Respublika qishloq tumanlari va shaharlari aholisini sifatli ichimlik suvi bilan taʼminlashni yanada yaxshilash va tabiiy gazdan tejamli foydalanish, mazkur sohalardagi loyihalarni amalga oshirish uchun xalqaro moliya institutlari va donor-mamlakatlarning imtiyozli kreditlarini jalb etish maqsadida:

1. Oʻzbekiston Respublikasi Iqtisodiyot vazirligi “Oʻzkommunxizmat” agentligi, “Oʻzbekneftgaz” MXK, “Oʻzbekenergo” DAK, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, boshqa manfaatdor tuzilmalar bilan birgalikda ishlab chiqilgan 2008 — 2012-yillarga moʻljallangan xalqaro moliya institutlari va donor-mamlakatlarning imtiyozli kreditlarini jalb qilgan holda qishloq tumanlari va shaharlari aholisini sifatli ichimlik suv bilan taʼminlashni yanada yaxshilash va tabiiy gazdan tejamli foydalanish boʻyicha investitsiya loyihalarini amalga oshirishning quyidagilarni oʻz ichiga olgan Dasturi:

xalqaro moliya institutlari va donor-mamlakatlar ishtirokida respublika mintaqalarida ichimlik suv bilan taʼminlashni yaxshilash boʻyicha amalga oshiriladigan loyihalar roʻyxati 1-ilovaga* muvofiq;

xalqaro moliya institutlari va donor-mamlakatlar ishtirokida respublika mintaqalarida ichimlik suv bilan taʼminlashni yaxshilash borasida ishlab chiqilgan loyihalar roʻyxati 2-ilovaga* muvofiq;

xalqaro moliya institutlari va donor-mamlakatlar ishtirokida respublika mintaqalarida ichimlik suv bilan taʼminlashni yaxshilashga yoʻnaltirilgan yangi loyihalar roʻyxati 3-ilovaga* muvofiq;

xalqaro moliya institutlari va donor-mamlakatlar, shuningdek toʻgʻridan-toʻgʻri xorijiy investitsiyalar ishtirokida tabiiy gazdan tejamli foydalanish borasida ishlab chiqilgan loyihalar roʻyxati 4-ilovaga* muvofiq;

xalqaro moliya institutlari va donor-mamlakatlar, shuningdek toʻgʻridan-toʻgʻri xorijiy investitsiyalar ishtirokida tabiiy gazdan tejamli foydalanishga yoʻnaltirilgan yangi loyihalar roʻyxati 5-ilovaga* muvofiq maʼqullansin.

Xalqaro moliya institutlari va donor-mamlakatlar ishtirokidagi loyihalarni 1, 2 va 4-ilovalarga muvofiq amalga oshirish uchun belgilangan tartibda javobgarlik yuklatilgan “Oʻzkommunxizmat” agentligi, “Oʻztransgaz” AK, “Oʻzbekenergo” DAK, boshqa vazirliklar, idoralar va mahalliy davlat hokimiyati organlari Oʻzbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi bilan birgalikda jalb etiladigan mablagʻlar oʻz vaqtida oʻzlashtirilishini, loyihalarda nazarda tutilgan quvvatlar va obyektlar ishga tushirilishini taʼminlasin.

2. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Iqtisodiyot vazirligi, manfaatdor vazirliklar va idoralar, shuningdek Oʻzbekiston Respublikasidan tegishli xalqaro moliya institutlarini Boshqaruvchilar bilan birgalikda 3 va 5-ilovalarga kiritilgan loyihalar ishlab chiqilishini hamda ularni amalga oshirish uchun xalqaro moliya institutlari va donor-mamlakatlar mablagʻlari jalb etilishini taʼminlasin.

3. Mazkur Qaror bilan tasdiqlangan Dasturga kiritilgan loyihalarni amalga oshirish boʻyicha belgilangan tartibda ijro etuvchi agentliklar etib tayinlangan vazirliklar, idoralar, xoʻjalik birlashmalari va mahalliy davlat hokimiyati organlari rahbarlari zimmasiga quyidagilar yuzasidan shaxsiy javobgarlik yuklansin:

texnik-iqtisodiy, shuningdek muhandislik-loyiha hujjatlarining oʻz vaqtida va sifatli ishlab chiqilishi hamda tasdiqlanishi;

Oʻzbekiston Respublikasi Moliya vazirligi bilan kelishilgan holda har bir loyiha boʻyicha xalqaro moliya institutlari va donor-mamlakatlar kredit mablagʻlarini jamlash va qaytarish tartibini belgilash;

mahalliy davlat hokimiyati organlari bilan birgalikda Dastur loyihalarini moliyalash manbalari aniqlangach, xalqaro moliya institutlari va donor-mamlakatlar mablagʻlari jalb etilishini hisobga olgan holda hamda belgilangan tartibda texnik-iqtisodiy asosi tasdiqlangandan soʻng ushbu loyihalarni soʻzsiz amalga oshirish.

4. Oʻzbekiston Respublikasi Iqtisodiyot vazirligi va Moliya vazirligi 2009 — 2012-yillardagi Investitsiya dasturini shakllantirishda mazkur Dasturga kiritilgan loyihalarni moliyalashda Oʻzbekiston Respublikasi ulushini qoplash uchun markazlashtirilgan kapital qoʻyilmalarning har yilgi umumiy limiti doirasidagi mablagʻlarni nazarda tutsin.

5. Loyihalarni amalga oshirish davrida xalqaro moliya institutlari va donor-mamlakatlarning kredit mablagʻlari, shuningdek toʻgʻridan-toʻgʻri xorijiy investitsiyalar hisobidan Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha import qilinadigan (Oʻzbekiston Respublikasida ishlab chiqarilmaydigan) uskunalar va materiallar bojxona toʻlovlari (bojxona rasmiylashtiruvi yigʻimlaridan tashqari) toʻlashdan ozod etilsin.

6. Mazkur Qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.