“Isteʼmolchilarning huquqlarini himoya qilish toʻgʻrisida”gi Oʻzbekiston Respublikasi Qonuniga hamda Oʻzbekiston Respublikasi Prezidentining “Mamlakatimizda ishlab chiqarilgan mahsulotlarning raqobatbardoshligini yanada oshirish va tovarlarni respublikaga noqonuniy olib kirishga qarshi kurashni kuchaytirish toʻgʻrisida” 2013-yil 29-yanvardagi PQ-1913-son qaroriga muvofiq Vazirlar Mahkamasi qaror qiladi:

1. Ishlab chiqaruvchi, ishlab chiqaruvchining vakolatli shaxsi va import qiluvchilar tomonidan davlat tilida markirovka qilinishi shart boʻlgan import qilinadigan isteʼmol tovarlarining ayrim turlarini markirovka qilish va bojxonada rasmiylashtirish qoidalari 1-ilovaga muvofiq tasdiqlansin.

2. Belgilab qoʻyilsinki, isteʼmol upakovkasiga (idishiga) ega boʻlgan dori vositalarini (TIF TN boʻyicha kodi 3004) import qilish davlat tilida majburiy markirovka qilingan holda amalga oshiriladi.

Import qilinadigan dori vositalarini markirovka qilish isteʼmol upakovkasiga (idishiga) isteʼmolchi uchun davlat tilidagi axborotni qistirma varaqa shaklida joylashtirish yoʻli bilan, upakovkasida qoʻshimcha markirovkasiz amalga oshiriladi. Ishlab chiqaruvchi korxona tomonidan qoʻyiladigan davlat tilidagi markirovkasi mavjud boʻlmagan taqdirda import qilinayotgan dori vositalarini ular Oʻzbekiston Respublikasi hududiga olib kirilgandan keyin, bojxona omborida saqlash vaqtida, guruhli upakovkaga davlat tilidagi qistirmalarning tegishli birliklarini joylashtirish yoʻli bilan markirovka qilishga yoʻl qoʻyiladi.

Dori vositalari markirovkasining davlat tilidagi matni Oʻzbekiston Respublikasi Sogʻliqni saqlash vazirligining Dori-darmonlar va tibbiy texnika sifatini nazorat qilish bosh boshqarmasi tomonidan tasdiqlanadi.

3. Vazirlar Mahkamasining “Oʻzbekiston Respublikasiga isteʼmol tovarlari olib kirishni takomillashtirishga doir qoʻshimcha chora-tadbirlar toʻgʻrisida” 2013-yil 13-maydagi 127-son qaroriga (Oʻzbekiston Respublikasi QT, 2013-y., 5-son, 29-modda) 2-ilovaga muvofiq oʻzgartirishlar va qoʻshimcha kiritilsin.

4. Oʻzbekiston Respublikasi Davlat bojxona qoʻmitasi, Davlat soliq qoʻmitasi Adliya vazirligi hamda manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Qoidalar “Isteʼmolchilarning huquqlarini himoya qilish toʻgʻrisida”gi Oʻzbekiston Respublikasi Qonuniga hamda Oʻzbekiston Respublikasi Prezidentining “Mamlakatimizda ishlab chiqarilgan mahsulotlarning raqobatbardoshligini yanada oshirish va tovarlarni respublikaga noqonuniy olib kirishga qarshi kurashni kuchaytirish toʻgʻrisida” 2013-yil 29-yanvardagi PQ-1913-son qaroriga muvofiq ishlab chiqaruvchi, ishlab chiqaruvchining vakolatli shaxsi va import qiluvchilar tomonidan davlat tilida markirovka qilinishi shart boʻlgan import qilinadigan isteʼmol tovarlarining ayrim turlarini markirovka qilish va bojxonada rasmiylashtirish shartlarini belgilaydi.

2. Ushbu Qoidalarda quyidagi asosiy tushunchalar qoʻllaniladi:

birka — ogʻirligini, borish joyini, tayyorlanishini, tarkibini, egasini yoki boshqa maʼlumotlarni belgilash uchun tovarni ishlab chiqarish vaqtida qoʻyiladigan yozuv yozilgan (qogʻoz, yogʻoch, karton, charm, metall va boshqalardan tayyorlangan) plastinka;

leybl — ishlab chiqaruvchi zavod tomonidan ip yoki tasma yordamida tovarga mahkamlanadigan, yozuv yozilgan yorliq;

markirovka — import qilinadigan tovarning isteʼmol upakovkasidagi va (yoki) idishdagi matn, rasmlar yoki maʼlumot beruvchi belgilar;

stiker — etiketka yoki upakovkaga kirmagan qoʻshimcha maʼlumotlarni joylashtirish uchun xizmat qiladigan maxsus yelim qatlamli etiketka;

idish — oʻzida mahsulotni joylashtirish uchun buyumni ifodalaydigan upakovkaning asosiy elementi;

transport idishi — mustaqil transport birligini hosil qiluvchi idish;

upakovka — mahsulotni shikastlanish va nobudgarchilikdan, atrof muhitni ifloslanishdan himoya qilishni taʼminlaydigan vosita yoki vositalar majmui, shuningdek mahsulotning aylanish jarayoni;

isteʼmol upakovkasi — transport idishi funksiyasini bajarmaydigan, isteʼmolchiga mahsulot bilan birgalikda tushgan idish;

etiketka — tovarni ishlab chiqarishda ishlab chiqaruvchi korxonaning savdo markasi, nomi, ishlab chiqarilgan sanasi, yaroqlilik muddati va (yoki) tovar toʻgʻrisidagi boshqa maʼlumotlar koʻrsatilgan holda unga yopishtirilgan chizmali va matnli belgi;

formulyar, pasport — tovar toʻgʻrisidagi maʼlumotlar yoziladigan varaq (daftar).

3. Oʻzbekiston Respublikasi Vazirlar Mahkamasining “Oʻzbekiston Respublikasiga isteʼmol tovarlari olib kirishni takomillashtirishga doir qoʻshimcha chora-tadbirlar toʻgʻrisida” 2013-yil 13-maydagi 127-son qaroriga 1-ilovaga kiritilgan hamda tovarning bir qismi boʻlgan va uning qiymatga kiruvchi isteʼmol upakovkasida bevosita chakana savdoga tushadigan tovarlar ishlab chiqaruvchi, ishlab chiqaruvchining vakolatli shaxsi va import qiluvchilar tomonidan davlat tilida markirovka qilinishi shart. Isteʼmolda boʻlgan tovarlarni markirovka qilish ushbu Qoidalarga muvofiq umumiy asoslarda amalga oshiriladi.

4. Quyidagilar:

yuridik va jismoniy shaxslar, shu jumladan xorijiy yuridik va jismoniy shaxslar tomonidan oʻz ehtiyojlari uchun olib kirilayotgan va ishlab chiqarish yoki boshqa tijorat faoliyati uchun moʻljallanmagan tovarlar;

xorijiy davlatlarning Oʻzbekiston Respublikasidagi diplomatik va konsullik vakolatxonalari, xalqaro va hukumatlararo tashkilotlar, xorijiy davlatlarning ushbu tashkilotlar huzuridagi vakolatxonalari va boshqa xalqaro tashkilotlar tomonidan rasmiy tarzda (xizmat doirasida) foydalanish uchun, shuningdek ularning xodimlari uchun olib kiriladigan tovarlar;

koʻrgazma namunalari, sinash, tatbiq etish va marketing uchun namunalar sifatidagi tovarlar ishlab chiqaruvchi korxona tomonidan davlat tilida majburiy markirovka qilinmaydi.

5. Davlat tilidagi markirovkaning mahsulotga standartlashtirish boʻyicha normativ hujjatlar talablariga muvofiqligi sertifikatlashtirish boʻyicha akkreditatsiya qilingan organlar tomonidan amalga oshiriladi.

6. Davlat tilidagi markirovka ushbu Qoidalarga ilova talablariga muvofiq isteʼmolchi uchun toʻliq va ishonchli boʻlishi kerak.

7. Tovarning asosiy isteʼmol xususiyatlari va tavsifi, shuningdek ishlab chiqaruvchi korxonaning markirovkasidagi boshqa maʼlumotlar ushbu Qoidalarga ilovaga* muvofiq markirovkada davlat tilida koʻrsatilishi kerak.

8. Quyidagilarga:

davlat tilidagi markirovkaga ishlab chiqaruvchi korxonaning boshqa tillardagi markirovkasida mavjud boʻlmagan qoʻshimcha maʼlumotlar kiritilishiga;

davlat tilidagi markirovkada bayon qilingan maʼlumotlarning boshqa tillardagi ishlab chiqaruvchi korxonaning markirovkasiga muvofiqligini tahlil qilish imkonini bermaydigan ishlab chiqaruvchi korxonalar tomonidan qoʻyilgan markirovka yuzasiga tovarning upakovkasiga stikerni yelimlash usuli bilan tovarni davlat tilida markirovka qilishga yoʻl qoʻyilmaydi.

9. Ishlab chiqaruvchi, ishlab chiqaruvchining vakolatli shaxsi va import qiluvchilar tomonidan davlat tilida markirovka qilinishi shart boʻlgan import qilinadigan isteʼmol tovarlarining ayrim turlarini markirovka qilish ushbu Qoidalarga ilovaga muvofiq amalga oshiriladi.

10. Import qiluvchi davlat tilida markirovka qilinishi shart boʻlgan tovar Oʻzbekiston Respublikasi hududiga olib kirilgunga qadar import qilish yuzasidan oʻzi tuzadigan kontrakt shartlarida tovarni davlat tilida markirovka qilish talabini nazarda tutishi kerak.

11. Tovarni “erkin muomala (import) uchun chiqarish” bojxona rejimida rasmiylashtirish uni tovardagi markirovka bilan tanlab solishtirgandan keyin bojxona organlari xodimlari tomonidan amalga oshiriladi.

12. Davlat tilida markirovka qilinishi shart boʻlgan olib kirilgan tovarlar davlat tilida markirovka qilinmagan shaklda “erkin muomala (import) uchun chiqarish” bojxona rejimida bojxonada rasmiylashtirilishiga yoʻl qoʻyilmaydi.

13. Erkin industrial (iqtisodiy) zonaga olib kiriladigan tovarlar “erkin muomala (import) uchun chiqarish” bojxona rejimida rasmiylashtirilgan hollarda davlat tilida markirovka qilinadi.

14. Tovarning davlat tilidagi markirovkasi matnining toʻliqligi va toʻgʻriligi uchun import qiluvchi va sertifikatlashtirish boʻyicha akkreditatsiya qilingan organlar javob beradi.

15. Bojxona organlari tomonidan ushbu Qoidalarga ilovada koʻrsatilmagan davlat tilidagi markirovkadagi maʼlumotlar talab qilinishiga yoʻl qoʻyilmaydi.

16. Ushbu Qoidalar talablari buzilishida aybdor boʻlgan shaxslar qonunchilikka muvofiq javob beradilar.

1. 5-bandda:

toʻqqizinchi xatboshidagi “Tovar markirovkasi (etiketka, birka, leybl)da” soʻzlari “Isteʼmol upakovkasi (idishi) (etiketka, birka, leybl)da” soʻzlari bilan almashtirilsin;

quyidagi mazmundagi xatboshi qoʻshilsin:

“Markirovka qilinadigan tovarlarning ayrim turlari toʻgʻrisidagi axborotning mazmuni Vazirlar Mahkamasi tomonidan belgilanadi”.

2. 1-ilovada:

17-band oʻz kuchini yoʻqotgan deb hisoblansin;

izoh chiqarib tashlansin.