Import oʻrnini bosadigan va raqobatbardoshli zamonaviy mahsulotlar ishlab chiqarishni koʻpaytirish, tarmoq ichida va tarmoqlararo sanoat kooperatsiyasini mustahkamlash, aholi bandligini oʻstirish, shuningdek oʻtkazilgan Respublika sanoat yarmarkasi va Kooperatsiya birjasi yakunlarini hisobga olgan holda:

1. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Moliya vazirligi, Savdo-sanoat palatasi tomonidan respublika kompaniyalari, uyushmalari va korxonalari bilan birgalikda ishlab chiqilgan 2008—2010-yillarda sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturi maʼqullansin. Dastur:

2008—2010-yillarda sanoat mahsulotlarining asosiy turlarini ishlab chiqarish hajmi va mahalliylashtirish darajasining 1-ilovaga* muvofiq maqsadli parametrlarini;

2008—2010-yillarda butlovchi uzellar va detallar ishlab chiqarishni mahalliylashtirish loyihalarining 2 va 2a-ilovalarga* muvofiq roʻyxatini;

2008—2010-yillarda tayyor mahsulotlar, materiallar va xomashyo turlarini mahalliylashtirish loyihalarining 3 va 3a-ilovalarga* muvofiq roʻyxatini;

sport inventarlari va oʻquv anjomlari ishlab chiqarishni mahalliylashtirish 2008-yilda tugallanadigan loyihalarining 4-ilovaga* muvofiq roʻyxatini;

mamlakatimiz ishlab chiqaruvchilari tomonidan oʻzlashtirishga tavsiya etilayotgan tayyor mahsulotlar, materiallar va butlovchi buyumlarning 5-ilovaga* muvofiq roʻyxatini oʻz ichiga oladi.

2. 2 va 3-ilovalarga kiritilgan korxonalar 2011-yil 1-yanvargacha:

chetdan keltiriladigan texnologik asbob-uskunalar va ular uchun ehtiyot qismlar, shuningdek mahalliylashtiriladigan mahsulotlar ishlab chiqarishda texnologik jarayonda foydalaniladigan, respublikada ishlab chiqarilmaydigan komponentlar uchun bojxona toʻlovlari (bojxonada rasmiylashtirish yigʻimlaridan tashqari);

mahalliylashtirish loyihalari boʻyicha ishlab chiqarilgan mahsulotlar boʻyicha foyda soligʻi, yagona soliq toʻlovi (soliq solishning soddalashtirilgan tizimini qoʻllaydigan subyektlar uchun);

mahalliylashtiriladigan mahsulotlar ishlab chiqarish uchun foydalaniladigan asosiy ishlab chiqarish fondlari boʻyicha mulk soligʻi toʻlashdan ozod qilinsin.

Bunda 2a, 3a va 4-ilovalarga kiritilgan korxonalar uchun ushbu bandda nazarda tutilgan imtiyozlar 2009-yil 1-yanvargacha beriladi.

3. Belgilab qoʻyilsinki, ushbu qarorning 2-bandida nazarda tutilgan imtiyozlar berilishi munosabati bilan boʻshab qoladigan mablagʻlar yangi ishlab chiqarishlarni tashkil etishga, shuningdek faoliyat koʻrsatayotgan ishlab chiqarishlarni kengaytirishga, rekonstruksiya qilishga, modernizatsiyalashga, texnik va texnologik jihatdan qayta jihozlashga, mahalliylashtiriladigan mahsulotlar ishlab chiqarish uchun zarur boʻlgan xomashyo va materiallar sotib olishga, Mahalliylashtirish dasturini amalga oshirishga jalb qilingan korxonalarning muhandis-texnik xodimlarini ragʻbatlantirishga yoʻnaltiriladi.

4. Oʻzbekiston Respublikasi Moliya vazirligi, Iqtisodiyot vazirligi, Tashqi iqtisodiy aloqalar, investitsiyalar va savdo vazirligi Adliya vazirligi, Davlat bojxona qoʻmitasi, Davlat soliq qoʻmitasi bilan birgalikda bir oy muddatda Mahalliylashtirish dasturida qatnashuvchi korxonalarga berilayotgan imtiyozlarini qoʻllashning yangilangan tartibini tasdiqlasinlar, unda korxonalarning loyihalar parametrlarini bajarish boʻyicha aniq majburiyatlari va javobgarligini, shu jumladan ularga belgilangan parametrlarni, birinchi navbatda, mahalliylashtirish darajasini asossiz ravishda bajarmaganlik uchun moliyaviy sanksiyalar belgilashni nazarda tutsinlar.

5. Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturining amalga oshirilishini taʼminlash boʻyicha Maxsus komissiya tarkibi 6-ilovaga* muvofiq tasdiqlansin, unga, mahalliylashtirishning belgilangan darajasini pasaytirishni istisno qilgan holda, Mahalliylashtirish dasturi loyihalari parametrlariga tuzatishlar kiritish huquqi berilsin.

6. Vazirlar Mahkamasiga Maxsus komissiyaning takliflari boʻyicha 2 va 3-ilovalarga kiritilgan ishlab chiqarishni mahalliylashtirish parametrlari va roʻyxatiga, shuningdek 5-ilovaga kiritilgan tayyor mahsulotlar, materiallar va butlovchi buyumlar roʻyxatiga oʻzgartirishlar kiritishga ruxsat berilsin. Bunda 2 va 3-ilovalarga birinchi navbatda 5-ilovada aks ettirilgan, shuningdek Respublika sanoat yarmarkasi va Kooperatsiya birjasini oʻtkazish davomida aniqlangan talabdan kelib chiqib mamlakatimiz ishlab chiqaruvchilari tomonidan ishlab chiqarish nazarda tutilayotgan tayyor mahsulotlar, materiallar va butlovchi buyumlarni ishlab chiqarishni oʻzlashtirishga yoʻnaltirilgan loyihalar kiritiladi.

7. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi hamda Savdo-sanoat palatasi loyihalarni tanlash, kiritish va chiqarib tashlashning ochiq-oshkora mexanizmi va mezonlarini, xoʻjalik yurituvchi subyektlarning buyurtmanomalari vakolatli organlar va Maxsus komissiya tomonidan koʻrib chiqilishining aniq muddatlarini va Mahalliylashtirish dasturiga kiritilayotgan oʻzgartirishlar toʻgʻrisida Vazirlar Mahkamasining qarorlari qabul qilinishini nazarda tutadigan Sanoat kooperatsiyasi asosida tayyor mahsulotlar, butlovchi buyumlar va materiallar ishlab chiqarishni mahalliylashtirish dasturiga tuzatishlar kiritish tartibi toʻgʻrisidagi nizomni bir oy muddatda qayta ishlab chiqsinlar va tasdiqlash uchun Vazirlar Mahkamasiga kiritsinlar.

8. Idoralararo bojxona-tarif kengashi respublikada ishlab chiqarilmaydigan xomashyo va materiallarga, shuningdek mamlakatimiz ishlab chiqaruvchilari uchun keng raqobat muhiti va qulay shart-sharoitlar yaratilishi zarurligini nazarga tutgan holda Mahalliylashtirish dasturi doirasida seriyali ishlab chiqarish oʻzlashtirilgan mahsulotlarga import bojxona toʻlovlarini maqbullashtirish boʻyicha takliflarni muntazam ravishda Oʻzbekiston Respublikasi Vazirlar Mahkamasiga kiritsin.

9. Oʻzbekiston Respublikasi Iqtisodiyot vazirligi Tashqi iqtisodiy aloqalar, investitsiyalar va savdo vazirligi, Davlat statistika qoʻmitasi va Davlat bojxona qoʻmitasi bilan birgalikda Mahalliylashtirish dasturiga kiritilgan loyihalarni amalga oshirishning borishi ustidan tizimli monitoring oʻrnatsin va har oyda Vazirlar Mahkamasiga axborot bersin.

10. Oʻzbekiston Respublikasi Iqtisodiyot vazirligi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi, Oʻzbekiston Milliy axborot agentligi va Oʻzbekiston milliy teleradiokompaniyasi:

sanoat kooperatsiyasi aloqalarini chuqurlashtirish hamda mahalliy xomashyoni qayta ishlashga va zamonaviy texnologiyalarni jalb etishga asoslangan mahsulotlarni ishlab chiqarishni mahalliylashtirishni kengaytirish tadbirlari ommaviy axborot vositalarida keng yoritilishini;

mamlakatimiz ishlab chiqaruvchilari tomonidan oʻzlashtirilishi tavsiya etilayotgan tayyor mahsulotlar, materiallar va butlovchi buyumlar roʻyxati toʻgʻrisida muntazam axborot berib borilishini taʼminlasinlar.

11. Quyidagilar oʻz kuchini yoʻqotgan deb hisoblansin:

Oʻzbekiston Respublikasi Prezidentining “2006—2008-yillarda mahalliy xomashyo negizida tayyor mahsulot, butlovchi buyumlar va materiallar ishlab chiqarishni mahalliylashtirish Dasturi toʻgʻrisida” 2006-yil 22-iyundagi PQ-386-son qarori;

Vazirlar Mahkamasining “2006—2008-yillarda mahalliy xomashyo negizida tayyor mahsulotlar, butlovchi buyumlar va materiallar ishlab chiqarishni mahalliylashtirish Dasturiga tuzatishlar kiritish toʻgʻrisida” 2007-yil 8-maydagi 93-son qarorining 1-bandi.

12. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.