Qishloq aholi punktlarining ichimlik suv ta’minotini yaxshilash, qishloq xo‘jaligi ilmiy muassasalarini zamonaviy laboratoriya uskunalari bilan jihozlash hamda Amerika Qo‘shma Shtatlari Hukumati bilan O‘zbekiston Respublikasi Hukumati o‘rtasida tuzilgan “Taraqqiyot uchun oziq-ovqat” dasturi bo‘yicha qishloq xo‘jaligi mahsulotlari berish to‘g‘risidagi Bitim doirasida O‘zbekiston Respublikasiga berilgan grantdan samarali foydalanish maqsadida Vazirlar Mahkamasi qaror qiladi:

1. Hukumatlararo bitimga muvofiq tuzilgan O‘zbekiston-Amerika qo‘shma ishchi guruhining “Taraqqiyot uchun oziq-ovqat” dasturi doirasidagi grant mablag‘lari hisobiga 2012-yilda ilovaga muvofiq ro‘yxat bo‘yicha loyihalarni moliyalashtirish to‘g‘risidagi taklifiga rozilik berilsin.

2. Qoraqalpog‘iston Respublikasi Vazirlar Kengashi, Jizzax, Qashqadaryo, Navoiy va Surxondaryo viloyatlari hokimliklari:

yil va choraklarga bo‘lib chiqqan holda loyihalarni moliyalashtirish jadvallarini bir oy muddatda ishlab chiqsinlar va O‘zbekiston Respublikasi Moliya vazirligi bilan kelishsinlar;

mablag‘lardan maqsadli foydalanilishini ta’minlasinlar va loyihalarning amalga oshirilishi to‘g‘risidagi axborotni har chorakda O‘zbekiston Respublikasi Moliya vazirligiga hamda Tashqi iqtisodiy aloqalar, investitsiyalar va savdo vazirligiga taqdim etsinlar.

3. O‘zbekiston Respublikasi Moliya vazirligi ilovaga kiritilgan loyihalarning “Taraqqiyot uchun oziq-ovqat” dasturi doirasida tushgan mablag‘larni jamlash uchun ochilgan O‘zbekiston Respublikasi Moliya vazirligining maxsus hisob raqamidan o‘z vaqtida moliyalashtirilishini ta’minlasin.

4. Qoraqalpog‘iston Respublikasi Vazirlar Kengashi va viloyatlar hokimliklarining “Yagona buyurtmachi xizmati” injiniring kompaniyasi mazkur qarorga ilovaga kiritilgan qishloq aholi punktlaridagi ichimlik suv ta’minoti obyektlari bo‘yicha buyurtmachi etib belgilansin.

5. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.