O‘zbekiston Respublikasi “Davlat bojxona xizmati to‘g‘risida”gi Qonunining (O‘zbekiston Respublikasi Oliy Majlisining Axborotnomasi, 1997-yil, 9-son, 230-modda) 6-moddasi va O‘zbekiston Respublikasi Prezidentining 2012-yil 16-iyuldagi PF–4453-son “Statistik, soliq, moliyaviy hisobotlarni, litsenziyalanadigan faoliyat turlarini va ruxsat berish tartib-taomillarini tubdan qisqartirish chora-tadbirlari to‘g‘risida”gi Farmoniga (O‘zbekiston Respublikasi qonun hujjatlari to‘plami, 2012-yil, 29-son, 327-modda) asosan O‘zbekiston Respublikasi Davlat bojxona qo‘mitasi qaror qiladi:

1. O‘zbekiston Respublikasi Davlat bojxona qo‘mitasining 2004-yil 20-yanvardagi 01-02/12-4-son qarori (ro‘yxat raqami 1317, 2004-yil 27-fevral) (O‘zbekiston Respublikasi qonun hujjatlari to‘plami, 2004-yil, 8-son, 102-modda) bilan tasdiqlangan “Boj olinmaydigan savdo do‘koni” bojxona rejimi to‘g‘risidagi nizomga ilovaga muvofiq o‘zgartirishlar va qo‘shimcha kiritilsin.

2. Ushbu qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

1. 27-bandda:

birinchi xatboshi quyidagi tahrirda bayon qilinsin:

“27. Boj olinmaydigan savdo do‘konining egasi boj olinmaydigan savdo do‘koniga joylashtiriladigan tovarlar hisobini hisobga olish daftarini yuritish orqali (shu jumladan, avtomatlashtirilgan tarzda) olib boradi va bojxona organiga ushbu tovarlar harakati to‘g‘risida har chorakda mazkur Nizomning 5-ilovasiga muvofiq shaklda boj olinmaydigan savdo do‘konidagi tovarlar harakati bo‘yicha hisobot taqdim etadi.”;

uchinchi xatboshining birinchi jumlasi quyidagi tahrirda bayon qilinsin:

“Oxirgi yozuv kiritilganidan keyin hisobga olish daftari taqdim qilingan hisobotlar bilan solishtirish uchun bojxona organiga beriladi.”;

to‘rtinchi xatboshi quyidagi tahrirda bayon qilinsin:

“Hisobga olish daftarining shakli boj olinmaydigan savdo do‘koni faoliyatini amalga oshirish uchun zarur bo‘ladigan ma’lumotlar asosida boj olinmaydigan savdo do‘koni egasi tomonidan belgilanadi. Bunda hisobga olish daftarining shaklida mazkur Nizomning 5-ilovasida keltirilgan Boj olinmaydigan savdo do‘konidagi tovarlar harakati bo‘yicha hisobot shaklida mavjud barcha ma’lumotlar bo‘lishi kerak”.

2. 30-band quyidagi tahrirda bayon qilinsin:

“30. Boj olinmaydigan savdo do‘koni egasi bojxona organi bilan kelishgan holda boj olinmaydigan savdo do‘konini ishlatish qoidalarini tasdiqlaydi.”

3. 31-bandda:

birinchi xatboshidagi “tadbirlarda” degan so‘z “qoidalarda” degan so‘z bilan almashtirilsin;

beshinchi xatboshidagi “hisobga olish” degan so‘zlardan keyin “daftarining” degan so‘z bilan to‘ldirilsin;

oltinchi xatboshi chiqarib tashlansin.

4. 32-banddagi “mazkur tadbirlar” degan so‘zlar “mazkur Nizomning 31-bandida ko‘rsatilgan qoidalar” degan so‘zlar bilan almashtirilsin.

5. 5-ilova mazkur o‘zgartirishlar va qo‘shimchaning ilovasiga muvofiq tahrirda bayon qilinsin.