Ushbu Qonunning maqsadi davlat hokimiyati va boshqaruvi organlari faoliyatining ochiqligi sohasidagi munosabatlarni tartibga solishdan iborat.

Ushbu Qonunning asosiy vazifalari quyidagilardan iborat:

jismoniy va yuridik shaxslarning davlat hokimiyati va boshqaruvi organlari faoliyati toʻgʻrisidagi axborotdan foydalanishini taʼminlash;

davlat hokimiyati va boshqaruvi organlarining faoliyati toʻgʻrisida axborot olish huquqining kafolatlarini taʼminlash;

davlat hokimiyati va boshqaruvi organlarining hamda ular mansabdor shaxslarining qabul qilinayotgan qarorlar uchun masʼuliyatini oshirish;

davlat hokimiyati va boshqaruvi organlarining faoliyati toʻgʻrisidagi axborotni tarqatish tartibini belgilash.

Davlat hokimiyati va boshqaruvi organlari faoliyatining ochiqligi toʻgʻrisidagi qonun hujjatlari ushbu Qonun va boshqa qonun hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasining davlat hokimiyati va boshqaruvi organlari faoliyatining ochiqligi toʻgʻrisidagi qonun hujjatlarida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Ushbu Qonun davlat hokimiyati va boshqaruvi organlari, ularning tarkibiy va hududiy boʻlinmalari faoliyatining ochiqligini taʼminlashga nisbatan tatbiq etiladi.

Ushbu Qonunning amal qilishi:

jismoniy shaxslarning shaxsiga doir maʼlumotlardan foydalanishni taʼminlash tartibiga;

davlat hokimiyati va boshqaruvi organlari tomonidan arizalar, takliflar hamda shikoyatlarni koʻrib chiqish tartibiga;

davlat hokimiyati va boshqaruvi organlari oʻz vakolatlarini amalga oshirishi munosabati bilan ular tomonidan davlat hokimiyati va boshqaruvining boshqa organlariga oʻz faoliyati toʻgʻrisida axborot taqdim etish tartibiga;

taqdim etilishining oʻziga xos xususiyatlari boshqa qonun hujjatlarida nazarda tutilgan, davlat hokimiyati va boshqaruvi organlarining faoliyatiga taalluqli boʻlgan axborotning ayrim turlariga nisbatan tatbiq etilmaydi.

Davlat hokimiyati va boshqaruvi organlari faoliyati ochiqligining asosiy prinsiplari quyidagilardan iborat:

ular tomonidan taqdim etiladigan axborotdan hammaning foydalanishi mumkinligi, uning oʻz vaqtida berilishi va ishonchliligi;

ular faoliyatining oshkoraligi va shaffofligi;

davlat hokimiyati va boshqaruvi organlarining faoliyati toʻgʻrisidagi axborotni izlash, olish va tarqatish erkinligi;

davlat hokimiyati va boshqaruvi organlari faoliyati toʻgʻrisida axborot taqdim etishda fuqarolarning oʻz shaʼni va qadr-qimmatini tajovuzlardan, oʻz shaxsiy hayotiga aralashuvlardan himoya qilishga boʻlgan huquqlari va qonuniy manfaatlariga, shuningdek fuqarolar va yuridik shaxslarning oʻz ishchanlik obroʻsini himoya qilishga boʻlgan huquqlariga rioya etish.

Davlat hokimiyati va boshqaruvi organlarining faoliyati toʻgʻrisidagi axborot jumlasiga quyidagilar kiradi:

davlat hokimiyati va boshqaruvi organlarining, ularning tarkibiy va hududiy boʻlinmalarining huquqiy maqomini belgilovchi normativ-huquqiy hujjatlar;

davlat hokimiyati va boshqaruvi organlari tomonidan qabul qilingan normativ-huquqiy hujjatlar, normativ hamda boshqa hujjatlar, shuningdek ularning ijro etilishining borishi toʻgʻrisidagi maʼlumotlar;

davlat hokimiyati va boshqaruvi organlari tomonidan qabul qilingan normativ-huquqiy hujjatlarga, normativ va boshqa hujjatlarga oʻzgartish va qoʻshimchalar kiritish, shuningdek ushbu hujjatlarni oʻz kuchini yoʻqotgan deb topish toʻgʻrisidagi maʼlumotlar;

davlat hokimiyati va boshqaruvi organlari tomonidan ishlab chiqilayotgan normativ-huquqiy hujjatlarning, normativ va boshqa hujjatlarning loyihalari toʻgʻrisidagi maʼlumotlar;

davlat hokimiyati va boshqaruvi organlari tomonidan davlat dasturlari hamda boshqa dasturlar amalga oshirilishi toʻgʻrisidagi maʼlumotlar;

budjetdan ajratiladigan mablagʻlardan, budjet tashkilotlarining budjetdan tashqari jamgʻarmalari mablagʻlaridan foydalanilishi, oʻtkazilgan tanlovlar (tenderlar) va olingan tovarlarning yetkazib berilishi toʻgʻrisida, vazirliklar, idoralar, davlat maqsadli jamgʻarmalari hamda boshqa budjet mablagʻlarini taqsimlovchilar tomonidan oʻz rasmiy veb-saytlariga joylashtiriladigan tegishli axborot;

davlat hokimiyati va boshqaruvi organlari tomonidan oʻtkaziladigan ommaviy tadbirlar (majlislar, kengashlar, uchrashuvlar, matbuot konferensiyalari, brifinglar, seminarlar, davra suhbatlari va boshqalar) toʻgʻrisidagi maʼlumotlar;

davlat hokimiyati va boshqaruvi organlarining davlat hokimiyati va boshqaruvining boshqa organlari, jismoniy va yuridik shaxslar, shuningdek xorijiy va xalqaro tashkilotlar bilan hamkorligi toʻgʻrisidagi maʼlumotlar;

amalga oshirilishida davlat hokimiyati va boshqaruvi organlari ishtirok etayotgan Oʻzbekiston Respublikasining xalqaro shartnomalari toʻgʻrisidagi maʼlumotlar;

davlat hokimiyati va boshqaruvi organlarining faoliyati sohasiga taalluqli boʻlgan tarmoqning (hududning) holatini va uning rivojlanish surʼatini tavsiflovchi asosiy koʻrsatkichlar haqidagi, shu jumladan ijtimoiy-iqtisodiy rivojlanish koʻrsatkichlari toʻgʻrisidagi maʼlumotlar;

davlat hokimiyati va boshqaruvi organlari tomonidan oʻtkaziladigan (tashkil etiladigan) ochiq tanlovlar (tenderlar) va kimoshdi savdolari toʻgʻrisidagi maʼlumotlar;

boʻsh ish oʻrinlari, ishga qabul qilish shartlari va boʻsh ish oʻrinlarini egallash uchun nomzodlarga qoʻyiladigan talablar toʻgʻrisidagi maʼlumotlar;

davlat hokimiyati va boshqaruvi organlari tomonidan tuzilgan muvofiqlashtiruvchi va maslahat organlari toʻgʻrisidagi maʼlumotlar;

davlat hokimiyati va boshqaruvi organlarining ochiq hayʼat majlislarini oʻtkazish rejalari, shu jumladan majlislarning kun tartibi loyihalari, ular oʻtkaziladigan sana, joy va vaqt, majlislarda hozir boʻlish tartibi.

Davlat hokimiyati va boshqaruvi organlarining faoliyati toʻgʻrisidagi axborot jumlasiga qonun hujjatlariga muvofiq boshqa maʼlumotlar ham kiritilishi mumkin.

Davlat hokimiyati va boshqaruvi organlari oʻz faoliyati toʻgʻrisidagi axborot roʻyxatini ushbu modda qoidalariga muvofiq tasdiqlaydi.

Davlat hokimiyatining vakillik organlari (Oʻzbekiston Respublikasi Oliy Majlisining palatalari, Qoraqalpogʻiston Respublikasi Joʻqorgʻi Kengesi, xalq deputatlari viloyat, tuman va shahar Kengashlari), ularning qoʻmitalari (doimiy komissiyalari), komissiyalari ochiqlikni taʼminlash maqsadida oʻz faoliyati toʻgʻrisidagi axborot, shu jumladan rejalashtirilayotgan majlislar va tadbirlar, koʻrib chiqilishi moʻljallanayotgan masalalar, qabul qilingan qarorlar haqidagi axborot oʻz vaqtida eʼlon qilinishini (chop etilishini) taʼminlaydi.

Davlat hokimiyati va boshqaruvi organlarining faoliyati toʻgʻrisidagi axborotdan foydalanish, agar mazkur axborot qonunda belgilangan tartibda davlat sirlari yoki qonun bilan qoʻriqlanadigan boshqa sirni tashkil etuvchi maʼlumotlar jumlasiga kiritilgan boʻlsa, cheklab qoʻyiladi.

Davlat hokimiyati va boshqaruvi organlarining faoliyati toʻgʻrisidagi foydalanilishi cheklab qoʻyilgan axborotga taalluqli maʼlumotlarning roʻyxati, shuningdek maʼlumotlarni bunday axborot jumlasiga kiritish tartibi qonun hujjatlarida belgilanadi.

Davlat hokimiyati va boshqaruvi organlarining faoliyati toʻgʻrisida axborot izlashni amalga oshirayotgan jismoniy yoki yuridik shaxs axborotdan foydalanuvchidir.

Axborotdan foydalanuvchi quyidagi huquqlarga ega:

davlat hokimiyati va boshqaruvi organlarining faoliyati toʻgʻrisidagi ishonchli axborotni olish va tarqatish;

davlat hokimiyati va boshqaruvi organlarining faoliyati toʻgʻrisida ushbu Qonunning 5-moddasida nazarda tutilgan axborotni olish uchun bevosita yoxud oʻz vakillari orqali soʻrov bilan murojaat etish;

davlat hokimiyati va boshqaruvi organlarining faoliyati toʻgʻrisida axborot olishni rad etish.

Axborotdan foydalanuvchi qonun hujjatlariga muvofiq boshqa huquqlarga ham ega boʻlishi mumkin.

Davlat hokimiyati va boshqaruvi organlari rahbarlarining davlat hokimiyati va boshqaruvi organlari faoliyatining ochiqligini taʼminlash sohasidagi vakolatlariga quyidagilar kiradi:

davlat hokimiyati va boshqaruvi organlari tarkibiy va hududiy boʻlinmalarining oʻz faoliyati toʻgʻrisidagi axborotdan foydalanuvchilarning foydalanishini taʼminlashga doir faoliyatini muvofiqlashtirib borish;

davlat hokimiyati va boshqaruvi organlarining faoliyati toʻgʻrisida axborot taqdim etish tartibini belgilovchi normativ-huquqiy hujjatlar, normativ va boshqa hujjatlar ishlab chiqilishi hamda qabul qilinishini tashkil etish;

davlat hokimiyati va boshqaruvi organlari faoliyatining ochiqligini taʼminlash boʻyicha oʻtkazilayotgan tadbirlar monitoring qilinishini hamda doimiy ravishda kompleks baholanishini tashkil etish;

davlat hokimiyati va boshqaruvi organlarining faoliyati toʻgʻrisida axborot taqdim etish uchun masʼul boʻlgan mansabdor shaxslarni belgilash;

davlat hokimiyati va boshqaruvi organlarining faoliyati toʻgʻrisida ularning rasmiy veb-saytlarida joylashtiriladigan axborot roʻyxatini tasdiqlash;

davlat hokimiyati va boshqaruvi organlarining faoliyati toʻgʻrisidagi foydalanilishi qonun hujjatlariga muvofiq cheklab qoʻyilgan axborotga taalluqli maʼlumotlarning roʻyxatini tasdiqlash;

davlat hokimiyati va boshqaruvi organlarining faoliyati toʻgʻrisidagi eʼlon qilinishi (chop etilishi) lozim boʻlgan axborot materiallarini tasdiqlash;

axborotdan foydalanuvchilarning davlat hokimiyati va boshqaruvi organlarining ochiq hayʼat majlislarida hozir boʻlishi tartibini belgilash;

axborotdan foydalanuvchilarning davlat hokimiyati va boshqaruvi organlarining faoliyati toʻgʻrisidagi axborotdan moneliksiz foydalanishini taʼminlash, ushbu Qonun 6-moddasining birinchi qismida nazarda tutilgan hol bundan mustasno;

davlat hokimiyati va boshqaruvi organlarining faoliyati toʻgʻrisida ularning rasmiy veb-saytlarida joylashtiriladigan axborotning oʻz vaqtida berilishini va ishonchliligini taʼminlash;

davlat hokimiyati va boshqaruvi organlari faoliyatining ochiqligi toʻgʻrisidagi qonun hujjatlarini buzganlik uchun davlat hokimiyati va boshqaruvi organlarining mansabdor shaxslariga nisbatan tegishli choralar koʻrish.

Davlat hokimiyati va boshqaruvi organlarining rahbarlari davlat hokimiyati va boshqaruvi organlari faoliyatining ochiqligini taʼminlash sohasida qonun hujjatlariga muvofiq boshqa vakolatlarni ham amalga oshirishi mumkin.

Davlat hokimiyati va boshqaruvi organlarining faoliyati toʻgʻrisidagi axborot manbalari quyidagilardan iborat:

davlat hokimiyati va boshqaruvi organlarining rasmiy nashrlari;

davlat hokimiyati va boshqaruvi organlari rahbarlarining, shuningdek ushbu organlar tomonidan vakolat berilgan mansabdor shaxslarning chiqishlari va bayonotlari;

davlat hokimiyati va boshqaruvi organlari axborot xizmatlarining xabarlari;

davlat hokimiyati va boshqaruvi organlari rasmiy veb-saytlarining materiallari;

ommaviy axborot vositalarining materiallari.

Qonun hujjatlariga muvofiq boshqa manbalar ham davlat hokimiyati va boshqaruvi organlarining faoliyati toʻgʻrisidagi axborot manbalari boʻlishi mumkin.

Davlat hokimiyati va boshqaruvi organlarining oʻz faoliyati toʻgʻrisidagi axborotni tayyorlash hamda tarqatish vazifalarini bajaruvchi, shuningdek ommaviy axborot vositalari va jamoatchilik bilan hamkorlikni taʼminlovchi tarkibiy boʻlinmasi yoxud ushbu vazifalarni bajarish zimmasiga yuklatilgan shaxs davlat hokimiyati va boshqaruvi organlarining axborot xizmatidir (bundan buyon matnda axborot xizmati deb yuritiladi).

Axborot xizmati ommaviy tadbirlarni tashkil etish, axborot xabarlarini (press-relizlar, byulletenlar va hokazolarni) tarqatish, shuningdek davlat hokimiyati va boshqaruvi organlarining rasmiy veb-saytida ularning faoliyati toʻgʻrisidagi axborotni joylashtirish va yangilab borish yoʻli bilan davlat hokimiyati va boshqaruvi organlarining faoliyatini ommaviy axborot vositalarida yoritish chora-tadbirlarini koʻradi. Axborot xizmati davlat hokimiyati va boshqaruvi organlarining faoliyati toʻgʻrisida axborot tarqatishning qonun hujjatlariga zid boʻlmagan boshqa usullaridan ham foydalanishi mumkin.

Axborot xizmatining faoliyatini tashkil etish tartibi davlat hokimiyati va boshqaruvi organlari tomonidan belgilanadi.

Davlat hokimiyati va boshqaruvi organlari faoliyatining ochiqligini taʼminlash usullari quyidagilardan iborat:

davlat hokimiyati va boshqaruvi organlarining faoliyati toʻgʻrisidagi axborotni eʼlon qilish (chop etish);

davlat hokimiyati va boshqaruvi organlarining faoliyati toʻgʻrisidagi axborotni ularning rasmiy veb-saytlarida joylashtirish va yangilab borish;

davlat hokimiyati va boshqaruvi organlarining faoliyati toʻgʻrisidagi axborotni hamma kirishi mumkin boʻlgan xonalarga va joylarga joylashtirish hamda yangilab borish;

davlat hokimiyati va boshqaruvi organlarining faoliyati toʻgʻrisidagi axborotni axborot-kutubxona va arxiv fondlari orqali taqdim etish;

davlat hokimiyati va boshqaruvi organlarining ochiq hayʼat majlislarida axborotdan foydalanuvchilarning hozir boʻlishi uchun sharoitlar yaratish;

axborotdan foydalanuvchilarning soʻrovi asosida ularga davlat hokimiyati va boshqaruvi organlarining faoliyati toʻgʻrisida ogʻzaki va yozma shaklda (shu jumladan elektron hujjat shaklida) axborot taqdim etish.

Davlat hokimiyati va boshqaruvi organlari faoliyatining ochiqligini taʼminlash qonun hujjatlariga muvofiq boshqa usullar bilan ham amalga oshirilishi mumkin.

Davlat hokimiyati va boshqaruvi organlarining faoliyati toʻgʻrisidagi axborotni eʼlon qilish (chop etish) davlat hokimiyati va boshqaruvi organlarining rasmiy nashrlari, rasmiy veb-saytlari, shuningdek ommaviy axborot vositalari orqali amalga oshiriladi.

Davlat hokimiyati va boshqaruvi organlarining rasmiy veb-saytlari Internet jahon axborot tarmogʻidagi ushbu organlarga yoki boʻysunuv tartibida yuqori turuvchi organga tegishli boʻlgan va ularning faoliyati toʻgʻrisidagi axborotni oʻz ichiga olgan rasmiy veb-sayt sifatida identifikatsiya qilinadigan, hamma foydalanishi mumkin boʻlgan resursdir.

Davlat hokimiyati va boshqaruvi organlarining rasmiy veb-saytlarida ushbu Qonun 5-moddasining birinchi qismida nazarda tutilgan axborotdan tashqari quyidagilar joylashtirilishi mumkin:

davlat hokimiyati va boshqaruvi organlarining rahbarlari toʻgʻrisidagi maʼlumotnoma tarzidagi axborot (biografik maʼlumotlar, fuqarolarni qabul qilish kunlari va hokazo);

davlat hokimiyati va boshqaruvi organlarining hamda ular tarkibiy va hududiy boʻlinmalarining ish tartibi toʻgʻrisidagi maʼlumotlar, ularning telefon raqamlari hamda pochta manzillari, elektron pochta manzillari, maʼlumot xizmati telefonlarining va ishonch telefonlarining raqamlari, jamoat transportining qatnov yoʻllari, toʻxtash joylarining nomlari va yoʻnalish raqamlari;

davlat hokimiyati va boshqaruvi organlarining rahbarlari, shuningdek ushbu organlar tomonidan vakolat berilgan mansabdor shaxslar chiqishlarining hamda bayonotlarining matnlari;

davlat hokimiyati va boshqaruvi organlari huzurida ommaviy axborot vositalari vakillarini akkreditatsiya qilish tartibi toʻgʻrisidagi axborot;

davlat hokimiyati va boshqaruvi organlari tomonidan koʻrsatiladigan davlat xizmatlarining roʻyxati;

davlat hokimiyati va boshqaruvi organlarining faoliyati toʻgʻrisidagi tahliliy maʼruzalar hamda axborot tusidagi sharhlar;

arizalarni, takliflarni, shikoyatlarni qabul qilish tartibi toʻgʻrisida axborot;

davlat hokimiyati va boshqaruvi organlarining faoliyati toʻgʻrisida axborot olishga doir soʻrovlarni qabul qilish tartibi haqidagi axborot;

kelib tushgan arizalarni, takliflarni, shikoyatlarni, shuningdek davlat hokimiyati va boshqaruvi organlarining faoliyati toʻgʻrisida axborot olishga doir soʻrovlarni koʻrib chiqishning umumiy natijalari haqidagi axborot.

amalga oshirilayotgan profilaktika tadbirlarining mohiyati va ahamiyatiga bagʻishlangan materiallar, qonuniylikning holati va jinoyatchilikning darajasi haqidagi maʼlumotlar, sodir etilgan huquqbuzarliklar hamda ularga chek qoʻyish chora-tadbirlari haqidagi axborot.

Davlat hokimiyati va boshqaruvi organlarining rasmiy veb-saytlarida qonun hujjatlariga muvofiq ularning faoliyati toʻgʻrisidagi boshqa axborot ham joylashtirilishi mumkin.

Davlat hokimiyati va boshqaruvi organlarining rasmiy veb-saytlaridagi axborot davlat tilida joylashtirilishi kerak. Rasmiy veb-sayt boshqa tillardagi shakllarga ham ega boʻlishi mumkin.

Davlat hokimiyati va boshqaruvi organlari tomonidan oʻz rasmiy veb-saytlarida joylashtiriladigan axborotning sanasi qoʻyilgan boʻlishi hamda u vaqti-vaqti bilan yangilab borilishi kerak. Axborotni yangilab borish davriyligi davlat hokimiyati va boshqaruvi organlari tomonidan belgilanadi, lekin u haftasiga bir martadan kam boʻlmasligi kerak.

Davlat hokimiyati va boshqaruvi organlarining rasmiy veb-saytlarida joylashtirilgan axborot ishonchli boʻlishi kerak va u ommaviy axborot vositalarida eʼlon qilinadigan axborot bilan teng kuchga ega boʻladi.

Davlat hokimiyati va boshqaruvi organlari oʻzlari egallab turgan hamma kirishi mumkin boʻlgan xonalarda va (yoki) boshqa ajratilgan joylarda tegishli organning faoliyati toʻgʻrisidagi axborot bilan axborotdan foydalanuvchilar tanishishi uchun axborot stendlarini va (yoki) shunday maqsad uchun moʻljallangan boshqa texnik vositalarni joylashtirishi shart.

Ushbu moddaning birinchi qismida koʻrsatilgan axborot stendlarida va (yoki) shunday maqsad uchun moʻljallangan boshqa texnik vositalarda quyidagilar boʻlishi kerak:

davlat hokimiyati va boshqaruvi organlarining huquqiy maqomini belgilovchi normativ-huquqiy hujjatlar roʻyxati;

davlat hokimiyati va boshqaruvi organlarining ish tartibi toʻgʻrisidagi maʼlumotlar, maʼlumot xizmati telefonlarining, ishonch telefonlarining raqamlari;

davlat hokimiyati va boshqaruvi organlarining rejalashtirilayotgan ochiq hayʼat majlislari toʻgʻrisidagi axborot;

arizalarni, takliflarni hamda shikoyatlarni qabul qilish tartibi toʻgʻrisidagi axborot;

davlat hokimiyati va boshqaruvi organlarining faoliyati toʻgʻrisida axborot olishga doir soʻrovni qabul qilish tartibi haqidagi axborot;

davlat hokimiyati va boshqaruvi organlari tomonidan koʻrsatiladigan davlat xizmatlarining roʻyxati.

Ushbu moddaning birinchi qismida koʻrsatilgan axborot stendlarida va (yoki) shunday maqsad uchun moʻljallangan boshqa texnik vositalarda qonun hujjatlariga muvofiq davlat hokimiyati va boshqaruvi organlarining faoliyati toʻgʻrisidagi boshqa axborot ham boʻlishi mumkin.

Davlat hokimiyati va boshqaruvi organlari davlat hokimiyati va boshqaruvi organlarining faoliyati toʻgʻrisidagi axborotni axborot-kutubxona va arxiv fondlari orqali qonun hujjatlarida belgilangan tartibda taqdim etadi.

Davlat hokimiyati va boshqaruvi organlarining hayʼat majlislari ochiq tarzda oʻtkaziladi, qonun hujjatlarida nazarda tutilgan hollar bundan mustasno.

Davlat hokimiyati va boshqaruvi organlari oʻzlarining ochiq hayʼat majlislarida axborotdan foydalanuvchilarning hozir boʻlishi uchun sharoitlar yaratadi.

Davlat hokimiyati va boshqaruvi organlarining ochiq hayʼat majlislarida axborotdan foydalanuvchilarning hozir boʻlishi tartibi ushbu organlarning tegishli normativ hujjatlari bilan belgilanadi.

Davlat hokimiyati va boshqaruvi organlari oʻz faoliyatining ochiqligini taʼminlash maqsadida ommaviy axborot vositalari vakillarining davlat hokimiyati va boshqaruvi organlari huzurida akkreditatsiya qilinishini amalga oshirishi mumkin.

Davlat hokimiyati va boshqaruvi organlari ommaviy axborot vositalarining akkreditatsiya qilingan vakillarini oʻtkaziladigan tadbirlar toʻgʻrisida oldindan xabardor qiladi, ularga oʻz kasbiga doir vazifalarini bajarishda koʻmaklashadi.

Ommaviy axborot vositalarining akkreditatsiya qilingan vakillari quyidagi huquqlarga ega:

boʻlib oʻtadigan ochiq hayʼat majlislari va boshqa ommaviy tadbirlar toʻgʻrisida oldindan axborot olish;

akkreditatsiya qiluvchi organning binolariga (xonalariga) va boshqa obyektlariga akkreditatsiya qiluvchi organ tomonidan belgilangan tartibda kirish;

ochiq hayʼat majlislarida va boshqa ommaviy tadbirlarda hozir boʻlish;

akkreditatsiya qiluvchi organning masʼul shaxslaridan zarur hujjatlar va materiallarni soʻrash hamda olish, ommaviy tadbirlarning yozuvlari bilan tanishish hamda ulardan koʻchirma nusxalar olish;

olingan yozuvlardan ommaviy axborot vositalari materiallarini tayyorlashda foydalanish.

Ommaviy axborot vositalarining akkreditatsiya qilingan vakillari qonun hujjatlariga muvofiq boshqa huquqlarga ham ega boʻlishi mumkin.

Davlat hokimiyati va boshqaruvi organlarining faoliyati toʻgʻrisida axborot olishga doir soʻrov (bundan buyon matnda soʻrov deb yuritiladi) axborotdan foydalanuvchining davlat hokimiyati va boshqaruvi organlari faoliyati toʻgʻrisida axborot taqdim etish haqida ushbu organlarga va (yoki) ularning mansabdor shaxslariga yoʻllanadigan ogʻzaki yoki yozma shakldagi (shu jumladan elektron hujjat shaklidagi) talabidir.

Axborotdan foydalanuvchining soʻrovi roʻyxatdan oʻtkazilgan kundan eʼtiboran koʻpi bilan oʻn besh kunlik muddatda koʻrib chiqilishi kerak.

Ommaviy axborot vositasining davlat hokimiyati va boshqaruvi organlarining faoliyati toʻgʻrisida axborot olishga doir, shuningdek mansabdor shaxslarning intervyusini tashkil etish toʻgʻrisidagi soʻrovi koʻpi bilan yetti kunlik muddatda koʻrib chiqiladi.

Agar axborotdan foydalanuvchining soʻrovini koʻrib chiqish davlat hokimiyati va boshqaruvi organlarining vakolatlariga kirmasa, soʻrov soʻralayotgan axborotni taqdim etish vakolatiga kiritilgan organga roʻyxatdan oʻtkazilgan kundan eʼtiboran uch ish kuni ichida yuboriladi, axborotdan foydalanuvchi esa bu haqda xabardor qilinadi.

Rasmiy nashrlarda, ommaviy axborot vositalarida eʼlon qilingan (chop etilgan) yoxud rasmiy veb-saytlarda joylashtirilgan axborot soʻralganda davlat hokimiyati va boshqaruvi organlari soʻrovga beriladigan javobda soʻralayotgan axborot eʼlon qilingan (chop etilgan) rasmiy nashrning, ommaviy axborot vositasining nomi, chiqarilish sanasi hamda raqamini va (yoki) soʻralayotgan axborot joylashtirilgan rasmiy veb-saytning elektron manzilini koʻrsatgan holda havola berishi mumkin.

Agar davlat hokimiyati va boshqaruvi organlari olingan soʻrov boʻyicha davlat hokimiyati va boshqaruvining boshqa organlari vakolatlari toʻgʻrisidagi maʼlumotlarga ega boʻlmasa, axborotdan foydalanuvchiga soʻrov roʻyxatdan oʻtkazilgan kundan eʼtiboran uch ish kuni ichida tegishli javob yuboriladi.

Soʻrov rad etilgan taqdirda axborotdan foydalanuvchiga asoslantirilgan javob yuboriladi.

Jismoniy shaxsning soʻrovida uning familiyasi, ismi, otasining ismi, yashash joyi toʻgʻrisidagi maʼlumotlar koʻrsatilgan va soʻrovning mohiyati bayon etilgan boʻlishi kerak. Yuridik shaxsning soʻrovida yuridik shaxsning toʻliq firma nomi, uning joylashgan yeri (pochta manzili) toʻgʻrisidagi maʼlumotlar koʻrsatilgan, soʻrovning mohiyati bayon etilgan boʻlishi kerak.

Yozma soʻrovlar axborotdan foydalanuvchining shaxsiy imzosi bilan tasdiqlangan boʻlishi kerak. Soʻrovni shaxsiy imzo bilan tasdiqlash imkoniyati boʻlmagan taqdirda, u qoʻshimcha ravishda tuzuvchining ham familiyasi, ismi, otasining ismi qoʻyilgan holda uning imzosi bilan tasdiqlangan boʻlishi kerak.

Axborotdan foydalanuvchini identifikatsiyalash imkoniyatini beradigan maʼlumotlar koʻrsatilmagan soʻrov anonim hisoblanadi va koʻrib chiqilmaydi.

Soʻrov unda qoʻyilgan masalalar yuzasidan axborot taqdim etish vakolatiga kiradigan davlat hokimiyati va boshqaruvi organiga yoki mansabdor shaxsga yuboriladi.

Belgilangan tartibda yuborilgan soʻrov koʻrib chiqilishi shart.

Davlat hokimiyati va boshqaruvi organlari faoliyatining ochiqligi sohasidagi nizolar qonun hujjatlarida belgilangan tartibda hal etiladi.

Davlat hokimiyati va boshqaruvi organlari faoliyatining ochiqligi toʻgʻrisidagi qonun hujjatlarini buzganlikda aybdor shaxslar belgilangan tartibda javobgar boʻladi.

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

Ushbu Qonun rasmiy eʼlon qilingan kundan eʼtiboran kuchga kiradi.