Mamlakatimizda shakar ishlab chiqarish hajmlarini ko‘paytirish, “Xorazm-shakar” davlat korxonasining ishlab chiqarish quvvatlaridan foydalanish samaradorligini oshirish, uni xom ashyo bilan ta’minlashni yaxshilash maqsadida Vazirlar Mahkamasi qaror qiladi:

1. “Oziqovqatsanoat” uyushmasi, O‘zbekiston Respublikasi Qishloq va suv xo‘jaligi vazirligi, Makroiqtisodiyot va statistika vazirligi, Moliya vazirligi hamda Xorazm viloyati hokimligining:

qand lavlagi ekin maydonlarini Xorazm viloyati xo‘jaliklarida 10 ming gektar maydonda jamlash, 2001-yilda qand lavlagi yalpi hosilini 220 ming tonnagacha yetkazish to‘g‘risidagi;

mavsumlar oralig‘idagi davrda “Xorazm-shakar” davlat korxonasida shakar xom ashyosidan 126 ming tonnagacha shakar ishlab chiqarishni tashkil etish to‘g‘risidagi takliflariga rozilik berilsin.

O‘zbekiston Respublikasi Qishloq va suv xo‘jaligi vazirligi, Xorazm viloyati hokimligi qand lavlagi ekinlarini faqat muttasil yuqori qand lavlagi hosili olinayotgan va sug‘orish suvlari bilan kafolatli ta’minlangan xo‘jaliklardagina joylashtirsinlar, qand lavlagi o‘stirish texnologiyasiga rioya etilishi ustidan qat’iy nazoratni ta’minlasinlar. Bazaviy qand miqdori kamida 15,5 foiz bo‘lishi belgilab qo‘yilsin.

2. Quyidagilar:

shakar xom ashyosidan shakar ishlab chiqarishni tashkil etish uchun 2001-2002-yillarda “Amerikas interneshnl Ink” (AQSH) kompaniyasining 1,5 mln AQSH dollari miqdoridagi bevosita investitsiyalarini jalb etgan holda shakar zavodining qisman rekonstruksiya qilinishi;

“Amerikas interneshnl Ink” (AQSH) kompaniyasi loyiha boshlangan vaqtdan boshlab 10 oy mobaynida shakar xom ashyosini qayta ishlaydigan zavodni ishga tushirish majburiyatini o‘z zimmasiga olishi ma’lumot uchun qabul qilinsin.

O‘zbekiston Respublikasi Makroiqtisodiyot va statistika vazirligi ushbu loyihani O‘zbekiston Respublikasining 2001-yilgi investitsiya dasturi aniq manzilli qismining bevosita xorijiy investitsiyalar hisobiga mablag‘ bilan ta’minlanadigan loyihalar bo‘limiga kiritsin.

3. “Oziqovqatsanoat” uyushmasi:

O‘zbekiston Respublikasi Qishloq va suv xo‘jaligi vazirligi, Xorazm viloyati hokimligi bilan birgalikda qand lavlagi ekuvchi xo‘jaliklar bilan 2001-yil hosilidan qand lavlagi xarid qilish yuzasidan kontraktatsiya shartnomalari tuzishni bir oy muddatda tugallasin, ularda qand lavlagi ekuvchi xo‘jaliklarni yetishtirilgan qand lavlagi uchun, qand miqdori va olingan hosilga qarab, tabaqalashtirilgan haq to‘lash tarzida rag‘batlantirish mexanizmlarini nazarda tutsin;

qand lavlagi ekuvchi xo‘jaliklarga shartnomaviy narx bo‘yicha xarid qilinadigan xom ashyo qiymatining 40 foizi miqdorida, xo‘jaliklarning ilgari olingan avans bo‘yicha qarzini hisobga olgan holda, 2 bosqichda avans to‘lasin, shu jumladan avansning 15 foizini 2001-yil 27-martgacha va 25 foizini qand lavlagi ekib bo‘lingandan va nihollar to‘liq undirib olingandan keyin to‘lasin. Berilgan avanslar belgilangan tartibda “O‘zagrosug‘urta” kompaniyasida sug‘urta qilinsin;

O‘zbekiston Respublikasi Qishloq va suv xo‘jaligi vazirligi bilan birgalikda 2001-yilda ekish uchun, tender asosida aniqlangan narx bo‘yicha 40 tonna qand lavlagi urug‘i xarid qilinishini ta’minlasin;

“Amerikas interneshnl Ink” (AQSH) kompaniyasi bilan birgalikda, shakar zavodi qisman rekonstruksiya qilib bo‘lingandan keyin, tender asosida, har yili 126 ming tonna shakar ishlab chiqarish uchun zarur miqdorda shakar xom ashyosi yetkazib berilishini ta’minlasin;

Ukrainaning “Biryuza-4” ilmiy-texnika shirkati bilan 2001-yil mavsumida shakar zavodini ishga tushirishga tayyorlashda qatnashish uchun 10 nafar mutaxassisni jalb etish yuzasidan kontrakt tuzsin.

O‘zbekiston Respublikasi Mehnat va aholini ijtimoiy muhofaza qilish vazirligi taklif etilgan mutaxassislarga mehnat faoliyati huquqiga belgilangan tartibda ruxsatnoma bersin.

5. O‘zbekiston Respublikasi Qishloq va suv xo‘jaligi vazirligi respublika xo‘jaliklarida yetishtirilgan qand lavlagi urug‘ini Qirg‘iziston Respublikasining Kant shahridagi ixtisoslashtirilgan korxonada qayta ishlash, keyinchalik qayta ishlashdan olingan mahsulotlarni belgilangan tartibda O‘zbekiston Respublikasiga olib kelish (qaytarish) masalalarini bir hafta muddatda hal etsin.

6. Quyidagilar bojxona to‘lovlari (bojxona rasmiylashtirilishi uchun yig‘imlardan tashqari) to‘lashdan ozod qilinsin:

“Oziqovqatsanoat” uyushmasi tomonidan import bo‘yicha keltiriladigan 30 tonna qand lavlagi urug‘i;

qayta ishlashdan olingan mahsulotlarni belgilangan tartibda O‘zbekiston Respublikasiga qaytarib keltirgan holda, Qirg‘iziston Respublikasiga qayta ishlashga olib ketiladigan 10 tonna qand lavlagi urug‘i (sof og‘irligi);

shakar ishlab chiqarish uchun zarur bo‘lgan ilovaga muvofiq yordamchi materiallar va ehtiyot qismlar.

7. “O‘zavtotrans” davlat korporatsiyasi va “O‘zbekiston temir yo‘llari” kompaniyasi belgilangan tartibda “Oziqovqatsanoat” uyushmasiga qand lavlagi, shakar xom ashyosi, shakar, melassa va boshqa yordamchi materiallar va asbob-anjomlar tashish uchun avtotransport vositalari, shuningdek kodlar va temir yo‘l vagonlari ajratsinlar.

8. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T. Sultonov zimmasiga yuklansin.