O‘zbekiston Respublikasi Prezidentining “Toshkent shahri va Toshkent viloyatida yo‘lovchilar tashish xavfsizligini ta’minlashga doir qo‘shimcha chora-tadbirlar to‘g‘risida” 2006-yil 28-fevraldagi PQ-294-son qarorini bajarish yuzasidan, shuningdek aholiga yo‘lovchi tashish transportida transport xizmatlari ko‘rsatishni yanada takomillashtirish, yo‘lovchilar tashishda buyurtmachi va pudratchi funksiyalarini chegaralash maqsadida Vazirlar Mahkamasi qaror qiladi:

1. Toshkent viloyati hokimligining eksperiment tariqasida Toshkent viloyati hokimligining Yo‘lovchi transportining barcha turlari harakatini litsenziyalash va muvofiqlashtirish departamentini (keyingi o‘rinlarda Departament deb ataladi) tashkil etish to‘g‘risidagi taklifiga rozilik berilsin.

2. Quyidagilar Departamentning asosiy va ustuvor vazifalari etib belgilansin:

yo‘lovchi transportining barcha turlari harakatini muvofiqlashtirish, yo‘nalishlar tarmog‘ini tartibga solish va maqbullashtirish, shaharlarda va shaharlar atrofida yo‘lovchilar tashish faoliyatini litsenziyalash huquqi bilan yo‘lovchi tashish bo‘yicha buyurtmachi funksiyalarini bajarish, shuningdek Toshkent viloyati doirasida yo‘lovchilarni shaharlarda, shaharlar atrofida va shaharlararo tashish yo‘nalishlarini joylashtirish uchun ochiq tendyerlarni tashkil etish;

raqobat muhitini shakllantirish va barcha yo‘lovchi tashuvchilarning transport xizmatlari bozoriga kirishi uchun teng shart-sharoitlar yaratish, jamoat transporti ishi samaradorligini va natijadorligini baholash, yo‘lovchi tashish xavfsizligi normalari va qoidalariga rioya etilishini nazorat qilish;

Toshkent viloyati hokimligiga shahar avtobus va elektr transportida yo‘lovchilar tashishga cheklangan tariflarni belgilash to‘g‘risida moliya organlari bilan kelishilgan takliflar kiritish, ularga qat’iy rioya etilishini nazorat qilish;

yo‘lovchi tashish transporti subyektlari (taksidan tashqari) uchun chipta tizimini joriy etish, yo‘l chiptalarini, kartochkalarini, shuningdek amaldagi qonun hujjatlariga muvofiq fuqarolarning ayrim toifalariga transportda imtiyozli yurish huquqini beruvchi hujjatlarni tayyorlash;

Toshkent viloyati shaharlarida yo‘lovchi tashishni boshqarishning avtomatlashtirilgan tizimini joriy etish, shu jumladan yer usti yo‘lovchi transportida haq to‘lanishini hisobga olish va shahar yo‘lovchi tashish transporti yo‘nalishlarida nazorat tizimini avtomatlashtirish.

3. Quyidagilar:

Departament ijro etuvchi apparatining tuzilmasi 1-ilovaga muvofiq;

Toshkent viloyati hokimligining Yo‘lovchi transportining barcha turlari harakatini litsenziyalash va muvofiqlashtirish departamenti to‘g‘risidagi nizom 2-ilovaga muvofiq tasdiqlansin.

4. Quyidagilar Toshkent viloyati hokimligining Yo‘lovchi transportining barcha turlari harakatini litsenziyalash va muvofiqlashtirish departamenti faoliyatini moliyalashtirish manbalari etib belgilansin:

yo‘lovchi tashuvchilardan shahar yo‘lovchi tashish transporti obyektlari tomonidan ko‘rsatilayotgan xizmatlar va ulardan foydalanganlik uchun kontraktlarda nazarda tutilgan miqdorlarda tushadigan mablag‘lar;

litsenziyalar berilganligi uchun davlat bojining bir qismi, litsenziya berish to‘g‘risidagi arizalar ko‘rib chiqilganligi uchun yig‘imlar;

tender hujjatlari paketlarini sotib olganlik uchun yo‘lovchi tashuvchilardan tushadigan mablag‘lar;

qonun hujjatlarida taqiqlanmagan boshqa manbalar.

5. Shaharda va shahar atrofida yo‘lovchilar tashish uchun O‘zbekiston avtomobil va daryo transporti agentligining hududiy bo‘linmalari tomonidan berilgan litsenziyalar ularning muddati tugagunga qadar Toshkent viloyati doirasida ishlash uchun haqiqiydir.

6. Departament O‘zbekiston avtomobil va daryo transporti agentligi bilan kelishgan holda bir oy muddatda Toshkent viloyatida shaharlarda va shaharlar atrofida yo‘lovchilar tashishni litsenziyalash uchun litsenziya va litsenziya kartochkalari namunalarini tayyorlasin.

7. Quyidagilar:

“Toshviltrans” Toshkent viloyati yuk va yo‘lovchilar tashish hududiy uyushmasi qatnashchilari tomonidan uyushmani 3-ilovaga muvofiq qatnashchilar tarkibiga va tashkiliy tuzilmaga ega bo‘lgan “Toshviltransterminal” Toshkent viloyati avtomobilda yo‘lovchi va yuk tashuvchilar hamda avtoterminallar uyushmasi etib qayta tashkil etish to‘g‘risida qaror qabul qilinganligi;

Uyushma tarkibiga kiruvchi korxonalar va tashkilotlarning ixtiyoriy badallari hamda qonun hujjatlarida taqiqlanmagan boshqa manbalar uning ijro etuvchi apparati ta’minoti manbalari hisoblanishi;

quyidagilar:

bozor islohotlarini yanada chuqurlashtirishni ta’minlash, aholining yo‘lovchi va yuk tashish avtotransporti xizmatlariga bo‘lgan ehtiyojlarini qondirish, iqtisodiyot va aholiga barqaror avtotransport xizmatlari ko‘rsatish uchun shart-sharoitlar yaratish;

avtomobil transportining harakatdagi tarkibini yangilash, zamonaviy texnika va texnologiyani joriy etish, ta’mirlash bazasini rivojlantirish va modernizatsiya qilish, harakatdagi tarkibdan foydalanish samaradorligini oshirish bo‘yicha investitsiya loyihalarini shakllantirish va ro‘yobga chiqarish;

yuk va yo‘lovchilar tashish xavfsizligi, harakatdagi tarkibni texnik jihatdan soz holatda saqlash, avtotransport vositalarini texnik ko‘rikdan hamda haydovchilarni tibbiy ko‘rikdan o‘tkazish bo‘yicha talablarning uyushma qatnashchilari bo‘lgan korxonalar tomonidan bajarilishini ta’minlash;

transport korxonalari mol-mulki, shu jumladan avtotransport vositalari saqlanishi hamda ulardan maqsadli foydalanishi monitoringini olib borish;

yo‘lovchilarga xizmat ko‘rsatish madaniyati va sifatini oshirish, avtotransport xizmatlari servisini kengaytirish Uyushmaning asosiy vazifalari etib belgilanganligi ma’lumot uchun qabul qilinsin.

8. Toshkent viloyati hokimligi:

Departamentni tashkil etish va uning faoliyati bilan bog‘liq masalalar bir oy muddatda hal etilishini ta’minlasin;

2008-yildagi ishlar yakunlari bo‘yicha ushbu qarorning bajarilishi va eksperiment natijalari to‘g‘risida O‘zbekiston Respublikasi Vazirlar Mahkamasiga axborot bersin.

9. O‘zbekiston Respublikasi Hukumatining 4-ilovaga muvofiq ayrim qarorlariga o‘zgartirish va qo‘shimchalar kiritilsin.

10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari N.M. Xanov zimmasiga yuklansin.

1. Toshkent viloyati hokimligining Yo‘lovchi transportining barcha turlari harakatini litsenziyalash va muvofiqlashtirish departamenti (keyingi o‘rinlarda Departament deb ataladi) Toshkent viloyati hokimligining yo‘lovchilar tashish bo‘yicha faoliyatni litsenziyalash, yo‘lovchilar tashish transporti sohasidagi faoliyatni boshqarish va muvofiqlashtirish, marketing tadqiqotlarini tashkil etish hamda yo‘nalishlar va tarmoqlarni maqbullashtirish, yo‘lovchilar tashish bozorida yo‘lovchi tashuvchilarning erkin raqobati uchun shart-sharoitlar yaratish, yo‘lovchilar tashish xavfsizligini ta’minlagan holda ko‘rsatilayotgan xizmatlarning sifat standartlariga va yo‘nalishlarning ish jadvallariga rioya qilish, haydovchilar tarkibining transport vositalarini saqlashdan manfaatdorligini oshirish masalalarini hal qilish uchun vakolatli tarkibiy bo‘linmasi hisoblanadi.

Departament o‘z faoliyatida Toshkent viloyati hokimligiga hamda O‘zbekiston avtomobil va daryo transporti agentligiga hisob beradi.

2. Departament o‘z faoliyatini O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi Qonunchilik palatasi va Senati qarorlari va boshqa hujjatlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga hamda ushbu Nizomga muvofiq amalga oshiradi.

3. Departamentning to‘liq nomi:

davlat tilida — Toshkent viloyati hokimligining Yo‘lovchi transportining barcha turlari harakatini litsenziyalash va muvofiqlashtirish departamenti;

rus tilida — Departament po litsenzirovaniyu i koordinatsii dvijeniya vsex vidov passajirskogo transporta xokimiyata Tashkentskoy oblasti.

4. Departament yuridik shaxs hisoblanadi, alohida mulkka, mustaqil balansga, bank muassasalarida hisob raqamlariga, O‘zbekiston Respublikasi Davlat gerbi tasviri tushirilgan va o‘z nomi yozilgan muhrga, shtampga, ramzga va boshqa xizmat atributlariga, shuningdek o‘z faoliyati uchun zarur bo‘lgan rekvizitlarga ega bo‘ladi.

5. Departament o‘z majburiyatlari bo‘yicha o‘ziga tegishli barcha mulk bilan javob beradi.

6. Quyidagilar Departamentning asosiy vazifalari hisoblanadi:

yo‘lovchi tashish transporti barcha turlari harakatini muvofiqlashtirish, yo‘nalishlar tarmog‘ini tartibga solish va maqbul holga keltirish, Toshkent viloyati doirasida yo‘lovchilar tashish faoliyatiga litsenziyalar berish huquqiga ega bo‘lgan holda yo‘lovchi tashish bo‘yicha buyurtmachi funksiyalarini bajarish, shuningdek yo‘lovchilar tashish yo‘nalishlarini qat’iy tender asosida belgilash;

raqobat muhitini shakllantirish va barcha yo‘lovchi tashuvchilar transport xizmatlari bozorida teng sharoitlar yaratish, jamoat transporti ishi samaradorligi va natijasini baholash;

Toshkent viloyati hokimligiga shaharlar avtobus va elektr transportida yo‘lovchilar tashishga cheklangan tariflar belgilash bo‘yicha moliya organlari bilan kelishilgan takliflar kiritish va ularga rioya etilishini nazorat qilish;

yo‘lovchi tashish transporti subyektlari (taksidan tashqari) uchun chipta tizimini joriy etish, yo‘l chiptalarini, kartochkalarini, shuningdek amaldagi qonun hujjatlariga muvofiq fuqarolarning ayrim toifalariga transportda imtiyozli yurish huquqini beruvchi hujjatlarni tayyorlash;

Toshkent viloyati shaharlarida yo‘lovchilar tashishning avtomatlashtirilgan boshqaruv tizimini joriy etish, shu jumladan yerusti yo‘lovchi transportida yo‘l haqi to‘lash hisob-kitobi tizimini avtomatlashtirish va shaharlar yo‘lovchi tashish transporti harakat yo‘nalishlarida nazorat o‘rnatish.

7. Departament o‘ziga yuklangan vazifalarni bajarish uchun quyidagi funksiyalarni amalga oshiradi:

Toshkent viloyatida yo‘lovchi tashish transporti barcha turlari faoliyatini muvofiqlashtiradi;

yo‘lovchi tashishning yagona buyurtmachisi vazifasini bajaradi, yo‘lovchilar oqimi bo‘yicha marketing tadqiqotlari olib borish asosida viloyat ichidagi shahar, shahar atrofi va shaharlararo yo‘nalishlarning zarur miqdorini belgilaydi, yo‘nalishli va yengil avtomobil taksilarning maqbul soni bilan uzviy bog‘lagan holda asosiy yo‘lovchilar oqimlarini tartibga soladi, yo‘nalishlarni belgilangan tartibda tasdiqlaydi;

Toshkent viloyatida avtomobil transportida shaharlarda va shahar atrofida yo‘lovchilar tashish faoliyatiga litsenziya beradi;

Toshkent viloyatida yo‘lovchi transporti sohasida tashuvchilarning yo‘lovchilar hayoti, sog‘lig‘i va (yoki) mol-mulkiga zarar yetkazganlik uchun qonunda belgilangan o‘z fuqarolik javobgarligini majburiy sug‘urta qilish bo‘yicha majburiyati bajarilishini nazorat qilish;

Toshkent viloyati doirasida shaharlar, shahar atrofi va shaharlararo yo‘lovchi tashish yo‘nalishlarini joylashtirish bo‘yicha ochiq tendyerlar tashkil qiladi, tender g‘oliblari bilan yo‘nalishda yo‘lovchilar tashish bo‘yicha xizmatlar ko‘rsatish yuzasidan kontraktlar tuzadi;

Toshkent viloyatida yo‘lovchi tashish transportini rivojlantirish kompleks dasturlarini ishlab chiqishni tashkil etadi va ularning amalga oshirilishini nazorat qiladi;

yo‘lovchi tashuvchilarga yo‘lovchi terminallarining samarali faoliyat ko‘rsatishi va rivojlanishi, yagona tizim sifatida transport jarayoniga dispetcherlik rahbarligi hamda harakatdagi tarkib sig‘imidan samarali foydalanish, shuningdek yo‘lovchi, bagaj tashish norma va qoidalariga rioya qilish va yo‘lovchilarni tashish xavfsizligini ta’minlash bo‘yicha ko‘maklashadi;

xalqaro normalarni hisobga olgan holda yo‘lovchilar tashish faoliyatini tartibga solish standartlari, qoidalari, shakllari va metodlari bo‘yicha ma’lumotlarning yagona axborot bazasini shakllantiradi;

Toshkent viloyati hokimligi bilan birgalikda, moliya organlari hamda xususiylashtirilgan korxonalarga ko‘maklashish va raqobatni rivojlantirish hududiy boshqarmasi bilan kelishgan holda yo‘lovchi transportida yo‘l haqi tariflarini shakllantiradi;

yo‘lovchi transportining barcha turlari uchun (taksidan tashqari) yo‘l chiptalari, kartochkalari, shuningdek qonun hujjatlariga muvofiq fuqarolarning ayrim toifalariga avtobuslar va trolleybuslarda imtiyozli yurish huquqini beradigan hujjatlarning yagona shakllarini belgilangan tartibda ishlab chiqadi va tasdiqlaydi, yo‘l kartochkalari miqdori va turlarini, shuningdek yo‘l kartochkalarini tarqatuvchi korxonalar ro‘yxatini kelishadi;

harakatdagi tarkib parkini yangilash bo‘yicha loyihalarning texnik-iqtisodiy asoslashlarini ishlab chiqishda, xizmatning normativ amortizatsiya muddatida yuqori darajada faol foydalanishni hisobga olgan holda transport vositalarining o‘z xarajatlarini o‘zi qoplashi bo‘yicha prognoz hisob-kitoblarni amalga oshirishda yo‘lovchi tashuvchilarga metodologik va konsultativ yordam ko‘rsatadi;

yo‘lovchi tashuvchilarning belgilangan shakllar bo‘yicha hisobotlarini yig‘ish va umumlashtirishni, ular tomonidan shartnomaviy majburiyatlarning bajarilishini tashkil qiladi, yo‘lovchi tashuvchilarning transportdan foydalanish va moliya-xo‘jalik faoliyati ko‘rsatkichlarini kelishilgan shakllar va muddatlar bo‘yicha Toshkent viloyati hokimligiga hamda O‘zbekiston avtomobil va daryo transporti agentligiga tegishli hisobotlarni taqdim etadi.

8. Departament o‘ziga yuklangan vazifalar va funksiyalarni bajarish uchun quyidagi huquqlarga ega:

tender savdolari natijalari bo‘yicha tuzilgan kontraktlar shartlariga rioya etilishini nazorat qilish;

favqulodda vaziyatlarda, shuningdek xizmat ko‘rsatish huquqini yo‘qotgan bitta tashuvchidan yo‘nalishlarga xizmat ko‘rsatish huquqlarini tender asosida aniqlanadigan boshqa tashuvchiga berish o‘rtasidagi davrda ko‘rsatib o‘tilgan yo‘nalishlarga (tendersiz) to‘liq yoxud qisman xizmat ko‘rsatish huquqini vakolatli tashuvchilarga uch oydan ko‘p bo‘lmagan muddatga vaqtinchalik berish;

yo‘lovchi tashuvchiga aniqlangan qoida buzilishlarini bartaraf etish vazifasini yuklaydigan qarorlar chiqarish va ularni bartaraf etish muddatlarini belgilash;

transport vositalaridan foydalanish qoidalari buzilishida aybdor bo‘lgan shaxslarni qonun hujjatlarida nazarda tutilgan javobgarlikka tortish to‘g‘risida davlat tegishli organlariga takliflar kiritish.

Toshkent viloyatida yo‘lovchi transporti sohasida tashuvchilarning yo‘lovchilar hayoti, sog‘lig‘i va (yoki) mol-mulkiga zarar yetkazganlik uchun qonun hujjatlarida nazarda tutilgan o‘z fuqarolik javobgarligini majburiy sug‘urta qilish bo‘yicha majburiyati bajarilmaganligi uchun aybdor shaxslarni qonun hujjatlarida nazarda tutilgan javobgarlikka tortish haqida sud organlariga taqdimnomalar kiritish.

9. Departamentni O‘zbekiston avtomobil va daryo transporti agentligi taqdimnomasiga ko‘ra, O‘zbekiston Respublikasi Vazirlar Mahkamasi bilan kelishgan holda Toshkent viloyati hokimi tomonidan lavozimga tayinlanadigan va lavozimdan ozod qilinadigan boshliq boshqaradi. Boshliqning ikki nafar o‘rinbosari bo‘ladi, ularni boshliq Toshkent viloyati hokimi bilan kelishgan holda lavozimga tayinlaydi va lavozimdan ozod qiladi.

10. Departament boshlig‘i:

Departament faoliyatiga yakkaboshchilik asosida umumiy rahbarlik qiladi hamda Departamentga yuklangan vazifalar va funksiyalarning bajarilishi uchun shaxsan javob beradi;

zarurat bo‘lganda, Departamentning boshqaruv apparati tuzilmasiga tasdiqlangan xodimlar soni va ularning ta’minoti xarajatlari smetasi doirasida o‘zgartirishlar kiritadi;

Departament xodimlarini belgilangan tartibda lavozimga tayinlaydi va lavozimdan ozod qiladi.

Boshliq qonun hujjatlariga muvofiq boshqa vakolatlarni ham amalga oshiradi.

11. Departamentning bo‘limlari va xizmatlari o‘z faoliyatini Departament boshlig‘i tomonidan tasdiqlanadigan nizomlar va lavozim yo‘riqnomalariga muvofiq amalga oshiradi.

12. Departament Toshkent viloyati hokimligi bilan kelishgan holda Departament xodimlarining shtat jadvalini tasdiqlaydi, qonun hujjatlariga muvofiq xodimlarni moddiy rag‘batlantirish tizimi va shaklini belgilaydi.

13. Departament o‘ziga birkitilgan davlat mulkiga nisbatan qonun hujjatlarida belgilangan tartibda egalik qilish va foydalanish huquqlarini amalga oshiradi.

14. Quyidagilar Departament faoliyatini moliyalashtirish manbalari hisoblanadi:

yo‘lovchi tashuvchilardan shahar va shahar atrofi yo‘lovchi tashish transporti infratuzilmasi obyektlari tomonidan ko‘rsatiladigan xizmatlar va ulardan foydalanganlik uchun kontraktlarda nazarda tutilgan miqdorlardagi to‘lov hisobiga tushadigan mablag‘lar;

litsenziyalar berilganligi uchun davlat bojining bir qismi, litsenziya berish to‘g‘risidagi arizalar ko‘rib chiqilganligi uchun yig‘imlar;

tender hujjatlari paketlarini sotib olish uchun yo‘lovchi tashuvchilardan tushadigan mablag‘lar;

qonun hujjatlarida taqiqlanmagan boshqa tushumlar.

15. Departament o‘z faoliyati natijalarining tezkor va buxgalteriya hisobini amalga oshiradi, statistika hisobotini yuritadi.

Buxgalteriya va statistika ma’lumotlari ishonchli bo‘lishi hamda qonun hujjatlarida belgilangan hajmlarda, muddatlarda va shakllar bo‘yicha taqdim etilishi kerak.

16. Departament faoliyatini tekshirish qonun hujjatlariga muvofiq vakolatli organlar tomonidan amalga oshiriladi.

17. Departamentni qayta tashkil etish va tugatish qonun hujjatlarida belgilangan tartibda amalga oshiriladi.

1. Vazirlar Mahkamasining “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunini amalga oshirish chora-tadbirlari haqida” 2002-yil 28-iyundagi 236-son qarori (O‘zbekiston Respublikasi QT, 2002-yil, 6-son, 36-modda) bilan tasdiqlangan Faoliyatning ayrim turlarini litsenziyalovchi organlar ro‘yxatiga “O‘zbekiston avtomobil va daryo transporti agentligi” bo‘limidan keyin quyidagi mazmundagi bo‘limlar qo‘shilsin:

Toshkent shahrida yo‘lovchilarni avtomobil transportida shaharda tashish.

Toshkent viloyati doirasida yo‘lovchilarni avtomobil transportida shaharlarda va shaharlar atrofida tashish”.

2. Vazirlar Mahkamasining 2006-yil 14-iyuldagi 138-son qarori bilan tasdiqlangan Avtomobil transportida yo‘lovchilarni hamda yuklarni shaharda, shahar atrofida, shaharlararo va xalqaro yo‘nalishlar bo‘yicha tashish faoliyatini litsenziyalash to‘g‘risidagi nizomda (O‘zbekiston Respublikasi QT, 2006-yil, 7-son, 51-modda):

a) 3-band quyidagi tahrirda bayon qilinsin:

“3. Litsenziyalar berish, shuningdek qonun hujjatlarida belgilangan hollarda litsenziyalarning amal qilishini to‘xtatib turish, to‘xtatish va ularni bekor qilish to‘g‘risidagi qarorlar litsenziyalovchi organlar tomonidan:

O‘zbekiston Respublikasida yo‘lovchilar va yuklarni shaharlararo va xalqaro tashishlar bo‘yicha — O‘zbekiston avtomobil va daryo transporti agentligi (keyingi o‘rinlarda “Agentlik” deb yuritiladi) tomonidan;

yo‘lovchilar va yuklarni shaharda, shahar atrofida tashishlar bo‘yicha (Toshkent shahrida va Toshkent viloyati shaharlarida yo‘lovchilarni tashish bundan mustasno) — Agentlikning hududiy bo‘limlari tomonidan;

Toshkent shahrida yo‘lovchilarni shaharda tashish bo‘yicha — Toshkent shahar hokimligining Yo‘lovchilar tashish transportining barcha turlari harakatini litsenziyalash va muvofiqlashtirish departamenti (keyingi o‘rinlarda “Departament” deb yuritiladi) tomonidan;

Toshkent viloyati doirasida yo‘lovchilarni shaharda va shahar atrofida tashish bo‘yicha — Toshkent viloyati hokimligining Yo‘lovchilar tashish transportining barcha turlari harakatini litsenziyalash va muvofiqlashtirish departamenti (keyingi o‘rinlarda “Departament” deb yuritiladi) tomonidan qabul qilinadi.

Avtomobil transportida yo‘lovchilar va yuklarni shaharlararo va xalqaro tashishlarni amalga oshirishga litsenziyalar berish to‘g‘risidagi hujjatlarni ko‘rib chiqish uchun Agentlikda ekspert komissiyasi tashkil etiladi. Ekspert komissiyasining faoliyati Agentlik tomonidan tasdiqlangan nizomga muvofiq tashkil etiladi”;

b) 9-bandning “j” kichik bandi quyidagi tahrirda bayon qilinsin:

“j) tendyerlar natijalari bo‘yicha, vakolatli organlar bilan shartnoma asosida, shu jumladan Toshkent shahrida va Toshkent viloyati doirasida tegishli Departament bilan shartnoma asosida yo‘lovchilarni avtomobilda muntazam tashish (yo‘nalishli taksilardan tashqari)”.