Oʻzbekiston Respublikasi Vazirlar Mahkamasining “2007—2011-yillarda paxta tozalash sanoati korxonalarini modernizatsiya va rekonstruksiya qilish dasturi toʻgʻrisida” 2007-yil 3-apreldagi 70-son qarorini (Oʻzbekiston Respublikasi qonun hujjatlari toʻplami, 2007-y., 14-son, 143-modda) bajarish maqsadida, buyuraman:

1. Paxta tozalash sanoati korxonalarini modernizatsiya va rekonstruksiya qilish dasturini amalga oshirish uchun moʻljallangan mablagʻlarni Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi maxsus subhisob raqamida jamlash va ulardan foydalanish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilganidan soʻng oʻn kundan keyin kuchga kiradi.

Mazkur Nizom Oʻzbekiston Respublikasi Vazirlar Mahkamasining “2007—2011-yillarda paxta tozalash sanoati korxonalarini modernizatsiya va rekonstruksiya qilish dasturi toʻgʻrisida” 2007-yil 3-apreldagi 70-son qaroriga muvofiq (Oʻzbekiston Respublikasi qonun hujjatlari toʻplami, 2007-y., 14-son, 143-modda) 2007—2011-yillarda paxta tozalash sanoati korxonalarini modernizatsiya va rekonstruksiya qilish dasturini (keyingi oʻrinlarda matnda dastur deb yuritiladi) amalga oshirish uchun moʻljallangan mablagʻlarni Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi (keyingi oʻrinlarda matnda Jamgʻarma deb yuritiladi) maxsus subhisob raqamida jamlash va ulardan foydalanish tartibini belgilaydi.

1. Paxta tozalash sanoati korxonalari (keyingi oʻrinlarda matnda korxonalar deb yuritiladi) choraklik moliyaviy hisobot tuzilganidan soʻng 5 kun ichida “Paxtasanoat” hududiy aksiyadorlik birlashmalariga hisobot davrida paxtani qayta ishlashdan olingan mahsulotlarning sotilgan qiymatidan Jamgʻarmaning maxsus subhisob raqamiga hisoblangan bir foiz miqdoridagi ajratmalar summasi toʻgʻrisida maʼlumotni taqdim qiladi. Hisoblangan ajratma summalari korxonalarning “davr xarajatlari” sifatida ishlab chiqarish xarajatlariga taalluqli boʻladi.

2. Jamgʻarmaning maxsus subhisob raqamiga, shuningdek, belgilangan tartibda budjetga “Paxtasanoat” hududiy aksiyadorlik birlashmalarining ustav fondlaridagi aksiyalarning davlat ulushi boʻyicha kelib tushgan dividendlar ham oʻtkaziladi.

3. “Paxtasanoat” hududiy aksiyadorlik birlashmalari paxta mahsulotlarini sotib oluvchilardan pul mablagʻlarining kelib tushishi bilan, 23208 — “Jamgʻarma va Moliya vazirligi bilan kliring transaksiyalari” maxsus hisob raqamidan paxtani qayta ishlashdan olingan mahsulotlarning sotilgan qiymatidan bir foiz miqdoridagi ajratmalarni Jamgʻarmaning maxsus subhisob raqamiga oʻtkazadilar.

4. “Oʻzpaxtasanoat” uyushmasi tomonidan ishlab chiqilgan mablagʻlarning tushumi va ulardan foydalanish prognozi har yilning 1-sentabrigacha Oʻzbekiston Respublikasi Moliya vazirligiga taqdim qilinadi va mazkur prognoz 10 kunlik muddatda Moliya vazirligi tomonidan tasdiqlanadi.

5. “Oʻzpaxtasanoat” uyushmasi har yili belgilangan tartibda tasdiqlangan loyiha hujjatlariga asosan:

korxonalar tomonidan xoʻjalik yoʻli bilan, shuningdek pudrat yoʻli bilan amalga oshiriladigan ishlarning roʻyxatini aniqlash hamda tanlov asosida uskunalarni sotib olishni;

dasturga kiritilgan korxonalarni rekonstruksiya qilishga tanlov oʻtkazishni;

pudrat ishlarini bajarishga va uskunalarni xarid qilishga shartnomalar tuzishni;

korxonalarni modernizatsiya va rekonstruksiya qilishning aniq moʻljallangan roʻyxatini tasdiqlanishini tashkil qiladi.

6. Jamgʻarmaning maxsus subhisob raqamida jamlangan mablagʻlardan foydalanish uchun “Oʻzpaxtasanoat” uyushmasi zarur hisob-kitoblar va tegishli hujjatlarni (qurilishning aniq moʻljallangan va titul roʻyxati, buyurtmachi va pudratchi oʻrtasida tuzilgan shartnoma nusxasi, pudratchi tashkilotlarning qurilish tavakkalchiliklarini sugʻurtalash yuzasidan shartnomasi nusxasi, “Davarxitekqurilish” qoʻmitasining qurilish-montaj ishlarini bajarishga ruxsatini) ilova qilgan holda mablagʻ ajratish toʻgʻrisidagi talabnomani Moliya vazirligiga taqdim qiladi.

7. Mazkur Nizomning 6-bandida koʻrsatilgan hujjatlar toʻliq taqdim etilmaganda, Moliya vazirligi oʻn besh ish kunidan kechiktirmay “Oʻzpaxtasanoat” uyushmasiga mablagʻ ajratish boʻyicha asoslantirilgan rad javobini yuboradi.

8. Jamgʻarmaning maxsus subhisob raqamida jamlangan mablagʻlardan foydalanish Moliya vazirining mablagʻlarni oʻtkazish haqidagi buyrugʻiga asosan amalga oshiriladi. Mazkur buyruqda tegishli korxonaning “Paxta tozalash sanoati korxonalarini modernizatsiya va rekonstruksiya qilish” maxsus hisob raqamiga mablagʻlarni oʻtkazilishi muddati, summasi va maqsadli yoʻnalishi koʻrsatiladi.

9. Jamgʻarmaning maxsus subhisob raqamida jamlangan mablagʻlardan foydalanish obyekt qiymatining 70 foizidan koʻp boʻlmagan miqdorda amalga oshiriladi.

10. Uskunalarni yetkazib berish va ishlarni bajarishga avans berish uchun mablagʻlar belgilangan tartibda tuzilgan shartnomalar (kontraktlar) shartlaridan kelib chiqib oʻtkaziladi.

11. Obyekt qiymatining 50 foizigacha miqdorida avans berish Jamgʻarmaning maxsus subhisob raqamida jamlangan mablagʻlar hisobidan bir oy davomida amalga oshiriladi. Import qilinayotgan uskunalarni yetkazib berilishi uchun toʻlov hisob-kitoblarning akkreditiv shaklini qoʻllagan holda amalga oshiriladi.

12. Jamgʻarmaning maxsus subhisob raqamida jamlangan mablagʻlar hisobiga obyekt qabul qilingan kundan keyin bir oy ichida oʻn besh foiz toʻlov amalga oshiriladi, shartnomada qayd etilgan kafolat muddati tamom boʻlganidan keyin esa, toʻlovning qolgan qismi (besh foizgacha) amalga oshiriladi. Bunda obyekt qabul qilingandan keyin Jamgʻarmaning maxsus subhisob raqamida jamlangan mablagʻlar hisobidan toʻlovlar obyekt qiymatining oʻttiz foizidan kam boʻlmagan qismi modernizatsiya qilinayotgan korxona tomonidan oʻz mablagʻlari va tijorat banklari kreditlari hisobiga toʻliq moliyalashtirilganidan soʻng amalga oshiriladi.

13. Dastur tugallanganidan keyin, shuningdek, buyurtmachilar va pudratchilar oʻrtasidagi hisob-kitoblar yakunlanganidan soʻng, Jamgʻarmaning maxsus subhisob raqamida jamlangan mablagʻlarning qoldigʻi budjetga va “Paxtasanoat” hududiy aksiyadorlik birlashmalariga ulardan tushgan mablagʻlarning summasiga mos ravishda qaytariladi.

14. “Paxtasanoat” hududiy aksiyadorlik birlashmalari Jamgʻarmadan qaytarilgan mablagʻlarni korxonalar oʻrtasida, ulardan kelib tushgan summaga mos ravishda taqsimlaydilar va korxonalarning hisob-kitob raqamlariga oʻtkazadilar.

15. Korxonalarning “Paxta tozalash sanoati korxonalarini modernizatsiya va rekonstruksiya qilish” maxsus hisob raqamiga oʻtkazilgan mablagʻlar soliq solish obyekti hisoblanmaydi hamda soliq va soliq boʻlmagan majburiy toʻlovlar hisoblanadigan bazaga kiritilmaydi.

16. Jamgʻarmaning maxsus subhisob raqamiga paxtani qayta ishlashdan olingan mahsulotlarning sotilgan qiymatidan bir foizi miqdoridagi ajratmalarni oʻz vaqtida va toʻliq oʻtkazilishini nazorat qilish Jamgʻarmaning hududiy inspektorlari zimmasiga yuklatiladi.

17. Jamgʻarmaning maxsus subhisob raqamiga “Paxtasanoat” hududiy aksiyadorlik birlashmalari ustav fondlaridagi aksiyalarning davlat ulushi boʻyicha dividendlarni oʻz vaqtida va toʻliq oʻtkazilishini nazorat qilish Moliya vazirligi tomonidan amalga oshiriladi.

18. Korxonalarni modernizatsiya va rekonstruksiya qilish uchun ajratilgan mablagʻlardan maqsadli va samarali foydalanish ustidan nazorat Moliya vazirligining Nazorat-taftish bosh boshqarmasi tomonidan amalga oshiriladi.

19. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javobgar boʻladilar

20. Mazkur Nizom “Oʻzpaxtasanoat” uyushmasi bilan kelishilgan.