“Aholini ish bilan taʼminlash toʻgʻrisida” va “Budjet tizimi toʻgʻrisida”gi Oʻzbekiston Respublikasi qonunlariga muvofiq Vazirlar Mahkamasi qaror qiladi:

1. Oʻzbekiston Respublikasi Ish bilan taʼminlashga koʻmaklashuvchi davlat jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom 1-ilovaga muvofiq tasdiqlansin.

2. Oʻzbekiston Respublikasi Mehnat va aholini ijtimoiy muhofaza qilish vazirligi Moliya vazirligi va Davlat soliq qoʻmitasi bilan birgalikda ikki hafta muddatda Oʻzbekiston Respublikasi Ish bilan taʼminlashga koʻmaklashuvchi davlat jamgʻarmasi mablagʻlarini undirish, hisobga olish va sarflash tartibi toʻgʻrisidagi Yoʻriqnomani ishlab chiqsin va belgilangan tartibda tasdiqlasin.

3. Vazirliklar, idoralar, konsernlar, uyushmalar, mulkchilikning barcha shakllaridagi korxonalar, muassasalar va tashkilotlar Oʻzbekiston Respublikasi Ish bilan taʼminlashga koʻmaklashuvchi davlat jamgʻarmasiga mablagʻlarning toʻliq va oʻz vaqtida ajratilishini taʼminlasinlar.

4. Oʻzbekiston Respublikasi Mehnat va aholini ijtimoiy muhofaza qilish vazirligi hamda Davlat soliq qoʻmitasi Oʻzbekiston Respublikasi Ish bilan taʼminlashga koʻmaklashuvchi davlat jamgʻarmasiga mablagʻlarning toʻliq tushishi ustidan qatʼiy va hamma joyda nazorat oʻrnatsinlar.

5. Oʻzbekiston Respublikasi Mehnat va aholini ijtimoiy muhofaza qilish vazirligiga Moliya vazirligi hamda Markaziy bank bilan kelishgan holda Oʻzbekiston Respublikasi Ish bilan taʼminlashga koʻmaklashuvchi davlat jamgʻarmasiga boshqa davlatlar tashkilotlari va fuqarolaridan tushadigan mablagʻlarni oʻtkazish uchun xorijiy valyutada hisob raqami ochishga ruxsat etilsin.

Oʻzbekiston Respublikasi Mehnat va aholini ijtimoiy muhofaza qilish vazirligi koʻrsatib oʻtilgan valyuta mablagʻlaridan aholini ish bilan taʼminlash bilan bogʻliq maqsadlarda foydalansin.

6. Oʻzbekiston Respublikasi Vazirlar Mahkamasining 1993-yil 24-iyundagi 310-son qarori bilan tasdiqlangan Aholini ish bilan taʼminlash dasturlarini ishlab chiqish va amalga oshirish tartibiga, 2-ilovaga muvofiq oʻzgartirishlar kiritilsin.

7. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Oʻzbekiston Respublikasi Ish bilan taʼminlashga koʻmaklashuvchi davlat jamgʻarmasi (keyingi oʻrinlarda Ish bilan taʼminlash jamgʻarmasi deb yuritiladi) aholini ish bilan taʼminlash sohasidagi davlat siyosatini amalga oshirish hamda mehnat, aholini ish bilan taʼminlash va ijtimoiy muhofaza qilish tuman (shahar) boʻlimlarining (keyingi oʻrinlarda mehnat boʻlimlari deb ataladi) samarali faoliyat koʻrsatishi tadbirlarini mablagʻ bilan taʼminlash uchun Oʻzbekiston Respublikasi Mehnat va aholini ijtimoiy muhofaza qilish vazirligi tarkibida tashkil etilgan.

2. Ish bilan taʼminlash jamgʻarmasi budjetdan tashqari maqsadli davlat jamgʻarmasi hisoblanadi, mahalliy va respublika darajalarida tashkil etiladi va uning mablagʻlarini shakllantirish va ulardan foydalanishning maqsadli yoʻnaltirilganligi saqlab qolingan holda Davlat budjeti tarkibida jamlanadi hamda Jamgʻarmaning mustaqil balansida aks ettiriladi.

3. Ish bilan taʼminlash jamgʻarmasi mablagʻlari Oʻzbekiston Respublikasi Mehnat va aholini ijtimoiy muhofaza qilish vazirligi, Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar mehnat va aholini ijtimoiy muhofaza qilish bosh boshqarmalarining budjetdan tashqari maqsadli maxsus hisob raqamlarida jamlanadi. Bunda korxonalar, muassasalar va tashkilotlarning (keyingi oʻrinlarda ish beruvchilar deb yuritiladi) ajratmalari hisobiga tashkil topadigan Ish bilan taʼminlash jamgʻarmasi mablagʻlarining yetmish foizi Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar Mehnat va aholini ijtimoiy muhofaza qilish bosh boshqarmalari ixtiyorida qoladi, keyinchalik tumanlar va shaharlar oʻrtasida taqsimlanadi, oʻttiz foizi Qoraqalpogʻiston Respublikasi Mehnat va aholini ijtimoiy muhofaza qilish vazirligi, tegishli hududiy mehnat va aholini ijtimoiy muhofaza qilish boshqarmalarining toʻlov topshiriqnomalari bilan pul oʻtkazish yoʻli bilan respublika darajasida markazlashtiriladi.

4. Ish bilan taʼminlash jamgʻarmasi mablagʻlarini tegishli ravishda Oʻzbekiston Respublikasi Mehnat va aholini ijtimoiy muhofaza qilish vazirligi, Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar mehnat va aholini ijtimoiy muhofaza qilish bosh boshqarmalari tasarruf etadilar.

5. Quyidagilar Ish bilan taʼminlash jamgʻarmasining asosiy vazifalari hisoblanadi:

ishsizlarni moddiy qoʻllab-quvvatlash yuzasidan davlat kafolatlarini amalga oshirish;

mehnat boʻlimlari taʼminotini moliyalashtirish;

tijorat banklarida kredit liniyalari ochish yoʻli bilan ish oʻrinlarini saqlab qolish va yangi ish oʻrinlari tashkil etish uchun kreditlar berish;

fuqarolarni ishga joylashtirish, mehnat, aholini ish bilan taʼminlash va ijtimoiy muhofaza qilish masalalari boʻyicha meʼyoriy hujjatlarni ishlab chiqish, sotsiologik kuzatuvlar oʻtkazish bilan bogʻliq xarajatlarni mablagʻ bilan taʼminlash.

6. Koʻrsatib oʻtilgan vazifalarni amalga oshirish uchun Oʻzbekiston Respublikasi Mehnat va aholini ijtimoiy muhofaza qilish vazirligi va uning joylardagi organlari:

ish beruvchilarning majburiy ajratmalarini Oʻzbekiston Respublikasi Mehnat va aholini ijtimoiy muhofaza qilish vazirligi, Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar mehnat va aholini ijtimoiy muhofaza qilish bosh boshqarmalarining budjetdan tashqari maqsadli maxsus hisob raqamlarida jamlaydilar;

Ish bilan taʼminlash jamgʻarmasi mablagʻlaridan ishsizlik nafaqalarini, ishsiz fuqarolarga moddiy yordamni va qonun hujjatlarida koʻrsatilgan boshqa toʻlovlarni oʻz vaqtida tayinlaydilar, moliyalashtiradilar va toʻlaydilar;

Ish bilan taʼminlash jamgʻarmasi mablagʻlaridan qonun hujjatlariga muvofiq qatʼiy maqsadli foydalanadilar;

ishsizlarni ijtimoiy muhofaza qilish tizimining barqarorligini taʼminlash va uni yanada takomillashtirish uchun oldini oluvchi chora-tadbirlarni ishlab chiqish maqsadida Ish bilan taʼminlash jamgʻarmasining moliyaviy ahvolini prognozlash boʻyicha aktuar hisob-kitoblarni amalga oshiradilar;

majburiy ajratmalar miqdorlarini belgilash toʻgʻrisida takliflar tayyorlaydilar;

Ish bilan taʼminlash jamgʻarmasining kelgusi yil uchun daromadlari manbalari va ulardan foydalanish yoʻnalishlari prognozi loyihasini ishlab chiqadilar va Oʻzbekiston Respublikasi Moliya vazirligiga taqdim etadilar;

Ish bilan taʼminlash jamgʻarmasi budjetining ijrosi toʻgʻrisidagi har oylik hisobotlarni, shuningdek yiliga bir marta Ish bilan taʼminlash jamgʻarmasi daromadlari va ulardan foydalanishning ahvoli toʻgʻrisidagi mustaqil auditorlik tekshiruvi natijalarini tayyorlaydilar va Oʻzbekiston Respublikasi Moliya vazirligiga belgilangan tartibda taqdim etadilar;

Ish bilan taʼminlash jamgʻarmasi vazifalarini amalga oshirish uchun zarur boʻlgan normativ-huquqiy hujjatlarni oʻz vakolatlari doirasida ishlab chiqadilar;

joylardagi davlat hokimiyati organlari bilan birgalikda ish bilan taʼminlash hududiy dasturlarini amalga oshirishda, haq toʻlanadigan jamoat ishlarini tashkil etishda qatnashadilar;

majburiy ajratmalar va toʻlovlarning toʻgʻri hisoblanishini va oʻz vaqtida Ish bilan taʼminlash jamgʻarmasiga toʻliq toʻlanishini hisobga oladilar va nazorat qiladilar;

ish beruvchilar tomonidan majburiy ajratmalar va toʻlovlar toʻgʻri hisoblab chiqilishini, shuningdek amaldagi qonun hujjatlariga muvofiq Ish bilan taʼminlash jamgʻarmasi bilan oʻzaro hisob-kitoblarning ahvolini tekshiradilar;

qonun hujjatlariga muvofiq majburiy ajratmalarni hisoblab chiqarish tartibini va toʻlov muddatlarini buzganlik uchun mansabdor shaxslarga nisbatan moliyaviy va maʼmuriy choralar qoʻllaydilar;

Ish bilan taʼminlash jamgʻarmasining toʻlov subyektlari va moliyalashtirish obyektlari boʻyicha toʻliq hisob-kitobni va elektron maʼlumotlar bazasi yuritilishini taʼminlaydilar.

Mehnat va aholini ijtimoiy muhofaza qilish vazirligi Ish bilan taʼminlash jamgʻarmasiga taalluqli masalalar boʻyicha xalqaro tashkilotlar va xorijiy davlatlarning vakolatli organlari bilan belgilangan tartibda hamkorlik qiladi.

7. Ish beruvchilar:

majburiy toʻlovlarni qonun hujjatlarida belgilangan miqdorlarda va tartibda hisoblab chiqarish va Ish bilan taʼminlash jamgʻarmasiga toʻlashga;

Ish bilan taʼminlash jamgʻarmasining kreditlashga, haq toʻlanadigan jamoat ishlarini tashkil etishga, qonun hujjatlarida belgilangan tartibda ishsiz deb tan olingan shaxslarni kasbga tayyorlash, qayta tayyorlash va ularning malakasini oshirishga ajratilgan mablagʻlarini sarflashning maqsadli yoʻnaltirilishiga qatʼiy rioya etilishini taʼminlashga;

Ish bilan taʼminlash jamgʻarmasiga majburiy ajratmalarni toʻlash boʻyicha belgilangan shakldagi hisobotlarning ishonchliligini va oʻz vaqtida taqdim etilishini taʼminlashga majburdirlar.

8. Ish bilan taʼminlash jamgʻarmasi mablagʻlari quyidagilar hisobiga shakllantiriladi:

korxonalar, muassasalar, tashkilotlarning ish haqi fondidan Oʻzbekiston Respublikasi Vazirlar Mahkamasi tomonidan belgilanadigan miqdordagi majburiy ajratmalari, ushbu xarajatlar mahsulot tannarxiga qoʻshiladi;

tegishli budjet mablagʻlarini shakllantirishda Oʻzbekiston Respublikasi Vazirlar Mahkamasi va joylardagi davlat hokimiyati organlari tomonidan belgilanadigan miqdorlarda respublika va mahalliy budjet mablagʻlaridan dotatsiyalar;

qonun hujjatlarida nazarda tutilgan talablar buzilganligi uchun joylardagi mehnat organlari tomonidan belgilangan tartibda solinadigan moliyaviy sanksiyalar va qoʻshilgan penyalar summasi;

qoʻshimcha va yangi ish oʻrinlari yaratish uchun kichik biznes subyektlarini kreditlash uchun tijorat banklari tomonidan ochilgan kredit liniyalaridan foizlar;

yuridik va jismoniy shaxslarning, shu jumladan xorijiy yuridik va jismoniy shaxslarning ixtiyoriy badallari;

qonun hujjatlariga muvofiq boshqa tushumlar.

9. Quyidagilar Ish bilan taʼminlash jamgʻarmasiga ajratmalar toʻlashdan ozod etiladilar:

nogironlar jamoat tashkilotlariga qarashli oʻquv-ishlab chiqarish va ishlab chiqarish korxonalari;

protez-ortopediya buyumlari ishlab chiqarishga, nogironlarga protez qoʻyish boʻyicha xizmatlar koʻrsatishga ixtisoslashtirilgan korxonalar;

tarbiya va taʼlim muassasalari huzuridagi oʻquv-ishlab chiqarish ustaxonalari va oʻquv-ishlab chiqarish korxonalari;

budjet taʼminotidagi teatr-tomosha tashkilotlari.

10. Ish bilan taʼminlash jamgʻarmasi mablagʻlarini jamlash va ulardan foydalanish uchun banklarda hisob raqamlari ochiladi.

11. Ish bilan taʼminlash jamgʻarmasi mablagʻlari hisobiga quyidagilar amalga oshiriladi:

mehnat organlarida ishsizlik maqomi olgan va ish qidiruvchi sifatida roʻyxatda turgan shaxslarni kasbga tayyorlash, ularning malakasini oshirish va qayta tayyorlash ishlarini mablagʻ bilan taʼminlash;

ishsizlik boʻyicha nafaqalar, mehnat organlarining taklifiga binoan ishlash uchun boshqa joyga ixtiyoriy ravishda koʻchib oʻtish uchun kompensatsiyalar toʻlash va qonun hujjatlariga muvofiq ishsizlarga moddiy yordam berish;

ishsizlarga muddatidan oldin pensiya tayinlanganligi sababli budjetdan tashqari Pensiya jamgʻarmasi xarajatlarini qoplash;

haq toʻlanadigan jamoat ishlarini qonun hujjatlarida belgilangan tartibda mablagʻ bilan taʼminlash;

nogironlar va fuqarolarning ijtimoiy himoyaga muhtoj boʻlgan boshqa toifalari mehnatidan foydalanish uchun ixtisoslashtirilgan ish oʻrinlari (ishlab chiqarishlar) tashkil etish tadbirlarini mablagʻ bilan qisman taʼminlash;

mehnat organlari taʼminoti, barcha darajalardagi mehnat va aholini ijtimoiy muhofaza qilish organlarini (tuman va shahar ijtimoiy taʼminot boʻlimlaridan tashqari) joylashtirish uchun binolar qurish va ularni rekonstruksiya qilish, ularni moddiy-texnikaviy taʼminlash, kompyuterlar, nusxa koʻchirish va boshqa zarur texnika bilan jihozlash;

axborot-maʼlumotlar va reklama-noshirlik ishlarini amalga oshirish;

demografiya, aholini ish bilan taʼminlash va ijtimoiy himoya qilish, mehnatni muhofaza qilish, mehnat munosabatlarini tartibga solish, mehnatni normalash va unga haq toʻlash masalalari boʻyicha normativ-uslubiy va yoʻriqnoma materiallar ishlab chiqishni mablagʻ bilan taʼminlash;

belgilangan tartibda respublika darajasida va hududiy darajada ijtimoiy kuzatuvlarni tashkil etish va oʻtkazish, ish bilan taʼminlash masalalari boʻyicha aholining ayrim guruhlari oʻrtasida anketa soʻrovlari oʻtkazish;

respublika va hududiy mehnat bozori axborot tizimlarini yaratish va ularning dasturiy taʼminotini ishlab chiqish, shu jumladan texnika vositalari sotib olish;

ish bilan band boʻlmagan aholiga yordam koʻrsatish, shu jumladan ishga joylashtirishga koʻmaklashish va maslahat xizmatlari koʻrsatish bilan bogʻliq xarajatlarni mablagʻ bilan taʼminlash;

aholini ish bilan taʼminlashga doir muammolar boʻyicha xalqaro hamkorlikni mablagʻ bilan taʼminlash;

ishchi kuchi eksport qilish masalalari boʻyicha xalqaro loyiha va shartnomalarni amalga oshirish, Oʻzbekiston Respublikasining chet ellarga ishga yuborilgan fuqarolarini ishga joylashtirishni tashkil etish, ularning ijtimoiy himoyasini taʼminlash bilan bogʻliq xarajatlarni mablagʻ bilan taʼminlash;

Ish bilan taʼminlash jamgʻarmasi mablagʻlarini koʻpaytirishga yoʻnaltirilgan, aholini ish bilan taʼminlashga bevosita koʻmaklashuvchi tijorat va xoʻjalik hisobidagi faoliyatni amalga oshirish, mulkchilik va xoʻjalik yuritishning turli shakllaridagi korxonalar tashkil etish;

tijorat banklari tomonidan ochiladigan kredit liniyalari orqali xoʻjalik yurituvchi subyektlarga, shu jumladan kichik biznes subyektlariga, dehqon va fermer xoʻjaliklariga, oilaviy tadbirkorlik subyektlariga hamda yakka tartibdagi tadbirkorlarga qonun hujjatlarida belgilangan tartibda toʻlov, taʼminlash va qaytarish shartlarida yangi ish oʻrinlari yaratish uchun qisqa muddatli va oʻrta muddatli kreditlar berish. Bunda Ish bilan taʼminlash jamgʻarmasidan kreditlar ustuvor tartibda va Mehnat va aholini ijtimoiy muhofaza qilish vazirligi hamda uning hududiy bosh boshqarmalari takliflariga koʻra yangi ish oʻrinlari ustuvor ravishda yaratiladigan hududlarda, uzoqda joylashgan, borish qiyin boʻlgan va chegara tumanlarda, murakkab vaziyatda va ekologik noqulay sharoitli mintaqalarda yangi ish oʻrinlari yaratish, shuningdek “Aholini ish bilan taʼminlash toʻgʻrisida”gi Oʻzbekiston Respublikasi Qonunining 7-moddasida koʻrsatilgan aholining alohida toifalarini ish bilan taʼminlash bilan bogʻliq maqsadlar uchun beriladi.

12. Ish bilan taʼminlash jamgʻarmasi hisob raqamlariga:

tekshirishlar natijasida majburiy ajratmalarga qoʻshimcha hisoblangan mablagʻlar summasidan;

mehnat va aholini ish bilan taʼminlash toʻgʻrisidagi qonun hujjatlari buzilganligi uchun undirilgan maʼmuriy va moliyaviy sanksiyalar summasidan tushadigan mablagʻlarning 15 foizi Mehnat va aholini ijtimoiy muhofaza qilish organlarining moddiy yordam jamgʻarmasiga yoʻnaltiriladi.

Ushbu jamgʻarma mablagʻlarini shakllantirish va ulardan foydalanish tartibi Oʻzbekiston Respublikasi Mehnat va aholini ijtimoiy muhofaza qilish vazirligi tomonidan tasdiqlanadi.

13. Ish bilan taʼminlash jamgʻarmasi mablagʻlaridan foydalanish yoʻnalishlari respublika va hududiy darajada ishlab chiqilgan va qonun hujjatlarida belgilangan tartibda tasdiqlanadigan ish bilan taʼminlash dasturlari asosida belgilanadi.

14. Ish bilan taʼminlash jamgʻarmasining Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar mehnat va aholini ijtimoiy muhofaza qilish bosh boshqarmalari hisob raqamlarida yetishmagan mablagʻlari Oʻzbekiston Respublikasi Mehnat va aholini ijtimoiy muhofaza qilish vazirligi tomonidan Ish bilan taʼminlash jamgʻarmasi mablagʻlarining Respublika qismi hisobidan qoplanadi.

Yil boshida zarur hollarda Ish bilan taʼminlash jamgʻarmasi hisob raqamidagi boʻsh mablagʻlar Davlat budjeti taqchilligini qoplash uchun yoʻnaltirilishi mumkin.

15. Ish bilan taʼminlash jamgʻarmasi mablagʻlaridan qonun hujjatlarida nazarda tutilmagan maqsadlarda foydalanilishiga yoʻl qoʻyilmaydi.

16. Mehnat va aholini ijtimoiy muhofaza qilish vazirligi Oʻzbekiston Respublikasi Vazirlar Mahkamasi tomonidan belgilangan tartibda va muddatlarda har yili, lekin joriy yilning birinchi iyulidan kechikmay kelgusi yil uchun Ish bilan taʼminlash jamgʻarmasi daromadlari manbalari va uning mablagʻlaridan foydalanish yoʻnalishlari boʻyicha prognozni Moliya vazirligiga koʻrib chiqish uchun taqdim etadi, ushbu prognoz:

daromadlar manbalari boʻyicha mablagʻlarning oʻtgan yilda va joriy yilning birinchi yarim yilida hududlar boʻyicha haqiqiy tushumini;

Ish bilan taʼminlash jamgʻarmasiga ajratmalar va yigʻimlar boʻyicha moliyaviy hisobot yili oxirida ish beruvchilarning hududlar boʻyicha kreditorlik qarzlarini;

oʻtgan yilda va joriy yilning birinchi yarim yilida Ish bilan taʼminlash jamgʻarmasi mablagʻlaridan tasdiqlangan prognozlar bilan taqqoslaganda hududlar boʻyicha maqsadli foydalanilishini;

oʻtgan yilda xodimlar soni va ish haqining oʻsish surʼatini eʼtiborga olgan holda hisoblangan ish haqi fondi prognozini hisobga olgan holda ishlab chiqiladi.

17. Moliya vazirligi taqdim etilgan hujjatlarni koʻrib chiqish chogʻida Ish bilan taʼminlash jamgʻarmasiga kelgusi yil uchun majburiy ajratmalar va yigʻimlar stavkalarining prognoz qilinadigan oʻzgarishini va makroiqtisodiy koʻrsatkichlar taʼsirini hisobga oladi.

18. Ish bilan taʼminlash jamgʻarmasi daromadlari va uning mablagʻlaridan foydalanishning koʻrib chiqilgan va kelishilgan prognozi kelgusi yil uchun Oʻzbekiston Respublikasining Davlat budjeti parametrlari tarkibida Oʻzbekiston Respublikasi Vazirlar Mahkamasiga kiritiladi.

19. Oʻzbekiston Respublikasi Davlat budjeti Oliy Majlis sessiyasida tasdiqlangandan soʻng, shuningdek Vazirlar Mahkamasining kelgusi yil uchun Oʻzbekiston Respublikasi budjeti parametrlari toʻgʻrisidagi qarori qabul qilingandan keyin Moliya vazirligi Ish bilan taʼminlash jamgʻarmasining kelgusi yil uchun daromadlari va uning mablagʻlaridan foydalanishning tasdiqlangan asosiy parametrlarini oʻn kun muddatda Oʻzbekiston Respublikasi Mehnat va aholini ijtimoiy muhofaza qilish vazirligiga yetkazadi.

20. Oʻzbekiston Respublikasi Mehnat va aholini ijtimoiy muhofaza qilish vazirligi Ish bilan taʼminlash jamgʻarmasining Oʻzbekiston Respublikasi Vazirlar Mahkamasi tomonidan tasdiqlangan daromadlari va uning mablagʻlaridan foydalanishning parametrlari Moliya vazirligidan olingan kundan boshlab bir hafta muddatda Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar mehnat va aholini ijtimoiy muhofaza qilish bosh boshqarmalari, mehnat boʻlimlari uchun kelgusida, Vazirlikning hayʼat majlisida ularning ish yakunlarini koʻrib chiqqan holda, Jamgʻarma daromadlari manbalari va uning mablagʻlaridan foydalanishning yoʻnalishlari boʻyicha yillik prognozni choraklarga boʻlgan holda tasdiqlaydi.

21. Oʻzbekiston Respublikasi Mehnat va aholini ijtimoiy muhofaza qilish vazirligi, Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar mehnat va aholini ijtimoiy muhofaza qilish bosh boshqarmalari, mehnat boʻlimlari Ish bilan taʼminlash jamgʻarmasining tasdiqlangan budjet koʻrsatkichlarini bajarish uchun:

Ish bilan taʼminlash jamgʻarmasi daromadlari va xarajatlarining tasdiqlangan prognoz koʻrsatkichlari bajarilishini;

ish beruvchilardan majburiy ajratmalar, jarimalar va penyalarning toʻliq yigʻilishi va tushishini;

Ish bilan taʼminlash jamgʻarmasi mablagʻlaridan qonun hujjatlariga qatʼiy muvofiq holda maqsadli foydalanilishini taʼminlaydilar.

22. Oʻzbekiston Respublikasi Mehnat va aholini ijtimoiy muhofaza qilish vazirligi, Qoraqalpogʻiston Respublikasi Mehnat va aholini ijtimoiy muhofaza qilish vazirligi, viloyatlar va Toshkent shahar mehnat va aholini ijtimoiy muhofaza qilish bosh boshqarmalari, mehnat boʻlimlari Ish bilan taʼminlash jamgʻarmasiga tushumlarning toʻliq yigʻilishi taʼminlanishi, shuningdek Jamgʻarma mablagʻlarining qatʼiy maqsadga muvofiq ravishda moliyalanishi va foydalanilishi uchun javob beradilar.

23. Ish beruvchilar Ish bilan taʼminlash jamgʻarmasining oʻz hisob raqamlariga oʻtkazilgan mablagʻlaridan maqsadli foydalanilishi, shuningdek majburiy ajratmalarning toʻgʻri hisoblanishi va Ish bilan taʼminlash jamgʻarmasiga oʻz vaqtida toʻlanishi uchun javob beradilar.

24. Ish beruvchilarning Ish bilan taʼminlash jamgʻarmasiga majburiy ajratmalari toʻliq va oʻz vaqtida tushishi ustidan nazorat Oʻzbekiston Respublikasi Mehnat va aholini ijtimoiy muhofaza qilish vazirligi, uning joylardagi organlari va soliq organlari tomonidan amalga oshiriladi.

25. Ishsizlik nafaqalari, shuningdek ishsizlarga kompensatsiyalar va moddiy yordam toʻgʻri hisoblanishini nazorat qilish Oʻzbekiston Respublikasi Mehnat va aholini ijtimoiy muhofaza qilish vazirligi va uning viloyat boʻlinmalari tomonidan amalga oshiriladi.

26. Ish bilan taʼminlash jamgʻarmasi mablagʻlaridan foydalanilishini nazorat qilish Oʻzbekiston Respublikasi Mehnat va aholini ijtimoiy muhofaza qilish vazirligi, Moliya vazirligi tomonidan, zarur hollarda, auditorlar va auditorlik firmalarini jalb qilgan holda amalga oshiriladi.

1. “Dasturni ishlab chiqishning umumiy masalalari” boʻlimida:

birinchi va beshinchi xatboshidagi “Mehnat vazirligi” soʻzlari “Mehnat va aholini ijtimoiy muhofaza qilish vazirligi” soʻzlari bilan almashtirilsin;

uchinchi xatboshidagi “organlari” va “viloyat mehnat boshqarmalariga” soʻzlari tegishli ravishda “boʻlimlari” va “Mehnat va aholini ijtimoiy muhofaza qilish hududiy bosh boshqarmalariga” soʻzlari bilan almashtirilsin;

toʻrtinchi xatboshidagi “Viloyat mehnat boshqarmalari”, “Mehnat vazirligiga” soʻzlari tegishli ravishda “Mehnat va aholini ijtimoiy muhofaza qilish hududiy bosh boshqarmalari”, “Mehnat va aholini ijtimoiy muhofaza qilish vazirligiga” soʻzlari bilan almashtirilsin.

2. “Ish bilan taʼminlashga koʻmaklashish jamgʻarmasi mablagʻlari hisobiga ish oʻrinlari barpo etish dasturini ishlab chiqish boʻyicha tavsiyalar” boʻlimining 2-bandida:

birinchi xatboshidagi “viloyat mehnat organlari” soʻzlari “Mehnat va aholini ijtimoiy muhofaza qilish hududiy bosh boshqarmalari” soʻzlari bilan almashtirilsin;

ikkinchi xatboshidagi “Mehnat vazirligi” soʻzlari “Mehnat va aholini ijtimoiy muhofaza qilish vazirligi” soʻzlari bilan almashtirilsin.

3. “Dasturni amalga oshirish” boʻlimida:

birinchi xatboshidagi “Mehnat vazirligiga” soʻzlari “Mehnat va aholini ijtimoiy muhofaza qilish vazirligiga” soʻzlari bilan almashtirilsin;

uchinchi xatboshidagi “Mehnat vazirligiga” soʻzlari “Mehnat va aholini ijtimoiy muhofaza qilish vazirligiga” soʻzlari bilan almashtirilsin;

1. Oʻzbekiston Respublikasi Vazirlar Mahkamasining “Ish bilan taʼminlashga koʻmaklashish davlat jamgʻarmasini tashkil etish toʻgʻrisida” 1992-yil 31-dekabrdagi 606-son qarori, 1-banddan tashqari.

2. Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining 1992-yil 31-dekabrdagi 606-son qaroriga oʻzgartirishlar va qoʻshimchalar kiritish toʻgʻrisida” 1993-yil 8-iyundagi 277-son qarori.

3. Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining 1992-yil 31-dekabrdagi 606-son qaroriga oʻzgartirishlar va qoʻshimchalar kiritish toʻgʻrisida” 1998-yil 8-maydagi 197-son qarori.

4. Vazirlar Mahkamasining 1998-yil 23-iyuldagi 310-son qarori (Oʻzbekiston Respublikasi QT, 1998-y., 7-son, 27-modda) bilan tasdiqlangan Oʻzbekiston Respublikasi Hukumatining ayrim qarorlariga kiritiladigan oʻzgartirish va qoʻshimchalarning 2-bandi.