan parametrlarning soʻzsiz bajarilishini taʼminlash, ularni zamonaviylashtirish uchun xorijiy investitsiyalarni jalb etish, qazib olinayotgan koʻmir tannarxini pasaytirish hamda elektr va issiqlik energiyasi ishlab chiqarishda uning yoqilgʻi tarkibidagi salmogʻini koʻpaytirish maqsadida Vazirlar Mahkamasi qaror qiladi:

1. “Oʻzbekenergo” davlat-aksiyadorlik kompaniyasi (E.Shoismatov) va “Koʻmir” aksiyadorlik birlashmasi (A.Klimenko) rahbariyatiga koʻmir qazib olish korxonalarini rekonstruksiya qilish va texnika bilan qayta jihozlash loyihalarini amalga oshirishning belgilangan muddatlariga rioya etilmaganligi, koʻmir tannarxini pasaytirish, ishlab chiqarish rentabelligini oshirish va koʻmir tarmogʻining moliyaviy ahvolini mustahkamlash boʻyicha taʼsirchan iqtisodiy chora-tadbirlar koʻrilmaganligi koʻrsatib oʻtilsin.

2. “Oʻzbekenergo” davlat-aksiyadorlik kompaniyasi va “Koʻmir” aksiyadorlik birlashmasi tomonidan Oʻzbekiston Respublikasi Iqtisodiyot vazirligi va Moliya vazirligi bilan birgalikda ishlab chiqilgan “Koʻmir” aksiyadorlik birlashmasi korxonalarida koʻmir qazib olish tannarxini pasaytirish chora-tadbirlari dasturi ilovaga muvofiq tasdiqlansin.

“Oʻzbekenergo” davlat-aksiyadorlik kompaniyasi va “Koʻmir” aksiyadorlik birlashmasi rahbarlariga Dasturda nazarda tutilgan chora-tadbirlarning toʻliq va oʻz vaqtida amalga oshirilishi uchun shaxsiy javobgarlik yuklansin.

3. Koʻmir tannarxining asossiz oʻsishiga yoʻl qoʻymaslik maqsadida Oʻzbekiston Respublikasi Moliya vazirligi, “Oʻzbekenergo” davlat-aksiyadorlik kompaniyasi va “Koʻmir” aksiyadorlik birlashmasi ishlab chiqarish xarajatlari tarkibi oʻzgarishi ustidan qatʼiy monitoring oʻrnatsinlar, 1 tonna koʻmir qazib olish uchun moddalar boʻyicha cheklangan xarajatlarni tasdiqlasinlar.

4. Vazirlar Mahkamasining “Koʻmir” aksiyadorlik birlashmasi tuzilmasini takomillashtirish va 2002—2010-yillarda respublika koʻmir sanoatini rivojlantirish Dasturini amalga oshirish chora-tadbirlari toʻgʻrisida” 2002-yil 4-iyundagi 196-son qaroriga muvofiq:

“Angren” konini texnika bilan qayta jihozlashning yiliga 4,5 mln kub.metr kon ochadigan birinchi bosqichi obyektlari qurilishi boʻyicha ishlar tugallanganligi;

“Angren” koni obyektlarini texnika bilan qayta jihozlash uchun “Kon-texnika asbob-uskunalarini taʼmirlash zavodi” ochiq aksiyadorlik jamiyatida importning oʻrnini bosuvchi mahsulotlar ishlab chiqarish yoʻlga qoʻyilganligi;

sotish bozorini kengaytirish, eksportbop mahsulotlar ishlab chiqarish hajmlarini koʻpaytirish uchun 2003-yil iyul oyida “Boysunkoʻmir” ochiq aksiyadorlik jamiyatida qadoqlangan koʻmir briketlari ishlab chiqarish oʻzlashtirilganligi;

“Koʻmir” aksiyadorlik birlashmasi tomonidan 2003-yil oktabr oyidan boshlab “Angren” konini texnika bilan qayta jihozlashning ikkinchi bosqichini amalga oshirish boshlanishi maʼlumot uchun qabul qilinsin.

5. Oʻzbekiston Respublikasi Iqtisodiyot vazirligi, Moliya vazirligi, “Oʻzbekenergo” davlat-aksiyadorlik kompaniyasi va “Koʻmir” aksiyadorlik birlashmasining Koʻmir tarmogʻini texnika bilan qayta jihozlash va zamonaviylashtirish maqsadli jamgʻarmasini (keyingi oʻrinlarda Jamgʻarma deb ataladi) tashkil etish toʻgʻrisidagi taklifiga rozilik berilsin.

Quyidagilar Jamgʻarmani shakllantirish manbalari etib belgilansin:

koʻmir sanoati korxonalarining amaldagi qonunchilikka muvofiq soliqlar va majburiy toʻlovlar toʻlangandan keyin qoladigan foydasining bir qismi;

2003-yil sentabr oyidan boshlab elektr energiyasi isteʼmolchilari uchun imtiyozli tariflarni bekor qilish natijasida “Oʻzbekenergo” davlat-aksiyadorlik kompaniyasi oladigan qoʻshimcha sof daromadining 40 foizi;

qonunchilikka zid boʻlmagan boshqa tushumlar.

6. Belgilab qoʻyilsinki:

Jamgʻarma mablagʻlaridan faqat “Angren” konini texnika bilan qayta jihozlashda, “Apartak” uchastkasini rekonstruksiya qilishni moliyalashtirishda, koʻmir sanoatini zamonaviylashtirish uchun jalb qilinadigan xorijiy kreditlarni qoplashda foydalaniladi;

“Oʻzbekenergo” davlat-aksiyadorlik kompaniyasi qoʻshimcha sof daromadining Jamgʻarma orqali koʻmir sanoatini texnika bilan qayta jihozlash va zamonaviylashtirishga yoʻnaltiriladigan bir qismi koʻmir qazib oluvchi korxonalarning foyda soligʻining soliq solinadigan bazasiga kiritilmaydi;

2004-yildan boshlab Angren koʻmir koni obyektlarini texnika bilan qayta jihozlash uchun kapital qoʻyilmalar “Oʻzbekenergo” davlat-aksiyadorlik kompaniyasining markazlashtirilgan mablagʻlar, Jamgʻarma mablagʻlari va tarmoqning oʻz resurslari hisobiga amalga oshiriladigan qurilishlari aniq roʻyxatiga kiritiladi.

“Oʻzbekenergo” davlat-aksiyadorlik kompaniyasi Oʻzbekiston Respublikasi Moliya vazirligi bilan birgalikda bir oy muddatda Jamgʻarma mablagʻlarini shakllantirish va ulardan maqsadli foydalanish tartibi toʻgʻrisidagi nizomni ishlab chiqsin va tasdiqlasin.

7. “Koʻmir” aksiyadorlik birlashmasi korxonalari va tashkilotlariga olinadigan elektr energiyasi uchun energiya tizimining xoʻjalik ehtiyojlari uchun belgilanadigan X tarif guruhi tariflari boʻyicha haq toʻlash tartibi joriy etilsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov zimmasiga yuklansin.