Oʻzbekiston Respublikasi Prezidentining 2011-yil 30-dekabrdagi PQ-1675-son “Oʻzbekiston Respublikasining 2012-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2011-yil, 52-son, 351-modda) muvofiq, Oʻzbekiston Respublikasi Moliya vazirligi va Davlat soliq qoʻmitasi qaror qiladilar:

1. Oʻzbekiston Respublikasi Moliya vazirligi va Davlat soliq qoʻmitasining 2010-yil 17-avgustdagi 64, 2010-34-sonli qarori (roʻyxat raqami 2134, 2010-yil 18-avgust) (Oʻzbekiston Respublikasi qonun hujjatlari toʻplami, 2010-yil, 33-son, 284-modda) bilan tasdiqlangan Yagona soliq toʻlovining eng kam miqdori kiritilishi munosabati bilan chakana savdo korxonalari, xizmat koʻrsatish sohasidagi mikrofirmalar va kichik korxonalar tomonidan yagona soliq toʻlovini hisoblab chiqarish va toʻlash tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

1. 5-bandda:

quyidagi mazmundagi uchinchi xatboshi bilan toʻldirilsin:

“Agar soliq toʻlovchining asosiy faoliyat turi avtomobil transportida yuk tashish xizmatlari koʻrsatish boʻlsa, unda YSTning eng kam miqdori avtomobil transportida yuk tashishni amalga oshirayotgan yakka tartibdagi tadbirkorlar uchun oʻrnatilgan qatʼiy belgilangan soliq stavkasidan kelib chiqib, har bir avtotransport vositasini hisobga olgan holda aniqlanadi”;

uchinchi xatboshi toʻrtinchi xatboshi deb hisoblansin.

2. 9-bandda:

oʻn uchinchi va oʻn toʻrtinchi xatboshilardagi “6,5” raqami “4” raqami bilan almashtirilsin;

4-misol quyidagi tahrirda bayon etilsin:

“4-misol. Kichik korxona quyidagi faoliyat turlarini amalga oshiradi:

avtomobil transportida yuk tashish boʻyicha xizmatlar;

hududiy jihatdan alohida boʻlgan tarkibiy tuzilma tomonidan amalga oshiriladigan nooziq-ovqat mahsulotlarining — avtomobil ehtiyot qismlarining chakana savdosi.

Yuk tashish xizmatlari koʻrsatishdan tushgan tushumning ulushi umumiy realizatsiya hajmining 60% ini tashkil etadi. Nooziq-ovqat mahsulotlari chakana savdosidan tushgan tushumning ulushi umumiy realizatsiya hajmining 40% ini tashkil etadi.

Ushbu korxona uchun avtomobil transportida yuk tashish xizmatlari koʻrsatish asosiy faoliyat turidir. Ushbu faoliyat turi yakka tartibdagi tadbirkorlar tomonidan amalga oshirilishi mumkin va u boʻyicha qatʼiy belgilangan soliq stavkasi oʻrnatilgan. Ushbu holatda, butun korxona boʻyicha toʻlanishi lozim boʻlgan YST summasi, har bir avtotransport vositasini hisobga olgan holda avtomobil transportida yuk tashish xizmatlari koʻrsatishni amalga oshirayotgan yakka tartibdagi tadbirkor uchun belgilangan qatʼiy belgilangan soliq summasidan kam boʻlmasligi lozim. Bunda, ushbu korxona uchun nooziq-ovqat mahsulotlari chakana savdosi asosiy faoliyat turi emasligini hisobga oladigan boʻlsak, YSTning eng kam miqdori nooziq-ovqat mahsulotlarining chakana savdosi qismi boʻyicha tatbiq etilmaydi.

Masalan, korxona balansida 6 tonna yuk koʻtarish quvvatiga ega boʻlgan 5 ta yuk avtomobiliga ega. YSTning eng kam miqdori quyidagicha hisoblanadi:

5 (yuk avtomobili) x EKIHning 3 baravari (8 tonnagacha yuk koʻtarish quvvatiga ega yuk avtomobillari uchun qatʼiy belgilangan soliq stavkasi EKIHning 3 baravari miqdorida belgilangan) = YSTning eng kam miqdori summasi.

Agar korxona yuk tashish xizmatlarini qatʼiy belgilangan soliq stavkalari transport vositalarining yuk koʻtarish quvvatlariga qarab tabaqalashgan har xil yuk koʻtarish quvvatiga ega yuk avtomobillari orqali amalga oshirayotgan boʻlsa, YSTning eng kam miqdori har bir avtotransport vositasi uchun, yuk koʻtarish quvvatlariga qarab, qatʼiy belgilangan soliq stavkasidan kelib chiqib hisoblanadi.

Masalan, korxona balansida 10 ta yuk avtomobillariga ega, shulardan:

2 ta yuk avtomobili — 2 tonna yuk koʻtarish quvvatiga ega;

3 ta yuk avtomobili — 5 tonna yuk koʻtarish quvvatiga ega;

5 ta yuk avtomobili — 10 tonna yuk koʻtarish quvvatiga ega.

Bunday holda YSTning eng kam miqdori quyidagi tartibda hisoblanadi:

2 (yuk avtomobili) x EKIHning 2 baravari (3 tonnagacha yuk koʻtarish quvvatiga ega yuk avtomobillari uchun qatʼiy belgilangan soliq stavkasi EKIHning 2 baravari miqdorida belgilangan) = X1;

3 (yuk avtomobili) x EKIHning 3 baravari (8 tonnagacha yuk koʻtarish quvvatiga ega yuk avtomobillari uchun qatʼiy belgilangan soliq stavkasi EKIHning 3 baravari miqdorida belgilangan) = X2;

5 (yuk avtomobili) x EKIHning 4 baravari (8 tonnadan ortiq yuk koʻtarish quvvatiga ega yuk avtomobillari uchun qatʼiy belgilangan soliq stavkasi EKIHning 4 baravari miqdorida belgilangan) = X3;

X1 + X2 + X3 = YSTning eng kam miqdori summasi”.

3.12-bandning birinchi xatboshisi quyidagi tahrirda bayon etilsin:

“Ushbu Nizom tatbiq etiladigan soliq toʻlovchilar YST hisob-kitobi bilan birga ushbu Nizomning 6-bandida koʻrsatilgan Maʼlumotnoma-hisob-kitobni ilova qiladilar, hisobot choragi yakunlari boʻyicha asosiy faoliyat turi avtomobil transportida yuk tashish xizmatlari koʻrsatish boʻlgan YST toʻlovchilari esa ushbu Nizomning 1a-ilovasida keltirilgan shaklda Maʼlumotnoma-hisob-kitobga hisobot davri uchun YSTning eng kam miqdori toʻgʻrisidagi ilovani ham ilova qiladilar”.

4. Ushbu oʻzgartirish va qoʻshimchalarning ilovasiga muvofiq 1a-ilova bilan toʻldirilsin.