Avtobus parklarining harakatdagi tarkibini zamonaviy, qulay transport vositalari bilan yangilash hisobiga Toshkent shahri aholisining yoʻlovchilar tashishda ortib borayotgan talabini toʻliq qondirish maqsadida Vazirlar Mahkamasi qaror qiladi:

1. “Toshshahartransxizmat” uyushmasi va “EvoBus GmbH” firmasi (Germaniya) tomonidan 2013-yilda umumiy qiymati 14,0 mln yevro jadval boʻyicha ilovaga muvofiq “Mercedes-Benz Conecto Low Floor” rusumidagi 100 ta shahar yoʻlovchi avtobuslari, ularga ehtiyot qismlar va diagnostika asboblarini yetkazib berish uchun oldi-sotdi shartnomasi imzolangani maʼlumot uchun qabul qilinsin.

2. Belgilansinki:

100 ta shahar yoʻlovchi avtobuslari, ularga ehtiyot qismlar va diagnostika asboblarini yetkazib berish uchun oldi-sotdi shartnomasining toʻliq qiymatini moliyalashtirish Oʻzbekiston Respublikasi Tiklanish va taraqqiyot jamgʻarmasining 15 yil muddatga (shu jumladan 3 yillik imtiyozli davr bilan) beriladigan krediti hisobiga amalga oshiriladi. Kreditning yillik foiz stavkasi 0,5 foizni, qayta moliyalashtiruvchi bank — “Oʻzsanoatqurilishbank” OATB ning yillik marjasi esa 0,25 foizni tashkil etadi;

asosiy qarzni qaytarish, kreditga xizmat koʻrsatish boʻyicha foizlar va vositachilik haqini toʻlash kredit kelishuvlari shartlariga muvofiq Oʻzbekiston Respublikasi Davlat budjeti mablagʻlari va sotib olinadigan avtobuslardan foydalanuvchi tashkilotlar mablagʻlari hisobidan amalga oshiriladi..

3. Oʻzbekiston Respublikasi moliya vaziriga “Toshshahartransxizmat” uyushmasining “Oʻzsanoatqurilishbank” OAKB oldidagi majburiyatlari boʻyicha Oʻzbekiston Respublikasi Tiklanish va taraqqiyot jamgʻarmasining jalb etilayotgan krediti boʻyicha Oʻzbekiston Respublikasi nomidan kafolat berish vakolati berilsin.

4. Oʻzbekiston Respublikasi Tiklanish va taraqqiyot jamgʻarmasi, “Oʻzsanoatqurilishbank” OAKB va “Toshshahartransxizmat” uyushmasi, istisno tariqasida, texnik-iqtisodiy hisob-kitob parametrlari koʻrib chiqilgunga qadar kredit kelishuvlarini rasmiylashtirsin va “EvoBus GmbH” firmasi bilan oldi-sotdi shartnomasida nazarda tutilgan muddatlarda moliyalashtirishni ochsin.

5. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi “Toshshahartransxizmat” uyushmasi va “EvoBus GmbH” firmasi oʻrtasida tuzilgan oldi-sotdi shartnomasi boʻyicha ekspert xulosasi bersin.

6. Oʻzbekiston Respublikasi Moliya vazirligi:

2013-yil oxirigacha kredit kelishuvlari shartlariga muvofiq Oʻzbekiston Respublikasi Tiklanish va taraqqiyot jamgʻarmasining koʻrsatib oʻtilgan kreditiga xizmat koʻrsatish uchun mablagʻlar ajratilishini taʼminlasin;

keyingi yillarda, 2014-yildan boshlab, Oʻzbekiston Respublikasi Davlat budjeti parametrlarini shakllantirishda har yili nazarda tutiladigan mablagʻlar va sotib olinadigan avtobuslardan foydalanuvchi transport tashkilotlarining mablagʻlari hisobiga Oʻzbekiston Respublikasi Tiklanish va taraqqiyot jamgʻarmasi kreditiga xizmat koʻrsatishni amalga oshirsin.

7. “Toshshahartransxizmat” uyushmasi:

ikki oy muddatda “Mercedes-Benz Conecto Low Floor” rusumidagi 100 ta shahar yoʻlovchi avtobuslarini sotib olishning texnik-iqtisodiy hisob-kitobi ishlab chiqilishini va tasdiqlash uchun Oʻzbekiston Respublikasi Vazirlar Mahkamasiga kiritilishini taʼminlasin;

Oʻzbekiston Respublikasi Tiklanish va taraqqiyot jamgʻarmasi kreditiga xizmat koʻrsatishga yoʻnaltiriladigan Oʻzbekiston Respublikasi Davlat budjetining pul mablagʻlarini olish uchun “Oʻzsanoatqurilishbank” OATBda maxsus hisob raqamini ochsin.

8. Oʻzbekiston Respublikasi Iqtisodiyot vazirligi hamda Tashqi iqtisodiy aloqalar, investitsiyalar va savdo vazirligi tasdiqlangan texnik-iqtisodiy hisob-kitoblar asosida Oʻzbekiston Respublikasining 2013-yilgi Investitsiya dasturiga “Mercedes-Benz Conecto Low Floor” rusumidagi 100 ta shahar yoʻlovchi avtobusi, ularga ehtiyot qismlar va diagnostika asboblari xaridi kiritilishini taʼminlasin.

9. “Mercedes-Benz Conecto Low Floor” rusumli 100 ta shahar yoʻlovchi tashish avtobusi, ularga ehtiyot qismlar va diagnostika asboblari, shuningdek, “EvoBus GmbX” firmasi bilan tuzilgan oldi-sotdi shartnomasi boʻyicha foydalanishning kafolatli muddati davrida safdan chiqqan avtobuslar oʻrniga yetkazib beriladigan ehtiyot qismlar va materiallar bojxona toʻlovlaridan (bojxona rasmiylashtiruvi yigʻimlaridan tashqari) ozod qilinsin.

10. Belgilansinki, “Toshshahartransxizmat” aksiyadorlik kompaniyasi tomonidan tarkibiy boʻlinmalarga beriladigan “Mercedes-Benz Conecto Low Floor” rusumli 100 ta shahar yoʻlovchi tashish avtobusi, ularga ehtiyot qismlar va diagnostika asboblari qoʻshilgan qiymat soligʻi obyekti hisoblanmaydi.

11. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.