“Ommaviy axborot vositalari toʻgʻrisida” hamda “Axborot erkinligi prinsiplari va kafolatlari toʻgʻrisida”gi Oʻzbekiston Respublikasi qonunlariga muvofiq, ommaviy axborot vositalari tomonidan axborotlarni shakllantirish va tarqatish sohasidagi faoliyatni takomillashtirish va uning samarali monitoringini amalga oshirish, shuningdek shaxs, jamiyat va davlatning axborot xavfsizligini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Madaniyat va sport ishlari vazirligi, Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Axborot va ommaviy kommunikatsiyalar agentligi, Respublika Maʼnaviyat targʻibot markazi, jamoat tashkilotlari hamda boshqa tashkilotlarning Axborot va ommaviy kommunikatsiyalar sohasidagi ekspert komissiyasini (keyingi oʻrinlarda Komissiya deb ataladi) tashkil etish toʻgʻrisidagi taklifiga rozilik berilsin, Komissiyaga quyidagi asosiy vazifalar yuklansin:

milliy axborot makoni va ommaviy kommunikatsiya vositalari faoliyati, shu jumladan zamonaviy axborot-kommunikatsiya texnologiyalari, yoʻldosh tizimlar, Internetning global tarmogʻi, axborotni uzatish va tarqatishning boshqa elektron vositalari, shuningdek bosma mahsulotlar monitoringi natijalarini koʻrib chiqish;

Oʻzbekiston matbuot va axborot agentligining Ommaviy kommunikatsiyalar sohasida monitoring markazi tomonidan taqdim etiladigan monitoring materiallarini ommaviy kommunikatsiya vositalarida tarqatiladigan axborot materiallarining axborot sohasida shaxs, jamiyat va davlatning manfaatlarini himoya qilishni taʼminlashga, fuqarolarning ijtimoiy ongiga buzgʻunchi salbiy axborot-ruhiy taʼsirning oldini olishga, milliy-madaniy anʼanalar va merosni saqlab qolish va ularning uzviyligini taʼminlashga yoʻnaltirilgan respublika qonun hujjatlari talablariga muvofiqligi yuzasidan ekspertizadan oʻtkazish;

ommaviy kommunikatsiyalar sohasida xizmatlar koʻrsatuvchi subyektlar faoliyatida qonunchilik talablarining aniqlangan buzilishlari boʻyicha xulosalarni tayyorlash va tegishli davlat organlariga taqdim etish;

milliy ommaviy kommunikatsiya vositalarining samarali faoliyat koʻrsatishiga toʻsqinlik qiluvchi muammolarni aniqlash;

ommaviy kommunikatsiyalar sohasidagi qonun hujjatlarini takomillashtirishga doir takliflar ishlab chiqish.

2. Axborot va ommaviy kommunikatsiyalar sohasidagi ekspert komissiyasi tarkibi va Komissiya toʻgʻrisidagi nizom 1* va 2-ilovalarga muvofiq tasdiqlansin.

Axborot va ommaviy kommunikatsiyalar agentligining Ommaviy kommunikatsiyalar masalalari boʻyicha markazi Komissiyaning ishchi organi etib belgilansin.

3. Oʻzbekiston aloqa va axborotlashtirish agentligi, Oʻzbekiston Respublikasi Adliya vazirligi manfaatdor vazirliklar va idoralar bilan birgalikda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

1. Ushbu Nizom Axborot va ommaviy kommunikatsiyalar sohasidagi ekspert komissiyasi (keyingi oʻrinlarda Komissiya deb ataladi) faoliyatini tartibga soladi.

Axborot va ommaviy kommunikatsiyalar agentligining Ommaviy kommunikatsiyalar masalalari boʻyicha markazi Komissiyaning ishchi organi (keyingi oʻrinlarda ishchi organ deb ataladi) hisoblanadi.

2. Komissiya faoliyati teng huquqlilik, fikrlarni erkin ifodalash, qarorlar va xulosalarni kollegial qabul qilish, Komissiya vakolatiga kiradigan masalalarning har tomonlama, toʻliq va xolisona hal etilishini taʼminlash tamoyillariga asoslanadi.

3. Komissiya oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda boshqa qonun hujjatlariga, shuningdek ushbu Nizomga amal qiladi.

4. Quyidagilar Komissiyaning asosiy vazifalari hisoblanadi:

milliy axborot makoni va ommaviy kommunikatsiya vositalari faoliyati, shu jumladan zamonaviy axborot-kommunikatsiya texnologiyalari, yoʻldosh tizimlar, Internetning global tarmogʻi, axborotni uzatish va tarqatishning boshqa elektron vositalari, shuningdek bosma mahsulotlar monitoringi natijalarini koʻrib chiqish;

ishchi organ tomonidan taqdim etiladigan monitoring materiallarini ommaviy kommunikatsiya vositalarida tarqatiladigan axborot materiallarining axborot sohasida shaxs, jamiyat va davlatning manfaatlarini himoya qilishni taʼminlashga, fuqarolarning ijtimoiy ongiga buzgʻunchi salbiy axborot-ruhiy taʼsirning oldini olishga, milliy-madaniy anʼanalar va merosni saqlab qolish va ularning uzviyligini taʼminlashga yoʻnaltirilgan respublika qonun hujjatlari talablariga muvofiqligi yuzasidan ekspertizadan oʻtkazish;

ommaviy kommunikatsiyalar sohasida xizmatlar koʻrsatuvchi subyektlar faoliyatida qonunchilik talablarining aniqlangan buzilishlari boʻyicha xulosalarni tayyorlash va tegishli davlat organlariga taqdim etish;

milliy ommaviy kommunikatsiya vositalarining samarali faoliyat koʻrsatishiga toʻsqinlik qiluvchi muammolarni aniqlash;

ommaviy kommunikatsiyalar sohasidagi qonun hujjatlarini takomillashtirishga doir takliflar ishlab chiqish.

5. Asosiy vazifalariga muvofiq Komissiya quyidagi funksiyalarni bajaradi:

ommaviy kommunikatsiya subyektlari tomonidan ommaviy kommunikatsiyalar sohasidagi qonun hujjatlari talablariga rioya qilinishini, shuningdek ommaviy foydalanish uchun davriy bosma va kitob mahsulotlari, audiovizual mahsulotlar va fonogrammalarning ishlab chiqarilishi, tarqatilishi va saqlanishini oʻrganadi va xulosa beradi;

respublikaning axborot-kommunikatsiya tizimlarida milliy ongning oʻzgartirilishiga, jamiyatning tarixiy hamda milliy anʼanalar va urf-odatlardan uzilib qolishiga, ijtimoiy-siyosiy vaziyatning nobarqarorlashishiga, millatlararo va konfessiyalararo totuvlikning buzilishiga yoʻnaltirilgan axborotning tarqalishiga qarshi kurashish tizimini takomillashtirishga doir takliflar tayyorlaydi;

milliy axborot makonida aniqlangan konstitutsiyaviy tuzumni zoʻravonlik bilan oʻzgartirishga, Oʻzbekiston Respublikasining hududiy yaxlitligi va suverenitetini buzishga, ijtimoiy, milliy, irqiy va diniy adovatni avj oldirishga, davlat tuzumiga qarshi qaratilgan boshqa tajovuzlarni sodir etishga ommaviy daʼvat qilgan materiallarni, shuningdek urush, zoʻravonlik, pornografiya va shafqatsizlikni, terrorizm va diniy ekstremizm gʻoyalarini targʻib qilishga yoʻnaltirilgan axborotlarni tahlil qiladi va ular boʻyicha xulosalar tayyorlaydi;

ommaviy kommunikatsiyalar sohasidagi subyektlar faoliyati toʻgʻrisidagi xulosani, aniqlangan kamchiliklar va qonun buzilishlarini bartaraf etish boʻyicha takliflarni tayyorlaydi va belgilangan tartibda tegishli davlat organlariga taqdim etadi;

ommaviy kommunikatsiyalar sohasidagi normativ-huquqiy hujjatlar loyihalarini tayyorlaydi va ularni ishlab chiqishda qatnashadi;

Komissiya vakolatiga kiradigan masalalar boʻyicha davlat organlari, jamoat tashkilotlari va boshqa tashkilotlar bilan oʻzaro hamkorlik qiladi;

ekspert xulosalarini oʻrganadi hamda xalqaro Internet tarmogʻi axborot resurslarining identifikatsiya maʼlumotlarini Oʻzbekiston Respublikasi qonunchiligi bilan tarqatilishi taqiqlangan axborot mavjud boʻlgan Internet tarmogʻi Reyestriga kiritish yuzasidan qaror qabul qiladi;

ommaviy kommunikatsiyalar sohasidagi qonun hujjatlarida nazarda tutilgan boshqa funksiyalarni amalga oshiradi.

6. Komissiya quyidagi huquqlarga ega:

oʻz vakolatiga kiradigan masalalar boʻyicha davlat organlari, jamoat tashkilotlari va boshqa tashkilotlardan maʼlumotlarni soʻrash va belgilangan tartibda olish;

davlat organlari, jamoat tashkilotlari va boshqa tashkilotlarning tegishli maxsus bilimlarga ega boʻlgan vakillarini ekspertlar sifatida jalb etish;

oʻz majlislarida Komissiya aʼzolari va davlat organlari masʼul vakillarining hisobotini eshitish, tegishli qarorlar qabul qilish;

Komissiya vakolatiga kiradigan masalalar boʻyicha ekspert xulosalari va tavsiyalar berish;

qonun hujjatlariga muvofiq axborot materiallarini tarqatishni cheklash boʻyicha takliflar kiritish;

oʻz vakolatlari doirasida vakolatli davlat organlariga ommaviy kommunikatsiyalar sohasidagi qonun hujjatlariga oʻzgartirish va qoʻshimchalar kiritish toʻgʻrisida takliflar kiritish.

materiallarni koʻrib chiqish hamda xalqaro Internet tarmogʻi axborot resurslarining identifikatsiya maʼlumotlarini Oʻzbekiston Respublikasi qonunchiligi bilan tarqatilishi taqiqlangan axborot mavjud boʻlgan Internet tarmogʻi Reyestriga kiritish yuzasidan qaror qabul qilish.

7. Komissiyaning shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadi.

Koʻrib chiqilayotgan materiallarning mohiyatidan kelib chiqib Komissiya aʼzolari tomonidan davlat organlari, jamoat tashkilotlari va boshqa tashkilotlardan tegishli maxsus bilimlarga ega boʻlgan ekspertlar jalb etilishi mumkin.

8. Komissiyaning oʻz blankasi boʻladi. Komissiyaning faoliyati bilan bogʻliq yozishmalarni yuritishda xat Komissiya raisi, uning oʻrinbosari (yoki) kotibi tomonidan imzolanadi.

9. Komissiyaga rais boshchilik qiladi, uning vakolatlariga quyidagilar kiradi:

Komissiya ishini tashkil etish;

Komissiyaga yuklangan vazifalarni bajarish boʻyicha uning aʼzolari ishini muvofiqlashtirish;

Komissiya majlislari kun tartibini belgilash va ularni chaqirish;

materiallarni ekspertizadan oʻtkazish va zarur hollarda ekspertiza xulosalarini sudda himoya qilish uchun ekspert (ekspertlar) belgilash;

Komissiya tomonidan qabul qilingan qarorlar bajarilishi yuzasidan nazoratni tashkil etish;

Komissiyaning samarali ishlashini taʼminlash yuzasidan boshqa xatti-harakatlarni bajarish.

10. Komissiya raisi boʻlmagan taqdirda uning vazifalarini Komissiya raisining oʻrinbosari bajaradi.

11. Komissiya aʼzolari:

Komissiya ishida qatnashadilar;

Komissiya qarorlarini qabul qilishda ovoz berishda ishtirok etadilar, Komissiya tomonidan belgilangan tartibda, shu jumladan elektron koʻrinishda majlis natijalarini roʻyxatga olish va oʻtkazish;

koʻrib chiqish uchun kiritiladigan materiallar boʻyicha tegishli xulosalarni oʻz vaqtida taqdim etadilar;

12. Komissiyaning ishchi organi:

Komissiyaning navbatdagi majlisiga monitoringning barcha natijalarini va zarur materiallarni oʻz vaqtida tayyorlashni taʼminlaydi hamda uning tegishli qarorini oladi;

tahliliy materiallarni tayyorlashni va kun tartibidagi masalalar boʻyicha Komissiya majlislarini oʻtkazishni tashkil etadi shu jumladan, Komissiya tomonidan belgilangan tartibda elektron hujjat aylanishi tartibida;

Komissiyaning koʻrib chiqishi uchun qoʻshimcha axborot va tahliliy materiallarni, shuningdek Komissiyaning vakolatlari doirasida qarorlar qabul qilish uchun boshqa zarur maʼlumotlarni taqdim etadi.

zarur materiallarni oʻz vaqtida tayyorlashni taʼminlaydi hamda materiallar Ishchi organga tushgan sanadan boshlab 15 kun muddatda ekspertiza oʻtkazadi.

13. Komissiya kotibi:

barcha zarur hujjatlar Komissiyaning navbatdagi majlisiga oʻz vaqtida tayyorlanishini taʼminlaydi;

materiallarni Komissiya majlisiga tayyorlash boʻyicha ishchi organ ishlarini tashkil etadi;

kun tartibidagi masalalar boʻyicha Komissiya majlislari oʻtkazilishini tashkil etadi;

majlislarni oʻtkazish muddatlari va joyini, shuningdek taklif etiladiganlar tarkibini Komissiya raisi bilan kelishadi;

Komissiya aʼzolarini va taklif etilgan shaxslarni majlis oʻtkaziladigan sana, uning vaqti, joyi toʻgʻrisida xabardor qiladi;

Komissiya qarorlari ijrosi monitoringini olib boradi va uning natijalarini Komissiya majlisining koʻrib chiqishi uchun taqdim etadi;

Komissiya bayonnomalarini rasmiylashtiradi va tasdiqlangan bayonnomalarni Komissiya aʼzolariga, manfaatdor davlat organlariga va boshqa tashkilotlarga yuboradi shu jumladan, Komissiya tomonidan belgilangan tartibda elektron hujjat aylanishi yoʻli bilan.

14. Komissiya raisi jismoniy va yuridik shaxslarning har bir aniq murojaati yuzasidan materiallar olingan sanadan boshlab uch ish kuni mobaynida Komissiya ishchi organi taklifi bilan jalb etilgan ekspertlardan ekspertni (ekspertlarni) tasdiqlaydi.

15. Ekspertiza materiallar olingan sanadan boshlab 15 kun mobaynida oʻtkaziladi.

16. Ekspert (ekspertlar) taqdim etilgan materiallarni besh kun muddatda oʻrganib chiqadi va ekspert xulosasi beradi.

17. Ekspert koʻrib chiqish jarayonida qoʻshimcha materiallarni soʻrash huquqiga ega.

18. Zarurat boʻlganda Komissiya bajarilgan ishlar yuzasidan Ishchi organning amalga oshirilgan ishlar toʻgʻrisidagi hisobotini koʻrib chiqadi.

19. Komissiya qarori majlisda ishtirok etgan barcha Komissiya aʼzolari tomonidan imzolangan bayonnoma asosida, shu jumladan Komissiya tomonidan belgilangan tartibda elektron hujjat almashinuvi vositasida rasmiylashtiriladi.

20. Ekspert (ekspertlar)ning xulosasida:

xulosa qabul qilingan sana;

ekspertizani oʻtkazish uchun asos;

ekspertiza predmeti (ekspertizaga taqdim etilgan materiallar roʻyxati);

oʻtkazilgan ekspertiza boʻyicha Komissiyaning xulosasi aks ettirilishi kerak.

21. Komissiya zaruratga qarab majlis oʻtkazadi.

22. Agar Komissiya majlisida uning aʼzolarining kamida uchdan ikki qismi hozir boʻlsa Komissiyaning majlisi qonuniy vakolatli hisoblanadi.

23. Komissiyaning qarori majlisda hozir boʻlgan aʼzolarining oddiy koʻpchilik ovozi bilan qabul qilinadi. Ovozlar teng boʻlib qolgan taqdirda Komissiya raisining ovozi hal qiluvchi hisoblanadi.

24. Komissiya aʼzosining Komissiya qabul qilgan qarordan farq qiladigan alohida fikri Komissiyaning bayonnomasida aks ettiriladi yoki yozma shaklda alohida rasmiylashtiriladi va Komissiya bayonnomasining ajralmas qismi hisoblanadi.

25. Komissiyaning bayonnomalari Oʻzbekiston Respublikasi qonun hujjatlariga muvofiq tegishli chora-tadbirlar koʻrish uchun vakolatli davlat organlariga yuboriladi.

26. Vakolatli davlat organlari belgilangan muddatlarda yozma shaklda Komissiyani koʻrilgan chora-tadbirlar toʻgʻrisida xabardor qiladi.

27. Komissiya oʻz majlislarida muntazam ravishda qabul qilingan qarorlar ijrosining holatini koʻrib chiqadi.

28. Komissiya xulosasining asl nusxasi va unga materiallar Komissiyaning ishchi organida saqlanadi.

29. Komissiyaning vakolatiga kiradigan masalalar boʻyicha uning xulosasi davlat organlari va boshqa tashkilotlar tomonidan tegishli qarorlar qabul qilinishi uchun asos hisoblanadi.

30. Komissiya faoliyatini taʼminlash boʻyicha tashkiliy masalalarni hal etish hamda ekspertizalar oʻtkazish Komissiyaning ishchi organi tomonidan, shu jumladan Komissiya tomonidan belgilangan tartibda elektron hujjat almashinuvi yoʻli bilan amalga oshiriladi.

31. Komissiya yilning har choragida oʻz faoliyati toʻgʻrisida Oʻzbekiston Respublikasi Vazirlar Mahkamasiga hisobot taqdim etadi.