Oʻzbekiston Respublikasi Hukumati va Koreya Respublikasi Hukumati, bundan keyin Tomonlar deb ataluvchilar,

ikki davlat oʻrtasidagi diplomatik munosabatlarni mustahkamlash va iqtisodiy aloqalarni rivojlantirishga boʻlgan oʻzaro intilishga amal qilib,

bir davlat fuqarolarining boshqa davlat hududida vaqtincha mehnat faoliyati hamkorlikning muhim sohasi ekanini eʼtiborga olib,

Oʻzbekiston Respublikasi va Koreya Respublikasida tashqi mehnat migratsiyasi jarayonini tartibga solishdagi oʻzaro manfaatdorlikka asoslanib,

1. Ushbu Bitim Oʻzbekiston Respublikasining Koreya Respublikasi hududida vaqtincha ishlayotgan fuqarolarining va Koreya Respublikasining Oʻzbekiston Respublikasi hududida vaqtincha ishlayotgan fuqarolarining mehnat faoliyati bilan bogʻliq masalalarni tartibga soladi.

2. Ushbu Bitim chet el fuqarolarining kirishi uchun maxsus ruxsatnoma talab etiladigan hududlar, tashkilotlar va obyektlardan tashqari ikki davlatning butun hududida qoʻllaniladi.

1. Ushbu Bitimni amalga oshirish uchun masʼul boʻlgan vakolatli organlar (bundan keyin vakolatli organlar deb ataluvchilar) quyidagilardir:

a) Oʻzbekiston Respublikasi uchun — Mehnat va aholini ijtimoiy muhofaza qilish vazirligi, Ichki ishlar vazirligi, Tashqi ishlar vazirligi, Tashqi iqtisodiy aloqalar, investitsiyalar va savdo vazirligi;

b) Koreya Respublikasi uchun — Koreya Respublikasining Tashqi ishlar va savdo vazirligi, Koreya Respublikasining Adliya vazirligi.

2. Tomonlar oʻzlarining vakolatli organlariga taalluqli har qanday oʻzgarishlar toʻgʻrisida bir-birini diplomatik kanallar orqali oldindan xabardor qiladilar.

3. Tomonlarning vakolatli organlari ushbu Bitimni bajarish bilan bogʻliq masalalarni hal etish uchun ishchi guruhni tuzadilar.

4. Ushbu moddaning 3-bandida koʻrsatib oʻtilgan ishchi guruh zaruratga qarab navbati bilan Oʻzbekiston Respublikasida va Koreya Respublikasida birgalikdagi majlislarni oʻtkazadi.

Ushbu Bitim Tomonlar davlatlarining quyidagi toifadagi fuqarolariga nisbatan joriy qilinadi:

a) bir Tomon davlatining boshqa Tomon davlati hududida joylashgan va tijorat faoliyatini amalga oshirayotgan chet el kapitali ishtirokidagi korxonalarning vakillari yoki malakali xodimlari boʻlgan fuqarolari;

b) bir Tomon davlatining malakali xodimlari boʻlgan, boshqa Tomon davlati hududida joylashgan va tijorat faoliyatini amalga oshirayotgan yuridik shaxslarning vakolatxonalarida vaqtincha ishlayotgan fuqarolari;

v) bir Tomon davlatining ushbu Tomon davlati hududida joylashgan kompaniyalar guruhi yoki shunday guruh kompaniyasi bilan mehnat shartnomasini tuzgan va boshqa Tomon davlati hududida joylashgan xuddi shu kompaniyalar guruhining kompaniyasida mehnat faoliyatini amalga oshirayotgan fuqarolari (bir kompaniyalar guruhi deb bosh kompaniya va kompaniyalardan tarkib topgan kompaniyalar guruhi tushuniladi, bunda bosh kompaniya kompaniyalarni ularning ustav jamgʻarmasida oʻz hissasi bilan qatnashishiga asosan yoki taʼsis hujjatlariga muvofiq bevosita yoki bilvosita nazorat qiladi); va

g) ushbu moddada koʻrsatib oʻtilgan fuqarolarning ularga hamroh boʻlgan turmush oʻrtogʻi va voyaga yetmagan bolalari.

1. Tomonlar davlatlarining ushbu Bitimning 3-moddasi a), b) va v) bandlarida koʻrsatib oʻtilgan fuqarolariga mehnat faoliyatini amalga oshirish maqsadidagi viza taklifnoma asosida rasmiylashtiriladi.

2. Bir Tomon davlatining fuqarolariga taklifnoma boshqa Tomon davlatining vakolatli organi tomonidan rasmiylashtiriladi va ushbu organ tomonidan qabul qiluvchi Tomonning milliy qonunchiligida nazarda tutilgan hujjatlar asosida beriladi.

1. Bir Tomon davlatining diplomatik vakolatxonalari va konsullik muassasalari boshqa Tomon davlatining mazkur Bitimning 3-moddasida koʻrsatib oʻtilgan fuqarolariga mehnat faoliyatini amalga oshirish maqsadida ushbu Tomon davlati hududiga kirish va uzoq vaqt boʻlish huquqini beruvchi kirish va chiqish sonini cheklamagan holda bir yilgacha boʻlgan muddatga koʻp martalik kirish vizasini beradilar.

2. Ushbu moddaning 1-bandiga muvofiq berilgan vizaning amal qilish muddati tugagunga qadar vizaning amal qilish muddati va koʻrsatib oʻtilgan vizaga ega boʻlgan shaxsning boʻlish davri har bir holatda uzaytirish toʻgʻrisida ariza berilganda, agar uzaytirish joiz emasligiga oqilona asoslar boʻlmasa, quyidagi tarzda uzaytiriladi:

a) 3-moddaning a) bandida koʻrsatib oʻtilgan shaxslarga nisbatan — 3 (uch) yilga;

b) 3-moddaning b) va v) bandlarida koʻrsatib oʻtilgan shaxslarga nisbatan — ularning mehnat shartnomasi uzaytirilgan, ammo 3 (uch) yildan oshmaydigan muddatga;

v) 3-moddaning g) bandida koʻrsatib oʻtilgan shaxslarga nisbatan — ular hamroh boʻlgan shaxslar uchun berilgan viza muddatiga.

3. Ushbu moddada koʻrsatib oʻtilgan vizalar shunday vizaga ega boʻlgan shaxsga boʻlish davlati hududidan chiqib ketishni talab qilmasdan uzaytirilishi mumkin.

4. Boʻlish muddatini va vizaning amal qilish muddatini uzaytirishga ruxsat berish toʻgʻrisidagi ariza bunday ariza berilgan kundan boshlab 15 kun davomida koʻrib chiqilishi lozim.

5. Ushbu moddada koʻrsatib oʻtilgan viza Tomonlarning vakolatli davlat organlari tomonidan oʻz davlatlarining qonunchiligiga muvofiq uzaytiriladi.

1. Davlatlar hududida ishlashga ruxsatnomani rasmiylashtirish uchun zarur boʻlgan hujjatlar bunday ruxsatnomani soʻrayotgan kompaniyalarga nisbatan yurisdiksiyaga ega boʻlgan tegishli vakolatli organlarga berilishi mumkin.

2. Bitim joriy etiladigan ishlash uchun ruxsatnoma, agar qabul qiluvchi Tomon davlati qonunchiligida boshqacha tartib nazarda tutilmagan boʻlsa, berilgan ruxsatnoma muayyan ish beruvchiga nisbatan va qabul qiluvchi davlat hududida haqiqiy hisoblanadi.

3. Tomonlar davlatlari hududida joylashgan yuridik shaxslarning vakolatxonalaridan akkreditatsiya qilinishi lozim boʻlgan xodimlarni jalb qilish uchun mehnat faoliyatini amalga oshirishga ruxsat beruvchi hujjatlarni rasmiylashtirish talab etilmaydi.

1. Chet el fuqarolari uchun bir Tomon davlati qonunchiligida nazarda tutilgan huquq va erkinliklar boshqa Tomon davlatining ushbu Bitimning 3-moddasida koʻrsatib oʻtilgan fuqarolariga ham kafolatlanadi.

2. Tomonlar ushbu Bitimning 3-moddasida koʻrsatib oʻtilgan fuqarolarning huquqlarini himoya qilish boʻyicha choralar koʻradi.

3. Ushbu Bitim qoidalari Tomonlar davlatlarining ushbu Bitimning 3-moddasida koʻrsatib oʻtilgan fuqarolarini qabul qiluvchi davlat qonunchiligiga rioya qilish majburiyatidan ozod qilmaydi.

Tomonlar davlatlarining ushbu Bitimning 3-moddasida koʻrsatib oʻtilgan fuqarolariga qabul qiluvchi davlatning chet el fuqarolariga nisbatan qoʻllanuvchi qonunchiligiga muvofiq tibbiy xizmat koʻrsatiladi.

Agar Tomonlar davlatlarining fuqarolariga muayyan turdagi ishlarni bajarish uchun maxsus malaka talab etilsa, bu fuqarolar qabul qiluvchi davlatning qonunchiligiga muvofiq shunday malakani tasdiqlovchi hujjatlarni taqdim etadilar.

1. Tomonlar davlatlarining ushbu Bitimning 3-moddasida koʻrsatib oʻtilgan fuqarolarining ish beruvchi bilan tuzilgan mehnat shartnomasi boʻyicha mehnat faoliyati qabul qiluvchi davlatning qonunchiligiga muvofiq tartibga solinadi.

2. Tomonlar davlatlarining ushbu Bitimning 3-moddasida koʻrsatib oʻtilgan fuqarolari xodimlar bilan tuzilgan mehnat shartnomalarida koʻrsatilgandan tashqari hech qanday boshqa haq toʻlanadigan ishni bajarishlari mumkin emas.

3. Agar Tomonlar davlatlarining fuqarolari ushbu Bitimning 3-moddasida koʻrsatib oʻtilgan mezonlarga keyinchalik mos kelmasa, ularga chet el fuqarolariga qoʻllanadigan qabul qiluvchi davlat qonunchiligi tomonidan beriladigan umumiy sharoitlar va yashash tartibi joriy etiladi.

Tomonlar davlatlarining ushbu Bitimning 3-moddasida koʻrsatib oʻtilgan fuqarolarining qabul qiluvchi davlat hududiga kirishi va ularning qabul qiluvchi davlatdan chiqishi uchun zarur boʻlgan hujjatlarni rasmiylashtirish bilan bogʻliq barcha xarajatlar fuqarolar tomonidan yoki qabul qiluvchi kompaniya tomonidan toʻlanadi.

Ushbu Bitimni talqin qilish va qoʻllash bilan bogʻliq har qanday kelishmovchiliklar Tomonlar oʻrtasida oʻzaro maslahatlashuvlar yoʻli bilan hal etiladi.

Tomonlar oʻzaro kelishuv boʻyicha ushbu Bitimga uning ajralmas qismi hisoblanuvchi alohida protokollar bilan rasmiylashtiriladigan va ushbu Bitimning 14-moddasida nazarda tutilgan tartibda kuchga kiruvchi oʻzgartish va qoʻshimchalar kiritishi mumkin.

1. Tomonlar ushbu Bitimning kuchga kirishi uchun zarur boʻlgan tegishli davlat ichki protseduralari tugallangani toʻgʻrisida bir-birini yozma shaklda diplomatik kanallar orqali xabardor qiladilar. Bitim soʻnggi xabarnoma taqdim etilgan sanadan keyin keluvchi ikkinchi oyning birinchi kunida kuchga kiradi.

2. Ushbu Bitim uch yil muddatga tuziladi va agar Tomonlardan hech biri boshqa Tomonni tegishli davrning tugashidan kamida uch oy oldin yozma ravishda xabardor qilish yoʻli bilan oʻzining uning amal qilishini toʻxtatish maqsadi toʻgʻrisida maʼlum qilmasa, keyingi bir yillik davrlarga oʻz-oʻzidan uzaytiriladi. Ushbu Bitim bekor qilinganda uning qoidalariga muvofiq ega boʻlingan huquqlar Tomonlar boshqacha kelishgunlariga qadar toʻxtatilmaydi.

3. Ushbu Bitimning amal qilishi toʻxtatilganda uning qoidalari mehnat shartnomalariga nisbatan bu shartnomalar tuzilgan muddat tugagunga qadar va ushbu Bitimning amal qilishi davrida taqdim etilgan ishlash uchun ruxsatnomalarning amal qilish muddatiga nisbatan ular berilgan muddat tugaguniga qadar kuchida qoladi.

2011-yil 23-avgustda Toshkent shahrida har biri oʻzbek, koreys va ingliz tillarida ikki nusxada tuzildi, bunda barcha matnlar bir xil kuchga ega. Talqin qilishda har qanday tafovutlar yuzaga kelganda ingliz tilidagi matndan foydalaniladi.