Oʻzbekiston Respublikasi Prezidentining “Kinematografiya sohasida boshqarishni takomillashtirish toʻgʻrisida” 2004-yil 16-martdagi PF–3407-son Farmoniga muvofiq hamda kinematografiya sohasidagi respublika va hududiy organlar faoliyatining samaradorligini taʼminlash, kino va video mahsulotlarini ishlab chiqarish, koʻpaytirish hamda namoyish etish tizimining moddiy-texnika bazasini mustahkamlash va rivojlantirish maqsadida Vazirlar Mahkamasi qaror qiladi:

1. Quyidagilar:

“Oʻzbekkino” Milliy agentligining tashkiliy tuzilmasi va hududiy boʻlimlarining namunaviy tuzilmalari 1, 3-ilovalarga;

“Oʻzbekkino” Milliy agentligining Nizomi 4-ilovaga muvofiq tasdiqlansin.

2. “Oʻzbekkino” Milliy agentligi markaziy apparati xodimlarining cheklangan umumiy soni 22 nafar, shu jumladan boshqaruv xodimlari soni 14 nafar etib belgilansin.

“Oʻzbekkino” Milliy agentligiga Agentlik bosh direktorining bir nafar oʻrinbosari va shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadigan besh kishidan iborat hayʼat boʻlishiga ruxsat berilsin.

“Oʻzbekkino” Milliy agentligiga Agentlik bosh direktorining ikki nafar oʻrinbosari, shu jumladan, bir nafar birinchi oʻrinbosar va shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadigan yetti kishidan iborat hayʼat boʻlishiga ruxsat berilsin.

3. “Oʻzbekkino” Milliy agentligi huquq va majburiyatlar boʻyicha “Oʻzbekkino” davlat-aksiyadorlik kompaniyasining huquqiy vorisi hisoblansin.

“Oʻzbekkino” Milliy agentligiga soha aksiyadorlik jamiyatlaridagi davlat aksiyalari paketlarini (ular belgilangan tartibda investitsiya aktivlarini ishonchli boshqaruvchilarga topshirilgunga qadar) boshqarish vakolati berilsin.

4. “Oʻzbekkino” Milliy agentligi:

mamlakatimizda yaratilayotgan badiiy va hujjatli kino-videofilmlarning maʼnaviy va badiiy saviyasini oshirish, milliy hamda umuminsoniy qadriyatlar va talablarni aks ettirish maqsadida professional yetuk, talabchan mutaxassislardan iborat Badiiy kengash tuzsin, uning Nizomini bir oy muddatda belgilangan tartibda tasdiqlasin;

hududiy boʻlimlar toʻgʻrisidagi namunaviy nizomni ikki hafta muddatda ishlab chiqsin va tasdiqlasin;

Davlat mulki qoʻmitasi bilan birgalikda “Oʻzbekkino” davlat-aksiyadorlik kompaniyasini “Oʻzbekkino” Milliy agentligi etib qayta tashkil qilish bilan bogʻliq boʻlgan tashkiliy va mulkiy masalalarni bir oy muddatda hal qilsin.

5. “Oʻzbekkino” Milliy agentligi uchun 2005-yildan boshlab quyidagi yillik ishlab chiqarish hajmlarining istiqbolli koʻrsatkichlari belgilansin:

15 ta toʻla metrajli badiiy kinofilm yaratish;

40 qismdan iborat 20 ta hujjatli va ilmiy-ommabop, 10 ta multiplikatsion kinofilm va 60 soatlik maʼnaviy-maʼrifiy, oʻquv-uslubiy videofilmlar ishlab chiqarish;

har bir yaratilgan badiiy kinofilmdan dubl-negativ tayyorlash va viloyatlarda keng namoyish etish uchun 15 nusxadan, jahon bozoriga chiqarish uchun chet tillardagi subtitrlar bilan 2 nusxadan koʻpaytirish.

“Oʻzbekkino” Milliy agentligi “Oʻzbekiston milliy teleradiokompaniyasi” kompaniyasi bilan hamkorlikda 2005-yildan boshlab qoʻshimcha ravishda oʻz daromadlari va homiylik mablagʻlarini jalb etgan holda, zamondoshlarimiz hayoti, ijtimoiy va maʼrifiy sohalarda amalga oshirilayotgan tub islohotlar toʻgʻrisida hikoya qiluvchi badiiy kino va videofilmlar, teleseriallar ishlab chiqarish va namoyish qilishni yoʻlga qoʻysin.

6. “Oʻzbekkino” Milliy agentligi Moliya vazirligi bilan birgalikda:

2004 va 2005-yillarda kino ishlab chiqaruvchi korxonalarning zamonaviy kinotexnologik jihozlarga boʻlgan ehtiyojlarini bir oy muddatda asoslangan hisob-kitobini qilib, zarur mablagʻlarning miqdori va moliyalashtirish manbalari toʻgʻrisida Vazirlar Mahkamasiga taklif kiritsin;

yillik ishlab chiqarish hajmlarini shakllantirish, moliyalashtirish hamda ajratilgan mablagʻlar maqsadli va samarali sarflanishini nazorat qilish tartibini bir oy muddatda ishlab chiqsin va belgilangan tartibda tasdiqlasin.

“Oʻzbekkino” Milliy agentligiga filmlar ishlab chiqarish uchun ajratilgan mablagʻlar doirasida ssenariy mualliflariga qalam haqi va ijodiy guruhning boshqa aʼzolariga mukofot miqdorini Moliya vazirligi bilan kelishgan holda belgilashga ruxsat berilsin.

7. Respublikadagi kinoteatrlarning faoliyati va mavjud holatini atroflicha oʻrganish maqsadida 5-ilovaga* muvofiq Maxsus komissiya tuzilsin.

Maxsus komissiya Qoraqalpogʻiston Respublikasi Vazirlar Kengashi raisining, viloyatlar va Toshkent shahar hokimlarining iqtisodiyot va ijtimoiy rivojlantirish masalalari boʻyicha oʻrinbosarlari, Davlat mulki qoʻmitasi va “Oʻzbekkino” Milliy agentligi hududiy boʻlimlari mutaxassislaridan iborat hududiy ishchi guruhlar tuzsin.

Hududiy ishchi guruhlar ikki oy muddatda:

mulkchilik shakllaridan qatʼi nazar, joylardagi barcha kinoteatrlardan maqsadli foydalanilishi, ularning moddiy-texnika bazasining holati va asosiy faoliyat turi boʻyicha ish yuritilishini inventarizatsiya qilsin;

mavjud kinoteatrlardan samarali foydalanish, xususiy tadbirkorlikni rivojlantirish negizida kinoprokat tizimini kengaytirish haqidagi takliflarni Maxsus komissiyaga taqdim etsin.

Maxsus komissiya bir oy muddatda kinoteatrlar tizimini rivojlantirishning aniq yoʻnaltirilgan dasturini ishlab chiqsin va Vazirlar Mahkamasiga kiritsin.

8. Oʻzbekiston Respublikasi Moliya vazirligi:

“Oʻzbekkino” milliy agentligining markaziy apparati xarajatlarini Oʻzbekiston Respublikasi respublika budjeti, hududiy boʻlimlarni mablagʻ bilan taʼminlashni Qoraqalpogʻiston Respublikasi budjeti, viloyatlar va Toshkent shahri mahalliy budjetlari hisobidan amalga oshirsin.

2004 va 2005-yillarda davlat budjetidan kinematografiya sohasini zamonaviy kinotexnologik jihozlar bilan taʼminlash uchun zarur boʻlgan mablagʻlar ajratsin;

2005-yildan boshlab yillik rejalashtirilgan kino va video mahsulotlarini ishlab chiqarish uchun respublika budjetidan belgilangan mablagʻlarni ajratishni koʻzda tutsin;

“Oʻzbekkino” Milliy agentligi markaziy apparati uchun uchta yengil avtomobil xarajatlariga limit ajratsin.

9. “Oʻzbekkino” Milliy agentligi markaziy apparati Toshkent shahar, Oʻzbekiston koʻchasi, 98-uyga joylashtirilsin.

10. Oʻzbekiston Respublikasi Vazirlar Mahkamasining “Oʻzbekiston Respublikasida tashqi savdo faoliyatini erkinlashtirish boʻyicha qoʻshimcha chora-tadbirlar toʻgʻrisida” 1998-yil 31-martdagi 137-son qaroriga 6-ilovaga muvofiq oʻzgartirishlar kiritilsin.

11. Oʻzbekiston Respublikasi Vazirlar Mahkamasining “Oʻzbekkino” davlat-aksionerlik kompaniyasini tashkil etish va uning faoliyati masalalari toʻgʻrisida” 1996-yil 12-iyuldagi 247-son qarori oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Oʻzbekiston Respublikasi Prezidentining davlat maslahatchisi X. Sultonov va Oʻzbekiston Respublikasi Bosh vazirining oʻrinbosari A. Azizxoʻjayev zimmasiga yuklansin.

1. “Oʻzbekkino” Milliy agentligi (keyingi oʻrinlarda agentlik deb yuritiladi) kino sanʼati, kino-videofaoliyatni amalga oshirish sohalaridagi vazifalarni hal etishga vakolatli boʻlgan davlat boshqaruv organi hisoblanadi.

Agentlik oʻz faoliyatida Vazirlar Mahkamasiga hisobot beradi.

2. Agentlik oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasining boshqa qonun hujjatlariga hamda mazkur Nizomga amal qiladi.

3. Agentlik oʻz faoliyatini davlat boshqaruvining boshqa organlari, mahalliy davlat hokimiyati organlari, jamoat birlashmalari va boshqa tashkilotlar bilan hamkorlikda amalga oshiradi.

4. Agentlik va uning hududiy boʻlimlari faoliyatining xarajatlari respublika budjeti va mahalliy budjetlarning agentlik va uning hududiy boʻlimlari uchun ajratilgan mablagʻlar doirasida, shuningdek, qonun hujjatlariga zid boʻlmagan boshqa manbalar hisobiga amalga oshiriladi.

5. Agentlik va uning hududiy tuzilmalari yuridik shaxslar hisoblanadilar, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.

6. Agentlikning asosiy vazifalari quyidagilardan iborat:

kino sanʼatining milliy madaniyatni rivojlantirish, jamiyat maʼnaviy hayotini yuksaltirishdagi oʻrni va ahamiyatini hisobga olgan holda, bu sohani umumbashariy va milliy qadriyatlar uygʻunligi asosida taraqqiy ettirishning ustuvor yoʻnalishlarini ishlab chiqish;

kino sanʼatida, kino-videofaoliyat sohasida davlat siyosatini amalga oshirish;

kinematografiya sohasida faoliyat koʻrsatayotgan, mulkchilik shaklidan qatʼi nazar, korxona va kinostudiyalarni, ijodiy jamoalarni qoʻllab-quvvatlash, ularning manfaatlarini himoya qilish, tadbirkorlik va raqobat muhitini rivojlantirish uchun qulay shart-sharoitlar yaratish;

milliy kino sanʼatining eng yaxshi anʼanalarini izchil davom ettirish va boyitish maqsadida iqtidorli yosh kinematografchilarni tarbiyalash, ularning ijodiy imkoniyatlarini roʻyobga chiqarishga koʻmaklashish;

Oʻzbekiston Respublikasi Davlat filmlar fondi faoliyatini bugungi kun talablari negizida tashkil etish;

kinofilmlar yaratish va ularni namoyish etish tizimini tanlovlar tashkil etish orqali takomillashtirish va qayta texnik jihozlash, aholiga kino-videoxizmat koʻrsatish darajasini oshirish;

mualliflik huquqlari himoyalangan kino va video mahsulotlarini noqonuniy ravishda respublika hududiga olib kirishga, ulardan foydalanish, ijaraga berish va tarqatishga qarshi zarur choralar koʻrish;

import va eksport qilinadigan kino va video mahsulotlariga ekspert bahosi berilishini amalga oshirish, respublika hududida kino va videofilmlar koʻrsatish va ulardan texnik jihatdan foydalanishning qoidalarini belgilash;

kinematografiya sohasida xalqaro hamkorlikni rivojlantirish, milliy kino mahsulotlarini jahon bozoriga olib chiqish, xorijiy kino ishlab chiqaruvchi tashkilot va kinoijodkorlar bilan aloqalarni kengaytirish, milliy kino sanʼatini xalqaro kinofestivallarda namoyish etish.

7. Agentlik oʻziga yuklatilgan vazifalarni bajarish uchun quyidagi funksiyalarni amalga oshiradi:

kino sanʼati, kino-videofaoliyatni amalga oshirish sohasidagi qonun hujjatlarining ijrosini taʼminlaydi;

tomoshabinlar talabini oʻrganadi, zamonaviy janr va mavzularda filmlar yaratishga koʻmaklashadi, milliy kino sanʼatining yuqori sifatga ega boʻlishi va xalqaro maydonga chiqishi uchun Oʻzbekiston kinoarboblari birlashmasi, yozuvchilar, rassomlar, bastakorlar, muhandis-texnik xodimlar, sportchilar, kaskadyerlar va boshqa kasb vakillarining saʼy-harakatlarini birlashtiradi;

yosh avlod ongida milliy gʻoya va milliy shuurni shakllantirish, zamondoshlarimizning mamlakatda amalga oshirilayotgan siyosiy, ilmiy va ijtimoiy islohotlardagi ishtirokini aks ettiradigan asarlar yaratishda ishtirok etadi;

qonun hujjatlarida belgilangan tartibda Vazirlar Mahkamasining litsenziyalash sohasidagi ishchi organi sifatida oʻz vazifasini bajaradi;

rivojlanib kelayotgan xususiy kino va videostudiyalarga zarur metodik va amaliy yordam koʻrsatadi, ularning mahsulotlarini respublika kino ekranlarida keng namoyish etilishiga koʻmaklashadi;

kinofilmlar ishlab chiqarish va ularni namoyish etish tizimini takomillashtirish choralarini koʻradi, bunda ijodiy jamoalar, kinoijodkorlar va turli mulk shaklidagi kinostudiyalar oʻrtasida film yaratish boʻyicha tanlovlar (tendyerlar) tashkil etadi;

kino tizimiga kiruvchi korxonalarni moddiy-texnika bazasini yangilanishiga koʻmaklashadi, sohani qayta texnik jihozlash dasturini ishlab chiqadi va amalga oshiradi;

respublika hududida kino va videofilmlar koʻrsatish va ulardan texnik jihatdan foydalanishning qoidalarini belgilaydi, xususiy prokat tizimini rivojlantirishga koʻmaklashadi;

Oʻzbekiston kinoarboblari uyushmasi apparati faoliyatini aʼzolik badallari, turli ijodiy uchrashuvlar va tadbirlar hisobidan taʼminlaydi;

kinematografiya sohasi uchun kadrlar tayyorlaydigan taʼlim muassasalari bilan doimiy hamkorlik oʻrnatadi, ularning oʻquv rejalari, dasturlari va mutaxassislarni oʻqitish jarayonini takomillashtirish boʻyicha takliflar kiritadi, tizim xodimlari uchun qisqa muddatli malaka oshirish oʻqishlari va seminarlar tashkil etadi;

mulkchilik shakli va idoraviy mansubligidan qatʼi nazar, kino-videofaoliyati bilan shugʻullanuvchi korxonalar va xususiy tadbirkorlar uchun teng sharoitlar yaratilishini, ularning manfaatlarini himoya qilinishini va xoʻjalik faoliyatiga noqonuniy aralashuvga yoʻl qoʻyilmaslikni taʼminlaydi;

kino va video mahsulotlarni ishlab chiqarish, koʻpaytirish, dublyaj qilish, prokat va namoyish etish hamda sotishga oid standartlash boʻyicha texnik-iqtisodiy siyosatni yuritadi;

kinofilmlarni yaratish, namoyish etish, agentlik korxonalarini moddiy-texnika bazasini yangilash uchun ajratilgan mablagʻlarning maqsadli va samarali sarflanishini taʼminlaydi;

kino-video prokat tizimini rivojlantirish, yaratilgan filmlarni video kasseta va boshqa turdagi manbalarga nusxasini koʻchirib tarqatish orqali agentlik korxonalarining qoʻshimcha mablagʻ manbalarini shakllantirishiga koʻmaklashadi;

Davlat filmlar fondi faoliyatini yuritish bilan bogʻliq dasturlarni ishlab chiqadi va amalga oshiradi;

xorijiy kinostudiya va telekanallarning Oʻzbekiston Respublikasi hududida badiiy kino va videofilmlarni suratga olish boʻyicha murojaatlarini oʻrganib, tegishli taklif va tavsiyalar beradi;

kino sanʼati sohasida xalqaro hamkorlikni rivojlantiradi, milliy kino mahsulotlarini jahon bozoriga olib chiqish uchun xalqaro kinoanjumanlar va kinofestivallarda faol ishtirok etadi, xorijiy kino ishlab chiqaruvchi tashkilot va kinoijodkorlar bilan muntazam aloqalar oʻrnatadi.

8. Agentlik oʻziga yuklangan vazifalar va funksiyalarni bevosita, shuningdek, oʻz hududiy tuzilmalari hamda oʻz tizimidagi tashkilotlar orqali hal qiladi.

9. Agentlik qonun hujjatlarida nazarda tutilgan boshqa funksiyalarni ham bajaradi.

10. Agentlik oʻziga yuklangan vazifalar va funksiyalarni bajarish uchun quyidagi huquqlarga ega:

qonun hujjatlarida nazarda tutilgan tartibda davlat boshqaruvi va boshqa organlar, muassasalar, tashkilotlar, mansabdor shaxslardan ularning kino-videofaoliyatiga doir zarur maʼlumotlar, hujjatlar va materiallarni soʻrab olish;

kino-videofaoliyatni amalga oshirish sohasidagi qonun hujjatlarining bajarilishini belgilangan tartibda nazorat qilish;

kinematografiya sohasiga doir qonun hujjatlarini takomillashtirish boʻyicha Vazirlar Mahkamasiga takliflar kiritish.

Agentlik Oʻzbekiston Respublikasi qonun hujjatlariga muvofiq boshqa huquqlarga ham ega boʻlishi mumkin.

11. Agentlik oʻz vakolatlari doirasida barcha vazirliklar, davlat qoʻmitalari, idoralar, joylardagi davlat hokimiyati organlari, tashkilotlar, muassasalar va korxonalar uchun bajarish lozim boʻlgan normativ-huquqiy hujjatlarni qabul qilishga haqlidir.

Agentlik zarur hollarda boshqa vazirlik, davlat qoʻmitalari va idoralar bilan birgalikda qoʻshma qarorlar va boshqa hujjatlarni qabul qilishga haqlidir.

12. Agentlik oʻziga yuklatilgan vazifalarning samarali bajarilishi uchun javobgardir.

13. Agentlikni qonun hujjatlarida belgilangan tartibda lavozimga tayinlanadigan va lavozimdan ozod qilinadigan bosh direktor boshqaradi.

Bosh direktorning bir nafar oʻrinbosari boʻladi.

Bosh direktor oʻz maqomiga koʻra vazirga, bosh direktorning oʻrinbosari vazirning oʻrinbosariga tenglashtiriladi.

14. Bosh direktor:

Agentlik faoliyatiga yakka tartib asosida umumiy rahbarlikni amalga oshiradi va agentlikka yuklangan vazifalar va funksiyalarning bajarilishi uchun shaxsan javob beradi;

Bosh direktor oʻrinbosarlarining vakolatlarini belgilaydi va ular oʻrtasida vazifalarni taqsimlaydi, agentlik tizimidagi boshqa mansabdor shaxslarning vakolatlarini va masʼullik darajasini belgilaydi;

agentlik tizimi xodimlari tomonidan bajarilishi lozim boʻlgan buyruqlar chiqaradi hamda ularning ijrosini nazorat qiladi;

belgilangan xodimlar cheklangan soni va mehnatga haq toʻlash fondi doirasida agentlik markaziy apparati tuzilmasiga oʻzgartishlar kiritadi, shtatlar jadvalini, agentlik markaziy apparati va uning hududiy boʻlimlari xarajatlari smetasini tasdiqlaydi;

belgilangan tartibda agentlikning tarkibiy va hududiy boʻlimlari nizomlarini tasdiqlaydi;

belgilangan tartibda agentlik markaziy apparati xodimlarini, hududiy boʻlim rahbarlarini lavozimiga tayinlaydi va vazifasidan ozod qiladi.

Bosh direktor qonun hujjatlariga muvofiq boshqa vakolatlarni amalga oshiradi.

15. Agentlikda boshliq (hayʼat raisi), uning oʻrinbosarlari (lavozimiga koʻra), shuningdek Agentlik faoliyatining asosiy yoʻnalishlarini muvofiqlashtiruvchi tarkibiy boʻlinmalari rahbarlaridan iborat tarkibda hayʼat tashkil etiladi.

Hayʼatning aʼzolari soni va shaxsiy tarkibi Boshliqning taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat quyidagilar bilan bogʻliq masalalarni koʻrib chiqadi:

Agentlik faoliyatining kino sanʼatining jamiyat maʼnaviy hayotini yuksaltirishdagi oʻrni va ahamiyatini hisobga olgan holda, bu sohani umumbashariy va milliy qadriyatlar uygʻunligi asosida taraqqiy ettirishning ustuvor yoʻnalishlarini ishlab chiqish boʻyicha ushbu Nizomda belgilangan asosiy yoʻnalishlarini tayyorlash va amalga oshirish;

“Oʻzbekkino” milliy agentligi nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini taʼminlash uchun Agentlik rahbarlari va xodimlarining shaxsiy javobgarligini oshirish.

Hayʼat Agentlik vakolatiga taalluqli boshqa masalalarni ham koʻrib chiqish huquqiga ega.

Hayʼat majlisiga Agentlik vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar rahbarlari taklif etilishi mumkin.

Hayʼat uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hayʼat qarorlari bosh direktorning buyruqlari bilan amalga oshiriladi. Bosh direktor va hayʼat aʼzolari oʻrtasida kelishmovchiliklar mavjud boʻlgan taqdirda bosh direktor paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Oʻzbekiston Respublikasi Vazirlar Mahkamasiga xabar qilishlari mumkin.

Hayʼat faoliyati tartibi uning hayʼat tasdiqlaydigan reglamentida belgilanadi.

16. Agentlikda doimo faoliyat yurituvchi professional yetuk, talabchan mutaxassislardan iborat Badiiy kengash tuziladi va uning Nizomi belgilangan tartibda tasdiqlanadi. Badiiy kengashning asosiy vazifalari quyidagilardan iborat:

mamlakatimizda yaratilayotgan badiiy va hujjatli kino-videofilmlar maʼnaviy va badiiy saviyasini oshirish, milliy hamda umuminsoniy qadriyatlar va talablarni aks ettirish;

import va eksport qilinadigan kino va video mahsulotlariga ekspert bahosi berilishini taʼminlash.

17. Agentlikning hududiy tuzilmalari agentlik tarafidan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan oʻzaro kelishilgan holda tasdiqlangan nizomlar asosida mustaqil yuridik shaxs sifatida faoliyat yuritadi.

Agentlik hududiy tuzilmalari rahbarlari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishilgan holda, bosh direktor tomonidan lavozimga tayinlanadi va lavozimdan ozod etiladi.

18. Agentlik oʻz faoliyatida hisobotni belgilangan tartibda yuritadi.

19. Agentlik davlat budjeti hisobidan ajratilgan budjet mablagʻlarining uning tizimiga kiruvchi korxonalar tomonidan samarali va maqsadli ishlatilishi boʻyicha nazorat yuritadi va har chorakda Moliya vazirligiga hisobot beradi.

20. Agentlik moliyaviy faoliyatining nazorati oʻrnatilgan tartibda Oʻzbekiston Respublikasi Moliya vazirligining Bosh nazorat-taftish boshqarmasi va uning hududiy boʻlimlari tomonidan amalga oshiriladi.

Qarorga 2-ilovada:

1. 2-banddagi “Kino, video va” soʻzlari chiqarib tashlansin.

2. Quyidagi tahrirda 8-band bilan toʻldirilsin:

“8. “Kino, video mahsulotlarini importi va eksporti — “Oʻzbekkino” Milliy agentligi”.