Keyingi yillarda respublikada harbiy akademik litseylar faoliyatini takomillashtirishga doir muayyan ishlar amalga oshirildi. Harbiy akademik litseylarda o‘qitish tizimi belgilangan davlat ta’lim standartlariga muvofiqlashtirildi, zamonaviy talablarga javob beradigan va o‘quv-tarbiya jarayonini tashkil etish samaradorligini ta’minlaydigan zarur infratuzilma yaratildi, har bir litseyda o‘qitishning o‘ziga xosligi hisobga olingan holda o‘quvchilarni tanlov bo‘yicha tanlab olish tizimi joriy etildi.

Harbiy akademik litseylar faoliyatini yanada takomillashtirish, manfaatdor vazirliklar va idoralar o‘rtasida funksiyalar va mas’uliyat yo‘nalishlarini aniq ajratish, bitiruvchilarning keyingi o‘qishi va ishga joylashishini tashkil etish maqsadida O‘zbekiston Respublikasi Vazirlar Mahkamasi qaror qiladi:

1. Quyidagilar:

Harbiy akademik litsey to‘g‘risidagi Nizom 1-ilovaga muvofiq;

harbiy akademik litseylarning namunaviy shtat jadvali 2-ilovaga* muvofiq;

harbiy akademik litseylar o‘quvchilarining kiyim-bosh formasi namunalari 3-ilovaga* muvofiq;

harbiy akademik litseylar o‘quvchilarini kiyim-bosh, poyabzal va yumshoq inventar bilan ta’minlash normalari 4-ilovaga* muvofiq;

harbiy akademik litseylar o‘quvchilari ovqatlanishining sutkalik normasi 5-ilovaga* muvofiq tasdiqlansin.

2. O‘zbekiston Respublikasi Oliy va o‘rta maxsus ta’lim vazirligi Mudofaa vazirligi bilan birgalikda:

belgilangan talablar bajarilishining amaldagi monitoringi tizimini, harbiy akademik litseylarga tezkor munosabat bildirish hamda zarur huquqiy, metodik va texnik yordam ko‘rsatish tartibini o‘z ichiga oladigan harbiy akademik litseylar faoliyati samarali boshqarilishini;

harbiy akademik litseylarni O‘zbekiston Respublikasi o‘rta maxsus, kasb-hunar ta’limi tizimida namunaviy ta’lim muassasalari darajasigacha yetkazgan holda ularni rivojlantirish va takomillashtirishni;

ushbu qaror talablarini hisobga olgan holda vazirliklar va idoralarning amaldagi normativ-huquqiy hujjatlariga tegishli o‘zgartirish va qo‘shimchalar kiritilishini ta’minlasin.

3. O‘zbekiston Respublikasi Mudofaa vazirligi, Ichki ishlar vazirligi, Davlat bojxona qo‘mitasi, Milliy xavfsizlik xizmati tasarrufidagi oliy ta’lim muassasalariga o‘qishga kirishda harbiy akademik litseylarning bitiruvchilari uchun test sinovlari topshirishda ular to‘plagan jami ballarga ballarning to‘planishi mumkin bo‘lgan eng ko‘p miqdorining 10 foizi miqdorida qo‘shimcha ballar tarzida imtiyozli shartlar belgilansin.

4. O‘zbekiston Respublikasi Mehnat va aholini ijtimoiy muhofaza qilish vazirligi Oliy va o‘rta maxsus ta’lim vazirligi, Mudofaa vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda harbiy akademik litseylarning oliy ta’lim muassasalariga o‘qishga kirmagan bitiruvchilarini ish bilan ta’minlasin, shu jumladan bunda zaxiraga qo‘yiladigan (kvotalangan) ish o‘rinlaridan foydalansin.

5. O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi Mudofaa vazirligi va O‘zbekiston Respublikasi Vazirlar Mahkamasi huzuridagi Davlat test markazi bilan birgalikda 2010-yil 1-martgacha Harbiy akademik litseylarga o‘quvchilar qabul qilish tartibi va qoidalari to‘g‘risidagi Nizomni ishlab chiqsin va belgilangan tartibda tasdiqlasin.

6. O‘zbekiston Respublikasi Mudofaa vazirligi har yili harbiy akademik litseylarning ofitser va serjantlar tarkiblari harbiy xizmatchilarini ushbu maqsadlar uchun Davlat budjeti parametrlarida nazarda tutiladigan mablag‘lar doirasida ta’minotning barcha turlari, shu jumladan pul ta’minoti bilan ta’minlasin.

8. Vazirlar Mahkamasining “Harbiy akademik litseylar faoliyatini takomillashtirish chora-tadbirlari to‘g‘risida” 2007-yil 23-oktabrdagi 223-son qarori (O‘zbekiston Respublikasi QT, 2007-y., 10-son, 59-modda) o‘z kuchini yo‘qotgan deb hisoblansin.

9. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.N.Aripov zimmasiga yuklansin.

1. Ushbu Nizom harbiy-kasbiy yo‘nalishdagi akademik litsey (keyingi o‘rinlarda harbiy akademik litsey deb yuritiladi) maqomini va faoliyatining tashkiliy asoslarini belgilaydi.

Nizom, shuningdek, o‘quvchilarni qabul qilish maqsadlari, vazifalari, funksiyalari, tartibini, harbiy akademik litseylar rahbarlarining javobgarligini belgilaydi.

2. Harbiy akademik litsey davlat ta’lim muassasasi hisoblanadi va o‘z faoliyatini O‘zbekiston Respublikasi Konstitutsiyasiga, “Ta’lim to‘g‘risida”gi O‘zbekiston Respublikasi Qonuniga, ushbu Nizomga, boshqa normativ-huquqiy hujjatlarga va o‘z ustaviga muvofiq amalga oshiradi.

3. Harbiy akademik litseyda o‘quv-tarbiya jarayoni o‘quvchilarni harbiy-kasbiy yo‘naltirishni hamda ularning keyinchalik oliy harbiy va oliy ta’lim muassasalarida o‘qishini nazarda tutadigan Davlat ta’lim standartlari, o‘quv rejalari va dasturlari talablariga qat’iy muvofiq ravishda amalga oshiriladi.

4. O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi harbiy akademik litseyga umumiy rahbarlik qiladi, uning faoliyatini moliyalashtiradi, uni moddiy-texnik jihatdan ta’minlaydi.

5. Harbiy akademik litsey yuridik shaxs hisoblanadi hamda bank muassasalarida hisob-kitob raqamlariga va boshqa hisob raqamlariga, o‘z nomi yozilgan belgilangan namunadagi muhrga, shtampga, blankalarga ega bo‘ladi.

6. O‘quvchilarni chuqurlashtirilgan kasbiy, tabaqalashtirilgan, kasbga yo‘naltirilgan holda o‘qitish, ularning intellektual rivojlanishini, harbiy-vatanparvarlik tarbiyasini ta’minlash harbiy akademik litsey faoliyatining maqsadi hisoblanadi.

7. Quyidagilar harbiy akademik litseyning vazifalari hisoblanadi:

o‘quvchilarni o‘rta maxsus, kasb-hunar ta’limi davlat ta’lim standarti talablariga muvofiq sifatli o‘qitishni tashkil etish;

Vatanga sadoqat, yuksak fuqarolik hamda demokratiya, mustaqillik g‘oyalariga, o‘z xalqining ma’naviy va tarixiy qadriyatlariga sodiqlik ruhida tarbiyalangan yoshlarni tayyorlash;

o‘quvchilarga qonunchilikni to‘g‘ri tushunishni va ularga ongli rioya qilishni ta’minlaydigan yuksak madaniyatni, ko‘nikmalarni, faol ijtimoiy-fuqarolik xulq-atvorni singdirish;

litsey ixtisosiga muvofiq o‘quvchilarning tegishli mutaxassisliklar bo‘yicha oliy, shu jumladan oliy harbiy ta’lim muassasalarida o‘qishni davom ettirishlari uchun zarur va yetarli bo‘lgan chuqurlashtirilgan nazariy va kasbiy tayyorgarligini ta’minlash;

o‘quvchilarda jismoniy chidamlilik, kuch, chaqqonlik va tezkorlikni rivojlantirish.

8. Harbiy akademik litseyda o‘quv jarayoni Davlat ta’lim standartlariga muvofiq, O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi tomonidan tasdiqlangan o‘quv rejalari va o‘quv dasturlariga muvofiq, Mudofaa vazirligi bilan kelishilgan holda tashkil etiladi.

9. Harbiy akademik litseyda o‘qish davlat va rus tillarida olib boriladi.

10. O‘quv rejasi, o‘quv jarayoni jadvali, auditoriya va auditoriyadan tashqari o‘quv-tarbiyaviy ishlar, shuningdek o‘quv-tarbiya jarayonini tashkil etishning boshqa masalalari O‘rta maxsus, kasb-hunar ta’limi davlat ta’lim standartlari talablaridan kelib chiqib, harbiy akademik litseyning o‘ziga xosligi hisobga olingan holda belgilanadi.

11. O‘quvchilarni tarbiyalash va o‘qitish jarayonida auditoriya va auditoriyadan tashqari mashg‘ulotlar o‘tkazishning turli zamonaviy shakllari va usullaridan foydalaniladi.

12. O‘qitish, mehnat, dam olish va turli tadbirlarni qo‘shib olib borishning tibbiy-pedagogik asoslanishini ta’minlaydigan kun tartibi o‘quvchilarning harbiy akademik litseyda kecha-kunduz bo‘lishini hisobga olgan holda tuziladi va Pedagogik kengashning qarori bilan tasdiqlanadi.

13. Harbiy akademik litseyning mansabdor shaxslari va o‘quvchilarining vazifalari va funksional majburiyatlari harbiy akademik litseyning ustavida belgilanadi.

14. O‘qish tamom bo‘lgandan keyin har bir kursda reyting nazorati va attestatsiya natijalari bo‘yicha harbiy akademik litsey o‘quvchilarini navbatdagi kursga o‘tkazish to‘g‘risida qaror qabul qilinadi. O‘quvchilarning kursdan kursga o‘tishi harbiy akademik litsey direktorining buyrug‘i bilan amalga oshiriladi.

18. Muntazam ravishda fanlarni o‘zlashtirmaslik, o‘qishni xohlamaslik, ichki tartibni qo‘pol ravishda va bir necha marta buzish, kasallikka chalingan holatlarida yoki tegishli hujjatlar bilan tasdiqlangan boshqa holatlarda o‘quvchilarni harbiy akademik litseydan o‘quvchilar tarkibidan chiqarish va boshqa ta’lim muassasasiga o‘tkazish tartibi O‘zbekiston Respublikasi Vazirlar Mahkamasi tomonidan belgilanadi.

19. Harbiy akademik litseyga o‘qishga qabul qilinadigan shaxslar o‘quvchilar deb ataladi, ularga belgilangan namunadagi o‘quvchi bileti va o‘zlashtirish daftarchasi beriladi.

20. O‘quvchilarning huquq va majburiyatlari O‘zbekiston Respublikasi Mudofaa vazirligi bilan kelishilgan holda Oliy va o‘rta maxsus ta’lim vazirligi tomonidan tasdiqlanadigan harbiy akademik litsey ustavida belgilanadi.

21. Harbiy akademik litseyda o‘qish muddati uch yildan iborat bo‘ladi. Harbiy akademik litsey o‘quvchilarining soni ko‘pi bilan 450 kishini tashkil qilishi kerak.

22. Harbiy akademik litseyning tashkiliy tuzilmasiga muvofiq o‘qitish kurslari bo‘yicha akademik guruhlar vzvodlarga birlashadi. Bunda vzvodlardagi o‘quvchilar soni 150 kishidan, akademik guruhlardagi o‘quvchilar soni esa — 30 kishidan ortiq bo‘lmasligi kerak.

23. Harbiy akademik litseyni tamomlagandan keyin bitiruvchilarga belgilangan namunadagi diplom va ko‘krak nishoni beriladi. Harbiy akademik litseyni tamomlaganlik to‘g‘risidagi ko‘krak nishoni ko‘krakning (kitel, kostyumning) o‘ng tomoniga taqiladi.

24. Rahbar va pedagog kadrlar tarkibidagi lavozimlarni, shuningdek kontrakt bo‘yicha harbiy xizmatchilar safini to‘ldirish qonun hujjatlarida belgilangan tartibda amalga oshiriladi.

25. Tegishli ma’lumotga, kasbiy tayyorgarlikka va yuksak axloqiy sifatlarga ega bo‘lgan shaxslar harbiy akademik litseyda pedagogik faoliyat bilan shug‘ullanish huquqiga egadirlar.

26. Ish jarayonida vakolatli organlar tomonidan harbiy akademik litseyning o‘qituvchilar tarkibi attestatsiyadan o‘tkaziladi.

27. Ta’lim muassasasining rahbariyati qonun hujjatlarida belgilangan o‘quvchilarning o‘qish, mehnat va dam olish sharoitlariga rioya etilishi yuzasidan javob beradi.

28. Harbiy akademik litseyga O‘zbekiston Respublikasi Mudofaa vaziri bilan kelishilgan holda Oliy va o‘rta maxsus ta’lim vaziri tomonidan qonun hujjatlarida belgilangan tartibda lavozimga tayinlanadigan va lavozimdan ozod qilinadigan direktor rahbarlik qiladi.

29. Direktor harbiy akademik litsey faoliyatiga rahbarlik qiladi, o‘quvchilarning sifatli o‘qitilishi va tarbiyalanishi, o‘quv rejalari va dasturlarining bajarilishi, harbiy akademik litseyning o‘quv-metodik va moliya-xo‘jalik faoliyatining zarur darajada amalga oshirilishi yuzasidan javob beradi. Direktor belgilangan xodimlar soni va mehnatga haq to‘lash fondi doirasida shtatlar jadvalini, pedagog xodimlarning tarifikatsiya bo‘yicha ro‘yxatlarini tasdiqlaydi, xodimlar va o‘qituvchilarni ishga qabul qiladi va ishdan bo‘shatadi, qonun hujjatlarida belgilangan tartibda harbiy akademik litsey bo‘yicha buyruqlar chiqaradi.

30. Harbiy akademik litsey direktorining harbiy-jismoniy tayyorgarlik bo‘yicha o‘rinbosari, o‘quv vzvodlari va akademik guruhlar komandirlari O‘zbekiston Respublikasi Oliy va o‘rta maxsus ta’lim vaziri bilan kelishilgan holda ofitsyerlar va serjantlar tarkibidagi muayyan tajribaga ega bo‘lgan, o‘quvchilarda vatanparvarlik, Vatanga muhabbat va sadoqat tuyg‘ulari, yuksak ma’naviy-axloqiy sifatlar va faol hayotiy pozitsiya shakllantirilishini ta’minlashga qodir bo‘lgan, yuqori malakali harbiy xizmatchilar orasidan O‘zbekiston Respublikasi Mudofaa vaziri tomonidan tayinlanadi.

31. Harbiy akademik litseylar direktorlarining o‘quv, ma’naviy-ma’rifiy va ma’muriy-xo‘jalik ishlari bo‘yicha o‘rinbosarlari O‘rta maxsus, kasb-hunar ta’limi markazi bilan kelishilgan holda harbiy akademik litsey direktori tomonidan tayinlanadi.

32. Harbiy akademik litseyda ta’lim muassasasi direktori huzurida o‘quv-tarbiyaviy jarayonni tashkil etishga va takomillashtirishga ko‘maklashadigan kollegial organ hisoblanadigan Pedagogik kengash tashkil etiladi.

Pedagogik kengashning vazifalari va funksiyalari harbiy akademik litsey ustavida belgilanadi.

33. Harbiy akademik litseyning direktori va direktor o‘rinbosarlari, shuningdek boshqa mansabdor shaxslari malaka talablarida, mehnat shartnomasi (kontrakti)da va harbiy akademik litsey ustavida nazarda tutilgan o‘z funksional vazifalarining bajarilishi yuzasidan javob beradilar.

34. Quyidagilar O‘zbekiston Respublikasi Oliy va o‘rta maxsus ta’lim vazirligining vazifalari va funksiyalari hisoblanadi:

O‘zbekiston Respublikasi Mudofaa vazirligi bilan kelishilgan holda, O‘rta maxsus, kasb-hunar ta’limi davlat ta’lim standartlariga muvofiq harbiy akademik litseylarning o‘quv rejalari va o‘quv dasturlarini ishlab chiqish va tasdiqlash;

sohaga oid oliy ta’lim muassasalari bazasida va malaka oshirish muassasalarida o‘qituvchilar malakasini oshirishni hamda harbiy xizmatchilar malakasini psixologik-pedagogik jihatdan oshirishni tashkil etish;

o‘quv-tarbiya jarayonini tashkil etish, ilg‘or pedagogik va axborot texnologiyalarini ta’lim dasturlariga hamda o‘quv jarayoniga joriy etish bo‘yicha ilmiy-metodik yordam ko‘rsatish;

o‘quv, o‘quv-metodik adabiyotlar va ko‘rgazmali qo‘llanmalar ishlab chiqish, nashr etishni hamda harbiy akademik litseylarni ular bilan ta’minlashni tashkil etish;

o‘quvchilarni harbiy-vatanparvarlik, huquqiy, ma’naviy-axloqiy va estetik tarbiyalashni ta’minlaydigan kompleks ma’naviy-ma’rifiy va tarbiyaviy ishlarni tashkil etish va amalga oshirish;

O‘zbekiston Respublikasi Mudofaa vazirligi bilan birgalikda o‘quvchilarni aniq maqsadni ko‘zlagan holda kasbga yo‘naltirish va oliy o‘quv yurtiga kirishgacha tayyorlash, harbiy akademik litseydagi o‘qitish yo‘nalishlariga muvofiq kiritilgan maxsus fanlar bo‘yicha kasbiy mahorat va ko‘nikmalarni shakllantirish;

harbiy akademik litseylarga birkitilgan oliy ta’lim muassasalari bilan o‘zaro samarali hamkorlik qilishni tashkil etish va nazorat qilish, birkitilgan oliy ta’lim muassasalarining harbiy akademik litseylar o‘quvchilarini oliy harbiy va oliy ta’lim muassasalariga sifatli tayyorlashdagi roli va mas’uliyatini oshirish, shuningdek bevosita ishtirokini ta’minlash;

harbiy akademik litseylarning o‘quv-moddiy bazasini o‘qitishning zamonaviy texnik vositalari, kompyuter texnikasi va tegishli o‘quv-laboratoriya asbob-uskunalari bilan jihozlash;

harbiy akademik litseylarning ma’muriy, moliyaviy va xo‘jalik faoliyatini, shuningdek moddiy-texnik ta’minotini belgilangan tartibda muvofiqlashtirish va nazorat qilish;

harbiy-ashyoviy mulkni xarid qilish yuzasidan tender (tanlov) savdolari o‘tkazish yakunlariga ko‘ra O‘zbekiston Respublikasi Mudofaa vazirligi tomonidan belgilangan yetkazib beruvchilardan, ushbu maqsad uchun budjet parametrlarida nazarda tutiladigan mablag‘lar doirasida, harbiy akademik litseylar o‘quvchilari uchun belgilangan normalar bo‘yicha kiyim-bosh va poyabzal komplektlarini markazlashtirilgan tartibda sotib olishni amalga oshirish;

davlat yakuniy attestatsiyasini tashkil etish va harbiy akademik litseylar bitiruvchilariga diplomlar berish.

35. Quyidagilar O‘zbekiston Respublikasi Mudofaa vazirligining vazifalari va funksiyalari hisoblanadi:

o‘quv-tarbiya jarayonini sifatli tashkil etishda, harbiy mavzudagi ilg‘or pedagogik va axborot texnologiyalarini ta’lim dasturlariga va o‘quv jarayoniga joriy etishda zarur yordam ko‘rsatish;

O‘zbekiston Respublikasi yoshlarini harbiy xizmatga chaqirishgacha dastlabki tayyorlash dasturiga muvofiq harbiy akademik litseylarni harbiy-muhandislik asbob-uskunalari va kimyoviy muhofaza vositalari, harbiy mavzudagi o‘quv va ko‘rgazmali qo‘llanmalar bilan ta’minlashda belgilangan tartibda yordam ko‘rsatish;

harbiy akademik litseylar o‘quvchilari bilan O‘zbekiston Respublikasi Mudofaa vazirligining oliy harbiy ta’lim muassasalari va serjantlar tayyorlash maktablari bazalarida taktik, o‘q otish, maxsus tayyorgarlik bo‘yicha (shu jumladan dala sharoitlarida ham) amaliy mashg‘ulotlarni tashkil etish va o‘tkazishga ko‘maklashish;

harbiy akademik litseylar o‘quvchilarini kasbga samarali yo‘naltirishni ta’minlash maqsadida ularning O‘zbekiston Respublikasi Mudofaa vazirligining oliy harbiy ta’lim muassasalariga, serjantlar tayyorlash maktablariga, harbiy qismlar va muassasalarga borishlarini tashkil etish;

harbiy akademik litseylarda harbiy xizmatni o‘tayotgan ofitser va serjantlar tarkibidagi harbiy xizmatchilarni oziq-ovqatlar va kiyim-boshlarning barcha turlari bilan ta’minlash;

harbiy akademik litsey direktorining bo‘sh lavozimiga nomzodlar tanlashda belgilangan tartibda qatnashish;

harbiy akademik litseylar harbiy xizmatchilarining O‘zbekiston Respublikasi Mudofaa vazirligi oliy harbiy ta’lim muassasalarining malaka oshirish fakultetlarida va Metodik markazida malaka oshirishini tashkil etish va o‘tkazish;

O‘zbekiston Respublikasi Oliy va o‘rta maxsus ta’lim vazirligi bilan birgalikda yoshlarni harbiy xizmatga chaqirishgacha dastlabki tayyorlash dasturini takomillashtirish;

O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi buyurtmasiga binoan, harbiy ashyoviy mulkni xarid qilish yuzasidan tender (tanlov) savdolari o‘tkazishda harbiy akademik litseylar o‘quvchilari uchun kiyim-bosh va poyabzal komplektlariga bo‘lgan ehtiyojni kiritish;

o‘qishga qabul qilish komissiyalari va harbiy akademik litseylar bitiruvchilarining davlat yakuniy attestatsiyasini o‘tkazish komissiyalari ishida qatnashish.

36. Harbiy akademik litseylarga birkitilgan oliy harbiy va oliy ta’lim muassasalari o‘quv-tarbiya jarayonini tashkil etishda, ilg‘or pedagogik va axborot texnologiyalarini ta’lim dasturlariga va o‘quv jarayoniga joriy etishda zarur ilmiy-metodik yordam ko‘rsatadilar, shuningdek o‘quvchi yoshlarni oliy o‘quv yurtiga kirishdan oldin kasbga yo‘naltirishni, sifatli tanlashni va pedagog kadrlar malakasini oshirishning samarali tashkil etilishini ta’minlaydilar.

Harbiy akademik litseylarga birkitilgan oliy ta’lim muassasalari rektorlari ko‘rsatib o‘tilgan vazifalarning bajarilishini nazorat qiladilar.

37. Harbiy akademik litsey faoliyatini moliyalashtirish qonun hujjatlariga muvofiq quyidagilar hisobiga amalga oshiriladi:

Davlat budjetidan ajratiladigan mablag‘lar;

ta’lim xizmatlari ko‘rsatishdan, ilmiy-pedagogik, ishlab chiqarish va ta’lim muassasasining ustavdagi vazifalariga muvofiq bo‘lgan faoliyatning boshqa turlaridan olingan daromadlar;

yuridik va jismoniy shaxslarning ixtiyoriy ehsonlari va maqsadli badallari.

38. Moliyaviy mablag‘lar harbiy akademik litsey tasarrufida bo‘ladi hamda ulardan qonun hujjatlariga va harbiy akademik litseyning ustaviga muvofiq foydalaniladi.

39. Harbiy akademik litseyning moddiy vositalari, binolari, inshootlari va anjomlari O‘rta maxsus, kasb-hunar ta’limi markazi balansida, harbiy akademik litseyning foydalanishida bo‘ladi va ulardan belgilangan maqsadda foydalaniladi.

40. Harbiy akademik litseyning o‘quv-laboratoriyalarini, kabinetlarini va boshqa obyektlarini jihozlash Davlat ta’lim standartlari talablariga muvofiq o‘rta maxsus, kasb-hunar ta’limi jarayonini moddiy-texnik ta’minlashning namunaviy normativlarida belgilanadi.

41. Harbiy akademik litsey o‘quvchilari qonun hujjatlarida belgilangan normalarga muvofiq bepul turar joy, oziq-ovqat va kiyim- bosh bilan ta’minlanadilar.

42. Harbiy akademik litseylarning rahbarlar tarkibiga, o‘qituvchilari va boshqa xodimlariga akademik litseyning tegishli lavozimi uchun belgilangan mehnatga haq to‘lash shart-sharoitlari tatbiq etiladi.

43. Harbiy akademik litseyning ofitser va serjantlar tarkiblari harbiy xizmatchilarining pul ta’minoti O‘zbekiston Respublikasi Qurolli Kuchlari harbiy xizmatchilarining tegishli toifalari uchun nazarda tutilgan xizmatni o‘tash tartibini, ta’minoti bo‘yicha imtiyozlar va normalarni hisobga olgan holda belgilanadi.

44. Harbiy akademik litsey belgilangan tartibda o‘z ishlari natijalarining tezkor buxgalteriya hisobini amalga oshiradi, statistik va buxgalteriya hisobotlarini yuritadi.

Harbiy akademik litseyda xo‘jalik va moliyaviy intizomga rioya etilishini nazorat qilish davlat vakolatli organi tomonidan amalga oshiriladi.