Xorijiy avtotransport vositalarining O‘zbekiston Respublikasi hududiga kirishi, chiqishi va tranzit bo‘yicha bo‘lishini nazorat qilishni yanada takomillashtirish, narkotrafika va kontrabandaga qarshi kurashni kuchaytirish maqsadida Vazirlar Mahkamasi qaror qiladi:

1. 2009-yil 1-yanvardan boshlab O‘zbekiston Respublikasining Tojikiston Respublikasi bilan Davlat chegarasini kesib o‘tadigan xorijiy yuk avtotransport vositalari va avtobuslarning O‘zbekiston Respublikasi hududiga kirishi va tranzit o‘tishi uchun 1-ilovaga muvofiq qo‘shimcha yig‘im stavkalari belgilansin.

2. Belgilansinki, kirganligi va tranzit o‘tishi uchun har bir xorijiy avtotransport vositasidan olinadigan qo‘shimcha yig‘imni to‘lash O‘zbekiston Respublikasining Tojikiston Respublikasi bilan Davlat chegarasi orqali o‘tkazish punktlarida milliy valyuta “so‘m”da naqd pulsiz shaklda yoki tijorat banklari tomonidan bevosita bojxona postlarida naqd pul shaklida amalga oshiriladi, olingan mablag‘lar O‘zbekiston Respublikasi tijorat banklari bo‘limlari orqali O‘zbekiston Respublikasi Vazirlar Mahkamasi huzuridagi Respublika yo‘l jamg‘armasi hisob raqamiga O‘zbekiston Respublikasi Markaziy bankining to‘lov kunidagi kursi bo‘yicha o‘tkaziladi.

3. O‘zbekiston Respublikasi Milliy xavfsizlik xizmatining Davlat chegaralarini himoya qiluvchi qo‘mitasi, Davlat bojxona qo‘mitasi va Ichki ishlar vazirligi:

xorijiy avtotransport vositalarining “Oybek” (Toshkent viloyati) va “Andarxon” (Farg‘ona viloyati) o‘tkazish punktlari orqali kirishi va chiqishi, shuningdek O‘zbekiston Respublikasi hududi bo‘ylab tranzit o‘tishi ustidan nazoratni kuchaytirsinlar;

“Oybek” va “Andarxon” o‘tkazish punktlarida chegara va bojxona postlarining shtatdagi xodimlari sonini tegishli ravishda O‘zbekiston Respublikasi Milliy xavfsizlik xizmatining Davlat chegaralarini himoya qiluvchi qo‘mitasi va Davlat bojxona qo‘mitasi xodimlarining umumiy belgilangan soni doirasida ko‘paytirsinlar;

“Andarxon” bojxona postini zarur texnologiya asbob-uskunalari va texnik nazorat vositalari bilan jihozlashni ta’minlasinlar.

4. O‘zbekiston Respublikasi Davlat bojxona qo‘mitasi Tashqi iqtisodiy aloqalar, investitsiyalar va savdo vazirligi, O‘zbekiston Respublikasi Vazirlar Mahkamasi huzuridagi Narkotik moddalarni nazorat qilish milliy axborot-tahlil markazi bilan birgalikda jalb etiladigan grant mablag‘lari hisobiga “Oybek” va “Andarxon” bojxona postlari uchun skanirlash qurilmalari sotib olish masalasini ishlab chiqsin.

6. Vazirlar Mahkamasining “Tojikiston Respublikasi yuk transport vositalari va avtobuslarining O‘zbekiston Respublikasi bojxona hududi orqali o‘tganligi uchun yig‘imlarni birxillashtirish to‘g‘risida” 2002-yil 8-yanvardagi 11-son qarori 1-bandining uchinchi xatboshi (O‘zbekiston Respublikasi QT, 2002-y., 1-son, 3-modda) quyidagi tahrirda bayon qilinsin:

“Tojikiston Respublikasining yuk avtotransport vositasi va avtobuslari O‘zbekiston Respublikasi hududida 3 sutkadan ortiq bo‘lganda har bir kun uchun — 70 AQSh dollari”.

7. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari N.M. Xanov zimmasiga yuklansin.

1. Tojikiston Respublikasining avtotransport vositalari va avtobuslari uchun — 180 AQSh dollari.

2. Turkmanistonning yuk avtotransport vositalari uchun:

a) quyidagilar uchun:

10 tonnagacha yuk ko‘taradigan yuk avtotransport vositalari uchun — 35 AQSh dollari;

10 tonna va 10 tonnadan ortiq yuk ko‘taradigan yuk avtotransport vositalari uchun — 55 AQSh dollari.

b) o‘rindiqlar soni:

12 ta o‘rindiqdan kam bo‘lgan avtobuslar uchun — 35 AQSh dollari;

12 ta o‘rindiqdan ortiq bo‘lgan avtobuslar uchun — 55 AQSh dollari.

3. Boshqa xorijiy davlatlarning yuk avtotransport vositalari va avtobuslari uchun — 265 AQSh dollari*.