“Xavfli ishlab chiqarish obyektlarining sanoat xavfsizligi toʻgʻrisida”gi Oʻzbekiston Respublikasi Qonuniga muvofiq sanoat xavfsizligini taʼminlash, sanoat xavfsizligi deklaratsiyasini davlat organlari, jamoat birlashmalari va fuqarolarga taqdim etish tartibini belgilash maqsadida Vazirlar Mahkamasi qaror qiladi:

1. Belgilab qoʻyilsinki, 2010-yil 31-dekabrgacha boʻlgan muddatda qonun hujjatlariga muvofiq xavfli ishlab chiqarish obyektlarining birinchi tipiga mansub boʻlgan xavfli ishlab chiqarish obyektlaridan foydalanuvchi tashkilotlar “Sanoatkontexnazorat” davlat inspeksiyasiga, Favqulodda vaziyatlar vazirligi va deklaratsiya qilinayotgan xavfli ishlab chiqarish obyekti joylashgan hududdagi mahalliy davlat hokimiyati organlariga sanoat xavfsizligi deklaratsiyasini taqdim etishi shart.

2. “Sanoatkontexnazorat” davlat inspeksiyasi Oʻzbekiston Respublikasi Favqulodda vaziyatlar vazirligi bilan birgalikda qonun hujjatlarida belgilangan tartibda xavfli ishlab chiqarish obyektlari xavfsizligi deklaratsiyalanishi ustidan qatʼiy nazoratni taʼminlasin.

3. Vazirlar Mahkamasining “Xavfli ishlab chiqarish obyektlarining sanoat xavfsizligi toʻgʻrisida”gi Oʻzbekiston Respublikasi Qonunini amalga oshirishga doir qoʻshimcha chora-tadbirlar haqida” 2008-yil 10-dekabrdagi 271-son qaroriga (Oʻzbekiston Respublikasi QT, 2008-y., 12-son, 64-modda) ilovaga muvofiq oʻzgartirish va qoʻshimchalar kiritilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari E.R. Shoismatov zimmasiga yuklansin.

1. 1-bandning beshinchi xatboshi quyidagi tahrirda bayon qilinsin:

“Xavfli ishlab chiqarish obyektining sanoat xavfsizligi deklaratsiyasini ishlab chiqish va davlat organlariga, jamoat birlashmalari va fuqarolarga taqdim etish tartibi toʻgʻrisidagi Nizom 4-ilovaga muvofiq”.

2. Xavfli ishlab chiqarish obyektining sanoat xavfsizligi deklaratsiyasini ishlab chiqish tartibi toʻgʻrisidagi Nizomda (4-ilova):

a) Nizomning nomi quyidagi tahrirda bayon qilinsin:

b) 1-band quyidagi tahrirda bayon qilinsin:

“1. Ushbu Nizom “Xavfli ishlab chiqarish obyektlarining sanoat xavfsizligi toʻgʻrisida”gi Oʻzbekiston Respublikasi Qonunining 19-moddasiga muvofiq xavfsizlik chora-tadbirlariga rioya qilinishi ustidan nazoratni taʼminlash, xavfli ishlab chiqarish obyektidagi avariyalarning oldini olish va ularning oqibatlarini bartaraf etish boʻyicha tadbirlarning yetarliligi va samaradorligini baholash maqsadida xavfli ishlab chiqarish obyektining sanoat xavfsizligi deklaratsiyasini ishlab chiqish hamda davlat organlariga, jamoat birlashmalari va fuqarolarga sanoat xavfsizligi deklaratsiyasini taqdim etish tartibini belgilaydi”;

v) 3-bandning yigirmanchi xatboshidagi “sanoat xavfsizligi deklaratsiyasi” va “meʼyorlari va qoidalariga” soʻzlari tegishli ravishda “ekspertiza xulosasi” va “talablariga” soʻzlari bilan almashtirilsin;

g) 14-bandga quyidagi mazmundagi xatboshi qoʻshilsin:

“Sanoat xavfsizligi deklaratsiyasini rasmiylashtirish boʻyicha talablar “Sanoatkontexnazorat” davlat inspeksiyasi tomonidan belgilanadi”;

d) quyidagi mazmundagi 16.1-band qoʻshilsin:

“16.1. Deklaratsiyaning maxfiylilik ustxati Oʻzbekiston Respublikasi qonun hujjatlariga muvofiq undagi mavjud maʼlumotlarning maxfiylik darajasi bilan belgilanadi”;

e) 19-20-bandlar oʻz kuchini yoʻqotgan deb hisoblansin;

j) quyidagi mazmundagi V va VI boʻlimlar qoʻshilsin:

23. Sanoat xavfsizligi deklaratsiyasi xavfli ishlab chiqarish obyektidan foydalanuvchi yoki undan foydalanishni nazarda tutuvchi tashkilotlar tomonidan ekspertiza oʻtkazilgandan keyin qonun hujjatlarida belgilangan tartibda davlat yoki xizmat sirlari boʻlgan maʼlumotlarni muhofaza qilish talablariga rioya qilgan holda mazkur Nizomning 24-bandida koʻrsatilgan hajmda davlat organlariga, jamoat birlashmalari va fuqarolarga taqdim etiladi.

24. Xavfli ishlab chiqarish obyektidan foydalanuvchi yoki undan foydalanishni nazarda tutuvchi tashkilot rahbari:

a) ekspertiza xulosasini tasdiqlash toʻgʻrisida qaror qabul qilingan kundan boshlab bir oy muddatda sanoat xavfsizligi deklaratsiyasini favqulodda vaziyatlar boʻyicha tegishli hududiy boshqarmaga, “Sanoatkontexnazorat” davlat inspeksiyasining mintaqaviy organiga, Oʻzbekiston Respublikasi Favqulodda vaziyatlar vazirligiga, “Sanoatkontexnazorat” davlat inspeksiyasiga va deklaratsiya qilinayotgan xavfli ishlab chiqarish obyekti joylashgan hududdagi mahalliy davlat hokimiyati organiga taqdim etadi.

b) sanoat xavfsizligi deklaratsiyasini asoslangan soʻrovlar boʻyicha davlat boshqa organlariga “Sanoatkontexnazorat” davlat inspeksiyasi va Oʻzbekiston Respublikasi Favqulodda vaziyatlar vazirligini xabardor qilgan holda taqdim etadi;

v) sanoat xavfsizligi deklaratsiyasining axborot varaqasini jamoat birlashmalari va fuqarolarga ularning asoslangan soʻrovlari boʻyicha “Sanoatkontexnazorat” davlat inspeksiyasi va Oʻzbekiston Respublikasi Favqulodda vaziyatlar vazirligini xabardor qilgan holda taqdim etadi;

g) rasmiy vakillarning deklaratsiyadan foydalanishini taʼminlaydi.

25. Sanoat xavfsizligi deklaratsiyasining birinchi nusxasi (asli) va ekspertiza xulosasi xavfli ishlab chiqarish obyektidan foydalanuvchi tashkilotda saqlanadi.

26. Oʻzbekiston Respublikasi Favqulodda vaziyatlar vazirligi va “Sanoatkontexnazorat” davlat inspeksiyasi xavfsizlik jihatidan deklaratsiya qilinishi kerak boʻlgan sanoat obyektlari toʻgʻrisidagi elektron maʼlumotlar banklarini yuritadilar, Oʻzbekiston Respublikasi hududida xavfsizlikni deklaratsiyalash tartib-qoidasi bajarilishini tahlil qiladilar, kelib tushgan sanoat xavfsizligi deklaratsiyasini hisobga oladilar va saqlaydilar”;

z) Nizomga 2-ilova 2.8-bandining “a” kichik bandi quyidagi tahrirda bayon qilinsin:

“a) deklaratsiyalanayotgan obyektdagi sanoat xavfsizligi talablarini tartibga soluvchi normativ-huquqiy hujjatlar va normativ texnik hujjatlar roʻyxati”.