Shanxay hamkorlik tashkilotiga aʼzo davlatlar hukumatlari, keyingi oʻrinlarda Tomonlar,

Tomonlar hududlarida terrorizm, separatizm va ekstremizm bilan samarali kurash olib borish maqsadida,

terroristik, separatistik va ekstremistik faoliyatlarga aloqador shaxslarning Tomonlar hududiga suqilib kirishi Tomonlar xavfsizligiga jiddiy tahdid solishini anglagan holda,

2002-yil 7-iyundagi Shanxay hamkorlik tashkiloti Xartiyasi qoidalari, 2001-yil 15-iyundagi terrorizm, separatizm va ekstremizmga qarshi kurashish toʻgʻrisidagi Shanxay konvensiyasi hamda 2002-yil 7-iyundagi Shanxay hamkorlik tashkilotga aʼzo davlatlar oʻrtasidagi Mintaqaviy aksilterror tuzilma toʻgʻrisidagi Kelishuvga tayangan holda,

terrorizm, separatizm va ekstremizm bilan kurashishga qaratilgan samarali chora-tadbirlarni qabul qilishda oʻzaro manfaatdorlikdan kelib chiqqan xolda,

Tomonlar davlat qonunchiligi va umumeʼtirof etilgan xalqaro tamoyillar va xuquq meʼyorlariga tayangan xolda,

quyidagilar toʻgʻrisida kelishib olindi:

Mazkur Kelishuv maqsadlari uchun unda qoʻllanilgan tushunchalar quyidagilarni bildiradi:

“buzgʻunchilar” — 2001-yil 15-iyundagi terrorizm, separatizm va ekstremizmga qarshi kurashish toʻgʻrisidagi Shanxay konvensiyasida belgilangan terroristik separatistik, ekstremistik harakatlarni sodir etganlik uchun yoki sodir etishda gumonlanayotgan, Shanxay hamkorlik tashkilotiga aʼzo davlatlarning maxsus xizmatlari va huquqni muhofaza qiluvchi organlari tomonidan xalqaro qidiruv eʼlon qilingan shaxslar;

“suqilib kirish kanallari” — buzgʻunchilarning Tomonlar hududiga qonuniy va noqonuniy suqilib kirishi yoʻllari.

Tomonlar, suqilib kirish kanallarini aniqlash va yopish boʻyicha qoʻshma chora-tadbirlarini ishlab chiqish maqsadida, hamkorlik qiladilar va oʻz faoliyatlarini muvofiqlashtiradilar, davlat organlari, jamoatchilik va boshqa tashkilotlar, Tomonlar fuqarolari kuchlarini birlashtiradilar, shuningdek koʻrsatilgan maqsadlarda ommaviy axborot vositalari imkoniyatlaridan foydalanadilar.

Tomonlar mazkur Kelishuv kuchga kirishi uchun zarur davlat ichki protsedurlarini bajarilgandan soʻng, oʻttiz kun ichida mazkur Kelishuvni tatbiq qilish uchun javobgar vakolatli organlari toʻgʻrisida yozma shaklda depozitariyni xabardor qilishadi.

Tomonlar vakolatli organlari quyidagi asosiy yoʻnalishlar boʻyicha suqilib kirish kanallarini aniqlash va yopish sohasida hamkorlik qilishadi:

suqilib kirish kanallarini aniqlash va yopish sohasida kelishilgan yondashuvlarni ishlab chiqish;

suqilib kirish kanallarini aniqlash, ularning ustidan nazorat oʻrnatish va yoki yopish;

Tomon davlatlari hududiga buzgʻunchilar tomonidan suqilib kirish uchun foydalaniladigan usullarini aniqlash;

buzgʻunchilarni aniqlash, ularni qoʻlga olish boʻyicha kelishilgan chora-tadbirlarni amalga oshirish;

suqilib kirish kanallarini yopish va aniqlash boʻyicha hamkorlik tadbirlarini oʻtkazishda muvofiqlashtirish va oʻzaro hamkorlik qilish;

suqilib kirish kanallarini aniqlash va yopish boʻyicha hamkorlik rejalarini ishlab chiqish va tatbiq qilish;

suqilib qirish kanallarini aniqlash va yopish masalalari boʻyicha Tomonlar davlat qonunchiligini muvofiqlashtirish;

suqilib kirish kanallarini aniqlash hamda yopish masalalari boʻyicha mutaxassislarni tayyorlash, qayta tayyorlash va ularning malakasini oshirish;

suqilib kirish kanallarini aniqlash va yopish muammolari boʻyicha hamkorlikdagi ilmiy tadqiqotlar oʻtkazish;

Suqilib kirish kanallarini aniqlash va yopish masalalari boʻyicha xalqaro tashkilotlar va xalqaro forumlarda ishtirok etish uchun pozitsiyalarni kelishish;

Tomonlarning vakolatli organlari mazkur Kelishuv 4-moddasida koʻrsatilgan quyidagi asosiy yoʻnalishlar boʻyicha hamkorlik qilishadi:

Koʻmak berish toʻgʻrisida talabnomalarni bajarish (keyingi oʻrinlarda — talabnoma):

suqilib kirish kanallarini aniqlash va yopish boʻyicha kelishilgan operativ-qidiruv tadbirlarini oʻtkazish;

buzgʻunchilarni qidiruvga berish va qoʻlga olish;

oʻzaro manfaatlar asosida boshqa tadbirlar oʻtkazish;

maʼlumot almashish:

Tomonlar davlatlari hududida terroristik, separatistik va ekstremistik harakatlarni sodir etish uchun suqilib kirish kanallaridan foydalanish toʻgʻrisida;

suqilib kirish kanallaridan foydalanishga aloqadorlikda gumonlanayotgan shaxslar va tashkilotlar toʻgʻrisida;

Tomonlar davlatlari hududiga buzgʻunchilar tomonidan suqilib kirish kanallaridan foydalanish bilan bogʻliq aniq faktlar va hodisalar toʻgʻrisida;

suqilib kirish kanallaridan foydalanadigan alohida shaxslar va jinoiy guruhlar oʻrtasida boʻlgan yoki taxminiy aloqalar toʻgʻrisida;

suqilib kirish kanallaridan foydalanish boʻyicha tashkilotlar va alohida shaxslar faoliyatining shakllari va usullari toʻgʻrisida;

buzgʻunchilar tomonidan foydalaniladigan suqilib kirish kanallari toʻgʻrisida;

suqilib kirish kanallarini moliyalashtirish manbalari toʻgʻrisida;

suqilib kirish kanallarini aniqlash va yopish shakllari va usullari toʻgʻrisida;

suqilib kirish kanallarini aniqlash va yopish masalalari boʻyicha maʼlumotlarini Shanxay hamkorlik tashkiloti Mintaqaviy aksilterror tuzilmasining maʼlumotlar bankiga joʻnatish;

Tomonlar davlatlarining chegaralarini kesib oʻtishga huquq beruvchi hujjatlar namunalari bilan almashinish xamda Tomonlar davlatlari hududiga kirish, boʻlish va chiqish uchun hujjatlarga oid shakl va talablarida oʻzgarishlar toʻgʻrisida maʼlumot taqdim qilish;

ish tajribasi bilan almashinish, shu jumladan majlis, konferensiya va seminarlar oʻtkazish yoʻli bilan;

suqilib kirish kanallarini aniqlash va yopish masalalar boʻyicha qonunchilik va boshqa meʼyoriy huquqiy hujjatlar, materiallar bilan almashish;

Tomonlarning vakolatli organlari hamkorlikning boshqa oʻzaro maqbul shakllarini belgilab olishlari mumkin.

Ushbu Kelishuv doirasida Tomonlarning vakolatli organlari oʻrtasidagi hamkorlik talabnoma asosida ikki va koʻp tomonlama hajmlarda, shuningdek Tomonlar davlatlaridan birining vakolatli organlarining tashabbusi boʻyicha xabardor qilish yoʻli bilan amalga oshiriladi.

Talabnoma yoki maʼlumot yozma shaklda joʻnatiladi. Kechiktirib boʻlmaydigan holatlarda talabnoma yoki maʼlumot ogʻzaki tarzda yetkazilishi mumkin, ammo ular yetmish ikki soatdan kechiktirilmasdan yozma tarzda, zarurat tugʻilganda matn uzatish texnik vositalaridan foydalangan xolda, rasmiylashtirilishi lozim.

Talabnoma yoki maʼlumot yoki ularning mazmuni haqiqiyligiga shubha yuzaga kelgan hollarda, koʻrsatilgan hujjatlarni qoʻshimcha tasdiqlash yoki tushintirish talab qilinishi mumkin.

Talabnoma quyidagilarni oʻz ichiga olishi shart:

talabnoma yuborgan va olgan vakolatli organlarning nomi;

talabnoma maqsad va asoslari;

talab etiladigan koʻmak mazmunini tavsiflash;

talabnomani oʻz vaqtida va tegishlicha bajarish uchun foydali boʻlishi mumkin boʻlgan boshqa maʼlumotlar;

agar zarur boʻlsa, uning yopiqlik darajasini koʻrsatish;

yozma shaklda joʻnatilgan talabnoma yoki maʼlumot joʻnatuvchi vakolatli organ rahbari yoki uning oʻrinbosarlari tomonidan imzolanadi va (yoki) ushbu vakolatli organ gerbli muhri bilan tasdiqlanadi.

Talabnoma olgan vakolatli organi talabnomani tez va imkon boricha toʻliqroq bajarilishini taʼminlash maqsadida barcha zarur chora-tadbirlarni qabul qiladi hamda u kelib tushgan kunidan boshlab oʻttiz kun muddat ichida talabnoma yuborgan organni talabnomani koʻrib chiqish natijalari toʻgʻrisida xabardor qiladi.

Talabnomani bajarilishiga toʻsqinlik qiluvchi yoki sezilarli kechiktiruvchi holatlar toʻgʻrisida talabnoma yuborgan vakolatli organi darhol xabardor qilinadi.

Agar talabnomani bajarish talabnoma olgan vakolatli organ vakolatiga kirmasa, unda u talabnomani bajarishga vakolati boʻlgan oʻz davlatning boshqa vakolatli organiga joʻnatadi va bu toʻgʻrisida talabnoma yuborgan vakolatli organga darhol xabar beradi.

Talabnoma olgan vakolatli organ talabnomani bajarish uchun, uning fikricha, zarur maʼlumotlarni talab qilishi mumkin.

Talabnomani bajarishda talabnoma olgan Tomon davlatning qonunchiligi qoʻllaniladi. Agar talabnoma olgan Tomonning qonunchiligi yoki xalqaro majburiyatlariga zid boʻlmasa, unda talabnoma olgan vakolatli organ iltimosiga koʻra talabnoma yuborgan Tomon davlat qonunchiligi qoʻllanishi mumkin.

Talabnoma olgan vakolatli organ oʻz davlat hududida talabnoma yuborgan tomon vakillariga, agar bu uning davlat qonunchiligiga zid boʻlmasa, talabnomani bajarishda qatnashishga ruxsat berishi mumkin.

Agar talabnoma olgan vakolatli organ talabnomani bajarish uning davlat suvereniteti, xavfsizligi, jamoat tartibiga yoki boshqa muhim manfaatlariga zarar yetkazadi deb hisoblasa yoki talabnoma olgan Tomon davlat qonunchiligi yoki xalqaro majburiyatlariga zid boʻlsa, talabnoma ijrosi kechiktirilishi yoki uni bajarish toʻliq yoxud qisman rad qilinishi mumkin.

Agar ushbu moddaning 6- yoki 7- abzatslarga muvofiq talabnomani bajarilishi toʻliq yoki qisman rad etilsa yoki uning ijrosi kechiktirilsa, bu haqida vakolatli organga yozma shaklda xabar beriladi.

Agar olingan maʼlumot va hujjatlar yopiq xususiyatga ega boʻlsa yoki yuborgan tomon ularni oshkor qilish nomaqbul deb hisoblasa, har bir tomon ularning maxfiyligini taʼminlaydi. Maʼlumot va hujjatlarning yopiqlik darajasi yuboruvchi tomonidan belgilanadi.

Mazkur Kelishuv asosida olingan maʼlumot yoki talabnomani bajarish natijalarini ularni taqdim qilgan Tomonning yozma roziligisiz boshqa maqsadlarda foydalanish mumkin emas.

Mazkur Kelishuv asosida bir Tomonning boshqa Tomondan olgan maʼlumot va hujjatlari ularni taqdim qilgan Tomonning oldindan yozma roziligisiz uchinchi tomonga yuborilishi mumkin emas.

Agar har bir aniq holatda oldindan boshqacha tartib kelishilmagan boʻlsa, Tomonlar mazkur Kelishuvni bajarishda yuzaga keladigan xarajatlarni mustaqil qoplashadi.

Mazkur Kelishuv doirasidagi hamkorlik natijalarini tahlil qilish va baholash, shuningdek uni takomillashtirish yoʻllarini ishlab chiqish maqsadida, Tomonlar konsultatsiya va majlislar oʻtkazishlari mumkin.

Tomonlar mazkur Kelishuv qoidalarini izohlash yoki qoʻllash bilan bogʻliq bahsli masalalarni konsultatsiya va muzokaralar yoʻli bilan hal qilishadi.

Mazkur Kelishuv Tomonlarning ular aʼzo boʻlgan boshqa xalqaro shartnomalaridan kelib chiqadigan huquq va majburiyatlariga daxldor emas.

Mazkur Kelishuv doirasida hamkorlikni amalga oshirishda, Tomonlar ishchi tillari sifatida rus va xitoy tillaridan foydalanishadi.

Tomonlarning kelishuviga koʻra, ushbu Kelishuvning 15-moddasida oʻrnatilgan tartibda kuchga kiradigan bayonnomalar tuzish yoʻli bilan, mazkur Kelishuvga oʻzgartirishlar kiritilishi mumkin.

Mazkur Kelishuv noaniq muddatga tuziladi va uning kuchga kirishi uchun zarur davlat ichki protseduralarini Tomonlar orqali bajarish toʻgʻrisida yozma shakldagi toʻrtinchi xabarni depozitariy olgan sanadan oʻttizinchi kuni kuchga kiradi.

Mazkur Kelishuv depozitariysi Shanxay hamkorlik tashkiloti hisoblanadi va u Mazkur Kelishuv imzolanganidan soʻng oʻn besh kun ichida Kelishuvning tasdiqlangan nusxalarini Tomonlarga joʻnatadi.

Depozitariy mazkur Kelishuvni tatbiq etish uchun,Tomonning javobgar vakolatli organlaridan xabar olingan kundan oʻn besh kun ichida bu toʻgʻrisida boshqa Tomonlarga xabar beradi.

Mazkur Kelishuv 2001-yil 15-iyundagi terrorizm, separatizm va ekstremizmga qarshi kurashish toʻgʻrisidagi Shanxay konvensiyasi aʼzolari hisoblanadigan davlatlarning qoʻshilishi uchun ochiq. Mazkur Kelishuv qoʻshiladigan davlatlar uchun uning qoʻshilishi toʻgʻrisidagi hujjat depozitariy tomonidan qabul qilingan kundan oʻttizinchi kuni kuchga kiradi.

Mazkur Kelishuv 2001-yil 15-iyundagi terrorizm, separatizm va ekstremizmga qarshi kurashish toʻgʻrisidagi Shanxay konvensiyasi aʼzosi hisoblanadigan istalgan Tomonlar davlatiga nisbatan oʻz kuchida qoladi.

2006-yil 15-iyunda Shanxay shahrida, bitta asl nusxada rus va xitoy tillarida tuzildi va ikki matn ham bir xil kuchga ega hisoblanadi.